- تىزىملاتقان
- 2013-6-2
- ئاخىرقى قېتىم
- 2015-2-13
- ھوقۇقى
- 1
- جۇغلانما
- 859
- نادىر
- 0
- يازما
- 44
ئۆسۈش
71.8%
|
بۇ يازمىنى ئاخىرىدا yolimiz تەھرىرلىگەن. ۋاقتى 2015-2-13 22:42
ئەسسالامۇ ئەلەيكۇم باغداشتىكى مۇنبەرداشلار
بۇ يىل ئۇيغۇرلارنىڭ كىتاب ئوقۇش يىلى تەشەببۇسىغا ئاۋاز قوشۇش، ياش ئەۋلادلارنىڭ ئىلىمگە ئىنتىلىش، بىلىمىنى پۇختىلاش، كىتاب مەدەنىيىتى ۋە كىتاب ئوقۇش ئادىتىنى داۋاملاشتۇرۇشقا تۈرتكە بولۇش مەدەت بېرىش ئۈچۈن، 2-ئاينىڭ 13-كۈنى خوتەن ۋىلايىتى گۇما ناھىيەسىنىڭ تولۇق ئوتتۇرا مەكتىپىدە گۇما ناھىيەمىزنىڭ تۇنجى نۆۋەتلىك كىتاب ئوقۇش بايرىمى ئېچىلىش مۇراسىمى ئۆتكۈزۈلدى، پائالىيەتنى ناھىيەمىزدىن ھەرقايسى ئالىي مەكتەپلەردە ئوقۇپ تەتىلگە قايتىپ كەلگەن ياش ستۇدېنتلىرىمىز مۇنبەرلەردىكى كىتاب ئوقۇش يىلىغا ئاتاپ تەشكىللىگەن بولۇپ، پائالىيەت ناھىيەلىك يازغۇچىلار جەمئىيتىنىڭ باشچىلىقى، ستۇدېنتلارنىڭ نەچچە كۈنلۈك تەييارلىق كۆرۈشى، ھەرقايسى ساھەدىكى مەرىپەتلىك كىشىلىرىمىزنىڭ قوللاپ ياردەم بېرىشى بىلەن بۈگۈن ئوڭۇشلۇق ئۆتكۈزۈلدى.
پائالىيەتتە كىتاب ئوقۇش يىلىنىڭ ئوتتۇرىغا قويۇلۇشىنى تونۇشتۇرۇش، كىتاب ئوقۇشتىن تەسىرات سۆزلەش، شىئىر ئوقۇش، ئاۋازلىق ئەسەر ئاڭلاپ ئەسەر نامىنى تىپىش، ئۇيغۇر تارىخىي رومانلىرىنى ساناپ بېقىڭ، ئۇيغۇر مەشھۇرلىرىنى ساناپ بېقىڭ، يۇرت تارىخىنى سۆزلەپ بېقىڭ، يۇرتىمىزدىكى مەدەنىيەت يادىكارلىقلىرىدىن قانچىنى بىلىسىز، ئۇيغۇر تارىخىي رومانلىرىنى تونۇشتۇرۇش، كىتاب ھەدىيە قىلىش، كىتاب ئوقۇش قىزغىنلىقىنى يۇقىرى كۆتۈرۈش قاتارلىق تەرتىپلەر بولدى.
بۇ قېتىمقى پائالىيەتكە ماددىي جەھەتتىن ياردەم بەرگەن كوللىكتىپلار، شەخسلەر قىسقىچە تونۇشتۇرۇلدى: يەنى شىنجاڭ كۈيچى مەدەنىيەت تارقىتىش شىركىتى (بەش مىڭ يۈەن قىممىتىدە كىتاب ماتېرىيال ياردىمى)، ئۈرۈمچى بۇلاق كىتابخانىسى (كىتاب ياردىمى)، گۇما بۇلاق كىتابخانىسى (14-يانۋار كىتاب سىتىۋېلىش ئېتىبار باھا ياردىمى، ئىلىم سۆھبىتى)، گۇما شىنخوا كىتابخانىسى (كىتاب سىتىۋېلىش خەتچۈك ياردىمى)، دەۋر ئېلانچىلىقى، ئەنزار ئېلانچىلىقى، ئۈمىدۋار ئېلېكترون چەكلىك شىركىتى، يېشىل مەرۋايىت ھەمكارلىق كوپراتىپى قاتارلىق كوللىكتىپلار ماددىي جەھەتتىن قوللاپ ساخاۋەتلىك ياردىمىنى ئايىمىغان.
ئاخىرىدا ناھىيەلىك يازغۇچىلار جەمئىيىتىنىڭ ئەزاسى، تەشكىللىگۈچىسى ئەخمەتجان تۇرۇپ بەگتۈرك ئەپەندى كىلەر نۆۋەتلىك (كىلەر يىللىق) كىتاب ئوقۇش بايرىمىنىڭ 2-ئاينىڭ 21-كۈنى دۇنيا ئانا تىل كۈنىدە ئۆتكۈزۈلىدىغانلىقىنى جۇشقۇنلۇق بىلەن ئېلان قىلدى. پائالىيەت ئىشتىراكچىلىرى قىزغىن ئالقىشلار بىلەن كىلەر نۆۋەتلىك كىتاب ئوقۇش بايرىمىنى ئالدىن قۇتلۇقلاشتى ھەمدە ئۇيغۇر دېگەن مۇشۇنداق ناملىق ناخشىغا كوللىكتىپ مەشرەپكە چۈشۈشتى.
پائالىيەتكە ناھىيەگە قاراشلىق بىر قىسىم ئورۇنلاردىن تەكلىپ قىلىنغان مھېمانلار، ناھىيەلىك يازغۇچىلار جەمئىيتى، مائارىپ سىستېمىسىدىكى بىر قىسىم ئوقۇتقۇچى-ئوقۇغۇچىلار بولۇپ 160 كە يىقىن ئامما قاتناشتى.
تەكلىپنامىگە يېزىلغان مۇنۇ شىئىر بەك ياخشىكەن: كۆزى كورنى كەمسىتمەڭ، كور كىشىگە كۆز كىتاب.
كۈچسىزلەرگە كۆپ كايىماڭ، كۈچسىزلەرگە كۈچ كىتاب.
كىتابنى كۆپ كۆرسىڭىز، كىر كۆڭۈللەر كېتىدۇ.
كۈلىدىغان كۈنلەرمۇ، كېچىكمەيلا كىلىدۇ.
كىتاب كۆرۈڭ كىشىلەر، كىتاب كامال كەلتۈرۈر.
كۆپرەك كىتاب كۆرگەننىڭ، كۆڭلى-كۆكسى كەڭ كىلۇر.
|
|