«تاجسىز پادىشاھلار» نىڭ بايرىمىغا مۇبارەك
ئەسقەرجان ئەنۋەر ئەلسۆيەر
ھەر يىلى 8 - نويابىر خەل تىلچىسى، تارىخ پۈتۈكچىسى، دەۋر كۈيچىسى بولغان جاپاكەش مۇخبىرلارنىڭ بايرىمى. بايرام تەنتەنىسىگە سىلەر بىلەن تەڭ جۆر بولالىغانلىقىمدىن ئۆزۈمنى ئىنتايىن بەختلىك ھېس قىلماقتىمەن.
مۇخبىر دۇنيانى كۆزەتكۈچى، پاكىتنى سۆزلەتكۈچى، ئۇ ئۆز كۆزى بىلەن كۆرگەن، ئۆز قۇلىقى بىلەن ئاڭلىغان، ئۆز يۈرىكى بىلەن ھېس قىلغان، ئۆز كاللىسى بىلەن ئويلىغان نەرسىلەرنى يازىدۇ. ئاخبارات ئەسەرلىرىدىكى «مەن» ئەنە «شۇ سۆزلەۋاتقان» پاكىتلارنىڭ گۇۋاھچىسى. مۇخبىرلار مۇخبىرلىق كۆزى ئارقىلىق باشقىلار كۆرەلمىگەن، كۆرسىمۇ ھېس قىلالمىغان نەرسىلەرنى كۆرىدۇ ۋە ھېس قىلىدۇ. ئاخبارا ئەسىرىدە مۇخبىر «مەن» ئارقىلىق زىيارەت ئوبىكتى بىلەن يۈزمۇ يۈز تۇرۇپ ھېسىيات ۋە پىكىر ئالماشتۇرىدۇ. مۇخبىردا چوقۇم ئويناق تەپەككۇر، ئۆتكۈر كۆز بولۇشى كېرەك. چۈنكى ئادەتتىكى مۇخبىر بىلەن ئۆتكۈر كۆزلۈك مۇخبىر ئارىسىدا ناھايىتى زور پەرق بولىدۇ. كۆزى ئۆتكۈر مۇخبىر كىشىلەر دائىم ئۇچرىتىدىغان شەيئى - ھادىسىلەر ئارىسىدىن باشقىلار كۆرەلمەيدىغان نەرسىلەرنى بايقىۋالالايدۇ. مۇنداق كۆزنى ئۇلارغا كەسىپكە بولغان ساداقىتى، جاپالىق ئىزدىنىشى، ئۆگىنىش ئىرادىسى، پىداكارلىق روھى، ئادالەتنى ياقلاشتىكى جاسارىتى ۋە پاراسىتى ئاتا قىلغان. ياخشى مۇخبىر زىيارەت داۋامىدا تالاي جاپالىق يوللارنى بېسىپ، خەلقى، ئەل-ۋەتىنى ئۈچۈن تىنم تاپماي خىزمەت قىلىدۇ. بىراق، بىرەر قېتىممۇ ھاردىم-تالدىم دەپ داتلىمايدۇ. چۈنكى ئۇ ئۆزى سۆيگەن مۇخبرلىق كەسپىگە بارلىقىنى ئاتىغان بولىدۇ. مۇخبىرلار گۈلزارلىقتىن ئەڭ خۇشپۇراق گۈللەرنى تاللاپ خەلقىگە تەقدىم ئېتىش يولىدا جاپا چەككۈچىلەردۇر.
شۇنداق، مۇخبىرلىق ــ ئۇلۇغ كەسىپ، مۇخبىرلار «بۈگۈن» نىڭ يازغۇچىلىرى، «ئەتە» نىڭ تارىخچىلىرىدۇر. بۈگۈنكىدەك ئۇچۇرنىڭ رولى ھەرقانداق نەرسىنىڭ رولىدىن چوڭ بولىۋاتقان زامانىۋي جەمئىيەتنى مۇخبىرسىز تەسەۋۋۇر قىلىش مۇمكىن ئەمەس. مۇخبىرنىڭ كۆزى، قۇلىقى، قولى، ئاغزى، پۇتى پۈتۈنلەي ئاۋامنىڭ كۆزى، قۇلىقى، قولى، ئاغزى، پۇتى ئۈچۈن خىزمەت قىلىدۇ. مەلۇم مەنىدىن ئېيىتقاندا مۇخبىر بولۇش راستىنلا ئاسان ئىش، سىز كۆرگەن، ئاڭلىغانلىرىڭىزنى ئەينەن خاتىرلەپ قويسىڭىزلا مۇخبىر بولالايسىز. پەقەت جان باقىدىغان مۇخبىرلا بولالايسىز! خالاس. لېكىن ياراملىق مۇخبىر بولۇش ئۇنچە ئاسان ئەمەس. بىزدە تونۇلغان يازغۇچى، شائىرنىڭ كۆپ، تونۇلغان مۇخبىرنىڭ ئاز بولىشىمۇ بۇ نۇقتىنى چۈشەندۈرۈپ بېرىدۇ. بەلكىم مۇخبىرنىڭ مەنزىلى يازغۇچىنىڭ مەنزىلىدىن تېخىمۇ يىراق ۋە مۈشكۈل بولسا كېرەك.
مەن بۇ يازمام ئارقىلىق ئاخبارات سېپىدە جاپالىق ئىشلەۋاتقان ئاخباراتچىلىرىمىزنى سۆيۈندۈرەلىگەن بولسام ئۆزۈمنى ئىنتايىن بەختلىك ھېس قىلغان بولاتتىم. سىلەرنىڭ ئاخبارات سېپىدە تېخىمۇ جەڭگىۋارلىق بىلەن ئىشلەپ، ئىجادىيەت گۈلزارلىقىدىن تېخمۇ رەڭگارەڭ گۈللەرنى ئېچىلدۇرۇشۇڭلارغا تىلەكداشلىق بىلدۈرىمەن، بايرىمىڭلارغا مۇبارەك بولسۇن تاجسىز پادىشاھلار، مېھنەتكەش ئاخباراتچىلار!
(يازما ئىگىسى شىنجاڭ قانۇنچىلىق گېزىتىنىڭ مۇخبىرى)
|