- تىزىملاتقان
- 2014-4-23
- ئاخىرقى قېتىم
- 2015-4-20
- ھوقۇقى
- 1
- جۇغلانما
- 2617
- نادىر
- 0
- يازما
- 134
ئۆسۈش
20.57%
|
|
مەن كۆرگەن گېرمانىيە ( 4 )
گېرمانىيەنىڭ غەربىگە جايلاشقان ئالپ تېغى-مەملىكەت ئىچى،سىرتىغا مەشھۇر ساياھەت مەنزىرە نۇقتىسى ئىكەن. بىز ھاۋا ئوچۇق كۈنلەرنىڭ بىرىدە ميۇنخېن شەھرىدىن پويىزغا ئولتۇرۇپ ئالپ تېغى ساياھەت مەنزىرە رايونىغا يۈرۈپ كەتتۇق. پويىز يول بويلىرىدىكى ياپيېشىل چىملىقلار، بۆك-باراقسان ئورمانلىقلار، كالىلار يايلاۋاتقان ئوتلاقلىقلار، قۇلماقزارلىقلار ۋە كىچىك شەھەر، بازارلارنى كەينىدە قالدۇرۇپ ئىلگىرىلىمەكتە ئىدى. ئەتراپىمىزدا ئولتۇرغان گېرمانلارپويىزدا كېتىۋېتىپمۇ كىتاپ،ژورنال كۆرۈپ ئولتۇرىدىكەن. ئەمما بىزگە ئوخشاش گېرمانىيەگە ئەندىلا كەلگەن چەتئەللىكلەر يولنىڭ ئىككى قاسنىقىدىكى گۈزەل مەنزىرىلەردىن كۆزىمىزنى ئۈزەلمەي قالىدىكەنمىز. ئىككى سائەت ماڭغاندىن كىيىن پويىزدىن چۈشۈپ ئاپتۇبۇسقا ئالماشتۇق، يەنە يېرىم سائەتتىن كىيىن ئالپ تېغى باغرىغا يېتىپ كەلدۇق.
پاھ، بۇيەرنىڭ مەنزىرىسى نىمىدىگەن گۈزەل!...ئەنە، تاغ ئۈستى، تاغ باغرىدىكى ياپيېشىل قارىغايزارلىق، ئارچىزارلىقلار ۋە ئۇنىڭ ئارىسىدا قەد كۆتىرىپ تۇرغان قەدىمىي قەلئەلەر يىراقتىنلا ئادەمنى ئۆزىگە جەلپ قىلاتتى. بۇ گۈزەل سەيلىگاھقا دونيانىڭ ھەرقايسى جايلىرىدىكى ساياھەتچىلەرنىڭ ئايىقى ئۈزۈلمەي كىلىپ تۇرۇشىمۇ بىكار ئەمەسكەن. بىز بۇيەرگە كىلىپلا ساياھەتچىلەر توپىغا ئەگىشىپ يانتۇ تاغ يولى بىلەن يوقۇرىغا ئۆرلىدۇق. ئىككى تەرىپى قويۇق ئورمان بىلەن قاپلانغان بۇ تاغ يولىغا قوياش نۇرىمۇ ئانچە چۈشمەيدىكەن، يولىمۇ بەك تىك بولمىغاچقا،ئادەممۇ ھېرىپ كەتمەيدىكەن. پىيادە تاغقا چىقىشقا ئېرىنىدىغان بىر قىسىم ساياھەتچىلەر قاۋۇل ئىككى ئات قوشۇلغان ساياھەت ھارۋىسىغا ئولتۇرۇپ تاغقا چىقىپ چۈشىدىكەن. بۇ ساياھەت ھارۋىلىرى تاغنىڭ قاپ بېلىدىكى بېكىتىدە ساياھەتچىلەرنى چۈشۈرۈپ قويىدىكەن. ساياھەتچىلەر ئۇنىڭ نېرىسىغا پىيادە چىقىدىكەن. تاغ يولىنىڭ بەزى جايلىرىدا قەھۋەخانىلار ئورۇنلاشتۇرۇلغان بۇلۇپ، ھېرىپ قالغان ساياھەتچىلەر بۇيەردە بىردەم ئولتۇرۇپ ئۇسسۇزلۇق ئىچكەچ ئارام ئېلىۋىلىپ ئاندىن ماڭىدىكەن. بىزمۇ ئاخىرى تاغ ئۈستىگە چىقىۋالدۇق. تاغ ئۈستىگىمۇ ساياھەتچىلەر ئارام ئالىدىغان مۇلازىمەت ئەسلىھەلىرى جايلاشتۇرۇلغان ئىكەن. تاغ ئۈستىدىن قارىغاندا يىراقتىكى ۋە پەس تەرەپتىكى مەنزىرىلەر ئاجايىپ گۈزەل كۆرىنىدىكەن. تاغ چوققىسىنىڭ ئۈستىدە لەيلەپ ئۈزۈپ يۈرگەن ئاپئاق بۇلۇتلار، ئۇنىڭ ئاستىدىكى ياپيېشىل قارىغايلار كىشىنى ئۆزىگە مەھلىيا قىلىدىكەن.
ئالپ تېغىدا 16-ئەسىردىكى باۋارىيە خاندانلىقىنىڭ پادىشاھى لۇدۋىك-2 نىڭ چوڭ-كىچىك قەلئەلىرى جايلاشقان بۇلۇپ، بىز تاغ ئۈستىدىكى ئەڭ چوڭ بىر قەلئەنى ئىكىسكۇرسىيە قىلدۇق. كۆپ قەۋەتلىك بۇ قەلئە ئاجايىپ ھەيۋەتلىك ئىدى. ئىچىدە ئەينى زاماندىكى پادىشاھلار ياشىغان نۇرغۇن ئۆيلەر بار ئىكەن. بىز تاغ باغرىدىكى بىر كىچىك بىنانىڭ ئادىدا نۇرغۇن ساياھەتچىنىڭ ئۇزۇن ئۆچرەتتە تۇرغانلىقىنى كۆرگەن ۋە ئۇلارنىڭ نىمىگە ئۆچرەتكە تۇرغانلىقىنى ئاڭقىرمايلا تاغ ئۈستىگە قاراپ يول ئالغان ئىدۇق. ئەندى بىلدۇقكى، ئۇلار مۇشۇ قەلئەدىكى پادىشاھنىڭ ئۆيلىرىنى ئىكىسكۇرسىيە قىلىش ئۈچۈن ئىشىك بېلىتى ئېلىشقا ئۆچرەتتە تۇرغان ئىكەن. بىز ئالدىنئالا ئىشىك بېلىتى ئېلىپ قويمىغانلىقىمىز ئۈچۈن، ئۆي ئىچىنى ئىكىسكۇرسىيە قىلالمىدۇق، پەقەت قەلئەنىڭ سىرتىنى ۋە ئۇنىڭ ئەتراپىدىكى گۈزەل مەنزىرىلەرنىلا كۆرەلىدۇق.
قەلئەگە ئانچە يىراق بولمىغان يەردە، ئىككى تاغنىڭ ئوتتۇرىسىغا سېلىنغان بىر ئاسما كۆۋرۈك بار ئىكەن. بىز ساياھەتچىلەر توپىغا ئەگىشىپ، ئىگىز-پەس تار يوللاردىن ئۆتۈپ، بەزىدە تاش پەلەمپەيلەر ئارقىلىق يوقۇرى-تۆۋەن چۈشۈپ بۇ ئاسما كۆۋرۈككە كەلدۇق. كۆۋرۈك ئۈستىدە ئادەم ناھايتى كۆپ ئىدى. كۆۋرۈكتە تۇرۇپ قارىغاندا،يىراقتىكى تۈزلەڭلىكلەر، ئورمانلىقلار، دەريا، كۆللەر، مەھەللىلەر غۇۋا كۆرۈنۈپ تۇراتتى. كۆۋرۈك ئاستى ياپيېشىللىققا تولغان چوڭقۇر جىلغا ئىدى. كىشىلەر كۆۋرۈك ئۈستىدە ئۇيان-بۇيان ئۆتۈشۈپ تۇراتتى، بەزىلىرى سۈرەتكە چۈشەتتى، ئەتراپتىكى گۈزەللىكلەرنى سۈرەتكە تارتىشاتتى. كۆۋرۈك ناھايتى مۇستەھكەم ياسالغان بۇلۇپ، بىرەريۈز ئادەمنى بىمالال كۆتىرىپ تۇراتتى. بىز ئۆمرىمىزدە بۇنداق گۈزەل جاينى كۆرۈپ باقمىغانلىقىمىز ئۈچۈن، ئۆزىمىزنى تولىمۇ تەلەيلىك ھېس قىلدۇق. بۇيەردىكى گۈزەل تەبىئەت بىزنى ئۆزىگە مەھلىيا قىلىۋالغان ئىدى. ئەپسۇسكى، بىر ھازادىن كىيىن ھاۋا تۇيۇقسىز ئۆزگىرىپ، تاغ ئۈستىدىكى ئاپئاق بۇلۇتلارنىڭ ئورنىنى قارا بۇلۇتلار ئىگىلەشكە باشلىدى. بۇ يامغۇر ياغىدىغانلىقنىڭ بىشارىتى ئىدى. بىز يامغۇردا قېلىشتىن ئەنسىرەپ، ئالدىراپ-تىنەپ تاغدىن چۈشۈۋالدۇق. ئاپتۇبۇس بېكىتىگە كىلىپ بولغىچە شاقىراپ يامغۇر قۇيۇۋەتتى. بىز ئوچۇقچىلىقتا يامغۇرغا چىلىشىپ ئۆچرەتتە تۇرۇپ، ئاران دىگەندە ئاپتۇبۇسقا چىقىۋالدۇق، بىردەمدىن كىيىن پويىزغا ئالمىشىپ ميۇنخېنغا قايتتۇق.
|
|
|