كەپتەرلەر-(4)- نۇري تېيىپ

qeyser-mijit

كەپتەرلەر(4)

نۇري تېيىپ

قەيسەر مىجىت يوللانمىسى

        كۈنلەر مۇشۇنداق  ھەر خىل مەزمۇنلاردا بەزىدە كۈلۈپ ، بەزىدە ئانچە - مۇنچە خىزمەتداشلار  بىلەن ماي تارتىشىپ ، بەزىدە  خوشال  ، بەزىدە  زېرىكىشلىك ئۆتمەكتە .ھەممە يېڭى ،ئاستا- ئاستا كونىراشقا  قاراپ ماڭماقتا . بۇ ئىدارىگە كۆنۈپ قالىدىغاندەكمۇ  ئەمەسمەن .  خىزمىتىممۇ  مېنى ئۆزىگە جەلىپ قىلالمىدى . ھە دىسە ۋاقتى ئاللىقاچان ئۆتۈپ كەتكەن ، پاق - پاق ئەسەرلەرىنى تەرجىمە قىلىش ، قىزىل باشلىق ھۆججەتلەرنىڭ تەرجىمىلىرى ، . خەلق قۇرۇلتىيىدا ماقۇللانغان ، دەبدەبىلىك پىلانلار ... ئىش قىلىپ قۇلاققا خوش ياقمايدىغان ، تۈكى يوق گەپلەر ...  ھەر كۇنى ئىككى تەرىپىمدىكى كىشىلەرنىڭ  يىرگىنىشلىك ، سۈنىئى چىرايىغا قاراپ كۈن ئۆتكۈزۈش ، بارغانچە ئېغىر تۇيۇلىدىغان بولدى. ئۇلارمۇ ماڭا خۇددى  دۈشمىنىگە قارىغاندەك  قارايدىغان  بولۇپ كۆندى. بەلكىم ئۇلارمۇ ئۆزلىرى چۇشۇنىشىدىغان بىئارامچىلىقتا بولسا كىرەك .يەنە باشقا  يېڭى مەزمۇنلار بارمىدۇ ؟ دىگەن يەرگىمۇ كىلىپ قالدىم . لىكىن ، تۈگەپتۇ . ئەمدىكى ھاياتىم ، مانا مۇشۇ مەزمۇنلارنىڭ تەكرارلىنىشى بىلەن ئۆتىدىغان ئوخشايدۇ .
      ھاياتتا يەنىلا شۇ شارائىت ، شۇ موھىت ، شۇ زىددىيەتلىك مۇناسىۋەتلەر ئىچىدىن ، شۇ كىشىگە ، ئۆزىگە چۇشلۇق خوشاللىقلار  تىپىلىپ تۇرىدىكەن. شۇڭا ئىنسانلار مەيلى باي بولسۇن ، كەمبەغەل بولسۇن ، نوچىسى بولسۇن پوچىسى بولسۇن ، تۇرمۇشنىڭ ، ھاياتلىقنىڭ  ئەگرى - بۇگرى يوللىرىدا ، بىردە يىقىلىپ  ، بىردە قوپۇپ ، بىردە خوشال  ، بىردە خاپا  ، ئالغا ئىلگىرلەشنىلا ئادەت قىلغان  ئىكەن . مانا بۇ تەغدىر بولسا كىرەك .
      ئىدارىمىزدە مەن كەلگەندىن كىيىنكى تۇنجى يەڭى يىل ئولتۇرۇشى ئۆتكۇزۇلدى . بۇ ئولتۇراشتا يەنە " چاتاق  " تېرىپ قويدۇم ....
     ئۇيغۇر بۆلۈمىدىكى بارلىق يولداشلار قاتناشقان ، بۇ ئولتۇراش ، ناھايىتى قىزىۋاتىدۇ  . مەنمۇ ئۇنى دەپ ، بۇنى دەپ ، كۆپ ساندىكى يولداشلار بىلەن چىقىشىپمۇ  قالغان ئىدىم . خىزمەت  ۋاقتىدا  ئانچە گەپ - سۆز قىلمايدىغان  ، ئېغىر بېسىق ، خىزمەتداش  ئاكىلىرىممۇ بۈگۈن باشقىچە... .
    ئىدارىدىكى خىزمەتداشلارنىڭ ھەممىسىنىڭ ئۆزىگە خاس لەقەملىرى  بولۇپ ، سورۇندا مۇشۇ لەقەملەرلا  ئىشلىتىلمەكتە. ئېشەك ، چوشقا  ، مايمۇن ، ئۆچكە ، تاشپاقا  ، توخو  ، چاشقان  ... قايسى  ھايۋاننىڭ ، كىمگە خاسلىقىنى يىنىمدا ئولتۇرغان كەم سۆز ئاكىمىزدىن سوراپ،  بىر دەمدىلا ئۇقۇۋالدىم   .
  "لەقەمنى  خىزىر قويىدۇ " دەپ ،
    ھاھاھاا...
ھىلىقى بىر ئىشخانىدىكى  باشلىقنىڭ لەقىمى  چوشقاكەن ئەمەسمۇ !!!
خوشاللىق  شارابىدىن ئىككى قەدەھ  " گۈپ ، گۈپ " كۆتۈرۈپمۇ قويدۇم .
    ھېلىقى  مانتا شەپكە يولداشنىڭ لەقىمى  ئۆچكە ئىكەن . بۇ ئادەمنى ئاكا دەپ چاقىرىشتىن  ، خېلى بۇرۇنلا  ۋاز كەچكەنتىم . لەقىمىنى بىلىۋىلىپ ، ياخشى  بولدى .  ئۇ ئادەم تولىمۇ كۆتۈرەڭگۇ ، ھاراقنىڭ  تەسىرىدىن ، ھېلىقى  يىرگىنىشلىك ،مەن بىزار بولغان يۈزلىرى  قىزىرىپ  ، خىلىلا يەقىملىق  تۈس ئاپتۇ . ئاپپاق يېڭىدىن سالغان ، يالغان چىشلىرىنى دامىلىتىۋاتقاندەك ، پات - پاتلا كالپۇكلىرىنى بولۇشىچە سوزۇپ كۇلۇمسىرەپلا ئولتۇرىدۇ . ئاندا - ساندا ھايۋاناتلار ئۇستىدە بولىۋاتقان چاقچاققا  ، كەلسۇندۇ كەلمىسۇندۇ سۆز قېتىپمۇ  تۇرىۋاتىدۇ .
     _ يېڭى مىھمانغا  مۇۋاپىق ھايۋانلارنىڭ ئىسمىدىن بىرنى قويمامدۇق   !!!
   ھا ھا ھا. .. ئۆزى يالغۇزلا كۈلۈپ ، تېلىقىپ  قالدى  . چوشقىمۇ  بوش كەلمەي :
      ھە ! بۇ بالا قالايمىقان  ھاۋشۇپ خەقنى  چىشلەيمەنلا دەيدىكەن . ئىت دەپ قويساق قانداق  ؟
      ھا ھاھا ... پاچاقلىرىغا ئۇرۇپ كۈلۈپ كەتتى ۋە ئالدىغا كەلگەن رومكىنى كۆتەرگەچ :
     مۇبارەك بولسۇن ئۇكا !! يېڭى لەقىمىڭىز  ئۈچۈن ، خوشەئەئە !!!
ئۇ " گۇپ " قىلىپ  رومكىنى كۆتۇرۇۋىتىپ ، ئۇزۇن ، سەت تۇمشۇقلىرىنى  ئالقىنى بىلەن بىر سىپاۋىتىپ :
    ھە ! گەپ قىلمايسىلەرغۇ  ؟! تازا كەلگەن يەرىغۇ بۇ ھا ھا ھا ...
سورۇندىكى مەن خېلىلا چىقىشىپ قالغان ئاكىلىرىم ، چوشقىنىڭ  قەستەن  ماڭا " ئىت " دىگەن لەقەمنى  ، مەجبۇرى تېڭىۋاتقانلىقىنى  سەزدى بولغاي ،
      " ئۇكا خاپا  بولما " دىگەندەك ماڭا قاراشتى . بەزى ئاكىلار ، قەستەن چاقچاق  تېمىسىنى ، باشقا  ياققا بۇراشقا تىرىشاتتى .
     كۆڭلۈم خېلىلا كۆتۈرۈلۈپ قالدى . بۈگۈن تۇنجى قېتىم ، مىنى چىن دىلىدىن ياخشى  كۆرگەن ، مېنى قوللايدىغان ئاكىلارنىڭ ، ئەتىراپىمدىلا بارلىقىنى  بىلدىم.  ھەر بىر قېرىندىشىمىزنىڭ قەلبىدىكى  يوشۇرۇن غورۇرىنى ، ئىپادىلەشكە ئاجىزلىق قىلىۋاتقان ، يۈرەك سۆزلىرىنى چۈشەنگەندەك بولدۇم .مەن يالغۇز ئەمەسكەنمەن . ئۇلار ئۈن- تۈنسىز ئولتارغان بىلەن ئۇلار يۇرەكلىرىنىڭ چوڭقۇر يەرلىرىدە ماڭا ھىسداشلىق  قىلىۋىتىپتۇ  . رەھمەت ئاكىلار ... غورۇرۇڭلارغا بارىكاللا ... مېنىڭدەك بىر " سويما " ئۈچۈن يۇرۇكۇڭلاردىن ئورۇن بەرگەنلىكىڭلارغا رەخمەت  ...
   كەيپىياتىم كۆتۈرۈلدى . ئىككىگە قارشى ،  يالغۇز ، چاقچاق  سەھنىسىگە سەكرەپلا چىقتىم  .
-  ئۇزۇن يىل چوشقا  بىلەن بىر قوتاندا       يېتىپ، ھارام بوپ قالغان  ئۆچكە .
      - ۋەئەئەتتت!!
      -چوشقىغا  ھەۋەس قىپ  ، كىملىكىنى ئۇنتىغان ئۆچكە .
   - چوشقىنى  دورايمەن دەپ ، ساقىلىنى قىرقىۋەتكەن  ئۆچكە...ۋەئەئەتت!!
ماڭا ھىسداشلىق  قىلىدىغان  ئاكىلار ۋە ...ئەت دىسە ۋەئەئەت !!! دەپ تازا كۈلۈشتى . چاقچىغىم كەلگەن ئوخشايدۇ  دەپ ، مەنمۇ ساقىدىن تارتىنمايلا سوراپ ، بىر ئىككىنى قېقىۋەتتىم .
      ئىدارە باشلىقىمىز مۇشۇنداق سورۇنلارغا تولىمۇ ئامراق  ، كىچىك پېئل ئادەم ئىدى . سورۇننىڭ تورىدە ئولتۇرۇپ ، ئۆزىگە  ئاجايىپ ياراشقان ئالتۇن چىشلىرىنى  كۆرسۈتۈپ ، تازا كۇلمەكتە. باشلىق بۇنچە كۈلگەن ئىكەن  ،مېنىڭ ئىشىم بەش .
   تېمىنى چوشقىغا  يۆتكۈدۈم.
    - قوي  تەرىسىگە ئورۇنىمەن دەپ ، يېلىنىنى يوشۇرالمىغان چوشقا  ...
    -  بۆرىنى تونىماي ، ئىتمىكىن دىگەن چوشقا ...
     -  تۇمشۇغىدىن خىجىل  بوپ ، ماسكا تارتىۋالغان چوشقا ...
    - قۇرۇق يەرنى ياراتماي ، پاتقاقتا ياتىدىغان  چوشقا  ...
       ھاراق  كۈچىنى كۆرسەتكەن بولسا  كىرەك . مۇشۇنداق  چاقچاقلارغا ھەممە بىردەك كۈلۈشتى . بۇ چوشقا بىلەن ئۆچكىگە،  ئامراق  ئادەمنىڭ يوقلۇغىغا  كۆزۇم يەتتى . يىنىمدا ئولتۇرغان ، ئالدىغا كەلگەن رومكىنى پوش دىمەي ، توختاتماستىن  كۆتۈرىۋاتقان  ئاكىمىز ، كۈلۈپ " شا" بوپ كىتىپتۇ . ھاراقنىڭ  تەسىرى بىلەن قىزارغان  بۇ ئاكىمىز ، بېشىنى ئارقىسىدىكى  تامغا تەككۇزۇپ ، ئېغىزلىرىنى يوغان ئىچىپ ، ھا ھا ھا توۋا توۋا ... مانا كەلدى دىگەن ... يارايسە ئۇكام ، يارايسە !!! دەپ ئوڭ مۈرەمگە ئۇرغاچ ، ماڭا مەدەت بىرىۋاتاتتى.
      راست دىگەندەك سورۇندىكى گەپنىڭ ھەممىنى مەنلا سىتىۋالدىم . كەيىپچىلىكتە بەزىلەر ، تولۇق ئاڭلىيالماي قالغان  چاقچاقلارنى  يىنىدىكىدىن سوراشتىن بۇرۇن ، كۈلمەكتە ... مەنمۇ ئېغىزىمنىڭ تورمۇزىنى قويۇپلاۋەتتىم . قىززىق  يېرى : ئاخىرى  ، بەزى كەيپى توشۇپ قالغانلار  :
     -   ئاۋۇ نىمىدۇ ؟ قاراپ باقە !!
دىسەممۇ كۈلىدىغان يەرگە كەپ قالدى .
سورۇن كەيپىياتى پەللىسىگە يىتەي يىتەي دەپ قالماقتا . چاقچاقلار  يەنىلا ھايۋاناتلار دۇنياسىنى توختىماي چۆگۈلىمەكتە ...
       ئۆچكە بىلەن چوشقا  مانا مۇشۇ ۋاقىتتىلا ئۆزىنىڭ چاقچاقتا يولۋاسنىڭ قۇيرۇقىنى  سىلاپ سالغانلىقىغا  تامامەن ئىشەندى . لىكىن ، لىللا گەپ قىلىش  كىرەككى ، ئۇلارنىڭمۇ بىر نەچچە چاقچاقلىرى راۋرۇس كەلدى يۇ ،لىكىن  سورۇننى ئۆزىگە قارىتالمىدى  .  ئوتتەك يالقۇنجاۋاتقان ھىسيات ، چاقماقتەك  چىقىۋاتقان  سۆزلەر  ، ھىلىغۇ ئۇ ئىككىسىلاكەن ، ئۆزىگە ئوخشاشتىن  يەنە ئىككىنى باشلاپ كەلسىمۇ ، ئۆز كۈچىنى ئوخشاشلا كۆرسۇتەلەيتتى ... ئۇلار شالاڭ تاياق خورازلاردەك  ، ئاندا - ساندا ، چىشلەپ راۋرۇس تىپىپمۇ قويىۋاتىدۇ . ئۇلارمۇ ئاخىرقى  كۈچىنى يىغىپ ھۇجۇمغا تەييارلىق  قىلماقتا ...
       ئىدارە باشلىقى  يەنىلا كۆپنى كۆرگەن ، تەجىربىلىك ، كۈلۈپلا ئولتۇرغىنى بىلەن ، كۆز قارچۇغىنىلا ئوينۇتۇپ ، سورۇننىڭ ئۇجۇر - بۇجۇرىغىچە كۈزۈتۈپ تۇرغاندەك بىلىنەتتى .
       بولدى بەس ... دەپ سۆزىنى باشلىدى ئىدارە باشلىقى  . يېڭىدىن كەلگەن ئۇكىلىرىمىز ، بۇ يىلقى  يېڭى يىل ئولتۇرۇشىمىزنىڭ جانلىنىشىغا ئالاھىدە تۆھپە قوشىۋاتىدۇ پىشقەدەملىرىمىزنىڭ  كەيپىياتىمۇ ئالامەت . سورۇنىمىز ناھايىتى بەلەن داۋاملاشماقتا . قىنى ئەمسە  ئازراق ساز - پاز ، ئۇسۇل - پۇسۇللارنىمۇ قىلمايمىزمۇ  !! ھە قىنى  ياشلار ... .تارتىنماي .... ھە ھە ...
       كەيپىسى خىلىلا بىر يەرگە بېرىپ قالغان  بىر ئاكىمىز ، بىر ھازا ئەيتىشىپ ،تولىمۇ تەسلىكتە بىر ئۇسۇل مۇزىكىسىنى ، ئۇن ئالغۇ لىنتىسىنى ئۇياققا  بۇياققا ئۆتكۈزۈپ يۈرۈپ ، قاق  بېلىدىنلا قويۇشقا  باشلىدى . مېنىڭمۇ كەيپىم ئاتتەك ، پۇتلىرىم  مۇزىكا رېتىمىغا ئاللىقاچان  ماسلىشىپ  بولدى . ئۆزەملا چۈشۈپ بىر پىرقىراپ  ئوينىۋىتەيمۇ ؟!! توختا  ، ئازراق  تەخىر قىلاي  ، بىرەرسى ئالدى بىلەن ئۇسۇلغا چۇشۇپ تارتسۇن دە . ئاندىن ئوينىساممۇ ئۈلگۈرىمەنغۇ... ياق ، ياق ... ھەيييي ماۋۇ مۇزىكىنىڭ پەيزى يىرى ئۆتۈپ كىتىپ بارىدۇ دەيمەن ....
      ئۆزەمگە ھاي بىرەلمىدىم . چاۋاكلار چىلىندى . بەزى كەيپى توشۇپ قالغانلار  ، ئىككى قولىنىڭ پاكىزە - پاسكىنىلىغىغا قارىماي ، ئاغزىغا سىلىپ ئىسقىرتىش بىلەن ئاۋارە ...
  شوخ قەدەملەر  بىلەن غۇلاچلىرىمنى ، مەغرۇر قىياپەتتە  سورۇننى بىر پىقىراپ  چىقتىم . ھەممە چاۋاكلىرىنى مەسلىھەتلىشىۋالغاندەكلا رېتىم بويىچە چىلىپ ، ماڭا ئىلھام بەرمەكتە . كەيپىيات تىخىمۇ كۆتۈرۈلۈپ كەتتى . مەن بىلەن بىرگە ، تەڭ خىزمەتكە  كىرگەن ئاغىنەممۇ ماڭا ئوخشاش  ، ئۆزىنى باسالمىغان بولسا كىرەك . ئۇمۇ سەكرەپلا چۇشتى . ئەمدى ، راسا بىر پوزىلارنى چىقىراي دەپ ، تەمشەلگىنىمدە مۇزىكا تۇگەپ قالدى  . ھەي ....! !!! يەنە ئازراق باشتىنراق  قويغان  بولسا ھە .
       ئۇسۇلنىمىغۇ ئۇنچە ياخشى ئوينىيالمايتتىم ، لىكىن بۇنداق ئالقىش ، چاۋاكلار ئىچىدە ، ئادەمنىڭ توختىماي  ئوينىغىسىمۇ كەپ كىتىدىكەن . ئالامەت پەيزى ئوينىۋەتتىممۇ قانداق  ؟ دىگەننىمۇ ئويلاپ قالدىم .
       ئۆچكە بىلەن چوشقىغا  بۇ سورۇن كەيپىياتى يارىمىدى بولغاي ، ئىككىسى قوللىرىغا  يىرىمى تۆكۈلۈپ ، رومكىنىڭ قوڭىدا  قالغان ھاراقلىرىنى بىر - بىرى بىلەن نەچچە رەتلەر سوقاش  سالدۇرۇپ ، يەنە ئۇنى قايتا  ئۈستەل ئۈستىگە قويۇپ  ، يەنە.... شۇ ئىشلىرىنى تەكرارلاپ ، قانداقتۇ  بىر ئاخىرى  چىقماس  مەزمۇنلارغا كىرىپ كىتىپتۇ . مەنمۇ ئۇلار بىلەن قېرىشىپلا قالغاچقا ،  بىرىپ ئۇلارنىڭ ئۇدۇلىدىلا ئولتۇردۇم .
      ئاغزى سەل كالۋالىشىپ قالغان ئۆچكە  دۇدۇقلاپ  :
       كۆزلىرىڭگە قارىسا  ، مۈشۈك ئېسىغا كىلىدىكىنا ئادەمنىڭ ... ۋەئەئەتت!!!
    چوشقا تەڭكەش بولدى . سېرىق چاياننىڭ ئۆزىغۇ بۇ ... ۋەئەئەت!!!

  ئۇلار ماڭا "ئىت" دىگەن لەقەمنى تېڭىشتىن يالتايغان. مۈشۈككە ئوخشۇتۇپ  ، مىنى ۋەيران قىلىشنى  مەسلىھەت  قىلغاندەك  قىلىدۇ  .
كۈلكە ئاۋازى قايتا كۆتۈرۈلۈشكە باشلىدى . چاقچاقنىڭ  ئاخىرى ئۇنىڭدىمۇ قىززىق بولارمىكى دىگەنلەر ، ئورۇندۇقلىرىنى  داقىرتىپ ، بىز تەرەپكە سۈرۈلمەكتە . بەزى مۇناسىۋىتى يىقىنراقلار  :
     " ئاياقراق  ئولتۇرە ۋۇي " دىيىشىپ ، قىسىلىشىپ  ئولتۇرۇپ ، چاقچاقنى قۇلاقلىرىنى  ، دىڭ تۇتۇپ ئاڭلاشقا تىرىشماقتا . يولداشلارنىڭ بۇنداق قىزغىنلىقىنى  كۆرۈپ ، مەنمۇ ئۆزۈمنى چاقچاقچىلاردەك  ھىس قىلىپمۇ  قالدىم . ھا ھا ھا .... قىززىق  . ياق . مەن ئۆزۈمنى چاقچاقچى  دەپ خوشال  تۇتقۇنۇم يوق ، ئىككى كۈچلۈك رەقىبىمنى ،  چاقچاقتا پاخشا قىلىۋەتكەنلىكىمدىن ھوزۇرلىنىۋاتىمەن . ..بۇ قىتىمقى  ھايات - ماماتلىق  " جەڭ" دە ئۇتۇق بايرىغى مەن تەرەپتە لەپىلدىدى .
       ئۇلار تولىمۇ بېزەڭلىك بىلەن ، لاۋزا - تېتىقسىز  گەپلەر بىلەن قايتۇرما ھۇجۇمغا ئوتتى .
      كۆزلىرىنىڭ قارچۇغىنى  تاپقىلى بولمايدىكەن ...ۋەئەئەت!!!
       -ياق  ! ئۈندەش بەلگىگە ئوخشاپ قاپتۇ . .. ۋەئەئەت !!!

ئۇلار ماڭا چاقچاق قىلمىدى ،  مېنى ئۇدۇللا تىللاشقا  قاراپ  تەرەققى قىلىۋاتىدۇ  . ئۇتۇق  ئاللا بۇرۇن مەن تەرەپتە بوپ بولغاچ ، ھەممە گىپىگە " ھە سىنىڭ راست" دەپ كۈلۈپلا بەردىم . باشقا  خىزمەتداشلار قانداقتۇ بىرنىمىلەرنى چۇشەنگەندەك ، ئۇلارنىڭ " چاقچاق " لىرىغا مىيىغىدا كۇلۇپ ، باشلىرىنى بىلىنەر بىلىنمەس لىڭشىتىپ قوياتتى .
      ئۆچكە خېنىم  ، يىقىندا  يىڭى كەلگەن يىگىتلەرنى كۆرۈپ ، قۇيرۇقىنى ياپالماس بوپ قاپتۇ  . دەپ سالدىم .

قىقاس كۆتۈرۈلۈپ ، بەزىلەر ئەمدىلا ئوتلىغان چايلىرىنى پۈركۇۋەتتى .
     ئۆچكىنىڭ قاتتىق ئاچچغى كەلدىكى ، كۆزلىرى  يوغىناپ ، چىڭقىلىپ  كەتتى بولغاي كۆزەينەكلىرىنى ئىلىپ ، تاقاپ  ... قۇرۇپ  ، ئاقىرىپ  كەتكەن ،كالپۇكلىرىنى بىردەم - بىردەمگە يالاپ ، نىمە قىلارىنى  بىلەلمەي كەتتى ...چۇنكى ، شۇ ۋاقىتلاردا  بىرەر ئەركەك ئۇچۇن ، "قۇيرۇقىنى  كۆتۈرۈپ ، ياشلارغا ناز قىپتۇ  " . دىيىلىش ، ئېغىر ھاقارەتمۇ ھىساپلىناتتى . مەنمۇ ئۇنىڭغا خېلىلا ئېغىر تەككۇزىۋەتكىنىمگە ئازراق  پۇشايمانمۇ قىلدىم  . چۈنكى ، بۆلۈمدىكى ئاياللارمۇ ئاڭلاپ ، " ۋاي توۋۋا.. !! دىيىشىپ ،بەزىلىرى ئېغىزىنى بىر قولى  بىلەن توسۇپ كۈلۈشسە ، بەزىلىرى  بىر - بىرىنىڭ مۈرىلىرىگە باشلىرىنى قويۇشۇپ ، ھا ھا ھائائائا دەپ ئاۋازىنىڭ بارىچە  كۇلۇشمەكتە . بەزىلىرى چىكىسىدىكى قورۇقلارنىڭ  ئېنىق كۆرۈنۈپ قەلىشىدىن  ئەنسىرەپ ، ئىككى قولى بىلەن يۈزىنى توسۇپ تۇرۇپ كۇلۇشىۋاتاتتى...
    يېڭى يىل ئولتۇرۇشى ، كۈلكە - چاقچاق  ، ئۇسۇل - دىسكولار بىلەن تولىمۇ كۆڭۈللۇك ئاياغلىشىش ئالدىدا .  . گىرادۇسى بەك ئۈستۈن كۆتۈرۈلۈپ كەتكەنلەر بولسا :
     - ھوي !! قانداق  گەپكەن بۇ ؟!! ئوينايمىز تېخى .... ئويۇن ئەمدى باشلاندى تېخى  .... نىمە دەيدۇ ماۋۇ ...
   ھە !!! ھەي ... ساقى  ، ساقى  قىنى  ؟
    "- ئاناڭنى.... گۇيلار ، ھەممىڭ لاتا ....
   دەپ ئۆزىنىڭ ئاللىقاچان  مەس بوپ بولغانلىقىنى زادىلا ئېتىراپ قىلغۇسى  يوق  . ھەمدە ، بولدى قىلغۇسى  تېخىمۇ يوق .... 88- يىلدىن 89- يىلغا ، گالدۇ - گۇلدۇڭ كىرىپ بولغانلىقىنىمۇ ئۇنتىغان . ھاراق دىگەن ، كەيپىيات كۆتۈرەڭگۇ ، چاقچاقلار  راسا كەلگەندە ئىچسە ، سىڭىدىغان نەرسىكەن . قۇرۇغدالغان  پوتولكىلار ، رەتسىز ، تاراڭ - تۇرۇڭ ئاۋازلارنى چىقىرىپ ، ئۈستەل تېگىلىرىدە بىرىنىڭ پۇتىغا تىگىپ ، ئۈستەلنىڭ بۇ تەرىپىگە كەلسە ، ئۆزىنى ئوڭشاش ئۇچۇن ، مىدىرلىغان مەسرەكىنىڭ پۇتىغا تەگىپ ، دۇگۇلەپ سورۇننىڭ ئوتتۇرلىرىغىمۇ چىقىپ قالغان  . بەزى ئاكىلىرىمىز كەيپى توشۇپ ، بېشىنى تاماق ئۇستىلىگە قويۇپلا ئۇيقۇغا كەتكەن . يەڭلىرى قالدۇق قورمىلارنىڭ سۈيىگە چىلىشىپ قالغان ، بەزىلىرى بىر بۇلۇڭدا ، بېشىنى تامنىڭ بۇلۇڭىغا يۆلەپ، ئۇيقۇدا . ئۇلارنىڭ كۆزلىرىنىڭ قارچۇغى ئاللا قاياقلارغا كىتىپ ، كونتۇرولدىن ھالقىغان . ئايال خىزمەتداشلار بولسا قايتىپ كىتەي دىسە ، پوكككىدە يەنە قىززىق چاقچاقلار بولۇپ قالارمىكى دەپ ، قايتماي دىسە مەسلەر بارغانچە كۆپىيىۋاتقان .
     ۋىيەييي توۋا ... ئاۋۇ ئادەمنى قاراڭ ... ھەي ! ئۇ ئادەم ئانچە ئىچمەيتتىغۇ ؟! بۈگۈن نىمە بولغاندۇ ...ئۆتكەندە ئايالى " بىزنىڭ ئەر ھاراق تاشلىدى " دەپ ۋىتىلداۋاتاتتى ... تازا تاشلاپتۇ ئەنە ....
     ئوئويي .... مۇشۇ ئەر خەقلەرنىڭ ئىچىشىدىن خويمۇ تويدۇم . يە ئۆزىنى سوراپ ئازراق ئىچىشمەيدۇ .. . چوپ- چوڭ بوپ قالغاندىمۇ ... نىمىسى پەيزىكى ئۇ ئاچچىق نەرسىنىڭ ...
     دىيىشىپ غەيۋەتكىمۇ كىرىشىپ كەتكەن .
     گالدۇ - گۇلدۇڭلار بولسا ، يولۋاسنىڭ ئۆزى . ئۇلار ھازىر ئەتىنى ئاللىقاچان ئۇنتىدى . ئۆزىنىڭ قانچىلىك ئىچىپ سالغانلىقىنىمۇ مۆلچەرلىيەلمەيدۇ . ئۇلار بۇگۇنلا ، پوتۇلكىلارنى ساناشنى خالىمايدۇ  . ھەم ئېسىغىمۇ كەلمەيدۇ . ئەتە باشلىرى "زىڭ - زىڭ " قىلىپ ئاغرىغاندا ،"  ھۆ ھۆھ " دەپ ئاچچىق  ، قاڭسىق سېرىق سۇلارنى ياندىرغاندا ،
سوغاق  سۇنى گۇپۇلدەپ ئىچىپ ، مايماق  يىتىپ قىلىپ  ، چاچلىرىنىڭ بەزى يەرلىرىنىڭ ، ئۆچكىنىڭ قۇيرۇقىدەك   " دىڭڭىدە " تىك تۇرۇپ قالغان  يەرلىرىنى  ، نەم لۆڭگە بىلەن ئوڭشاشقا  باشلىغاندا ، قاپاقتەك  بوپ قالغان باشلىرىنى ئىككى قولىدا  چاڭگاللاپ ، " ئاخشام قالايمىقان  بىرەر ئىش قىپ قويمىغاندىمە  ھە " دەپ تۇنۇگۇنكى " خوشەئەئە  !!! " دىن كىيىنكى ئىشلارنى ئەسلىيەلمەي ، گاڭگىراپ ئولتۇرغاندا ...ئاندىن ، ئاخشامقى  ، زادى قانچىمىز ؟ قانچە پوتۇلكا ئىچىۋەتتۇق  ھۇي ؟!!!
دەپ  پوتۇلكىلارنى ساناشقا ئۆتىدۇ . مەنمۇ ئەلۋەتتە شۇلارنىڭ ئاكتىپ ئەزاسى ...
     ئۆچكە بىلەن چوشقىنىڭ ، يېڭى يىلى كۆڭلىدىكىدەك باشلانمىدى . ئۇلار خوشاللىق  ھارىقى  ئەمەس ، بەلكى ئازاپ ئىچىدە زەھەر ئىچتى . ئۇلارنىڭ گالدا- گۇلدۇڭ يۇرۇشى ، خىلىلا  ئۇزۇنغا سوزۇلۇشى تۇرغانلا گەپ . ئۇلار بەلكىم سەھەردىلا زەردە بىلەن خوتۇنلىرىغا :
        ئاچچىق  - چۇچۇك سۇيقاش  ئەت . دەپ ، پۇتۇن ئۆچىنى بىچارە خوتۇنلىرىدىن  ئالغان بولسا كىرەك.
مانا مۇشۇ سورۇندىن كەيىن ، ئۆچكە ، تاكى مەن ئىدارىدىن ئايرىلغىچە ماڭا گەپمۇ قىلمىدى  . مەن بۇنىڭدىن تا ھازىرغىچە راھەتلىنىمەن.
   يېڭى يىلغا مانا مۇشۇنداق قاقاقلاپ كۈلۈپلا كىرىپ كەتتىم . ئىدارىدىكى خىزمەتداشلار ،  مەن بىلەن بۇرۇنقىدىن خىلىلا قىزغىن  كۆرۇشىدىغان بوپمۇ قالدى  . ئىجدىمائى مۇناسىۋەتتە ، مەن رازى بولغىدەك ھەتتا چىن كۆڭلۇمدىن رەخمىتىمنى  ئېيتقۇدەك  ئىشلار بولىۋاتىدۇ . شەنبە ، يەكشەنبە كۈنلىرى ، بىر نەچچە ئاكىلىرىمىز ئۆيلىرىگە چاقىرىپ ، ئۆي تاماقلىرى  بىلەن مىھمان قىلىۋاتىدۇ  . " بىزمۇ چاقىرىپ قويمىساق  سەت بولارمىكى " دىگەن ئۆرۈپ - ئادەت بېسىمى بىلەن ئالاھىدە مىھمانغا چاقىرىش  پىلانى يوقلارمۇ  ، چىشىنى چىشلەپ چاقىرىۋاتىدۇ  . لىكىن ، شۇنداقلارنىڭ  كىچىك ئولتۇراشلىرى قىزىپ كىتىپ بارماقتا . دۇشەنبىسى ئىشخانىدا  ئاساسەن ، شەنبىدىكى ئولتۇراشنىڭ ئەھۋالى ، چاقچاقلار  تەكرارلىنىپ ، خىزمەت  ئاساسەن پاراڭ سىلىش بىلەن ئۆتمەكتە.
      ئادەمنى بىزار قىلىدىغان  سوغۇق شىمال شامىلى ھاردىمۇ قانداق  ، پەسكويغىمۇ چۇشتى . قىشلىق  ئۇيقىدىن  كۆزىنى ئاچقان   دەرەخلەر  ، گۇللەر ئاستا - ئاستا بىخ  چىقىرىپ ، كۈنمۇ خىلىلا  ئىللىقلىشىپ  قالدى  . قىشلىق  كىيىملىرىمىزنى يىغىشتۇرۇپ ئاپامنىڭ :
     " خىزمەتكە  چىققاندا  ، دوست - دۇشمەننىڭ ئالدىدا كىي  بالام "دەپ ، تىكىپ بەرگەن  ۋە بازاردىن ئىلىپ بەرگەن يازلىق  كىيىملىرىنى ، ئوقۇغۇچىلىق  ۋاقتىمدىن  تارتىپ ،ماڭا ھەمرا بولۇپ كىلىۋاتقان  ساندۇغۇمدىن چىقىرىپ:
      "  ماۋۇ بولىدىكە ، ماۋۇنى قانداق  كىيگىلى بولىدۇ بۇنى ؟ مودىدىن ئاللا بۇرۇن قالدىغۇ  ؟! قارا  ماۋۇ ئاپامنى ، ياشلارنىڭ كۆڭلىنى تازا چۇشەنمەيدۇ جۇما ! "
       دەپ مىيىغىمدا كۇلۇپ ، رەتلەشلىرىمنى ھازىر ئەسلىسەممۇ ، يۇزۇم " ۋىللىدە " قىزىرىيدۇ  . ھەم شۇ گەپلىرىم ئۇچۇن ، كىچىكسەممۇ ،
     كەچۇر جىنىم ئاپا ، شۇ ۋاقىتلاردا ، ياشلىق قىلىپ  ئانا مىھرى ، ئانىنىڭ بالىغا بولغان ئەشۇ ئىللىق يۈرەكلىرىنى ، كۆڭۇللىرىنى ،  ھىس قىلالماپتىكەنمەن . دەپ قايتا - قايتا دىگۇم كىلىدۇ . كەچۇرۇم سورۇغۇم كىلىدۇ . لىكىن ، مەن بەك بەكلا كىچىكتىم ... ئۇنى بىشىمنى تاشقا ئۇرساممۇ ، ئاپامنىڭ قۇلىقىغا پىچىرلىيالمايمەن . ئامما مىھرىبان ئانامنىڭ روھىغا ئاتاپ دۇئا قىلغىنىمدا ، مەن بۇ گەپلىرىمنى،  بىرەر قىتىممۇ دىيىشنى ئۇنتىمىدىم . ھەمدە ھاياتىمنىڭ ئاخىرغىچە ، شۇ گەپلىرىمنى تەكرارلاپ ئۆتۇش قەسىمىنى ، بۇنىڭدىن 15 يىل بۇرۇن ، ئانامدىن ئايرىلغان كۈنلىرىمدە ، قان- زار يىغلىغان ۋاقىتلىرىمدا ، كۆك ئاسمانغا قاراپ ، ئانام روھىغا قىلغان دۇئارىم بىلەن بىللە قوشۇپلا بىرىۋەتكەن  ئىدىم ...
        بىر كۇنى پوسولكا قەغىزىگە ، " مىللەتلەر تەرجىمانلار ئىدارىسىدىكى ئوغلۇمغا  تەگسۇن " دىگەن تولىمۇ يوغان ، ئىغىر بىر خالتا تاپشۇرۇپ ئالدىم . خالتىنىڭ  يىنىغا كەلسەم ، غۇلجىنىڭ چوڭ نىنى بىلەن ، قانداقتۇ  بىر خىل ،  مايلىق  توقاچلارنىڭ مېزىلىك ھىدى،  بۇرنۇمغا ئۇرۇلدى . ئەتىراپىمدىكىلەردىن ئازراق  خىجىل بولدۇميۇ ... لىكىن ، تىزراق ئىچىپ ، ئەتكەنچايغا بىسىپ ،ئەتكەنچاي بىلەن  راسا ئىچىمەنكەندە دىگەنلەرنى چاقماق  تىزلىكىدە ئويلاپ بولدۇم .
     خالتىنى  ئاچسام ، ماڭا تونۇش پۇجۇركىدا يىزىلغان ، سىغىنىشلىق  سالام خەت ،  نان ، توقاچ  ، سارماي ، كىچىك ماركىسى يوق  بىر پوتولكىغا ھەسەل ، ئازراق يايمىقاق ، ئۈرۈك قېقى ، قۇرۇت ، ئىرىمچىك دىگەندەك نەرسىلەر " ئاز بولسىمۇ  بالام ، ئېغىز تەگ" دىگەن ئاپامنىڭ يىقىملىق ئاۋازى بىلەن ئالدىمغا تىزىلدى . ئالدى بىلەن خەتنى ئىچىپ ئوقۇدۇم  . ئەينى ۋاقىتتىكى
       " سالام خەت" لەر ئاساسەن بىر خىل ئۇسۇلدا ، بىر خىل قىلىپتىلا  ، باش قىسمى  ، ھەممە مەسلەھەتلىشىۋالغاندەك ئوخشاشلا  سۆزلەر بىلەن يىزىلاتتى .
          ؟؟؟؟ شەھرىنىڭ ساپ ھاۋاسىدىن ئەركىن نەپەس ئىلىپ كىتىپ بارغان ئوغلۇم  . قانداق  ئەھۋالىڭ ؟  خىزمەتلىرىڭ ياخشى  كىتىپ بارامدۇ ؟ تۇرمۇشۇڭ ياخشى  كىتىپ بارامدۇ؟ سالامەتلىكىڭ ياخشىدۇ ؟ ئۇ يەرنىڭ ھاۋاسىغا ، تاماقلىرىغا خىلى كۆنۇپ قالدىڭمۇ بالام ؟ خىزمەتداشلىرىڭغا  بىزدىن سېغىنىپ سالام دە بالام ....
     بىزدىن ئەھۋال سورىساڭ ، خۇددى  ئۆزەڭ كورگەندەك ، ساق - سالامەت . بىزدىن ئەنسىرىمە .  ھەممىمىز ياخشى تۇردۇق ...
      مەخسەتكە كەلسەك : ساڭا ئاتاپ ، كالا خۇرۇمىدىن  تىكىلگەن ، بىر شىبلىت ئەۋەتتۇق  . داداڭ تونۇشلىرىغا دەپ ، غۇلجا تېرە زاۋۇتىدا  تىككۇزۇپ كەلدى . پۇتۇڭنىڭ ئاستىدىن سوغۇق ئۆتۇپ كەتمىسۇن دەپ ، خۇرۇم  چەم قىلغۇزدۇق .  ماگىزىننىڭ ھازىرقى ئاياقلىرىنىڭ  ھەممىسى رىزىنكە ، چوشقا خۇرۇمى ، سوغ تارتىدۇ  . ئوغۇل بالىغا بۇ بولمايدۇ ، كىيىن رىماتىزىم بولىسەن ... دىگەندەك يۇرەك سۆزلەر ، قاتار  - قاتار تىزىلغان .
        شىبلىتنى تەستەرەك كىيدىم . سەل پۇتۇمنى قىستىغاندەكمۇ  قىلدى يۇ ،  ھەر ھالدا پۇتۇمغا پاتتى . بىر مەزگىل كىيسەم ئۆزىنى قويۇپمۇ بىرەر ... دەپ ئورنۇمدىن تۇرۇپ ، جىمجىت ياتاقتا ، ئۇ يان ، بۇيانغا مېڭىپ كۆردۈم . " ئالە شەرىڭنى " ماڭغانچە ، شىبلىتتىن " غاچ غاچ غاچ " ئاۋاز چىقىشقا باشلاۋاتىدۇ ." ئوھ قانداق  قىلغۇلۇق  ... بۇ شىبلىتنى كىيىپ ، جىم- جىت خىزمەت بىناسىدا ئۇياقتىن ، بۇ ياققا  ماڭسام ، نىمە ئىشلار بوپ كىتەر"  چوشقا  بىلەن ئۆچكە مازاق  قىلىپ  ، كۈلۈپمۇ كىتەر ... ھە !
     شىبلىتنىڭ " غاچ غەچى " ماڭغانچە كۆپىيىۋاتىدۇ . كارۋىتىمدا  ئولتۇرۇپ ،پۇتۇمنى يەرگە ئاستا تەككۇزسەممۇ " غىچ " قىلىپ قويىدۇ  . بۇ بولمايدۇ . بۇ " غاچ غاچ" نىڭ ئامالىنى قىلىش  كىرەك . شىبلىتنى چىرايلىق  قىلىپ ، سومكىغا سىلىپ ، شۇ يەرلىك موزدۇزنىڭ يەنىغا ئاپاردىم .
        شىما شى ؟( نىمە ئىشىڭ بار)
  تۇمشۇقلىرىنى   قاپ  - قارا  قوللىرى  بىلەن ، يىرىم - ياتا سۇرتۇپ ، دىدى موزدۇز ماڭا.
     ئەييائائا !!! دىدىم مەن دۇدۇقلاپ  ،
  بۇ گۇينىڭ تىلىدا " غاچ غاچ" نى نىمە دەيدىغاندۇ ؟ئەمدى .
      " ھەي ! غاچ غاچ دە بەنفا يوئۇمەئىيو " ھەي ! گۇي ... لا دەپ باقتىم  . ( غاچ - غاچنى يوقۇتالامسە ). چۇشىنىدىغاندەك ئەمەس بۇ   ...
    ئۇنى دەپ باقتىم  ، بۇنى دەپ باقتىم ، بۇ موزدۇزغا زادىلا چۇشەندۇرەلمەي ، ئاخىرى شىبلىتنى كىيىپ ، " غاچ " چىقىرىپ  مىڭىپ ،چۈشەندۇردۇم .
     ئەييا بۇشىڭ ... ( بولمايدۇ)
  دەپ ئۇ تىخىچە  ، موزدۇزلۇق ھاياتىدا بۇنداق  " غاچ غاچ" نى كۆرۇپ باقمىغانلىقىنى  ، قىلالمايدىغانلىقىنى  بىلدۇردى . شۇنداق  قىلىپ  بۇ " غاچ غاچ " شىبلىت ئۇزۇن ۋاقىت   ساندۇغۇمدا تۇردى . كىيىن يەنىلا ھەمشەھەرلەردىن سوراپ ، ئۇ غۇلجىلىق موزدۇز ئۇستام ئاران سالغان " غاچ غاچ"نى يوقاتتىم  .
    ئويلۇدۇم . بالا يەنىلا بالا .
ھايات مانا مۇشۇنداق  زەنجىر ھالقىسىدەك  ، بىر - بىرىگە ئۇلانغانىكەن . " مەن قىلارمەن  بالامغا ، بالام قىلار  بالىسىغا " دىگەندەك ، بىچارە جاپاكەش ئاتا - ئانام ، مەن خىزمەتكە  چىققاندىن  كىيىنمۇ ، مېنىڭ غېمىمدە ... ئاپامنىڭ " بالام بېشىڭغا قىلىن  كىي ، بىز ئەۋەتىپ بەرگەن قۇلاقچىنى  بېشىڭدىن ئايرىما ، سوغاق باشتىن ئۆتسە بەك يامان ، ھازىرقى  باللار شەپكە كىيىشتىنمۇ خىجىل  بولۇپ ، يالاڭپاشتاق  يۇرۇيدۇ . بۇ تەرمۇسقا قايناق سۇنى  لىقلاپ  ئەلىپ ، ئاغىزىنى ياپمىغاندەكلا ئىش..." دىگەن گەپلىرى قۇلۇقۇمنىڭ  تۇۋىدە...
    ھەي ياشلىق  .... ھەي بەڭۋاشلىق ... شۇ ۋاقىتلاردا چوڭلارغا يىنىش ئاساسەن يوق  ، لىكىن ، بىر ئاماللارنى قىلىپ  ، ئۆزىمىزنىڭكىنى توغرىغا چىقىرىشقا  تىرىشاتتۇق  . بەلكىم ، ئوقۇرمەنلەر  ئارىسىدىكى كۆپ دوستلىرىمىزمۇ ، شۇنداق بولغان بولسا كىرەك ...
     ئاتا - ئانىنىڭ بالا ئۈچۈن قىلغىنىنى  ، بالا ھەرقانچە  قىلىپمۇ قايتۇرالمايدۇ  . شۇڭا ئاتا- ئانا ھەممىدىن ئۇلۇغ ، ھەممىدىن مىھرىبان ، ئاتا - ئانا مىھرىنىڭ ئورنىنى ، ھىچ قانداق  نەرسە تولدۇرالمايدۇ ... ئۇنىڭدىكى ھارارەت بىلەن ھىچ قانداق ھارارەت بەسلىشەلمەيدۇ ھەمدە سېلىشتۇرۇشنى ئويلىغان ھامان ئۇتتۇرغىنىڭىز ئۇتتۇرغان  ...
      بۇ ھەقتە  يەنە مۆرىتى كەلگەندە ، پۇرسەتنى ئۆتكۇزىۋەتمەي ، ئوقۇرمەنلەر  بىلەن بىللە سوزلىشىشكە  ، ھەرقاچان تەييارمەن ....
    باھار كىرىشى بىلەن ، بۇ قىلىدىغان  ئىش يوق  ئىدارە ، جانلىنىپ كەتتى. ھەممە ئادەم ئادەتتىكى مېڭىشلىرىدىن ، قەدەملىرىنى  تىز - تىز ئەلىپ ، چىرايلىرىدا ئىچى - ئىچىگە پاتماي قالغان  خوشاللىقلىرىنى  يوشۇرالماي يۇرمەكتە.
      خۇددى  دۇنياۋى خاراكتىردىكى تەنتەربىيە يىغىنى، ئولىمپىكتىنمۇ ئۇزۇن ، داغدۇغۇلۇق  تەنتەربىيە يىغىنى باشلىنىپ كەتتى. ھەر قايسى  مىللەتلەر بولۇمى ، ئوز مىللىتىنىڭ غورۇرى ۋە ئابرۇيىنى ساقلاش ۋە يۇقۇرى  كۆتۇرۇش ئۇچۇن ، بەيگىگە چۇشۇش ئالدىدا . "دوستلۇق  بىرىنچى ، مۇسابىقە ئىككىنچى " دىگەن ئاخمىقانە  شوئار ئاستىدا ، ھەممە مۇشتۇملىرىنى چىڭ تۇرۇپ ، " بىز بار مەيەردە جۇما " دەپلا تۇرۇدۇ .
      مانا پۇرسەت دىگەن . مانا ھە دىگەندىلا ، مىللىتىم ئۇچۇن ، ئۆزەم ۋايىغا يەتكۇزۇپ قىلالايدىغان  ، بىرەر ئىش قىلالايدىغان  بولدۇم . خىزمەتتە  10 يىل ئىشلىسەممۇ ، بىرەر نەتىجە چىقىرالىشىمدا  ، پەقەتلا  ئۇمىت يوق . ئارقىدىن  سانىغاندا بىرىنچى بولۇپ ، داۋاملىق  مېڭىشىمدا گەپ يوق  . ئامما تەنتەربىيەدە ، بۇ ئىدارىدە كىم مىنىڭ ئالدىمغا ئۆتەلەيدىكىن .
    بايرامغا ياسانغان ، ھېيتلىق  پۇل ئالغان بالىلاردەك خوشاللىقىم  قىن - قىنىمغا  پاتماي كەتتى . ئۆزەم ئەڭ ياخشى ئوينىيالايدىغان ۋالىبول تۇرى بويىچە ، ئۇزۇن يىللىق  تەجىربىلىرىمگە ئاساسەن ، يولداشلارنى تەشكىللىدىم . باشقا   تىلنى راۋان سوزلىيەلمىگىنىم بىلەن ، ۋالىبول ھەققىدە  قۇچقاچ تىللىرىم چىقىپ  كېتىدىغۇ ... ئوننەچچە يەشىمدىن باشلاپ ئويناپ كەلگەن ۋالىبول ، مەن ۋايىغا يەتكۇزۇپ ئوينىيالايدىغان توپ تۇرىغۇ ....
      ئۇرە ...!!! چىقىرە  !!! سالە گۇينى ... ئۇيغۇرچە سىلىق  - سىپايە ، قاتتىق يۇمشاق گەپلەرنى چاقچاق  ئارىلاش توۋلاپ ، ھەر قايسى  بۆلۇملەرنى پوسكايتىۋەتتۇق  . بۇ ۋاقىتقا  كەلگۇچە ، چاۋشىيەن مىللىتى بولۇمى بىرىنچىلىكنى قولدا  تۇتۇپ كەلگەن ئىكەن . ئاخىرقى  ھەل قىلغۇچ  مۇسابىقىدىمۇ  ، كونا چىمپىيۇن ، قولىمىزغا  سۇ قۇيۇپمۇ  بىرەلمىدى .
      ھەر قانداق  مىللەت ، " قول سۇنسا يەڭ ئىچىدە " دىگەندەك ، يەنىلا ئۆز مىللىتىنىڭ مەنپەئەتى ، غورۇرى ئۇچۇن جەڭگە ئاتلانغاندا ، ئۆزارا تولىمۇ سۆيۇملۇك ، تولىمۇ ئىناق بولۇشۇپ كىتىدىكەن . بەزى بىر ماي تارتىشلار ، مىللەت مەنپەئەتى ئۇچۇن " ھۇررا " توۋلىغان چاغدا ، يەنىلا توختاپ  ، " مىللىتىم ئۇچۇن " دىگەن روھ ئۈستۇن ئورۇنغا ئوتىدىكەن .
       يارايسىز ئۇكام . يارايسىز ... ماندا ھۇنەرلەرمۇ بار دەڭ : دەپ كەم سوز بۆلۇم باشلىقى  ، مۇرەمگە ئۇرغاچ خوشاللىقىنى  ئىپادىلىمەكتە .
     ئۇ ئادەم ۋىجىك ، تولىمۇ ئاز گەپ قىلىدىغان  ، شۇ ۋىجىك بويىنى خەقتىن يوشۇرىۋاتقاندەك  ، ئالدىغا خىلىلا ئەڭىشىپ ماڭىدىغان ، ھەر قانداق كەلگەن چاقچاققىمۇ  " پىسسىڭڭىدە " ئارانلا كۈلۇپ قويىدىغان  ، كۇلكىسى بەكلا  قىممەت  ،خىزمەتتە  ئەستايىدىل  بىر ئادەم ئىدى .
      "مىنىڭ بۇ ئىدارىدە قىلالايدىغىنىم ، ئولتۇراش ئويناش بىلەن مۇشۇ توپ ئويناشتەكلا قىلىدۇ  ...'"
      دىدىم مەنمۇ چاقچاق ئارلاش ، خوشاللىقىمنى  ئىپادىلەپ.
بۇ ئۇزۇنغا سوزۇلغان " ئولىمپىك" تە ئۇيغۇر بولىمى ، ئىدارە تارىخىدا قولغا كەلتۇرۇپ باقمىغان ،  كۆچمە بايراقنى  ، تۇنجى قىتىم  ئالغان بولدى. . ئىدارە باشلىقىمىزنىڭ  خوشاللىق كۇلكىسىدىن ، ئارقا  تەرىپىدىكى بىر نەچچە چىشىنىڭمۇ ،ئالتۇن چىش ئىكەنلىكىنى شۇ كۇنى بىلىپ قالدىم  ...
     مەن يۇقۇرىغا  بۇ ئەھۋالنى مەلۇم قىلىپ  ، شەھەردىكى پۇتۇن ، يۇرتىمىزدىن كەلگەنلەر ئۇچۇن " تەڭرى تاغ لوڭقىسى تالىشىش مۇسابىقە  يىغىنى " ئۆتكۇزۇشكە كۇچ چىقىرىمەن  . بىرىنچى بولغان ئۇيغۇر بۆلىمىگە ، ئىدارىدىن مەخسۇس خىراجەت  ئاجىرتىپ ، مۇسابىقىغە  تەييارلىق مەشىقى  ئىلىپ بېرىلىشىنى بۇگۇنلا جاكالايمەن ...
  دەپ يىغىننى ئاخىرلاشتۇردى  .
    ئەكەڭنى سۇگۇي ، سارتلار ئاپ كاتتە...
   دىگەن گەپمۇ قۇلۇقۇمغا  كىرىپ قالدى  ....
       تەييارلىق  پۇتتى . ئىدارىدىن ئاجىرتىلغان پۇلغا ، تولۇق  بىر يۇرۇش ، تەنتەربىيە كىيىمى سىتىۋالدۇق . بۇ جەرياندىكى قىززىق  تالاش - تارتىشلارنى  ، ئاۋۇ رەڭ بولىدىكە ، ماۋۇ بولمىدى ، ۋاي نىمە قىلىشساڭ قىلىشمامسە ۋاي... دىگەندەك كىلىشەلمەسلىكلەرنى كەيىنچە بىر پۇرسەت بولغاندا تەكىتلەپ ئۆتەي ...
      ۋەتىنىمىزدىن كەلگەن ، شۇ شەھەردىكى ئۆزىنى خەلىق   ئالدىدا ئانچە كورسۇتۇشنى خالىمايدىغان  ، كاتتاباشلارمۇ بۇ قىتىمقى " تەڭرى تاغ لوڭقىسى تالىشىش تەنتەربىيە يىغىنى" غا  قاتناشتى  ۋە تەبرىك سۆزى قىلدى  . تەنتەربىيە يىغىنىنىڭ ئېچىلىش مۇراسىمى تولىمۇ ئەركىن ، تەبىئى بولدى . ھەممە ئۇرغۇپ تۇرغان قىزغىن  روھ بىلەن  پاراتتىن ئوتۇپ، بۇ تۇنجى قەتىملىق تەڭرى تاغ لوڭقىسى  تالىشىش تەنتەربىيە پائالىيىتى ، داغدۇغۇلۇق باشلاندى .  ئىدارىمىز كاماندىسى بىرىنچى كۇنىلا داڭ چىقىرىۋەتتى .
    -   ھە ھە سالە ئۇكا ...
  بەكمۇ ئىتتىك ماڭالمايدىغان ، لىكىن شۇ سەمىز بەدىنى بىلەن،  توپ مەيدانىدا كۇرەش قىلىۋاتقان  ، ئارلاپ - ئارلاپ يوغان قوساقلىرىنى  ، ئوز ئىختىيارى  ئەمەسلا سىلاپ - سىلاپ قويىدىغان  ئاكىمىزنىڭ ئاۋازى ، مىللەتلەر ئىنىستۇتىنىڭ تەنتەربىيە مەيدانىنى  بىر ئالغان ... ئۇ ئاكىمىز پۇتۇن ھىسياتى بىلەن ئوينىغاچ ، مەن توپكىغا چىققىنىمدا  ، ماڭا مەدەت بەرگەندەك ، سىمىز پۇتلىرىنى كۆتۇرۇپ ، توپنىڭ يولۇنۇشىنى بويلاپ بويۇنلىرىنى سوزۇپ تۇرۇپ ۋاقىرىماقتا  ...
     يارايسە ئۇكا !! مانا مۇشۇنداق  . ھە مانا يەنە بىرنى ، سالە كۆككوز ...ئۇ ئاكىمىز توختىماي  ۋاقىرىماقتا  :
        سالە دەيمە ...!!! جېنىم ئۇكام ، ھە !
باشقىلار  قاراپ  تۇرىۋاتىدۇ ، دەيمە ...
   ئۇچ مىتىرنىڭ ئىچىگە بىرنى سالە ئۇكا ...
      ئۇ ئۆزىنى ئۇنتىغان  ، ئۇنىڭ  " باشقىلار  قاراۋاتىدۇ  " دىگىنى شۇ ۋاقىتتىكى  ئاممىۋى سورۇنلاردا ، ئانچە يۇرەكلىك دىيىلمەيدىغان گەپلەر ... لىكىن ، ھەممە كۆپنىڭ چىن كۆڭلىدىكى گەپلەر ئىدى . ئۇ مۇشۇ مۇسابىقە  ئارقىلىق  بولسىمۇ ، ئۇيغۇر مىللىتىنىڭ ئابرويىنى ، تەسىرىنى ھەتتا كۇچىنى باشقا  مىللەتلەر ئالدىدا  كۆرسەتمەكچى ...
     ئاكىمىزنىڭ چىقارغان  پاسلىرىدىن ، قوللىرىنىڭ  بىر ئەپلىك ، قايماقتەك كىلىشى ۋە پاسلىرىنىڭ تولىمۇ مۇقۇم ئورۇنغا كۆتۇرلىشلىرىدىن ،ياش ۋاقتىدا خىلى كۆزگە كۆرۇنگەن پاسچى ئىكەنلىكى چىقىپلا تۇراتتى . ھەركەتلىرى ئاستا ، سىمىزلىكى،  ئويلىغان ۋە قىلماقچى  بولغان ھەركەتلىرىگە ئانچە ماسلاشمىسىمۇ ،لىكىن كىشىنىڭ زوقىنى  كەلتۇرەتتى . قارشىلىقسىز  ئىلگىرلەۋاتقان  كاماندىمىزدىكىلەرنىڭ روھى كەيپىياتى ئالامەت .
       بۇگۇن نەتىجىمىزنى تەبرىكلەپ بىرەرنى چاقامدۇق  ئۇكا ؟
  ئۇ ئۆزى سوئال سوراپ ، جاۋابىنى كۇتمەي ، ئۆزىلا جاۋاپ بىرىپ :
    ياق ئۇكا ، بولمايدۇ . بۇگۇن چاقمايلى  ، قايتىپ  ئوبدان ئارام ئىلىپ ، ھەممىنى سىرىپ تۇگىتىپ ، ئاندىن ئىچسەكمۇ كېچىكمەيمىز . قانداق  ؟ دىگىنىم توغرىدۇ ؟ئۇكا ..
     شۇنداق قىلىپ  ، مۇسابىقە ئەھۋاللىرى قۇلاقتىن  - قۇلاققا  كۆچۇپ ، ئاخىرى  ھەل قىلغۇچ  مۇسابىقە  كۇنى ، ۋالىبول مەيدانىنىڭ توت ئەتىراپى ، ھەر مىللەت ئوقۇغۇچىلىرى بىلەن لىق تولدى . شۇنچە چوڭ مۇسابىقىلارنى باشتىن كەچۇرگەن ، ئالى مەكتەپلەر ئارا ئوتكۇزۇلگەن ، ھەل قىلغۇچ مۇسابىقىلەردە ۋە شەھەر ، ئوبلاس- ۋىلايەتلەر ئارا ئۆتكۇزۇلگەن مۇسابىقىلاردىمۇ ، جاننى تىكىپ قويۇپ ، ئويناپ ،   ئالقانلىرىمدىن بۇ قىتىمقىدىكىدەك   تەر چىقمىغان . مەندىمۇ خىلىلا جىددىلىشىش ، ئەنسىرەش بار . ئىككى ئالقىنىمنى  يەرگە تەككۇزدۇم . ئاللا مەدەت بەرگەي ...
   قارشى  گۇرۇپپىدىن ھەممىنى سىرىپ كەلگىنى ، يىزا ئىگىلىك ئۇنۋىرسىتىتى  . بۇلار خىلىلا كۈچلۈك . ماسلىشىشچانلىقى بىزدىن ياخشى  .ھەممىسى 20 ياش ئەتىراپىدىكى ، ئۇرغۇپ تۇرغان ياشلار ،  پاسچىسى ، بىزنىڭ پاسچىغا يەتمىگىنى بىلەن ، ئىككى ھۇجۇمچىسىدا چوڭ چاتاق يوق .
بىزدە بىر ھۇجۇمچى كەم . پىلاننى ئۆزگەرتتۇق  . پاسچى  ئاكىمىزنىڭ تەجىربىسىنى قوبۇل  قىلىپ ، مەن ئالدى مەيداندىن نورمال ھۇجۇم ، ئارقا مەيداندىن ئۇزۇن ھۇجۇم ( ئۇچ مىتىر سىزىقنىڭ  سەتكىغا قارشى  تەرىپىدىن ، سىزىقنى  دەسسىمەي ، سەكرەپ چىقىپ  ئۇرۇش) تاكتىكىسىنى بېكىتتۇق  . بۇ تاكتىكا ، ئەگەر مۇسابىقە ئۇچ مەيدان بىلەن ئۇ ياق  بۇياق  بولسا ، كۇچىنى كۆرسىتەلەيدىغان ، ئەگەر مۇسابىقە سوزۇلۇپ ، بەش مەيدانغا سوزۇلغاندا ، ھۇجۇمچى چارچاپ ، رولىنى ئانچە جارى قىلدۇرالماسلىقتەك ئەھتىمالى كوپرەك  تاكتىكا  . بۇگۇنكى ھەل قىلغۇچ  مۇسابىقىدە  ، بۇ تاكتىكىنىڭ ئوتتۇرغا قويۇلۇشىمۇ خاتا  دىگىلى بولمايدىغان مەسلىھەت.
     ھەممە جىددىلەشمەكتە. تاماشىبىنلارمۇ " قايسى ئۇتۇپ چىقار  ؟" دىگەن سوئال - جاۋاپ  ۋە تايىنى يەتكەنلىرى ئوزارا قول  ئىلىشىپ  ، قانداقتۇ  بىر نىمىلەرنى تىكىپ ۋەدىلىشىۋاتقاندەك  ..."  بولدى ، ھىساپ  تىكتىم ، قىنى  كۆرىمىز ، بىر تەخسە لەغمەنكەنغۇ ..."دىيىشىپ ، مۇسابىقىنىڭ تىزراق باشلىنىشىنى كۇتمەكتە.
     بەدەن قىزىتىش  ئۇچۇن مەشىق  توپى ئۇرۇش باشلاندى . بۇ مەشىق توپكىسىمۇ ، ئالاھىدە ئەھمىيەتكە ئىگە بىر تاكتىكا بولۇپ ، مەشىق جەريانىدا ھە دىگەندە قاتتىق  بىرەرنى ئۇرۇش ، قارشى تەرەپنىڭ كەيپىياتىغا ئازدۇر - كوپتۇر تەسىر كۆرسۇتەلەيتتى. روھى جەھەتتىن " بۇلار خىلىلا  كۇچلۇكمۇ قانداق ؟  " دىگەن بىسىمنىمۇ بەرەلەيتتى.
   سالە ئۇكا !....
سېمىز ئاكىمىزنىڭ ، بوم ئاۋازى بىلەن تەڭلا ، قايماقتەك  پاستىن بىرسى كۆتۇرۇلدى .
     ھەممە تىمتاس ، خۇددى  مۇشۇ بىر توپ بىلەن مۇسابىقە  نەتىجىسى ئىلان قىلىنىدىغاندەك  ... پۇتۇن كۇچۇم بىلەن سەكرەپ چىقىپ  ، سېتكا بىشىدا " ھە قەنى  ، مەنى ئۇرمامسە " دەپ قاراپ تۇرغان توپقا   ، كىچىك بېغىشىمنى ئۇنۇملۇك سىلكىپ ، راسا ئۇردۇم . توپ ھەم قاتتىق  كۇچ بىلەن ھەم بېغىچنىڭ جايىدا سىلكىنىشى بىلەن تولىمۇ چىرايلىق  ئۇرۇلدى . ھەم قارشى  تەرەپ ئۇچ مىتىر سىزىقىنىڭ  ، قىسقا  يانتۇ سىزىقىغا  چۇشتى .بۇ خىلىلا يۇقۇرى ماھارەت تەلەپ قىلىدىغان ئەھۋال بولۇپ ، پاس چوقۇم سەتكىنىڭ قاق بەشىغا چىقىشى كىرەك . بەغىشنى خۇددى ئات ھارۋا قامچىسىغا ئوخشاش سىلكىگەندىلا ئاندىن ھۇجۇم نەتىجىسى ، توپنىڭ ئولۇش نىسپىتى 80- 90% گە يەتىپ بارالايدۇ .  بۇ توپ ، بىز تەرەپنى قوللىغۇچىلارغا  غايەت زور بىر ئۇمىتلەرنى ئاتا قىلىۋەتتى  .
     ھە. ... !!! يارايسە ئۇكا . ھە ئاخىرغىچە  مانا مۇشۇنداق  ...
ئاكىمىز خوشاللىقىدىن  ، توختىماي ۋاقىرماقتا  ...
     مۇسابىقە  باشلاندى . دەسلەپ بىزنىڭ ھۇجۇمىمىز ناھايىتى ئوڭۇشلۇق  ئىلىپ بىرىلدى . قارشى  تەرەپ تازا دىگەندەك رولىنى جارى قىلدۇرالماي ، بىراز ساراسىمدا ، سەل قالايمىقانلاشتى  . ۋە ئوزارا تاپا - تەنە ،بىر - بىرىگە ۋاقىراشلار  بىلەن ھودۇقۇشتا  ...
      ئىشلار بۇنداق  جايىدا بولىۋەرمىدى . ئۇلارنىڭ ھۇجۇمچىسىمۇ ، پۇتۇن ئاچچىقىنى  توپتىن ئالماقچى بولغاندەك ، غەزەپ بىلەن بىرنى ئۇردىكى ، مەيدان كەيپىياتى پۇتۇنلەي ئۆزگەردى . ئۇلار جانلىنىپ ، ھەر خىل ۋاقىراش  ، ئىسقىرتىشلار  بىلەن بىزگە تەھدىت سالماقتا  ... نەق بۇ ۋاقىت  ، مەنىڭ ئارقا  مەيداندا ئۇزۇن پاس ئۇرۇۋاتقان  ۋاقتىم . ئۇزۇن ھۇجۇمنىڭ كۇچى بولغىنى بىلەن يولۇنۇشى يايى شەكىلدە بولغاچ ، نومۇر ئىلىش  نىسبىتى توۋەن . بىز ، ئۇلار 10 نەچچە نومۇر ئەلىپ بولۇشىغىچىمۇ  ، ئايلىنىش قىلالمىدۇق  . يەنە ئىككى ئايلىنىش بولسا ، مەن ئالدى مەيدانغا كىلىمەن ، لىكىن قارشى  تەرەپنىڭ ئىچىلىپ كەتكەن ھۇجۇمچىسى ، بىزنى پاراكەندە قىلىۋەتتى  . 14 تە 8 . ئايلىنىش قىلدۇق  . " ئۇففف خۇدا  " بۇ ۋاقىتتا ،  بىز تەرەپتىن سەۋەنلىك بولمىسۇن . ئاكىمىزمۇ تەجىربىلىك پاسچى بولغان ، پاسلىرىنى سەتكىدىن سەل تارىپ ، يىراقراق  چىقىرىپ  بەرمەكتە. سەتكىدىن يىراقراق  بولغان ھۇجۇم ، بىراز مۇقىم  بولۇپ ، توساش بىراز قىيىن  . كەينى - كەينىدىن ئوخشاش  شەكىلدىكى ھۇجۇم ئۇنۇملۇك بولۇپ ، بىزنىڭ كەيپىياتىمىزنى يۇقۇرى كۆتەردى . تەلەي ئوڭدىن كەلدى بولغاي نومۇرىمىز ئۇلارغا يەتىشتى . 14 تە 14 . ۋالىبولدا راسا قىززىيدىغان  پەيت . ....قايسى تەرەپ ئىككى نومۇر ئاشۇرسا ، بۇ مەيدان ئۇتۇقى  شۇنىڭغا مەنسۇپ . توپ باشلاش بىزدە . بۇ پەيتتە قاتتىق  ھۇجۇم قىلىپ  ، ئۆزىنى كورسۇتۇش زورۇر ئىش ئەمەس ، ئەپلەپ - سەپلەپ نومۇر ئىلىشلا ئاقىلانە ئىش . لىكىن ، ئۇلار يەنىلا ياشلىق قىلىپ ، قاتتىق ھۇجۇمغا ئۆتتى. ئۇلار ھاياجان ۋە سەل جىددىچىلىكتە توپنى سەتكىنىڭ قوسىقىغا  چاپلاپ ، بىزگە ياخشى شارائىت ھازىرلاپ بەردى . 15 تە 14 . ئاكىمىز ، " ھە ھە كىلە ئۇكا ، مانى مانى " دەپلا ماڭا چىقارماقچى  بولغان پاسنى ، " شارت" قىلىپ  قارشى  مەيداننىڭ ، بوش ئورنىغا تاشلىدى .  قارشى تەرەپ " چوقۇم ھۇجۇمچىغا چىقىرىدۇ "  دەپ ئويلاپ ، مىنى توساشقا  تەييارلىق قىلىۋاتاتتى  . 6- ئورۇندىكى ئادىمى مىنىڭ ھۇجۇمۇمنى توسۇغۇچىلارنىڭ ئارقىغا كىرىپ   مۇداپىيىدە ، 4- ئورۇندىكى ئادەم ئارقىغا چىكىنگەن ، 1- ۋە 5- ئورۇندىكىسى ، يايى شەكىلدە ھۇجۇم كەپ قالسا،  دىگەن پەرەز بىلەن ئوز ئورۇنلىرىنىڭ مۇداپىيىسى بىلەن . دىمەك ، مەيدان ئات تۇيۇقى شەكىلدە ، 6- ئورۇن بوشلا قالغان . ئاكىمىز بۇنى ئالدىن قىياس قىلغاچ ، تاشلاش ئۇنۇملۇك بولۇپ ، نومۇر بىز تەرەپكە قوشۇلدى  . تەستە بىر تەرەپ بولغان 1- مەيدان قىقاس - چۇقانلار  ئىچىدە ئاخىرلاشتى  .
      ئىككىلى تەرەپ بىر - بىرىگە يول بەرمەي ، بارلىق  ماھارەتلىرىنى كۆرسۇتۇپ  ئىلىشماقتا  . تاماشىبىنلارمۇ  ئوت - كاۋاپنىڭ ئىچىدە ،  قارشى  تەرەپ قوللۇغۇچىلىرىغا  ھومۇيۇپ قاراپ  ، گەپتىن سەللا كەتسە ، " نىمە دەيسە" دەپ چىقىدىغاندەكلا  . مۇسابىقىنىڭ  تۆتىنچى مەيدانى ئاياغلاشتى . 2 دە 2 . ھەل قىلغۇچى  مانا بۇ 5- مەيدان . ئىككى تەرەپتىن توختىماي  ھۇجۇم قىلىپ ، مەنمۇ ھالىمدىن كىتەي دىدىم. لىكىن ، ئەتىراپتىكى قوللىغۇچىلىرىمىزنىڭ بىزگە بىرىۋاتقان  مەدەتلىرى ، بولۇپمۇ  سىمىز پاسچى ئاكىمىزنىڭ  روھى ھالەت ، كەيپىياتلىرى ماڭا كۇچ - قۇۋەت  بولماقتا  . ئاكىمىزنىڭ ئىغىر بەدىنى بىلەن  خۇددى يامغۇردا قالغان  ئادەمدەك ئەقىپ تۇرغان تەرلىرى ماڭا ئوزۇق بولماقتا  . 5 مىنۇت دەم ئىلىشتىن كىيىن ، مۇسابىقە  باشلاندى . ئىككىلى تەرەپ تاكتىكا ئۆزگۇرۇشى ئىلىپ بارماي ، " قازاندا  نىمە بولسا ، چۇمۇشكە شۇ چىقىدۇ  " دەپ باشقا  كەلگەننى كۆرمەكچى . ئۇزۇنغا سوزۇلغان بۇ مۇسابىقە  ، تولىمۇ  جىددى ئىلىپ بىرىلدى . مەيدان كەيپىياتى چاۋاك ، ئىسقىرتىشلار  بىلەن پەللىگە كۆتۇرۇلدى . مۇسابىقە  نومۇرى بىر - بىرىنى تاپ بىسىپ قوغلۇشۇپ  ، ئاخىرقى  نەتىجە تولىمۇ تەسلىكتە بىزگە مەنسۇپ بولدى. پاسچى ئاكىمىز پۇتۇن ئاۋازى بىلەن ۋاقىرغىنىچە ، مەيدان ئوتتۇرسىدا تازا يوغان بىر پىقىرىۋىتىپ ،  يۈگۈرۈپ كىلىپ ، مېنى قۇچاقلىدى  ۋە  لىككىدە قىلىپ مىنى ئىگىزگە كۆتەردى.
داۋامى بار

begir

ئىنكاس جىق يېزىلمىغان بىلەن كۆرۈپ تۇرۇپتىمىز ...

HALJAT

نۇرىكامنىڭ قەلەم قۇۋۋىتىگە ئىچ ئىچىمدىن قايىل بولدۇم....

amirsahip

يااللامانا مۇنداق ھىكايەلەرنىمۇ كۈرىدىكەن دىسە،پىقرمۇ90-يىللارنىڭ يامان توپچىللىرىدىن،پاس ھەم مۇداپىئەگە گەپ كەتمەيدۇلىكىن ھۇجۇمغا ئۇنچىلا ئەمەس قەدىرئەھۋال.داۋامىنى تەقەززالىق بىلەن ساقلايمەن.....

jmgur

بىرمۇنچە ۋقتننى چىقىرىپ ئېسىل بىر يازمىنى بىز بىلەن كۈرۈشتۈرگەن قەيسەر مىجىت ئەپەندىگە رەھمەت، داۋامىنى ساقئالايمىز

Uygurfarzanti

داۋامىنى ساقلايمەن.         كۆپ رەھمەت.

ئالۋۇن

داۋامىنى ساقلايمىز

yiganayapraq

ئانىنىڭ باغرىغا نىمە يەتسۇن،مۇشۇ نۇرىكامنىڭ ئۆزى سۈرلۈك بولغىنى بلەن بەك قەلبى يۇمشاق ئادەمكەن،يېقىندىن بېرىقى ئانىغا ئاتىغان قوشاقلارنى ئوقۇپ سالسا ئادەم چىداپ تۇرغىلى بولمايدۇ.شۇ ‹غاچ-غۇچ ›قىلىدىغان ئاياقنى كىيىپ ئوياق-بۇياق ماڭغان ۋاقتى ۋە غۇلجىنىڭ مىللى پۇراقلىقى چىقىپ تۇرىدىغان ئەتكەن چاينىڭ گەپلىرى،سارماي،تىرموس دىگەندەك بەكلا بىر يۇرت ئىشقىدا كۆيۈپ،سېغىنىشلىرىنى چوڭقۇر ئىپادىلەپ تۇرۇپتۇ. ئۆز يۇرتقا ،ئۆزىنىڭ ئۆيىگە نىمە يەتسۇن.