ھامىلىدارلىقنىڭ ئاخىرقى مەزگىلىدىكى بەل ئاغرىقى
يانفوندا كۆرۈش
ھامىلىدارلىقنىڭ ئاخىرقى مەزگىلىدە بەزى ھامىلىدار ئاياللار بەل قىسمىنىڭ ئاغرىۋاتقانلىقىنى ھېس قىلىدۇ. بۇ يەڭگىش مەزگىلىنىڭ يېقىنلىشىشىغا ئەگىشىپ، ھامىلىدار ئاياللارنىڭ قورساق قىسمىنىڭ ئالدىغا كۆپۈپ چىقىپ، بەدەننىڭ ئېغىرلىق مەركىزىنى ئالدىغا يۆتكىلىۋاتقانلىقىنىڭ نەتىجىسىدۇر. بەدەننىڭ تەڭپۇڭلۇقىنى ساقلاش ئۈچۈن، ئۆرە تۇرغان ۋە يول ماڭغاندا ئىككى پۇتنى ئايرىپ، يۇقىرىقى بەدەننى كەينىگە تارتىپ مېڭىش كېرەك، بۇنداق قىلغاندا دۈمبە ۋە بەل قىسىملاردىكى مۇسكۇللارنىڭ دائىم جىددىي ھالەتتە تۇرۇشىغا كاپالەتلىك قىلغىلى بولىدۇ. ئۇنىڭدىن باشقا ھامىلىدارلىق مەزگىلىدە ئومۇرتقا، بوغۇملارنىڭ بوشىشىپ كېتىشى، بالىياتقۇنىڭ يوغىناپ بەل قىسمىدىكى نېرۋىلارنى بېسىشىدىن بەل ئاغرىش كېلىپ چىقىدۇ.
بەل ئاغرىقىنىڭ ئالدىنى ئېلىش ۋە ئۇنى پەسەيتىش ئۈچۈن، ھامىلىدارلىقنىڭ دەسلەپكى باسقۇچىدا سەيلە قىلىش قاتارلىق مۇۋاپىق ھەرىكەتلەرنى داۋاملاشتۇرۇپ، بەل قىسمىنىڭ ئېلاستىكلىقىنى ئاشۇرۇش، ئۇنىڭدىن باشقا سوغۇق ئۆتۈپ قېلىشنىڭ ئالدىنى ئېلىش، قاتتىق كارىۋاتتا ئۇخلاش، يەڭگىل كىيىنىپ، پاشنىسىز يۇمشاق ئاياغ بىلەن يول يۈرۈش، يەنە قىسمەن ئورۇنلارنى ئۇۋۇلاپ بېرىش، چوقۇم ئېغىر نەرسە كۆتۈرۈپ سېلىشتىن، ئۇزۇن مۇددەت مەلۇم خىل بەدەن ھالىتىنى ساقلاش، ياكى بەل قىسمىغا سوغۇق ئۆتۈپ قېلىشتىن ساقلىنىش لازىم.