جۇڭگولۇقلار بىلەن ياپونلۇقلارنىڭ مۇۋەپپەقىيەت چۈشەنچىسى

niku

                         جۇڭگولۇقلار بىلەن ياپونلۇقلارنىڭ مۇۋەپپەقىيەت  
                                    چۈشەنچىسىدىكى پەرق 

                            ياپونچىدىن تەرجىمە قىلغۇچى: نىكۇ    

       ياپونلۇقلارغا نىسبەتەن مۇۋەپپەقىيەت تىنىمسىز تىرىشچانلىقنىڭ نەتىجىسىدۇر. "تاما – تاما كۆل بۇلار" دېگەندەك، ئادەتتىكى تىرىشچانىق داۋام قىلىۋەرسە چوڭ نەتىجە كېلىپ چىقىشىنىڭ مۇقەررەرلىكىنى ئاتا – ئانىلارمۇ، مەكتەپمۇ تەكىتلەيدۇ. بولۇپمۇ ياپونىيەدىكى ئاق ياقىلىقلار ئۆزى تۇرىۋاتقان مۇھىتقا بويسۇنغان ھالدا يۇقىرى ئۆرلەش يولىدا ئىزدىنىدۇ. مەسىلەن، ئۇلار شىركەتتىن پىنسىيەگە چىقىپ بەش يىل ياكى ئون يىل ئۆتكەندىن كېيىنمۇ ئۆزلىرىنى "پالانى چوڭ شىركەتنىڭ سابىق خىزمەتچىسى" "پالانى شىركەتنىڭ سابىق بۆلۈم باشلىقى" دەپ تونۇشتۇرىدىغانلار ئىنتايىن كۆپ ئۇچرايدۇ. ئۇلارنىڭ ھاياتىنىڭ ئەڭ گۈزەل مەزگىللىرى شىركەتتە ئۆتكەن، شۇڭا ئىلگىرىكى خىزمەت – ئەمەللىرىنى ئىزچىل ئەسلەپ تۇرىدىغان، ئۇنتۇپ كېتىشنى خالىمايدىغان ھېسسىياتىنى بىلىشكە بولىدۇ. "مەن 30 يىل بولدى ئىزچىل مۇشۇ شىركەتتە ئىشلەپ كېلىۋاتىمەن" دەپ پەخرلىنىدىغان ياپونلۇق ئاق ياقىلىقلارغا جۇڭگولۇقلارنىڭ نەزىرى بىلەن قارايدىغان بولساق، ئۇلارنى "قالتىس" دېگەندىن كۆرە يەنىلا "بىچارە" دېيدىغان خائىش كۈچلۈك ئىپادىلىنىدۇ. 
        2010 – يىلى ھەرقايسى دۆلەتلەردىكى ياشلارنى ئوبيېكت قىلىپ ئېلىپ بېرىلغان راي تەكشۈرۈشتە "كەلگۈسىدە ئىگىلىك تىكلىگىم بار" دەپ جاۋاب بەرگەن ياپونلۇقلارنىڭ نىسبىتى %39 ئەتىراپىدا، "كەلگۈسىدە داڭدارلاردىن بولۇشنى كۈچلۈك ئارزۇ قىلىمەن" دەپ جاۋاب بەرگەنلەر پەقەت %8، "نورمال ياشىيالىغىدەك كىرىم بولسىلا، ئازادە ياشىغۇم بار" دەپ جاۋاب بەرگەنلەر %43 كە يەتكەن. يەنە مۇشۇ راي تەكشۈرۈشتە "كەلگۈسىدە ئىگىلىك تىكلىگىم بار" دەپ جاۋاب بەرگەن جۇڭگولۇقلارنىڭ نىسبىتى %71 كە، "كەلگۈسىدە داڭدارلاردىن بولۇشنى كۈچلۈك ئارزۇ قىلىمەن" دەپ جاۋاب بەرگەن جۇڭگولۇقلار %34.4 كە يەتكەن، "نورمال ياشىيالىغىدەك كىرىم بولسىلا، ئازادە ياشىغۇم بار" دەپ جاۋاب بەرگەنلەر پەقەت %17.8 تىن ئاشمىغان.
         يەنە بۇيىل (2012 - يىلى) 3 – ئايدا مېيجى ياسۇدا ھاياتلىق ھەمسۇغۇرتا شىركىتى پۈتۈن مەملىكەتتىكى يېڭى قۇبۇل قلىنغان شىركەت خادىملىرىنى ئوبيېكت قىلىپ ئېلىپ بارغان راي تەكشۈرۈشىدە "بىر ئۆمۈر بىرلا شىركەتتە ئىشلىگىم بار" دەپ جاۋاب بەرگەنلەر %44.7، "شىركەتكە كىرگەندىن كېيىن دېرىكتور بولغۇم بار" دەپ جاۋاب بەرگەنلەر %6.4، "ئەمەلگە قىزىقمايمەن" دەپ جاۋاب بەرگەنلەر %44.8، "كېيىنچە ئىگىلىك تىكلىگىم (مۇستەقىل بولغۇم) بار" دەپ جاۋاب بەرگەنلەر %9.9 بولغان. ياپونلۇق ياشلاردا خاتىرجەملىككە تەلپۈنۈش خائىشى كۈچلۈك بولۇپ، ئۆزى تەۋە توپتىن ئايرىلىپ رىقابەتتە مۇستەقىل ئۇتۇپ چىقىشتىن ئىبارەت ئېچىرقاش (شەخسىيەتچىل) روھىنىڭ كەملىكى بەكلا گەۋدىلىك.
        جۇڭگولۇقلارنىڭ كۆپىنچىسى "تېز بېيىش" چۈشىنى كۆرۈدۇ، شۇنداقلا "مەن چوقۇم مۇۋەپپەقىيەت قازىنالايمەن" دەپلا ئاساسسىز ئىشەنچ تۇيغۇسىدا ياشايدۇ. جۇڭگولۇقلارغا نىسبەتەن ئەڭ زور مۇۋەپپەقىيەت بولسا ئاتا – ئانانىڭ كۈچىگە تايانماي، ئۆزىگە بىر قەدەم – بىر قەدەمدىن يول ئېچىشتۇر. مۇنداقچە ئېيتقاندا، قۇرۇق قول ئىگىلىك تىكلەش كىشىلىك ھاياتتىكى ئەڭ پارلاق مەنزىلدۇر. مانا بۇ ئۆزى ئىگىلىك تىكلەش مۇۋەپپەقىيەت قازىنىشنىڭ چىغىر يولى دەپ قارالغانلەقتىن بولغان. جۇڭگولۇقلار يەنە "توخۇنىڭ بېشى بولسام مەيلىكى، سۇمرۇغنىڭ قويرۇقى بولغۇم يوق" دېگەندەك، چوڭ شىركەتنىڭ ئاددىي خادىمى بولغاندىن كىچىك شىركەتنىڭ دىرىكتورى بولغان ئەلا، دېگەن تونۇشقا ئىگە. ئۇلاردىكى نام قازىنىش ئىستىكى بەكلا كۈچلۈك بولغاچقا، مەيلى قانداق كىچىك ساھە بولسۇن "بىرىنچى" بولغىسى، دۆلەتنىڭ غوجىسى بولغىسى كېلىدۇ. مانا بۇ جۇڭگولۇقلارنىڭ يۇقىرى ئۆرلەش پسخىكىسىنىڭ ئىنېرگىيە مەنبەسى دېسەكمۇ ئارتۇق كەتمەيدۇ.
        بۇيىل (2012 - يىلى) جۇڭگودىكى مەلۇم بىر تولۇق ئوتتۇرا مەكتەپتىكى ئالىي مەكتەپ ئىمتاھانىغا قاتنىشىدىغان ئوقۇغۇچىلىرىغا "ئەگەر تىرىشمىساڭلار، پۇلدارلارنىڭ ھورۇن بالىلىرىغا ئۇتتۇرۇپ قويىسىلەر!" دەپ مەدەت بېرىلگەن بولۇپ، بۇ پۈتۈن مەملىكەتتە قىززىق تېما بولغانىدى. بۇ ھازىرقى جۇڭگودىكى رېئاللىق بولۇپ، جۇڭگوچە مۇۋەپپەقىيەت پەلسەپىسى دېيىشكە بولىدۇ. 

مەنبە :  http://blogs.bizmakoto.jp/t-hayashi/entry/5368.html

 

kusanbay

[كەلگۇسىىدە دڭدار شەخس بولغۇم بار]راست گەپ قىپتۇ .ھۇقۇق ئالامەت يارشىپ قۇيۇدۇ

iltebir107

ئېسىل يازمىدىن  يەنە  بىرسى تەرجىمە قىلىنپتۇ. قېرىندىشىم سىزگە رەھمەت.

jimjitlik

رەخمەت سىزگە. يەنە ياخشى تېمىلىرىڭىزنى كۈتىمىز.

alim516

ئوبدان تېما بوپتۇ،كۆز قارىشىمنى ئوتتۇرىغا قويۇپ قوياي.
ئۇستىدىكى سىتاتىستىكا قىلىنغان سان-سېفىرلارنىڭ قانداق بولىشىنى شۇ جەمىيەتنىڭ  ئونۋىرسال ھالىتى(دۆلەتنىڭ تەرەققىياتى،نوپوسى،ئائىلە تەربىيىس،مائارىپ،مىللەت پىسخىكىسى......) بەلگۈلەيدۇ.  لىكىن ئەمەلىيەتتىكى نەتىجىسى يەنىلا 80%،20% ئايرىمىسىدىن بەك جىق چەتنەپ كەتمەيدۇ.80%بايلىق 20%ئادەمنىڭ قولىدا بولىدۇ،80%ئادەم ياراتقان بايلىق 20%ئادەمنىڭ قولىدا بولىدۇ. سەبى بالا ۋاقتىدا مىجەز-خۇلقى،ئېرسىيەت،قىممەت قارىشى،تۇرمۇش موھىتى ....دىگەندەك نۇرغۇن سەۋەپلەر تۈپەيلىدىن بىر ئادەمنىڭ 80%ياكى 20%ئادەم ئىچىدە بولىشى پىشانىسىگە پۈتۈلۈپ بولىدۇ، 20%ئىچىدىكى ئادەملەر ئاسانلا  مۇۋەپپەقىيەتكە ئېرىشىدۇ(كەسىپتە پىشقان مۇتەخەسىس،باي سودىگەر،باشلىق كادىر ...دىگەندەك،نىمە كەسپ قىلىشىدىن قەتئى نەزەر تەبىئىلا مۇشۇ نەتىجە چىقىدۇ)،80%ئىچىدىكى ئادەملەر،قاتتىق تىرىشچانلىق كۆرسەتسە،ئوبدان يول باشلىغۇچىغا ئۇچرىسا，ياكى باشقا بىر قولايلىق تاشقى شارائىت بولسا(دادىسى لىگاڭ دىگەندەك ) ئۇلارمۇ ئاسانلا مۇۋەپپىقىيەت قازانغانلار  قاتارىغا كىرەلەيدۇ، بولمىسا ئۇلار بىر ئۆمۈر باشقىلارغا ئىشلەپ ،تۇرمۇشىنى قامداپلا ئۆتۈپ كىتىدۇ.مەلۈم جەھەتتىن ئېيىتقاندا يۇقارقى سان-سېفېرلار شۇ جەمىيەتتىكى كىشىلەرنىڭ پىسخىك ھالىتىنى ئەكس ئەتتۈرۈپ بېرىدۇ.
ئەگەر سىز بىر باشلىق،كادىر، كۆتۈرۈلگەن سودىگەر بولسىڭىز شۇ 20%ئىچىدە بولغان بولىسىز،كەسپىڭىز نىمە بولىشىدىن قەتئىنەزەر باش كۆتۈرۈپ چىقىشڭىز مۇقەررەر.ئەگەردە ئاخىرقى بىر كۈنلەردە موللاق ئېتىپ ،ئاخىرغىچە قايتا باش كۆتۈرەلمىىڭىز،بۇ سىزنىڭ ئەسلىدە 80%ئىچىدىكى ئادەملىكىڭىزنى بىلدۈرىدۇ.
ئەگەر سىز ھازىر ئادەتتىكى بىر خىزمەتچى،ئوقۇتقۇچى،ياللانما ئىشچى،مەدىكار  بولسىڭىز بۇ گەپنى كۆرۈپ بەلكىم ئاچچىغىڭىز كىلىشى مۇمكىن(ئادەمنى خىلغا بۆلدى دەپ)،مەيلى ھازىر قانداق ھېسياتتا بولۇڭ،كىيىنلىكتە باش كۆتۈرۈپ چىقسىڭىز بۇ سىزنىڭ 20%ئىچىدىكى ئادەم ئىكەنلىگىڭىزنى، ھازىر سىزنىڭ تەييارلىقىڭىزنىڭ پۈتمىگەنلىكى بىلدۈرىدۇ.
ئەگەردە سىز خەققە بەس سېلىپ ئۇ كەسىپنى قىلىپ ،بۇ كەسىپنى قىلىپ ،ئۇ سودىنى قىلىپ ،بۇ سودىنى قىلىپ،جەمىيەتتىن قاقشاپ،ئاتا-ئانىدىن قاقشاپ نىمىلا قىلسىڭىزمۇ بىر باشقا ئەپ چىقالمىسىڭىز ،ئەمىسە سىز شۇ 80%ئىچىدىكى ئادەم ،سىڭگەن ناننى يەپ تۇرمۇش كەچۈرسىڭىز بولىدۇ.
مۇۋەپپەقىيەت بىر ئۇقۇم،بىر تۇيغۇ خالاس. مەيلى ئادەم قايسى خىلدا بولسۇن ھالال ئەمگىكى بىلەن ياشىسا ،خەلقىگە جەمىيەتكە بىر كىشىلىك ھەسسىسىنى(ماددى ياكى مەنىۋى ھەسسە) قوشسا،ئۆزىگە يۈز كىلەلىسە شۇ كۇپايە،شۇنىڭ ئۆزى مۇۋەپپىقىيەت. ئۆزىنى زىيادە ھاردۇرىۋىتىشنىڭ زۆرۆرىيىتى يوق.
ئىنسان ھاياتى ئۆزىنىش چۈشىنىش ئۆزىنى مۇكەممەللەش جەريانىدۇر،ھەر بىرىمىز ئۆزىمىزنى مۈكەممەللەپ،پەرزەنتلىرىمىزنى ئوبدان تەربىيەلەپ ياشىساق شۇنىڭ ئۆزى مىللەتنى سۆيگەنلىك،مىللەتكە پايدا يەتكۈزگەنلىك.
ئاخىرىدا 2013نىڭ مودا گىپى : ئانا تىلىمىزنى قەدىرلەيلى!
قايسى تىلدا ئوقۇشىڭىز سىزنىڭ قايسى پىرسەنتكە كىرىشىڭىزنى بەلگىلىمەيدۇ،لىكىن يات تىلدا ئوقۇسىڭىز 80%گە كىرىپ قىلىش ئېھتىماللىقىنى يۇقۇرى كۆتۈرىدۇ.