ئەركىم: ئەسىرلىك توغراقلارنىڭ پىچىرلىشى

arkim

ئەسىرلىك توغراقلارنىڭ پىچىرلىشى

مۇجىبۇل راخمان ئەركىم

    پۈتۈن يەرشارىدا پەقەتلا ئۈچ يەردە كۆلىمى چوڭ ئۈچ پارچ توغراقلىق ساقلىنىپ قالغان بولۇپ، بۇنىڭ بىرى دەل قومۇل ۋىلايىتى ئاراتۈرك ناھىيسى نوم بازىرىنىڭ جەنۇبىغا ئورۇنلاشقان نوم توغراقلىقىدۇ. نوم توغراقلىقى جۇڭگودىكى ئىككى چوڭ توغراقلىقىنىڭ بىرى. دۇنيادىكى شەھەرگە (نوم بازىرىغا) يېقىن ھەمدە سانائەت رايونىغا ئەڭ يېقىن بولغان تەبىئىي توغراقلىق. كۆلىمى 47.6 تۈمەن كۇۋادىرات مېتىر كېلىدىغان بۇ توغراقلىققا يىراق يېقىندىن كېلىۋاتقان ساياھەتچىلەرنىڭ ئايىقى ئۈزۈلمەيدۇ. پايانسىز چۆللۈكنىڭ بىر چېتىدە مۆجىزىلەردەك ئۆز مەۋجۇتلىقىنى ساقلاپ، مەردانە ياشاۋاتقان بۇ توغراقلىقنىڭ باشقا توغراقلىقلار بىلەن يەنە بىر ئوخشىمايدىغان تەرپى شۇكى، بۇ يەردە دەريا يوق، نوم توغراقلىقى يەر ئاستى سۈيىنىڭ ياردىمىدە كۆكىرىپ كەلمەكتە. ئەڭ ياشلىرى تېخى بۇ يىل يازدا  بىخلىغان، ئەڭ قېرىلىرى تۈمەن يىللاردىن ئاشقان توغراقلارنىڭ شەكلى بەتبەشرە ئالۋاستى، ئاجايىپ-غارايىپ مەخلوقلارغا ئوخشىسا، توساتتىنلا ئەتىراپىڭىزدا غۇلاچ كېرىپ ساماغا چۈشكەن بەردەم قىز-يىگىتلەرنىڭ سىماسىنى كۆرىسىز، ھەتتا بەزى توغراق كۆرۈنىشلىرى ئاسماندىن لەرزان ئۇچۇپ چۈشكەن ھۈر پەرىلەردەك كۆرۈنسە، بەزىلىرى ھۇررا توۋلاپ جەڭگە ئاتلانغان باتۇر جەڭچىلەرنى ئەسلىتىدۇ...بۇ يەر خۇددى بىر جەڭگاھقا ئوخشايدۇ. بۇ يەردە سىز ھاياتلىقنىڭ يارقىن جىلۋىسى ھەم ماماتلىقنىڭ سوغوق تەبەسسۇمىنى كۆرۈپ ھېس قىلالايسىز. سىز بۇ يەردە ئۈمىد ۋە ئىشەنىچنىڭ، چىدام ۋە جاسارەتنىڭ قۇچىقىدا ئەللەيىلىنىسىز، ئۇشبۇ ئەسىرلەر مابەينىدە قۇرۇپ قاقشال بولۇپ قالغان گاھى توغراقلارنىڭ يەنىلا كۆكلەپ تۇرغان ياپراقلىرى سىزگە ھاياتنى قانداق سۆيۈشنى، مۇشكۈللەرگە قانداق تاقابىل تۇرۇشنى ئۈن-تىسىز پىچىرلاپ بېرىدۇ...قېنى سىز توغراقلارنىڭ پىچىرلىشىنى ئاڭلىيالامسىزكىن؟!



ئۇيغۇرغول سۈرەتچلىرى-مۇجىبۇل راخمان ئەركىم فوتوسۈرەتلىرى

توغراقلىقتىكى مالچىنى ئۆيى  
   

يىللار ئىزى

ئەسىرلىك چىدام

ئۈمىدنىڭ پايانى

قەد كۆتۈرۈش

كۈتۈش

ئىنتىلىش

بەسلىشىش

چىدام

مېنىڭ باغرىم

يىللار ئارلىقى

ئۈمىد يۇلتۇزلىرى

قاچان كېلىسەن...

توغراق بۇغا

2015-يىلى10-ئاينىڭ15-كۈنى قومۇل

3626

تەبىئەتنىڭ مۆجىزىكار مەنزىرىلىرىدىن ھوزۇرلاندۇرغىنىڭىزغا رەھمەت، قېرىندىشىم. نوم توغراقلىقى ھەقىقەتەن كۆرۈپ كىلىشكە ئەرزىيدىكەن. شاياردىمۇ بىر توغراقلىق باكەن ئالۋاستى ئورمانلىقى دىگەن نام بىلەن ئاتالغان.

amul

سۈرەتلەرنى ياخشى تارتىپسىز ھەم ياخشى ئىسىم قويۇپسىز،رەھمەت سىزگە.

BOGHDAY

قۇيۇلغان ئىسىملار بەك ماس كەپتۇ.

ablizmuhemmet

مەن دەل مۇشۇ يازمىدا دېيىلگەن نوم دىيارىدا چوڭ بولغان، مۇشۇ پايانسىز توغراقلىقلار مېنىڭ بالىلىقتىكى ئەسلىمىلىرىمنىڭ، جاپالىق دەملىرىمنىڭ گۇۋاھچىلىرى. بىز ئائىلىمىزنىڭ ئوتۇن ئېھتىياجىنى دەل مۇشۇ چەكسىز توغراقلىقلاردىن ئوتۇن ئېپكېلىش بىلەن قامدىغان؛ قىشنىڭ قەھرىتان سوغۇقلىرىدا، يازنىڭ پىژغىرىم ئىسسىقلىرىدا ئېشەك ھارۋىسى بىلەن مۇشۇ جاڭگالدىن توغراق، قاخشال، قاڭغىرو، يۇلغۇنلارنى توشۇپ ئوتۇن ئېپكېلىدىغان. بىز ئانا تەبىئەتنىڭ بىزگە تالىق نېمەتلىرىنى ئۆزىمىزنىڭ جاپالىق ئەمگەكلىرى، قەيسەر ئىرادىسى بىلەن قولغا كەلتۈرۈپ، ھەممىنى ئۆز تىرىشچانلىقىمىز بىلەن ھەل قىلىپ ياشاپ كەلگەن ئىدۇق. ھازىرقىدەك ھەممە نەرسە تەل زامانلار ئۇ چاغلاردا نەدە دەيسىلەر؟! ھازىر مەن ھەر قېتىم نومدىكى توغراقلىقلارنى ئارىلىسام، ئەشۇ جاپالىق، ئەمما غەمسىز چاغلىرىم كۆز ئالدىمغا كېلىدۇ. ھەر بىر ئىشنىڭ ئۆزىگە لايىق بىر ھېكمىتى بار بولغان مۇشۇ ئالەمدە، ئەشۇ چاغلاردىكى تارتقان جاپالار، قىلغان ھەر بىر ئىشلارنىڭ ئۆزىگە لايىق ھېكمەتلىرىنى ھەر دائىم ھېس قىلىمەن ۋە شۈكۈرلەر ئيتىمەن.
مېنىڭ بالىلىق ئەسلىمىلىرىمنىڭ پىلتىسىگە ئوت تۇتاشتۇرغان قېرىمدىشىم مۇجىبۇل راخمان ئەركىمنىڭ بۇ يازمىسىغا رەھمەت.
   ئەمدى يازمىدىكى كىچىككىنە بىر يەرگە ئىزاھ بېرىپ قويسام، نوم دىيارىدىكى توغراقلىقلار نومنىڭ شەرق، شىمال ۋە غەرب تەرىپىدە، ئاساسەن تۇتاش توغراقلىق بولۇپ، بۇنىڭدىن باشقا يەنە نومدىن غەربكە يەتمىش كىلومېتىرچە  بولغان يەردە  كىچىك نوم دەپ بىر يەر بولۇپ، ئۇمۇ نومنىڭ زېمىنى، بۇ يەردىمۇ پارچە-پارچە توغراقلىقلار بار، يازمىدا «نوم بازىرىنىڭ جەنۇبىغا ئورۇنلاشقان نوم توغراقلىقىدۇر» دەپ خاتا يېزىلىپ قاپتۇ. نوم بازىرىنىڭ جەنۇب تەرىپى قاقاس سايلىق بولۇپ، بۇ ساي تاكى ئاداق يېزىسىنىڭ چېگرىسىغىچە داۋام قىلىدۇ.

arkim

ablizmuhemmet يوللىغان ۋاقتى  2015-10-16 18:05
مەن دەل مۇشۇ يازمىدا دېيىلگەن نوم دىيارىدا چوڭ بولغان، ...

رەھمەت، مەن خاتالىشىپتىمەن...