ئەسسالامۇ ئەلەيكۇم، ھۆرمەتلىك تورداشلار:
     مەن ئايشەمخان ئەمەت، ئايال، ئۇيغۇر، 1962-يىلى 4-ئاينىڭ1-كۈنى تۇغۇلغان، يەككە تىجارەتچى، ئايشەم تورتخانىسىنىڭ خوجايىنى.
     2000-يىلى 4-ئاينىڭ 1-كۈنى بىز ئىلگىرى ئىشلىگەن قومۇل شەھەرلىك كۆمۈر كان ۋەيران بولغانلىقتىن، مەن ۋە يولدىشىم ئىسكەندەر تەڭلا ئىش ئورنىمىزدىن قالدۇرۇلدۇق، كىرىم مەنبەيىمىز ئۈزۈلۈپ قالغاچقا، ئۆزىمىز ئىگىلىك تىكلىمەكچى بولۇپ، تەرەپ-تەرەپلەرگە قاتراپ مەبلەغ توپلاپ، تونۇش-بىلىشلەرنىڭ ياردىمى ۋە ھۆكۈمەتنىڭ قوللىشى بىلەن ئاخىرىدا «ئايشەم تورتخانىسى»نى ئاچتۇق.
      تورتخانىمىز 2003-يىلى 12-ئاينىڭ 17-كۈنى تىجارەت باشلىغاندىن بۇيان، كىچىكلىكتىن زورىيىپ، تەدرىجىي راۋاجلىنىپ، تىجارىتىمىز ئۈزلۈكسىز كېڭەيدى.ھازىر تورتخانىمىزدا 40 نەچچە خادىم ئىشلەيدىغان بولۇپ، دۆلەتنىڭ 40تىن ئارتۇق كىشىنى ئىشقا ئورۇنلاشتۇرۇشتىكى قىيىنچىلىقىنى ھەل قىلىشنى ئۈستىمىزگە ئالدۇق.مىللىي يېمەكلىك كارخانىلىرى ساھەسىدە ئالدىنقى قاتارغا ئۆتتۇق.تورتخانىمىزنىڭ تىجارەتتىكى داڭقى قومۇلنىڭ شەھەر-يېزىلىرىغىچە تارقالدى. تىجارەت كىرىمىمىز ئۈزلۈكسىز ئېشىپ، مىللىيچە تورت كەسپى تىجارىتى بىلەن شۇغۇللىنىدىغانلار ئىچىدە كۆپ باج تاپشۇرىدىغان كارخانىغا ئايلاندى. تورتخانىمىزنىڭ تىجارىتى تازا گۈللىنىۋاتقان چاغدا، قومۇل شەھىرىنىڭ كوچا-كويلىرىدا تۈرلۈك پىتنە-ئىغۋالار تارقىلىپ، "ئايشەم تورتخانىسى ئەۋرەز مېيى ئىشلىتىدىكەن، سودا-سانائەت، يېمەكلىك، سەھىيە ئورۇنلىرى جەرىمانە قويۇپ پېچەتلىۋېتىپتۇدەك"، يەنە تېخى "تورتلارغا چوشقا مېيى قوشىدىكەن" دېگەندەك چىداپ تۇرغىلى بولمايدىغان پىتنە-پاساتلار تارقىلىپ، بىر ئوبدان كېتىۋاتقان تىجارىتىمىزنى ئاقسىتىپ، تورتخانىمىزنىڭ ئابرويىنى تۆكتى، جەمئىيەتتە ئىناقسىزلىق ئامىللىرى ۋە تەشۋىشلىنىش كەلتۈرۈپ چىقىرىپ، خېرىدارلىرىمىزدا يامان تەسىر پەيدا قىلدى. شۇنداقلا مەن ۋە تورتخانىمىزدا ئىشلەۋاتقان خادىملىرىمىزنىڭ جىسمانىي بىخەتەرلىكىگە يوشۇرۇن خەۋپ ئېلىپ كەلدى، تۇرمۇشىمىزنىڭ خاتىرجەملىكى بۇزۇلدى. مەن بۇ ئەھۋاللارنى ئۆز ۋاقتىدا مىللەت-دىن، سەھىيە، سودا-سانائەت ئورۇنلىرىنىڭ، شۇنداقلا ھۆكۈمەت ۋە جامائەت خەۋپسىزلىكى ئورۇنلىرىنىڭ زىچ ھەمكارلىشىپ تەكشۈرۈپ، تەكشۈرۈش نەتىجىسىنى ئاممىغا ئېلان قىلىپ، تورتخانىمىزنىڭ نام-ئابرويىنى ئەسلىگە كەلتۈرۈشىنى ئۈمىد قىلىپ ئىلتىماس يازغان.

     مەن ۋىجدانىم ۋە ئىمانىم بىلەن شۇنىڭغا كاپالەت بېرەلەيمەنكى، مۇسۇلمانلارنىڭ يېمەك-ئىچمەك ئادىتىگە زىت كېلىدىغان ھېچقانداق خۇرۇچ ئىشلەتمىدىم، كىرگۈزگەن خۇرۇچلار مۇنتىزىم شىركەتلەردىن كىرگۈزۈلگەن، مەسىلەن: ئۇننى ئۈرۈمچى مىدۇڭ رايونى «جىنيۈەن» ئۇن زاۋۇتى قاتارلىق ئورۇنلاردىن، پۇرچاق يېغى، ئالىي دەرىجىلىك سېرىق ماي(سۈنئىي قايماق)نى چىنخۇاڭداۋ «جىنخەي»ئالاھىدە يېمەكلىك مايلىرى چەكلىك شىركىتىنىڭ قومۇل شەھەرلىك خەلق دوختۇرخانىسىنىڭ ئۇدۇلىدىكى توپ تارقىتىش ئورنىدىن كىرگۈزگەن، ئۇلاردا چىنخۇاڭداۋ شەھەرلىك مىللەت-دىن ئىشلىرى ئىدارىسى چىقىرىپ بەرگەن مۇسۇلمانچە يېمەكلىك ئىشلەپچىقىرىش ئىجازەتمامىسى بار، «يىنگۇ» ماركىلىق كالا سۈتى خۇشپۇراق تالقىنى قاتارلىق خۇرۇچلارنىمۇ «مېيچېن»گۇرۇھى پاي چەكلىك شىركىتىنىڭ قومۇل شەھەرلىك خەلق دوختۇرخانىسىنىڭ ئۇدۇلىدىكى توپ تارقىتىش ئورنىدىن كىرگۈزگەن، مەزكۇر شىركەت سۈپەت تەكشۈرۈش بۆلۈمىنىڭ بۇ خىل خۇرۇچلارغا ھايۋانات مېيى قوشۇلمىغانلىق ئىسپاتى بار، ئۇ شىركەتنىڭ بۇ خۇرۇچلارنى ئىسلام دۆلىتى بولغان ھىندونېزىيەگىمۇ ئېكىسپورت قىلىۋاتقانلىق ئىسپاتى بار. بىز بۇ خۇرۇچلارنى ھەرگىزمۇ ئىچكىرىدىكى شىركەتلەردىن بىۋاستە كىرگۈزمەيمىز.

      ئاخىرىدا كەڭ ئاممىنىڭ پىتنە-ئىغۋالارغا ئىشەنمەي، مىللىي كارخانىلىرىمىزنى ئىلگىرىكىدەكلا قوللىشىنى ئۈمىد قىلىمەن، مەن بۇندىن كېيىن تېخىمۇ تىرىشىپ، كەڭ مۇسۇلمان قېرىنداشلارنىڭ ئۈمىدىنى يەردە قويماي، ئىزچىل شەكسىز يېمەكلىك ئىشلەپچىقىرىپ، خەلقنى خاتىرجەم ئوزۇقلىنىش ئىمكانىيىتىگە ئىگە قىلىمەن. تورداشلارنىڭ ماڭا كۆڭۈل بۆلگەنلىكىگە ۋە قىممەتلىك تەكلىپ-پىكىرلەرنى بەرگەنلىكىگە ئالاھىدە تەشەككۈر بىلدۈرىمەن، شۇنداقلا كەڭ خەلق ئاممىسىنىڭ تورتخانىمىزغا قەدەم تەشرىپ قىلىپ، ئەمەلىي ئەھۋالنى ئۆز كۆزى بىلەن كۆرۈپ بېقىشىنى سەمىمىي قارشى ئالىمەن.
        كەڭ مۇسۇلمان قېرىنداشلارنىڭ تېنىگە سالامەتلىك، ئائىلىسىگە بەخت تىلەيمەن.







بۇ كىنىشكە بىز ئىشلەتكەن خۇرۇچنىڭ مۇسۇلمان دۆلەت ھىندىنوزىيەگە ئىكىسپورت قىلغاندا ئالىدىغان ھالال
ئىجازەتنامىسى .بۇ خۇرۇچ ھىندىنوزىيەگىمۇ ئىكىسپورت قىلىنىدۇ .

مۇشۇ ئۆزىمىزنىڭ ھالال يىمەكلىكلىرىنى ئىشلەۋاتقان تورتخانىغىمۇ قارا سۈركىگەن يولداشلىرىمىز بار ھە؟ تۆۋۋە!!!!!

پىتنى- پاسات پەيدا بولغاندىلا قاراپ تۇرماي ئوتتۇرغا چىققان بولسىڭىز  ئەھۋال باشقىچە بولار ئىدى .ھېلىمۇ ياخشى ئۆزىڭىز ئوتتۇرغا چىقىپ ئەھۋالنى ئېلان قىلدىڭىز .تىجارىتىڭىز بەلكىم بۇرۇنقىدىنمۇ روناق تاپقۇسى

مەن ھەر قېتىم قومۇلغا بارغاندا قېرىنداشلىرىم مېنى ئايشەم تورىتخانىسىغا ئېلىپ باراتتى، لېكىن بۇ قېتىم قومۇلغا بارغاندا قومۇلدىكى قېرى ياش ، ھەتتا ھەدەمنىڭ 5ياشلىق قىزىمۇ «ئايشەم تورىتخانىسى چوشقا مېيى بىلەن تورت ياسايدىكەن ، ئاكا سەنمۇ ئەمدى بارما جۇمۇ» .ئايشەمخان تورتخانىسىنىڭ يامان گېپىنى قىلىپ يۇرۇيدۇ.
دۇنيادا ئازمايدىغان ئىنسان يوق ، بەلكى سىزنىڭ تورىتخانىڭىزنىڭ تىجارىتىنىڭ ياخشلىغىنى كۆرەلمەيۋاتقان  كەسىپداشلار ياكى بىكار تەلەت گەپ ساتتىلارنىڭ تاپقان گېپى بولۇشى مۇمكىن ، كونىلارنىڭ يالغاننى يۇز قېتىم دىسەڭ راستقا ئايلىنىدۇ دىگىنىدەك ، ھەممە ئادەم ئاشۇنداق دەۋەرسە ،يالغان سۆزگە قوشۇلۇپ پىتنى پاساتلار ئاۋۇپ خېلى بىر يەرلەرگە باردۇ.
بولسا سىز تورىتخانىنىڭ ئالدىغا چوڭراق پىلاكاتقا ئۆزىڭىز تەمىنلىگەن ماتىرياللارنى چاپلاپ قويۇڭ ، ئەگەر شارائىت بولسا ،رادىيۇ ياكى قومۇل گېزىتىدە تېما يوللاڭ .
سودىڭىزنىڭ تېخىمۇ ياخشى بولىشىغا تىلەكداشمىز. ئاللا خالىسا قۇربان ھېيىتتا بارغاندا تورىتخانىڭىزنىڭ ئادەمگە لىق تولغانلىغىنى كۆرگۇم بار ، مېنىڭلا ئەمەس سىرىتتا خىزمەت قىلىۋاتقان قومۇللۇق يۇرۇتداشلارنىڭمۇ شۇنداق ئۇمىدى بار.

    قۇمۇلغا  بېرىپ  قالسام   چوقۇم  سىلىنىڭ  تورتخانىلىرىدا   قەھۋە  ئىچكەچ  تورت  يەيمەن  .

  سىلى  كۆكلىسىلە  سايىلىرى  يەنىلا  ئۇيغۇرغا  چۈشىدۇ  .  
  
  ئەسلى  بۇ  ئىشلارنى  جىمجىتلا  ھەل  قىلغىلىمۇ  بولاتتى  ،   لېكىن  بەزىلەر  بەك  داۋراڭ  سېلىپ  تورلارغا  يوللاپ  بەك  جاپا  تارتىپ  كەتتى  .  

   نى  ئاشخانىلاردا  تاماق  يەيمىز   توخونى  قايسى  مۇسۇلماننىڭ  ئۆلتەرگەنلىكىنى  ، گۆشنى  قەيەردىن  كىرگۈزگەنلىكىنى  سۈرۈشتۈرمەيمىز  ،   ئەمدى  بىر  ئۇيغۇر  ئازراق  روناق  تېپىۋىدى  قىلىۋاتقان  قىلىقىمىزنى  كۆرۈڭ  .

     بىر  ئۇيغۇر  روناق  تاپسا  ئون  ئۇيغۇرغا  پايدىسى  بولىدۇ  .  ئەگەر  سىلى  ۋەيران  بولسىلا  زىيىنى  يەنىلا  ئۇيغۇرغا  بولىدۇ  .  

    ھەممەيلەننىڭ  سىلىنى  قوللىشىنى  ،  بۇندىن  كېيىنكى   سودىلىرىنىڭ  تېخىمۇ  روناق  تېپىشىنى  ئۈمۈت  قىلىمەن  .  

    

بۇرۇنلا مۇشۇنداق قىلىدىغان ئىشتى، قانداقلا بولمىسۇن ئۆزلىرى ئوتتۇرغا چىقىپ بۇ ئىشنى ئوچۇق-ئاشكارە ھەل قىلىپلا، كېيىنكى قەدەملىرىگە بەرىكەت تىلەيمەن!!!!!!!!!!!!!

ئىشلىتىش

بۇ مەزمۇن 1قەۋەتتىكى taratiدە2011-09-08 13:22يوللىغان يازمىسىغا نەقىل :
مۇشۇ ئۆزىمىزنىڭ ھالال يىمەكلىكلىرىنى ئىشلەۋاتقان تورتخانىغىمۇ قارا سۈركىگەن يولداشلىرىمىز بار ھە؟ تۆۋۋە!!!!!

سېنى دەسلەپ مەن باشلاپ كىرگەن ھە؟ ئېسىڭدە بارمۇ، مالاچۈەر يېگۈم بار دەپتىكەنسەن تورتخانىنىڭ تائاملىرىغا ئېغىز تېگىپ باق، بەك ياخشى دەپ باشلاپ كىرگىنىم. بۇ توغۇرلۇق مۇنبەردە شېئېرمۇ ئېلان قىلغانتىڭ!!!!!!!!!

بىكارچىلار ----گۈللىنۋاتقان مىللىي كارخانچىلارغا پىتنە ئىغۋا تارقاتقىچە ،قىمار ئويناۋاتقان قىمارۋازلار،بالىسى بىلەن كارى بولمايۋاتقان مەسئۇليەتسىز ئاتا- ئانىلار ،كوچىدىكى زابويلار ،يولدىن چىقىپ كىتىۋاتقان قىز - چوكانلار ،ئاقچى -نەشىكەشلەر ،خەلقنىڭ دەردىگە يەتمەيدىغان ئازساندىكى يوغان قۇرساقلار ئۈستىدىن پىتنە ئىغۋا تارقىتىڭلار

بولسا مۇشۇ تىمنى باشقا مۇنبەرلەرگىمۇ كۆچۈرۈپ تىخمۇ كۆپ تورداشلارنىڭ كۆرۈشىنى ئەمەلگە ئاشۇرساق،،