2013-يىلى 5-ئاينىڭ 9-كۈنى (پەيشەنبە) ئۈرۈمچى ۋاقتى كەچ سائەت 6:40 دا XJTV-2 قانىلىدا «قانۇن ۋە پۇقرا پروگراممىسى»نىڭ 10يىللىقى مۇناسىۋىتى بىلەن ئىشلەنگەن مەخسۇس پروگرامما كۆرسىتىلىدۇ، كۆرۈرمەنلەرنىڭ ۋاقتىدا كۆرۈشىنى ئۈمۈد قىلىمىز...
قەدىرلىك دوستلار، «قانۇن ۋە پۇقرا» پروگراممىسى-شىنجاڭ ئۇيغۇر ئاپتونۇم رايونلۇق خەلق قۇرۇلتىيى دائىمىي كومىتېتىنىڭ ھاۋالىسىگە ئاساسەن، شىنجاڭ ئۇيغۇر ئاپتونۇم رايونلۇق خەلق تەپتىش مەھكىمىسى، يوقۇرى خەلق سوت مەھكىمىسى، ئاپتونۇم رايونلۇق ج خ نازارىتى، ئەدلىيە نازارىتى قاتارلىق نازارەت-ئىدارىلەرنىڭ قوللىشى بىلەن، شىنجاڭ تېلېۋىزىيە ئىشستانسىسىنىڭ باشقۇرۇشىدا 2003-يىلى 5-ئاينىڭ 1-كۈنى تەسىس قىلىنىپ كۆرسىتىشكە باشلىغان قانۇنچىلىق مەخسۇس پروگرامما بولۇپ، بۇ يىلغىچە ساق 10 يىل بولدى، بۇ 10 يىل مابەينىدە، يوقىرىنىڭ قوللىشى، پۇقرالارنىڭ ياقتۇرۇپ كۆرۈشى ۋە مەدەت بېرىشى نەتىجىسىدە، پروگراممىنىڭ سۈپىتى ۋە جامائەت پىكرى نازارەتچىلىكى جەھەتتە ئۆزىنىڭ تېگىشلىك رولىنى ئويناپ كەلدى ۋە تېلېۋىزۇر كۆرگۈچىلەرنىڭ ياخشى دوستىغا ئايلاندى. لېكىن، يەنە نۇرغۇنلىغان كىشىلىرىمىز «قانۇن ۋە پۇقرا» پروگراممىسىنىڭ خارەكتېرى ۋە ئوربىتىنى چۈشەنمەي كېلىۋاتىدۇ، شۇڭا، «قانۇن ۋە پۇقرا» پروگراممىسىنىڭ 10 يىللىق خاتىرە كۈنىدە بىز پۇقرالىرىمىزنىڭ قانۇننى ئۆگىنىش، قانۇن ئارقىلىق ئۆزىنىڭ ھوقۇق-مەنپەئەتىنى قوغداشنى بىلىۋېلىشنى مەقسەت قىلىپ، «قانۇن ۋە پۇقرا» پروگراممىسىنىڭ سەھىپىلىرىنى سىلەرگە يوللىدۇق، سىلەرنىڭ پروگراممىمىزغا يەنە قانداق پىكىر-تەلەپلىرىڭلار، ئارزۇ-تەكلىپلىرىڭلار بولسا، مۇنبەر ئارقىلىق قالدۇرۇپ قويۇشىڭلارنى تەۋسىيە قىلىمىز...تۆۋەندە «قانۇن ۋە پۇقرا» پروگراممىسى بىلەن تەپسىلى تونۇشۇپ چىقايلى: «قانۇن ۋە پۇقرا پروگراممىسى»- دېلو مىساللىرى ئارقىلىق قانۇن ساۋاتلىرىنى ئومۇملاشتۇرۇش، پۇقرالار كۆڭۈل بۆلىۋاتقان قانۇن دائىرسىدىكى قېيىن مەسىلىلەرنى يېشىپ چۈشەندۈرۈش، بۇ ئارقىلىق پۇقرالارنىڭ ھوقۇق-مەنپەئەتىنى قوغداش ۋە مەجبۇرىيىتىنى تونۇتۇشنى مەقسەت قىلغان ھالدا پۈتۈن جەمئىيەتنى قانۇن ئۆگىنىش، انۇندىن پايدىلىنىش، قانۇنغا رىئايە قىلىشقا ئۈندەپ، دۆلەتنى قانۇن ئارقىلىق ئىدارە قىلىش، قانۇنچىلىق دۆلىتى قۇرۇشقا تۆھپە قوشۇشنى مەقسەت قىلغان قانۇنچىلىق مەخسۇس پروگراممىسىى. پروگراممىدا تەسىس قىلىنغان سەھىپىلەر: 1. دېلوۋە تەھلىل» سەھىپىسى: تىپىك بولغان،ئاپتونۇم رايون دائىرسىدە ياكى ھەرقايسى ۋىلايەت، ئوبلاست، ناھىيە ياكى شەھەر تەۋەسىدە تەسىرى بىر قەدەر زور بولغان، تەربىيۋى ئەھمىيتى زور ھەق تەلەپ دېلولىرى، جىنايى ئىشلار دېلولىرى، مەمۇرىي دېلولار نۇقتا قىلىنىپ، شۇ دېلو مىساللىرى ئارقىلىق شۇ دېلوغا چېتىشلىق بولغان بارلىق قانۇن-نىزاملار تەشۋىق قىلىنىدۇ. 2. «بىر مىسالدا بىر مەزمۇن» سەھىپىسى: بۇ سەھىپىدە ئىككى رىياسەتچى ئاممىدىن كەلگەن تېلېفۇن، خەت، توردىكى تەربىيۋى ئەھمىيتى زور بولغان قىسقا، تىپىك دېلو مىساللىرى ئارقىلىق، قانۇن، ئەخلاق نۇقتىسىدىن تەھلىل، مۇلاھىزە يۈرگۈزۈپ، ئاممىنىڭ دېلوغا قارىتا قارىشىنى ئوتتۇرغا قۇيۇپ، مۇتەخەسىس خۇلاسە قىلىش ئۇسۇلى ئارقىلىق ئاممىنى توغرا بولغان جامائەت پىكىرىگە يېتەكلەيدۇ ھەم ئاممىنى قانۇن ئۆگىنىشكە قاتناشتۇرۇش، يىتەكلەش مەقسەت قىلىنىدۇ . 3.«بىرلىكتە قانۇن ئۆگۈنەيلى» سەھىپىسى: بۇ سەھىپە زېھىن سىناش شەكىلىدە ئېلىپ بېرىلىدۇ.بۇ سەھىپە 2007-يىلى يولغا قويۇلغان بولۇپ ئاساسلىقى ئوتتۇرا باشلانغۇچ مەكتەپ ئوقۇغۇچىللىرىنى نۇقتا قىلىپ ئېلىپ بېرىلغانىدى. پىروگىراممىزدا نۆۋەتتىكى ۋەزىيەتنىڭ ئېھتىياجى، قانۇننى ئومۇملاشتۇرۇش خىزمىتىنىڭ تەلىپى بويىچە دائىرىنى تېخىمۇ كېڭەيتىپ قانۇننى ئوتتۇرا باشلانغۇچ مەكتەپلەر ھەتتا ئالىي مەكتەپلەرگە، كارخانا-كەسپىي ئورۇنلارغا، كەنت-مەھەللە ئىش بېجىرىش ئورۇنلىرىغا، دىنىي سورۇنلارغىچە يەتكۈزۈپ ، «ئائىلىلەردە قانۇن ئۆگىنىش»،«مەكتەپلەردە قانۇن ئۆگىنىش»،«خىزمەت ئورۇنلىرىدا قانۇن ئۆگىنىش»،«كۈندىلىك تۇرمۇشتا قانۇن ئۆگىنىش»نى ئىشقا ئاشۇرۇپ، ھەممەيلەن قانۇن ئۆگىنىدىغان، ھەممەيلەن قانۇننىڭ ئىززەت-ئابرويىنى قوغدايدىغان ياخشى ئىجتىمائىي كەيپىيات يارتىش ئۈچۈن بۇ سەھىپىنى تېخىمۇ جانلىق باشقۇرماقچى. يەنى ئاساسىي قاتلاملارغا تېخىمۇ چوڭقۇر چۆكۈپ ئاساسىي قانۇن ۋە باشقا قانۇنلارنى تۈرلۈك شەكىللەر ئارقىلىق تەشۋىق قىلىمىز. 4.«پۇشايمان خاتىرسى»سەھىپىسى: بۇ سەھىپە ئاساسلىقى ئۆزگەرگۈچى خادىملارنىڭ جىنايەت ئۆتكۈزگەندىن كېيىنكى پۇشايمىنى، تۆۋبىسى ئارقىلىق تېخىمۇ كۆپ پۇقرالارنى تەربىيلەش، ئىبرەت ئېلىشنى مەقسەت قىلغان سەھىپە بولۇپ، بىر قىسىم پۇقرالارنىڭ جىنايەت يولىغا مېڭىشىنىڭ ئالدىنى ئېلىشتا يېتەكچىلىك رول ئوينايدۇ. ھازىرغا قەدەر بۇ سەھىپىنىڭ ئىجتىمائىي ئۈنۈمىي ناھايىتى ياخشى بولۇپ كەلمەكتە. بۇنىڭدىن كېيىن بۇ سەھىپىنى تېخىمۇ ياخشى باشقۇرۇش ئۈچۈن ئاپتونۇم رايونىمىزدىكى ھەرقايسى تۈرمىلەرگە تېخىمۇ چوڭقۇر چۆكۈپ ،ئەڭ تىپىك زىيارەت ئوبىكتىلىرىنى قېزىپ چىقىپ .ھەم قانۇنى جەھەتتىن ھەم جىنايەت پىسخولوگىيسى جەھەتتىن ئاممىغا چۈشەنچە بېرىپ، قانۇننىڭ ئىززەت-ئابرويىنى كۆتىرىپ، كىشىلەرنىڭ ھەر ۋاقىت قانۇنغا رىئايە قىلىشىنى، جەمئىيەتنىڭ مۇقىم، ئىناق، خاتىرجەملىكى ئۈچۈن تېگىشلىك تۆھپە قوشۇش كېرەكلىكنى ئەكىس ئەتتۇرىمىز.
5.«نەق مەيدان» سەھىپىسى : بۇ سەھىپە يېڭىدىن تەسىس قىلىنغان سەھىپە بولۇپ، بۇ سەھىپىدە ج خ نازارىتى بىلەن ھەمكارلىشىپ، ج خ تارماقلىرىنىڭ تىپىك دېلولىرىنى يىپ ئۇچى قىلىپ، دېلونىڭ رازۋېتكا جەريانى ۋە پاش قىلىش ئەھۋالىنى ھېكايە شەكلىدە بايان قىلىش بىلەن، سوت مەھكىمىلىرىنىڭ نەق مەيدان سوت ئەھۋالىنى سۆرەتكە ئېلىش ئارقىلىق، پروگراممىنى ئاممىغا يېقىنلاشتۇرۇش، نەق مەيدان تۇيغۇسىنى كۈچەيتىمىز . 6. «سىگنال» سەھىپىسى: بۇ سەھىپە يول قاتنىشى بىخەتەرلىكىگە مۇناسىۋەتلىك مەخسۇس سەھىپە بولۇپ، ئاپتونۇم رايونىمىزدا يۈز بەرگەن تىپىك قاتناش ھادىسىسىلىرى، بۇ ھادىسىلەرنىڭ يۈز بېرىش سەۋەبى، ئامما دىققەت قىلىشقا تېگىشلىك نۇقتىلار، يول قاتنىشى بىخەتەرلىكىگە ئائىت يېڭىدىن يولغا قۇيۇلغان بەلگىمىلەر ئاممىغا يەتكۈزۈلىدۇ . بۇندىن كېيىن، ئىككى دەرىجىلىك سوت مەھكىمىسىنىڭ ھۆكۈمى بىلەن ئاخىرلاشقان دېلو مىساللىرىنى ئىشلەش بىلەنلە توختاپ قالماي، بەلكى تەسىر دائىرىسى بىر قەدەر زور تىپىك دېلو مىساللىرىنى ئىز قوغلاپ خەۋەر قىلىمىز، يەنە بىر قىسىم دېلو مىساللىرىنى جامائەت پىكىرى نازارەتچىلىكى نۇقتىسىدىن پاش قىلىش خاراكتىرىدە پروگرامما ئىشلەپ ئاممىنىڭ جانىجان مەنپەتىگە ھەقىقىي كاپالەتلىك قىلىشقا تىرىشىمىز. |