ئەسسالامۇ ئەلەيكۇم ئەزىزلەر!
مەن بۇ مۇنبەرنىڭ يېڭى بىر ئەزاسى بولۇش سۈپىتىم بىلەن ئۆزۈمنىڭ بارلىق ئەسەرلىرىمنى سىزلەرگە سۇندۇم.  مەن پەقەت ئەدەبىيات ھېرىسمەنى.
تەكلىپ ۋە تەنقىدىي پىكىرلەر بولسا كۆپلەپ بېرىشىڭىزلەرنى ئۈمىد قىلىمەن.


گۇناھ ئىشلارنىڭ تۈرلىرى كۆپ. بۇنىڭ ئىچىدىكى ئەڭ يامىنى ئۆزىنى دالدىغا ئېلىۋېلىشتۇر. بەك چوڭ ئىشلار بولمىسا، بەك زور تەسىرى بولماسلىقى مۇمكىن، لېكىن چوڭراق ئىشلار چىقىپ قالسا، ئاخىرىنى يىغىشتۇرغىلى بولمايدىغان  پاجىئەلەرمۇ يۈز بېرىدۇ. ئۇ ۋاقىتتا  ھېچكىم ھېچكىمنى قانات ئاستىغا ئېلىپ بولالماسلىقى مۇمكىن. پەقەت بۇنىڭ ئىگىسى شۇ خاتالىق ئۆتكۈزگۈچىنىڭ ئۆزىدۇر.  گۇناھىنى تونۇش ئەڭ ياخشى. تونىماسلىق يامان ئىللەتتۇر ھەم يوقىتىشتۇر.

مەن بۈگۈن توي قىلىمەن. بۇ خۇشاللىق مېنىلا ئەمەس پۈتۈن ئائىلەمدىكىلەرنى خۇشال قىلدى.
ھازىر مەن توي گىرىمى قىلدۇرۋاتىمەن. مەن بۈگۈن تېخىمۇ چىرايلىق بولۇپ كەتتىم.  ئەسلىدىمۇ  قونچاقتەك قىز بالا ئىدىم.  ھەممىسىنىڭ مەسلىكى كىلەتتى. مەيلى گىرىم قىلىۋاتقانلار بولسۇن، مەيلى  گىرىم قىلدۇرىۋاتقانلار بولسۇن، مەيلى دوستلىرىم بولسۇن ئاغزى ئاغزىغا تەگمەي مېنى ماختاۋاتاتتى.
_ئاداش بۈگۈن بەك چىرايلىق بولۇپ كەتتىڭ جۇمۇ. ھېلى يىگىتىڭ تونىيالماي قالىدىغان بولدى دە.
_ يىگىتىڭ دەيسەنغۇ، ئەتىگەن نىكاھ ئوقۇلدى ئېرىڭ دىمەمسەن ... ھەممەيلەن پاراققىدە كۈلۈشتى. مەنمۇ كۈلدۈم. مەن ھەقىقەتەن خۇشال بولغان ئىدىم. بۇ خوشلىقىمنىڭ بۇنچە قىسقا بولدىغانلىقىنى مەن خىيالىمغىمۇ كەلتۈرمىگەن ئىدىم. بۈگۈن تويۇم بولدى، مېنىڭچە ھاياتىمدىكى ئەڭ ئەشەددىي بولغان قاباھەتلىك چۈشۈم باشلاندى.
بىز ياسىنىشىپ دېگەندەك ئىشلىرىمىزنى تۈگىتىشىپ، قىز ئولتۇرۇشى بولىۋاتقان رېستۇرانغا كەلدۇق.
ئاپام-داداملار، باشقا ئۇرۇق-تۇغقانلار ھەممىسى مېھمانلارنى كۈتىۋاتاتتى. ھەممىسى مېنىڭ تويۇمغا تەنتەنە قىلىۋاتاتتى. لېكىن ئاشۇ بىچارە ئاپامغىلا  بىر تال قىزنى ياتلىق قىلىشى سەل ئېغىر كەلدى. بۈگۈندىن باشلاپ مېنى تالالىق قىلىپ خەققە تۇتقۇزىدۇ.  ئاپام كۈلەلمىدى. كۆز چاناقلىرىدا ياشلار ئەگىپ تۇراتتى. ئاپامنىڭ يېنىدا تۇرغان قولداش خوتۇنلار :- خۇش بولۇڭ، زۈمرەتخان، خۇش بولۇڭ، پەرھىز ئادا قىلىندى دەپ ئاپامغا تەسەللىي بېرىۋاتاتتى.  گىرىمخانىدا خۇشال يېنىپ كەلگەن مەن ئەمدى يىغامنى توختىتالمىدىم. مەن ئۇلاردىن بۈگۈندىن باشلاپ ئايرىلىدىكەنمەن. مەن بۇنى بۇرۇن ھېس قىلماپتىكەنمەن. مانا مۇشۇ دەقىقىلەردە ھېس قىلىۋاتىمەن. مەن ئەمدى بۇلارنىڭ ئەمەس ئىكەنمەن. ئۆزۈمنى خۇددى ئاتا-ئانىسى مەجبۇرىي باققۇسى كەلمەي، خەققە بېرىۋېتىلگەن 3-4 ياشلىق بالىدەك ھېس قىلىۋاتىمەن.  لېكىن مەن كىچىك بالا ئەمەس، شۇنداق بولسىمۇ مەن ئەمدى ئۇلارغا ئەركىلەلمەيدىغان بولدۇم،  ئۇلارغا قىيدىيالمايدىغان بولدۇم، ئاپامنى كۆپ قاخشىتىپتىمەن. دادامنى نۇرغۇن قېتىم ئۇھسىندۇرۇپتىمەن. بالا  باققانغا راستىنلا تويغۇزغان ئوخشايمەن. نەچچە ۋاقىتتىن قىلچىمۇ بۇنداق ئويلىمايدىغان ئادەم بۈگۈن ھەممىنى ئويلاپ يەتكەندەك بولدۇم. ئەمدى سىلەرنىڭ ئىشىڭلارنى قىلاي دېسەممۇ  قىلالمىغۇدەكمەن، چوڭلارنىڭ قىز بېقىپ نېمەڭ قالدى دېسە، بىر چېلەك يۇندىسى دېگىنى شۇ ئىكەن. بۇ گەپنىڭ تېگىگىمۇ ئەمدى تېخىمۇ بەك يەتكەندەك قىلدىم. ھەممە ئادەم بېشىغا كەلگەندە بىلىدىكەن. باشقىلار مېنىڭ تويۇمغا توي قوشماقتا ئىدى. مەن بولسام قەلبىمدە ماتەم تۇتماقتىمەن. خەقلەر تويۇڭدا مەجبۇرىي يىغلايسەن دېسە ئۇنىمۇ بىلمەپتىكەنمەن. مەجبۇرىي ئەمەسكەن. ئىچى-ئىچىدىن چىققان پۇشايمان، ئۆكۈنۈش، ئاچچىق ھەسرەت، ئايرىلىش ئازابى ئۈچۈن يىغلايدىكەن. يىغلىمايمەن دېگەنگە ئۇنىماي چىقىدىغان توي يىغىسى ئىكەن.
_يىگىتلەر كەلدى،  قىزنىڭ يۈزىنى يېپىڭلار دېدى بىر  دوستۇم ئالدىراش كىلىپ.
_تېز ، تېز ، قىزلار قۇچقاچلاردەك چۇرقىرىشىپ كەتتى. ئۇلار مېنى ئوڭشاپ قويدى.
يىگىتلەر كىردى.
-يىگىتىمىز نېمانچە قاملاشقان بۈگۈن دېدى  قىز بېشى.
_ قىز تېخىمۇ چىرايلىق بولغاچقا ئېلىپ كەتكۈلى كەلدۇققۇ  دېدى يىگىتلەرنىڭ بېشى.
_ئۇنداق ئاسان ئېلىپ كېتىدىغان قىز نەدىكەن  دەيسىز، تۆش بېرىسىز تۆش.
_ قىزلار  تۆش ئالمىغۇچە قىز بەرمەيمىز شۇنداققۇ .....
_ بىز تۆشنىمۇ بەرمەيمىز،  قىزنىمۇ ئېلىپ كېتىمىز قانداق دېدىم يىگىتلەر  دېدى يىگىت بېشى.
گارمونچى مۇزىكىسىنى تېخىمۇ كۈچلۈك چېلىپ، ئۈنلۈك ئېيتىشقا باشلىدى. ھەممەيلەن توي شادلىقىغا چۆمۈلگەن ئىدى. لېكىن مەن ئېچىلالمىدىم. ئاپامنىڭ سىماسى ئالدىمدا. مەن ئۇنىڭغا قىيالمىغۇدەكمەن. قانداقمۇ مېڭىپ چىقىپ كېتەرلەرمەن بۇ يەردىن....
بىز ھەممىمىز  دادام-ئاپاملارنىڭ ئالدىغا ئاستا مېڭىپ كەلدۇق.  چوڭلار مېنىڭ ئۆمۈرلۈك يولدىشىم دەپ قارالغان مەردان بىلەن  ئىككىمىزنىڭ بېشىدىن نان تۇزلارنى ئۆردى. ھەممەيلەن رازىلىق دۇئالىرىنى بېرىشتى.
مەردان  مېنى تارتىپ ماڭدى. كەينىمگە قانداق ئۆرۈلگىنىمنى بىلمەيمەن ئاپامغا ئېسىلىپ  ھۈڭرەپ يىغلىدىم.
ھەممەيلەن :- بولدى قىزىم بولدى، تېز مېڭىڭ،  تېز مېڭىڭ. 
زۈمرەتخان بولدى قىلسىلا،  يولدىن قويمىسىلا...
مەن كەتتىم. ئىچىمدە :- ئاپا ، دادا،  مەندىن رازى بولۇڭلار  دىدىم.
مۇزىكا ئىچىدە  بىز كەتتۇق.
كەچتە ئوغۇل تەرەپتىمۇ توي شۇنداق ياخشى بولدى. توي قىزىپ خىلى ئەۋىجگە چىققان ئىدى. بىر  ۋاقىتتا  تويۇقسىز  بىر تۇنۇش چىراينى كۆرۈپ قالدىم. كۆزۈمگە ئىشەنمىگەندەك يەنە بىر ئىزلەپ قارىدىم. يۈرۈكۈم قارتتىدە قىلدى. يۈرىكىم ئېغىشى تېنىمنى شۈركەندۈرۋەتتى. ئۇ تونۇش چىراي يەنە  يوقاپ كەتتى. ئىچىمدە:- خىيالىمكەندە، دېدىم دە، كۆڭلۈمدە ۋاقىت  ھېسابلىدىم، 12 يىل، بۇ يىل 12- يىلى ئىكەن. ئۇ تۈرمىدىن چىققانمىدۇ؟ يەنە ئەنسىز ئەتراپقا قارىدىم. يېنىمدىكى قولداش مەندىن:- ئاداش، ساۋاقداشلىرىڭ كەپتىمۇ، ئەجەپ قاراپ كەتتىڭغۇ؟
_ ھە، ياق ، ھە .... مەن كىكەچلەپ كەتتىم يەنە:- شۇنداق بىر ساۋاقدىشىمنى ئوخشىتىپ قالدىم. ئەمەستەك قىلىدۇ.
_زۇلپىيە، يۈر، تازىلىق  ئۆيىگە كىرىپ چىقايلىچۇ مەن قولداشنىڭ قۇلىقىغا بوش ئاۋازدا دېدىم. رېستۇران ئىچى مۇزىكىدا، ئۇسسۇل-ناخشىلاردا قىزىپ، قايناپ كەتكەن ئىدى. مەن مەردانغا سىرتقا چىقىدىغانلىقىم توغرىسىدا ئىشارەت قىلدى. ئۇمۇ باش لىڭشىتىپ قويدى.
مەن قولدىشىم بىلەن تازىلىق ئۆيى تەرەپكە ماڭدىم. راستىنلا شۇ ئوخشىمامدۇ؟ ئۇ ئاۋۇ يەردە تۇرامدۇ قانداق؟ 
مەن دەرھال كىرىپ كەتمەكچى بولغان ئىدىم. ئۇ كەينىنى قىلىپ تۇرۇپ:- قانداق، ئويلىمىغان بولغىيىتىڭىز نازاكەت.
مەن جايىمدا قېتىپ تۇرۇپلا قالدىم. بۇ دەل ھېلىقى ئاۋاز. مەن ئەڭ يىرگىنىدىغان ھېلىقى ئاۋاز. سەن كىىرپ تۇرغىن زۇلپىيە، مەن كەينىڭدىن كىرىمەن دېدىم.
زۇلپىيە كىرىپ كەتتى. ئۇ مېنىڭ يېنىمغا كىلىپ:- قانجۇق، مەن چىقتىم. ئويلىمىغان بولغىيىدىڭ، بۈگۈنكىدەك بەختلىك كۈنلىرىڭدە پەيدا بولۇشۇمنى ھە! مەن ئەمدى سېنى كۈندە يوقلاپ تۇرىمەن. مۇشۇنى ساڭا ئەسكەرتىپ قويماقچىمەن. سەن ئەمدى مېنىڭكىگە كۆنىسەن، كۆنمەيدىكەنسەن، مەن سېنىڭ بۇرۇنقى ئىشلىرىڭنى خەلقى-ئالەم ئالدىدا يەر بىلەن يەكسان قىلىۋېتىمەن دېدى_ دە، يەنە:- بۈگۈن ھەقىقەتەن چىرايلىق بولۇپ كېتىپسەن، دېدى ئۇ ئاغزىنى بوينۇمنىڭ يېنىغا يېقىن كەلتۈرۈپ، بەك خۇشپۇراق دېدى ئۇ ئەسەبىيلەرچە، مەن دەرھال ئۇنى ئىتتىرىۋەتتىم. ئاڭغىچە زۇلپىيە چىقتى.
مەۋلان:- ساۋاقداشلار سالىمىنى يەتكۈزدى دېدى زۇلپىيەگە يالغان كۈلۈمسىرىدى. ئۇ زالغا كىرىپ كەتتى.
زۇلپىيە:- ئاداش نېمانداق ئۇزۇن تۇرۇپ قالدىڭ.
مەنجاۋاب بەرمەيلا تازىلىق ئۆيىگە كىردىم. ئەينەككە قارىدىم. مېنى قاتتىق ۋەھىمە بېسىۋالدى. يۈرەكلىرىم ئەنسىزلىكتىن سوقۇش سۈرئىتى تېزلىشىپ كەتكەن ئىدى. _ئۇ نېمىشقا مېنى يوقلايدۇ، بۇ قانداق گەپ دېدىم ئۆز-ئۆزۈمگە، يەنە:-مېنىڭمۇ يولدىشىم بار بولدى. ئۇ قۇرۇق گەپ قىلىۋاتىدۇ دەيتتىم. ئۆزۈمگە شۇنداق ئىشەنگەندەك گەپلەر بىلەن تەسەللىي بېرىۋاتقان بولساممۇ لېكىن مەن ھەقىقەتەن قورقۋاتقان ئىدىم. :- بۇ تويدا ئۇ نېمە قىلىدۇ. بۇ يەردە تونۇشى بارمۇ يە؟ قەستەن مېنى سۈرۈشتۈرۈپ كەلدىمۇ يە؟ بىرەر ئۇرۇق-تۇغقىنىمۇ يە؟ قورقۇنۇش چىرايىمغا چىقىپ كەتكەن ئىدى. زۇلپىيە كەينىمدىن كىردى:- ئاداش ساڭا بىرەر ئىش بولمىغاندۇ؟
_ ياق، زۇلپىيە.  مەن سەل چارچاپ قالغان ئوخشايمەن. يۈر چىقايلى دەپ ئۇنىڭ بىلەن بىرگە چىقتىم. ئۇ كەينىمدىن كۆينەكلىرىمنى تۈزەشتۈرۈپ چىقتى.
جايىمىزغا كىلىپ ئولتۇردۇق. مەردان:- نېمانچە ئۇزۇندا چىقىسىلەر، ئىچكىردىن كەلگەن ساۋاقداشلار بىر گە سۈرەتكە چۈشىۋالمىز دېگەن ئىدى سىز يوق بولۇپ قالدىڭىز دېدى.
_تازىلىق ئۆيىدە ئادەم كۆپكەن. شۇڭا  دېدىم سەل تارتىنىپ. مانا مېنىڭ يالغانچىلىقىم ھازىردىن باشلانغان بولدى. مەن بۇ ئۆمۈرلۈك ھەمراھىم بولغان كىشىگە يالغان سۆزلەشنى باشلىۋەتكەن بولدۇم. لېكىن ئۇ بۇنى بىلمەيتتى.
توي يەنە ئۆز يوسۇنىدا قىزغىن كەيپىياتتا ئىدى.
مەن غىل-پال ئۇنى كۆرۈپ قالاتتىم. بىر  ھازدىن كېيىن مەۋلان ئۇدۇل مەن تەرەپكە كىلىۋاتاتتى. مەن بېشىمنى تۆۋەن سېلىپ كۆزۈمنى يۇمىلۋالدىم.
_ ئاكا، بۇياققا  كەل سۈرەتكە  چۈشىۋالايلى، ئەتىگەندىن چۈشەلمىگەن ئىدۇق دېدى مەردان بىراۋغا.
مەن بېشىمنى كۆتۈردۈم. كۆزۈم ھەيرانلىقتا يوغىراپ چىقىپ كېتەيلا دەپ قالغان ئىدى« مەۋلان، ئاكىسى، مەن ئەجەپ....»
-قانداقراق ئۇكا، بۈگۈن ساڭا  قۇت كۈن جۇمۇ، مۇبارەك بولسۇن،  بېشىڭلار باش، ئايغىڭلار تاش بولۇپكەتسۇن دېدى بىزنىڭ كەينىمىزگە ئۆتكەچ. ئۇ ئىككىمىزنىڭ ئورۇندۇقى كەينىگە تۇردى. لېكىن قولىدا بىلىندۈرمەي مېنىڭ دۈمبەمنى سىلىۋاتاتتى.
مەن تىنالمىدىم، سۆز قىلالمىدىم. ئەگەر گەپ قىلساملا، مەن تۈگىشىمەن.
_ يەنە ئىككى پارچە تارتە ئۇكا، يەنە ئىككىنى دېدى مەۋلان سۈرەتچىگە.
ئۇ توختىماي دۈمبەمنى سىلىدى. مەن ئۆزۈمنى قاچۇرۇشقا ئامالىسز قالدىم، مەجبۇرىي كۈلىۋاتىمەن. مەن خۇددى نىمجان بىر قۇشتەكلا بولۇپ قالغان ئىدىم. بۇ سۈرەتكىمۇ چۈشۈپ بولدۇق.
_ بەك چىرايلىقكەنسىز سىڭلىم، مەردان بەختىنى تېپىپتۇ، بەخىتلىك بولۇڭلار دېدى مەۋلان. بۇگەپلەر ئوچۇقتىن-ئوچۇق ماڭا قىلىنغان تەنە سۆز ئىدى. ئەمما مەردان بۇلاردىن قىلچە خەۋەرسىز. ئۇ ئاكىسىنىڭ تىلەكلىرىدىن سۆيۈنگەن ئىدى.
_رەھمەت ئاكا دېدى مەردان.
_ بۇ قايسى ئاكىڭىز دېدىم مەن تۆۋەن ئاۋازدا، ئۇنىڭ قۇلىقىغا  يىقىنراق كىلىپ.
_ ھازىر دەپ بەرسەم گەپ جىق، كېيىن ئايرىم بولغاندا تەپسىلىي چۈشەندۈرەي. لېكىن ئۆز ئاكامدەكلا دېدى ئۇ ماڭا سىنجىلاپ قاراپ يەنە:- بۈگۈن سىز پەرىلەردىنمۇ چىرايلىق بولۇپ كىتىپسىز دېدى.
مەن ئۇنىڭ بۇ سۆزلىرىدىن خۇشاللىق تاپاي دېسەممۇ، ۋەھىمە چۈشىۋالغان كۆڭلۈم ئۇنى قاياقلارغا ئېلىپ كەتكەن ئىدى.
_ئۇنىڭغا دەيمۇ دېمەيمۇ، دەي بولدى، دېمىسەم بولمىغىدەك، ياق دېسەم تېخىمۇ بولمىغىدەك، دېمەي، دېمەيمەن. بۇ كۈنلەرمۇ ئۆتۈپ كېتەر. مەن خىيالغا چۆكتۈم.
ئاشۇ ئويۇننىڭ كەينىگە كىرىپ، ئۆزۈمنى بىلمەي يۈرگەن ۋاقىتلىرىمنىڭ بىر كۈنى مەن ئۆيدە تارىنىپ، ياسىنىپ ئوينىغىلى ماڭماقچى بولدۇم.
ئاپام ياغلىقىنى ئوڭشىغاچ يېنىمغا كىرىدى. مېنىڭ ياسىنىپ بىر يەرگە مېڭىشقا تەمشەلگىنىمنى كۆرۈپ:- قىزىم، يەنە نەگە بارىسەن بۇ كەچتە، قارىغىنا  سائەتكە، قانچە بولدى دېدى تامدىكى سائەتكە ئىشارەت قىلىپ.
_ ئاپا، دېدىم ئەركىلەپ ۋە يەنە:- بۈگۈن دوستۇم زىبانىڭ ئۆيىدە توغۇلغان كۈن ئولتۇرۇشى قىلىپتىكەن بېرىپ كىلەي،  ماقۇل دېگىنە ئاپا. دېدىم ئاپامنىڭ شىلاپ يۈزىگە سۆيۈپ. ئاپام مۇشۇ كەمگىچە مېنىڭ سۆزۈمنى ئەزەلدىن رەت قىلىپ باقمىغان. نېمە ئۈچۈنكىن مېنى بىر بالا دەپ شۇنچىلىك ئارزۇلىغان ئىدى.
_ماقۇل قىزىم،  كەچ قالما جۇمۇ، داداڭغا نېمە دېيىشىمنى بىلەلمەي كېتىدىكەنمەن دېدى ئاپام.
_ئاپا ئۇ يەردە ئولتۇرساق كەچ بولۇپ كېتىدۇ.  مەن زىبانىڭ ئۆيىدە قونۇپ قالاي. ئەتە سەھەردىلا كىلىمەن. دادامغا كىچىك ئاپسىنىڭكىگە كەتتى دەپ قويغىنچۇ. يەنە ئەركىلىدىم.
_بالام تازا ياخشى بولماسمىكى، بۇنداق  بولىۋەرسە ياخشى بولمايدۇ. بۈگۈن يېنىپ كەل بىلدىڭمۇ ، يېنىپ كەل دېدى ئاپام سەل قاپىقىنى تۈرۈپ. لېكىن ئاپامنىڭ شۇنداق دېسىمۇ  قوشۇلغانلىقىنى مەن بىلىپ بولغان ئىدىم.
_ مەن ئەھۋالغا قاراي ھە ئاپا شۇنىڭ بىلەن ئۆيدىن چىقىپ كەتتىم.
مەن ئۆيدىن چىقىپلا ، مەۋلانغا تېلېفون قىلدىم.
مەۋلان مېنىڭ يېشىمغا نىسبەتەن سەل چوڭراق بالا ئىدى.  لېكىن ئۇنىڭ ئەركەكلىكى،  قەيسەرلىكى، باتۇرلىقى مەردلىكى مېنى ئۆزىگە جەلپ قىلىۋالغان ئىدى. يەنە ئۇنىڭ قاراملىقىنىمۇ بىلەتتىم.
_سىز نەدە، مەن ھازىر ئۆيدىن چىقتىم.
_مەن ھازىر «ئۇچقۇر» دېسكوخانىسىدا. سەن مۇشۇ يەرگە كەلگىن دېدى ئۇ.
_ بولىدۇ دەپ شۇ يەرگە ماڭدىم.
مانا مۇشۇ قېتىملىق ئۇچرىشىش،  مۇشۇ قېتىملىق ئويۇن مېنىڭمۇ ھەم ئۇ مەۋلاننىڭمۇ تەقدىرىنى ئۆزگەرتىۋەتتى. ئۇ شۇ كۈنى مېنىڭ  ئۇنىمىغىنىمغا قارىماي نومۇسۇمغا تەگدى. مېنى دەپسەندە قىلدى.
_مەن سېنى بەك ياخشى كۆرىمەن، جېنىم، سەن مېنىڭكى، ئۇندىن كېيىنكى گەپلەر مۇشۇ بولدى.
ئەسلىدە بۇ ئىشلارنى ھېچكىمگە دېمەي يىغىشتۇرۋېتەي دېگەن ئىدىم. لېكىن ئىشلار يەنە ئويلىغىنىمدەك بولماي قالدى. ئىككى ئايدىن كېيىن  بويۇمدا قالغانلىقىنى بىلدىم. ئەمدى قانداق قىلىمەن.
ئاپامغا  بۇ ئەھۋالنى ئېيتتىم. ئاشۇنداق سۆرىشىپ يۈرۈپ دېگەندەك، ئاپام، داداملار بۇ ئىشتىنمۇ خەۋەر تاپقان بولدى. دادامنىڭ ئالدىدا يۈزۈم تۆكۈلدى.  ئاپام مېنى بىر نەرسە دەي دېسە تېخى، دېمەي دېسە تېخى دىمى ئىچىگە چۈشۈپلا كەتتى. 
داۋامى بار

بۇنىڭدىن مەۋلاننىڭ خەۋرى بار ئىدى. ئۇ مېنى ئالىمەن دەپ شۇ كويدىلا يۈرىۋەردى.
ئاپاملار بىر كۈنى مېنى دوختۇرخانىغا ئەكىلىپ بالىنى ئالدۇرۋەتتى.
ئاپاملار خىيالىدا يىپىق قازان پېيىق پېىتى قالسۇن، داۋراڭ سېلىشمايلى دەپ ئويلىغان ئىدى.
مەنمۇ ئەسلىمگە كىلىپ ئارىدىن بىر ئىككى ئاي ئۆتكەن كۈنلەرنىڭ بىر كۈنى مەن تالا-تۈزلەرنى ئايلىنىپ كىلىش ئۈچۈم ئۆزۈم يالغۇز سەيلىگە چىقتىم.
مەۋلاننىڭ  ئۇ مەھەللىدە تېخىچە تىمسىقلاپ يۈرگىنىنى مەن خىيالىمغىمۇ كەلتۈرمەپتىمەن.
_سەن تېخى مېنىڭ بالامنى ئۆلتۈرگىدەك بولدۇڭما، مەن سېنى يا ئالمايمەن دېمىسەم. ئۇ مېنى قاتتىق ئۇردى، تەپتى، دەسسىدى. ئاغزى بۇرنۇمدىن قانلار ئوقتەك ئېتىلىپ چىقتى. ئۇ بارچە كۈچى بىلەن مېنى ئۇرىۋاتاتتى. ئۇ مېنىڭ يالۋۇرۇشلىرىم، ئۆتۈنۈشلىرىمگە قارىمىدى.
مەھەللىدىكىلەر يىغىلىشىپ كەتتى. بىر ھازادىن كېيىن خوشنىلىرىمىز ساقچىغا مەلۇم قىلدى. دادام-ئاپاملارمۇ يۈگۈرۈپ كىلىشتى، مېنىڭ بۇ ھالىمنى كۆردى.
دادامنىڭ ئەمدى سەۋىر قاچىسى يېرىلدى. شۇنىڭ بىلەن مېنىڭ سۆزلەپ بەرگەنلىرىم بويىچە ئەرزىيەت سۇنۇپ مەۋلانغا سوت ئاچتى. ئاخىرىقى ھۆكۈم، باسقۇنچىلىق قىلىش ۋە قەستەن ئېغىر  دەرىجىدە يارلاندۇرۇش جىنايىتى بىلەن 12 يىل قاماق جازاسى بېرىلدى.
سوت ئاخىرلاشقان ۋاقىتتا ئۇ ماڭا ۋارقىراپ تۇرۇپ :- بىز يەنە ئۇچىرىشىمىز، سېنى بوش قويىۋەتمەيمەن. بۇ ئەنتىمنى چوقۇم ئالىمەن، قانغا قان ئالىمەن دەپ جار سالدى.
مەن قورققىنىمدىن يىغلاپ كەتتىم.  ساقچىلار ئۇنى باستۇرۇپ  ئېلىپ چىقىپ كەتتى.
بۈگۈنكى كۈنگە كەلگەندە ئۇ مەرداننىڭ ئاكىسىكەن. بۇ جاھان نېمانچە تار. ئەجەبا ئۇ مېنىڭ تەقدىرىممىدۇ؟
كۆزۈمدىن ياشلار قويۇلۇشقا باشلىدى.
_تېخىچە ئاپىڭىزغا قىيالماپسىز ھە ! دېدى مېنىڭ خىيالىمنى بۇزۇپ.
مەن پەقەت بېشىمنى بوش قىلىپ لىڭشىتىپ قويدۇم.
بۈگۈن تويمۇ ئاخىرلاشتى. بىزنى ئۆيگىچە ئەكەلگەنلەرمۇ بىزگە بەختلەر تىلەپ مەردان ئىككىمىزنى يالغۇز قويدى.
ئىككىمىز  بۇ چىرايلىق بېزەلگەن، يېڭى ئۆيدە بەخت پەيزى سۈرمەكچى بولغان.
لېكىن مېنى چىرمىۋالغان  ئۇ ۋەھىمە ھېچبىر  ئارامىمدا قويمايۋاتاتتى.
مەردان ماڭا مۇھەببىتىنى ئىزھار قىلىۋاتىدۇ. لېكىن مەن ئۇنىڭدىن تېخى.......
_بۈگۈن بەك چارچاپ قالدىڭىزمۇ نازاكەت، گەپمۇ قىلمايسىزغۇ؟
_ ياق ئۇنداق ئەمەس، سىزگە ياتلىق بولغىنىم مېنىڭ بەختىم دېدىم، ئىچىمدە:- مەن بۈگۈن مەرداننىڭ قانۇنلۇق نىكاھلىق خوتۇنى بولدۇم. بۇندىن باشقىسى ماڭا ھارام. مەن شۇم خىياللارنى قىلمايمەن دەپ ئۆزۈمگە مەدەت بەردىم.
شۇنىڭ بىلەن بىز بەختلىك يېڭى تۇرمۇشىمىزنى باشلىدۇق. ئەتىسى بىز چوڭلارنىڭكىگە بارماقچى بولدۇق.
_ جىنىم خوتۇنۇم، بۈگۈن ھەقاچان يەنە ئالدىراش بولۇپ كېتىمىز، ھېلى باشقىلار كەلگۈچە ئازىراق بىر نەرسە يەۋالايلى ماقۇلمۇ دېدى مەردان كۆينىكىنىڭ يەڭ تۈگمىسىنى ئەتكەچ.
_مەن ماقۇل، دېدىم يەنە: _ ھە راست مەۋلان ئاكىڭىز؟ دېدىم مەن سۇئال  تەرىقىسىدە...
_ ھە، مەۋلان ئاكامما،  ئۆز ئاكامغا ئوخشاش. ئۇنىڭ ئاتا-ئانىسى يوق. ئاپام بىر قوللۇق چوڭ قىلدى. بىز بىر ئۆيدە چوڭ بولغان. ئاپامنىڭ ئاچىسىنىڭ ئوغلى.
_ئۇنداقتا ئاپىسىچۇ؟
_تۈگەپ كېتىپتىكەن، بىر ياش ۋاقتىدىلا ئاكامنى ئاپامغا قالدۇرۇپتىكەن.  ئاپاممۇ  بەك ئامراق ئىدى. دادامنىڭ كېسەل سەۋەبىدىن بىزدىن ئايرىلىشى ئاپامغا ئېغىر كەلگەندەك بولۇپ، ئاپاممۇ تۈگەپ كەتكىلى بىر يىل بولدى. مەن سىزگە بۇ ئەھۋاللارنى دېگەن.
_دېگەن، لېكىن ئاكىڭىزنىڭ بارلىقىنى......
_ ئاكاممۇ چەتئەلدىن كەلگىلى تېخى بىر ئاي بولمىدى دېدى ئۇ داستىخانغا كىلىپ ئولتۇرۇپ.
مەن ئۇنىڭ پىيالىسىگە چاي قويىۋاتقان ئىدىم، بۇ گەپ بىلەن چاينى تېشىغا قويىۋەتتىم:- چەتئەلگە؟ ئاپلا،  قايناق چاي ئۇچىڭىزغا تۆكۈلمىگەندۇ؟
_ياق ياق ھېچۋەقەسى يوق.
_نېمىگە بۇنچىۋالا ھەيران قالىسىز؟ چەتئەلدە ئوقىسا بولمامدىكەن؟
_ئاكام چەتئەلگە ماڭغان ۋاقىتتا مەن ئىچكىرىدىكى ئالىي مەكتەپتە ئوقۇۋاتقان ئىدىم.  ئاپام شۇنداق دېگەن دېدى ئۇ ناننى سۇندۇرۇپ، پىيالىسىگە ئىككى پارچىسىنى چىلىدى.
_ئەسلىدە مۇنداق ئىكەندە دېدىم ئىچىمدە:- مەردان ھېچنېمىنى بىلمەيدىكەن ئەمىسە، مەن تېخىمۇ بىلدۈرسەم بولمايدىكەن دېدىم.
_بولدى خوتۇن،  نېمىلەرنىڭ ئويلاپ كەتتىڭىز، تېزراق بولايلى، ئۇلارنىڭ كىلىدىغان ۋاقتى بولۇپ قالدى.
_مەردان،  مەردان ، تۆۋەندىن چىققان  بوم ئاۋاز مېنى چۆچۈتىۋەتتى.
مەردان دېرىزىدىن تۆۋەنگە قاراپ :- مانا ھازىر دېدى دە_ئۇلار كەپتۇ. بىزمۇ چۈشەيلى دېدى.
_ئۇلار ئۆيگە چىقمامدىكەن؟
_كەچتە ئۇلارنى ئايرىم چاقىرايلى دېدى مەردان ئۈستى باشلىرىنى تۈزەشتۈرگەچ.
-مەن قىپقىزىل  بىر قۇر كىيىمنى كىيىۋالدىم. بۇ كىيىممۇ ماڭا بەك ياراشقان ئىدى.
_ ئىسمىڭىزغا لايىق نازاكەت بولۇپ كەتتىڭىز دېدى مەردان ماڭا سۆيۈنۈپ قاراپ.
بىز تۆۋەنگە چۈشتۇق.
بىزنى ساقلاۋاتقانلارنىڭ ئىچىدە مەۋلانمۇ بار ئىدى.
_ئاكا، سەنمۇ بارىكەنسەنغۇ؟
_مەن ھەر ۋاقىت بار  ئۇكام دېدى ئۇ گەپنى ماڭا دارتمىلاپ دېگەندەك قىلىپ. ئۇنىڭ ماڭا غەزەپ بىلەن قاراشلىرى، ئۆچمەنلىك نەزىرىدە تىكىلىشلىرى مېنى تېخىمۇ دەككە-دۈككە قىلىۋەتكەن ئىدى.
مەن يەنە خىيالغا چۆكتۈم. مەرداننىڭ ماڭا بولغان سەمىمىي ئىش-پائالىيەتلىرىگە قاراپ مەن تېخىمۇ بەك ئۆزۈمنى بىر  ھاڭغا تاشلاۋاتقاندەك ھېس قىلىۋاتىمەن.
_مەن سىزنى شۇنچىلىك ياخشى كۆرىمەن نازاكەت، مېنىڭ تۇرمۇشۇمدا سىز بولمىسىڭىز مەن ياشىيالمايمەن. ئاپامنىڭ ۋاقىتسىز ئايرىلىشى مېنى تېخىمۇ يىگانە قىلدى. مەن سىزگە مۇھتاجمەن. مەن سىزنى بەخىتلىك قىلىمەن دېدى مەردان.
_لېكىن مەن سىزگە لايىق ئەمەسمەن مەردان.
_بۇنداق دېمەڭ،  مەيلى سىز قانداقلا بولۇڭ،  مەن سىزنى تاللىدىم. ئۆتمۈش كەلگۈسىگە ۋەكىللىك قىلالمايدۇ. بۇندىن كېيىن ماڭا ۋاپادار خانىمىم بولالىسىڭىزلا بولدى. ماڭا  شۇ يېتەرلىك دېدى ئۇ مېنىڭ قولۇمنى تۇتۇپ تۇرۇپ.
_مەن لايىق ئەمەسمەن دەپ قولۇمنى تارتىۋالدىم.
_مەن قانداق قىلسام سىز ماڭا ياتلىق بولۇسىز؟ _پۈتۈن ھاياتىم بىلەن ۋەدە بېرەي، سىز تۇنجىسى ھەم ئەڭ ئاخىرقىسى بولۇشىڭىزنى چىن دىلىمدىن ئۈمىد قىلىمەن.
_نازاكەت، نازاكەت، نازا..... دەپ يەنە چاقىرىشىغا مەن :_ھە،  كەلدۇقمۇ دېدىم يەنە  دۇدۇقلاپ.
_ ياق، ئەمدى ماڭىمىز، ماشىنىغا چىقىڭ دېدى مەردان.
ئالدىدا ئولتۇرغان مەۋلان ھە دەپ ماشىنا ئەينىكىدىن ماڭا قاراپ تۇراتتى. مەن كۆزۈمنى ئامالنىڭ بېرىچە قاچۇردۇم. ماشىنا ئىچىدىكى مۇزىكا ئىچىمنى تېخىمۇ بەك سىقىۋەتتى. خۇددى نەپىسىم سىقىلغاندەك، خۇددى مەۋلان ھازىرلا  يېنىمغا ئۆتۈپ مېنى بوغۇپ قويىۋاتقاندەك بولۇپ كەتتىم.
_ئەينەكنى چۈشۈرۋەتسەڭچۇ دېدىم دوستۇم زۇلپىيەگە. ھەممەيلەن ماڭا بىر خىل ھەيرانلىق نەزىرىدە قارىدى. چۈنكى سىرتنىڭ ھاۋاسى ئۇنچە ئەينەك چۈشۈرگىدەك  ئىسسىق ئەمەس ئىدى.
مەۋلان يەنە شۇ  ئالدى ئەينەكتىن كۆزۈمگە غەزەپ بىلەن مىيقىدا كۈلۈپ قاراپ قويدى.
مانا شۇ كۈندىن باشلاپ مەن ۋەھىمە ئىچىدە ياشىدىم. ئۇ كۈنى مەۋلان بىزنىڭ ئۆيگە كىرمىدى. بىزنىڭ قورۇنىڭ ئالدىغا كەلگەندە مەن تاماكا ئېلىۋالاي دېگەن باھانە بىلەن مەھەللىگە يېقىن جايدا  چۈشۈپ قالغان.
قانداق كۈنلەرنى كۆرىدىغىنىمنى ئالاھ ئۆزىگە ئامانەت بولدى ....مۇشۇنداق دەككە –سۈككە بىلەن بىر ھەپتە ئۆتتى.
مەردانمۇ خىزمەتكە چۈشتى.  بۈگۈن سەھەر مەن ناشتىلىق تەييارلىدىم.
مەردان ناشتىلىقىنى قىلىپ بولۇپ:- خوتۇن مەن چۈشتە ئۆيگە كىلىپ بولالمايمەن. كەچتە  بىراقلا كىلىمەن. كەچتە كۆرىشەيلى ئەمىسە دەپ چاپاننى ئېلىپلا ئالدىراش  چىقىپ كەتتى.
مەن  ئۆيلەرنى تازىلاشقا باشلىدىم. يېنىك مۇزىكىغا ئەگىشىپ مەنمۇ غىڭشىدىم.
ئاۋۋال ئاشخانا ئۆينى يىغىشتۇردۇم. بايقى ناشتلىق قىلغان قاچىلارنى يۇيدۇم. بۇ يەرلەرنى بىرەر قۇر يىغىشتۇرۋېتىپ ياتاق ئۆينى يىغىشتۇرغىلى كىرىدىم. مەن خۇشال ئىدىم. بىر ئورۇننى قاتلىغان بولسام بىر  ئەينەككە قاراپ كۈلدۈم. بىر كىيىمنى  كىيىم ئىشكابىغا ئاسقان بولسام يەنە بىر ئايلىنىپ ئەينەككە قارىدىم. بۇخۇشاللىقىم بىباھا ئىدى.
مېنىڭ ئىللىق، سۆيۈملۈك، گەرچە چوڭ بولمىسىمۇ ئوماق ئائىلەم بار بولدى.  مەن مۇشۇلارنى خيال قىلغاچ ئۆي يىغىشتۇرۋاتسام، ئىشىك چىكىلدى.
مەن ھېچقانداق ئارتۇق ئىشىنى ئويلىمايلا :- كىم دەپ ئىشىكنى ئاچتىم.
_جىنىم، مەن، بۈگۈن ئەجەپ خۇشالغۇسەن؟ ئېرىڭ كۆڭلۈڭنى بەك ياخشى ئالغان ئوخشىمامدۇ دېدى مەۋلان ماڭا  دىۋەيلەپ كىرىپ كەلدى.
_ سىز، سىز نېمىگە كەلدىڭىز؟
_ مەن نېمىگە كىلەتتىم، بۇ مېنىڭ  ئېنىمنىڭ ئۆيى،  نېمە  بولدى كىنلچەك، كەلسەم بولمامدىكەن؟
_ بۇ ئۆيگە كىرىش ئۈچۈن روخسەت ئېلىش كېرەكمۇ ئەمدى؟ بۇ دېگەن مەن چوڭ بولغان ئۆي. ئۇ كەينىگە ئۆرۈلۈپ، ئۆيلەرنىڭ ئىچىنى بىرەر قۇر ئايلاندى. خېلى چىرايلىق قىلىۋاپسىلەر ھە؟! سەن مېنى مۇشۇ ئۆيدە تۇرۇشۇمنى مەھرۇم قىلغان. شۇنى بىلەمسەن. گالۋاڭ ئېرىڭ نېمە دەيدۇ. مېنى چەتئەلدىن كەلدى دېگەندۇ؟ مەن چەتئەلدە تۇرغاندىمەنمۇ؟ بۇ ساڭا بەك ئايان. ئېرىڭغا دەيمۇ دېمەيمۇ؟ ئاكىسىغا خوتۇن بولغاننى ئىنىسىغا خوتۇن بولسا،  بىر ئەركەك نېمە بولۇپ كېتەر؟ ئۇ ساڭا يەنە مۇشۇنداق ئامراقلىق قىلارمۇ جېنىم، ئۇ مېنى يېنىمغا كىلىپ قۇچاقلاپ سۆيمەكچى بولدى.
_نېرى تۇر. مەن ئۇنى ئىتتىردىم. لېكىن ھېچقانچە كۈچىيەلمىدىم. ئۇنىڭ يوغان تەمبەللىكىگە مەن نېمە قىلالايتتىم. ئۇ مېنى مەجبۇرىي سۆيىۋاتاتتى ھەم ماڭا سۆزلەۋاتاتتى:- سەن ئېرىڭغا ھازىرقى ئەھۋاللار دىيەلەمسەن. ئەگەر ئۇنىڭغا بىلدۈرۈشنى خالىساڭ، مەنلا يەتكۈزۈپ قويىمەن..... سەن قانجۇقنى مەن ھەرگىز بوش قويىۋەتمەيمەن.
مەن ئۇنىڭ قوينىدا تىپىرلىدىم، ئۆزۈمنى قاچۇرۇشقا ئۇرۇندۇم لېكىن ئامالسىز قالدىم.  ئۇ ماڭا بارلىق بولمىغۇر قىلىقلارنى قىلىشقا باشلىدى. قانداق سۇغۇرلۇپ چىققىنىمنى بىلمەيمەن،  تامنىڭ يېنىغىچە سەنتۈرلۈپ كەتتىم.
_بولدى بۈگۈن مەن كەتتىم. ئېرىڭ دېگەن ئاكتىپ خىزمەتچى. ئۇ ھەر كۈنى ئىشقا بارىدۇ،  شەنبە يەكشەنبىسىمۇ يوق ئىشلەيدۇغۇ .
_12 يىللىق بەدەلنى مەن سەندىن چوقۇم ئالىمەن جېنىم. مەن سېنى شۇنچىلىك ياخشى كۆرىمەن بىلەمسەن ئۇ ئالدىمغا دىۋەيلەپ كەلدى_دە  يۈزۈمگە بىرنى سۆيۈپ:- مەن ئەتە يەنە كېلىمەن. ھە، راست، ئېرىڭغا ھېلى مەن تېلېفون قىلىپ قويىمەن دېيىشىگە :- مەن ياق، ياق دېدىم يىغلاپ تۇرۇپ.
_يىغلىما جېنىم، باشقىنى دېمەيمەن پەقەت ئۆيگە كىلىپ كەتكەنلىكىمنى دەيمەن. چۈنكى خۇشنىلار مېنىڭ كىرگىنىمنى چوقۇم كۆرىدۇ. قالغىنىنى سېنىڭ ئىپادەڭگە قارايمەن.
ئۇ ئىشىكنى يېپىپ چىقىپ كەتتى.
قېنى مېنىڭ خۇشاللىقىم، قېنىڭ مېنىڭ بەختىم. بۇ مېنىڭ بەخىتممۇ، بۇ مېنىڭ تۇرمۇشۇممۇ. مەن بۇنىڭدىن قانداق قۇتۇلىمەن. ساقچىغا مەلۇم قىلايمۇ؟ مەن يەرگە يۈكۈنۈپ ئولتۇرۇپ قالدىم. كۆزۈمدىن پۇشايمان ياشلىرى تۆكۈلۈشكە باشلىدى. نېمىگە پۇشايمان قىلىدىغانلىقىمنى بىلمىدىم، توي قىلغىنىمغىمۇ، نازاكەت بولۇپ قالغانلىقىمغىمۇ؟ ئۆزۈمنىڭ تېرىغان ئىشلىرىمغىمۇ، ئاپام-داداملارنىڭ يۈزىنى تۆككەنلىكىمگىمۇ؟
مەن ئەمدى قانداق قىلىمەن، مەن ئەمدى قانداق قىلىمەن. باياتىن مەن قويۇپ قويغان مۇزىكا تېخىمۇ يۈرىكىمنى ئەزگۈلى تۇردى.
مەن بارغانسېرى ئۆزۈمنى ئاسىي دەك ھېس قىلدىم. ھېس قىلىش ئەمەس مەن راستىنلا ئاسىي بولۇپ قالدىم. بېشىم قاتتى، قانداق قىلىشنى بىلمىدىم. مەرداننى ئازابلاشنى خالىمىدىم. شۇ ئولتۇرغىنىمچە جايىمدا بىر سائەتتەك ئولتۇرۋېتىپتىمەن. پۇتۇم ئۇيۇشۇپ قالغانمۇ ئۆرە تۇرالماي قالدىم.
پۇتۇمنى ئۇۋلىغاچ ئاستا كىلىپ  كىرىسلودا ئولتۇردۇم. قولۇم ئىشقىمۇ بارمىدى.
كەچتە مەردان قايتىپ كەلدى. مەن ھېچ ئىشنى بىلىندۈرمەسلىك ئۈچۈن چىرايلىق ياسىنىۋالدىم. كەچتە ئوخشىتىپ چۈچۈرە قىلدىم. چۈنكى مەردان تۈگۈپ قىلغان تاماقلارنى بەكمۇ ياقتۇراتتى.
بىز بىللە غىزالاندۇق. مەردان ئۆزىنىڭ خىزمەتتىكى مەسئۇلىيىتىنىڭ ناھايىتى ئېغىرلىقىنى،  بىر كۈن كەچكىچە ئارام ۋاقتىنىڭ ناھايىتى ئاز ئىكەنلىكىنى، بىردەم ماتېرىيال كۆرۈپ  ئۇخلىماقچى بولغانلىقىنى  ئېيتتى.
مەن قانداقمۇ يوق يەردىن گەپ چىقىرالايمەن. ئۇ ئارام ئېلىشى كېرەكتە. شۇنىڭ بىلەن مەنمۇ ئۇنىڭ خالىغىنى بويىچە ئىش كۆردۈم. بۈگۈن يەنە ئېغىز ئاچالمىدىم. ئۇنىڭغا بالدۇراق ئورۇن راسلاپ بەردىم. خىزمەت بېسىمى ھەقىقتەن بەك ئېغىرمۇ ماڭا تۈزۈك يېقىنچىلىقمۇ قىلىپ قويمىدى. بۇنىمۇ توغرا چۈشەندىم، ئۇ چارچىدى ئەمەسمۇ....
مېنىڭ كۆڭلۈم تېخىچىلا دەككە-دۈككىدە ئىدى.
_ ھە راست بۈگۈن ئاكام كەلگەنمىدى دېدى ئۇ يېتىشقا تەمشىلىپ.
_ھەئە دېدىم مەن،  يۈرىكىم ئىتتىك سوقۇپ كەتتى.
_ ئاكام كەلگەندە ياخشى تاماقلارنى قىلىپ، كىر قاتلىرىنى يۇيۇپ بېرەرسىز ئېغىر كۆرمەي، ئۇنى توي قىلىۋال دېسەم ئۇنىمىدى. كۆڭلىدە بىرەرسى بار ئوخشايدۇ بەلكىم دېدى مەردان .
_ھەئە بىلدىم.... دېدىم ئۇنىڭغا ئەركىلىگەندەك قىلىپ.
_سىزنى سۆيىمەن خوتۇن دەپ مەڭزىمگە سۆيۈپ قويۇپ، يېتىپ  ئۇخلىدى.
لېكىن مەن ئۇخلىيالمىدىم.  ئورنۇمدىن تۇرۇپ كەتتىم. تېلېۋىزور كۆردۈم، قاناللارنى  قارىسىغا يۆتكۈدۈم. بېشىم ئاغرىقتىن ئېلىشىپلا قالايلا دېگەن  ئىدى.  مەۋلاننىڭ گەپلىرى قۇلاق تۈۋىمدە جاراڭلاپ تۇراتتى.
شۇنىڭ بىلەن كۈنلەر مۇشۇ تەرىقىدە ئۆتىۋەردى.
مەۋلانمۇ مېنى كۈندە بىر بوزەك قىلىۋېلىپ كېتىدىغان بولدى. مەن قارشىلىق كۆرسەتكەن كۈنۈم تاياق يېدىم.  مەردانغا بەزىدە يىقىلىپ كەتتىم ئەينەك سۈرتكىچە ياكى پەلەمپەيدىن تېيلىپ كەتتىم دەپ قوياتتىم. مەن ئەمدى ئاكىسىغىمۇ ئىنىسىغىمۇ خوتۇن بولۇپ يۈردۈم. بۇنى پەقەت مەۋلان ئىككىمىزلا بىلدۇق. ئۇنىڭ يۈرۈش-تۇرۇشلىرى ياكى مېنىڭكىدە بولسۇن چاندۇرۇش بولمىدى.  مەن ھەممە ئىشتا ئۆزۈمگە خۇدۈك ئېلىپ يۈرۈپ ياشىدىم.  بىرەر يەردە ئىشلەي دېسەم مەردان يول قويمىدى. پەقەت مېنىڭ تېزراق ئوماق بالا تۇغۇپ بېرىشىمنى ئۆتۈندى ۋە تەلەپ قىلدى.
شۇنىڭ بىلەن كۈن بويى مەرداننىڭ  ئىشلىرىنى قىلىش ۋە يەنە مەۋلاننى ئوغرىلىقچە ھاجىتىدىن چىقىدىغان بولدۇم.
بىر كۈنى مەردان دەم ئالدى. ئۇ كۈنى مەۋلانمۇ مەرداننىڭ  دەم ئېلىشىنى بىلىپ كەلمىدى.
مەن  ئۆزۈمنىڭ ئىشلىرىدىن تېخىچە ئەنسىزلىكتە يۈرگەچكە ئۆزۈمنىڭ بۇ تىراگىدىيىسىنى ئوخشىتىپراق قىلىپ بىر كىنونىدىكى كۆرۈنۈش دەپ ئېلىپ، مەن بولغان بولسام ھەر گىز قوللىمايتتىم دەپ، مەۋلان بىلەن بولغان ئۈچ كىشىلىك مۇناسىۋەتنى مىسال ئېلىپ سۆزلىگەن ئىدىم،  مەردان دەرھال ئىشىنى قويۇپ ماڭا سۆزلەپ كەتتى.
_ئۇنداق  ئايالنى  ئۆلۈمگە مەھكۇم قىلىش كېرەك. نومۇسنى بىلىمىگەن، ئىتائەتنى بىلمىگەن، ئېتىقادنى بىلەن ئۇنداق ئايالنىڭ بارا جايى ۋەيلۇن دوزاق.  ئەگەر مەن شۇ ئەرنىڭ ئورنىدا بولغان بولسام، بىلىپلا قالسام،  ئەتراپىدا باشقىلار بارمۇ يوق كارىم يوق، شۇ پەيتىدىلا  ئۇ دۇنياغا يولغا سېلىۋېتىمەن. بۇ يەردە باشقا قېرىندىشىم باركەن دەپ ھەرگىز ئۇنىڭغا  يەنە  بىر نۆۋەت ياشاش پۇرسىتى بەرمەيمەن ... ئۇ ئىنسان قىلىپىدىن چىققان ھايۋاندۇر  دەپ قايناپلا كەتتى.
مەن ئۇنىڭ سۆزلىرىنى ئاڭلاپ پۈتۈن بەدىنىمگە تىترەك ئوۋلىشىۋالدى.
_ سىز مېنىڭ ئەڭ سۆيۈملۈك ئايالىم.  بىزنىڭ  ئەمدى  بىر ئوماق پەرزەنتىمىز بولسىلا بىز تېخىمۇ مۇكەممەل بىر ئائىلە بولغان بولىمىز دېدى ئۇ  مىيقىدا  ئىللىق كۈلۈپ.
_ ھەئە، راست دەيسىز دېدىم مەن  تەخسىدىكى ئاشنى يىگۈم كەلمەي ئاستا ئىلەشتۈرۈپ. مەرداننىڭ سۆ‍زلىرى مېنى چۆچۈتتى.
ئارىدىن مۇشۇنداق قىلىپ ئۈچ ئاي ئۆتۈپتۇ. مۇشۇ بىر قانچە كۈندىن بېرى نېمىشقىدۇر تاماقلارنى يىگۈم كەلمەيدىغان، كۆڭلۈم ئاينىيدىغان بولۇپ قالدى. بويۇمدا قالغانلىقتىن مۇشۇنداق بولدىمۇ يە؟ بويۇمدا قالسا بولمايتتى.
بۇ زادى كىمنىڭ بالىسى؟ بۇ ئەھۋالنى ھېچكىمگە بىلدۈرمەي دوختۇرخانىغا باردىم. دىئاگىنوزدا بالا ئىككى ئايلىق  بوپتۇ. مەن ئۆز-ئۆزۈمگە :- بۇ مەرداننىڭ بالىسى ئەمەسكەن. بۇ مەۋلاننىڭ بالىسىكەن، مەن بۇ بالىنى تۇغمايمەن.
مەن بۇ بالىنى تۇغمايمەن مەن بۇ بالىنى تۇغمايمەن.
مەن شۇنداق دېگەنچە ئۆيگە يېنىپ كەلدىم. ئۆيگە كەلسەم بىنا ئالدىدا مەۋلان تۇرۇپتۇ. ئۇ مېنى ساقلاۋاتقان ئىكەن.:- ئەجەپ قۇتۇلمىدىم بۇنىڭدىن دېدىم ئاچچىقىمدا ئۇنىڭغا  ئالىيىپ قارىدىم.
مەۋلان:- سەت ھىجاراپ  ئارقامدىن ئۆيگە كىردى.
مەن تازىلىق ئۆيىگە كىرىۋالدىم. قانداق قىلىش توغرىسىدا ئويلاندىم.
مەۋلان مېنى چاقىرىۋەردى.
مەن نۇرغۇن ئويلىنىپ چىقتىم. يەنىلا بۇرۇنقىدەك قوپال-قوپال مۇئامىلە قىلدىم.
چىقىشىمغىلا ئۇ مېنى چىڭ قۇچاقلىۋالدى.
_مەن سېنى تېخىمۇ بەك ياخشى كۆرۈپ قىلىۋاتىمەن. ساڭا بولغان نەپرىتىم مۇھەببەتكە ئايلىنىۋاتىدۇ. ئېرىڭدىن ئاجراش، مەن بىلەن توي قىل دېدى.
_سىز چۈش كۆرمەڭ.  مەن ئۆلۈشكە رازىمەنكى  مەرداننى تاشلاپ قويمايمەن دېدىم ئۇنى سىلكىپ.
ئۇ مېنى  مۇنداقلا كۆتۈرۈپ ياتاق ئۆيدىكى كارۋاتقا تاشلىدى.
_ مەن ساڭا چىرايلىق گەپ قىلسام ئاڭلىمايسەنغۇ. مەن ھېچنېمىدىن قورقمايدىغان ئادەممەن. سەن مېنى شۇنداق قىلىۋەتكەن. مەن مۇشۇ ئىشلارنى ئاشكارلىۋەتسەم، ئاندىنغۇ مەردان ئۆزى سېنى تاشلايدۇ. ۋاقتى كەلسە مەن مەرداندىنمۇ قورقمايمەن دېدى.
ئۇ مېنى بېسىپ سۆيۈشكە باشلىدى. مەن بۇ قىلىقلىرىدىن شۇنداق بىزار بولغان ئىدىم. ئۇنىڭ قويۇق يېڭى چىققان ساقاللىرى يۈزۈمگە  سانجىلىپ تۇراتتى.
مەن يەنە ھېچنېمە دېمىدىم ۋە ئىچىمدە :- توختاپتۇر. مەن سېنىڭ ئەدىبىڭنى بېرىدىغان ئادەم چىقىدۇ. سەن مېنى مۇشۇنچە  ۋاقىت دەپسەندە قىلدىڭ.  ئەمدى يا كۆرۈم، يا ئۆلۈم بولىدۇ. بارلىق شەرمەندىچىلىكنى قىلدىم، ئەمدى مەنمۇ ھېچنېمىگە قارىمايمەن دېدىم.
ئۇ قىلغۇلىقىنى قىلىپ بولۇپ يەنە كەتتى. مەن شۇ جايىمدا يىغلاپ يېتىپ قالدىم. مەن قانداق قىلىمەن. نېمىشقا بۇنداق ئۆزۈمنى قىينايمەن. بۇ ماڭا نېمە كۆرگۈلۈك.  مەن ئاستا ئورنۇمدىن تۇردۇم دە ئۈستەل ئالدىغا كىلىپ ئولتۇردۇم.  قولۇمغا قەغەز قەلەم ئېلىپ ئاۋۋال سۆيۈملۈك مېھرىبان ئاپامغا قەلىب سۆزلىرىمنى تۆكۈشكە باشلىدىم.
_ قەدىرلىك ئاپا.  
زۈمرەت خانىم دەپ قويسام شۇنچىلىك خۇشال بولۇپ كېتەتتىڭ، قىزىم مېنى ئەركىلەتتى دەپ......
جىنىم ئاپا. مەن دۇنيالىقتىكى بىر تال ئارزۇلۇق قىزىڭ. سىلەر مېنى تېخىمۇ گۈزەل بولسۇن. ئۇيغۇر ئاياللىرىغا خاس نازۇكلۇق، شەرمى ھايالىق، ۋاپالىق، ئەخلاقلىق، ئەدەپلىك قىز بولۇشۇمنى تىلەپ بۇ نازاكەت دېگەن ئىسمىمنى قويغان بولغىيدىڭلار.
مەن بۇ دۇنيالىقتا  سىلەرگە ھېچنەرسە قىلىپ بېرەلمىدىم. سىلەرنىڭ يۈزۈڭلارنى تۆكتۈم. سىلەرگە يۈز كىلەلمەيمەن.
مەن توي قىلغاندىن كېيىن، سەن ماڭا نۇرغۇن تەربىيىلەرنى قىلغان ئىدىڭ. يولدىشىڭنى ياخشى كۈتكىن،  ئۇنىڭغا يانمىغىن،  ئۇنى قەدىرلىگىن،  ئۇنى پاك مۇھەببىتىڭ بىلەن سۆيۈندۈرگىن. ئۇنىڭغا ئاسىيلىق قىلمىغىن. ئۇ ھەر ۋاقىت سېنىڭ ئىللىقلىقىڭنى ھېس قىلسۇن دەپ نۇرغۇن تەربىيىلەرنى بەرگەن ئىدىڭ. لېكىن ئاپا، مەندەك شەرمەندە قىزىڭىنى كەچۈرگىن. مەن قىلالمىدىم. كەچۈرگۈسىز گۇناھ قىلدىم. گۇناھلىرىم بەك ئېغىر ئاپا. ھېلىقى مەۋلان مەرداننىڭ  ئاكىسى ئىكەن. مەن توي قىلغان كۈنى ئۇ پەيدا بولدى. تاكى بۈگۈنگە قەدەر مېنى دەپسەندە قىلدى. مەن ھېچكىمگە ئېيتالمىدىم. قورقتۇم. يەر بىلەن يەكسان بولۇشتىن قورقتۇم.  مەرداننىڭ ئالدىدا شەرمەندىچىلىككە قىلىشتىن قورقتۇم. مەن مەرداننى قەدىرلەيتتىم. ئۇنى ئاسىرماقچى بولغان ئىدىم. لېكىن مەن بۇ مەينەتچىلىكىم بىلەن ئۇنى قانداقمۇ ئاسىرىيالايمەن. مەن ئۇنىڭغا يۈز كىلەلمەيمەن. مېنىڭ  گۇناھىم بەڭباشلىق قىلغىنىم، مېنىڭ گۇناھىم بۇنى سىر ساقلىغانلىقىم، مېنىڭ گۇناھىم، گۇناھىم، گۇناھىم بەك كۆپ، بەك كۆپ. مەن بىر پەسكەش ئايال. مەندەك بىر ئايالنىڭ يەنە داۋاملىق ياشاش سالاھىتى بولمايدۇ.   بۇ قورسۇقىمدىكى بالا مەۋلاننىڭ بالىسى ئاپا، مەن بۇ بالىنى تۇغمايمەن. مەن سىلەرگە يۈز كىلەلمەيمەن. ئۈمۈدۈڭلارنى ئاقىليامىدىم.  پەرزەنتلىك بۇرچۇمنى ئاداقىلالمىدىم.
نازاكەتتىن  دەپ خەتنى ئاخىرلاشتۇردۇم.  بۇ خەتنى يېزىپ بولغۇچە  ئۆكسۈپ-ئۆكسۈپ يىغلىدىم. ياشلىرىم قەغەزلارنى، قوللىرىمنى ھۆل قىلدى. مەن خەتنى چىرايلىق قاتلاپ يەنە بىر پارچە خەتنى يېزىشقا باشلىدىم.
سۆيۈملۈكۈم مەردان
بۇ خەتنى يازغۇچە مەن نۇرغۇن ئىشلارنى قايتىدىن ئويلاپ چىقتىم. سىز مېنى ئاسرىدىڭىز، ئۆزىڭىزدىن ئارتۇق كۆردىڭىز. ھېلىقى نۆۋەت ئاغرىپ قالغاندا، سىز كېچە كۈندۈز يېنىمدا بولدىڭىز، ئاشۇنداق مۇھىم خىزمەتلىرىڭىزنى تاشلاپ ئاپاملارنىڭ قارايمەن دېگىنىگە ئۇنىماي، مېنى باقتىڭىز. سىز بولغاچ، سىزنىڭ مەدىتىڭىز ۋەى ياخشى كۈتىشىڭىز بولغاچ مەن سەللىمازا ساقىيىپ كەتتىم. لېكىن مەن سىزگە نېمە قىلىپ بەردىم، ئاياللىق  مەجبۇرىيىتمنى ئادا قىلالىدىممۇ،  بۇنداق دېسەم، ئاش-تاماقلىرىمنى ئەتتىڭىز،  كىر-قاتلىرىمنى يۇيدىڭىز،  ئۆينى ياخشى تۇتتىڭىز،  ماڭا خوتۇن بولدىڭىز مېنى ئاسرىدىڭىز دەپ بىر مۇنچە  چىرايلىق گەپلەرنى قىلىپ مېنى خۇش قىلىدىغانلىقىڭىزنىمۇ بىلىمەن.  سىز بىرەر قېتىم مېنى ئالداپ باقمىدىڭىز، بىرەر قېتىم مېنى قاتتىق سىلكىپ ۋارقىراپ باقمىدىڭىز. لېكىن مەن سىزگە  شۇنداق قىلدىم. بۇ قانداقمۇ بىر ياخشى ئايالنىڭ پەزىلىتى. سىزگە  يەنە  نۇرغۇن گەپلىرىم بار. يۈز تۇرانە  دېيىشنى ئويلاشقان بولساممۇ لېكىن سىزگە قاراشقا پېتىنالمىدىم. ھېلھەم شۇنداق، قىلغان بارلىق ئەتكەنلىرىمنى ئويلاپ كۈن بويى دەككە-دۈككە، ئەنسىزلىكتە ئۆتتۈم. بەزى گەپلەرنى دېسەم سىز چوقۇم  ئاڭقىرالماي قىلىشىڭىز،  ئىشەنمەسلىكىڭىز ھەتتا بىزنىڭ ئۆيدىكىلەردىنمۇ رەنجىشىڭىز مۇمكىن. تويدىن كېيىنكى ئىشلارنىڭ بىرسىنىمۇ ھېچكىم بىلمەيدۇ. مەن ئۆزۈم باشلىغان تىراگىدىيە، ئۆزۈم ئاخىرلاشتۇراي دەپ ئويلاپتىمەن. لېكىن بۇ ...لېكىن ....
مەن سىزگە ئۆز ۋاقتىدا مەن باشقىلار تەرىپىدىن بوزەك قىلىنغان، سىزگە ماس كەلمەيمەن، ئاشۇ ئادەم تېگىشلىك جازاسىنى تارتىۋاتىدۇ دېگىنىم ئېسىڭىزدىمۇ؟  ئۇ ئادەم دەل سىزنىڭ مەۋلان ئاكىڭىز. ئىككىمىزنىڭ توي كۈنى  مەن ئۇنى ئۇچىراتتىم. ئۇ چەتئەلگە ئەمەس، تۈرمىگە  بۇيرۇلغان.  رەھمەتلىك ئاپىمىز ئەھۋالدىن قارىغاندا سىزنى بەك ئىچىگە ئېلىپ كەتمىسۇن دەپ شۇنداق دېگەن ئوخشايدۇ. لېكىن بۇ مەخپىيەتلىكنى ئاشكارلىماسلىققا ئىلاجىم يوق. بىز توي قىلغان ھەپتە كۈندىن كېيىنلا  مەۋلان ماڭا  تەدىت سېلىپ مېنى كۈندە قورقۇتۇپ  مېنى بوزەك قىلدى. سىز ئىشقا كەتسىڭىزلا ئۇ ئۆيدە پەيدا بولىدۇ. مېنى ئۆزى خالىغانچە كۆڭلىنى خوش قىلدى. مەن سىزگە ئېيتاي دەپ كۆپ تىرىشقان بولساممۇ، سىزنىڭ مەندىن بەكىرەك  تۈگىشىپ كېتىدىغانلىقىڭىزنى بىلىپ دېمىدىم. بۈگۈنكى كۈنگە كەلگەندە مېنىڭ بويۇمدا قاپتۇ. بۇ سىزنىڭ بالىڭىز ئەمەس، مەن ئەسلىدە سىزنىڭ بالىڭىزغا ھامىلىدار بولسام بولاتتى. لېكىن ئىش ئويلىغاندەك بولمىدى. مەن قانداقمۇ سىزنىڭ ۋاپادار، ئەقىللىق، سۆيۈملۈك خوتۇنىڭىز بولاي. مەن ئەسلا لايىق ئەمەسمەن. خۇددى سىز دېگەندەك مەن دوزاخقا مەھكۇم ئايالمەن. مەن پەقەت  سىزگە بۇ ۋاقىتتا مېنى كەچۈرۈڭ دېگەننىلا دىيەلەيمەن. مەن...
خەتنى مۇشۇنچە يازدىم. يەنە يازماقچى بولغان ئىدىم، يەنە نېمىنى يازىمەن. ھەممىسى بۈگۈن ئاخىرلىشىدۇ. نېمىنى يازىمەن. شۇنىڭ بىلەن كەينىگە نازاكەت دەپ يېزىپلا  خەتنى تاماملىدىم. ئىككىسىنى چىرايلىق قىلىپ قاتلاپ، ئاپامغا، مەردانغا دەپ يېزىپ قويدۇم.
شۇنىڭ بىلەن  ئۆزۈم توغرا دەپ قارىغان شۇ يوللىنى تاللىدىم. قاچانلاردىن بىر ۋاقىتلاردا ئۇيقۇم كەلمىدى دەپ ئۇيقۇ دورىسى سېتىۋالغان. شۇ دورىنى تېپىپ چىقتىم.  ئەمدى تېخى سائەت بىر بوپتۇ. مەرداننىڭ كىلىدىغىنىغىمۇ ئالتە سائەت بار ئىكەن. مەن دورىنىڭ ھەممىنى ئىچتىم.
مەن دورىنى ئىچىپ بولۇپ، نۇرغۇن نەرسىلەرنى  ئويلىدىم.
بۇ دۇنيادا رەزىللىككە تولغان.  ئۇنىڭ بىلەن بىر ئۆيدە چوڭ بولغان، گەرچە بىر قان قېرىنداش بولمىسىمۇ، بىر قازان ئاش يەپ چوڭ بولغان. غەزەپ نەپرەتلەر بولغان تەقدىردىمۇ ئاز تولا مېھرى-مۇھەببەتلەر بولغاندۇ؟  ئۇ مەۋلاننىڭ قىلغان ئەتكەنلىرى پەقەت كاللامدىن ئۆتىمىدى. مەن شۇ ۋاقىتلاردا نېمىشقا، نېمىشقا.....
نازاكەت ئۇيقىغا كەتتى. ئۇ مۇشۇنداق پېتى ھېچنېمىنى ئاقىلماي، يا ئاقلانماي ئۇيقىغا كەتتى. ئۇ مەڭگۈلۈك ئۇيقىغا كەتتى.
مەردان ئىشتىن قايتىپ كەلدى.
مەردان ئىشىكنى ئېچىپلا،  خوتۇن بۈگۈن توي قىلغانلىقىمىزنىڭ توپتوغرا ئۈچ ئاي بولغان كۈنكەن. سىزنى تۇيۇقسىز خۇش قىلاي دېدىمغۇ...
_خوتۇن، خوتۇن دەپ چاقىردى مەردان ئايقىنى سالغاچ.
مەرداننىڭ قولىدا يوغان بىر دەستە گۈل يەنە بىر كىچىك سومكا بار ئىدى.
_نازاكەت، نازاكەت، سىرتقا چىقىپ كېتىپتۇ دە  دېدى ئۇ گۈل ۋە باشقا نەرسىلەرنى ئۈستەلگە قويۇپ،  ئاشخانا ئۆيگە كىردى. لېكىن ئاشخانا ئۆيدە ھېچقانداق بىر تاماققا تەييارلىق نەرسىلەر يوق ئىدى.
_بۈگۈن نازاكەت تاماق ئەتمەپتۇ دە، ئۇ چاپاننى سېلىپ ياتاق ئۆيگە كىرىدى. نازاكەتنى كۆرۈپ: _ ئۇخلاپ قاپتۇ دە دېدى ئۇ نازاكەتنىڭ يېنىغا كىلىپ ئولتۇردى.
ئۇ نازاكەتكە تويماي قارايتتى. ئۇ ھېچنىمىنى تۇيمىدى. ئۈستەل ئۈستىدىكى خەتنى كۆرۈپ:- نېمىلەرنى قىلىپ يۈرىيسىز نازاكەت دېدى زاڭلىق ئارلاش تەبەسسۇم كۈلۈپ.
مەردانغا دېگەن خەتنى ئېلىپ :- ئاۋۋال ئوقۇپ باقاي ھە!
مەردان خەتنى ئوقۇپ بولغۇچە قوللىرى تىترەپ كۆزلىرىدىن ياش تامچىلىرى ئەگىشكە باشلىدى.
مەردان غەزەپ بىلەن خەتنى پۇرلىدى دە نازاكەتنى سىلكىدى:- نازاكەت، نازاكەت، نازاكەت.......ئۇ توختىماي ۋارقىرايتتى. يىغلايتتى. ئۇ قاتتىق ۋارقىرىدى. ئۇ غەزەپ بىلەن ئاشخانا ئۆيىگە كىردە قولىغا  پىچاقنى ئېلىپ يانچۇقىغا سالدى.
ئۇ قەھرى بىلەن ئۆيدىن چىقتى.
_نازاكەت، مەن سىزنى جىنىمدىن ئەتىۋار بىلىمەن.  مەن سىزنىڭ يولدىشىڭىز تۇرۇپ، ئەجەپ ھېچنىمىدىن خەۋەردار بولماپتىمەنغۇ؟  مەنمۇ ئەركەكمۇ،  يىقىلىپ چۈشتۈم ، ئەينەك سۈرتكۈچە  تېيلىپ كەتتىم دېسىڭىز ئىشىنىپتىمەنغۇ؟ ئەجەپ ھالىڭىغا يەتمەپتىمەنغۇ. مەنمۇ بىر ئەر كىشىغۇ.... سىز مېنىڭ باغرىم ئىدىڭىز، مەن سىز  ئۈچۈن نېمىلا قىلسا مەيلىدى. مۇشۇ ئازغىنە ۋاقىتتىمۇ سىز بولغاچ مەن ئۆزۈمنى ئىنتايىن مۇكەممەل ئەر كىشى دەپ بىلگەن ئىدىمغۇ....نازاكەت، نازاكەت،  مەن قانداق ياشايمەن نازاكەت...سىز بولمسىڭىز مېنىڭ كۈنۈم قانداق ئۆتىدۇ.. ئۇ تىگىشلىك جازاسىنى تارتسا بولاتتىغۇ.  بۇنىڭ سەۋەبچىسى سىز ئەمەس، مەن،  مەن ئەسلىدە  سىزنى قوغدىسام بولاتتىم، مەن قوغدىيالماپتىمەن، مەن گۇناھكارمەن... مەنمۇ ئەركەكمۇ....
ئۇ توختىماي ئۆزىنى ئەيىبلەيتتى. ئۇ مەۋلان تۇرىۋاتقان  ئۆيگە كەلدى. مەۋلان بۇ ئۆيدىمۇ بىر ئايال بىلەن ئېغىز بۇرۇن يالىشىپ ئولتۇرغان ئىكەن. مەردان ئۈسۈپلا كىرىدۇ دەپ مەۋلاننىڭ زاڭقىغا بىرنى سالىدۇ. يېنىدىكى ئايال ۋايجان، ۋاييەي  دەپ چېرقىراپ چىقىپ كېتىدۇ.
_ سەن نازاكەتنى نېمە قىلدىڭ؟ ئېيتە، سەن نازاكەتنى نېمە قىلدىڭ؟
_مەن نازاكەتنى نېمە قىلغانلىقىمنى دەپ بەرمىدىمۇ دېدى ئۇ  لىۋىدىكى قاننى  باش بارمىقىدا  بوشغىنا سۈرتۈپ قويۇپ.
_سەنمۇ مېنىڭ ئاكاممۇ؟
_كىم سېنىڭ ئاكاڭكەن، سېنى ئايىغاننى بىل. ئەڭ ياخشىسى چىقىپ كەت، مەن سەندەك ماڭقىلارغا ۋاقتىمنى ئىسراپ قىلمايمەن دېدى مەۋلان  يوغان سۆزلەپ كەينىگە ئۆرۈلۈپ ياندىكى ئۆيگە كىرىپ كەتمەكچى بولىدۇ.
مەردان غەزىپىنى باسالماي، شۇ ئەسنادا يۈگۈرۈپ كىلىپ، مەۋلاننىڭ كەينىدىن ئىككى پىچاق ئۇرۇپ پىچاقنى سۇغۇرۋالىدى.
مەۋلان كەينىگە ئۆرۈلۈپلا ئۇنىڭ قولىدىكى پىچاق بىلەن مەرداننىڭ مەيدىسىگە ئۇرىدۇ دە ئىككىلىسى تولغىنىپ يەرگە يىقىلىدۇ. پۈتۈن ئۆينىڭ ئىچى قانغا بويىلىدۇ.
ئۆينىڭ ئىچىدە جىمجىتلىق ھۆكۈم سۈرىدۇ.
دوستىغا قارلىق تۇتقان زۇلپىيە زۈمرەتخاننى ئىزدەپ كىلىپ، ئۇنىڭغا ئۆزىنى تۇتىۋېلىشىنى ئېيتىپ نازاكەتنىڭ خېتىنى تاپشۇرىدۇ.
زۈمرەتخان خەتنى ئوقۇپ بولۇپ، ئاڭقىرالماي قالىدۇ دە:- قىزىم، بۇ نېمە خەت؟ نازاكەت ھازىر دوختۇرخانىدىمۇ ، زادى نېمە ئىش بولدى دەيدۇ.
_ئۆزلىرىنى تۇتىۋېلىپ سۆزۈمنى ئاڭلىسىلا. ھازىر نازاكەتنىڭ ئۆيىنى ساقچىلار تەكشۈرۋاتىدۇ. نازاكەت كەتتى، نازاكەت كەتتى. دەپ يىغلاپ كىتىدۇ.
زۈمرەتخان قولىدا ئاغزىنى ئېتىپ تۇرۇپ قالىدۇ.:- نېمە دېمەكچى، قىزىمغا نېمە بولدى...سىز ...سىز .. ئۇنى ....ئۇنى ...زۈمرەتخان ھوشىدىن كېتىدۇ.
بىرەر سائەتتىن كېيىن زۈمرەتخان ھوشىغا كىلىدۇ. يېنىدا نازاكەتنىڭ دادىسى، زۇلپىيە ۋە باشقا  تۇغقانلار ھەممىسى يىغىلغان ئىدى.
زۈمرەتخان دات ئېيتىپ يىغلاپ:- ھەممە گۇناھ مەندە، مەن شۇ ۋاقىتلاردا قىزىمنى كۆپ ئىشلاردىن توسىمىغان گۇناھ مەندە، بۇ سوراققا قىزىم ئەمەس مەن تارتىلىشىم كېرەك. ۋاي مېنىڭ باغرىم، ۋاي مېنىڭ  جگىرىم. مېنىڭ جېنىم قىزىم،  مېنىڭ بىر تال گۈلۈم، ھەممە گۇناھ مەندە.  ئوبدان قىزىم  چىرايلىق قىزىم...مەردان قېنى،  مەردان قېنى مەردان قېنى ....ھەممەيلەننىڭ زۈمرەتخاننىڭ دات-پاريادىغا قاراپ كۆز يېشى قىلدى.

گۇناھ كىمدە ؟ گۇناھ زادى كىمدە؟  زۈمرەتخاندىمۇ؟  مەۋلاندىمۇ ؟ مەرداندىمۇ؟  نازاكەتتىمۇ؟ ياكى مۇشۇ رەزىلككە تولغان جەمئىيەتتىمۇ؟
ھەممە ئادەم گۇناھنى قىلىپ، خاتالىقنى ئۆتكۈزۈپ بولغاندا گۇناھىنى تونۇيدۇ ۋە تۆۋبە قىلىدۇ. گۇناھ ۋە خاتالىقلارنى قىلىشتىن بۇرۇن ئالدىنى ئالسىچۇ كاشكى ......
تۈگىدى

يامغۇردىكى ۋىسال

ھېكايە

گۈلجەننەت مۇھەممەت

تۈگىدى

 

بۈگۈن ھەقىقەتەن ئىچىمنى بوشىتىۋالغىم كەلدى. ھەقىقەتەن ئىچىم سىقىلدى. نېمىشقا بۇنداق  يېتىرقايدىغانلىقىنى ھەقىقەتەن بىلمىدىم ھەم بىلەلمەيۋاتىمەن. قەلەمنى قولۇمغا ئالدىم. ھەقىقەتەن پاساھەتلىك سۆزلەر بىلەن ياخشى يازالمىساممۇ، لېكىن يەنىلا  قۇرلارنى قەلىبىدىمكى كىشىگە ئېيتساممۇ ئاڭلىمايدىغان، كىشى ئاڭلىسمۇ  ھېچقانچىكى بىلىنمەيدىغان  بايانلىرىم بىلەن تولدۇرۇشقا باشلىدىم.
تۇرمۇش ھەقىقەتەن رەڭگارەڭ، بۇ رەڭۋاز تۇرمۇش رېلىسىدىن چىقىپ كېتەي دەپ قالدىم.  چىقىپ كەتسەم نەگە بارىمەن، قانداق بارىمەن، بارغانسېرى تېخىمۇ مۇرەككەپ بولۇپ كېتىپ بارغاندەكلا... ھەقىقەتەن ئەنسىردىم. مەن  مۇشۇ قىلىپقا كىرىۋالغان بولسام، ئۆزۈمگە قانۇنىيەت قىلىۋالغان بولسام...
ئۇنداقتا  تۇرمۇش  راستىنلا  كىشىلەر دېگەندەك شۇنچىۋالا ئاددىي، شۇنچىۋالا ساپمىدۇ؟ بەزى ۋاقىتلاردا ئامال يوق، سىز شۇنداق دەپ قارىمىسىڭىزمۇ بولمايدىغان بولۇپ قالدى... شۇڭلاشقىمۇ ھەقىقەتەن چارچىدىم...
ئەگەر  سىز ئۇنداق دەپ قارالمايمەن دېسىڭىز ئۇنىڭغىمۇ ئامال يوق. ھەقىقەتەن كىشىنى ھاردۇردى. مەن ھاردىم ھالىمدىن كەتكىلىۋاتىمەن. بۇ قانداقتۇر  ئەمگەكتىن كەلگەن ھارغىنلىق ئەمەس، بەلكى روھى ھارغىنلىق. باشقىلارنىڭ ۋالاقلاشلىرىمۇ بەلكىم شۇنىڭدىن.......
مەيلى سىز راست ياكى يالغان دەپ بىلىڭ لېكىن بۇ ھەقىقەتەن شۇنداق.... بىر قارىسىڭىز ھەقىقەتەن راستەك، بىر قارىسىڭىز ھەقىقەتەن ساختىدەك....
مەن ھەقىقەتەن ئۆزۈمنى بىلىدىغان ئادەم، مەن ھەقىقەتەن ئەخمەق،  مەن ھەقىقەتەن تەبىئىي. ھەقىقەتەن  كىشىلەر مەندىن ئەقىللىق،  مەن ھەقىقەتەن  كىشىلەردىن ئەقىللىق. بۇ ھەقىقەتەن راست دەپ بىلسىڭىزمۇ بولىدىغان ھەقىقەتەن. مەن ھەقىقەتەن باي، بايلىقىم شۇدۇركى  كۆڭۈل بايلىقىم. مەن ھەقىقەتەن نامرات،  يانچۇقۇمدا لىقلانغان  قەغەز پۇللار، ئالتۇنلار،  ئېھتىياجدىن ئېشىنىپ كەتكەن ئۇ بايلىقنىڭ قىممىتى پەقەت پاخاللىق، شۇنىڭ ئۈچۈنمۇ ئۇ بايلىق ئەمەس.  قەلبىم ھەقىقەتەن نامرات. نامراتلىقىم مېنى ھەر يەرلەرگە  تاشلاۋاتىدۇ. ئىشلىرىم ھەقىقەتەن يۈرۈشمىدى،  خۇددى ھەممە غايىب بولغاندەك، خۇددى تەلەي چىراقلىرى ماڭا كەلگەندە ئۆچۈپ قىلىۋاتقاندەك.... مەن ھەقىقەتەن تەلەيلىك، ئىشلىرىم ھەقىقەتەن يۈرۈشتى..لېكىن ھەممە ماڭا پەرۋاسىزدەك....
مەن ھەقىقەتەن قايتىدىن ئويغانماقچى بولدۇم، لېكىن مەن ئۇيقىسىز. ئارزۇلىرىم مېنى قايرىپ قويغاندەك، مەن ئارزۇلىرىمغا  ھەقىقەتەنمۇ تەستە ئېرىشكەن، لېكىن توينىڭ بولدى دېگىنىدىن بولىدۇ دېگىنى مەنىلىكرەك دەپ ئېيتىلغان سۆز ھەقىقەتەن توغرىلىقىنى كۆرسەتتىمۇ قانداق....
مەن ھەقىقەتەن ئۈزۈل-كېسىل بولدۇم، بىراق نېمىدىن ئۈزۈل-كېسىل بولغانلىقىمنى، نېمىدىن ئۈزۈل-كىسىل بولۇشمنى بىلەلمەي يۈرىيمەن. مەن ھەقىقەتەن ئېھتىياجلىقمەن،  مۇھتاجمەن. لېكىن  كام-كۇستىلىرىم يوق . مەن ھەقىقەتەن  بارلىق نەرسىلەرگە ئېرىشىنى ئويلىغان ، لېكىن بۇ ھەقىقەتەن بىر شېرىن چۈش..
مېنىڭ ھەقىقەتەن يۇشۇرنىۋالغۇم كەلدى، لېكىن مېنى ھېچكىم كۆرەلمەيۋاتىدۇ.  ھەقىقەتەن سۆزلىگۈم كەلدى،  ھەقىقەتەن ئاڭلايدىغانلار يوق. ھەقىقەتەن غايىپ بولغۇم كەلدى. لېكىن غايىب بولۇشنىڭ قانداق بولىدىغانلىقىنى پەرەز قىلىپمۇ باقماپتىمەن، ئۇ ئۆلۈممۇ....
شۇنىڭدەك 24 سائەت ئىچىدە ھەقىقەتەن قانچىلىك نەپەسلەنگەنلىكىمنى بىلمەيدىكەنمەن. قانچىلىك نەپەسلەنگىنىمنى دوختۇرىمدىن سوراپ كۆرەي....
مەن ھەقىقەتەن ئويلىدىم، نۇرغۇن نەرسىلەرنى ئويلىدىم، يەنە ئويلاۋاتىمەن، لېكىن يېڭىلىقنى بايقىيالمىدىم. ھەممىسى كونا مۇقامكەن....
مەن ھەقىقەتەن ئۇنىڭ  نېمىگە ئېھتىياجلىق ئىكەنلىكىنى بىلمەپتىمەن، لېكىن  ئۇ مېنىڭ قانداقلىقمنى ھېس قىلغان چېغى....
مەن پۇلنى بەك چوڭ بىلىپ كەتتىم. بۇ كېبىرلىكنى كەلتۈردى. پۇل مېنى شۇنداق ھالەتكە كەلتۈرۈپ قويدىمۇ ياكى ....
مەن تۇرمۇشتىن ھەقىقەتەن سورىدىم بارچە ئەتكەنلىرىمنى، ئەسلى ئۇنداق ئەمەس، ئۆزۈمدىن سورامدىمەن،  ياق ئۇنداق ئەمەس ئاللادىن سورايمۇ ياكى جاۋاب بېرەيمۇ....
مەن ھەقىقەتەن  ھەرىكەتكە كىلىپ نەتىجە قازاندىم. بۇ نەتىجەمدىن بىرەرسىمۇ سۆيۈنمىدى. چۈنكى مەغلۇبىيەت مېنى گاڭگىرىتىپ قويغان.
بۇ مۇساپىلەرنى مەن ھەقىقەتەن مۇشۇنداق داۋاملاشتۇرغانكەنمەن، ئەپسۇس.....
مەن ھەقىقەتەن باشقىلارغا ئوخشاش ياشىدىم.  مۇھەببەت نەپرىتىم بار بولغان.
مېنىڭ ھەقىقەتەن  توي قىلىپ ئىللىق ئائىلە قۇرغۇم بارئىدى. لېكىن ئايغىمۇ يەتمىدى.
مېنىڭ ھەقىقەتەن ئۆي تۇتقۇم كەلمىدى. ھەممىدىن ۋاز كەچكۈم بار،  ئويلاپ كۆرسەم مەندە مەسئۇلىيەت دېگەن نەرسە مەۋجۇت ئوخشايدۇ ئېھتىمالىم.
مەن ھەقىقەتەنمۇ  بىر ئائىلەم  بولسىچۇ دېگەنلەرنى  ئويلايمەن، ئۆزىگە دوختۇر بولۇش بەك جاپالىق ئىكەن. ئۇ پەقەتلا ئىزتىراپ چېكىش......
مېنىڭ قايتىلاردىن ھەقىقەتەن كىچىكلەپ ئۆسمۈرلەر دەۋرىمگە قايتقۇم بار، لېكىن بۇ  ھەقىقەتەن مۇمكىن ئەمەس. چۈنكى يىللار ئادەمنى ئاشۇنداق قېرىتىدىكەن......
مەن ھەقىقەتەن راستچىل  بولۇشنى ئىستىدىم. لېكىن راستچىللىق مەندىن قېچىۋاتقاندەكلا....
مەن  ھەقىقەتەن بىر غەمگۈزار بولغان. لېكىن ۋاپاسىز دەرۋىشلىرى مېنى ئايلىنىپ يۈرمەكتە.....
مەن ھەقىقەتەن ئەمەلىيەتچان ئىدىم،  رەمباللار تۇرمۇشۇمنى خۇنۈكلەشتۈرۋەتتى. بۇنىڭدىكى سەۋەبمۇ يەنىلا ئۆز-ئۆزۈمگە ئاگاھلاندۇرۇش بەرمىگەنلىكىمدىن بولغان.
مەن ھەقىقەتەن تەبەسسۇم  قىلغان ئىدى، لېكىن باشقىلار تەبەسسۇمىمنى  مەسخىرە دەپ بىلىپ قالدى. ئۆزۈمنى ئاقلاشقا ئامالسىز قالدىم.
مەن ھەقىقەتەن ئۆزۈمنى ئاقلاش نىيىتىم بار ئىدى. ئۆۈزۈمنى ئاقلايمەن دەپ نەدە يۈرەي،  مەڭگۈ دىلىمدا ساقلاشنى قارا قىلدىم.  بۇنى پەقەت ئۆزۈم ھەم يەنە نىيىتىمنى ياراتقان ئىگەم بىلىدۇ.
مەن ھەقىقەتەن خۇشال يۈرمەكچى بولغان ئىدىم. لېكىن بۇ خۇشاللىقلار كەينىگە يوشۇرۇنغان قايغۇ ۋەئازاب ئوقىبەتلەر بۇ خۇشاللىقلارغا خاتىمە بەرمەكچى بولىۋاتىدۇ.
مەن ھەقىقەتەن قەدىرىلىمەكچى بولغان ئىدىم.  لېكىن  قەدىرلەشنى ئۆگەنگەن ۋاقتىمدا، ئاللىمىقاچان قولۇمدىن كەتكۈزۈپ قويغانلىرىم بولغان.
مەن ھەقىقەتەن قەدرىگىمۇ يەتكەن. ھازىر مېنىڭ قەدىرىممۇ بەلكىم  ئۆتۈلگەن بولۇشى مۇمكىن.
مەن نۇرغۇن جاۋاب تاپماقچى بولغان لېكىن  بۇ جاۋابلارنىڭ كۆپىنچىسىنى مەن بىلمەيدىكەنمەن.  قايتۇرۇپ سورىماقچىمۇ بولغان، ئەپسۇس مەن سۇئال سورىغۇچىمۇ بولالمايمەن. سوراق ئىگىمىزگە خاستۇر.
مەن بۇ ھاياتلىقتا ھەقىقەتەن نۇرغۇن نەرسىلەرنى قولدىن كەتكۈزۈپ قويدۇم. ھەقىقەتەن نۇرغۇن نەسىلەرنى قولغا كەلتۈردۈم.  قولدىن كەتكۈزۈپ قويغانلىرىم ھەقىقەتەن قولغا كەلتۈرگەنلىرىمدىن كۆپ بولدى.
ھەقىقەتەن مەن تەنھالىقتىن جاق تويدۇم. تەنھالىق مېنى چۆللەردە قويدى. تەنھالىق مېنى قاينامغا ئېلىپ كەتتى. مەن سوغۇرۇلۇپ چىقىۋالسام دەيمەن.
ھەقىقەتەن ئېچىندىمكى ۋاقتىم كۆپ ئىسراپ بولۇپتۇ. ھەممىدىن زور يوقىتىش  ۋاقىتىنى قولدىن كەتكۈزۈپ قويغانلىكەن.
مەن ھەقىقەتەن يەنە داغدام يولدا مەغرۇر ماڭماقچى بولىۋاتىمەن...داۋاملىق .....ھەقىقەتەن شۇنداق.......

تۈگىدى

نۇرغۇن ئىشلار دائىم باشقا كەلگەندە ئاندىن جاپالىق، شېرىن، گۈزەل ۋە ئاندىن قاباھەتلىك بىلىنىدىكەن.  مۇھەببەتتىن كۆڭلۈم ئاغىرىدى. ئاغرىقنى ھېس قىلغاندىن كېيىن ئاندىن ئۆزۈمنى  قوغداشنى بىلىپتىمەن.  مەجنۇنلاردەك بولۇپ قالغاندا، ئاندىن  غەيرەتكە كىلىپ ۋاز كېچىشنى بىلىپتىمەن.  ھەممىدىن ئايرىلغاندىن كېيىن ئاستا-ئاستا ئۆزۈمنى قايتىدىن تونۇپتىمەن. ئەمەلىيەتتە بۇنداق  جاھىللىق قىلىپ تۇرۇۋېلىشنىڭمۇ زۆرۈرىيىتى يوق ئىدى. ۋاز كېچىشنى ئۆگىنىۋالدىم. تۇرمۇش ھەقىقەتەن گۈزەل مەنىلىكتۇر.
مەن ۋاز كەچتىم، كۆز ياشلىرىم بىلەن ئۆتمۈشتىن يۈز ئۆردۈم، پەقەت قالغىنى خاتىرەمدىكى غۇۋا سايىلا خالاس.
مەن ۋاز كەچتىم،  تۆنۈگۈندىكى ئازابنى  قەلبىمنىڭ ئەڭ چوڭقۇر چوڭقۇر بولغان، قايتا قېزىپ چىقىرىلمايدىغان جايلىرىغا كۆمۈپ قويدۇم. پەقەت گۈزەل سىمالار، مەنزىرىلەرلا  تاسقىلىپ قالدى.
مەن ۋاز كەچتىم، ئۆز-ئارا ئەركىنلىك، ئازادىلىك ئارىلىق قويۇشقان بولدۇق. ئىككىلىمىز يېڭىدىن تۇرمۇش كارتىنىسى تۈزۈشنى باشلىدۇق. دەل ئاشۇنداق  ئايىغى چىقمايدىغان ۋەدىلەر قىلىشىپ ئۆزىمىزنى ئالداپ يۈرگەنلىك سەۋەب بولغان. شۇنىڭ ئۈچۈن  ئىككىلىمىز مەيلى ھەرقانداق بىراۋ ئۇنىڭدىن كۆرە مەڭگۈ باشلىنىشى بولمايدىغنا ئاخىرلىشىشنى تاللىغىنى ئەۋزەلرەكتۇر.
كۆڭلىڭىزدىكى ئۇنىڭغا ئېللىق ماكان بېرەلمىگەندىكىن، ئۇنىڭغا پەرۋاز قىلىشىغا بوشلۇقىنى ئاتا قىلىڭ.
ئۇنىڭغا يېپىنچا ياپالمىغاندىكىن ، ئۇنىڭغا  يېپىنچا بولىدىغان نەرسىنى تېپىپ بېرىڭ.
ئۇنىڭغا بەخىت قۇچىقى ئاچالمىغاندىكىن ، ئۇنىڭغا ئۇچۇش نۇقىتىسىنى كۆرسىتىپ قويۇڭ.
ئۇنىڭغا  يىغىلىۋېلىشى ئۈچۈن مۆرىڭىزنى تۇتالمىغاندىكىن، ئۇنىڭغا غۇۋا بولغان سايىڭىزنىلا قالدۇرۇڭ.
ئۇنىڭغا مەڭگۈلۈك بەخىت ئاتا قىلالمىغاندىكىن، ئۇنىڭ خەتەرگە تەۋەككۇل قىلماقچى بولغانلىقىنى ئاڭلاڭ. ئەمەلگە ئاشمىغان ۋەدىنى قىلغاندىن داۋاملىق سۈكۈتتە تۇرۇشمۇ  تېخىمۇ زۆرۈردۇر. مەجبۇرىلاپ  بىللە ياشاشنى تاللىغاندىن كۆرە ئىككىلىمىز ئەركىن ھەم ۋاز كەچكەن ئەڭ ئەۋزەل. بولمىسا ئىككىلىمىز چارچايمىز، ھالىمىزدىن كېتىمىز.....
ۋاز كېچىش قانداقتۇر  قولدىن كەتكۈزۈپ قويغانلىق ئەمەستۇر.
ئۇنىڭغا ئېرىشەلمىگەن بولساممۇ، ئۇنىڭغا داۋاملىق كۆڭۈل بۆلسەم، ئاسرىسام.
ئۇنىڭغا بۇنى بىۋاسىتە يەتكۈزەلمەي قالسام، ھېچ بولمىغاندا بەخىت تىلىسەم. بەخىتمۇ تىلىيەلمىسەم، كۆپرەك كۆزۈم بىلەن كۆرىۋالسام. ئەگەر كۆرەلمەي قالسام، ئۇنى ياد ئەتسەم، ئەگەر ياد ئېتەلمىسەم شېرىن چۈشلەر قوينىدا ئويغانمىسام.
بىراۋنى چىن كۆڭلىڭىزدىن ياقتۇرۇپ قالغاندا، قارشى تەرەپنىڭ سىزگە ئۆزىڭىزنىڭ ھېسسياتىغا ئوخشاش جاۋاب ياكى ئىنكاس قايتۇرىشى مۇمكىن ئەمەستۇر بەلكىم. بىر كۈنلەرگە بارغاندا سىز  ئۆزىڭىزدىن ئايرىلىپ قالغانلىقىڭىزنى ھېس قىلىپ قالىسىز.....مۇھەببەت قانچىكى كۆچەيگەنسېرى ئادەم شۇنچىلىك تۆۋەن ئورۇنغا چۈشۈپ قالىدۇ.  شۇڭا ۋاز كېچىش بىر خىل ھەر قانداق بىر ئادەم  قىلىشنى خالىمايدىغان لېكىن ھوزۇر ئالغىلى بولىدىغان بىر خىل گۈزەللىكتۇر، يەنى ئۆزىگە –ئۆزى تەسەللىي بېرىش ، تېنىچلاندۇرۇش گۈزەللىكىدۇر!
كىشىلىك تۇرمۇشتىكى مۇھەببەت  داۋالغۇچىدا بەزىلەرنى قەدىرىلەپ بولالمايسىز، شۇڭا قولىنى قويىۋېتىڭ. يەنە بەزى ئىشلارمۇ باركىن سىز ئۇنى ئۆز رايىغا قويىۋەتكەندە ئاندىن ئىزىغا چۈشىدۇ.  ئىدىيىنى ئازاد قىلىۋېتىڭ.  تۇرمۇشتا  شۇنچە گۈزەللىكلەر  بار، شۇنچە يېقىملىق.  ئۆزىمىزنى ئۆزىمىز بۇرۇقتىما قىلىشنىڭ نە زۆرۈرىيىتى؟

ۋاز كېچىش بەلكىم ئەڭ توغرا تاللاش!

«ئاجرىشىش» نېمانچە ئېسىل نام بۇ، ۋاقتى كەلسە خەقلەر پۇلغىمۇ سېتىۋالالمايدۇ....
بۈگۈندىن باشلاپ ئەركىنلىككە چىقتىم.  باشقۇرىدىغان خوتۇنمۇ يوق، نەگە بارىمەن دېسە شۇ يەرگە بارالايمەن.  پۇلۇمنىمۇ ئەركىن خەجلىيەلەيمەن ....
ۋاھ ۋاھ ! ئەجەپ يېنىكلەپ قالغاندەك بولدۇم....
شۇنداق قىلىپ مەن بىر قانچە ئاجراشقان دوستلىرىمنىمۇ ئىزدەشكە باشلىدىم. ئۇلارمۇ بويتاقلار بولۇپ، تېلېفونلىشىپ، ئۇچۇرلىشىپ دېگەندەك بۈگۈن بىر دوستىمىزنىڭ ئۆيىدە يىغىلىش قىلدۇق.
بۇلارنى ئارىسىدا ئاجقىراشمىغان لېكىن ئايالى تۆگەپ كەتكەن بىر ئاغىنىمىزمۇ بار ئىكەن.
-ئاداش خوتۇن يوق قانداق بىلىنىۋاتىدۇ دېدى ماڭا بىر رومكا ھاراقنى قويۇپ، سۇنۇپ.
-ھېچقانداق. بەك پەيزە دېدىم مەن ساراڭلاردەك ھېجاراپ.
ھېلىقى ئايالى  تۈگەپ كەتكەن  ئاغىنىمىز سۆز باشلىدى.
-بەك خوشال ئوخشىىمامسەن ئاغىنە. بالاڭ بارمۇ؟
-بار ، ئىككى. دېدىم مەن ھەممەيلەنگە بىر قۇر  قارىۋېتىپ.
-سەن ئالدىڭما؟
-ياق  مەن ئالمىدىم، ئىككىلىسىنى ئاپىسى ئېلىۋالدى دېدىم سەيدىن بىر چوكىنى ئالمان ئاغزىمغا سېلىۋالدىم.
-ئىككىلىسى سېنىڭ بالاڭدۇ؟
-ھەئە ئەلۋەتتە مېنىڭ بالامدە..
-نېمىشقا ئاجراشتىڭ؟
-چىقىشالمىدۇق ئاجراشتىم ....
-پۇشايمان قىلمامسەن؟
-نېمىگە پۇشايمان قىلىمەن، ئوغۇل بالا دېگەن پۇشايمان قىلمايدۇ دېدىم يوغان سۆزلىگەندەك  قىلىپ.
-شۇنداقمۇ دېدى ئۇ ئالدىدىكى چاينى بىر يۇتۇم ئوتلىدى.
-ئەمدى يەنە بويتاق يۈرمەسسەن ...
-ياخشىراقى ئۇچرىسا ئالىمەن، بولمىسا مۇشۇنداق يۈرىيمەن.
-يەنە كۆڭلۈڭگە ياقمىسا يەنە ئاجرىشىپ باشقىنى ئالىمەن دەپ ئويلايدىكەنسەندە؟
-ئەجەبا سەن ئۇنداق قىلمامسەن؟
بولۇپ تەرەپتە ئولتۇرغان يەنە بىر ئاغىنىمىز:- بۇنى توي قىلىۋالغىن دېسەك ھازىرغىچە قىزىم دەپ ياشاپ كىلىۋاتىدۇ. بۈگۈنمۇ بۇ يەرگە ئاران چىللاپ كەلدۇق.
-ھە، مۇنداق دە دېدىم سەل ھەيران قىلىپ.
ئارىمىزدىكى ئەڭ شوخ بىرەيلەن :- ھەي ئاغىنىلەر خوتۇن ھېلى سوراقنى باشلىۋەتمىسۇن،  مەن بالدۇراق قايتمىسام بولمايدۇ، سىلەرگە بىر ئىككى پەدە چېلىپ بېرەي قانداق دېدىم.
ھەممەيلەن چاۋاك چالدى.
ئۇ ناخشىسنى ئېيتىۋەردى. بۇنداق ناخشا چىقىدىغان سورۇنلاردىن  بېرى كىلەلمەيدىغان بولۇپ قالدىم. ھەر كۈنى ھاراق ئېچىپ مەست بولۇپ كېتىمەن. ھەتتا خىزمەت ئورنۇمدىنمۇ ئايرىلىپ قالدىم. كۈنۈم كۈندىن-كۈندىن ئارقىغا دەسسەشكە باشلىدى. مېنى تېخىمۇ بەك قەھەتچىلىك باستى.
بۈگۈن ئۆيدە  يالغۇز ئولتۇرۇپتىمەن. كۈلدان لىق تولغان ئىدى. مەن يەنە  شۇ لىق تولغان كۈلداننىڭ ئۈستىگە تاماكا كۈلىنى قاقتىم. مەن قاپاقتەك بولۇپ كەتكەن بېشىمنى سىلايتتىم، ھېلىقى ئاغىنىمىزنىڭ  گەپلىرى قۇلاق تۈۋىمدە جاراڭلاشقا باشلىدى.
-بەك خوشال ئوخشىىمامسەن ئاغىنە. بالاڭ بارمۇ؟
- بالىنى سەن ئالدىڭما؟
-ئىككىلىسى سېنىڭ بالاڭدۇ؟
-نېمىشقا ئاجراشتىڭ؟
-پۇشايمان قىلمامسەن؟
بۇ  سۇئاللار ئاغرىق  بېشىمنى تېخىمۇ چىڭقىلدۇرۋەتتى.
ئۆينىڭ ئىچىگە باشتىن سەپ سالدىم. ئۆينىڭ ئىچى شۇنچىلىك رەتسىز، بىر يەردە پايپاق، بىر يەردە ئىشتان، ئۈستەل ئۈستىدىكى رومكىلار، بوتولكىلار قالايمىقان يىقىلغان ئىدى.
-ئايالىم بار ۋاقىتتا بۇنداق ئەمەس ئىدى. ئۆيگە كىرسەم ھەر زامان ئىسسىق تاماق،  رەتلىك ئۆي، خۇشال كەيپىيات بار ئىدى. مۇشۇ تۆت ئايدىن بېرى  ھەتتا باللىرىمنىمۇ كۆرمەپتىمەن. ئايالىم  ھەر ۋاقىت  مېنى سۈرۈشتە قىلىپ تۇراتتى. مېنى كونتىرول قىلىپ قالايمىقان بەتخەجلىك قىلىشىمنى خالىمايتتى. ھازىر ئويلاپ كۆرسەم ئۇنىڭ توغرا ئىكەن. ئۇ مېنى دەپ مۇشۇ ئائىلىنى دەپ شۇنداق قىلغان ئىكەن. ئۇ شۇنچىلىك ئاددىي ساددا يۈرەتتى. ئەتكەن تاماقلىرى شۇنچىلىك تەملىك ئىدى. ئەمدى ئويلىسام تۇتامى يوق بىر ئىشلارنى دەپ ئاجرىشىپتىمىز.
ئايالىمىنىڭ:- بالا يېتىم قالىدۇ، ئۆتۈپ كېتەيلى-دەپ يالۋۇرۇشلىرىغا ئەجەپ قارىماپتىمەنغۇ؟ مەنمۇ بىر ئەركەكمۇ؟ ئەقلىم نەگە كەتكەن مېنىڭ؟
ھازىر مەن نېمە بولدۇم، چوڭچىلىق قىلىپ باشقىلارغا  خەجلىگىنىم بىلەن خەق ماڭا نېمە قىلىپ بەردى.  ئاشۇ ئاغىنىمىزگە شۇ ۋاقىتتا ساراڭلاردەك بەرگەن جاۋابلىرىمغا ئەمدى ئاچچىقىم كىلىۋاتىدۇ. ئۇ ئاغىنىمىز ئەسلى مېنىڭ ئەخمەقلىق قىلىۋاتقىنىمنى ھېس قىلغان چېغى....
ئاشۇ ئاغىنىمىزنىڭ نېمىشقا ھازىرغىچە توي قىلماي، قىزى بىلەن ياشاۋاتقانلىقىنى مەنمۇ ھېس قىلدىم. ئۇ ئايالىنى ۋە قىزىنى ئۆزىدىن بەك سۆيىدىكەن.
مەن بۈگۈن پۇشايمان قىلدىم. ئاشۇ يېنىكلىك بىلەن چىقارغان قارارىمنىڭ مېنى بۇ كۈنگە قويغانلىقىغا پۇشايمان قىلدىم.
مەن نە يۈزۈمنى كۆتۈرۈپ باراي، خەپ، خەپ دېدىم ئۆز ئۆزمگە لەنەت ئوقۇپ.
قانداقتۇر بىر كۈچ مېنى:-ئورنۇڭدىن تۇر، ئۇلار ساڭا مۇھتاج، سەنمۇ ئۇلاردىن ئايرىلالمايسەن، ئۇلار سېنىڭ ئەڭ يېقىنلىرىڭ، يۈرەك پارىلىرىڭ دەپ ئۈندەۋاتاتتى.
شۇنىڭ بىلەن مەن بېشىمنى سەل سىلكىۋېتىپ تۇردۇم-دە ئۆيلەرنى ئۆز خاھىشىمچە يىغىشتۇرۇپ تازىلىدىم. ئاندىن ئايالىم ئۆز ۋاقتىدا توي قىلغان خاتىرە كۈنىمىزگە ئاتاپ ئالغان كاستۇم بۇرۇلكىنى كىيدىم. ئىشىكنى تاقاپ مېڭىپ ئۇلارنى ئەكىلىۋېلىش نىيىتىدە يولغا چىقتىم.

تۈگىدى