ئەركىم: ۋاقىت بىر بەڭگى

arkim

ۋاقىت بىر بەڭگى

مۇجىبۇل راخمان ئەركىم

كۈلداندا ئۆچمىگەن تاماكا ئىسى،

ئوخشايدۇ يۈرەكنىڭ ھالىغا شۇتاپ.

گاھىدا ئەي دەرتمەن بەڭگىلەر ئۆيى،

قالىدۇ بۇلغانغان شەھەرگە ئوخشاپ.

بۇ ھايات بىر دانە تاماكا بەلكىم،

كۆيگەن، چېكىلگەن، كۈلگە ئايلانغان.

خۇمارى بېسىلماي كېتەركەن ھەركىم.

كۈلگەن، يىغلىغان، ياشىغان ھامان.

بۇ ۋاقىت چېكىدۇ بىزنى ھەركۈنى،

بىزمۇ ھەم چېكىمىز چوغ يا مۇز شۈمەپ.

بىلمەيمىز بۇ يىللار، ئەجەل ئاخىرى،

ئۆچۈرەر ئۆمۈرنىڭ شامىنى پۈۋلاپ.

تولۇپتۇ كۈلدانىم، تولۇپتۇ قەلبىم،

ئۆچكەن، ئۆچمىگەن چوغلارغا، كۈلگە.

تۇغۇلۇش بەخىتتۇر كىملەرگە بەلكىم،

كىملەرگە بەختمۇ مەسخىرلىك كۈلكە.

2016-يىلى1-ئاينىڭ28-كۈنى  قومۇل

---

سۈرەت مەنبەسى: تور دۇنياسى

uyghurizlari

توغرا ، ۋاقىت بىر بەڭگە كۆيدۈرۈپ تۈگىتىدۇ... ياخشى شېئىركەن. ئەمما نىمىشقىكىن سىزنىڭ شېئىرلارغا قارىغاندا تەتقىقات خاراكتىلىك ئەسەرلىرىنىڭ بەكرەك ياقتۇرىمەن، ھەم شۇ خىلدىكى ئەسەرلەرنى كۆپرەك يېزىشىڭىزنى ئۈمۈد قىلىمەن. بىزگە كېرىكى شۇ

AmanxahaR

قۇرۇلمىسى ياخشى ،مەزمۇنىدىن ئۈمۈدسىزلىك چىقىپ تۇرۇدۇ، ئىنسان ئۈچۈن قىممەتلىك سانالغان ھاياتلىقنىڭ دۈشمىنى ئاتالغان تاماكىغا ئوخشىتىلىشىنى .........   .

sheydai

ئوخشىتىش ھەقىقەتەن ئورنىنى تېپىپتۇ. ئىككىنچى كۇپلېتنىڭ بىرىنچى مىسراسىدىكى ئۆلچەمنىلا ئوڭشاپ قويسىڭىز شۇنداق ياخشى چىقىپتۇ، پەدىمۇ چاقمىغۇدەك.

bahtim

ئاخىرقى سۈرەتلەر شېئىرغا شۇنداق ماس كەپتۇ ،

nurhayat1

مەنىسى چوڭقۇر ئادەمنى چوڭقۇر ئويغا سالغۇداك تىما بۇپتۇ بۇ ....