ئالەم بوشلۇقىدىكى « شىنجاڭ » ۋە « ئۈرۈمچى »
پايانسىز ئالەم بوشلۇقىدىمۇ «شىنجاڭ»ۋە «ئۈرۈمچى» بار. ئۇ جۇڭگو پەنلەر ئاكادېمىيىسى زىجىنشەن رەسەتخانىسى تەىپىدىن بايقالغان، خەلقئارا رەسمىي رەت نومۇرىغا ۋە نامغا ئېرىشكەن 2336-نومۇرلۇق سەييارىچاق «شىنجاڭ» ۋە 2729-نومۇرلۇق سەييارىچاق «ئۈرۈمچى» دىن ئىبارەت. سەييارىچاقلار مارس ئوربېتىسى بىلەن يۇپىتېر ئوربېتىسى ئوتتۇرىسىدىكى بەلباغدا قۇياش ئەتراپىدا ئايلىنىپ يۈرىدىغان كىچىك ئاسمان جىسىملىرىدۇر. ئۇلارنىڭ سانى ئىنتايىن كۆپ،مۆلچەرلىنىشىچە، دېئامېتىرى 100 مېتىردىن، ئېغىرلىقى 1 مىليۇن توننىدىن ئاشىدىغان سەييارىچاقلار بىر نەچچە يۈز مىڭغا يېتىدىكەن. بۇ سەييارىچاقلار ناھايىتى كىچىك بولۇپ، ئەڭ چوڭلىرىنىڭ دېئامېتىرى ئاران 770 كىلومېتىر كېلىدۇ، ئۇلارنىڭ يورۇقلۇق دەرىجىسى چوڭ ئەمەس، پەقەت 4-نومۇرلۇق سەييارىچاق-ۋېستانىلا كۆز بىلەن كۆرگىلى بولىدۇ. قالغانلارنى كۆز بىلەن كۆرگىلى بولمايدۇ. «شىنجاڭ» ناملىق سەييارىچاقنىڭ يورۇقلۇق دەرىجىسى 12.5-دەرىجە، «ئۈرۈمچى» ناملىق سەييارىچاقنىڭ يورۇقلۇق دەرىجىسى 31-دەرىجە. ئادەتتە 6- دەرىجىدىن تۆۋەن سەييارىچاقلارنى كۆز بىلەن بىۋاستە كۆرگىلى بولىدۇ.سەييارىچاقلارنىڭ شەكىللىنىشى توغرىسىدا ئىككى خىل قاراش بار. ئۇنىڭ بىرى دەسلەپتەمارس ئوربېتىسى بىلەن يۇپىتېر ئوربېتىسى ئوتتۇرىسىدا ھەقىقەتەن بىر چوڭ سەييارەبولغان. كېيىن مەلۇم سەۋەبتىن بۇ چوڭ سەييارە پارچىلىنىپ نۇرغۇن سەييارىچاقلارنى شەكىللەندۈرگەن دېگەن قاراش؛ يەنە بىرى ، بۇ سەييارىچاقلار قۇياش سىستېمىسىنى شەكىللەندۈرۈشتىكى ماتېرىيال، دېگەن قاراش. ھازىر بايقالغان سەييارىچاقلار 5000 دىن ئاشىدۇ. زىجىنشەن رەسەتخانىسى تەرىپىدىن بايقالغان ھەم خەلقئارا رەسمىي رەت نومۇرىغا كىرگۈزۈلگەن سەييارىچاقلار 100 دىن كۆپرەككە يېتىدۇ. بۇ نىڭ ئىچىدىكى 56 سەييارىچاققا نام بېرىلىدى. 2336-نومۇرلۇق «شىنجاڭ»ناملىق سەييارىچاق 1975-يىلى 11-ئاينىڭ26-كۈنى بايقالغان، ئۇنىڭ قۇياش بىلەن بولغان ئوتتۇرىچە ئارىلىقى 480 مىليۇن كىلومېتىر ، شىنجاڭ بىلەن بولغان ئەڭ يېقىن ئارىلىقى 330 مىليۇن كىلومېتىر ، ئۇنىڭدىئامېتىرى تەخمىنەن 20 كىلومېتىركېلىدۇ. 2729-نومۇرلۇق «ئۈرۈمچى»ناملىق سەييارىچاق 1979- يىلى 10-ئاينىڭ18-كۈنى بايقالغان. ئۇنىڭ قۇياش بىلەن بولغان ئوتتۇرىچە ئارىلىقى تەخمىنەن 424مىليۇن كىلومېتىر ، ئۈرۈمچى بىلەن بولغان يېقىن ئارىلىقى تەخمىنەن 274 مىليۇن كېلومېتىر ، دېئامېتىرى 20 كىلومېتىر كېلىدۇ. ئۇنىڭدىن باشقا، شىنجاڭدىكى يەر ناملىرى بىلەن ئاتالغان سەييارىچاقلاردىن دۆلەتلىك رەسەتخانىسى 1997- يىلى 10-ئاينىڭ 8-كۈنى بايقىغان 48799 -نومۇرلۇق «تاشقورغان» ناملىق سەييارىچاق ۋە ئامېرىكا كىت چوققىسى رەسەتخانىسى 2000-يىلى 2-ئاينىڭ 8-كۈنى بايقىغان80801- نومۇرلۇق « ئاراتۈرك» ناملىق سەييارىچاقلارمۇ بار.
1- شىنجاڭ گېزىتى 1992-يىلى 8-ئاينىڭ 10-كۈنى
|