(bilgejan) ئۈچ ئۇيغۇر يىگىتنىڭ ئامېرىكا چۈشى سەپىرى

bilgejan

ئامېرىكىدىكى ھاياتىمدىن تەرمەچلەر (2) - ئۈچ ئۇيغۇر يىگىتنىڭ ئامېرىكا چۈشى سەپىرى (داۋامى)

بىزنىڭ «ئامېرىكا چۈشى»مىز ھەرگىزمۇ قانداقتۇر بىر غايىۋانە ئىنتىلىشلەر ئاساسىدا شەكىللەنمىگەن، بىزنىڭ ئامېرىكا ئۇنىۋېرستېتلىرىنى ئەڭ ياخشى تاللاش دەپ قارىشىمىزدا بىز قايىل بولغۇدەك ياخشى سەۋەبلەر بار. ئامېرىكىدا دوكتورلۇقتا ئوقۇش دۇنيانىڭ ھەر قانداق يېرىدىكىدىن پەرقلىنىدىغانلىغى ئامېرىكىغا كېلىشتىن بۇرۇنلا بىزگە خىلى تونۇشلۇق ئىدى. ئامېرىكىغا كەلگەندىن كىيىن ئامېرىكا ئاسپىرانتلار مائارىپىنىڭ نۇرغۇن تەرەپلىرى بىزنى قاتتىق ھاڭ-تاڭ قالدۇرغان ۋە ئىلگىرى كاللىمىزدا ئويلىۋالغان بىر قىسىم قاراشلىرىمىزنى شىددەت بىلەن پاچاقلاپ تاشلىغان بولسىمۇ، ئەمما بۇ بىزنىڭ ئامېرىكا مائارىپنى تۆۋەن كۆرۈپ قالغانلىقىمىزدىن بولدى. ئۆزۈمنى ئىلىپ ئېيتسام، ئامېرىكىدا دوكتورلۇقتا ئوقۇشۇمنى باشلىغان تۇنجى يىلى ئوقۇشنىڭ تەسلىكى ۋە تۇرمۇش ئىلىپ كەلگەن روھىي بېسىم مەن كۈتكەندىن كۆپ يۇقىرى بولغانلىقىنى ھېسابقا ئالمىغاندا، باشقا بارلىق ئىشلاردا مەن ئارزۇ قىلغان بۇ ئوقۇش كۈتكىنىمدىن نەچچە ھەسسە بەكرەك كىشىنى رازى قىلىدىغان بولۇپ چىقتى.
ئويلاپ بېقىڭ:

ئامېرىكىدىن باشقا يەنە قايسى دۆلەتتە 4 يىللىق تولۇق كۇرسنى پۈتتۈرۈپ بولسىڭىز بىۋاستە دوكتۇرلۇق ئوقۇشىغا كىرگىلى بولىدۇ؟

قايسى دۆلەتتە بىر تەبئىي پەن فاكۇلتېتىدىكى ئوقۇغۇچىلارنىڭ يېرىمىدىن كۆپرەكى چەتئەللىك كەلگەن ئوقۇغۇچىلار ۋە ئۇلارنىڭ مۇتلەق كۆپ قىسمى تولۇق ئوقۇش مۇكاپات پۇلىدىن بەھرىمان بولۇپ ئوقۇيدۇ؟

قايسىبىر دۆلەتتە سىز ئامېرىكىدىكىدەك چەتئەللىك بولغانلىقىڭىز ياكى دىننىي ئېتىقادىڭىز، مىللىي كىملىكىڭىز تەرىپىدىن ئاشكارا (ياكى يوشۇرۇن) كەمسىتىلىشكە ئۇچرىماي بارچە ئىنسانىي ھوقۇقلىرىڭىز مۇتلەق كاپالەتكە ئىگە بولغان ئاساستا ئوقۇيالايسىز؟

يەنە قانچىلىك كۆپ دۆلەتلەردىكى ئۇنىۋېرسىتېت كۈتۈپخانىلىرىدا جۈمە نامىزى ئوقۇلىدۇ؟! تۈركىيەدىمۇ؟ ياۋروپادىمۇ؟ ياپونىيەدىمۇ؟

يەنە قايسى دۆلەتتىكى مۇتلەق كۆپ سانلىق ئاسپىرانت ئوقۇغۇچىلار ئوقۇش جەريانىدا ئىقتىسادتىن غەم قىلماي، ئىشلەيمەن دەپ يۈرمەي پۈتۈن زېھنى بىلەن ئوقۇش ۋە تەتقىقاتلىرىغا كىرىشەلەيدۇ؟

يەنە قانچىلىك دۆلەتتە بىر ئۇيغۇر ئوقۇغۇچى مېنى ئىسمىم پاسپورتىمغا خاتا يېزىلىپ قالغان، دوكتۇرلۇق دىپلومىغا مەن ئۆزۈم ئارزۇ قىلغان ئىسمىمنى يېزىپ بەرمىسەڭ مېنى كەمسىتكەن بولىسەن دەپ (ئۇششۇقلۇق قىلىپ) كىنىشكا-ھۆججەتتە دېيىلگىنى بويىچە ئەمەس، بەلكى ئۆزى خالىغىنى بويىچە ئىسمىنى يازغۇزالايدۇ؟

قايسى دۆلەتلەردە دوكتورلۇقتا ئوقۇۋېتىپ سىز بۇرۇن كەم قالغان ياكى ياخشى ئۆگىنەلمىگەن دەرسلىرىڭىزنى ناھايىتى چوڭقۇرلاپ ئوقۇش ۋە ئۆزى قىزىققان ساھەدە ئۆزىڭىزنى تولۇقلاش پۇرسىتىگە ئېرىشەلەيسىز؟

قايسى دۆلەتتە سىز ئوقۇش جەريانىدا پەرزەنتلىك بولسىڭىز بالىڭىز تۇغۇلغان دۆلەت پەزرەنتىڭىزنى ئۆز قوينىغا ئىلىپ ئۆز پۇقراسى دەپ بىلىپ قوغدايدۇ ۋە ئاسرايدۇ؟

قايسى دۆلەتلەردە بىر قىز ئوقۇغۇچىنىڭ يۈزىنى قىزارتىدىغان چاقچاق قىلغان ئەر خىزمەتدىشى ياكى ساۋاقدىشى مەكتەپتىن قوغلىنىپ شۇ قىز ئوقۇغۇچى ئوقۇشىنى ھېچبىر تەھدىت ياكى خالىمىغان ئاۋارىچىلىقتىن خالىي ھالدا ئوقۇشىنى داۋاملاشتۇرالايدۇ؟

قايسى دۆلەتلەردە يەرلىك خەلقلەر سىزگە بىرەر قېتىم «چەتئەللىك» ئىكەنلىكىڭىزنى بىلىندۈرمەي مۇئامىلىدە بولۇپ سىزگە باشقا يەرلىك دوستلىرىغا ئوخشاش مۇئامىلىدە بولىدۇ؟  

قايسىبىر تەرەققىي تاپقان دۆلەتتە ئۇيغۇردىن تەبئىي پەندە پىرافىسور، ئالىي ئىنژىنىر ۋە دۇنياۋى داڭلىق ئۇنىۋېرستىتلاردا ئىشلەيدىغان تەتقىقاتچىلار چىقىپ باقتى؟

دەپ كەلسەم بۇ تىزىملىككە يەنە نەچچە ئون قۇرلار ياكى بەتلەرنى قوشۇۋىتىشىم مۇمكىن. يۇقىرىدىكى سوئاللىرىمغا ئامېرىكىدىن بۆلەك ھەر قانداق دۆلەتنى كۆرسىتەلمەيسىز! بەلكىم بۇ سوئاللارنىڭ بىر ياكى بىر قانچىسىگە يەنە بىر دۆلەتنى مىسال قىلسىڭىزمۇ ھەرگىز ھەممىسىگە ئەمەس. يەنە نۇرغۇنلىغان ئىشلاردا تەرەققىي تاپقان ئەللەر ئىچىدە ئامېرىكا يىگانە ھالدا ئۇيغۇرلار ئۈچۈن ئەڭ جەلىپ قىلىش كۈچىگە ئىگە دۆلەت بولۇپ تۇرماقتا. ئاددىيسى، نېمە ئۈچۈن تور دۇنياسىدىكىلەر ئوبدان بىلىدىغان روسىيە، ياپونىيە ۋە باشقا دۆلەتلەردە دوكتورلۇقتا ئوقۇغان ئەڭ سەرخىللىرىمىز ۋە داڭلىقلىرىمىز ئامېرىكىغا كىلىپ يىغىلىپ قالدى؟ سىزنىڭچە ئۇ كىشىلەر ئەخمەقلەرچە ئامېرىكىغا كىلىپ قالغانمۇ؟ ياق، ئەلۋەتتە ئۇنداق ئەمەس! مېنىڭچە ئامېرىكا دۇنيادا بىلىملىكلەر ئۈچۈن يىگانە ھالدا ئەڭ ئادىل رىقابەت، تەرەققىيات ۋە مۇۋاپىقىيەت قازىنىش پۇرسىتى يارىتىپ بېرەلەيدىغان بىر جەمئىيەت بولغانلىقى ئۈچۈن ئۇلار ئامېرىكىنى تاللىغان. نۆۋىتى كەلگەندە «ئامېرىكىدىكى ھاياتىمدىن تەرمەچلەر» نامىدىكى بۇ خاتىرەمنىڭ كىيىنكى قىسىملىرىدا يۇقىرىدا دېگەنلىرىمنىڭ ھەممىسىگە ئەمەلىي مىساللارنى كۆرسىتىمەن. ھازىر دېمەكچى بولغىنىم بىز ئۈچ دوستنىڭ ئامېرىكىدا ئوقۇش ئۈچۈن شۇنچە يۇقىرى قىزغىنلىقتا بولۇشىمىز ۋە رىيازەتلىرىنى چېكىشىمىز ھەرگىزمۇ ھەيران قالارلىق ئىش ئەمەس، ئەكسىچە ئەسلى شۇنداق قىلىشنى تاللىمايدىغان سىتۇدېنتلىرىمىزدىن ھەيران قىلىشقا تىگىشلىك! گەرچە شىئەندىكى سەپىرىمىز ۋە ئەمدى بايان قىلماقچى بولغان ھېكايىلىرىمدە ئوقۇرمەنلەرگە ئاشكارا بولىدىغان  مەزمۇنلار بەلكىم بىزنىڭ ئامېرىكىدا دوكتورلۇقتا ئوقۇشنى قولغا كەلتۈرۈش ئۈچۈن ساراڭلارچە قىزغىنلىق بىلەن كىرىشىپ نۇرغۇن جاپالارنى تارتقاندەك تەسىر بېرىشى مۇمكىن. ئەمما ئىش ئەمەلىيەتتە ئۇنداق ئەمەس چۈنكى ئىنسان ئۆز ئارزۇسى، غايىسى ئۈچۈن قانچىلىك قىيىنچىلىقلارغا، بېسىملارغا دۇچ كەلسىمۇ، شۇ ئارزۇغا يېتىش يولىدىكى قۇربانلىق بېرىشلەر ھەرگىزمۇ جاپالىق بىلىنمەيدۇ، بەلكى ناھايىتى ھوزۇرلۇق بىلىنىدۇ. ھېچبولمىغاندا مەقسەتكە يېتىپ بىر ئەرزىيدىغان ئىش ئۈچۈن شۇ قىيىنچىلىقلارنى باشتىن كەچۈرگەنلىكىڭىزنى ئويلىغىنىڭىزدا تېخىمۇ شۇنداق.

شۇنداق قىلىپ ئامېرىكا مەكتەپلىرىنىڭ ئاسپىرانتلىق پروگراممىلىرىغا ئىلتىماس قىلىشنى تاللىغانلىقىمىز شىئەندىكى كۈنلەردە ئەمەلىي بىر ئىش بىلەن رەسمىي مۇقىملاشقان بولدى. بىز GRE ئىمتىھاننىڭ كومپىيۇتىدا ئېلىنىدىغان يېزىقچىلىق ئىمتىھانىنى بەرگەن ۋاقتىمىزدا نەق مەيداندا ئاسپىرانتلىققا ئىلتىماس قىلماقچى بولغان چەتئەلدىكى مەكتەپلەر ۋە فاكۇلتىتلارنىڭ ئىسمىنى كىرگۈزۈشىمىز تەلەپ قىلىنىدىكەن، شۇنىڭ ئۈچۈن شۇ ئالدىراش ئۆگىنىش داۋامىدا بىز يەنە ۋاقىت چىقىرىپ كەلگۈسىدە ئىلتىماس قىلماقچى بولغان مەكتەپتىن ئاز دېگەندە تۆتنى شۇ ۋاقىتتىلا بېكىتىشىمىزگە توغرا كەلدى. دەپ كەلسەم بۇ ئىش داۋامىدىكى ئىككىلىنىشلىرىمىز، ئىزدىنىشلىرىمىز ئاز ئەمەس، ئەمما چوقۇم دېمىسەم بولمايدىغىنى ئۈچەيلەننىڭ شۇ ۋاقىتتىكى پوزىتسىيىسى. ئۇتۇق بۇرۇنلا ئامېرىكىدا ئوقۇشنى ئويلاپ كېلىۋاتقان بولغاچقا ئۇ نۇرغۇن مەكتەپلەرنىڭ تور بېتىگە كېرىپ مەكتەپلەرنى چۈشىنىش بىلەن بىرگە ئۇلارنىڭ ئادەتتىكى مەكتەپكە قوبۇل قىلىش شەرتلىرى ۋە خەلقئارالىق ئوقۇغۇچىلار (شۇ مەكتەپ ئورۇنلاشقان دۆلەتتىن باشقا دۆلەتتىن كەلگەن ئوقۇغۇچىلار، يەنى چەتئەللىك ئوقۇغۇچىلار) غا قويۇلىدىغان تەلەپلەرنى تەپسىلىي كۆرۈپ چىقىپ ئۆزى ئوقۇشنى ئارزۇ قىلىدىغان مەكتەپلەر تىزىملىكىنى ناھايىتى تۈجۈپىلەپ تۈزۈپ چىققان ئىكەن. ئۇ ئۆزى كىرەلمەسلىكىم مۇمكىن، ئەمما بىر سىناپ باقمىسام ئارماندا قالىمەن دەيدىغان ئەڭ نوچى مەكتەپلەردىن 5-4 نى،  قوبۇل قىلىنىش ئېھتىمالىم بىر قەدەر يۇقىرى دەپ قارىغان ياخشى مەكتەپلەردىن 5-10نى ۋە ئۈستىدىكى تىزىملىكتىكى مەكتەپلەرنىڭ ھېچقايسىسىغا كىرەلمەي قالسام دەپ «زاپاس پىلان» غا يەنە 4-5 مەكتەپنى تىزىملاپ بىر ھۆججەت تۈزۈپتۇ. بۇ ھۆججەتكە شۇ مەكتەپلەرنىڭ ئىلتىماس قىلىش ۋاقتى توشىدىغان ئاخىرقى كۈن، مەكتەپنىڭ شۇ دۆلەتتىكى ئۇنىۋېرسىتېتلار قاتارىدىكى دەرىجىسى، مەكتەپنىڭ تولۇق كۇرستىكى ئوقۇش نەتىجىسىگە بولغان ئەڭ تۆۋەن تەلىپى، TOEFL ئىمتىھانى ئەڭ تۆۋەن نومۇر چېكى ۋە GRE ئىمتىھانىدىكى قوبۇل قىلىنغا ئوقۇغۇچىلارنىڭ ئوتتۇرىچە نومۇرى (چۈنكى بۇ ئىمتىھانغا كۆپىنچە مەكتەپلەر تۆۋەن چەك قويمايدۇ) قاتارلىقلارنى رەتلىك تېزىپ چىقىپتۇ. گەرچە مەنمۇ بىر مەخسۇس چەتئەلگە ئىلتىماس قىلىشقا دائىر مۇھىم ئۇچۇرلارنى تىزىملاپ ماڭدىدىغان يېنىمدىن ھەر ۋاقىت ئايرىمايدىغان يانچۇق خاتىرەمگە مۇشۇنداقراق ئۇچۇرلارنى تىزىملاپ ماڭغان بولساممۇ، ئۇتۇقنىڭكىدەك تەپسىلى، رەتلىك بىر جەدۋەل تۈزۈپ ماڭمىغاچقا، ئۇتۇقنىڭ شۇنچىلىك ئىنچىكە ۋە ئىدىتلىق ئىش قىلىشىغا قاراپ ھەيران قالغان ئىدىم. ئەمدى گەپنىڭ قىززىقى ئابلەتكە مەركەزلىشىدۇ. بىلگىنىڭلاردەك بۇ كۈنلەردە ئابلەت چەتئەلدە ئوقۇشنى ئويلاشقىنىغا تېخى ئەمدى بىرەر ئاي بولغان ۋاقىتلار، شۇڭىمۇ ئابلەتنىڭ پوزىتسىيىسى ئاجايىپ ئۆزگىچە بولدى.

داۋامى بار...

zubayir007

داۋامىنى ئوقۇشقا ئىنتىزارمەن ،رەھمەت سىزگە،ئاالا ئەجرىڭىزنى بەرسۇن.

zubayir007

داۋامىنى ئوقۇشقا ئىنتىزارمەن ،رەھمەت سىزگە،ئاللا ئەجرىڭىزنى بەرسۇن.

ablimitt

تىمىڭىزنى ئۇقۇپ پىژ-پىژ قىلىپ كۈيىۋاتىدۇ بۇ ئوت، ئىنگىلىز تىلى دىگەننى يا ئۈگەنمەپتۇق، بالىغا ئۈگەتكەچ تۇرساق 15 كۈنلۈك ۋىزىدىن بىرنى ئىلىپ زاۋۇت-كارخانىلېرىنى كۆرۇپ كىلىش نىسىپ بۇپ قالار...
ئۇيان سالامەتلىكىمنىڭ ياخشى بۇپ كەتمىگىنى، زۇكام بولغىلىمۇ ئۈچ كۈن بۇپ قاپتۇ، شورپا ئىچىپ تەرلىسەم ئوڭشىلارمەن دىسەم سۇغا سالغان قوي گۈشىمۇ ئىسسىق كىتىپتۇ ئەمەسمۇ...
بىر بولسا سوق ، بىر بولسا ئىسسىققا ئۈتۈپ تەڭشىلىدىغاندەك ئەمەس...

bilgejan

شىئەندىكى ئىمتىھانغا ئاز قالغان كۈنلەرنىڭ بىرىدە ھېلىقى «دەڭ» دە ئابلەت ئۆزى تاللىماقچى بولغان مەكتەپلەرنى مېنىڭ مەسلىھەتىمگە سېلىپ ئولتۇراتتى. ئۇنىڭ ئاجايىپ قاراشلىرىنى ھە دەپ ئاڭلاۋاتىمەن، ئەمدى يېڭى قەدەم باشلىغانلىغىنى چۈشەنگەچ ئەسلى ئۇنىڭ قىزغىنلىق روھىغا سوغۇق سۇ سېپىپ قويماي دېگەن، لىكىن ئاخىرى بولمىدى.

-تۇرسۇنجان، مەن تۆت مەكتەپنىڭ ئىچىدىكى ئۈچىنى تاللاپ بولدۇم، قالغان بىرسىنى سەن بىر تەۋسىيە قىلىۋەتمەمسەن؟ دەپ گەپ باشلىغان ئىدى ئابلەت.

-قايسىلىرىنى تاللىدىڭ؟

-ھازىرچە MIT (ماسسا چۇسېتىس تېخنىكا ئىنىستىتۇتى)، UCSF (كالىغورنىيە ئۇنىۋېرستېتى-سان فىرانسېسكو )، Yale (يەيىل ئۇنىۋېرستېتى) ئۈچىنى تاللىدىم (بۇ مەكتەپلەر دۇنيادىكى ئەڭ مەشھۇر مەكتەپلەردىن بولۇپ، ئامېرىكىدا تەتقىقات سەۋىيىسى ھاياتلىق پەنلىرىگە ئائىت ئاسپىرانتىلىق كەسپىلىرىنىڭ كۆپىنچىسىدە 1-5 ئورۇندا تۇرىدۇ). خارۋاردنى تازا ياقتۇرمىدۇم.

ما قاراملىقنى كۆرۈڭ! مەن ئۇ ۋاقىتلاردا ئامېرىكا ئۇنىۋېرستېتلىرى ئىچىدىكى ئالدىغا تىزىلغان ئەڭ داڭلىق 150 ئۇنىۋېرستېتنىڭ ئەھۋالى ۋە ئوقۇغۇچى قوبۇل قىلىش شەرتلىرىنى بىر قاتار تەكشۈرۈپ بولغان بولغاچقا، ئابلەتنىڭ بۇ تىزىملىكىدىن چۆچۈپ كەتتىم. گەرچە ئامېرىكا تولۇق كۇرس مائارىپىدا مەكتەپلەر ئارىسىدا خىلى زور پەرقلەر مەۋجۇت بولسىمۇ، ئەمما ئاسىپىرانتلىققا كەلگەندە ئىش ئوخشىمايتتى چۈنكى خارۋاردتىكى پىرافىسورلار ئىچىدىمۇ تەتقىقات سەۋىيىسى ئامېرىكىدىكى ئادەتتىكى سانالغان مەكتەپلەردىكى پىرافىسورلارغا يەتمەيدىغان ئاز بىر قىسىملار بار بولغان بولسا، 200-ئورۇنغا تىزىلغان مەلۇم مەكتەپتە دۇنيادىكى ئەڭ يۇقىرى تەتقىقات سەۋىيىسىگە ئىگە پىرافىسورلارنىڭ بولۇشىمۇ كىشىنى ھەيران قالدۇرمايتتى. شۇنداق بولغاچقا، ماگىستىر ۋە دوكتۇر ئاسپىرانىت ئوقۇغۇچىلارغا نېسبەتەن ئەڭ مۇھىمى مەكتەپنىڭ نام-شۆھرىتى ئەمەس، بەلكى قايسى پىرافىسوردا ئوقۇش ۋە مەكتەپنىڭ شۇ كەسىپتىكى تەتىقىقات سەۋىيسىگە قاراش ئەڭ ئاقىلانىلىك ئىدى. شۇنداقتىمۇ، نامى چىققان مەكتەپلەرنىڭ ئوقۇغۇچى قوبۇل قىلىش شەرتلىرى بەكلا يۇقىرى بولغاچقا، ئىلتىماس قىلغۇچىلار ئارىسىدىكى رىقابەت ناھايىتى كەسكىن بولاتتى. شۇنى بىلگەنلىكىم ئۈچۈن ئابلەتنىڭ دېگەنلىرى رىئاللىقتىن تولىمۇ يىراق بىلىنسىمۇ ئۇنىڭ بۇ خىل ئۆزىگە بولغان ھەددىدىن زىيادە ئىشەنچى ۋە يۇقىرىغا ئىنتىلىش روھىغا قارشى چىققۇم كەلمىدى. داۋاملىق ئۇنى گەپكە سالدىم:

-ھەممىسى بەكلا كاتتا مەكتەپلەركەن، خارۋارد يارىماپتۇ، دە؟

-قويە خارۋادنى ئاغىنە. تور بېتىنىمۇ ياقتۇرمىدىم، ئۇچۇرلارنى تېپىشمۇ تەسكەن. ئۇنىڭ ئۈستىگە ئىلتىماس ھەققىنىڭ قىممەتلىكى، تېخى ئىلتىماس قىلغۇچىلارغا ئوبدان ئويلىشىپ ئىلتىماس سۇنۇش توغرىىسدا شۇنداق ئاقسا گەپلەرنى چىقىرىپ قويۇپتۇ. MIT دەك بولسا بولمامدۇ، دەيمەن؟ مېنىڭ بىرىنچى ئارزۇيۇم MIT غا كىرىش.

-ھە مۇنداق دە. ئەمىسە يەنە بىرىگە ئۇنچىۋالا ئالدىدىكى مەكتەپلەرنى تىزىۋالمىساڭ ياخشىمىكىن.

-ئوقۇغاندىكىن داڭلىق مەكتەپلەردە ئوقۇمامدۇ دەيمەن. قېنى دېگىنە، پەچەت مەكتەپلەردىن يەنە قايسىسى بار؟

-سەنچە كورنېل ( Cornell University) بولامدۇ؟ بەكلا ياخشى مەكتەپ، كۆپىنچە كەسىپلىرى ئالدىنقى 10-نىڭ ئىچىدە، دېدىم مەن-نىيۇيورك شىتاتىدىكى گۈزەل شەھەر ئىتاكاغا جايلاشقان بۇ قەدىمىي داڭلىق ئۇنىۋېرستېتنى تەۋسىيە قىلىپ.

-توختاپ تۇر، ھە- دېدى ئۇ، ساقلىۋالغان مەكتەپ ئۇچۇرلىرىنى ئاختۇرغاچ- بۇ مەكتەپ ئاران 15-گە تىزىلپتۇغۇ... تۈزۈكرەك مەكتەپلەرنى دېمەمسە؟

ئوھ، ما گەپنىڭ كۆرۈڭ. ئۆزۈمنى راست گەپنى دەپ تاشلاشتىن ئاران-ئاران تۇتۇۋېلىپ، ئۇنىڭغا دېدىم:

-ئەمىسە، دىيۇك (Duke University) بولامدۇ؟

-ياقەي، بۇ مەكتەپمۇ ئوننىڭ ئىچىگە ئاران كىرىدىكەن. يەنىلا پىرېنسىتون (Princeton University) نى تاللايمىكىن!

ئەمدى قەتئىي تاقەت قىلالمىدىم. ئۇ تاللىسىغۇ مەيلى ئىختىيارى. ئەمما مەن بىلىپ تۇرۇپ، دوستۇمنىڭ كىيىن بىر مۇنچە ئوشۇق پۇل خەجلەپ كېتىشىگە قاراپ تۇرالمايتتىم ھەم ئۇنىڭ بۇ خىل ھېچنېمىدىن خەۋەر يوق غالىپلارچە ئىلتىماس قىلىش پوزىتسىيىسى ھامان ئۇنىڭغا بىر مۇنچە ئۈمىدسىزلىكلەرنى ئىلىپ كىلەتتى. ئىمتىھان ۋاقتىدا تاللايدىغان بۇ تۆت مەكتەپكە ئىمتىھان نەتىجىلىرى چىقسىلا ئاپتوماتىك ھالدا ھەقسىز ئەۋەتىپ بېرىلەتتى. ئەمما ئۇنىڭدىن ئارتۇق مەكتەپلەرگە ئىلتىماس قىلغان ۋاقتىڭىزدا بىر ھەر بىر قېتىملىق نەتىجە ئۈچۈن ETS (ئامېرىكا ئىمتىھان مۇلازىمىتى مەركىزى) بىلەن ئالاقىلىشىپ ھەر بىر مەكتەپكە نەتىجىنى ئەۋەتكۈزۈش ئۈچۈن $50 تۆلەشكە توغرا كېلەتتى. بۇنداق داڭلىق مەكتەپلەرنىڭ ئىلتىماس سۇنۇش ھەققى $100 ئەتراپىدا بولۇپ، ئىمكانقەدەر ئىقتىسادچىل بولۇشىمىزغا توغرا كىلەتتى. شۇڭىمۇ، ئەمدى راست گەپنى قىلىۋەتتىم:

-سەن بۇ مەكتەپلەرگىلا ئىلتىماس قىلساڭ كىيىن ئۈمىدسىزلىنىپ قىلىشىڭ مۇمكىن. ئەڭ ياخشى ئەمەلىيەتچان بولغىن. سەن تاللىغان مەكتەپلەرگە كىرىش ئۈچۈن باشقا شەرتلەرنى قويۇپ تۇرايلى، ئاددىيسى مۇشۇ بىز بەرمەكچى بولغان GRE دا 1400 دىن يۇقىرى نومۇر ئېلىشىڭغا توغرا كېلىدۇ (تولۇق نومۇر 1600 ئىدى). ھازىرقى تەييارلىقىمىز بىلەن بىز بۇنداق نومۇر ئالالمايمىز.

-نېمە دەيدىغانسەن؟ مۇشۇ يولداشلار جىنىدا ئالىدىكەنۇ، بىز نېمە دەپ ئالالمايمىز؟!! مەن 1500 نومۇر ئىلىۋىتىشىم مۇمكىن.

-ئاپلا، سەن تېخى بىرەر يۈرۈش ئىمتىھان سوئالىنىمۇ تولۇق ئىشلەپ باقمىغان ئوخشىمامسەن، نېمە؟ ئۇنداق بولسا ئىككىمىز تىكىشەيلى: ئەگەر سەن 1400 ياكى ئۇنىڭدىن بىر نومۇر يۇقىرى ئالالىساڭ، مەن سېنى بىر كۈن ئۆزۈڭ خالىغان يەردە مېھمان قىلىپ، خالىغان جايدا ئوينىتاي. ئەگەر ئۇنداق قىلالمىساڭ سەن شۇنداق قىلغىن. قانداق؟

-ئەكە، قولۇڭنى. تىكىشتۇق!

ئاجايىپ چاغلار ئىدى، دە... كىين ئامېرىكىدا كۆرۈشكىنىمىزدە ئابلەتكە مەنىلىك قىلىپ «ئاداش يەنە تىكىشەمدۇق؟» دەپ قويسام، ئۇ كۈلۈپ كېتىپ «ياق، بولدى. تىكىشمەيلى» دېگەن ئىدى. بۇ يەردە قانداقتۇر يىقىن دوستۇم ئابلەتكە سەلىبىي باھا بەرمەكچى ئەمەسمەن، بەلكى بىزنىڭ ئىلتىماس قىلىش جەريانىمىزدىكى بۇ رىئال ئىشلار ئارقىلىق كۆپ قىسىم ئامېرىكىدا ئوقۇشقا قىزىقىدىغان ياشلاردا ناھايىتى ئومۇميۈزلۈك كۆرۈلىدىغان بىر ئۆتكۈنچى پىسخىك ھالەتنى يورۇتۇپ بىرىشنىلا ئويلىدىم. ھازىرغىچىمۇ نۇرغۇن ياش سىتۇدېتنلىرىمىز ماڭا ۋە دوستلىرىمغا خەت يېزىپ ئۆزلىرىنىڭ دۇنيادىكى ئەڭ داڭلىق ئۇنىۋېرستېتلاردىن خارۋاردتا، يەيىلدا ۋە ياكى كولومبىيەدە ئوقۇغۇسى بارلىقىنى ئېيتىشىدۇ، لېكىن قارىسىڭىز ئۇلارنىڭ تولۇق كۇرس نەتىجىلىرى 80دىنمۇ ئاشمىغان. باشقا ئىمتىھان نەتىجىلىرىمۇ ئادەتتىكىچە بولغاننىڭ ئۈستىگە ھېچقانداق تەتقىقات تەجىرىبىسىمۇ يوق دېيەرلىك. بۇنداق ئەھۋالدا بۇ ئارزۇلارنى پەقەت شىرىن خىيال دېمەكتىن باشقا ئامال يوق.

نېمىلا بولمىسۇن، بىز ھەممىمىز پەقەت ئامېرىكا ئۇنىۋېرستېتلىرىنى ئىلتىماس قىلىش نىشانى قىلىپ بېكىتكەن ئىدۇق. شۇنداق قىلىپ 9-ئاينىڭ بېشىدا شىئەندىن ئۈرۈمچىگە قايتىپ كەلگەندىن كىيىن بىز ناھايىتى جىددى ھالدا شۇ يىلى 10-ئاينىڭ 25-كۈنىدىكى شىنجاڭ ئۇنىۋېرستېتىدا بەرمەكچى بولغان GRE نىڭ قەغەزچە ئىمتىھانىغا تەييارلىق قىلىشقا چۈشۈپ كەتتىم. بۇ ۋاقىت مېنىڭ ماگىسترلىق ئوقۇشۇمنىڭ 3-يىلى بولۇپ قالغاچقا بىر تەرەپتىن تەجىرىبە ئىشلىشىمگە توغرا كەلسە، يەنە بىر تەرەپتىن يىتەكچىم ئىلمىي ماقالەمنى يېزىشنى باشلىمىغانلىقىمنى ئەيىپلەپ كۈندە سۈيلەپ تۇراتتى. مېنىڭ يازغۇم يوق ئەمەس، مەسىلە نېمىنى يازىمەن؟ گەپنى يىپىپلا دېسەم، شۇ ۋاقىتلاردا بىز تەتقىقات دەپ ئاتىۋالغان «ئەڭ ئەرزان تەجرىبە دورىلىرى بىلەن ئەڭ ياخشى نەتىجە چىقىرىمىز» شوئارى ئاستىدىكى دۇنيانىڭ باشقا يەرلىرىدە بىر ئايدا تاماملاپ بولغىلى بولىدىغان تەجىرىبىنى ناچار دورا، ناچار تېخنىكىلار بىلەن بىر يىل ھەپىلىشىپمۇ چىققان نەتىجىگە ئادەم ئۆزىنىمۇ ئىشەندۈرەلمىگۈدەك شۇ نەتىجىلەرنى ئوقۇش پۈتتۈرەلمەيمەن دېمىسە كىشىنىڭ ماقالە قىلىپ يازغۇسىمۇ كەلمەيتتى. ياخشى يېرى 9-ئاينىڭ ئاخىرىلىرىدا يىتەكچىم بىر ئايغا يىقىن دالا تەكشۈرۈشكە چىقىپ كەتتى. تەلىيىمگە ئۇ ۋاقىتلاردا مەن تەجىرىبخانىنىڭ چوڭى بولۇپ قالغاچقا يىتەكچىم ئىشخانىسىنىڭ ئاچقۇچىنى بىرەر ئىش بولۇپ قىلىپ كىرىشكە توغرا كەپ قالسا دەپ ماڭا تۇتقۇزۇپ ماڭغان ئىدى. ئەلۋەتتە،  مەسئۇلىيەتچان بولغانلىقىم ئۈچۈن يىتەكچىم قاقشاپ قويغان بىلەن يەنىلا ماڭا ئىشىنەتتى ۋە ۋەزىپىلەرنى دائىىم ئىشەنچلىك ھالدا ماڭا تاپشۇراتتى. تەتقىقاتتىكى ئوڭۇشسىزلىقلار تۈپەيلى بۇ يىتەكچى ئوقۇتقۇچۇمدىن دېگەندەك رازى بولمىغىنىم بىلەن ئۇنىڭ قىلىۋاتقان تەتقىقات ساھەسى مەن ئۈچۈن يەنىلا ناھايىتى قىزىقارلىق بىلىنەتتى ۋە ئۇنىڭ مېنى دەسلەپ تەتقىقاتقا قىزىقتۇرۇپ باشلاپ كىرگەنلىكى ئۈچۈن ئۇنى ھۆرمەتلەيتتىم. شۇنداق قىلىپ مەن ھەر كۈنى سەھەر 6:00 لەردە ناشتىلىقىمنى، كىتاب ۋە باشقا لازىمەتلىكلەرنى شۇ ئىشخانىغا ئەكىرىۋىلپ ئاچقۇچنى دوستۇمغا تۇتقۇزاتتىم. چۈشلۈك تامىقىمنى ئەكىرىپ بېرىشىنى، ئارىلىقتا سىرتقا چىقىش زۆرۈر بولۇپ قالسا ئۇچۇر قىلىدىغانلىقىمنى تاپىلاپ ئىشكنى تېشىدىن قۇلۇپلاتقۇزاتتىم. تېلېفۇنلار ئېتىك، مېنى ئاۋارە قىلىدىغانلاردىن ھېچكىم قەيەردىلىكىمنىمۇ بىلمەيتتى. شۇ كۈنلەردە ئۇ ئىشخانىدا يۈز بەرگەن بىر قىزىقارلىق ۋەقە ھازىرمۇ ئەينەن ئېسىمدە:
ماڭا كۈندە چۈشلۈك تاماق توشۇيدىغان دوستۇم بىر كۈنى مەن ياخشى كۆرىدىغان تاماقلارنى ئىلىپ كىرىپ ئىشخانىدىكى چىرايلىق ئۈستەل ئۈستىدە داستىخاننى راسلاۋاتتى، بىرى «قارا!» دېگەندەك بولۇپ ئىتتىكلا قارىسام مۇئەللىمنىڭ ئىشخانىسىدىكى ئىدىشتا ئۈچەككە كىرگەن كىچىك بالىنىڭ بىلىكىدەك توملۇقتىكى چار يىلان ئىشىكنىڭ تۈۋىدە بېشىنى ئېگىز كۆتۈرۈپ ماڭا قاراپ تۇرۇپتۇ! نېمىشقىدۇر يىلان مەن ئۈچۈن ئەڭ سۈرلۈك ھايۋان ئىدى. تېنىم جۇغۇلداپ كەتتى، قانداق قىلىشنى بىلمىدىم، ئەمما چاندۇرماي دوستۇمنى دېرىزىنى ئېچىۋىتىشكە بۇيرۇپ (ئۇ قىز يىلاننى كۆرسە قورقۇپ ۋارقىراپ-چىرقىراپ كېتىشى تۇرغانلا گەپ) دەرھال بىر ئامال ئويلاشنى قارار قىلدىم. ئەمما چىرايىمدا قان قالمىغىنىنى كۆرۈپ ئۇ نېمە بولدى دەپ سوراۋىتىپ يىلاننى كۆرۈپ قالدى، ۋە ئويلىغىنمدەك ۋاقىراپ كەينىمگە ئۆتۈۋالدى. ھەرگىز قورقماڭ دەيمەن-يۇ، ئىچىمدە ئۆزۈم بىلىمەن. يىلان بىزگە بىر ھازا قارىۋىتىپ بىر قانىتى ئوچۇق ئىشىكتىن تېشىغا ماڭدى. ئەمدى قانداق قىلغۇلۇق؟ بۇ يىلاننى چارقىلىقلىق بىئولوگىيە فاكۇلتېتدىكى بىر ئوقۇغۇچى مەكتەپ ئالدىدا كۆرۈپ قىلىپ تۇتۇۋىلىپ يىتەكچىمگە تاپشۇرۇپ بەرگەن ئىكەن. ئاندىن ئۇ ئىشخانىسىدىكى بىر قارا راڭلىك پىلاستىك ئىدىشقا يىلاننى ۋاقتىنچە سولاپ قويغان ئىدى. چاتاق يېرى بۇ يىلان بۇ ئوقۇتۇش بىناسىنىڭ ئىچىدە غايىپ بولسا ناھايىتى قورقۇنچلۇق ئەھۋال كىلىپ چىقىشى مۇمكىن ئىدى. ئالاقىزادىلىك ئىچىدە يىلانغا ئەگەشتىم، يىلان كارىدوردىن چىقىپ ئۇدۇلدىكى پەلەمپەي تەرەپكى مېڭىۋىدى مەن دەرھال يان ئىشىكتىكى تەجىرىبخانىمىزدا بىرەرسىدىن ياردەم سوراي دەپ يۈگۈرۈپ كىرسەم، مەندىن بىر قارار تۆۋەن يىللىقتا ئوقۇۋاتقان ئىككى قىز ساۋاقدىشملا بار ئىكەن ئۈمىدسىزلىنىپ كەتتىم. ئەمما ئىلى دەرياسى بويىدا چوڭ بولغان ساۋاقدىشىم گۈلمىرە ئۆزىنىڭ دائىم يىلان باقىدىغانلىقىنى ئېيتقاچ تەجىرىبخانىدىكى خالاتلاردىن بىر نەچچىنى قولۇمغا تۇتقۇزۇپ ماڭا ئەگەشتى. مەن قورقۇپ تۇرساممۇ چاندۇرماي، خالاتنى ئالدىم، دەپ-جاغىلداپ تىترىگەن پىتى يىلانغا ئەگەشتىم. بىر مېتردىن سەللا ئۇزۇنراق بۇ توم چار يىلان پەلەمپەيدىن ماڭماي ناھايىتى ئاستا پەلەمپەينىڭ يىنىدىكى تازىلىق سايمانلىرىنى قويىدىغان كىچك ئۆينىڭ يىپىغلىق ئىشكىنىڭ يەر بىلەن ئارىلىقدىكى قارىماققا بارماقنى تىقسىمۇ پاتمىغۇدەك بوشلۇقتىن توم تېنىنى بىر خىل ياپىلاقلاشتۇرۇپلا ئاستا ئىچىگە شۇڭغۇپ ئىچىگگ كىرىپ كېـتىۋاتاتتى. بۇنىڭ ئىچىگە كىرىپ كەتسە، يا بىزدە ئاچقۇچى يوق، يىلاننىڭ يوقاپ كەتكىنى يوقىغان بولاتتى ۋە بۇنىڭغا ھەرگىز يول قويۇشقا بولمايتتى.

-قولىڭىزدىكى خالاتنى ماڭا بېرىپ دەرھال يىلاننى قۇيرۇقىدىن تارتىپ چىقىرىڭ، مەن ئۇنى خالاتقا يۆگەپ ئىدىشقا سولىۋالاي، دەپ بۇيرۇق قىلدى-گۈلمىرە.
شۇ بىزدىكى ئوغۇلبالدارچىلىقنى، زە؟ بولمىسا باشقا ھېچبىر ھايۋاندىن قورقمايدىغان ئادەم قىزلارنىڭ ئالدىدا نەق مەن قورقىدىغان ھايۋان بىلەن سىنالدىم.  ئەگەر ئەركەكلىك غورۇرۇم ئىككى پۇل بولىدۇ دېمىسەم ھەرگىز يىلاننى تۇتۇشقا جۈرئەت قىلالمايتتىم. تاماشا كۆرگىلى تۇرغان بىر نەچچە ساۋاقداشلىرىم قوشۇلۇپ بىر توپ ئۇيغۇر قىزلارنىڭ ئالدىدا ھەر قانچە بولسىمۇ قورقۇنچۇمنى ئاشكارىلىسام بولمايتتى. بولمىسا، بىر يىگىت تۇرۇپ ئۇلارنىڭ ئالدىدا يۈزۈمنى نەگە قويىمەن؟! شۇ ئەسنادا دەرھال يىلاننى قۇيرۇقىدىن تۇتۇپ تارتىشقا باشلىدىم. يىلاننىڭ بەدىنى بارغانسېرى سىلىقلىشىپ قولۇمدىن سىيرىلىپ تۇرماي تېخىمۇ ئىچىگە كىرىپ كەتكلى تۇردى. بولمىدى، دەرھال چاپاننى سالدىم، چاپانغا يۆگەپ تۇتسام سېلىقلىقى سەل بىلىنمەي كۈچەپ تارتقىلى بولىدىكەن. كۈچىگەنسىېرى بۇ يىلانمۇ تازا ئالدىغا تارتقىلى تۇردى، قاتتىقراق بىرنى تارتىۋىدىم يىلاننىڭ بېشىلا ئىشىكنىڭ ئىچىدە قىلىپ قالغان قىسمىنى ئىشىكنىڭ ئاستىدىن چىقىرىۋالدىم. يىلاننىڭ بېشى چىقسا قانداق قىلسام بولار، دەپ سەل ئىككىلىنىپ تۇرسام، گۈلمىرە «تارتىپلا تاشلاڭ!» دەپ بۇيرۇق بەردى. شۇنىڭ بىلەن كۆزۈمنى يۇمۇپلا يىلاننىڭ قەيەرگە چۈشۈشىنى ۋە قانداق ئىنكاستا بولۇشىنى ئويلىشىپمۇ ئولتۇرماي كۈچەپ بىرنى تارتىپ يىلاننى ئادەم يوق تەرەپكە ئاتتىم! ئىچىمدىكى قورقۇنچتىن ھېچ ئەسەرمۇ قالمىدى…. خالاتنى ئالدىم، دە دۈگىلەك قىلىپ خىلى ۋەزنى بار بۇ چار يىلاننى ئىدىشقا تاشلىدىم، گۈلمىرە تەييار قىلىپ تۇرغان ئېغىزىنى مەھكەم ئەتتۇق.

-ھوي... يارايسىز!!! دېگەن ئالقىشلار بىلەن دەسلەپ ئۆڭۈپ كەتكەن چىرايمنى كۆرمىگەن بىر توپ قىز ساۋاقداشلىرىم باتۇرلىقىمغا قول قويماي تۇرالمىدى. گۈلمىرەمۇ مانا مۇشۇنچىلىك ئىش دېگەندەك ماڭا قاراپ كۈلۈمسىرىدى. شۇ ۋاقىتتا ماڭا كۈندە تاماق توشۇغان، ھازىر بولسا قىزىم «ئانا!» دەپ چاقىرىدىغان قىزمۇ مەندىن ناھايىتى پەخىرلەنگەن ئىدى.

ئويلاپ كەتتىم، بۇ كىچىككىنە ئىش بولسىمۇ، ئەمما ماڭا نىسبەتەن خىلى باتۇرلۇق ھېسابلىناتتى. باتۇرلۇق دېگەنمۇ ئەمەلىيەتتە ھېچنېمىدىن قورقماسلىقتىن ئەمەس قورقۇنچلۇق نەرسىلەرگە دادىل يۈزلىنىشتە ئىپادىلەنسە كېرەك. ئۆزۈمچە بۇ ئىش ماڭا بىر خىل سىمۋوللۇق مەنىسى باردەك بىلىنىپ ئالدىمدىكى قورقۇنچلۇق دەپ قارىغان ئىتمىھان ۋە نەتىجىسىنى بىلمەيدىغان ئامېرىكا مەكتەپ ئىلتىماسىغا بولغان تەشۋىشلىرىم شۇ مىنۇتتىن باشلاپ پۈتۈنلەي يوقىدى. شۇنداق قىلىپ بىر ئايغا يىقىن ناھايىتى ئۈنۈملۈك تەكرار قىلىۋالدىم ۋە ئىشەنچ بىلەن GRE ئىمتىھانى كۈنىنى كۈتۈۋالدىم. ئىمتىھانمۇ ھەر ھالدا ئوڭۇشلۇق تۈگىدى، ئەمما قېرىشقاندەك، شىئەندە ئاشقازىنىمنى بۇزۋالغىنمىدىنمۇ ياكى يۇقىرى روھىي بېسىم ئىچىدە تۇرغىلى ئۇزۇن بولغىنىدىنمۇ تاڭ، بۇ ئىمتىھاننى بېرىپ بولۇپ دەل بىر ھەپتە ئۆتكەن شەنبە كۈنى جاننى ئاجايىپ قىينايدىغان سوقۇر ئۈچەي ياللۇغى بىلەن دوختۇرغا كىرىپ قالدىم. تۇنجى قېتىم ئوپراتسىيە قىلىنىشىم ۋە ئالدىنقى 10-15 يىلدىن بىرى تۇنجى قېتىم دوختۇرخانىدا يېتىپ قىلىشىم بولغاچقا، ئانام قاتتىق ئەنسىرەپ قالدى، ئەمما مەن ياخشى ئىكەنلىكىمنى ئېيتىپ ئۇنى كەلگۈزمىدىم. ئوڭۇشلۇق ئوپراتسىيەدىن كىيىن دوستلۇق دوختۇرخانىسىدىكى ناھايىتى كۆڭۈللۈك ۋە كەم قالغان ئۇيقۇلىرىمنى تولۇقلايدىغان بىر ھەپتىلىك ئارامغا چۈشتۈم. بەزىدە سىز ئارام ئىلىشنى ئۇنتۇپ قالسىڭىز، بەدىنىڭىز سىزگە گەپ ئاڭلىتالمىسا مۇشۇنداق ئۇسۇللار بىلەن دېمەكچى بولغىنىنى چۈشەندۈرسە كېرەك. دوختۇرخانىدىن قېيمىغان ھالدا چىقتىم، يۇ-دەرھال ئىلتىماسقا كىرەكلىك خەت-چەكلەرنى پۈتتۈرۈپ شۇ ئاينىڭ ئاخرىدا دوكتۇر شۆھرەت مۇتەللىپ ئىشلەۋاتقان ئورىگون ساغلاملىق پەنلىرى ئۇنىۋېرستېتىغا تۇنجى دوكتۇرلۇقتا ئوقۇش ئىلتىماسىمنى سۇندۇم.

داۋامى بار...

ablimitt

ماڭا بىر جاۋاپ بېرۋەتسىڭىز، بىر قىتىم زۇكام ۋاقتىمدا ئۇقماي 200گىرام ھەقسىز قان تەقدىم قىلغاندىن كىيىن يەنە شۇ كۈنىلا قول قايرىشىپ ...ئۈچىنچى كۈنى بەدىنىم ئىششىدى، يەرلىكتىكى دۇختۇرلار ھىچۋەقەسى يوق دىسە ئىشىنىپ كىتىپتىمەن. كىيىن يۈرەك چاتاق دىدى، بىرىنچى دۇختۇرخانىدا تەكشۈرتسەم يۈرەكنىڭ بىر قۇرسىقى چوڭلاپ قاپتۇ. دورا-ئوكۇلنى ئىشلىتىۋېرىپ ئاشقازان بىلەن ئۆتتىن چاتاق چىقتى، كىيىنمۇ قەيەرگىلا دۇختۇرغا بارسام يۈرەكتە مەسلە بار دەپ 迪欧心血康 دىگەن دورىنىلا بېرىدۇ， ئەمما ئۇ دورىنى ئىستىمال قىلساملا يۈرىكىم ئىتتىكلەپ تىنىم بەك ئاجىزلىشىپ كىتىپ شۇنىڭ بىلەن ئىشلەتمەيمەن. زۇكام بولساممۇ ئايلاپ ئاسما سالدۇرسام پايدا قىلمايدۇ.
كىيىن ياخشىلىنىپ توي قىلدىم، بالامنى ئىلىپ موتو مىنسەممۇ بالام ساپ-ساق مەن شامالدارىپ زۇكام بۇپ قالىمەن.
بۇلتۇر ئۈزۈم ئۈزۈش ئەمگىكى ئاخىرلىشىپ قالغاندا تىنىم بەك ئاجىزلىشىپ كەتتى، بەدەن ئېغىرلىقىم نورمال، ئاساسن چارچاپ قالىمەن.  ئاندىن ئىسسىق زۇكام بۇپ تۇرغاچقا ئازراق زۇكام بولساملا كۆزۈم چىڭقىلىپ، بىشىم ئاغرىيدىغان بولدى.
تاشپۇلات ئاكام سىزنى تەۋسىيە قىلغان، سىزمۇ ئامىركىدا بۇپ قاپسىز. ئادەتتە ئىلىكتىر كەسپىدە بولغاندىكىن سىرىتلارغا چىققاندىن باشقا ۋاقىتتا كۆپ ھەركەت قىلمايمەن، سەل ئېغىر ھەركەت قىلسام ئۆزەمنى ئىگلەپ تۇرغۇدەكمۇ ماغدۇرۇم قالمىغاندىكىن كۈپىنچە ئۆيدە ئولتۇرىمەن.
ھازىر دارا-دەرمان ئىشلەتمەي سۇغا سالغان توخوي گۈشىمۇ ئىسسىق كىتىۋاتىدۇ.

bilgejan

ablimitt يوللىغان ۋاقتى  2014-3-24 11:45
ماڭا بىر جاۋاپ بېرۋەتسىڭىز، بىر قىتىم زۇكام ۋاقتىمدا ئ ...

ئەسسالامۇ ئەلەيكۇم، ماڭا بىر جاۋاب بېرىۋەتسىڭىز دەپسىزيۇ، سوئالنى ئېنىق ئوتتۇرىغا قويماپسىز. سىز نېمىشقا مۇشۇنداق ئەھۋاللار كۆرۈلىدۇ، قانداق قىلسام ساقىيارمەن دەپ سورىماقچى، شۇنداقمۇ؟ زۇكام ۋاقتىدا قان تەقدىم قىلىش بىلەن يۈرەك يوغىناپ كېتىشنىڭ مۇناسىۋىتى بارلىقىغا ئىشەنمەيمەن. بەلكىم بەدەندە تۇيۇقسىز قان ئازلاپ كەتكەن مەزگىلگە توغرىلاپ قول قايرىشىپ بەك كۈچەپ كەتكەن بولسىڭىز يۈرىڭىڭىزگە مەلۇم تەسىرى بولغان بولۇشى مۇمكىن. ئېنىقكى، بەدىنىڭىزنىڭ ئىممۇنىت ئىقتىدارى خىلىلا ئاجىز ئىكەن. ئۇنىڭدىن باشقا سىزنىڭ زىيادە ماغدۇرسىزلىنىشىڭىزدىن دىئابىت كېسىلىنىڭ ئالامىتىمىدۇ، دەپ گۇمانمۇ قىلىپ قالدىم. ئەمما سىزگە ئۇدۇللا دېسەم مەن ئامېرىكىدا تۇرۇپ پەقەت سىز سۆزلەپ بەرگەن كېسەللىك ئالامەتلىرىگە تايىنپلار كېسلىڭىزگە دىئاگنوز قويۇپ، سىزگە داۋالاش ھەققىدە ئۇچۇرلارنى بېرەلمەيمەن. بەرسەممۇ بەرىبىر ھەممىسى پەرەزگە تايىنىپ قالىدۇ. شۇنىڭ ئۈچۈن، سىز ئۆزىڭىزنى ئوخشىمىغان بۆلۈملەردە ئومۇميۈزلۈك بىر تەكشۈرتۈپ بارلىق كېسەللىڭىزنى ئېنىقلىتىڭ. ئاندىن مەندىن سورايدىغان سوئاللىرىڭىز بولسا تەكشۈرۈش نەتىجىلىرىنى ئەۋەتىپ سورىسىڭىز تېخىمۇ مۇۋاپىق جاۋاب بېرەلىشىم مۇمكىن. سالامەتلىكىڭىزنىڭ ياخشىلىنىپ كېتىشىنى تىلەيمەن.

bilgejan

تۇنجى ئىلتىماسىنى سۇنۇپ بولغۇچە شۇنچىلىك كۆپ گاڭگىراشلارنى بېسىپ ئۆتتۈم، بىلىشىمچە ئۇتۇق بىلەن ئابلەتمۇ شۇ. ئۇتۇق خاربىندا ئوقۇشىنى داۋاملاشتۇرۇۋاتاتتى، ئابلەت شىئەندىن كىلىپ ئۇزۇن ئۆتمەي خاڭجۇغا كەتتى چۈنكى ئۇ 11-ئايدىكى TOEFL توفىل ئىمتىھانىنى شۇ يەردە بەرمەكچى ئىدى. مەن ئۈرۈمچىدە دوختۇرخانىدىن چىققاندىن كىيىن ئىلتىماس سۇنۇشقا لازىم بولىدىغان بارلىق ماتېرىياللارنى تىزىپ بىر باشتىن پۈتكەنلىرىگە بەلگە قويۇپ ماڭدىم. (بۇ بۆلەكنى چەتئەلدە ئاسپىرانتلقتا ئوقۇشنى ياكى بالىلىرىنى كەلگۈسىدە ئوقۇتۇشنى ئويلاشقانلار ئۈچۈن پايدىسى تەگسە ئەجەپ ئەمەس دەپ ئويلاپ سەل تەپسىلىيرەك يازدىم)
1. تولۇق كۇرس ئوقۇش نەتىجىسى (Transcript, GPA)

ئوقۇشنى مەن جاپا تارتتىم ئوقۇدۇم، ئوقۇغاندىمۇ ئامېرىكىدىكى ھەر قانداق مەكتەپكە نەتىجەمنى ئەۋەتسەم كۆرسە خىلى تەسىرلەنگۈدەك ئوقۇغان، ئەمما شۇ نەتىجىنى مەكتەپتىن ئىلىۋىلىشمۇ ئاسانغا توختىمىدى. دەسلەپ ئوقۇتۇش باشقارمىسىغا چىقىپ سۈرۈشتۈرسەم گىپىمنى ئاڭلايدىغانغا ھېچكىم يوق. مېنىڭ بېشىدا قاراپ تۇرغانلىقىمنى كۆرۈپمۇ خۇددى مېنى تاماشا كۆرگىلى تۇرغان ئوخشايدۇ دەپ قالغاندىكى ئىشخانىدا ئىشلەۋاتقان يولداشلارنىڭ بىرەرسىمۇ قاراپ قويايمۇ دېمەيتتى. بىر ياش ئۇيغۇر مۇئەللىمدىن سورىسام ياندىكى ئىشخانىغا كىر، دەپ كۆرسىتىپ قويدى. بۇ يەردىكىلەر بەلكىم مېنى بۇت ئوخشايدۇ دەپ قالغان بولۇشى مۇمكىن، ئەمما تۆتەيلەننىڭ ئىچىدىن بىرەرسىدىنمۇ سادا چىقمىدى. ئۇلار بىر-بىرىگە گەپ قىلىشىپ قوياتتى، تېلېفوننى قۇلاققا قىستۇرىۋىلىپ ئاللىقانداق بىركىملەر بىلەن كەچتە قەيەردە تاماق يىيىشنى دېيىشسە دېيىشەتتىكى مەندەك ھېلىھەم شۇ مەكتەپنىڭ ئوقۇغۇچىسى بولغان بىرسىگە ئۇلار قاراشقىمۇ چولىسى يوق ئىدى. ئۇلار ھەرگىزمۇ مەندەك ئوقۇغۇچىلار بولغاچقا شۇ ئىشخانىلىرىدا خىزمىتىدىن ئايرىلىپ قالماي ئىشلىيەلەيدىغانلىقىنى ئەسلا خىيالىغا كەلتۈرمەيتتى… بۇنداق ئىشلارنى پاسپورت بېجىرىش جەريانىدا كۆپ كۆرۈپ كۆنۈپ كەتكەن بولغاچ تەلەتى قالغانلىردەك ئۇنچىۋالا سۆرۈن كۆرۈنمەيدىغان بىرىنىڭ ئالدىغا بېرىپ مەن بۇ يەرگە ئىش بېجىرگىلى كەلدىم، دېدىم. بۇ ئايال باشنىمۇ كۆتۈرمەستىن نېمە ئىشىڭ بار دېگەن گەپنى ناھايىتى ھورۇنلۇق، لايغەزەللىك بىلەن سورىدى ۋە ئاۋۋال كۈتۈپخانىغا بىرىپ نەتىجە ئارخىپىمنى تىپىپ كىلىشىمنى، بۇنىڭ ئۈچۈن 10 كوي تۆلەيدىغانلىقىمنى ئېيتىپ يولغا سالدى. كۇتۇپخانىدا ياخشىمۇ خىلى پوزىتسىيىسى ياخشى بىر ياشانغان خادىمنىڭ ياردىمى بىلەن نەتىجەمنى تىزلا تاپتىم ۋە نۇسخىلىۋىلىپ تامغا ئۇرغۇزغاندىن كىيىن پۇلنى تاپشۇرۇپ قايتا ھېلىقى ئوقۇتۇش باشقارمىسىدىكى تەلەتى سۆرۈنلەرنىڭ يېنىغا كىردىم. ئۇلار مېنىڭ بۇنچە تىز بۇ نەتىجىنى ئىلىپ كەلگىنىمنى كۆرۈپ ئاۋۋال ئېنگلىزچە تەرجىمە قىلىپ جەدۋەل ياساپ كەلسەم ئەسلىدىكى نەتىجە بىلەن سېلىشتۇرۇپ خەنزۇچە-ئېنگىلىزچە نۇسخىلىرىغا تامغا قويۇپ بېرىدىغانلىقىنى ئېيتىشتى. بىر ئۇنىۋېرسىتېت بولۇش سۈپىتى بىلەن ئوقۇغۇچىلىرىنىڭ قولىغا بىرلىككە كەلگەن نەتىجە دوكلاتىنى تۇتقۇزۇش دۇنيانىڭ ھەممىلا يېرىدە ئەقەللىي ئىشقا ئايلانغان بىلەن يۇرتىمىزدىكى ئۇنىۋېرستېتلاردا بۇنداق ئىشنىڭ بارلىقىنى بىلمەيدىغاندەك مەندەك لازىم قىلىدىغانلار سورىسا ھەيران بولۇشاتتى ۋە خوشياقمىغاچ بۈگۈن كەل، ئەتە كەل دەپ ۋاقىتنى كەينىگە سوزۇپ كىشىنى ئاۋارە قىلاتتى. شۇندىن كىيىن ئاز دېگەندە 7 قېتىم بارغاندىمەن، كۆرۈشۈش ئۈچۈن ئاۋۋال بىر ئۇزۇن ساقلايمەن، ئاندىن ئاران ئىچىگە كىرىش نۆۋىتى كەلگەندە تامغا مەندە ئەمەستى، كىيىن كەل دەپ يولغا سېلىشىپ بىر مۇنچە ۋاقتىمنى زايە قىلىشتى. ئۆزىنى قالتىس باشلىق چاغلايدىغان بۇ بىر توپ پوق قورساقلارغا ئادەمنىڭ غەزىپى كەلمىسە كېلەتتى... ئاخىرى تامغىنى تۇتىدىغان قېرى «مىكىجىن» بىلەن ئاران كۆرۈشكىنىمدە بولسا چۈشتىن كىين سائەت 3:30 بولغاندا مەن ھازىر ئىشتىن چۈشتۈم دەپ، دوستىغا تېلېغۇن قىلغانچە چاچ ياسىتىشقا بارىدىغانلىقىنى دېيىشىپ ئاچچىقىمدا قېتىپ تۇرۇپ قالغان مېنى ئۈسۈۋەتكۈدەك بولۇپ ئىشخانىدىن چىقىپ كەتتى. بۇنداق دېسەم، ئۇنىۋېرستېتتا ئىشلەيدىغان «باشقۇرغۇچىلار» غا ھەجەپمۇ قوپاللىق قىلىپ كەتتى دەپ قالماڭلار، بۇلارنىڭ ماڭا قىلغان قوپاللىقلىرى ئالدىدا بۇنچىلىك دېيىشىم ھېچقانچىلىك ئەمەس. بۇلار پىرافىسورمۇ؟ ياق. بۇلار ھۆرمەتكە سازاۋەر بولغۇدەك بىلىملىكلەردىنمۇ؟ ياق. بۇلار ھېچبولمىسا ئىنسان بولغانلىقى ئۈچۈن ئىنسانىي ھۆرمەتكە لايىقمۇ؟ ياق! چۈنكى ماڭا ئىنسانىي ھۆرمەت كۆرسەتمىگەن كىشى مەيلى كىم بولسۇن، قانچىلىك چوڭ ئەمەلدار بولسۇن مېنىڭ ھۆرمىتىمگە لايىق ئەمەس. جۇڭگوچىلىقتىكى كىچىككىنە ئەمەلگە ئىگە بولۇۋالغانلارنىڭ ئۆزلىرىنى شۇنچىلىك قالتىس چاغلاپ باشقىلارغا قوپاللىق قىلىشى، كۆزگە ئىلماسلىقى ۋە ناچار مۇئامىلىلىرىنى ئامېرىكىغا سېلىشتۇرسام بۇ يەردە ھايۋانغىمۇ ئۇ قەدەرناچار مۇئامىلىدە بولىدىغانلارنى ئۇچراتقىلى بولمايتتى. باشقىنىغۇ قويۇپ تۇرايلى، ئۇنىۋېرستېتلاردا ئوقۇغۇچىلار ۋە پىرافىسورلارنىڭ خىزمەتلىرى ئۈچۈن مۇلازىمەت قىلىشقا ياللانغان ئاتالمىش «باشلىق»لارنىڭ قىلمىشلىرى قەتئىي كاللامدىن ئۆتمەيتتى. غەزەپلەنگەنسېرى بۇنداق بىيۇكراتلىققا تولغان، ئىنساننى بىر جانسىز تۈۋرۈكتەكمۇ كۆرمەيدىغان بۇنداق مەخلۇقلار بىلەن تولغان مۇھىتتىن تېزراق قۇتۇلۇپ ئامېرىكىغا چىقىپ كىتىش خىيالىم بارغانسېرى كۈچىيەتتى. نەچچە رەت ئاچچىق يۇتۇپ، ئاخىرى ئەتىسى ئەتىگەن سائەت 10:00 دا كىلىپ مانا ئەمىسە دەپ 10 نۇسخا ئېنگىلىزچە-خەنزۇچە نەتىجىگە تامغا ئۇرغۇزغىلى تەييارلاپ كەلدىم. بۇ قېرى مىكىجىندا ئېنگىلىزچىنى كۆرۈپ چۈشىنەلىگۈدەك سەۋىيە نەدە دەيسىلەر، ھېلىقى ياش ئۇيغۇر مۇئەللىمنى چاقىرتىپ توغرىمۇ، نەتىجىلەر ئەسلىدىكى بىلەن ئوخشاشمۇ دېگەنلەرنى بىرمۇ-بىر تەپسىلىي سېلىشتۇرغۇزدى ۋە چاتاق يوقلىقىنى ئاڭلاپ ئاخىرى ھېلىقى ئالتۇن ساندۇقتا ساقلايدىغان تامغا ناملىق «گۆھەر»نى چىقاردى. 20 پارچە تامغىنى ئۇرۇپ بولغۇچە نېمانچە كۆپ، سەن شۇنچە كۆپ مەكتەپكە ئىلتىماس قىلىپ نېمە قىلىسەن دەپ كوتۇلدىغاچ مەنسىتمىگەن ھالدا سەن بەرىبىر بىزنى ئاۋارە قىلغانغا چۇشلۇق چەتئەلگە چىقالمايسەن، ئەڭ ياخشىسى بولدى قىلساڭ بولمامدۇ دەپ نەسىھەت قىلىپمۇ ئۈلگۈردى. نەگىلا بارسام ساڭا چەتئەلدە نېمە بار، بەرىبىر چىقالمايسەن، پاسپورت بىجىرسەڭمۇ بىكار، شۇڭا بىجىرمە دېگەندەك گەپلەرنى تولا ئاڭلاپمۇ ئاخىرى پاسپورتنىمۇ ئالتە ئاي يول مېڭىپ 50-60 قېتىم مۇناسىۋەتلىك ئورۇنلارغا قاتراپ، تىل ئىشتىپ، ھەتتا ساقچى بىلەن ئۇرۇشقاچ ساقچىخانىغا سولانغىلى تاس قىلىپ دېگەندەك بىجىرىۋالغان بولغاچقا بۇنداق كوتۇلداشلاردىن قانچىلىك بىزار بولساممۇ ئىشنى پۈتتۈرۋالساملا بولدى دەپ يۈزى قېلىنلىق بىلەن دېگىنىمنى قىلغۇزاتتىم. تازا ئەمىسە دەپ ئۇنىڭ كۆز ئالدىدا 10 پارچە مەكتەپنىڭ لىپاپىغا بۇ 10 نۇسخا نەتىجىنى سېلىپ لېپاپنى نەق مەيدانغا يانچۇقۇمدىكى يىلىم بىلەن ئېغىزنى ئەتكەندىن كىيىن لېپاپنىڭ ئۈستىگىمۇ ھەر بىرىگە ئۈچتىن تامغا ئۇرۇلۇشى كىرەكلىكىنى ئېيتىپ (ئەسلى بىرسى بولسىلا كۇپايە) تاماشا كۆردۈم. مېنى شۇنچە بوزەك قىلغان بۇ ئەبلەختىن شۇنچىلىك بولسىمۇ دەردىمنى ئالمىسام بولمايدۇ، دە؟ كىيىن ئامېرىكىدىن دوكتۇرلۇقتا ئوقۇش چاقىرىقىنى قولۇمغا ئالغىنىمدا بۇ ئەبلەخلەرنىڭ كۆزىگە بىر تىقىپ قوياي دېدىميۇ، بۇلارنىڭ چىرايىنى يەنە بىر كۆرگۈم كەلمەي بولدى قىلغان ئىدى. ماگىستىرلىق ئوقۇشۇمدىكى دەرس نەتىجىلىرىنى ئىلىش ئۈچۈن ئاسپىرانتلار ئىنىستىتۇتىغا بارسام ئۇلار ھەر ھالدا خىلى ئاسان نەتىجىلىرىمنى چىقىرىپ بەرگەن بولدى.  بەلگە: پۈتتى.

2. TOEFL ۋە GRE ئىمتىھان نەتىجىسى
ئامېرىكا مەكتەپلىرىگە ئىلتىماس قىلىشتا قەتئىي كەم بولسا بولمايدىغان بۇ ئىككىلى ئىمتىھاننى تۈگىتىپ بولغاچقا ETS تېلېفۇن قىلدىم. توفىلنىڭ ئىشى ئاسانلا پۈتتى چۈنكى 1-ئايدا بېرىپ بولغان ئىمتىھان بولغاچقا $50 دوللارنى تۆلىسەملا بولىدىكەن. ئامېرىكا بىلەن مۇناسىۋەتلىك بۇ ئىمتىھانلار گەرچە ناھايىتى تەس بولسىمۇ بىر مۇنچە پۇل تۆلەپ بەرگەنگە چۇشلۇق ئۇلارنىڭ مۇلازىمىتىمۇ ھەر ھالدا ياخشى ئىدى. GRE نى بەرگىلى ئۇزۇن بولمىغاچقا قانچە نومۇر ئالغانلىقىمنىمۇ بىلمەيتتى ھەم بىر يېرى ئايدىن كىيىن ئاندىن ئەۋەتىشكە باشلايدىغانلىقىى ئېيتىۋىدى سەل ئەنسىرەپ قالدىم.  لېكىن 12-ئاينىڭ باشلىرىدا قولۇمغا بىر نۇسخا نەتىجە قەغىزى تەككەن ئىدى، گەرچە ھامىنى ETS ئەۋەتسە ئاندىن ئېتراپ قىلىنسىمۇ ھەر ھالدا نەتىجەم بارلىقىنى كۆرسىتىش ئۈچۈن ئۇنىمۇ پوچتىدىن ئەۋەتىدىغان ماتېرىياللار ئارىسىغا قوشتۇم. بەلگە: يېرىم پۈتتى.

3. ئىلتىماس خېتى (شەخسىي بايان، Personal Statement)
بۇ بىر پارچە ئاددىيلا خەت بولسىمۇ، ئەمما بۇ خەتنىڭ ئىلتىماس جەرياندىكى مۇھىملىقى GRE غا ئىمتىھانى نەتىجىسىگە يەتمىسىمۇ، توفىل ئىمتىھانى بىلەن باراۋەر ئورۇندا تۇراتاتتى. بۇ خەتكە ئۆزىڭىزنىڭ نېمە ئۈچۈن ئىلتىماس قىلىدىغانلىقىڭىزنى ئېيتىش بىلەن بىرگە ئۆزىڭىزنىڭ ئەڭ مۇنەۋۋەر تەرەپلىرىنى ئۇستىلىق بىلەن قەلەمگە ئىلىپ يۇقىرى ئىنگىلىز تىلى يېزىقچىلىق ماھارىتى بىلەن شۇ خەتنى ئوقۇغان كىشىنى بۇ ئىلتىماس قىلغۇچىنى چوقۇم بىر ئويلىشىپ باقمىساق بولماپتۇ دېگەن ھېسسىياتقا كەلتۈرگىدەك دەرىجىدە يېزىش زۆرۈر ئىدى. ئويلىسام، جۇڭگو مائارىپىدا بىزنى يېزىقچىلىق قىلىشقا ۋە نۇتۇق سۆزلەشكە ئازراقمۇ كۆندۈرمەيدىكەن، شۇڭا كۆپىنچە ستۇدېنتلار بۇنداق رەسمىي خەت-چەكلەرنى يېزىشتا بەكلا قېينىلىپ كىتىدىكەنمىز. بۇنى ياخشى يېزىش ئۈچۈن ئىنگىلىزتىلى سەۋىيىسى يۇقىرى بولغانغىلا بولمايتتى، چوقۇم چەتئەل مائارىپىنى قوبۇل قىلىپ باققان  ئۇيغۇر دوستلار ياكى چەتئەللىك تونۇشلارنىڭ مەسلىھەت بېرىشىگە ۋە تۈزىتىپ بېرىشىگە سۇنماي بولمايتتى. كۈتۈپخانىدىن چەتئەلدە ئوقۇشقا ئىلتىماس قىلىش توغرۇلۇق تاپقان بىر مۇنچە كونا كىتابلاردىن ئۈلگىلىرىنى ئوقۇپ بۇ خەتنى قانداق يېزىش توغرىسىدا دەسلەپكى چۈشەنچىگە ئىگە بولدۇم، ئەمما باشقىلارنىڭ يازغىنىنى كۆرۈپ باقمىغان بولغاچقا يەنىلا خىلى قىينالدىم. بۇ جەھەتتە ئىچكىرىدىكى taisha ۋە jituo دېگەن ئىككى چوڭ چەتئەلگە چىقىشقا ئائىت تور بەتتىن كۆپ نەپكە ئېرىشتىم ۋە ئۈچ ھەپتىدەك ۋاقىتتا بۇ خەتنىمۇ ئوبدانلا تەييارلاپ بولدۇم. شۇ ۋاقىتلاردا گېرمانىيىدىكى دوستۇم ئەخمەتجان ۋە ئامېرىكىلىق دوستۇم Adem بۇ خېتىمنى كۆپ قېتىم تۈزىتىپ بەرگەن ئىدى ۋە ئۇلارنىڭ ياردىمىدىن كۆپ مىننەتدارمەن. بولمىسا راستىنلا گاڭگىراپ قالاتتىم. (مانا ئەمدى، مەندىن ھەر ھەپتىدە دېگۈدەك، بولۇپمۇ ھەر يىلى 12-ئايلاردىن 3-ئايغىچە بولغان ئارىلىقتا كۆپلىگەن ئوقۇغۇچىلار يازغان خەتلىرىنى تۈزىتىپ تەھرىرلەپ بېرىشىمنى سورايدۇ. بەزىلەر ھەتتا، ماڭا خەتتىن بىرنى يېزىپ ئەۋەتىپ بەرسىڭىز دەپ سوراپمۇ قويىدۇ، ئەلۋەتتە بۇنىڭ جاۋابى: بۇ خەتنى سىزدىن باشقا ھېچكىم ياخشى يازالمايدۇ، ئاۋۋال يېزىپ بولۇپ ئەۋەتسىڭىز كۆرۈپ بېرەي، بولىدۇ). جەمئىي 12 قېتىم تۈزەتكەندىن كىيىن بۇ خەتمۇ تەييار بولدى. بەلگە: پۈتتى.

4. تەۋسىيە خەتلىرى
ئامېرىكا مەكتەپلىرىگە چوقۇم 3 پارچە تەۋسىيە خېتى ئەۋەتىش تەلەپ قىلىنغان بولغاچقا، ئۇنىۋېرسىتېتتىكى پىرافىسورلارغا ئۆتۈنۈشىمىزگە توغرا كېلەتتى. بىراۋ ئۈچۈن مەيلى مەسئۇلىيەت يۈزىسىدىن ياكى ئۆزى خالاپ ھەر قانداق بىر ئىش قىلىپ بەرگەندە قايتىدىغان جاۋابنى ئاۋۋال ئويلىشىدىغان كىشىلەر كۆپ سانلىقنى ئىگىلەيدىغان رېئاللىقتا ياشاۋاتقان بولغاچقا، گەرچە بۇ بىر ئۇستاز بولغۇچىنىڭ ئۆز ئوقۇغۇچىسىنىڭ تېخىمۇ يۇقىرى ئۆرلىشى ئۈچۈن قىلىپ بىرىشى بىر كەسپىي ئەخلاق نۇقتىسىدىن قىلىشقا تىگىشلىك بىر ئىش بولسىمۇ، ئەمما پايدا كەلمەيدىغان بۇنداق ئىشلارنى قىلىپ بېرىش نۇرغۇن پىرافىسورلارغا بەك خوشيىقىپمۇ كەتمەيتتى. بۇ خەت ئامېرىكىلىق ئوقۇغۇچىلار ئۈچۈن خىلى مۇھىم بولسىمۇ، ئەمما جۇڭگو پىرافىسورلىرىنىڭ تەۋسىيە خېتى بولمىسا بولمايدىغان، ئەمما بولسىمۇ ئىلتىماسنىڭ مۇۋاپىقىيەتلىك بولۇشى ئۈچۈن چوڭ پايدىسى تەگمەيدىغان بىر ئالۋاڭ ئىدى، خالاس. بۇنداق بولۇشى جۇڭگودا كۆپىنچە پىرافىسورلار تەۋسىيە خەتنى ئۆزى يازماي ئوقۇغۇچى يېزىپ كەلسە ئىمزاسىنى قويۇپ بىرىش بىلەن كۇپايىلىنىدۇ (بۇمۇ خوشياقسا تېخى)، شۇنداق بولغاچقا كىممۇ ئۆزىنى ئۆزى تازا كۆپتۈرۈپ ماختىمىسۇن؟ كۆپىنچە جۇڭگولۇق ئوقۇغۇچىلارنىڭ تەۋسىيە خەتلىرى بەكمۇ ئوخشىشىپ قالىدىغان بىر قېلىپتا چىقىدىغان بولغاچقا بارا-بارا بۇ خەتلەر ئانچە ئىتىبارغا ئېلىنمايدىغان بولغان بولسا كىرەك. ئەلۋەتتە، بۇ خەتنىمۇ ناچار يېزىپ قويۇشقا ھەرگىز بولمايتتى. شۇنىڭ بىلەن ئۆزۈم ياخشى كۆرىدىغان تولۇق كۇرستىكى قەدىناس ئۇستازىم پاتىگۈل مۇئەللىمگە دېسەم ئۇنىۋېرستېت ئېلخەت ئادېرىسى يوقلۇقىنى ئيتېيقان ئىدى (چەتئەللەردە بۇ بەكلا مۇھىم، ئىمكانقەدەر ئۆزى ئىشلەۋاتقان مەكتەپ ياكى تەتقىقات ئورنىنىڭ رەسمىي ئېلخەت ئادرېسى بولۇشى كېرەك)، مەكتەپ ئۇچۇر مۇلازىمەت مەركىزىگە ئۇنىڭ بىلەن بىللە بېرىپ ئۇنىڭغا يېڭىدىن بىر ئېلخەت ئادرېسى ئالغۇزدۇم، ئاندىن ئۇ ماڭا ئىشىنىپ مەخپىي نومۇرىنى دەپ بەردى ۋە مەكتەپلەردىن كەلگەن ئالاقىلەرگە ئۆزۈم جاۋاپ قايتۇرسام بولىدىغانلىقىنى ئېيتىپ ئۇنىڭ نامىدىن مەن تەييارلىغان تەۋسىيە خېتىگە ئىمزاسىنى قويۇپ بەردى. ئەمما ماگىستىر يىتەكچىم ئاۋۋال بۇ خەتنى خەنزۇچىغا تەرجىمە قىلىشىمنى ئېيتتى، تەرجىمە قىلسام ياخشى بولماپتۇ، دەپ خەنزۇچىسىنى تۈزىتىپ بەرگەندىن كىيىن ئاندىن ئىنگىلىزچىغا ئۆرۈپ قايتا يارغۇزۇپ ئىمزاسىنى قويۇپ بەردى. ئۈچىنچى پارچە خەتنى بولسا بەزى مەكتەپلەرگە دوكتۇر شۆھرەت مۇتەللىپنى يازغۇزدۇم، يەنە بەزىلىرىگە ئامېرىكىلىق پىرافىسور دوستلىرىمنىڭ ئىچىدىكى بىرەرسىگە يازغۇزدىم. بۇ خەتلەر ھەر ھالدا پۈتكەن بولدى. بەلگە: پۈتتى.

مانا، ئامېرىكىدا ئاسپىرانتلىقتا ئوقۇشقا ئىلتىماس قىلىشقا شۇنچە ئۇزۇن تەييارلىق قىلىپ ئىشلار پۈتۈپمۇ قالدى. ھاياجان ئىچىدە كېلەر يىلى 9-ئايدىكى ئوقۇشقا ئىلتىماس ۋاقتى 12-ئاي ئىچىدىلا توشۇپ بولىدىغان ئىككى مەكتەپكە ئىلتىماسىنى بىر ھەپتە ئىلگىرى-ئاخىرى ئەۋەتىۋەتتىم. بەك مۇرەككەپ ۋە تەس بىلىنگەن بىلەن يىغىپ-يۆگەپ كەلسە ئامېرىكىدا ئاسپىرانتلىقتا ئوقۇش ئۈچۈن شۇ يۇقىرىدىكى نەرسىلەرنى تەق قىلسىلا بولىدىغان ئىشكەنغۇ! ئالدى بىلەن تامغىلار بېسىلىپ لېپاپقا قاچىلانغان باكلاۋۇرلۇق ۋە ماگىستىرلىق ئوقۇش نەتىجىلىرىمنى چوڭ لېپاپقا سېلىپ ئۇنىڭ ئىچىگە يەنە شەخسىي بايان خېتىنى، ھەر ھالدا ئېتىراپ قىلىنمىسىمۇ توفىل بىلەن GRE نەتىجە قەغەزلىرىدىن بىر نۇسخىدىن (ETS رەسمىي نەتىجىنى بىۋاستە مەكتەپلەرگە ئەۋەتسە ھېساب، بۇنى ئاللىقاچان ئورۇنلاشتۇرۇپ قويغان) سالدىم، ئاندىن ھەر ھالدا ئىلخەت ئارقىلىق ئەۋەتىلگەن تەۋسىيە خەتلىرىنىمۇ كىچىك لېپاپقا سېلىپ ئۇلارنى بۇ چوڭ لېپاپقا سالدىم ۋە تاپشۇرۋالغۇچىغا ئىكى لىك خەت يېزىپ ئالاقىلىشىش ئادرىسىمنى قوشۇپ قارشى تەرەپنىڭ ئادرېسىنى نەچچە قېتىم توغرىلىقىنى تەكشۈرۈپ DHL گە تېلېفۇن قىلدىم. بۇ ۋاقىتتا جۇڭگو پوچتىسىدىن ئالدىرىماي ئەۋەتىدىغانغا ۋاقتىم قالمىغاچ ھەم ئۇلارنىڭ مۇلازىمىتىنى ئانچە ئىشەنچلىك ئەمەس دەپ ئويلىغاچقا گېرمانىيىنىڭ ئۈرۈمچىدىكى DHL مۇلازىمىتىنى ئىشلەتكەن ئىدى. ھەممە نەرسە تەق بولغاندا تېلېفۇن قىلسام ئۇلار دېيىشىپ قويغان ۋاقىتتا مەكتەپ ئالدىغان كېلىپ لىپاپنى قولۇمدىن ئالاتتى ۋە تۆت كۈن ئىچىدە يېتىپ بارىدىغانلىقىغا ۋەدە بېرىپ خەتنى ئىلىپ كېتەتتى. شۇنداق قىلىپ مۇشۇنداق ئىلتىماستىن 6 نى تاپشۇردۇم. ئۇتۇقمۇ خاربىندا تۇرۇپ ئوخشاش ۋاقىتتا 7-8 مەكتەپلەرگە ئىلتىماس تاپشۇرۇپتۇ. ئابلەت دەسلەپ 4 مەكتەپكە، ئاندىن 3-ئايلارغىچە داۋاملىق 10 دىن كۆپرەك مەكتەپلەرگە ئىلتىماس يوللاپتۇ. بىز ھەر ۋاقىت ھەر بىر ئىشتا ئىنچىكە، كىچىك نۇقتىلارغىچە ئۆز-ئارا پىكىر ئالماشتۇرۇپ تۇرۇشتۇق ۋە بىلگىنىمىزنى ئايىماستىن ئۆز-ئارا ياردەمدە بولدۇق. بۇنداق ئۇزۇن ۋە جاپالىق سەپەردە بۇنداق ياخشى سەپەرداشلارنى ئۇچرىتىش ھەقىقەتەنمۇ ئامىتىم ئىدى.

داۋامى بار….