ئەپەندىمنىڭ بىر سازەندە ئاغىنىسى ئەل - ئاغىنىلەر يىغىلغان بىر سورۇندا، دۇتارنى تىرىڭ - تىرىڭلا قىلىدىكەن، توختاپ دۇتارنىڭ قولىقىغا تۈكۈرىدىكەن، يەنە ئىككىلا پەدە چالىدىكەن، توختاپ دۇتارنىڭ قۇلىقىغا تۈكۈرىدىكەن. ئەپەندىم بۇنىڭغا ئىچى پۈشۈپ ئولتۇرسا، ھېلىقى ئاغىنىسى يېنىدا ئولتۇرغان ئەپەندىمگە
: - ئاداش، قۇلاققا تۈكۈرۈپ قويۇڭلار، - دەپتۇ. ئەپەندىم بولىدۇ، دەپتۇ - دە، ئاغىنىسىنىڭ قۇلىقىغا بىرنى تۈكۈرۈپتۇ.
ئەپەندىمنىڭ سازەندى ئاغىنىسى دەررۇ ئورنىدىن تۇرۇپ: - ئەپەندىم، مەن سىزنى قۇلىقىمغا تۈكۈرۈڭ، دېمىدىم، دۇتارنىڭ قۇلىقىغا تۈكۈرۈڭ! دېدىم، - دەپتۇ.
- خاپا بولماڭلار ئاداش، - دەپتۇ ئەپەندىم ھېچنېمىنى بىلمىگەن قىياپەتتە، - مەن تېخى سىلەرنى قۇلىقىمغا تۈكۈرۈپ قويۇڭلار دەۋاتىدىغان ئوخشايدۇ، دەپتىمەن، دەپتۇ.
ئەپەندىم ئىمامەتچىلىك قىلۋاتقان مەسچىتكە يېپيېڭى گىلەم سېلىنغانىكەن، يىراق - يېقىنغا داڭقى كەتكەن بىر قىمارۋاز ئۆيدىكى پۇل - پۈچەك ۋە مال - مۈلكىنى ئۇتتۇرۇۋەتكەندىن كېيىن تەپتارتماستىن مەسچىتتىكى گىلەملەرنى ئوغرىلاپ ئۆيىگە سېلىپ قويۇپتۇ. ئەپەندىم بۇ ئىشنى ئۇقۇپ بىر كۈنى ئەتىگەن جامائەتنى باشلاپ ھېلىقى قىمارۋازنىڭ قورۇسىغا بېرىپتۇ. بۇ جامائەتنى كۆرۈپ ھودۇقۇپ كەتكەن قىمارۋاز ئەپەندىمدىن:
- ئىمام ئاخۇنۇم، بامدات نامازنى مەسچىتتە ئوقۇماي بۇ يەرگە كىرگەنلىرىگە قارىغاندا، يېڭىلىپ قالدىلىمۇ، نېمە؟ - دەپ سوراپتۇ. - يوقسۇ، - دەپتۇ ئەپەندىم قىمارۋازغا چۈشەندۈرۈپ:
- تۈنۈگۈن قورۇيىڭىز ئالدىدىن ئۆتۈپ كېتىۋېتىپ، قورۇيىڭىزغا قارىسام، ساپلا مەسچىتنىڭ گىلەملىرى سېلىقلىق تۇرىدۇ، شۇنىڭغا
قاراپ مەسچىت سىزنىڭ قورۇيىڭىزغا يۆتكىلىپ قالغان ئوخشايدۇ، دەپتىمەن. قىمارۋاز بۇنى ئاڭلاپ ئۆپكىدەك قىزىرىپ كېتىپتۇ
ئەپەندىمنىڭ ئايالى كاسسىغا چۈشۈپ تۇرىدىغان چىرايلىق ئىككى ئۆرۈمە چېچىنى ئەپەندىمگە دېمەي ساتىراشخانىدا كەستۈرۈۋېتىپ چېچىنى بۈدۈرەت قىلدۇرۇپ قايتىپ كېلىۋاتسا ئەپەندىم ئۇچراپ قاپتۇ. ئەپەندىم قېرىغىنىنى تۇيماي چېچىنى بۈدۈرە قىلىۋالغان خوتۇنىنى كۆرگەن بولسىمۇ تونۇمىغانغا سېلىپ كېتىۋېرىپتىكەن، ئايالى:
- ھوي ئەپەندىم، كۆزلىرىنى يۇمۇپلا ماڭماي، ئىككى يانغا قاراپ ماڭسىلا! يېنىلىرىدىن ئۆتۈپ كېتىۋاتقان باشقا بىرى ئەمەس، بەلكى ئۆزلىرىنىڭ خوتۇنلىرى بولىدۇ، - دەپ ئەپەندىمگە خاپا بولۇپتۇ.
- شۇنداقمۇ خوتۇن، - دەپتۇ ئەپەندىم خوتۇنىغا قاراپ قويۇپ، - سىلەر مېنىڭ خوتۇنۇم بولامسىلەر؟ مەن تېخى ئەركىشىمىكىن دەپ قاپتىمەن.
