ئوقۇتقۇچىلار كېچىلىرى نۆۋەتچىلىك قىلمايدىغان بولدى
شىنجاڭ قانۇنچىلىق گېزىتى مۇخبىرى ئەسقەرجان ئەنۋەر خەۋەر قىلىدۇ: ئاپتونوم رايونىمىزدىكى مەكتەپلەرنىڭ بىخەتەرلىكىگە كاپالەتلىك قىلىش خىزمىتىنى ياخشى ئىشلەش ئۈچۈن، بۇنىڭدىن كېيىن جەنۇبىي شىنجاڭنىڭ ئۈچ ۋىلايەت، بىر ئوبلاستىدىكى ئوتتۇرا – باشلانغۇچ مەكتەپلەر ۋە بالىلار باغچىلىرىنىڭ بىخەتەرلىك خىزمىتىگە راسخوت ياردىمى بېرىلىدۇ.
مۇخبىرنىڭ ئاپتونوم رايونلۇق مائارىپ نازارىتىدىن ئىگىلىشىچە، ئاپتونوم رايونىمىز جەنۇبىي شىنجاڭدىكى ئۈچ ۋىلايەت، بىر ئوبلاستتىكى ئوتتۇرا – باشلانغۇچ مەكتەپلەر ۋە بالىلار باغچىلىرىنىڭ بىخەتەرلىكىگە كاپالەتلىك قىلىش ئۈچۈن راسخوت ياردىمى بېرىدىغان بولۇپ، ياردەم قەشقەر ۋىلايىتى، خوتەن ۋىلايىتى، قىزىلسۇ قىرغىز ئاپتونوم ئوبلاستى ۋە ئاقسۇ ۋىلايىتىنىڭ ئۇچتۇرپان، كەلپىن، ئاۋات قاتارلىق ناھىيەلىرى دائىرىسىدە بولىدىكەن. ئاپتونوم رايونىمىز بۇ رايونلاردىكى ھەربىر مەكتەپكە تۆت ئامانلىق قوغدىغۇچى ھېسابىدا راسخوت ياردىمى بېرىدىغان بولۇپ، ھەربىر ئامانلىق قوغدىغۇچىغا بېرىلىدىغان بىر يىللىق تولۇقلىما 15 مىڭ 750 يۈەن بولىدىكەن. راسخوت ياردىمىگە كېتىدىغان خىراجەتنى ئاپتونوم رايون ۋە يەرلىك ئورتاق ئۈستىگە ئالىدىكەن.
ئاپتونوم رايونلۇق مائارىپ نازارىتىدىكى مەسئۇل خادىمنىڭ مۇخبىرغا ئېيتىشىچە، ئوقۇتقۇچىلارنىڭ نورمال ئوقۇتۇشىغا كاپالەتلىك قىلىش ئۈچۈن، بۇنىڭدىن كېيىن مەكتەپلەردە ئوقۇتقۇچىلار كېچىلىك نۆۋەتچىلىككە ئورۇنلاشتۇرۇلمايدىكەن. ھەر دەرىجىلىك مالىيە تارماقلىرى مەكتەپلەرنىڭ ئامانلىق قوغداش خىزمىتىنى ياخشى ئىشلەش ئۈچۈن تۈرلۈك مائارىپ مەبلەغلىرىنى بىر تۇتاش ئورۇنلاشتۇرۇپ، ئامانلىققا كاپالەتلىك قىلىشى لازىم ئىكەن.
(شىنجاڭ قانۇنچىلىق گېزىتىدىن ئېلىندى)
| 
يوللىغان ۋاقتى 2014-11-12 15:42:38
قېزىلما
ھەمبەھر
ساقلاش
قوللاش
قارشى
