2011-يىلى10-ئاينىڭ 4-كۈنى (ئۈرۈمچى)
بۈگۈن كۆڭلۈم شۇنچىلىك يېرىم. چۈنكى، بۈگۈن مەن بىلەن ئىجارىگە ئالغان كىچىككىنە ئىككى ئېغىز ئۆيىمىزدە بىرگە  تۇرىدىغان نەچچە قىز مەلۇم سەۋەبلەر بىلەن باشقا ئۆيگە كۆچۈپ كەتتى. نەچچە ۋاقىتتىن بېرى خۇشال كۈلكە سادالىرى ئۈزۈلمەيدىغان بۇ «مۇساپىرلار لاگىرى» (چوڭلار شۇنداق ئىسىم قويىۋاپتىكەن) ئەمدى توساتتىن تىمتاسلىققا تولغان ئىدى. غېرىب خانەمدە غېرىبلىققا چۆمۈپ يالغۇزغىنە قالدىم. ئىختىيارسىز كونا ئالبۇمنى ۋاراقلاپ بىردە كۈلۈپ بىردە مۇڭسىراپ ئولتۇرۇپ كەتتىم. بىر نەچچە پارچە سۈرەت دىققىتىمنى تارتتى. توغرا، بۇ دەل 2006-يىلى10-ئاينىڭ 4-كۈنىدىكى سۈرەت ئەمەسمۇ؟! ئۇ كۈنى مەركىزىي مىللەتلەر ئۇنىۋېرستېتى ئۇيغۇر تىل ئەدەبىيات فاكۇلتېتىنىڭ 2006-يىللىق ئوقۇغۇچىلىرى بولغان بىز، سىنىپ مەسئۇلىمىز ئارزىگۈل ئابدۇللاھ مۇئەللىم بىلەن بىرگە تىيەنئەنمىن مەيدانىغا تۇنجى قېتىم بارغان ئىدۇق. ئادەتتە ئۇرسىمۇ ئورنىدىن تۇرمايدىغان بىزلەر ئۇ كۈنى تاڭ سەھەر سائەت  تۆتلەردە يولغا چىقىپ، ئىككى سائەتچە پىيادە يول يۈرۈپ، بايراق  چىقىرىش مۇراسىمىنى كۆرگىلى بارغان ئىدۇق. ئۇ چاغدا بىز ئۈچۈن ھەممىلا نەرسە يېڭى ئىدى، ھەممە نەرسىگە قىزىقسىنىپ قارايتتۇق، ھەممىلا نەرسىنى بىلگىمىز، كۆرۈپ باققىمىز كېلەتتى. شۇڭا، بايراق چىقىرىش مۇراسىمىنى كۆرۈش دېگەن قانچە ھاياجانلىق ئىش تۇيۇلغان-ھە؟! ئەمما، بىز ئۇ جايغا يېتىپ بارغاندا بولسا پۈتكۈل مەيدان ئادەم دېڭىزىغا ئايلانغان بولۇپ دۆلەت شېئىرى مۇزىكىسىنى ئاڭلىغان بىلەن بايراق چىقارغۇچىلارنىمۇ تۈزۈك كۆرەلمىدۇقق، بىراق، ئوغۇللار شوخلۇق قىلىپ ئىگىز دەرەخلەرگە يامىشىپ چىقىپ يۈرۈپ   كۆرگەن ئىدى. ئەمما، مەن نەق شۇ ئىشلارنى كۆرىۋاتقاندا بولسا ئۇنچىمۇ ھاياجانلانمىدىم. بەلكىم، رېئاللىق تەسەۋۋۇرۇمنىڭ قولىغا سۇمۇ قۇيۇپ بېرەلمىگەندۇ! ئېسىمىزدىن چىقمايدىغان بىر قىزىق ئىش. بايراق چىقىرىش ئاياغلىشىپ، بىز مەيداندىكى كۆرىنەرلىك داڭلىق ئۇرۇنلاردا رەسىملەرگىمۇ چۈشۈپ بولغاندىن كېيىن،  غۇلجىلىق شوخ بىر قىز ساۋاقدىشىمىز،  ئويناپ يۈرگەن ئوماققىنە بىر خەنزۇ بالىسىغا ئۇيغۇرچە گەپ قىلىپ« ھەي چوشقىنىڭ كۈچۈكى، ئىسمىڭ نىمە؟» دېۋىدى، كىم بىلسۇن بىر  ئادەم ئاسماندىن چۈشكەندەكلا  ئالدىمىزدا پەيدا بولۇپ __ ئۇنىڭ ئىسمى جې فاڭ دېمەسمۇ، ئۇ قىز ئۆڭۈپلا كەتتى. بىز ئەمدى ئىش چاتاق بولىدىغان بولدى دەپ تۇرساق،  ئۇ ئادەم ناھايىتى قىزغىنلىق بىلەن ئۆزىنىڭ ئىلگىرى خوتەندە ھەربىي خىزمەت ئۆتىگەنلىكىنى، ئۇيغۇرچىنى شۇ جايدا ئۆگەنگەنلىكىنى، شىنجاڭنى بەك ياخشى كۆرىدىغانلىقىنى...سۆزلەپلا كەتتى. ئۇنىڭ قىزغىنلىقى بىلەن ئوڭايسىز كەيپىياتمۇ ئوڭشالدى. بىراق، بىز شۇنىڭدىن كېيىن ئۇچرىغانلا خەنزۇغا «بىلمەيدۇ» دەپلا  خالىغانچە ئۇيغۇرچە گەپ قىلمايدىغان بولدۇق. بۇ ئىش ئارىمىزدا خېلى ۋاقىتلارغىچە يۇمۇر بولۇپ يۈرگەن ئىدى. بىزمۇ ئۇ قىزنى « چوشقىنىڭ كۈچۈكىنىڭ ئىسمى نىمىكەن؟» دەپ تىرىكتۈرۈپ گەپكە سالاتتۇق... ھەي شۇ غەمسىز چاغلار، سەبىئىي ۋاقىتلار، يىللار بىزنىڭ شۇ گۈزەل چاغلىرىمىزنى بىلىندۈرمەيلا ئوغرىلاپ كەتتى.ئۇ چاغدىكى سەبئىي چىرايلارغا ۋاقىتنىڭ ھەرخىل تامغىلىرى بېسىلدى، ئۇ چىھىرلەردە ئەمدى ئۇ سەبىئىيلىكنى مەڭگۈ تاپالمايمىز،  ئەمدى بىزگە قالغىنى پەقەتلا تاتلىق ئەسلىمە. ساۋاقداشلىرىم، مەن سىلەرنى شۇنچىلىك سېغىندىم. ئەگەر قولۇمدا پۈتكۈل دۇنيانى سېتىۋالغۇدەك بايلىق بولۇپ سىلەر بىلەن بىر كۈن بىر پارتىدا بىرگە ئولتۇرۇپ دەرس ئاڭلاشنى سېتىۋالغىلى بولىدىغان بولسا،  مەن قىلچە ئىككىلەنمىگەن بولاتتىم. ئاللاھ سىلەرنى قەيەردە بولساڭلار ئەزىز قىلغاي!  

بۇ تىما  53 قېتىم كۆرۈلگەنگە قەدەر مەندىن باشقا ھېچكىم ئاۋاز قوشۇشنى خالىماپتۇ. سەبىر قىلىپ باقسام ئۇمۇ بولۇپ قالار-ھە!؟

ئىشلىتىش

بۇ مەزمۇن 8قەۋەتتىكى taratiدە2011-10-05 22:05يوللىغان يازمىسىغا نەقىل :
10-ئاينىڭ بەشىنچى كۈنى
بۈگۈن ماڭا ئانچە كۆڭۈللۈك كۈن بولمىدى. ئىككى -ئۈچ قېتىم كۆڭلۈم ئاغرىدى. مەن قىزغىن، خۇشچاخچاق بولغىنىم بىلەن كۆڭلۈم نازۇك، ئاسان ئازار يەيمەن. بۇ ئىشىمنى قانداق تۈزەتسەم بولار دەپ ئويلاپ كىتىمەن. ئازار يىسەم ئاسان بولدى قىلىۋەتكىنىم بىلەن ئىسىمدىن پەقەت كۆتىرىلمەيدۇ، يىللار ئۆتكەندىن كىيىنمۇ ئۇ ئىشلارنى ئۇنتۇپ كىتەلمەيمەن.  
دېرىزىدىن سىرتقا قاراپ چاي ئىچكەچ ئۇزاققىچە تۇردۇم. شامال مېنى توڭدۇرغاندىلا ئاندىن دېرىزىنى يېپىپ، تەرجىمەمگە باش چۆكۈردۈم. ئىشلار جىق. قىلىدىغان ئىشلار رەت-رەت ..لېكىن ۋاقتىم ئانچە جىق ئەمەس....

ئامال بار گۈزەل چاغلارنى، قىزىقارلىق ئىشلارنى ئويلاڭ. بەك يالغۇز قالماڭ. كۆپچىلىك تۇرمۇش ئىچىدە ياشاش كىشىنى ئازاپلىق، كۆڭۈلسىز خىياللاردىن نېرى قىلىدۇ، ئىنشائاللاھ! ئىشلىرىڭىزغا ئۇتۇق يار بولسۇن!ئانچىكى كىشىلەرنىڭ دەپ قويغان گەپلىرىگە كۆڭلىڭىزنى يېرىم قىلماڭ! گۈزەل قەلب گۈزەللىككە ھامىلىدار.

2011-يىلى5-ئۆكتەبىر.
بۈگۈن ئىنتايىن ۋە ئىنتايىن ئادەتتىكى بىر كۈن بولدى. ئەمما، ئوخشىمايدىغان يېرى شورپا سالىمەن دەپ ئېھتىياتسىزلىقتىن قىزىق كورىنى تۇتۇپ سېلىپ قولۇمنى كۆيدۈرىۋالدىم. قولۇم دەھشەت ئېچىشىپ ئاغرىپ بەك ئارامسىزلاندىم. شۇنىڭ بىلەن كۆيدۈرگۈچى دەۋزەقنى خىيال قىلىپ، مۇشۇنچىلىك كۆيۈككە بەرداشلىق بېرەلمىگەن مەن دەۋزەققە مەھكۇم بولۇپ قالسام قانداق قىلامەن دېگەنلەرنى ئويلاپ قاتتىق قورقۇنۇش ئىچىدە قالدىم. ئاللاھ ھەممىمىزگە رەھمەت قىلىپ ئاشۇ كۈچلۈك ئوتتىن ساقلىغاي! ھەممىمىز ئىش قىلغاندا بىزنىڭ بىر مۇسۇلمان ئەۋلادى ئىكەنلىكىمىزنى، ئاللاھنىڭ ئازابىنىڭ قاتتىق بولىدىغانلىقىنى ئۇنۇتمايلى قېرىنداشلار!  

بۈگۈن بارلىق يېقىن-يورۇقلىرىم ماڭا ئاجايىپ قىممەتلىك بىلىنمەكتە. ئۆيدىكىلەرنى سېغىنىپ ئولتۇرۇپ «ئەڭ گۈزەل ئايال» دىكى مۇنۇ قۇرلارنى نەچچە رەت ئوقۇپ كۆزلىرىمگە ئىسسىق ياش ئالدىم. بەلكىم بۈگۈنكى سېغىنىشلىق تۇيغۇم بولمىغان بولسا بۇ بىر ئابزاس ئۆز ئىچىگە ئالغان مەنا چوڭقۇرلۇقىنى ئۇنچىلىك ھېس قىلالمىغان بولار ئىدىم.  «ئاتىلىق مېھىر شۇنداق بولىدىكەن، ئادەتتە سىز ئۇنىڭ مەۋجۇتلىقىغا سەل قارايسىز، ئۇ ھاۋاغا ئوخشاش سىز ئايرىلسىڭىزلا ياشىيالمايدىغان سەزگۈ ئەمەس، ياكى سۇغا ئوخشاش سىزگە ھەرۋاقىت مۇھىمدەك تۇيۇلماسلىقى مۇمكىن، لېكىن ئۇ بىزگە ئۇيقۇدەك مۇھىم ، ئادەتتە مۇھىملىقىنى ھېس قىلىپ كەتمەيسىز، لېكىن، ئۇنىڭدىن ئايرىلىپ قالغاندىكى تەشۋىشنى تەسەۋۋۇر قىلىش تەس ، ئۇ سىزگە ئاجايىپ ئىللىقلىق ئاتا قىلىدۇ. سىز سەزمىگەن چاغلاردا سىزگە دىققەت قىلىدۇ، پۈتۈن ۋۇجۇدى بىلەن سىزنى ئوراپ تۇرىدۇ، بۇ مېھىر سىز بىلەن تەڭ تۇغۇلىدۇ، ئاشۇ سۆيۈملۈك ئاتىڭىز بىلەن تەڭ كېتىپ قالىدۇ.»........................
دادا، ئانا سىلەرنىڭ ئالدىڭلاردا بىلىپ- بىلمەي قىلغان ھۆرمەتسىزلىكلىرىمنى ئاللاھ كەچۈرگەي! سىلەرمۇ كەچۈرگەيسىلەر ئىلاھىم! مەن دۇنيادا ماڭا سىلەردەك كۆيۈمچان بىراۋلارنى ئۇچرىتىپ باقمىدىم ھەم كۆزۈممۇ يەتمەيدۇ. دادا،سېنىڭ ئاشۇ سۈرلۈك چىرايىڭ پەردىلەپ تۇرغان مېھىر بۇلىقىنى بارغانسىرى تونۇپ يېتىۋاتىمەن. ئاللاھ سەندىن رازى بولسۇن! ئاتا-ئاناڭلار يېنىڭلاردا بار بولغان قېرىنداشلىرىم ئۇلارنى قەدىرلىگەيسىلەر! بولمىسا مەندەك دادا،ئانا دەپ بولغۇچە كۆزۈڭلاردىن ياش ئەگىيدىغان «ئۇششۇق» بولۇپ قالىسىلەر!

ئىشلىتىش

بۇ مەزمۇن 28قەۋەتتىكى taratiدە2011-10-09 16:12يوللىغان يازمىسىغا نەقىل :
لەغمەن، ئۆيدە ئەتكەن لەغمەن سېغىنىپ كەتتىم!!!!      

ھەي ئېسىت، ئۈرۈمچىدە بولغان بولسىڭىز ئوخشىتىپ بىر لەغمەن قىلىپ بىرەكەنمەن. شىنجاڭنىڭ بېيجىڭدىكى ئىش بىجىرىش ئورنىدىكى لەغمەنمۇ ئوخشايدۇ. ماڭا ھەممىدىن ئۈرۈمچى ئىش بىجىرىش ئورنىدىكى لەغمەن يارايتى. ھە راس. بىزنىڭ مەكتەپ(مىللەتلەر ئۇنىۋېرستېتى) نىڭ شەرقىي كىچىك دەرۋازىسىدىن چىقىپ، يولنىڭ قارشى تەرىپىدىكى بىكەتتىن 26-،614-يول ئاپتۇبۇسىغا ئولتۇرۇپ يەر تەۋرەشتىن خەۋەر بىرىش ئىدارىسىنىڭ بېكىتىدە چۈشۈپ قېلىپ ئالدىڭىزغا 200مىتىرچە ماڭسىڭىز "ئىبراھىم لەغمەنخانىسى" دەيدىغان بىر لەغمەنخانا بار.شۇ يەرنىڭ لەغمىنى ئوخشايدۇ.

ئىشلىتىش

بۇ مەزمۇن 33قەۋەتتىكى taratiدە2011-10-10 14:00يوللىغان يازمىسىغا نەقىل :
بىرسى ئاپارمىسا تېپىپ بارالمايدىكەنمەن..
ئەمما بۈگۈن ئۆز قولىمىز بىلەن پولۇ ئېتىپ يىدۇق...شۇنداق ئوخشاپتۇ.

ھەي ئىسىت ئۆزۈملا بولغان بولسام...
ئۇ جايلارنى تېپىش بەك ئاسان. باشقىلاردىن سوراپمۇ تېپىپ بارالايتىڭىز. ئاسپىرانت ساۋاقداشلىرىمغا تاپىلاپ قويسام بولامدىكىن يا بولمىسا.

بۈگۈن ئېچىنىشلىق بىر ئىش بولدى ماڭا. ماۋۇ كومپىيۇتىرىمنىڭ توكقا چاتىدىغان سىمى كۆيۈپ كەتتى. ماۋۇ باتارىيەنىڭ مېيى تۈگىسە كومپىيۇتىر ئىشلىتەلمەيدىغان بولدۇم ئەمدى. يا بىر ئۇ نەرسىلەرنى ساتىدىغان جاينى بىلمەيمەن.  كومپىيۇتىردا  قىلىدىغان يامان جىق ئىشىم بار ئىدى.  

بۈگۈن كومپىيۇتىرىمنىڭ توكقا چاتىدىغان سىمىنى ئېلىپ ئاخىرى تورغا چىقالىدىم. شۇنداق خۇش بولدۇم. ئەمما، دوستىمىز سەھەر، ئېقىن ۋە ئەركىم ئاكامنىڭ يازمىلىرىنى كۆرۈپ ئىچىم ئاچچىق بولۇپ قالدى. ھەممىمىزنىڭ ئۆزىمىزگە يارىشا دەرد-پراقلىرى بار ئىكەن. ئاللاھ ھەممىمىزنىڭ دەردلىرىگە «شىپالىق» بەرگەي! ئامىن!

ئەسسالامۇ ئەلەيكۇم مۇنبەر ئەھلى، جۈمە مۇبارەك!
     بۈگۈن ھەر كۈندىكىگە ئوخشاشلا ئادەتتىكى بىر كۈن ئىدى. بىراق، چۈشلۈك تاماق ئېتىۋاتقاندا، سول قولۇمنىڭ كۆرسەتكۈچ بارمىقىنىڭ تىرىنىقىنى تەڭ يېرىمىدىنلا كېسىۋېلىش بىلەن بۈگۈن ماڭا "ئەھمىيەتلىك" بىر كۈن بولۇپ قالدى. بۇ كىچىككىنە بارمىقىم 365كۈن مەن ئۈچۈن خىزمەت قىلسا مەن ئۇنىڭ مۇھىملىقىنى ھېس قىلمىغانكەنمەن. بىراق، بۈگۈن تاماق ئەتكىچە قولۇمدىن توختىماي قان چىقىپ كۆزلىرىمدىن ياش ئېقىپ كەتتى. "مىڭ نەسىھەتتىن بىر مۇسىبەت ئەلا" دېگەن گەپنى تىگى تەكتىدىن چۈشەندىم. ئاللاھنىڭ ئىنسان ۋۇجۇدىنى يارىتىشىدىكى مۇكەممەللىككە قايىل بولماي تۇرالمىدىم. گۈزەل ئاللاھىم، بەش ئەزايىمنى تولۇق، ھەرىكەت قىلىشىمغا قولاي قىلىپ ياراتقانلىرىغا چەكسىز شۈكرىلەر بولسۇن!

ئىشلىتىش

بۇ مەزمۇن 58قەۋەتتىكى arsilanدە2011-10-14 18:09يوللىغان يازمىسىغا نەقىل :
ئەسسەلامۇ ئەلەيكۇم سەبىر؛
بازاغا گۆش ئالغىلى چىقماپسىزمۇ نىمە .ئەتكەن تامىغىڭىزدىن قان ھىدى كەپ تۇرىدىكەندە ،مىزلىك بوپتىمۇ....    ئويۇن قىپ قويدۇم ھە ،كەچتە ئۇخلاماي تۇرما ھەنە .
سورىسام ئاچچىقىڭىز كەلمەس ھە .ئۈرۈمچىدە بىرەر نەرسە ئۆگىنىۋاتامسىز نىمە .مەركەزدە ئوقۇپ يەنە ئۇيغۇرنىڭ مەركىزى شەھرىدەكەنسىز .

ۋەئەلەيكۇم ئەسسالام ئارسىلان:
پىشىپ بولغان تاماقتىن قانداقسىگە قان ھىدى كەلسۇن؟! چۈچۈگەن مايغا بىرلا سېلىپ قورىۋىدىم قان ھىدى ھېچنەدە قالمىدى.   تاماق شۇنداق ئوخشاپ كىتىپتۇكى يىگەن قىزلار ماختىشىپلا كەتتى. دېمىسىمۇ گۆشنىڭ قىممەتچىلىكىدە بۇمۇ بولىدىغان ئىشكەن ئەمەسمۇ...    ئۈرۈمچىدە خىزمەت قىلغاچ ئۇنىڭدىن بۇنىڭدىن ئۆگىنىپ شۇ. ئەمما، ئەمدى قەيەردە ئىشلەيسىز دېگەن سوئالنى سورىماسلىقىڭىزنى ئۈمىد قىلىمەن. چۈنكى، بۇ دېگەن دۆلەت دەرىجىلىك مەخپىيەتلىك.