ئىيۇننىڭ ئاخىرى ۋە ئىيۇلنىڭ باشلىرى توققۇز يىللىق مەجبۇرىيەت مائارىپى باسقۇچىدىكى مەكتەپلەر ئۈچۈن دېھقانلارنىڭ يازلىق ۋە كۈزلۈك يىغىم ۋاقتىغا ئوخشاش ناھايىتىمۇ ئالدىراش ۋاقتى. بۇ يىل گەرچە ياز كېچىكىپ كەلگەن بولسىمۇ لېكىن، يېقىنقى ئۈچ كۈندىن بۇيان ھاۋا ناھايىتى ئىسسىپ كېتىپ، ۋىلايەت (قەشقەر)ۋە ناھىيىلىك (يوپۇرغا) مېترولوگىيە تارماقلىرى يۇقۇرى تېمپراتورا ھەققىدە سېرىق رەڭلىك ئاگاھلاندۇرۇش چىقاردى. ئەلۋەتتە بۇ ئاگاھلاندۇرۇش ئادەملەرنىڭ ئىسسىقتىن مۇۋاپىق پاناھلىنىشى ۋە ئۆزىنى قوغدىشى، ئىشلەپچىقىرىش ۋە خىزمەت ۋاقتىنى مۇۋاپىق تەڭشەپ ئورۇنلاشتۇرۇپ، ئورۇنسىز يامان ئاقىۋەتنىڭ كېلىپ چىقىشىنىڭ ئالدىنى ئېلىش ئۈچۈن، قىسقىسى كونكېرت ئادەملەرنىڭ سالامەتلىكىنى، مال-مۈلكىنى ئاسراش مەقسىدىدە چىقىرىلغان بولۇشى مۇقەررەر. بىر مەۋسۇم تۈرلۈك ئەقلىي ئەمگەك بىلەن شۈغۈللىنىپ چارچىغان، ئەمدىلىكتە بىر تەرەپتىن ھەرقايسى پەنلەرنىڭ ئىلمىي خۇلاسىسىنى ئىشلەش، يەنە بىر تەرەپتىن سىياسىي نەزەرىيە ئۆگىنىش قىلىشقا تەشكىللىنىپ تالجىققان ئوقۇتقۇچىلارغا بۇ يۇقۇرى تېمپراتۇرا خېلىلا ئېغىر چىلىقلارنى كەلتۈرگەن ئىدى. ئەسلىدىكى يازلىق مەشخۇلات ۋاقتى بويىچە ئۈرۈمچى ۋاقتى سائەت ئىككى چۈشتىن كېيىنلىك ئىشقا چۈشۈش ۋاقتى، شۇنداقلا بىر كۈنلۈك ئەڭ يۇقۇرى تېمپراتورا كۆرۈلىدىغان ۋاقىت ئىدى. شۇڭا ئۇقۇتقۇچىلار ئۆزئارا پىكىرىمىزنى جەم قىلىپ، چۈشتىن كېيىنلىك مەشخۇلىيەت ۋاقتىنى بىر سائەت كەينىگە سۈرۈپ بېرىش ئىلتىماسىمىزنى مەكتەپنىڭ بىر مۇئاۋىن مۇدىرىغا ئېيتتۇق. بۇ مۇدىر ناھايىتىمۇ تەمكىنلىك بىلەن بۇ ئىشنى مەكتەپ مەمۇرىيىتى ۋە ياچېيكىدا مۇزاكىرە قىلىپ، جاۋابىنى ئەتىسى بېرىدىغانلىقىنى جاكارلىدى. بۈگۈن ئۇقساق بۇ قارار رەھبەرلىك بەنزىنىڭ قارارىدىن ئۆتمەپتىمىش. ئەمەلىيەتتە ئىلمىي تەرەققىيات قارىشىنى ئۆگەنگەن «ئىلمىي» رەھبەرلەر توردا، ئۆزىنىڭ تېلېفونىدا كۆرگەن سېرىق رەڭلىك ئاگاھلاندۇرۇشقا دىققەت قىلىشى، «ئاممىنىڭ كۆڭلىنى مايىل قىلىش، ئاممىغا نەپ يەتكۈزۈش» ۋەزىپىسى بولغان خەلقنىڭ چاكارلىرى باشلىقلىق ھەيۋىسىنى بىر ياققا قايرىپ قويۇپ، پەقەت بىر سائەت كەينىگە سۈرۈلىدىغان مەشخۇلىيەت ۋاقتىغا قوشۇلسا، قول ئاستىدىكىلەرنىڭ نۇرغۇن ئالقىشى ۋە رەھمىتىگە ئېرىشكەن، بۇندىن كېيىنكى ئابروي- ئىناۋىتى تېخىمۇ ئاشقان بولاتتى. بىز يەنە شۇ ئەسلىدىكى ۋاقىتتا كېلىپ ئىشلەۋەردۇق، ياخشى يېرى بىر ئىدارىدا ئىشلەيدىغان باشلىقلىرىمىزغا گېپىمىز ئۆتمىگەن، ئۇلار بىزگە شۇنچىلىك بولسىمۇ كۆڭۈل بۆلمىگەن بىلەن، تەبىئەت يەنىلا رەھىمدىل ئوخشايدۇ، ئەتىدىن باشلاپ تېمپراتورا تۆۋەنلىگۈدەك، شۇنىڭغا ماس ھالدا مەكتەپ رەھبەرلىكىگە بولغان ھۆرمەت ۋە ئىشەنچ ئوتلىرىمىزمۇ سەل تۆۋەنلىدى. چۈنكى تېمپراتورىغا ئامال يوقكەن ئەمەسمۇ؟ 2014.7.2 |