ئۆتكۈرسىز كۈنلەر
ئابدۇۋەلى ئايۇپ | 2015 - يىلى 17 - سېنتەبىر
بۇنىڭدىن يىگىرمە يىل بۇرۇنقى 5- ئۆكتەبىردە سارە ئىسىملىك بىر قىز قار - يامغۇر تۆكۈلۈپ ئالدىمغا كەلدى. نېمە بولغانلىقىنى بىلىپ كۆز ياشلىرىم بىلەن ئۇ قىزغا جۈر بولدۇم. ئۆتكۈرسىز قاپتۇق. بۇ قىز مۇتەللىپ ئىسىملىك ئۆزۈمدىن كىچىك دوستۇمنىڭ ساۋاقدېشىكەن. مۇسىبەتتىكى پىغانلىرىمىزنى ساۋاقداشلار بىلەن قانداق ئورتاقلىشىش توغرىسىدا ھەمسۆھبەت بولدۇق. ئۇ چاغلاردا ئۇستازىمىز ئابدۇرەئۇپ پولات تەكلىماكانى دەستەكلەۋاتقان ‹ئەنجۈمەن› ناملىق بىر ئىلىم سورۇنىغا يېتەكچى ئىدىم. ئادەتتە ئەنجۈمەنىمىز ئىككى ھەپتىدە بىر ئورۇنلاشتۇرۇلىدىغان بولغاچقا، ئۆتكۈر ئەپەندىنىڭ ۋاپاتىغا ئاتاپ تويۇقسىز پائالىيەت تەشكىللەشكە ئامالسىز ئىدۇق. ئۇيان چاپا، بۇيان چاپا سارە بىلەن مۇتەللىپنىڭ ياشلىق كۆزلىرىدىن كۆزلىرىمنى تەستە قاچۇرۇپ، ئىمكان بولمىغانلىقىنى ئەنجۈمەن تەشنالىرىغا ئۇقتۇرۇش قىلىشقا مەجبۇر بولدۇم. ئەمما، شۇ كۈنكى ياشلانغان كۆزلەر، تۈرۈلگەن قوشۇمىلار، ئۆمچەيگەن لەۋلەرگە ھازىرغىچە يۈز كېلەلمەيمەن. شۇ چاغلاردا يۈرەكتىن سۆيگەن كىشىلىرىنى قەلب تۆرىدە ئەزىزلەيدىغان ئۇيغۇرنىڭ «ئالىم ئۆلدى، ئالەم ئۆرۈلدى» دەپ چەككەن پىغانى ئالدىدا مەن چارەسىز ئىدىم. ئۆتكۈرسىز قالدۇق. ھەر قېتىم بېشىمىزغا مۇسىبەت كېلىپ كۆزىمىزگە زۇلمەت تىقىلغاندا، ھەسرەت بىلەن ئۇنى ئەسلىدۇق. خۇددى بىزگە بىر يول كۆرسىتىدىغاندەك، خۇددى بىزگە مەشئەل سۇنىدىغاندەك، سۇنغان روھىمىزغا، قاغجىرىغان ئارمانلىرىمىزغا، قانىغان قەلبىمىزگە مەلھەم بېرىدىغاندەك... لېكىن يەنە ئويلىدۇق، ئۆتكۈرسىز كۈنلەردە. كەتكىنى ھېكمەتكەن... چىدىيالمايتتى، يۈز كېلەلمەيتتى، يېرىلىپ كېتەتتى. كۆزى ئوچۇق كېتەتتى، يۈرىكى چاك كېتەتتى، يۈزى غەمناك كېتەتتى... 2005 - يىلى تۈركىيەدە ئىلمىي زىيارەتتە بولغىنىمدا ئۆتكۈر ئەپەندىنىڭ «ئىز»، «ئويغانغان زېمىن» دېگەن رومانلىرىنى ۋە «ئۆمۈر مەنزىللىرى»، «تارىم بويلىرى» ناملىق شېئىرلار توپلاملىرىنى ھەر بىر ئۇيغۇرنىڭ كىتاب ئىشكابىدا دېگۈدەك كۆردۈم - دە، خەلقپەرۋەر رەھبەر تۆمۈر داۋامەتنىڭ «سەندەك ياشىسام» ناملىق مەرسىيەسىنى ئەسلىدىم. شۇنداق ياشىغۇم كەلدى. ئۆتكۈر ئەپەندىمدەك ئەسەرلىرىم بىلەن سۆيۈلۈپ، مېنى سۆيگەنلەرنىڭ ياشلىرىنى سۈرتۈپ، كۈلكىسىگە كۈلۈپ، ئىززىتىگە جان تىكىپ... 2015 - يىلى گازى (غازى) ئۇنىۋېرسىتېتىنىڭ پىروفېسسورى، ئابدۇرېھىم ئۆتكۈر ھەققىدە ئىككى قىسىملىق كىتاب يازغان ھۈليا قاساپئوغلۇ خانىمنىڭ مۇشۇ يىل ئىچىدە مەرھۇم ۋاپاتىنىڭ يىگىرمە يىللىقىغا ئاتاپ مۇراسىم قىلماقچى بولغانلىقىدىن سۆيۈندۈم. پەخىرلىك دوكتورىمىز زۇلپىقار بارات ئۆزباشنىڭ ئالىمىمىزدىن ئايرىلغان يىگىرمە يىللىق ھىجران ئازابىغا پائالىيەتلەر بىلەن تەسەللى بەرگەنلىكىدىن مەمنۇن بولدۇم. تۈركىيەدىكى داڭلىق ناخشىچى، پارلامېنت ئەزاسى ئۇغۇر ئىشىلاق ئەپەندىنىڭ مەرھۇم ئالىمىمىزنىڭ «ئۇچراشقاندا» ناملىق شېئىرىغا ئاساسەن ئىشلەنگەن ناخشىنى يۇقىرى سەۋىيەدە ئۇرۇنلىغىنىدىن پەخىرلەندىم. ھىندىستان باش مىنىستىرى مودىنىڭ مەرھۇم ئالىمىمىزنىڭ «ئىز» ناملىق شېئىرىنى ئىنگلىزچە دېكلىماتسىيە قىلغانلىقىدىن ئالەمچە ئىپتىخارلاندىم. ئۆتكۈرسىز كۈنلەر ئۆتكۈرنىڭ ساداسى بىلەن بىزنى ئويغاتتى. ئۆتكۈرسىز كۈنلەر ئۆتكۈرنىڭ نىداسى بىلەن بىزنى يىغلاتتى. ئۆتكۈرسىز كۈنلەر بىزنى كىم بولۇش ۋە كىم بولماسلىق ھەققىدە ئازابلىق ئويلارغا مۇپتىلا قىلدى.
ئەسكەرتىش: يازغۇچىنىڭ ھاۋالىسىگە ئاساسەن يوللاندى. |