قەدىمقى ئۇيغۇر شائىرى كەكمىنېر
كەكمىنىر 8-ئەسىرنىڭ ئاخىرى 9-ئەسىرنىڭ باشلىرىدا قەدىمقى مىرەن(ھازىرقى چارقىلىق)شەھىرىدە ياشىغان ئۇيغۇر شائىرلىرىنىڭ بىرى بولۇپ،ئۇنىڭ بىزگە يىتىپ كەلگەن ئەسىرى خەنزۇ تىلىدايېزىلغان بىر شېئىرلار توپلىمى بولۇپ،بىز بۇ توپلامدىكى<<خەت ئۇگىنىش>>،<<بالامغا تەلىم>>،<<چىلبۆرىلەر ئۇستىدىن شىكايەت>>قاتارلىق شېئىرلىرىدىن بۇ كىشىنىڭ يېتىلگەن شائىرلارنىڭ بىرى ئىكەنلىگىنى بىلەلەيمىز.ئۇنىڭ <<بالامغا تەلىم>>دىگەن شېئىرىدا مۇنداق قۇرلار بار.
بالام گۇدەك ئوقۇشقا كۆڭۇل قويمايدۇ،
كىتاپ ئىچىدە ئالتۇن بار،ئۇنى ئۇقمايدۇ.
بىلسە ئىدى كىتاپتىكى ئالتۇن قەدرىنى،
ئوقۇر ئىدى تاڭ ئاتقۇچە،يېقىپ چىراقنى.
شائىر بۇ شېئىرىدا كىتاپنىڭ قەدىر قىممىتىنى ئوبرازلىق سۇرەتلەش ئارقىلىق،كىشلەرنى تىرىشىپ بىلىم ئىگەللەشكە چاقىرغان.بۇنىڭدىن شائىرنىڭ كىتاپقا بەك ئامراق،ئىلىم-پەنگە خۇشتار خاراكتىرىنى ئېنىق كۆرۇپ ئالالايمىز.
شائىرنىڭ ئىجادىدىكى يەنە بىر ۋەكىللىك ئەسىرى مىلادى815-يىلى يېزىلغان<<چىلبۆرىلەر ئۇستىدىن شىكايەت>>ناملىق شېئىرى بولۇپ،ئۇنىڭدا جەنۇبىي شىنجاڭغا تاجاۋۇز قىلىپ كىرگەن تىبەت باسقۇنچىلىرى ئۇستىدىن شىكايەت قىلىش ئارقىلىق ئۆزىنىڭ يۇكسەك ۋەتەنپەرۋەرلىك ئىدىيىسىنى نامايەن قىلغان.
چەتتىن كەلگەن چىلبۆرە نېنىمىزنى يەپ كەتتى،
شوراپ قانۇ-يىلىكنى بارىمىزنى ئەپ كەتتى.
ئاشلىقىمىز خاماندا،بوزلىرىمىز دۇكاندا،
تۇرغان پېتى شۇلارنىڭ ئولجىلىرى بوپكەتتى.
قاچان بولسا بىر كۇنى يەر ۋە جاھان ئۆزگىرەر،
چىلبۆرىلەر يوقىلىپ،بىزگە ئىللىق تاڭ كۇلەر.
شېئىر ئەينى ۋاقىتتىكى رېئاللىقنى توغرا ئەكس ئەتتۇرۇش جەھەتتە ۋە ئالغا سۇرۇلگەن ئىدىيىسىنىڭ يۇكسەكلىكى جەھەتتىنلا ئەمەس،تىلىنىڭ ئاددى-ساددا چۇشىنىشلىك،ئاممىبابلىق،ئوبرازلىقچانلىقى،ھىسسىياتىينىڭ ساغلام ھەقىقى بولۇشتەك بىر قاتار ئالاھىدىلىكلىرى بىلەنمۇ،قەدىمقى زامان شېئىرىيتىنىڭ ئۇلگىسى بولۇشقا مۇناسىپ.شۇنىڭ بىلەن بىرگە ئۇنىڭ ئىلىمنى قەدىرلەش،ۋەتەنگە،ھەققانىيەتكە بولغان چوڭقۇر مۇھەببىتى ھەر بىر ئۇيغۇر پەرزەنتىگە ئۇلگە بولۇشقا تېگىشلىك.