ئۇيغۇر لاتېن يىزىقى
Noruzname
(rozi sayit)
،Bügün noruz, bügün uyghurche chaghandur
.bügün noruz-bahar her yanda jewlandur
،Bügün noruz-shipasi jan'gha dermandur
.chéchek-chokan putaq-shaxlarda seylandur
،Bu noruz-yil béshi, qish emdi sersandur
Zémin, tagh, su... Özige xas "pichir" qilghay
qiyaq-chimlardimu sezgü-"ghichir" qilgha
Qanatliqlarmu küyleshte "wichir" qilghay
hayat shundaq tinimsiz bir uchur qilghay
Uchurki yil béshi her ishqa imkandur
Bowaqlar paxtiliq ishtanidin azad
bowaylar mesh-ochaqliq xanidin azad
Kélinler ot yéqish alwanidin azad
taghar, ketmen, sapan "zindan"din azad
Bésiqmas emdi "hush-tap!" tangla xamandur
Hélitin newriler oghlaqchilap taqlap
térip kök "yéngiliq"ni bökide saqlap
"söyünchengni chiqar!" dep, chonglini yoqlap
yéshilliq tebiri zoqida dil toqlap
Quchaqta erkilep her öyde méhmandur
Yene bar: shox, zérekler bekini chaqlap
chiwiq-talni késip sirt postini aqlap
Yasap ney, püwliship xushluqta oynaqlap
jéni patmas ichige külse "qaq-qaq"lap
Bu noruz shoxluqi-shad, ghelwe-ghelyandur
Kichik qizlar qilip chach qiriq örüm talni
siqip osma, qaraytip qash, chékip xalni
Qulaqigha qisip ghunche-qizil, alni
bahardin reng tüzep doraydu "naz-hal"ni
Bu dorash bek omaq, chonglarmu heyrandur
Yigit-qizlarmu rastlap keng-kushade seyna
yéshil mewsumgha xas meshrep tüzer eyna
Quchar kökni bu söz: bosh kelmigin, oyna
hérish merdlerge yat, sazingni chal, qayna
Bu noruzluq muhebbet, söygü, armandur
Qiziydu ete noruzda chewendazliq
darwazliq, chélishish hem séhir, janbazliq
Buqa, qochqar, xoraz, it... Ichre jengwazliq
sama, meshrep, usul, dillarda hemrazliq
Bu, noruzgha teelluq külke-xendandur
Qilur jem ushbu noruz minglighan bashni
biri dangqan qazan, biri asar dashni
Gaday, shah-barche teng ichkey tamaq-ashni
tiler qut yurtqa beriket, bille yayrashni
Qedimdin ushbu adet bizge qalghandur
ئۇيغۇر ئەرەب يىزىقى
نورۇزنامە
(روزى سايىت)
بۈگۈن نورۇز، بۈگۈن ئۇيغۇرچە چاغاندۇر،
بۈگۈن نورۇز-باھار ھەر ياندا جەۋلاندۇر.
بۈگۈن نورۇز-شىپاسى جانغا دەرماندۇر،
چېچەك-چوكان پۇتاق-شاخلاردا سەيلاندۇر.
بۇ نورۇز-يىل بېشى، قىش ئەمدى سەرساندۇر.
زېمىن، تاغ، سۇ... ئۆزىگە خاس »پىچىر« قىلغاي،
قىياق-چىملاردىمۇ سەزگۈ-»غىچىر« قىلغاي.
قاناتلىقلارمۇ كۈيلەشتە "ۋىچىر" قىلغاي،
ھايات شۇنداق تىنىمسىز بىر ئۇچۇر قىلغاي.
ئۇچۇركى يىل بېشى ھەر ئىشقا ئىمكاندۇر.
بوۋاقلار پاختىلىق ئىشتانىدىن ئازاد،
بوۋايلار مەش-ئوچاقلىق خانىدىن ئازاد.
كېلىنلەر ئوت يېقىش ئالۋانىدىن ئازاد،
تاغار، كەتمەن، ساپان »زىندان«دىن ئازاد.
بېسىقماس ئەمدى »ھۇش-تاپ!« تاڭلا خاماندۇر.
ھېلىتىن نەۋرىلەر ئوغلاقچىلاپ تاقلاپ،
تېرىپ كۆك »يېڭىلىق«نى بۆكىدە ساقلاپ.
»سۆيۈنچەڭنى چىقار!« دەپ، چوڭلىنى يوقلاپ،
يېشىللىق تەبىرى زوقىدا دىل توقلاپ.
قۇچاقتا ئەركىلەپ ھەر ئۆيدە مېھماندۇر.
يەنە بار: شوخ، زېرەكلەر بەكىنى چاقلاپ،
چىۋىق-تالنى كېسىپ سىرت پوستىنى ئاقلاپ.
ياساپ نەي، پۈۋلىشىپ خۇشلۇقتا ئويناقلاپ،
جېنى پاتماس ئىچىگە كۈلسە "قاق-قاق"لاپ.
بۇ نورۇز شوخلۇقى-شاد، غەلۋە-غەلياندۇر.
كىچىك قىزلار قىلىپ چاچ قىرىق ئۆرۈم تالنى،
سىقىپ ئوسما، قارايتىپ قاش، چېكىپ خالنى.
قۇلاقىغا قىسىپ غۇنچە-قىزىل، ئالنى،
باھاردىن رەڭ تۈزەپ دورايدۇ "ناز-ھال"نى.
بۇ دوراش بەك ئوماق، چوڭلارمۇ ھەيراندۇر.
يىگىت-قىزلارمۇ راستلاپ كەڭ-كۇشادە سەينا،
يېشىل مەۋسۇمغا خاس مەشرەپ تۈزەر ئەينا.
قۇچار كۆكنى بۇ سۆز: بوش كەلمىگىن، ئوينا،
ھېرىش مەردلەرگە يات، سازىڭنى چال، قاينا...
بۇ نورۇزلۇق مۇھەببەت، سۆيگۈ، ئارماندۇر!
قىزىيدۇ ئەتە نورۇزدا چەۋەندازلىق،
دارۋازلىق، چېلىشىش ھەم سېھىر، جانبازلىق.
بۇقا، قوچقار، خوراز، ئىت... ئىچرە جەڭۋازلىق،
ساما، مەشرەپ، ئۇسۇل، دىللاردا ھەمرازلىق.
بۇ، نورۇزغا تەئەللۇق كۈلكە-خەنداندۇر.
قىلۇر جەم ئۇشبۇ نورۇز مىڭلىغان باشنى،
بىرى داڭقان قازان، بىرى ئاسار داشنى.
گاداي، شاھ-بارچە تەڭ ئىچكەي تاماق-ئاشنى،
تىلەر قۇت يۇرتقا بەرىكەت، بىللە يايراشنى.
قەدىمدىن ئۇشبۇ ئادەت بىزگە قالغاندۇر.
ئۇيغۇر سىلاۋىيان يىزىقى
норузнамә
(рози сайит)
бүгүн норуз, бүгүн уйғурчә чағандур,
бүгүн норуз-баһар һәр янда җәвландур.
бүгүн норуз-шипаси җанға дәрмандур,
чечәк-чокан путақ-шахларда сәйландур.
бу норуз-йил беши, қиш әмди сәрсандур.
земин, тағ, су... өзигә хас "пичир" қилғай,
қияқ-чимлардиму сәзгү-"ғичир" қилғай.
қанатлиқларму күйләштә "вичир" қилғай,
һаят шундақ тинимсиз бир учур қилғай.
учурки йил беши һәр ишқа имкандур.
бовақлар пахтилиқ иштанидин азад,
бовайлар мәш-очақлиқ ханидин азад.
келинләр от йеқиш алванидин азад,
тағар, кәтмән, сапан "зиндан"дин азад.
бесиқмас әмди "һуш-тап!" таңла хамандур.
һелитин нәвриләр оғлақчилап тақлап,
терип көк "йеңилиқ"ни бөкидә сақлап.
"сөйүнчәңни чиқар!" дәп, чоңлини йоқлап,
йешиллиқ тәбири зоқида дил тоқлап.
қучақта әркиләп һәр өйдә меһмандур.
йәнә бар: шох, зерәкләр бәкини чақлап,
чивиқ-тални кесип сирт постини ақлап.
ясап нәй, пүвлишип хушлуқта ойнақлап,
җени патмас ичигә күлсә "қақ-қақ"лап.
бу норуз шохлуқи-шад, ғәлвә-ғәляндур.
кичик қизлар қилип чач қириқ өрүм тални,
сиқип осма, қарайтип қаш, чекип хални.
қулақиға қисип ғунчә-қизил, ални,
баһардин рәң түзәп дорайду "наз-һал"ни.
бу дораш бәк омақ, чоңларму һәйрандур.
йигит-қизларму растлап кәң-кушадә сәйна,
йешил мәвсумға хас мәшрәп түзәр әйна.
қучар көкни бу сөз: бош кәлмигин, ойна,
һериш мәрдләргә ят, сазиңни чал, қайна...
бу норузлуқ муһәббәт, сөйгү, армандур!
қизийду әтә норузда чәвәндазлиқ,
дарвазлиқ, челишиш һәм сеһир, җанбазлиқ.
буқа, қочқар, хораз, ит... ичрә җәңвазлиқ,
сама, мәшрәп, усул, дилларда һәмразлиқ.
бу, норузға тәәллуқ күлкә-хәндандур.
қилур җәм ушбу норуз миңлиған башни,
бири даңқан қазан, бири асар дашни.
гадай, шаһ-барчә тәң ичкәй тамақ-ашни,
тиләр қут юртқа бәрикәт, биллә яйрашни.
қәдимдин ушбу адәт бизгә қалғандур.
بىيجىڭدىكى ئۇيغۇرلارنىڭ 2016-يىللىق ئەنئەنىۋى بايرام<نەۋرۇز بايرىمى >لىق پائالىيەتلىىرىدىكى كۆرىنىشلەردىنبەھىرلىنەيلى .
|