«بۇ يىل دېكابىردا قۇياش 6 كۈن تولۇق تۇتۇلىدۇ» دېگەن خەۋەر يالغان
بىلىمخۇمار
2014-يىلى 10-ئاينىڭ 30-كۈنى
بىر قانچە كۈننىڭ ئالدىدا تورلاردا «ناسا 2014-يىلى 12-ئايدا قۇياش 6 كۈن تولۇق تۇتۇلىدىغانلىقىنى جەزىملەشتۈردى» دېگەن تېمىدىكى بىر خەۋەر تارقالغان بولۇپ، بەزى قېرىنداشلار بۇ خەۋەرنى فېيىسبۇكقىمۇ ئۇلۇنۇش قىلىپ چىقىرىپ قويدى [1]. ئادەتتە بۇنداق بىر چوڭ ئىش بولغاندا، بىزگە ناسا نىڭ باش شتابىدىن چوقۇم ئۇچۇر كېلەتتى. لېكىن بۇ قېتىم بىزگە ئۇنداق ئۇچۇر كەلمىدى. شۇنىڭ بىلەن مەن بۇ خەۋەرنىڭ نېمە ئىش ئىكەنلىكىنى ئېنىقلاپ بېقىش ئۈچۈن تورلارنى ئىزدەپ كۆردۈم. نەتىجىدە مەزكۇر خەۋەرنىڭ يالغان خەۋەر ئىكەنلىكىنى بىلدىم [2].
ئەسلىدىكى خەۋەر «huzlers.com» دېگەن تور بېتىغا چىقىرىلغان بولۇپ، ئۇنىڭدا دېيىلىشىچە بۇ يىل 12-ئاينىڭ 16-كۈنىدىن 22-كۈنىگىچە كۈن تولۇق تۇتۇلۇپ، شۇنىڭ بىلەن 6 كۈن يەر شارىنى قاراڭغۇلۇق قاپلايدىكەن. بۇ ھادىسىنى «كۈن بورىنى» (solar storm) كەلتۈرۈپ چىقىرىدىغان بولۇپ، ئاشۇنداق بوران پەيدا قىلغان چاڭ-توزاڭ ۋە ئالەم بوشلۇقى زەررىچىلىرى كۈن نۇرىنىڭ 90 پىرسەنتىنى توسۇۋالىدىكەن. شۇنىڭ بىلەن پۈتۈن يەر شارى 6 كۈن قاراڭغۇلۇق ئىچىدە قالىدىكەن. ئۇ ئۇچۇردا دېيىلىشىچە بۇ خەۋەرنى ناسا جەزىملەشتۈرۈپتىمىش. بۇ خەۋەرگە تېخى تۆۋەندىكى 1-رەسىم قوشۇپ بېرىلىپتۇ:
1-رەسىم
1-رەسىم: يالغان خەۋەرگە قوشۇپ قويۇلغان «راست رەسىم».
ئەمەلىيەتتە بولسا «huzlers.com» دېگەن تور بېتى يالغان خەۋەرلەرنى توقۇپ چىقىرىدىغان تور بېتى بولۇپ، مۇشۇنىڭغا ئوخشاش ئىشلار بۇرۇنمۇ يۈز بەرگەن. يەنى، بۇرۇن بىر قېتىم بەزى جۇڭگولۇقلار مۇشۇنداق يالغان خەۋەرنى خەنزۇچىغا تەرجىمە قىلىپ، ئاندىن ئۇنى بەزى ئۇيغۇر تورداشلار ئۇيغۇرچىغا تەرجىمە قىلىپ، شۇنىڭ بىلەن ئۇيغۇر تىلىدىكى تورلاردا بىر خىل ۋەھىمە پەيدا قىلغانىدى. «huzlers.com» دېگەن تور بېتى ئۆزىنىڭ «كۈرەش نىشانىسى» نى مۇنداق دەپ بايان قىلىپتۇ: «دۇنيانى تەۋرىتىدىغان ھەقىقىي خەۋەرلەر بىلەن ساتىرىك (ھەجۋىي، مەسخىرلىق) قىزىقچىلىقلارنى بىرلەشتۈرۈپ ئېلان قىلىپ، بۇ تور بېتىنىڭ زىيارەتچىلىرىنى بىر خىل گۇمانلىق ياكى ھەيرانلىق ھالىتىدە ساقلاش.»
ئالدىنقى ھەپتە ئىچىدە تورلاردا «ناسا تارقاتقان، خەلقئارا ئالەم پونكىتىدا مەشغۇلات ئېلىپ بېرىۋاتقان ئىككى ئالەم ئۇچقۇچىسىنىڭ ۋىدەئو فىلمىدا بىر ئۇچار تەخسە كۆرۈنۈپتۇ» دېگەن يەنە بىر خەۋەرمۇ تارقىلىپتۇ [3]. ھەتتا بۇ ئىشنى تۈركىيە قاتارلىق بەزى ئەللەردىكى تېلېۋىزورلارمۇ مەخسۇس خەۋەر قىلىپ بېرىپتۇ. مەن تورلارنى ئىزدەپ، ناسا دىكىلەر بۇ ئىش ھەققىدە ھېچ نېمە دەمىگەنلىكىنى بايقىدىم. ھازىرغىچە بۇ ئىش «ئۇچار تەخسە» ھەۋەسكارلىرىنىڭ تور بەتلىرىدىكى قىزىق تېمىلارنىڭ بىرى بولۇپ، ناسا ياكى باشقا بىرەر ھۆكۈمەت ئورگانلىرى ئۇ ھەقتە بىر نەرسە دېمەپتۇ.
2-رەسىم
2-رەسىم: ناسا ۋىدېئوافىلمىدىكى «ئۇچار تەخسە».
ئەگەر سىز يۇقىرىقىدەك خەۋەرلەرنى ئاڭلاپ، ئۇنىڭ راست-يالغانلىقىنى بىلەلمىسىڭىز، مەن بىلەن ئالاقىلىشىڭ. مەن ئۇنى ئېنىقلاپ بېرىشكە تىرىشىمەن.
پايدىلىنىش ماتېرىياللىرى:
[1] NASA Confirms Earth Will Experience 6 Days of Total Darkness in December 2014! <http://huzlers.com/nasa-confirms ... -december-2014/>
<http://huzlers.com/nasa-confirms ... -december-2014/>
[2] NASA: Viral news on days of darkness in December is hoax
<http://www.techtimes.com/article ... ber-is-hoax.htm>
[3] 'UFO' appears to watch NASA astronauts on ISS spacewalk
http://www.chron.com/news/strang ... 9.php#photo-6998154
|