ئەسسالامۇ ئەلەيكۇم، ئىسكەندەر سەمەت ئاكا! تىنچ-ئامانمۇ سىز، بۇ خېتىمنى كۆرگەندىن كېيىن بەلكىم ئەجەبلىنەرسىز، چۈنكى سىز مېنى تونۇمايسىز، بىراق مەن ،جۈملىدىن پۈتۈن ئۇيغۇر خەلقى بولۇپمۇ ئالىي مەكتەپ ھاياتىنى باشتىن كەچۈرۈپ باققان ھەربىر ئۇيغۇر سىزنى تونۇيدۇ دەپ ئويلايمەن، چۈنكى سىزنىڭ «ئايرىلىش مىنۇتلىرى»، «سەككىز كارىۋات بىر ياتاق»،«مەكتەپتىكى مۇھەببەت» ... قاتارلىق بىر تۈركۈم ناخشىلىرىڭىز بىز گە ياد بولۇپ كەتكەن.
ئاي بېشىدا مولچىلىق،دوستلار،
پارقىرايدۇ پەتەڭگە.
ئاي ئاخىرى يانچۇقتىن ،ئاغىينە،
تېپىلمايدۇ بىر تەڭگە.
تېپىلمىسا بىر تەڭگە، دوستلار،
سەي بېلەتنى خەجلەيمىز.
يوقلاپ كەلسە ناۋادا، ئاغىينە،
رېستۇرانغا باشلايمىز.
تۈگەپ كەتسە سەي بېلەت، دوستلار،
نېسىگە بولار گاھى.
كۆنۈپ قالىسىز دوستۇم، ئاغىينە،
شۇنداق مەكتەپ ھاياتى.
سەككىز كارىۋات بىر ياتاق،دوستلار،
بىزدىن سىزگە قالىدۇ.
چوقۇر ئۈستەل سىم كارىۋات،ئاغىينە،
سىزنى كۈتۈپ ئالىدۇ.
قالدى بۇندا ئامانەت ، دوستلار،
سەككىز كارىۋات بىر ياتاق.
سەككىز ئوتلۇق يۈرەكتە، ئاغىينە،
ئۇنۇتۇلماس ئۇ ھەر چاغ.
بىر تىزىق مارجان ، بىر دەستە گۈلدەك،
ئۆتكەن ئىدۇق ساۋاقداش بولۇپ.
ئەمدى بىز بۈگۈن ئايرىلار بولدۇق،
جۇدالىق يېشى كۆزلەرگە تولۇپ.
قالدى ئەسلىمە ياتاق، سىنىپتا،
قالدى رىشتە باغلانغان ماكان.
كەتسەكمۇ يىراق، يىراق جايلارغا ،
بىزلەر ساۋاقداش،ساۋاقداش ھامان.
ھىجران ياشلىرى تۆكۈلدى بۈگۈن،
ئايرىلىشقا چىدالماي ئەجەب.
ئۆكسۈپ، ئۆكۈنۈپ، گاھى كۈلۈشۈپ ،
خوشلاشماقتىمىز ئاق يوللار تىلەپ.
مانا مۇشۇ مىسرالىرىڭىز، ئادەمنىڭ يۈرەك تارىنى چەككۈدەك مىلودىيەلىرىڭىز بىلەن سىز ھەربىر ئۇيغۇرنىڭ يۈرىكىگە بىر ئوتنى سالغان ئىدىڭىز، بىزنىڭ ئوقۇش پۈتتۈرۈش ھارپىسىدىكى خوشلىشىش مۇراسىمىمىزدابىز بۇ ناخشىنى ئېيتىشىپ يىغلىشىپ خوشلاشقان ۋاقتىمىزدا كىلاسسىك ئەدەبىيات ئوقۇتقۇچىمىز ئەركىن ئوغۇز ئابدۇرېھىم مۇئەللىممۇ «بۇ ئۆلمەس بىر ناخشا، مەكتەپ، ئوقۇغۇچى دېگەنلەرلا بولىدىكەن بۇ ناخشا ئۆلمەيدۇ، قۇمۇللۇق بالىلار قۇمۇلغا بارغاندا، ئىسكەندەر سەمەتكە مەندىن سالام ئېيتىڭلار »دېگەن ئىدى.
دۇرۇس، قايسى بىر ئالىي مەكتەپ ئوقۇغۇچىسى بۇ ناخشىلارنى ئاڭلىغاندا ھاياجانلانماي، يۈرىكى سېغىنىش ئوتىدا ئۆرتەنمەي، تالاي يىللار ئىلگىرىكى گۈزەل ئالىي مەكتەپ ھاياتىنى، ساۋاقداشلىرىنى ئەسلىمەي تۇرالىسۇن!
بىراق ئىسكەندەر ئاكا، سىز بىر مەزگىل ئەنە شۇ ناخشىلىرىڭىز بىلەن بىزنىڭ يۈرەك تارىمىزنى چېكىپ قويۇپ جىممىدە يېتىۋالدىڭىز، بىز ئۈنئالغۇ مودا بولغان زامانلاردا سىزنىڭ ئەشۇ ناخشىلىرىڭىزنى سۆيۈپ ئاڭلايتتۇق، بىراق ھازىر ئۈنئالغۇ زاماننىڭ كەينىدە قېلىپ دۋد كەڭ ئومۇملاشقان بۈگۈنكى كۈندە بولسا بىز بۇلارنى قايتا ئاڭلاشقا ئامالسىز قالدۇق، گەرچە بىر قىسىم ناخشىچىلىرمىز سىزنىڭ بىر قىسىم ناخشىلىرىڭىزنى قايتا ئاكورتلاشتۇرۇپ ئېيتىۋاتقان بولسىمۇ بىراق بىز يەنىلا سىزنىڭ ئاۋازىڭىزدىكى ئۆزگىچە بىر خىل مۇڭغا تەشنا !
ئىسكەندەر ئاكا مېنىڭ شۇنى بىلىپ باققۇم بار، سىزنىڭ ئىجادىيىتىڭىزنى توختىتىپ قويۇشىڭىزغا نېمە سەۋەب بولدى، ياكى سىزمۇ بىرەر شېركەت ئېچىۋالدىڭىزمۇ؟ بىراق شېركەت ئېچىۋالغانلارمۇ ئۆز ئىجادىيىتىنى نورمال داۋاملاشتۇرىۋاتىدىغۇ! شۇڭا سىزگە دەي، ئەشۇ دەۋرلەردىكى ئۈنئالغۇ لېنتىلىرىڭىزنى بىرەر سىنتەخسە قىلىپ ئىشلەش ئويىڭىز يوقمۇ، بۇ ئۆتۈنۈشمىزنى يەردە قويمىغايسىز، مۇئەللىمىمىزنىڭ سالامىنى سىزگە مەن يەتكۈزەي، :بىزنىڭ ئالىي مەكتەپتىكى ئوقۇتقۇچىمىز سىزگە سالام ئېيتتى، ئىجادىيىتىڭىزگە ئۇتۇق تىلىدى، ئىجادىيىتىڭىز توختاپ قالمىسۇن!
|