«ئۇلۇغ»سىراش ئەرقىل
ئۆپكىسىنى ياتاقتا قويۇپ چىققان بالىلار، بويۇن ئۈزرە باش تۇرار، «تاش» ئەمەستۇر بالىلار.
ئۆزىڭىزدىن بىر گەپنى ئارتۇق قىلسا باشقىلار، كۆرۈنۈپ كەتكەن ئوخشايدۇ كارامەتچى ئەۋلىيا.
دېمىسىمۇ ئەسىرلەپ «ئۇلۇغ»سىرىغان قەلبىڭىز. نېچۈك ئۆتسۈن بۇ ھايات مۇرىدى يوق«غوجا»سىز.
مەرىپەتلىك بىنادىن يۇقماي سىزگە مەرىپەت، ئەلى مالىم بېرىپلا تاپتىڭىزمۇ ھىدايەت؟
يىگىرمىدە تەرىتى تۇتماس بولۇپ قالغانلار، خەقنىڭ تەرەت سۈيىدە ئابدەست-تەرەت ئالغانلار.
ئىلىمسىزگە جورىماڭ سىزدە تەرەت تۇرمىسا، تولا-يامان سەكرىمەڭ مازىرىڭىزغا تاش ئاتسا.
ئۇلۇغ بولسا خوجىڭىز تاش ئاتقانغا تېگەمدۇ؟ تەگمەك تۈگۈل ئاتقاننىڭ شورلۇق قولى قۇرۇيدۇ.
قورساق ئاغرىق بولمىسا قورقماڭ تاۋۇز يېيىشتىن، قورققىنىڭىزدا گەپ بارمۇ؟ زىۋىيدىخان خېنىمدىن.
چىراغ بولسۇن ئىلاھىم ئەلى مەلىم سۆھبىتى، قەپ قالمىسۇن جايىدا بوشقا كەتكەن يەل پېتى.
كىم بىلىدۇ سىزنىمۇ، سەكرەپ ئىزغا چۈشەمسىز؟ قالغان تۇرسا ياتاقتا ئۆتمەتۆشۈك ئۆپكىڭىز.
چوكا مۇھىم، قوشۇق مۇھىم شىرەدە، بىراق كۆزۈم مېنىكى قاچىدىكى«يېمەك»تە.
ئىتمۇ سۆڭەك يېگۈچە، كېڭەش قىلۇر كۆتىگە، ئېتىلغان ئوق چىققان سۆز، ئەسلا يانماس كەينىگە.
ئۇلۇغلارغا تاش ئېتىپ «ئۇلۇغ» بولماس ھېچ كىشى، ئۇلۇغلارمۇ ئۇنتۇلار ئاشسا ئۇندىن ھەر ئىشى.
ئېشەكنىمۇ ئۇچۇرساڭ قىل سىغمايدۇ ئۇچىدۇ، ئاغزى بىلەن شەھەر ئالغان نادان بىلەن ئۇچىدۇ.
ئالدىمىزدا كۆۋرۈك بار، ئالار سىزدىن ئىمتىھان، بۇ كۆۋرۈكتىن ئۆتۈشتە نې نوچىلار سىنالغان.
لاپ ئۇرغانلار جايىدا، مۇرىتلىرى ئۇياقتا، قەپ قالغاندا، ھەسسىنە دەپ قالمايلى ئۇياتتا.
ئۆلچىمەك تەس مەدەننى ئېغىزدىكى يەل بىلەن، ئالتۇنمۇ يا قەلەيمۇ بىر سىناقتا بىلىنەر.
بۇ خەلقنىڭ كۆۋرۈكى، ئەمەس نامەرت كۆۋرۈكى، مېغىزىنى ئۆزى يەپ، قالمىسىدى شۆپۈكى.
بىزمۇ قىسساق پۈرۈكنى تۈگەر ئىدى ھەممە ئىش، «لوتو جەنلەمويو»غا ئەسلا سوراق يوق ئىمىش.
ئوتقا ياغنى چاچقانغا ئۆچمەيدۇ ئۇ يېلىنجار، سۈكۈتكە چىدىماق تەسكەن كىم چىدار.
تۈگەنچە ئورنىدا
بېشىمغا يۈگۈرگەي بۇ تىل يۈگرۈكى، تۈكۈرسە يانغۇسى يۈزگە تۈكرۈكى.
بۇ «نادان» ئىچىدە ئۆزۈم بار ئۆزۈم، نادان نە دېمەكتۇر، يوقتۇر ھېچ يۈزۈم.
تەنقىدتىن قىيسىقلار تۈزۈلەر، سۇنماس، تاۋلىنار تەپەككۇر، قىلىچلار ئالماس.
بىر ئالىم تۇغۇلسا، ئەل ھەم شادلىنۇر، بۇ سەپلەر ئۈزۈلمەي نەچچە قاتلىنۇر.
سۈكۈتمۇ ئەمەستۇر ئىشنىڭ تۈزۈكى، بارچىغا سەۋەپتۇر ئالىم ئۆكسۈكى.
|