قولاي تىزىملىك
كۆرۈش: 748|ئىنكاس: 9

«ئالمىخان» (كومىدىيە)

[ئۇلانما كۆچۈرۈش]

23

تېما

0

دوست

4174

جۇغلانما

ئاكتىپ ئەزا

ئۆسۈش   72.47%

ئەزا ئۇچۇرى
تىزىم نۇمۇرى:  1535
يازما سانى: 177
نادىر تېمىسى: 0
مۇنبەر پۇلى: 828
تۆھپە : 726
توردىكى ۋاقتى: 229
سائەت
ئاخىرقى: 2014-3-29
يوللىغان ۋاقتى 2014-2-2 17:24:59 |ھەممە قەۋەتنى كۆرۈش
abida



                                          ئالمىخان


                    ( 5  پەردە،6كۆرۈنۈشلۈك تىراگىدىيىلىك  كومىدىيە )

                                         ئەركىن زاكىر

ئاساسلىق قاتناشقۇچىلار :
غوجامنىياز: 28ياش             ئالمىخان :20 ياش
  قادىر    :  40 ياش          تۇرسۇن :   45 ياش
بىشىرشاھ  :    50 ياش       ئوسمان باي:   50ياش
ئوردا ئەمەلدارلىرى ،مۆتىۋەر-بايلار،خىزمەتكارلار،مېھمانلار...........
ۋاقتى :  1870 –يىللار
بىرىنچى پەردە: لەڭگەردىكى ئۆتەڭ
ئىككىنچى پەردە :ۋاڭ بېغىدا مەشرەپ
ئۈچىنچى پەردە: ئۈرۈمچىدىكى ئۈچرىشىش
تۆتىنچى پەردە : ۋاڭ ئوردىسىدا
بەشىنچى پەردە: غوجامنىيازنىڭ ئۆيى
(بۇ كومىدىيىنىڭ پىكىر ئىلىش نۇسخىسى بولۇپ،كومىدىيىنىڭ تارىخى چىنلىققا ئۇيغۇن بولىشى،مۇكەممەللىشىشى ئۈچۈن تورداشلارنىڭ قىممەتلىك تەكلىپ-پىكىرلەرنى بېرىشىنى،ياردەمدە بولىشىنى چىن دىلىمدىن سەمىمى ئۈمۈد قىلىمەن.)
                              
                                                بىرىنچى پەردە:لەڭگەردىكى ئۆتەڭ

               سەھنە تۈزۈلىشى :باققا تۇتاشقان قەدىمى ھويلا،ھويلا ئىچىدە ئوتقاش گىلەملەر سېلىنغان چوڭ سۇپا .باغ كەينىدىن كۆرۈنۈپ تۇرغان گۈمبەز،باغدىن كاككۇكلارنىڭ سايرىغان ئاۋازلىرى ئاڭلىنىپ تۇرىدۇ  ...........
(غوجامنىياز سەھنىنىڭ سول تەرىپىدىن بوياق ماتا پەنجىر كەيگەن،بىلىنى پوتا بىلەن باغلىغان ، مۇرىسىگە لۇڭگە ئارتقان ھالدا سەھنىگە كىرىپ سەھنە ئوتتۇرسىدا توختايدۇ. يىراقتىن ئاتنىڭ تۇياق ئاۋازى ،كۈمۈش قوڭغۇراق ئاۋازى ئاڭلىنىدۇ) غوجامنىياز: چوقۇم مېھمان كەلدى ،بىر چىقىپ قاراپ باقاي قېنى !(سەھنىنىڭ ئوڭ تەرىپىگە كىرىپ كېتىدۇ. كۈمۈش قوڭغۇراق ئاۋازلىرىغا قوشۇلۇپ،ئىتلارنىڭ قاۋىغان ،ئاتلارنىڭ كىشنىگەن، سودىگەرلەرنىڭ ئاتلارنى بەزلىگەن ئاۋازلىرى ئاڭلىنىدۇ . )
(غوجامنىياز  ئىگىز قاما تۇماق كىيگەن ئىككى مېھماننى ھويلىغا باشلاپ كىرىدۇ )
غوجامنىياز:
كەلسىلە مېھمانلار ،كەلسىلە!!!
           سارىيىمىز كەڭ تاشا ،
           بۇندا ھەردەم تاماشا.
           ئويناپ بەرسەم ئۇسۇلنى
           مېھمانلار بەك قاراشا .
           پۇلى بارلار چاينايدۇ ،
           قازاندىكى قوي گۆشى ،
           بىرلا كەلگەن مېھماننىنىڭ ،
           باردۇر يەنە كەلمىگى .
           تائاملارنىڭ شاھىدۇر،
           پولۇ بىلەن كاۋاپلار.
           مېھرى ئىللىق ساراي بۇ،
           بىلىۋالسىلا قاراپلا.
غوجامنىياز: توۋۋا،تونىمايلا قاپتىمەن،ئۆزلىرى تۇرسۇن ئاكامغۇ؟
تۇرسۇن : كۆزلىرى پىششىق ئادەمكەنلا،بىز كۆرۈشمىگىلى ئىككى يىل بولاي دىدى.ھېلىمۇ تونىۋالدىلا.
غوجامنىياز : بۇ سارايغا چۈشىدىغان ئادەم كۆپ.بەزىدە تونىيالماي قالسام خىجالەتتە قالىمەن.قېنى سۇپىغا كەلسىلە!
(مېھمانلارنى سۇپىدىكى گىلەمگەكېلىپ ئولتۇرىدۇ.مېھمانلار جايلىشىۋېلىپ دۇئاغا قول كۆتىرىدۇ ،كەينىدىن تېنچلىق -ئامانلىق سورىشىدۇ )
تۇرسۇن : قانداق ئۇكام ،تېنچلىق تۇردىلامۇ؟
غوجامنىياز :
           كۆرىنەمدۇ ئاي يۈزى،
           ھاۋادا تۇمان بولسا.
           خوشال ئۆتەر كۈنلىرىم،
            سارىيىم ئامان بولسا.
            
دىدارلاشتۇق بىر نۆۋەت،
            كەپلا يەنە سالامەت.
            راۋان بولسۇن يوللىرى،
            يەتمىگەي ھېچ مالامەت.
            تېنچلىقمىكىن يۇرت-ئاۋام،
            بارمۇ بىزگە قۇت-سالام؟
تۇرسۇن : خۇداغا شۇكرى  تېنچلىق ئۇكام .
(غوجامنىيازنىڭ  ئەر مۇلازىمى  پەتنۇستا نان،قەن-گېزەكلەرنى ئېلىپ چىقىپ تاماق شىرەسىگە قويىدۇ.)
مۇلازىم  : خوش كەپلا مېھمانلار!! خوش كەپتىلا . ۋۇي!بۇ تۇرسۇنئاخۇنكامكەنغۇ؟(قول ئۇزۇتۇپ كۆرىشىدۇ)
تۇرسۇن : ياخشى تۇردىلامۇ ئۇكام ؟
مۇلازىم  : ياخشى ،ياخشى !ئۆزلىرىنى بىر كۆرۈپلا تونىۋالدىم . كەلمىگىلى خېلى ئۇزۇن بولدى-ھە ئاكا؟
تۇرسۇن : شۇنداق ئۇكام،بۇ قېتىم مېھمان باشلاپ كەلدىم.
غوجامنىياز :
يات كىشىنى بىلمىدىم،
كىمدۇ ئۆزلە؟دىمىدىم.
             ئېيتىپ بەرسلە كىمدۇ ئۇ
              تېخى سوراق قىلمىدىم.
تۇرسۇن : بۇ كىشى، ئالدىقى قېتىم قونغاندا ئۆزلىرىگە گېپىنى قىلىپ بەرگەن ئىنىمىز قادىر بولىدۇ . بۇ قېتىم كۆزىنى ئېچىپ قوياي دىگەن نىيەت بىلەن بىرگە ئېلىپ كەلدىم. مېنى كۆرگەن كۆزىڭلاردا كۆرگەيسىلەر. قېنى قادىر ئەمدى ساڭا ساھىپخاننى  تونۇشتۇرۇپ قوياي.بۇ ئۇكىمىز مۇشۇ ساراينىڭ خوجايىنى ،قىزىقچى ،لەتىپىچى،ئۇسۇلچى،ھازىر جاۋاپ قوشاقچى غوجامنىياز بولىدۇ .
غوجامنىياز : (قول سۇنۇپ قادىر بىلەن يەنە كۆرىشىدۇ ) غوجامنىياز :
            يېڭى مېھمان ئۆزلىرى،
            مېھىرلىككەن كۆزلىرى.
            ئاكىرىغا ئوخشىغاي،
            تاتلىق بولسۇن سۆزلىرى.
                  يارىشىپتۇ پەرەنجە،
                  قاما تۇماق كىيىپلا.
                  قەدىنىسىم دەپ بىلدىم،
                  ئۆزلىرنى بىر كۆرۈپلا.
تۇرسۇن،قادىر:  ھا..ھا..ھا..
غوجامنىياز:
            سەپەر بۈگۈن قاياققا؟
            بىلسەم شەرق راۋاققا.
            سودا يەنە قاق-گۈلە،
            تاۋا-دۇردۇن،جانانە.
تۇرسۇن : ھا...ھا...ھا......بىلىۋاپتىلا،بىلىۋاپتىلا. يەنە شۇ لەنجۇ تەرەپلەرگە بارايلىمىكىن دەۋاتىمىز . مىۋە-چىۋە، يولۋاس-تۈلكە تېرىسى،بۇغا مۈڭگۈزى، ئەتلەس قاتارلىق يىپەك ماللارنى ئېلىپ ماڭدۇق .
غوجامنىياز :
سودىلىرى ئەپلىشىپ،
كەپلا ساراي سەگىشىپ.
راۋان بولسۇن تىجارەت ،
قالمىسىلا تەگىشىپ.
                    گۈزەللىرى شەرقنىڭ،
                     سىزنى كۆرسە كەتمەيدۇ.
                     بىراق ئاشۇ گۈزەللەر ،
                     تاجىخانغا يەتمەيدۇ.
      (تۇرسۇن ،قادىرلار قاقاقلاپ كۈلۈشۈپ كېتىدۇ)
تۇرسۇن :  چاقچاق قىلمىسلا،چاقچاق قىلمىسىلا،ئەلھەمدۇلىللا،سەپەر ئۈستىدىكى ئادەممىز.ئۇنداق ناشايىق ئىشلاردىن يىراق ئۇكام.قادىر ئۇكام ، بۇ ئادەم بەك قىزىقچى ئادەم .ئۇسۇلنىمۇ بەك ياخشى ئوينايدۇ.بىيىت-قوشاققىمۇ بەك ئۇستا.كارامىتىنى كۆرىسەن تېخى.
قادىر : ئۇنداقتا بۈگۈن تازا بىر مەشرەپ ئوينايدىكەنمىزدە .
غوجامنىياز :
قىلساق كەچتە تاماشا،
خەقلەر بېقىپ قاراشا.
كەچتە مەشرەپ باشلايمىز،
قالتىس سورۇن راسلايمىز.
(ھەممەيلەن قاقاقلاپ كۈلىشىدۇ)
غوجامنىياز : (سىرتقا قاراپ توۋلايدۇ) ھەي سالى ،ھەي سالى!
(سالى كىرىپ قول قوشتۇرۇپ تۇرىدۇ)
سالى : خوش ئاكا!!
غوجامنىياز : ئاتلارغا ئوت سېلىپ بەر !
سالى : ماقۇل (چىقىپ كېتىدۇ)
غوجامنىياز :
           قونغىدەكلا پەملىدىم،
           بۈگۈن كېچە سارايدا.
           رازى بولۇپ كېتىللا،
           بۇ سارايدىن ياناردا.
تۇرسۇن : ئەلۋەتتە! ئەلۋەتتە! ئۇزۇنمۇ بوپتۇ پاراڭلاشمىغىلى.بۈگۈن كېچە ئوبدان مۇڭدىشايلى.بولسا كەچتە  مەشرەپ ئۇيۇشتۇرۇپ بېرەلا .
غوجامنىياز :
ئاۋال سوپى بىلەن رەسۇل،
            كەينىدىن داپ بىلەن ئۇسۇل.
ئاۋال تاماق يەيلى،ئاندىن مەشرەپنى باشلىساقمۇ بولىدۇ.
تۇرسۇن : سەپەر ھاردۇقى يىتىپ قالدى .بولسا بالدۇر باشلاپ،بالدۇر ئارام ئالساق قانداق ئۇكا؟
غوجامنىياز :
           تەييار بولدى ھاپىزلا،
           باشلار مەشرەپ ھازىرلا.
           چېلىپ مۇڭلۇق مۇزىكا،
           يېقىپ رەڭدار يارۇقنى .
           بەزمە-مەشرەپ،كۈلكىدە
           چىقىرىمىز ھاردۇقنى.
           
تۇرسۇن : قېنى ئۇكام ،ئۇنداق بولسا مەشرەپنى باشلىمامدۇق ؟
غوجامنىياز :
            يىغىلسۇن نازۇ-نېمەت،
            چېلىنسۇن داپ ۋە غىجەك.
            ئويناڭلار شوخ-شوخ ئۇسۇل،
            يايرىسۇن ئوتلۇق يۈرەك!
(سالىنى چاقىرىدۇ)
غوجامنىياز:سەي سالى!(سالى كىرىدۇ)
سالى : ھەئە ئاكا ،نىمە ئىش؟
غوجامنىياز : سەن بېرىپ ھاپىزلارنى چاقىر.ئۇلار كەلسۇن .تېز كەلسۇن!
سالى : ماقۇل ئاكا،(چىقىپ كېتىدۇ)
(نازۇ-نىمەتلەر يىغىلىدۇ،مېھمانلار دۇئاغا قول كۆتىرىدۇ )
(داپ،غىجەك،دۇتتار،تەمبۇر،چاڭ ... قاتارلىق سازلارنى كۆتەرگەن ھاپىزلار،بىرنەچچە بورتۇمشالىق ئاياللار سەھنىگە كىرىپ ئورۇنلىشىدۇ ،تەكەللۇپلار قىلىشىدۇ.مېھمانلار تۆرىدە ئولتۇرىدۇ .)
غوجامنىياز :
                   شۈك بولسىلا مېھمانلار،
                        بىز مەشرەپنى باشلايمىز.
                        قىلىپ قىزىق تاماشا،
                        كۆزلىرلەنى ياشلايمىز.
           قومۇللۇقنىڭ مۇقامى،
           ھوزۇر بېرەر يۈرەككە.
           ھوزۇر ئالغان يۈرەكتىن ،
           كۈچ كىرىدۇ بىلەككە.
                        قىزىپ كەتسۇن تاماشا،
                        مېھمانلارنىڭ ھۆرمىتى.
                        نازۇ-نىمەت كەڭ تاشا،
                        كەلسۇن ئاللا رەھمىتى.
(مېھمانلار كۈلۇشۇپ،بارماقلىرىنى چىقىرىپ غوجامنىيازنى ماختايدۇ)
غوجامنىياز:  ئالدى بىلەن ھوزۇرلىرىغا قۇمۇل مۇقاملىرىدىن سۇنىمىز . قۇمۇل مۇقام - ناخشىلىرى بەك مۇڭلۇق،ئەۋرىشىم . قۇمۇل مۇقاملىرىدا باشقا مۇقاملارغا ئوخشاش سەلىقە ،جۇلا، مەرغۇل ، داستان تەركىپلىرى  يوق دىيەرلىك ،پەقەت  مۇقام بىلەن سەنەمدىنلا تەركىپ تاپقان .
تۇرسۇن : قومۇل مۇقاملىرىنىڭ داڭقىنى ئۇزۇندىن ئاڭلاپ كەلدىم. بىرنەچچە قېتىم ئاڭلىدىم.قومۇل مۇقاملىرى ئۇيغۇر 12 مۇقامىنىڭ بىر تەركىۋى قىسمى بولسىمۇ ئۆزىگە خاس ئالاھىدىلىگى باركەن.مۇقاملارنىڭ ئىسىملىرىمۇ ئۆزگىچە بولۇپ،ھەقىقەتەن مۇڭلۇق ،ئەۋرىشىم ئىكەن.
غوجامنىياز : بەك ماختىۋەتتىلە،بەك ماختىۋەتتىلە.
تۇرسۇن:  مەن كۆپ كىتاب كۆرىدىغان ئادەم. غەربى خەن سۇلالىسى دەۋرىدە جاڭ چەن قۇمۇلدىن ماھىدۇر كۈيىنى چاڭ ئەنگە ئىلىپ بارغان.شۇ چاغدىكى خەنزۇ شائىرلىرى قۇمۇل مۇقاملىرى ھەققىدە مۇنداق شىئىرلارنى يازغان ئىكەن :
ئاي راۋاق ئۈستىدە بەگزادە كۆڭۈل ئاچتى بۇئان،
سازچى قىز كۈيلەپ ئىۋىرغول نەغمىسى قىلدى بايان.
چالسا ماش رەڭپ پەنجىرە ئىچىدە ئىۋىرغول نەغمىسى،
مەس قىلار قىزىل تاۋار مەيخانىدا مەي ئەھلىنى.
چۆلسىرەپتۇ ئاڭلىماق تەس بوېتۇ قۇش ئاۋازىنى ،
ئىككى كۆزدىن ياش ئاقار تىڭشاپ ئىۋىرغول سازىنى...
غوجامنىياز : ئاكا ،ياخشى يېزىلغان شېئىرلاركەن جۇمۇ. ئۆزلىرىنىڭ بىلىدىغانلىرى  ھەقىقەتەن  كۆپكەن ئاكا!
تۇرسۇن: قۇمۇل ھەقىقەتەن گۈزەل بىر ماكان ئىكەن،بۇ يۇرتنىڭ خەلقمۇ،تاغلىرىمۇ-باغلىرىمۇ گۈزەل!... ئەنە قارا  ،   قىش- ياز  قار – مۇزلىرۈ ئېرىمەيدىغان باغداش تىغى .  قۇمۇل ۋاڭىلىقىمۇ  200  يىلدىن  ئارتۇق  تارىققا ئىگە ۋاڭلىق بولۇپ، كۆپ قىتىم  بىيجىڭ   خاننىڭ   ھىمايىسىگە ئىرىشىپ كەلگەن .قۇمۇل خەلقىمۇ ئەمگەكچان، جاسارەتلىك، باتۇر خەلق ئىكەن . قۇمۇل قەدىمدىن تارتىې ئۇرۇش ئوچىقى بولۇپ كەلگەن.قومۇل ناخشىلىرىدا قومۇل خەلقىنىڭ ئېچىنىشلىق مۇڭ-زارى ، تۇرمۇش ئۆرپە-ئادەتلىرى، باراۋەرلىك،ئەركىنلىك،ھۆرلۈككە بولغان ئىنتىلىشلىرى، پاك مۇھەببەتكە بولغان تەشنالىقى ئىپادىلىنىدىكەن.
غوجامنىياز : قېنى مۇقام باشلانسۇن .(غىجەكنىڭ باشلىشى بىلەن مۇقام ئورۇنلىنىدۇ)
         مۇقام: (ئۇلۇغدۇر مۇقامىدىن پارچە )
              جاھاندا ئىككى يارىم بار،
              بىرى ئالىم ،بىرى زالىم .
              بىرىگە ئانچە مەيلىم يوق ،
              بىرىگە كۆيىدۇ باغرىم .
                   سېنىڭ ئىشقىڭدا ئەي دىلبەر ،
                   ئەجەپ دىۋانىلەر بولدۇم.
                    جاھاندا خالايىققا ،
                    بەسى ئەپسانىلەر بولدۇم .
             سېنىڭ ئىشقىڭدا ئەي دىلبەر ،
              يۈرەگىم قىپ-قىزىل قاندۇر.
مۇھەببەت ئوتىدا كۆيگەن ،
كۆڭۈل ھەردەم پەرىشاندۇر.
چۈشۈرگە :
         قانىدۇر سېنىڭ يارىڭ،
        جانانىدۇر مېنىڭ يارىم .
        چىققىلى چارەسى يوق ،
        بىچارىدۇر مېنىڭ يارىم ..
........................................
     (مۇقام ئېيتىلىپ  سەنەم قىسمىغا كەلگەندە ئەر-ئاياللار ئۇسۇل-پوتا ئوينايدۇ. مەشرەپ ئەۋجىگە چىققاندا قىقاشلار ئېيتىلىدۇ.مېھمانلار باشلىرىنى چايقىشىپ ، ساقاللىرىنى سىلاپ ، ھەيرانە-ھەس بولىدۇ)
تۇرسۇن : ئەمدى قۇمۇل ئەلنەغمىلىرىدىن توخۇ ئۇسۇلى،چاق ئۇسۇلى ،تۆگەئۇسۇلىنى كۆرسەك بولارمۇ ؟
غوجامنىياز : بولىدۇ ،بولىدۇ.قېنى ھاپىزلار باشلاڭلار.
(ھاپىزلار توخۇ ئۇسۇلى،چاق ئۇسۇلى،تۆگە ئۇسۇللىرىنىڭ مۇزىكىلىرىنى چالىدۇ ،غوجامنىياز ھەجۋى ئۇسۇللىرى بىلەن مېھمانلارنى قاقاقلاپ كۈلدۈرىدۇ . ھەممەيلەن ئۇنىڭغا بارىكاللا ئېيتىدۇ . مەشرەپ ئاخىرلىشىدۇ)
قادىر : ئۇكام غوجامنىياز ،ئۆزلىرىگە قايىل بولدۇم ،ئالمىخاننى ئۆزلىرىلا يېڭەلەيدىغان ئوخشايلا .
غوجامنىياز :نىمە ؟ كىم ئۇ ئالمىخان دىگەن ؟
تۇرسۇن  : ئۈرۈمچىدە «ئالمىخان» ئىسىملىك بىر كۇچالىق ئايال پەيدا بولۇپ قالدى . ھۆسنى جامالى شۇنداق كېلىشكەن ، قوشاقچى،ئۇسۇلچى، ھازىر جاۋاپ ئايال . نۇرغۇن بەگ-تۆرىلەرنىڭ يۈرىگى ئالمىخاننىڭ دەردىدە قان زەرداپ بولۇپ كەتتى ،ئالمىخان «كىم مېنى شېئىر-قوشاق،بىيىت ئېيتىپ يېڭىۋالسا،تېپىشماقلىرىمنى تاپالىسا شۇنىڭغا ياتلىق بولىمەن » دەپ شەرت قويدى. نۇرغۇن بايلار پۇللىرىنى دو تىككەن بولسىمۇ،   ئاخىرىدا يەنىلا ئالمىخانغا ئۇتتۇرىۋەتتى .تېخى ئالمىخاننى يەڭگۈدەك ئادەم چىقمىدى ........
غوجامنىياز :(مونۇلۇگ)ئالمىخان؟!ئالمىخان؟!
غوجامنىياز :(مېھمانلارغا قاراپ) بولدى ،بۇ گەپ راست بولسا ئالمىخاننى ئۆزەم يېڭىمەن.مەن ئەمرىمگە ئالىمەن. (قوللىرىدىن قاس چىقىرىدۇ،)
(تۇرسۇن بىلەن قادىر كۈلىشىپ كېتىدۇ. باشقىلارمۇ كۈلىدۇ)
تۇرسۇن: لېكىن بۇ ئوڭايغا توختىمامدىكىن.
غوجامنىياز: نىمىشقا ؟
تۇرسۇن : سۇنى كۆرمەي ئىشتان سالمىغۇلۇق.
غوجامنىياز : ئەدەپسىزلىگىمنى كەچۈرسىلە .
تۇرسۇن :يوقسۇ،يوقسۇ. خوش ئۇكام ، رەھمەت!ئارام ئالايلى.
غوجامنىياز : خوش،ئاللا سىلەرگە نۇسرەت ئاتا قىلغاي،ئامىن !!
( ساھىپخانلار مېھمانلارنى ئۇزۇتۇپ چىقىپ كېتىدۇ،پەردە يېپىلىدۇ )

             ئىككىنچى پەردە:ۋاڭ بېغىدا مەشرەپ

سەھنە كۆرۈنىشى : ھەيۋەتلىك شاھ ئوردىسىغا يانداشقان باغ .
( ۋاڭ بىرمۇنچە مېھمانلار،ۋەزىر-ۋۇزرالار، خىزمەتكارلارنى باشلاپ باققا كىرىدۇ. مېھمانلار ئۆز ئورۇنلىرىغا كېلىپ ئولتۇرىدۇ)
ۋاڭ : لۈكچۈن ۋاڭى بىلەن بىزنىڭ ئۇزاقتىن بۇيان دوسلىقىمىز بار،لۈكچۈن ۋاڭلىرى بېيجىڭغا مېڭىشىدا مېنى كۆپ قېتىم يوقلاپ تۇردى.مەن ئۇلاردىن كۆپ مەمنۇن.
مېھمان ئا : ۋاڭ غوجامنىڭ ئىلتىپاتىنى بىزنىڭ ۋاڭلىرىمىز ئۇنتۇپ قالغىنى يوق.بىزمۇ كۆپ مىننەتدار.
ۋاڭ : بۇ قېتىم ئوبدان كېلىشىپلا ،بۈگۈن بۇ باغدا ئوبدان بىر تاماشا قىلايلى.
مېھمانلار : ۋاڭ گوجامغا كۆپ  رەھمەت!!
ۋاڭ : قېنى ھاپىزلار سورۇنغا كىرسۇن!
جاكارچى : ناخشىچى،ھاپىزلار مەشرەپ سورىنىغا كىرىپ ئورۇن ئالسۇن!!
(بىرنەچچە سازەندە-ھاپىزلار مەشرەپ سورىنىغا كىرىپ ۋاڭغا تەزىم قىلىدۇ)
ناخشىچى-ھاپىزلار : ۋاڭ ئالىلىرى ئامان بولسۇن!!(ئىگىلىپ تەزىم قىلىدۇ)
ۋاڭ : ھەممەيلەنگە ئىجازەت!!
(ھەممەيلەن ئورۇنلىرىغا  كېلىپ ئولتۇرىدۇ)
ۋاڭ :  قېنى مەشرەپ باشلانسۇن!
(«سايراڭ بۇلبۇلۇم مۇقامى» ئورۇندىلىدۇ.مۇقام ئورۇندالغاندا پوتا ئوينىلىدۇ،سەنەمگە چۈشكەندە قىز-چوكانلار ئۇسۇلغا چۈشىدۇ)
لۈكچۈنلۈك مېھمانلار: ياخشى !ياخشى !،ياخشى ئوينىدى.
ۋاڭ : مېھمانلارنىمۇ ئۇسۇلغا تارتىڭلار !
(قومۇللۇق قىز-چوكانلار مېھمانلارنى ئۇسۇلغا تارتىدۇ.مەشرەپ داۋاملىشىدۇ.)
ۋاڭ : ئەمدى مەشرەپ توختىسۇن.قىزىقچىلىق قىلىش باشلانسۇن!!
جاكاچى :قىزىقچى قاسىم بىلەن قىزىقچى خوجامنىياز كەلدى !!
(قاسىم قىزىق،غوجامنىيازلار كىرىدۇ)
قاسىم قىزىق،خوجامنىياز : ۋاڭ ئالىلىرىنىڭ ئالتۇن بويى ئامان بولغاي!
ۋاڭ  : ھەئە، قاسىم قىزىق،خوجامنىياز ، مېھمانلار سىلەرنىڭ كارامىتىڭنى كۆرۈشكە تەقەززا بولۇپ كەتتى،قېنى مېھمانلارنى بىر كۈلدۈرۈپ قويۇڭلار!ئاۋال قاسىم باشلىسۇن!
قاسىم قىزىق :باش ئۈستىگە!قېنى قانداق قىزىقچىلىق قىلىپ بېرىمەن ۋاڭ غوجام؟
ۋاڭ : بۇلار ھەرقانداق قىزىقچىلىقنى قىلالايدۇ. قېنى مېھمانلار سىلەر تەلەپ قىلىڭلار .
مېھمان ئا : قاسىم بىزگە كىچىك بالىنى دوراپ بەرسۇن!
قاسىم قىزىق : كىچىك بالىنى؟ بولىدۇ،بولىدۇ.
(قاسىم قىزىق قەن-كېزەكلەرنى ئۇياق-بۇياققا ئاتىدۇ،ئاندىن بىر مېھماننىڭ ئىتىگىگە چىقىپ ئولتۇرىۋالىدۇ.)
مېھمان ب : قاسىم ئاخۇن بۇ قانداق قىلىق؟
قاسىم قىزىق : مەن كىچىك بالىنى دوراۋاتىمەن .
(ھەممەيلەن قاقاقلاپ كۈلىشىدۇ)
مېھمان س : قاسىم قىزىق ئەمدى ئايال كىشىنى دوراپ بەرسۇن.
قاسىم قىزىق: ئايال كىشىنى؟؟!!
(قاسىم قىزىق بىر ئايالنىڭ ياغلىقىنى چىگىۋېلىپ،مېھمانلارنىڭ ئالدىغا بېرىپ،ھەجۋى قىلىقلارنى چىقىرىپ مېھمانلارنى كۈلدۈرىدۇ)
ۋاڭ :ئەمدى غوجامنىياز قىزىقچىلىق قىلسۇن. قېنى سەن غوجامنىياز؟ ھۈنىرىڭنى بىر كۆرسىتىپ مېھمانلار كۆڭلىنى خوش ئەت!
غوجامنىياز : باش ئۈستىگە( بېشىنى ئىگىپ تۇرىدۇ)
ۋاڭ : قېنى مېھمانلار غوجامنىياز سىلەرگە قانداق قىزىقچىلىق قىلىپ بېرىدۇ؟
مېھمان س : ئاڭلىساق قومۇلنىڭ ئاجايىپ ئۇسۇللىرى بار دەيدۇ.بولسا شۇ ئۇسۇللاردىن ئويناپ بەرسە.
غوجامنىياز:
           خوش كەپتىلا مېھمانلار ،
           پېقىر ۋاڭنىڭ بىر قۇلى.
           ئويناپ بېرەي سىلەرگە،
           توخو،تۆگە ئۇسۇلى.
مېھمانلار : بارىكاللا !!،بارىكاللا!
(ھاپىزلار«بۈرگەم» ،نازىركوم ئۇسۇلى،تۆگە ئۇسۇلىغا چېلىپ بېرىدۇ،غوجامنىياز ھەرخىل قىلىقلارنى چىقىرىپ ئۇسۇل ئويناپ مېھمانلارنى تېلىقتۇرۇپ كۈلدۈرىدۇ)
مېھمانلار : بارىكاللا!!بارىكاللا!!
مېھمانلار : ۋاڭ ئالىلىرى ھەر دائىم خوشال ئۆتكەي!خوشال ئۆتكەي!
ۋاڭ : ئۆزلىرلالا خوش بولسىلا مېنىڭ خوشاللىقىم شۇ.غوجىدار!!
غوجىدار : خوش ۋاڭ غوجام !(غوجىدار كىرىپ باش ئېگىپ تۇرىدۇ)
ۋاڭ : بۇ قىزىقچىلار بىر يامبۇ بىلەن تارتۇقلانسۇن.!
غوجىدار :خوپ!
مېھمان ب: ۋاڭ غوجام ئەمدى ئارام ئالايلى .
ۋاڭ : بولىدۇ ،قېنى مەرھەمەت!!(مېھمانلارغا يول كۆرسىتىدۇ)
(غوجامنىياز ۋاڭ ئالدىغا كېلىپ تىزلىنىدۇ)
غوجامنىياز :ۋاڭ ئالىلىرىغا سۆزۈم بار ئىدى.(ھەممەيلەن ئورۇنلىرىدا توختايدۇ)
ۋاڭ :ئورنىڭدىن تۇر!ھەئە سۆزلە ،نىمە گېپىڭ بار ئىدى؟
خوجامنىياز :(ئورنىدىن تۇرۇپ ،باش ئېگىپ قول قوشتۇرۇپ سۆزلەيدۇ) ھوزۇرلىرىغا كىرىپ ،ئۆزلىرى بىلەن دىدارلاشماق تەس.  يېقىنقى   بىرنەچچە   يىلدىن ھوزۇرلىرىدا  بولۇپ ،  مەشرەپ-  سورۇنلارغا قاتناشتىم .قىزىقچىلىقلىرىم بىلەن ئۆزلىرىنى خوش قىلدىم .ئەمدى بىر تەلىپىم بار ئىدى.
ۋاڭ : قېنى سۆزلە!
غوجامنىياز: ئاڭلىسام ئۈرۈمچىدە ئالمىخان ئىسىملىك بىر ئايال پەيدا بولۇپ قاپتۇ .ئۇ ئايال ناخشىچى، ھازىرجاۋاپ قوشاقچى ئىكەن، ئۇنى قوشاق ئېيتىش،تېپىشماق تېپىش،ئۇسۇل ئويناشتا يېڭىپ ئەمرىمگە ئالايمىكىن دەيمەن     .  ئالىلىرىنىڭ قۇللىرىغا ئىجازەت
بېرىشىنى سورايمەن!
ۋاڭ : (قاقاقلاپ كۈلۈپ  كېتىدۇ .) خوجامنىياز ، سەن مېنىڭ قۇلۇم
سەن ماڭا چەكسىز سادىق بولۇپ كەلدىڭ  . مەشرەپ – سورۇنلاردا  مېنىڭ كۆڭلۈمنى سۆيۈندۈردۈڭ .ئالمىخاندىن مېنىڭمۇ خەۋرىم بار. بىراق،ھەر-ھەر بەگ ،تۆرىلەر ئالالمىغان ئالمىخاننى سېنىڭ ئالالىشىڭ...
غوجامنىياز : قۇللىرىغا ئىشەنسىلە ۋاڭ غوجام.
ۋاڭ : ئالمىخاننى يېڭىۋېلىشقا ئىشەنچىڭ بارمۇ ؟
خوجامنىياز : ئىشەنچىم بارۋاڭ غوجام!
ۋاڭ : بولىدۇ،يارلىق !خوجامنىياز قۇلغا ئىجازەت بېرىلسۇن !ئۇرۈمچىگە چىقىپ كەلسەڭ بولىدۇ.
خوجامنىياز :  ۋاڭ غوجامغا  مىڭ رەھمەت !مىڭ رەھمەت!...
(غوجامنىياز قول قوشتۇرۇپ جىم تۇرىدۇ)
ۋاڭ : ئىجازەت بەرسەم چىقىپ كەتمەي يەنە تۇرىسەنغۇ؟
غوجانىياز :  
     ئون سەككىز كۈن يول ئىكەن ،
ئۈرۈمچىنىڭ يوللىرى.
     پارالامدۇ پىيادە ،
ئۈرۈمچىگە قۇللىرى.
ۋاڭ : توغرا ،سەن بىر قۇل تۇرساڭ،سەندە نەدىمۇ ئۇنچىلىك پۇل بولسۇن.غوجىدار !!(غوجىدارنى چاقىرىدۇ)
غوجىدار : خوش ۋاڭغوجام!(غوجىدار كىرىپ باش ئىگىپ تۇرىدۇ)
ۋاڭ : غوجامنىيازغا بەش يامبۇ بېرىپ يولغا سېلىپ قويۇڭلار !
غوجىدار : باش ئۈستىگە.
غوجامنىياز : ۋاڭ غوجامغا مىڭ رەھمەت!!ۋاڭ غوجامغا مىڭ رەخمەت!
(غوجامنىياز كەينىچە مېڭىپ چىقىپ كېتىدۇ.ۋاڭمۇ مېھمانلارنى باشلاپ چىقىپ كېتىدۇ .پەردە يېپىلىدۇ)

           ئۈچۈنچى پەردە : ئۈرۈمچىدىكى ئۈچرىشىش

1-كۆرۈنۈش
سەھنە كۆرىنىشى:پىشايۋانلىق ھويلا،ھويلىغا يانداش قاتار-قاتار كەپە ئۆيلەر كۆرىنىپ تۇرىدۇ.ياغاچ رىشاتكىنىڭ يېنىدىكى كەڭ سۇپىدا ئوسمان باي ياستۇققا يۆلىنىپ ،يەلپۈگۈچتە ئۆزىنى يەلپۈپ ئولتۇرغان ھالەتتە سەھنە ئېچىلىدۇ.
(ئوسمان باينىڭ ئايالى ئانارخان چاي كۆتىرىپ چىقىپ ،ئوسمان بايغا چاي قۇيىدۇ)
ئانارخان: بېگىم،ئىشىك ئالدىغا بىر مەدىكا كېلىپ قاپتۇ. ئىش بولسا قىلسام دەيدۇ.
ئوسمان باي :نەدىن كەپتۇ؟ ئۇنى كىرگۈزىۋەت ،پاراڭلىشىپ باقاي.
(ئانارخان چىقىپ كېتىدۇ.غوجامنىياز بىر قولىدا قومۇل غىجىگى كۆتەرگەن ھالدا كىرىدۇ)
غوجامنىياز: ئەسسىلامۇ ئەلەيكۇم باي ئاڭا!!
ئوسمان باي: ۋەئەلەيكۇم ئەسسىلام.(ئورنىدىن تۇرۇپ غوجامنىياز بىلەن قول ئېلىشىپ كۆرىشىدۇ)
غوجامنىياز: مەن بىر مەدىكار ،ئىش بولسا قىلايمىكىن دەيمەن.
ئوسمان باي : سىلىنى نەدىن سورايمىز ئۇكام؟
غوجامنىياز : مەن قومۇلدىن كەلدىم ،
ئوسمان باي :قومۇلدىن؟ مەن قومۇللۇق مەدىكانى تۇنجى كۆرىشىم ئۇكام ھا...ھا...ھا...
غوجامنىياز: ئۈرۈمچىگە  تۇققان يوقلاپ چىققان،قايتىشىمدا پۇلۇم قالمىدى ،شۇڭا......
ئوسمان باي :چىققىلى ئۇزۇن بولدىمۇ؟يۇرت ئەھۋالى قانداقراق؟نەچچە كۈندە يىتىپ چىقتىلا؟
غوجامنىياز :ۋاڭ غوجامنىڭ ئىلتىپاتىدا ئوبدان كېتىۋاتىدۇ.كارۋانلارغا ئەگىشىپ 18 كۈندە يىتىپ چىقتىم.
ئوسمان باي : نام –شەرەپلىرى نىمىكىن؟
غوجامنىياز : ئىسمىم غوجامنىياز.نىمە ئىش قىلالايدىلا ؟
غوجامنىياز : قانداق ئىش بولسا قىلالايمەن،باي ئاكا!
ئوسمان باي : ياخشى،ياخشى بەستىلىرىدىن قارىسىمۇ خېلى ئەركەكتەك كۆرىنىلا.بولىدۇ ھازىرچە ئوتۇن كەسلەش،سۇ توشۇشتەك ئىشلارنى قىلىپ تۇرسىلا!كېيىنچە مۇۋاپىق ئىش چىقىپ قالۇر. ھەي ئانارخان ، مېھمانغا چاي كەلتۇر!
ئانارخان : مانا،مانا!
(ئوسمانباي غىجەكنى قولىغا ئالىدۇ)
ئوسمانباي : بۇ قانداق ساز ؟
غوجامنىياز : بۇ قومۇل غىجىگى .بۇ ساز پەقەت قومۇلدىلا بار .تولىمۇ مۇڭلۇق ئاڭلىنىدۇ.
ئوسمانباي :قېنى ئەمىسە بىر چېلىپ باقماملا؟
(ئانارخان كىرىپ،غوجامنىيازغا چاي كەلتۈرىدۇ.ئانارخان چاينى قۇيۇپ قويۇپلا چىقىپ كېتىدۇ)
ئوسمانباي : ئېسىم قۇرىسۇن،«ئاۋال تائام ،ئاندىن كالام»دەپتىكەن.ئالدى بىلەن تاماق يەيلى،ئاندىن...
غوجامنىياز : ھېچقىسى يوق،ئاۋال ئۆزلىرىگە بىر مۇڭ قىلىپ بېرەي.
(غوجامنىياز  غىجەكنى ئازراق سازلىۋالغاندىن كېيىن قومۇل مۇقاملىرىدىن «يۇردۇم ئالەم»مۇقامىنى چالىدۇ.ئوسمانباي مۇڭ بولۇپ ئاڭلايدۇ.)
ئوسمانباي : بەك مۇڭ سازكەن .بەك مۇڭ سازكەن.ئەجەپ كۆرۈپ باقماپتىمەن. ئۈرۈمچىگە بىرەر ئىش بىلەن چىققاندەك تۇرىللا.بىلىپ باقسام بولامدۇ؟
غوجامنىياز :راست گەپنى دەي باي ئاكا. ئاڭلىسام ئۈرۈمچىدە ‹ئالمىخان› ئىسىملىك بىر ئايال باركەن. ئۇ ئۇسۇل ئويناش،قوشاق ئېيتىش،تېپىشماق تېپىشتا بەك ئۇستىكەن. بەگ –تۆرىلەر بىلەن دوئىلغا چۈشۈپتۇ.كىم ئۇنى ئۇسۇل ئويناش،قوشاق قېتىش،تېپىشماق تېپىشتا يېڭىۋالسا ئۇ شۇنىڭ ئەمرىگە ئۆتىدىكەن ،شۇنداقمۇ؟
ئوسمانباي : شۇنداق،شۇنداق.بىراق ھازىرغىچە بىرمۇ باي-تۆرە ئۇنى يېڭەلمىدى،يا ئەمرىگە ئالالمىدى. ئۇ نۇرغۇن باينىڭ پۇلىنى ئۇتىۋالدى.ئۇ ئايالغا تەڭ كېلىدىغان ئادەم چىقماسمىكىن دەيمەن.
غوجامنىياز : مانا مەن شۇ ئىش توغرىلىق چىقتىم. بىر دوئىلغا چۈشۈپ باقاي دەيمەن.
ئوسمان باي : ھا...ھا...ھا...بىكار ئاۋارە بولمىسلا،ئۇ بەك يامان ئايال .نى-نى نەۋقىران يىگىتلەر،باي،بەگ تۆرىلەر  ئۇنىڭ ئىشقى پىراقىدا كۆيۈپ،پەرۋانىدەك ئۆزىنى بۇ ئوتقا ئۇرۇپ باقتى.بىراق كۆيۈپ كۈل بولۇپ كەتتى.ئۆلىرىمۇ ئۇتالمايلا، بۇ نىيەتلىرىدىن يانسىلا بولارمىكىن..ناۋادا ئۆزلىرىگە ئىشەنچىلىرى بولسا، ئالمىخاننى ئۇتىۋالىدىغان ئىش بولسا مانا مەن سورۇننى ئۇيۇشتۇرىمەن.
غوجامنىياز : رەھمەت باي ئاكا،شۇنچىلىك دەپ قويغانلىرىغا.ماڭا ئىشەنسىلە باي ئاكا ،چوقۇم ئۇتۇپ چىقىمەن.
ئوسمان باي: ئەمىسە تەييارلىقلىرىنى قىلسىلا . ئۇ ئايال ھەر ئاخشىمى مۇشۇ يەردىن ئۆتىدۇ.سەل ساقلىساق بۈگۈنمۇ ئۆتۈپ قالامدۇ-تېخى!
(ئوسمان باي ئورنىدىن تۇرۇپ، ياغاچ  رىشاتكىدىن تۆۋەنگە قارايدۇ.)
ئوسمان باي : ئەنە ،ئەنە كېلىۋاتىدۇ.ئاشۇ مەپىنىڭ(پەيتۇن) ئىچىدە.
(غوجامنىيازمۇ بېرىپ تەڭ قارايدۇ)
غوجامنىياز : مەپىدىن چۈشكەن شۇمۇ؟
ئوسمان باي :دەل ئۆزى.قىزىل دۇخاۋا كۆينەك،قاما تۇماق كەيگەن ئالمىخان شۇ.  يېنىدىكى ئىككى ئايال ئۇنىڭ قوغدۇغۇچىلىرى.
غوجامنىياز : كۆردۈم،كۆردۈم.
ئۇلار ھېلىلا مۇشۇ ئۆينىڭ ئالدىدىن ئۆتىدۇ.
(ئالمىخان ئىككى ھەمرىيى بىلەن  سەھنىنىڭ ئوڭ تەرىپىدىن كىرىپ سول تەرىپىدىن چىقىپ كېتىدۇ.ئوسمان باي بىلەن غوجامنىياز ئالمىخانغا  ئاچكۆزلەرچە قاراپ قالىدۇ.پەردە يېپىلىدۇ)
  2-كۆرۈنۈش
سەھنە :   1-كۆرۈنۈش بىلەن ئوخشاش.
(ئوسمان باينىڭ ھويلىسىدا باي كەيىمى كەيگەن غوجامنىياز، بىرنەچچە بەگ-تۆرىلەر قاتارلىشىپ ئولتۇرغان،مېھمانلارنىڭ ئالدىغا نازۇ-نېمەتلەر تىزىلغان  ھالەتتە پەردە ئېچىلىدۇ.)
ئىشىك باقار : ئالمىخان خېنىم كەلدى!!
ئالمىخان :ھەممىلىرىگە سالام!(ئىككى قولىنى كۆكسىگە قويۇپ سالام بېرىدۇ)
مېھمانلار : ئالمىخانمۇ سالامەت بولغاي!
(ئالمىخان ئىككى ھەمرىيى بىلەن كىرىپ ،تۆرىدىن ئورۇن ئالىدۇ)
ئوسمان باي :بۈگۈن ئىنىم غوجامنىيازباي ئالمىخان بىلەن بەسلەشمەكچى.ئالمىخان بىلەن شۇنداق كېلىشتۇقكى، ناۋادا ئىنىم ئالمىخاننى يېڭىۋالسا بۈگۈنلا نىكاھى ئوقۇلۇپ ،ئىنىمغا قوشۇپ قويۇلىدۇ. ناۋادا يېڭەلمەي قالسا ئالمىخانغا 5 يامبۇ بېرىلىدۇ.ھەممىلىرى گۇۋا بولغايلا.
بەگ-تۆرىلەر : بىز گۇۋا،بىز گۇۋا.
ئوسمان باي : ھازىر بەسلىشىش باشلىنىدۇ.ئاۋال قوشاق توقۇشتا بەسلىشىدۇ،قېنى بەسلىشىش باشلانسۇن!
(ئالمىخان بىلەن غوجامنىياز سەھنىنىڭ ئوتتۇرسىغا كېلىپ توختايدۇ.بىر-بىرىگە قاراپ تەبەسسۈم قىلىشىدۇ.قوشاقلاردىن كېيىن قىقاس سېلىنىدۇ)
ئوسمان باي : ئاۋال غوجامنىياز بىيىت ئېيتىدۇ.ئالمىخان بىيىت بىلەن جاۋاپ قايتۇرىدۇ.
غوجامنىياز:
         ئالمىخانمۇ ئۆزلىرى،
         نەچچىدە باردۇ ياشلىرى.
         ئەگىم-ئەگىم قىياقتەق
         قارا-قارادۇ قاشلىرى.
ئالمىخان:
        ئېتىم مېنىڭ ئالمىخان،
        يىگىرمىگە تولمىغان.
       ھىچكىم قارا قېشىمغا ،
       ئۆزلىرىدەك باقمىغان.
غوجامنىياز:
    ئالمىخانمۇ ئۆزلىرى ،
قارىمۇقتەك كۆزلىرى .
ئەجە پ  تاتلىق ئاڭلاندى ،
قەن – شىكەردەك سۆزلىرى .
ئالمىخان:
          ئالمىخان دەپ ئېتىم بار،
          ئوڭ قېشىمدا مېڭىم بار.
          دەملەپ ئىسسىق ئىچكىلى،
          ناۋات سالغان چېيىم بار.
غوجامنىياز:
           ئالمىخانلار چىرايلىق ،
          قىرچىن ئىكەن بويلىرى.
          ئون سەككىز كۈن يول ماڭدىم،
          يىراق ئىكەن يوللىرى.
ئالمىخان :
           كېلەلمەيلا يول بېسىپ،
           دىللاردا پىراق بولمىسا.
           يول يىراقى بىلىنمەس،
           كۆڭۈل يىراق بولمىسا.
      
ئوسمان باي :ئەمدى ئالمىخان بىيىت ئېيتىدۇ.غوجامنىياز بىيىت بىلەن جاۋاپ قىلىدۇ.
ئالمىخان :
قۇمۇللاردىن چىقىپلا ،
تۇرپانلارنى ئارىلاپ .
ئۈرۈمچىدە يۈرۈپلا،
كەينىمىزدىن مارىلاپ .
خوجامنىياز :
         داڭقىلىرى ئالمىخان ،
         قومۇللارغا يەتتىغۇ.
         ئوتلىرىغا پايلىماي،
         يۈرەك كۆيۈپ كەتتىغۇ.
      
ئالمىخان:
        غوجامنىياز ئوخشايدۇ،
           ئىگىز ئۆسكەن تېرەككە.  
           مېنى ئالاي دىسىلە،
           ساق بولسىلا يۈرەككە.
غوجامنىياز:
         بويۇم ئىگىز بولسىمۇ،
         قەلبىم دەريا كەڭ مېنىڭ.
         كۆيگەن ئوتلۇق يۈرىگىم،
         مىڭ يىگىتكە تەڭ مېنىڭ.
ئالمىخان:
  ئالدىمدىكى دارازا ،
ئوتتۇز ياشقا كىرىپتۇ .
قاراپ باقماي يېشىغا ،
ماڭا شىلتىڭ ئېتىپتۇ .
خوجامنىياز :
ھەي،ھەي جېنىم ئالمىخان ،
قېرى كۆرمەڭ پېقىرنى .
ئېتىقاتلىق يىگىتمەن ،
بېرايايمەن       مېھىرنى .
ئالمىخان  :
        ئۆيلىرىگە بارغاندا
       گۆش بىلەن باقالاملا؟
       مىۋىسىنى يەپ بولۇپ،
       بىر مېغىز چاقالاملا.
غوجامنىياز:
       ماڭا ھەمرا بولسىلا،
     كۆرپىدە باقالايمەن.
     ئۆزلىرىگە جان بېرىپ ،
     مەيدەمنى ياقالايمەن.
ئوسمان باي : سۇئال-جاۋاپ توختىدى.ئۇلار بىر-بىرىنى يېڭەلمىدى. ئىختىيارى بىيىت ئېيتىش باشلىنىدۇ.قېنى باشلانسۇن.
غوجامنىياز :
           ئالمىخاننىڭ بېغىدا
           بىر تۈپ ئۈزۈم قەشقىرى.
           ئالمىخانغا قارىسام ،
           ئوتتۇر چىشى تاشقىرى.
ئالمىخان :
          قومۇللاردا ئۆيىلىرى،
          ئەجەپ ئىكەن خۇيىلىرى.
          ئوتتۇز ياشقا كىرىپلا،
          بولمىدىمۇ تويىلىرى؟
غوجامنىياز :
           ئۆيۈم مېنىڭ قومۇلدا،
            ئۆزلىرى بار ئويۇمدا.
           تاغ-داۋانلار ئاشىمەن،
           بولسا خەتەر يولۇمدا.
               ئالمىخان دەپ ئاڭلىدىم،
               بىلىمنى مەھكەم باغلىدىم .
               ئالمىخاننىڭ ئىشقىدا
               چۆللەردە قان يىغلىدىم.
ئالمىخان :  
غوجامنىياز :
ئالمىخانلار چىرايلىق،
            چىرايلىرى كۈلگۈنچەك.
            مەيدىسىدە يوق ئىكەن،
            قاراپ باقسام تۈگۈنچەك.
ئالمىخان :
غوجامنىياز ئۆزلىرى،
قوپال ئىكەن سۆزلىرى.
قېلىن گەپنى قىلىشقا ،
چىدىدىمۇ يۈزلىرى.
غوجامنىياز :
   ئالمىخاننى ئالىمەن ،
  يۈرىگىمگە تاڭىمەن.
ئۇنىمىسا ئالمىخان ،
بىيىت بىلەن سالىمەن.
ئالمىخان:
          ....................
كۆپچىلىك : يېڭىلدى ،يېڭىلدى ،ھوي!!!!!!!!!
ئوسمان باي : بۇ مۇسابىقىدە ئالمىخان يېڭىلدى .ئەمدى تېپىشماق ئېيتىش مۇسابىقىسى باشلىنىدۇ.مۇسابىقە باشلانسۇن!!
ئالمىخان  سۇئال :
         بېشى يوغان قاپاقتەك،
پۇتى ئۇزۇن ساپاقتەك.
قۇلىقى پۇتىنىڭ ئۇچىدا،
ئۈچىيى قوسىقىنىڭ تېشىدا.
غوجامنىياز جاۋاپ:
   ئېتى ئۇنىڭ دۇتاردۇر،
   يا بولمىسا ساتاردۇر.
غوجامنىياز سۇئال  :
          ئەجەپ تاتلىق ئاش باردۇر،
          ئاش ئىچىدە تاش باردۇر.
          تاشنى چېقىپ كۆرگەندە ،
          تاش ئىچىدە ئاش باردۇر.
ئالمىخان جاۋاپ:
          تېپىشماقتىن كۆرۈكتۇر،
          ئېتى ئۇنىڭ ئۆرۈكتۇر.
ئالمىخان سۇئال :
          پۇتى پالاقتەك،
          ئاغزى قوشۇقتەك.
          سۇدا يۈرىيدۇ ،
          ئۈزۈپ بېلىقتەك.
غۇجامنىياز جاۋاپ:
           چېچىمۇ يوق تازغۇ ئۇ،
           ئۆدەك ياكى غازغۇ ئۇ.
   
غوجامنىياز سۇئال:
           سېرىق ماتا تونى بار،
           ئىچىدە لىق ئۇنى بار.
           ئۇن ئىچىدە بىر نوغۇچ،
           يوپۇرماقلىرى كۈمۈچ.
ئالمىخان جاۋاپ :
            كۈزدە پىشقان مىۋىكەن،
            ئېتى ئۇنىڭ جىگدىكەن.
ئالمىخان سۇئال:
         ئۆزى قابىل،يورغا تاي،
         لېكىن زادى كىشنىمەس.
         بەللىرى نازۇك قىلدەك،
         بىدە-سامان چىشلىمەس.
غوجامنىياز جاۋاپ:
           يەردە ھەردەم ئۆمىلە،
           ئېتى ئۇنىڭ چۈمۈلە.
غوجامنىياز سۇئال  :
          شىكەر دىسەم تاتلىق ئەمەس،
         ئاق تۇز دىسەم ئاچچىق ئەمەس.
قىشتا كۆكتىن چۈشىدۇ،
يازدا كۆزگە كۆرۈنمەس.
ئالمىخان جاۋاپ:
          قاردا پەقەت تەم بولماس،
          مۇشۇ جاۋاپ كەم بولماس.
ئالمىخان  سۇئال :
                يەتتە دوست بار قەدىناس،
                بىر-بىرىدىن ئايرىلماس.
                قىرىمىدى ،ئۆلمىدى،
                ياكى سەككىز بولمىدى.
          غوجامنىياز جاۋاپ:
                 ئۇچرىتىمىز ھەر كۈنى ،
                 ئېتى ئۇنىڭ ھەپتىدۇر.
                 ئايلىنىدۇ رەت بىلەن
                ئاشالمىدى، يەتتىدۇر .
غوجامنىياز سۇئال :
               تىرىك كېلىپ ،ئوينىشىپ،
               نان سوراپتۇ ئۆلۈكتىن.
              ئۆلۈك دەرھال «كاپ»قىلىپ،
              جان سوراپتۇ تىرىكتىن .
ئالمىخان جاۋاپ :
....................
ئوسمان باي : يېڭىلدى،يېڭىلدى،ئالمىخان جاۋاپ بېرەلمىدى.
(ئالمىخان يېڭىلىپ قالغىنىدىن خىجالات بولۇپ،بېشىنى سېلىپ تۇرىدۇ)
ئوسمان باي : ئەمدى ناخشا-ئۇسۇل مۇسابىقىسى ئۆتكۈزۈلىدۇ. قېنى مۇسابىقە باشلانسۇن. ئالدى بىلەن ئالمىخان باشلىسۇن .
(ئالمىخان دۇتتارنى ئېلىپ كۇچا خەلق ناخشىلىرىدىن ئېيتىدۇ)
ئالمىخان :
            سېنىڭ جانىڭ ،مېنىڭ جانىم بىر جان ئەمەسمۇ،
            سېنىڭ ئۈچۈن مېنىڭ جانىم قۇربان ئەمەسمۇ.
.......................................
(غوجامنىياز پىقىراپ ئۇسۇل ئوينايدۇ،ئالمىخانغا بېقىپ،ھەجۋى شەكىللەرنى چىقىرىدۇ.قىقاس كۆتىرىلىدۇ)
ئوسمانباي :ئەمدى نۆۋەت غوجامنىيازغا كەلدى.قېنى غوجامنىياز باشلىسۇن.
(غوجامنىياز غىجەكنى ئېلىپ قومۇل مۇقاملىرىدىن «ئىراق مۇقامى»غا چالىدۇ.ئالمىخان دەسلەپكى ئىككى چۈشۈرگىگە ئۇسۇل ئوينايدۇ.ئۈچۈنچى چۈشۈرگىگە كەلگەندە ئوينىيالماي قالىدۇ ،قىقاس-چۈقان كۆتىرىلىدۇ.)
كۆپچىلىك : يېڭىلدى،يېڭىلدى،ئالمىخان يېڭىلدى.
ئالمىخان:(ئوڭايسىز ھالدا)مەن يېڭىلدىم،غوجامنىيازنىڭ ئۆمرىگە ئۆتۈشكە رازى بولدۇم.
كۆپچىلىك: مۇبارەك بولسۇن،مۇبارەك بولسۇن.قېنى نىكاھنى ئوقۇيلى.
(كۆپچىلىك غوجامنىياز بىلەن ئالمىخاننى ئېلىپ چىقىپ كېتىدۇ.پەردە يېپىلىدۇ)

                                              تۆتىنچى پەردە: ۋاڭ ئوردىسىدا

سەھنە كۆرىنىشى :ھەيۋەتلىك ۋاڭ ئوردىسى .
(ۋاڭ تەخىتتە ئولتۇرغان،ۋەزىر-ۋۇزرالار باش ئىگىپ تۇرغان ھالەتتە پەردە ئېچىلىدۇ.)
ۋاڭ : ھەممەيلەنگە ئىجازەت!(ھەممەيلەن ئورۇنلىرىغا كېلىپ ئولتۇرىدۇ)
جاكاچى : غوجامنىياز بىلەن ئالمىخان كەلدى!!
(غوجامنىياز بىلەن ئالمىخان كىرىدۇ،ئىگىلىپ ۋاڭغا سالام قىلىدۇ)
غوجامنىياز،ئالمىخان : ۋاڭ غوجام ئامان بولغاي!!ۋاڭ غوجامنىڭ ئالتۇن بويى ئامانمىكىن؟
ۋاڭ : غوجامنىياز ساڭا بارىكاللا! ئالمىخاننى ئېلىپ كېلىپسەن ھا..ھا...ھا...
غوجامنىياز : ۋاڭ غوجامنىڭ ئىلتىپاتى بىلەن ئالمىخاننى ئېلىپ كەلدىم.ۋاڭ غوجامغا مىڭ رەھمەت!!
ۋاڭ : ئالمىخان!
ئالمىخان : خوش ۋاڭ غوجام.
ۋاڭ :  ئۇزۇندىن بېرى داڭقىلىرىنى كۆپ ئاڭلىدىم. ئاللانىڭ ئىرادىسى بىلەن مېنىڭ خانلىق ھوزۇرۇمغا كېلىپ قالدىلا. غوجامنىياز مېنىڭ قۇلۇم بولسىمۇ ،ئۆزلىرى مېنىڭ مېھمىنىم .كارامەتلىرىنى كۆرەي،بۈگۈن بۇ سورۇندا بىزگە بىر قىزىقچىلىق قىلىپ بەرسىلە،باشقىلارغا ئىجازەت!!(ھەممەيلەن ئورۇنلىرىغا كېلىپ ئولتۇرىدۇ)
ئالمىخان : باش ئۈستىگە ۋاڭ غوجام.
غوجامنىياز : ۋاڭ غوجامغا سالامغا كىرگەندە،ۋاڭ غوجامنىڭ ھوزۇرىغا سۇنارمىز دەپ ئالمىخان بىلەن ئىككىمىز بىر لەپەر تەييارلاپ قويغان ئىدۇق.
ۋاڭ : قېنى ئىجازەت!
(غوجامنىياز بىلەن ئالمىخان سەھنىنىڭ ئوتتۇرسىغا كېلىپ بىر-بىرىگە تەزىم قىلغاندىن كېيىن لەپەر ئوينايدۇ)
ئالمىخان :
          ۋاڭ غوجامنىڭ بېغىدا،
          ئېچىلىپتۇ لەيلىگۇل.
غوجامنىياز:
          ۋاڭ غوجامنى كۆرگەندە ،
          كۆڭۈللەرگە تولدى گۈل.
ئالمىخان:
         ياخشى يۇتكەن قومۇلمۇ،
         تاتلىق ئىكەن قوغۇنمۇ.
غوجامنىياز :
         ۋاڭ غوجامغا قارايدۇ،
         ئاقتاش،لاپچۇق،شوپۇلمۇ.
ئالمىخان:
        ۋاڭ غوجامنىڭ بېغىدا،
        گۈل ئۈنۈپتۇ رەڭمۇ-رەڭ.
غوجامنىياز :
       ۋاڭ غوجامنى كۆرگەندە ،
       نىجاتچىمىز سىزلا دەڭ.
ئالمىغان :
       قۇشلار سايراپ تىنمايدۇ،
       ۋاڭ غوجامنىڭ بېغىدا.
غوجامنىياز :
      چارۋىلىرى بەكمۇ كۆپ ،
     شوپۇل،ئاقتاش تېغىدا.
ئالمىخان:
     ۋاڭ غوجامنىڭ دەۋرىدە ،
     خوشال ئۆتەر كۈنىمىز.
غوجامنىياز:
     ۋاڭ غوجامغا خۇش ياقسا،
     تۈگىمەيدۇ كۈيىمىز.
ۋاڭ : ياخشى!!ياخشى! سىلەر مېنى ماختاپ بۇ نەزمىنى توقۇپ چىقىپسىلەر. كۈنىڭلەر كۆڭۈللۈك ئۆتكەي .ھەراست، ئالمىخاننى دۇتارچى،ناخشىچى دەپ ئاڭلىۋېدىم.ناخشىلىرىمۇ ئاڭلاپ باقايلى.
غۇجامنىياز : شۇنداق ۋاڭ ئالىلىرى ،قېنى ئالمىخان....؟
(ئالمىخان دۇتتارنى قولىغا ئېلىپ،كۇچا خەلق ناخشىسى«بۇلبۇلجان»نى ئېيتىدۇ)
ئالمىخان :
          يار دەپ مەن ئادا بولدۇم،
          غەمگە مۇپتىلا بولدۇم.
          بىر كۆرۈپ جامالىڭنى ،
         ئاشىق بىقارار بولدۇم.
نەقرات :بۇلبۇلجان،بۇلبۇلجان سايراپ ئۆتتىڭىز،
        باغرىمغا يېقىپ ئىشقى ئوتىنى
        بىر چىرايلىق قاراپ ئۆتتىڭىز.
                   گۈل ئىكەنۇ گۈل ئىكەن،
                   رەنا-رەيھان گۈل ئىكەن.
                   يۈزلىرى گۈلدىن گۈزەل،
                   ئۆزى شوق بۇلبۇل ئىكەن.
   چۆل ئاۋاتنى چۆل دەيدۇ،
   چۆل ئەمەسكەن ئاۋاتكەن.
بىزنىڭ يارنى قەن دەيدۇ،
قەن ئەمەسكەن ناۋاتكەن.
ئۆرگەلدى پەلەك،چۆرگەلدى خەمەك.
يارنىڭ ئىشقىدا كۆيىدۇ يۈرەك.
ۋاڭ : بەك مەمنۇن بولدۇم ،كۇچا بۇلبۇلى مانا ئەمدى بىزنىڭ قومۇلغا كەپتۇ.ئاڭلىسام ئالمىخان ھازىر جاۋاپ قوشاقچىكەن .بىزنىڭ ئەمەت قالتىس بىلەن بىر مۇسابىقىگە چۈشۈپ باقسا قانداق دەيسىلەر .
كۆپچىلىك : ۋاڭ غوجام دانادۇر ،ۋاڭ غوجام دانادۇر!
جاكارچى : ئەمەت قالتىس ۋاڭ ئوردىسىغا كىرسۇن!
(بىر يىگىت ۋاڭ ئوردىسىغا كىرىدۇ.ۋاڭغا سالام قىلىدۇ)
ئەمەت قالتىس : ۋاڭغوجام  ئامان بولغاي!
ۋاڭ : كۇچا بۇلبۇلى ئالمىخان قومۇلغا كەلدى . ئالمىخانمۇ ساڭا ئوخشاش ھازىر جاۋاپ قوشاقچى. ھازىر سىلەر نەق مەيداندا قوشاق ئېيتىشىپ ،بىزگە كۈلكە ئاتا قىلغايسىلەر.
ئەمەت قالتىس:باش ئۈستىگە.
ئالمىخان : باش ئۈستىگە.
جاكارچى : ئېيتىشىش باشلانسۇن!
ئەمەت قالتىس :
               ئالمىخانكەن ئاتلىرى،
               قاشلىرىدا مەڭلىرى.
               يىتىپ كەلدى قومۇلغا،
               چاقچاقچى دەپ داڭلىرى.
ئالمىخان:
          ئەمەت قالتىس كېلىپتۇ،
          ئالمىخاننىڭ يېنىغا.
          چاقچىقىدا مەنا يوق
          تىگىپ ئۇنىڭ جېنىغا.
ئەمەت قالتىس:
         رەھىم قىلماي سۆز سالسام،
         چاقچاققا چىدالاملا.
         مەن چاقچاقنىڭ قاتىلى،
         تەڭمۇ-تەڭ تۇرالاملا.
ئالمىخان:
         ئۇستاز قاراپ تۇرغاندا
         شاگىرت ھەرگىز چالمايدۇ.
         ئالمىخانغا دۈپ سالماڭ،
         سىزدىن ھەرگىز قالمايدۇ.
ئەمەت قالتىس:
          ئالمىخاننىڭ ئىشقىدا ،
          نى-نى يىگىت كۆيۈپتۇ.
          ئىگىز ئىكەن بويلىرى،
          شوتا قويۇپ سۆيۈپتۇ.
ئالمىخان :
           غەرىزىڭىز بۆلەكچە
           باردۇر نىمە ئويىڭىز.
          ئالمىخاننى سۆيۈشكە
          يەتمەيدىكەن بويىڭىز.
ئەمەت قالتىس:
          ئىچكەن ناۋات چېيىڭىز،
         گېلىڭىزدىن كۆرىنەر.
        غوجامنىياز ئەر ئىكەن ،
        ئالمىخاندىن سۆيىنەر.
ئالمىخان :
        غوجامنىياز يارىمغا،
        باشقا يار يېتەلمەيدۇ.
        مېھمان دەپ كۈلۈپ قويسام،
        سىزدەكلەر كېتەلمەيدۇ.
ئەمەت قالتىس:
........................
كۆپچىلىك : يېڭىلدى،يېڭىلدى.ئەمەت قالتىس يېڭىلدى.(قىقاس)
ئەمەت قالتىس : مەن يېڭىلدىم .
ۋاڭ : ھەئە، بۈگۈنكى تاماشا مۇشۇنچىلىك بولسۇن.(پەردە يېپىلىدۇ)

             بەشىنچى پەردە :غوجامنىيازنىڭ ئۆيى

1-         كۆرۈنۈش
سەھنە كۆرىنىشى:جۈجەم باراڭلىق ھويلا،ھويلىغا يانداش ئۆي.
ئۆي يېنىغا سېلىنغان سۇپا .
ئالمىخان دۇتتار چېلىپ ناخشا ئېيتىۋاتقان ھالەتتە پەردە ئېچىلىدۇ.
ئالمىخان:
                   كۆرگىلى كەلدىڭلىمۇ،
                   كۆيدەرگىلى كەلدىڭلىمۇ.
                   كۆيۈپ ئۆچكەن ئوتلارنى ،
                   ياندۇرغىلى كەلدىڭلىمۇ....
(غوجامنىياز ئۇسۇل ئويناپلا سەھنىگە كىرىدۇ.ئالمىخان تېخىمۇ ئەۋجىگە چالىدۇ)
غوجامنىياز: چالسىلا!چالسىلا! ناخشا ئېيتسىلا،مەن ئۇسۇل ئويناي.
(ئالمىخان ناخشىنى داۋاملاشتۇرىدۇ،غوجامنىياز ئالمىخانغا بېقىپ ئۇسۇل ئوينايدۇ.)
غوجامنىياز: ئەمدى مەن چالاي،ئۆزلىرى ئوينىسىلا.
ئالمىخان : ماقۇل
(غوجامنىياز دۇتتارنى چېلىپ، قومۇل ناخشىلىرىدىن ئېيتىدۇ.ئالمىخان ئۇسۇل ئوينايدۇ.)
غوجامنىياز :(ئۇسۇلدىن توختاپ)مەن قويلارغا قاراپ باقاي ، ئۆزلىرى ئولتۇرۇپ تۇرسىلا .
ئالمىخان : ماقۇل
(ئالمىخان قولىغا دۇتتارنى ئېلىشىغا قولۇم –قوشنىلار كىرىدۇ.
ئالمىخان : كەلسىلە قوشنىلار ، كەلسىلەر ،كەلسىلەر.
قوشنا ئا : ھويلىدىن دۇتتار،ناخشىنىڭ ئاۋازى ئاڭلىنىۋاتىدۇ ،شۇنىڭ بىلەن كىردۇق.
ئالمىخان  : ياخشى بوپتۇ ،ياخشى بوپتۇ،قېنى سۇپىغا چىقىپ ئولتۇرسىلا.(قوشنىلار ئولتۇرىدۇ)چاي كەلتۈرەي!
قوشنىلار: بولدى ،بولدى ،ناخشا ئاڭلايلى
ئالىمىخان : مەن ئۆزلىرلاغا  ناخشا ئېيتىپ بېرەي.مەن قومۇل ناخشىلىرىنىمۇ ئۆگىۋالدىم .
قوشنىلار : ماقۇل،ماقۇل .
ئالمىخان : ئېيتتىم ئەمىسە.
(دۇتتارنى ئېلىپ ناخشا ئېيتىدۇ)
ئالمىخان:
         بېغىم بەكمۇ ھاۋالىق،
         كۆرسەم كۆڭلۈم سەگىيدۇ.
         يۇرتۇمنى خىيال قىلسام،
         كۆزۈمدە ياش ئەگىيدۇ.
                  دەرتنىمۇ تارتقان بىلەر،
                  ئاغرىقنىمۇ تارتقان بىلەر.
                  بىز غېرىپنىڭ ھالىنى
يار ئىشقىدا كۆيگەن بىلەر.
قوشنا ئا : ئالمىخان ،بىرەر ئىش كۆڭۈللىرىگە كېلىپ قالدىمۇ نىمە؟
ئالمىخان : ئۇنداق ئىش يوققۇ. بىرەر گەپ ئاڭلىدىلامۇ-يە؟!
قوشنا ئا: ياق،ياق،ناخشىلىرىدا بىر خىل ئازاپنىڭ پۇرىقى كېلىۋاتىدۇچۇ؟
ئالمىخان : ئۇنداقمۇ ئەمەس(ئۇھ تارتىدۇ)
قوشنا يىگىت :بولدى،بولدى. ئالمىخان ،ئۆزلىرى ھازىر جاۋاپ قوشاقچى ، مەن ئۇزۇندىن قىلغان تەييارلىق قىلىپ ،ئۆزلىرى بىلەن بىر تۇتۇشۇپ باقاي دەپ كىردىم.قانداق بەسلىشىپ باقامدۇق؟
ئالمىخان:  بەسلەشكەن ئىكەنمىز ئۇنىڭ مۇكاپاتى بىلەن جازاسى بولىشى كېرەك.
يىگىت :ئەگەر مېنى يېڭىۋالسىلا ،ئۆزلىرىگە 7 كۈن مەدىكىر بولۇپ،ھەقسىز ئىشلەپ بېرىمەن.
ئالمىخان : ئەگەر ئۆزلىرى مېنى يېڭىۋالسىلا ،كۈندە بىر قېتىمدىن 7 كۈن ناخشا ئېيتىپ بېرىمەن .قوشنىلار گۇۋا بولسۇن.
قوشلار :شۇنداق بولسۇن،شۇنداق بولسۇن.
قوشنا ئا : قېنى ئەمىسە قوشاق ئېيتىشىش باشلانسۇن ،قېنى يىگىت سەن باشلا.
يىگىت :
       ئالمىخېنىم ئاق ئىكەن ،
       يىگىنىسى چاق ئىكەن.
      ئالمىخانغا كۆيگەندىن ،
      خوتۇنغا كۆيگەن ياخشىكەن.
ئالمىخان:
     خوتۇنلىرى بار تۇرۇپ،
     ماڭا نىمە دەپ كۆيىلا.
     مەن كۆيمىسەم بەرى-بىر،
     يەرنى چىشلەپ سۆيىلا.
يىگىت :
       ئالمىخانلار يۈرگىدەك ،
     تىزەك بىلەن ئوت قالاپ.
ئالمىخان :
     خوشنا يىگىت يۈرگىدەك ،
     تام كەينىدە مارىلاپ.
يىگىت:
ئالمىخاننى باقساممەن ،
سۇت،قېمىز ،قايماق بىلەن.
ئالمىخان :
يۈرىمەيدۇ ئالمىخان ،
ئۆزلىرى شالتاق بىلەن.
يىگىت :
      ئالمىخاننىڭ غولىدا ،
      ئىگىز-ئىگىز تۇغراقلىق.
ئالمىخان :
      مەرت يىگىتتىن يارىم بار ،
      غوجامنىياز چىرايلىق.
يىگىت :
    .....................
قوشنىلار : يېڭىلدى ،يېڭىلدى ،ھوي!!!!!!!!!!!
(غوجامنىياز كىرىدۇ )
غوجامنىياز : نىمە بولدى ؟ بەك خوشال كۆرىنىسىلەرغۇ!
قوشنا س : بۇ يىگىتنى ئالمىخان قوشاق ئېيتىشتا يېڭىۋالدى . بۇ يىگىت ئەمدى ئۆزلىرىگە 7 كۈن بىكارغا ئىشلەيدۇ.
غوجامنىياز : شۇنداقمۇ ،دوئىلغا چۈشۈپتىكەندە ھا...ھا...
ھا....،قوشنىلار سىلەر ئۇسۇل ئويناڭلار بىز ساز چالايلى ،ئالمىخان داپنى ئىلىپ چىقسىلا !(ئالمىخان داپنى ئالغىلى كىرىپ كېتىدۇ)        
(بىر نەچچە ياساۋۇل سەھنىگە كىرىدۇ. ھەممەيلەن ئورۇنلىرىدىن تۇرىشىدۇ.)
ياساۋۇل باشلىقى: ئالمىخان بارمىكىن؟
غوجامنىياز : بار .نىمە ئىشتى؟
ياساۋۇل :ۋاڭ ئالىلىرىدىن يارلىق ! ۋاڭ غوجام باغداشقا شىكارغا چىقىدىكەن. ئالمىخاننى ئېلىپ كېلىشكە يارلىق چۈشۈردى .
(ئالمىخان داپ تۇتقان ھالدا كىرىدۇ، غوجامنىيازغا قارايدۇ،غوجامنىياز يەرگە قارايدۇ.ھەممەيلەننىڭ چىرايى جىددى تۈسكە كىرىدۇ)
ياساۋۇل باشلىقى: ئالمىخان ،قېنى ماڭايلى!
ئالمىخان :مەن.....
ياساۋۇل باشلىقى : ۋاڭ غوجامدىن  يارلىق!ۋاڭ غوجام باغداشقا چىقىدىكەن.ئۆزلىرىنى ئالغىلى كەلدىم. قانداق؟ بارغۇلىرى  يوقما؟ بۇ ۋاڭ غوجامنىڭ پەرمانى، كىمدە-كىم پەرمانغا قارشى چىقىدىكەن كاللىسى ئېلىنىدۇ.
(ئالمىخان غوجامنىيازغا ئېسىلىدۇ)
غوجامنىياز :  ئالمىخان ھازىر يېڭىدىن ئېغىر ئاياق بولۇپ قالدى، ئەمدى مەشرەپ سورۇنلىرىغا بارالمايدۇ، ۋاڭ غوجامغا ئېيتىپ قويسىلا.
ياساۋۇل باشلىقى : سېنىڭ ئۇ گېپىڭگە كىم ئىشىنىدۇ.سەن ۋاڭ غوجامدىنمۇ كۈندەشلىك قىلىۋاتامسەن؟مەن يارلىقنى ئىجرا قىلىمەن ،ئالمىخاننى ئېلىپ مېڭىڭلار.
ئالمىخان ناخشا ئېيتىدۇ .
ئالمىخان :
      ياز بولسا ئېچىلمامدۇ،
باققا تېرىغان گۈللەر.
       قاچانمۇ  ئۈتۈپ كېتەر
      دەھشەتلىك ئېغىر كۈنلەر......
(ياساۋۇللار ئالمىخاننى مەجبۇرى ئېلىپ كېتىدۇ.غوجامنىياز توۋلىغىنىچە كەينىدىن چىقىپ كېتىدۇ)
غوجامنىياز :ئالمىخان!!!ئالمىخان!!
خوشنا ئا : خەقنىڭ ئەمرىدىكى خوتۇننى خالىغانچە ئېلىپ كەتسە يامان بولىدۇ.ۋاڭ غوجام بۇنىمۇ بىلمامدىكىنە؟
خوشنا ب : ھېلىمۇ ئۈچ يىل بولدى .غوجامنىيازمۇ،ئالمىخانمۇ بۇ ئاھانەتكە چىداۋاتىدۇ.
خوشنا س : شۇ ئەمەسمۇ ،خەقنىڭ خوتۇنىنى ئايلاپ-ئايلاپ ئېلىپ كەتسە، ئۆيىگە قايتۇرمىسا ،بۇنداق ئادالەتسىزلىككە ھېچكىم چىدىمايدۇ.
قوشنا ئا : بىز ۋاڭنىڭ قۇللۇرى ،ھېچكىمنىڭ تەلەپنى رەت قىلىش ھوقۇقىمىز يوق .بۇ دەرتنى تارماي نىمە ئىلاج.
قوشنا ب : ۋاڭغۇ مەيلى ،ھازىر ئالمىخاننى ،تەيجىمۇ،شاھزادىمۇ،بەگمۇ ئېلىپ كېتىۋاتمامدۇ....
قوشنا س : ئىلگىرى غوجامنىيازنىمۇ بىللە ئېلىپ باراتتى. ئەمدىلىكتە ئېلىۋالمايدىغان بولدى .بىرگە ئېلىۋالغان بولسىمۇ پىتنە-ئىغۋا بولمىغان بولاتتى.
قوشنا ب : ھەي!! ئۇ يەرلەردە نىمە ئىشلار بولىۋاتىدۇ ،بىر ئاللا ئۆزى بىلىدۇ.
قوشنا س : غوجامنىياز بىلەن ئالمىخان بىر-بىرىنى بەكمۇ ياخشى كۆرىشىدۇ. ئۇلارغا كۆز تەگمىسىلا بولاتتىغۇ.
(غوجامنىياز پەرىشان قايتىپ كىرىدۇ)
قوشنا ئا : ئالمىخان كەتتىمۇ؟
غوجامنىياز :...........
قوشنا ب : غوجامنىياز ،ئەل ئارىسىدا پىتنە گەپلەر خېلى كۆپىيىپ قاپتۇ. بىزنىڭ يۈزىمىزگىمۇ داغ كەلتۈرىۋاتىدۇ. بۇ ئىشنى ئوبدانراق ئويلاپ باقمىسىلا بولمايدۇ جۇمۇ .
غوجامنىياز :...............
قوشنىلار : بىز چىقىپ كېتەيلى .
قوشنىلار چىقىپ كېتىدۇ ،غوجامنىياز بېشىنى قاماللىغىنىچە جۇجەمگە يۆلۈنۈپ ئولتۇرىدۇ.سەھنە قاراڭغۇلىشىدۇ .
سەھنە يورىدۇ .غوجامنىياز غىجەك چېلىپ،مۇڭلۇق ناخشا ئېيتىپ ئولتۇرماقتا.
غوجامنىياز:
ئالمىخانلار تاققا ماڭدى ،
              ئاتلىرىنى تاقىلاپ.
              مەن بىچارە ئۆيدە قالدىم ،
              باشلىرىمنى تاتىلاپ.
ۋاي-ۋاي جېنىم ئالمىخان-نەي!
قايسى باغنىڭ گۈلىسەن-نەي!
                      ئايغىرئاتنىڭ يايلىدەك
                      ئالمىخاننىڭ چاچلىرى.
                      يېڭى چىققان ئايغا ئوخشاش ،
                      ئەگىم-ئەگىم قاشلىرى.
ۋاي-ۋاي جېنىم ئالمىخان-نەي!
قايسى باغنىڭ گۈلىسەن-نەي!
                      ئالمىخانلار   نەگە بارسا،
                      يىمەك –ئىچمەك تەل بولۇر.
                      ۋاڭ غوجاملار ئېلىپ كەتسە،
                      غوجامنىياز نە قىلۇر.
ۋاي-ۋاي جېنىم ئالمىخان-نەي!
قايسى باغنىڭ گۈلىسەن-نەي!
(ئالمىخان كىرىدۇ.غوجامنىياز قارىمايدۇ.ئالمىخان ئالدىغا كېلىپ تەزىم قىلىدۇ.غوجامنىياز يەنىلا قارىمايدۇ. ئالمىخان ناخشا ئېيتىدۇ)
ئالمىخان :
        دەرت بىلەن ئەلەم قايغۇ،
        مەندىن ئەگىپ كەتمەيدۇ.
        مەن چىدىغان بۇ دەرتلەر،
        سېنىڭ دەدىڭگە يەتمەيدۇ.
بازاردىن يېنىپ كەلدىم ،
ئۆرۈك ،ئالمىنى ساتماي.
بۇ دەرتلەرنى كىم تارتسۇن ،
سېنىڭ بىلەن مەن تارتماي.
                    ئەركىنلىك،ئاراملىق دەپ،
                    ھەممىدىن كېچەي دەيمەن.
                    غوجامنىياز قوبۇل قىلسا ،
                    بۇ يۇرتتىن كېتەي دەيمەن.
ئالمىخان كۆز-ياش قىلىپ ،غوجامنىيازغا كەينىنى قىلىپ ئولتۇرىدۇ.غوجامنىياز ناخشا ئېيتىدۇ.
غوجامنىياز :
             سەندىن ئايرىلىپ كەتسەم ،
             بۇ يۇرتتا نىمەيىم بار.
             كەلدىغۇ ئەجەپ دەرتلەر،
             مېنىڭ نىمە گۇنايىم بار؟
زالىملار كۆرەلمىدى،
بەختىمنى ،باھارىمنى .
      چەيلەندى گۈلى –غۇنچە،
      جۇدۇن قاپلىدى باغىمنى.
                  كۆكتە ئوينىغان قۇشنى،
               تور سېلىپ تۇتالمايمەن.
               ئالمىخان كېتەر بولسا،
               مەجبۇرى تۇتالمايمەن.
ئالمىخان ئورنىدىن تۇرۇپ غوجامنىيازغا ئېسىلىدۇ.غوجامنىياز ئۇنى باغرىغا باسىدۇ.
ئالمىخان : ئۈچ يىلدىن بۇيان مېنى ئەتىۋالاپ ياخشى كۆرۈپ كەلدىلە.بىۋاپا پەلەك بىزنى ئايرىشقا مەجبۇر قىلدى. ئۆزلىرنىڭ كۆڭۈللىرىگە يەنە ئازار بەرگۈم يوق.
غوجامنىياز : مېنى دەپ قومۇلغا كېلىپ، كۆپ ئازار يىدىلە.ئۆزلىرگە ئىگە بولالمىدىم. رازى بولسىلا ئالمىخان !ئۆزلىرى نەگە بارماقچى؟
ئالمىخان : پىچان،تۇرپانلار ئارقىلىق ئۈرۈمچىگە چىقىپ ،ئاخىرىدا يۇرتۇم كۇچاغا كېتەيمىكىن دەيمەن.
غوجامنىياز : راسلا كەتمەكچى بولسىلا ،مەن ئۆزلىرىنى لاپچۇققىچە ئۇزۇتۇپ قويىمەن.
ئالمىخان :رەخمەت غوجامنىياز ،كۆڭۈللىرى تىگىل بولدى.
(غوجامنىياز يېنىدىن ئىككى دانە زىقچە ئالتۇننى ئېلىپ ئالمىخانغا تەڭلەيدۇ)
غوجامنىياز :بۇ ئاددى سوغامنى قوبۇل قىلسىلا،يول كىرالىرى بولۇپ قالار،
ئالمىخان : يېنىمدا بار ئالتۇنمۇ يول كىراسىغا يېتىدۇ.ئۆزلىرىنى ياد ئېتىش ئۈچۈن ئېلىپ قوياي.
غوجامنىياز : رەخمەت !!
(غوجامنىياز بىلەن ئالمىخان قۇچاقلىشىپ خوشلاشماقچى بولىدۇ)
(ياساۋۇل كىرىدۇ )
ياساۋۇل : ئالمىخان بارمىكىن ؟
ئالمىخان :.............
غوجامنىياز :..........
ياساۋۇل : بۈگۈن شاھزادە بېگىم راھەتباغقا سەيلىگە چىقىدىكەن ،«ئالمىخاننى ئېلىپ چىق »دىۋىدى كېلىشىم ،قېنى ئالمىخان ماڭايلى .
ئالمىخان : توختاپ تۇرۇڭلار !(غوجامنىيازنىڭ ئالدىغا كېلىدۇ.)
ئالمىخان :
           مەن قومۇلدىن كەتسەممۇ ،
          كەتمەيدىلا ئېسىمدىن .
           زامان بىزگە بىۋاپا،
          ئايرىدى سەن يايرىمدىن .
غوجامنىياز :
            ئۆزلىرى  كەتكەن بىلەن،
             مەن بۇندىن كېتەلمەيمەن.
            ئۆزلىرى كەچكەن بىلەن ،
            مەن ھەرگىز كېچەلمەيمەن.
ياساۋۇل : ئالمىخان، ماڭايلى .
ئالمىخان : خوش غوجامنىياز! بۇ ئاخىرقى كۆرۈشۈشىمىز بولۇپ قالسۇن.(ئالمىخان ياساۋۇللار بىلەن چىقىپ كېتىدۇ)
غوجامنىياز :(غىجەكنى ئېلىپ ناخشا ئېيتىدۇ)
           ئالمىخان دەپ چاقىرسام ،
           ئۈنى مەگەشتىن چىقۇر،
           كۆيىكى ئەمدى بېسىلدى ،
           دەردى ئۆلكگەندە چىقۇر .
(پەردە يېپىلىدۇ)
            مونۇلۇگ :
شۇنداق قىلىپ ئالمىخان غوجامنىيازدىن ئايرىلىپ،لۈكچۈنگە كەتتى.ئاخىرقى ئۆمرى تۇرپاندا ئۆتكەنلىكى مەلۇم.لېكىن قومۇلدا ئالمىخان ھەققىدىكى ھېكايىلەر،بىيىت-قوشاقلار ئامما ئارىسىدا تارقىلىپ،تاكى بۈگۈنگىچە يىتىپ كەلدى.‹ ئالمىخان ›ھەققىدىكى ھېكايىلەرنى غوجامنىيازنىڭ نەۋرىسى ئوسمان ئىسمايىل ئاكا ھېكايە قىلىپ بەرگەن بولۇپ، بۇ ئادەمنى كىشىلەر ئۆمرىنىڭ ئاخىرغىچە «ئالمىخان ئوسمان »دەپ ئاتاپ كەلگەن . «ئالمىخان »جەمەتىدىكى كىشىلەر ھازىرمۇ قومۇل شەھرىنىڭ لەڭگەر مەھەللىسىدە بار
قومۇل خەلق راديو ئىستانسىسىدىن : ئەركىن زاكىر 2502291,18097568923   

0

تېما

2

دوست

1029

جۇغلانما

تىرىشچان ئەزا

ئۆسۈش   2.9%

ئەزا ئۇچۇرى
تىزىم نۇمۇرى:  25314
يازما سانى: 96
نادىر تېمىسى: 0
مۇنبەر پۇلى: 5
تۆھپە : 296
توردىكى ۋاقتى: 33
سائەت
ئاخىرقى: 2014-3-31
يوللىغان ۋاقتى 2014-2-2 19:35:30 |ھەممە قەۋەتنى كۆرۈش
بەك ئۇزۇنكەن ۋاقىت چىقىرىپ ئاندىن ئوقۇي
قۇتلان تېلفۇنلىرى

0

تېما

0

دوست

84

جۇغلانما

يىڭى ئەزا

ئۆسۈش   28%

ئەزا ئۇچۇرى
تىزىم نۇمۇرى:  25418
يازما سانى: 6
نادىر تېمىسى: 0
مۇنبەر پۇلى: 0
تۆھپە : 26
توردىكى ۋاقتى: 3
سائەت
ئاخىرقى: 2014-2-6
يوللىغان ۋاقتى 2014-2-2 20:51:23 |ھەممە قەۋەتنى كۆرۈش
قىرىنداشلارغا بۇ تىمىنى كۆرۈپ بىقىشقا تەۋسىيە قىلىمەن !!!!
http://bbs.misranim.com/thread-118450-1-1.html

5

تېما

9

دوست

2069

جۇغلانما

ئاكتىپ ئەزا

ئۆسۈش   2.3%

ئەزا ئۇچۇرى
تىزىم نۇمۇرى:  15798
يازما سانى: 119
نادىر تېمىسى: 0
مۇنبەر پۇلى: 30
تۆھپە : 640
توردىكى ۋاقتى: 280
سائەت
ئاخىرقى: 2014-3-31
يوللىغان ۋاقتى 2014-2-2 21:05:58 |ھەممە قەۋەتنى كۆرۈش
uzhiyal يوللىغان ۋاقتى  2014-2-2 20:51
قىرىنداشلارغا بۇ تىمىنى كۆرۈپ بىقىشقا تەۋسىيە قىلىمەن ...

ھەجەپمۇ ياخشى قىپسىز بۇ تېمىنى بۇيەرگە ئەكلىپ .بولسا ئايرىم تېما قىلپ يوللىڭە باغداشقا ،تىخمۇ كۆپ كىشلەر كۆرسۇن .

0

تېما

0

دوست

84

جۇغلانما

يىڭى ئەزا

ئۆسۈش   28%

ئەزا ئۇچۇرى
تىزىم نۇمۇرى:  25418
يازما سانى: 6
نادىر تېمىسى: 0
مۇنبەر پۇلى: 0
تۆھپە : 26
توردىكى ۋاقتى: 3
سائەت
ئاخىرقى: 2014-2-6
يوللىغان ۋاقتى 2014-2-2 23:56:29 |ھەممە قەۋەتنى كۆرۈش
رەھمەت ! مەن مۇنبەرگە يىڭىدىن ئەزڭ بولغان ئىدىم شۇڭا تىما يوللاشنى بىلمەيمەن !  بىلىدىغانلار ياردەم قىلساڭلار !!!

0

تېما

0

دوست

574

جۇغلانما

دائىملىق ئەزا

ئۆسۈش   14.8%

ئەزا ئۇچۇرى
تىزىم نۇمۇرى:  8189
يازما سانى: 23
نادىر تېمىسى: 0
مۇنبەر پۇلى: 77
تۆھپە : 134
توردىكى ۋاقتى: 95
سائەت
ئاخىرقى: 2014-3-20
يوللىغان ۋاقتى 2014-2-3 02:37:43 |ھەممە قەۋەتنى كۆرۈش
بەك بەلەن يېزىلىپتۇ . سەۋىيەلىك ئەسەر بوپتۇ. خۇددى شۇ دىراممىنى نەق كۆرگەندەك بولدۇم. ھارمىغايسىز، رەھمەت .

1

تېما

4

دوست

3853

جۇغلانما

ئاكتىپ ئەزا

ئۆسۈش   61.77%

ئەزا ئۇچۇرى
تىزىم نۇمۇرى:  10179
يازما سانى: 244
نادىر تېمىسى: 0
مۇنبەر پۇلى: 546
تۆھپە : 819
توردىكى ۋاقتى: 245
سائەت
ئاخىرقى: 2014-4-1
يوللىغان ۋاقتى 2014-2-3 14:33:16 |ھەممە قەۋەتنى كۆرۈش
مەن بۇ تراگگكومىدىيەنى پەقەتلا كۆرۈپ باقمىغان ئىكەنمەن. ساقلاپ قويۇپ بىر كۆرۈپ چىقاي. ئالمىخان دېگەن ناخشىنى رادىئولاردىن ئاڭلىغان ھەم ئۆزۈممۇ شۇنداق ياقتۇرىمەن. ئۇنىڭ ئۈستىگە ئەينى دەۋردىكى ئۇرۇشخۇمار تەلۋە ماجۇڭيىڭنىڭ مۇشۇ ئالمىخان دېگەن ناخشىغا ئامراق ئىكەنلىكىنى، ئۆزىمۇ بۇ ناخشىنى بەكلا ياقتۇرۇپ ئاڭلايدىغانلىقىنى ئۆتكۈر ئەپەندىمنىڭ كىتابلىرىدىن كۆرگەن ئىدىم.

1

تېما

4

دوست

3853

جۇغلانما

ئاكتىپ ئەزا

ئۆسۈش   61.77%

ئەزا ئۇچۇرى
تىزىم نۇمۇرى:  10179
يازما سانى: 244
نادىر تېمىسى: 0
مۇنبەر پۇلى: 546
تۆھپە : 819
توردىكى ۋاقتى: 245
سائەت
ئاخىرقى: 2014-4-1
يوللىغان ۋاقتى 2014-2-3 14:35:09 |ھەممە قەۋەتنى كۆرۈش
uzhiyal يوللىغان ۋاقتى  2014-2-2 20:51
قىرىنداشلارغا بۇ تىمىنى كۆرۈپ بىقىشقا تەۋسىيە قىلىمەن ...

مەنمۇ تېخى نەچچە سائەت ئىلگىرى بېلەت تاشلىۋەتتىم.
كىرگەندىن كېيىن ئىنكاس يازالايسىز كىرىش | دەرھال تىزىملىتىش

Powered by Discuz! X2.5(NurQut Team)

( 新ICP备06003611号-1 )