ئىككى ئايال، ئىككى خىل دۇنيا
جۇ دامىڭ
نەچچە يىل بۇرۇن مەلۇم بىر ئاشخانىغا كېتىۋاتسام، يۈزىنى ئورۇۋالغان بىر قىز يېنىمدىن ئۆتۈپ كەتتى، كۆزىنىڭ ئەتراپىدىكى كۆيۈكتىن قالغان تارتۇقتىن ھۆكۈم قىلىشقا بولىدۇكى، چىرايى كىسلاتا بىلەن بۇزۇۋېتىلگەن بولۇپ، ئىنتايىن قورقۇنچلۇق بولۇپ قالغانىدى.
كەينىمگە بۇرۇلۇپ يۈزىنى ئورۇۋالغان بۇ قىزغا قارىشىمغا، ئۇمۇ كەينىگە بۇرۇلۇپ ماڭا قارىدى، خۇددى مەن ئۇنىڭغا قىيامەتلىك قەرز بولۇپ قالغاندەك كۆزلىرىدىن شۇملۇق يېغىپ تۇراتتى، قورققىنىمدىن تېنىم شۈركىنىپ كەتتى.
ئاشخانىغا كىرىپ ئەمدىلا ئولتۇرۇشىمغا، يەنە بىر قىز مەن تەرەپكە قاراپ كەلدى، ئۇ قىز ئىنتايىن چىرايلىق ئىدى، داڭقېتىپ تۇرۇپلا قالدىم، ئۇ قىلچىمۇ قورۇنماستىن:«جۇ باش دېرىكتور، بۇ مەن، رىزۋانگۈل! ئىلگىرى سىلەرنىڭ‹ت ر گ› دا ئىشلىگەن، مېنى ئەسلىيەلمىگەن بولۇشىڭىز مۇمكىن، ‹ت ر گ› مېنى تەربىيەلىگەن، ھازىرغىچە ئېسىمدىن چىقمايدۇ، بۇ بىر ۋاخ تاماقتا مەن مېھمان قىلاي!...» دېدى.
«رەھمەت سىزگە، سىزنى كۆرگىنىمدىن ئىنتايىن خۇشالمەن! » -دەپ جاۋاب قايتۇردۇم، ۋە ئۇلاپلا: « ھازىر نەدە خىزمەت قىلىۋاتىسىز؟» دەپ سورىدىم، كۆڭلۈمدە بۇ قىز خۇددى پەرىشتىگە ، يۈزىنى ئورۇۋالغان ھېلىقى قىز بولسا ئالۋاستىغا ئوخشايدىكەن دەپ ئويلىدىم.
-مەن ئاپتونوم رايونلۇق XX نازارەتتە ئىشلەۋاتىمەن، يېقىندا تېخى بۆلۈم باشلىقلىقىغا ئۆستۈرۈلدۈم، «ت ر گ» مېنى يېتىشتۈرگەن بۆشۈك!- دېدى رىزۋانگۈل ھاياجانلانغان ھالدا.
بىز تاماق يېگەچ پاراڭلىشىپ، خېلى ئۇزۇن ۋاقىت ئۆتكەندىن كېيىن خوشلاشتۇق.
ئۆيگە قايتىش يولىدا بۇ قىز مىننەتدارلىقنى بىلىدىغان قىز ئىكەن، كەلگۈسى چوقۇم پارلاق بولىدۇ دېگەنلەرنى ئويلاپ چوڭقۇر خىيالغا غەرق بولدۇم.
سۆزلىسەم غەلىتە تۇيۇلۇشى مۇمكىن. نەچچە كۈندىن كېيىن دۆڭكۆۋرۈكتە بازار ئايلىنىۋېتىپ، بىر جۈپ پارقىراپ تۇرغان خۇرۇم ئاياغقا كۆزۈم چۈشتى، دەل مۇشۇ ۋاقىتتا ئاياغ دۇكىنىنىڭ دېرىزىسىدىن ھېلىقى يۈزىنى ئورۇۋالغان قىزنىڭ چىرايى زاھىر بولدى، خۇددى ئەرۋاھقا ئوخشاش قاراپ تۇراتتى، كۆڭلۈم بىردىنلا سۇۋۇپ كەتتى، كېتىشكە ئالدىراپ تۇرغىنىمدا ئوغۇل دوستى بىلەن تويلۇق سېتىۋېلىش ئۈچۈن ئايلىنىپ يۈرگەن رىزۋانگۈل ئۇچراپ قالدى. قارىماققا رىزۋانگۈل ئىنتايىن بەختلىك ئىدى، ئوغۇل دوستىمۇ ئىنتايىن كۆيۈمچاندەك كۆرۈنەتتى، كىشىنىڭ مەستلىكىنى كەلتۈرەتتى. بىز سالاملاشقاندىن كېيىن ئۆز يولىمىزغا ماڭدۇق.
بۇ ئىش كاللامدىن زادىلا چىقمايدۇ، ئۈرۈمچىدە 4 مىليوندىن ئارتۇق نوپۇس تۇرسا نېمىشقا بۇ ئىككى قىز بىرلا ۋاقىتتا ئۇچرايدىغاندۇ؟ ئويلىغانسېرى غەلىتە تۇيۇلدى.
بىر كۈنى شۇيشىگۇ جىلغىسىدا گۇگۇم ۋاقتىدا، شوپۇر ياردەمچىم بىلەن ئىككىمىزنى مەنزىرە تاماشا قىلىدىغان راۋاققا ئاپىرىپ قويدى، ئەتراپتا ماشىنا بەك كۆپ ئىدى، مەن يالغۇز ئەڭ ئېگىز يېرىگە چىقىپ تۆۋەنگە نەزەر سالدىم، قويلار تاغنىڭ يانباغرىدا بەخىرامان ئوتلاۋاتاتتى، بۇ مەنزىرە كىشىگە چەكسىز ھوزۇر ئاتا قىلاتتى.
ياردەمچىم بىلەن شوپۇر تۇيۇقسىز غايىپ بولدى، كەينىمگە بۇرۇلۇپ ئادەملەرنىڭ ئارىسىدىن ئىزدەشكە باشلىدىم. توساتتىن يۈزىنى ئورۇۋالغان ھېلىقى قىزنىڭ ياردەمچىم ۋە شوپۇرغا بىر نېمىلەرنى دەپ بولۇپ كېتىپ قالغانلىقىنى كۆرۈپ قالدىم. ئۆلگۈر! يەنە شۇ ئىكەنغۇ، ئۇنى كۆرۈپ يۈرىكىم خېلى ئۇزۇنغىچە ئىزىغا چۈشمىدى.
ياردەمچىم بىلەن شوپۇر يېنىمغا كەلدى.
-يۈزىنى ئورۇۋالغان ئاۋۇ قىز كىمۇ؟-قىزىقىپ سورىدىم، ئۇنى دائىملا ئۇچرىتىپ قالىمەن، كۆڭلۈم بىر خىل شۇملۇقنى سەزگەندەك بولدى.
-كامىلە! ئىلگىرى بىزنىڭ شىركەتتە ئىشلىگەن.-دېدى ياردەمچىم.
-نېمە؟...ئۇنىڭ يۈزىگە نېمە بوپتۇ؟-قاتتىق چۆچۈپ سورىدىم.
-باشقىلار كىسلاتا چېچىپ تۈگەشتۈرۋېتىپتۇ.
-تەڭرىم، نېمىدىگەن رەزىل ئادەم ئۇ ؟!
دەل مۇشۇ ۋاقىتتا شوپۇر گەپ قىستۇردى:
-چىراينى بۇزۇۋەتكىنى ھەقىقەتەن رەزىل ئىكەن، لېكىن ئۇ ئۆزىمۇ ياخشى ئادەم ئەمەس.
-نېمىشقا؟
-كامىلە يېڭىدىن ئوقۇش پۈتتۈرۈپ كەلگەن ۋاقىتتا شىركەت ئۇنى نۇقتىلىق تەربىيەلەش ئوبيېكىتى قىلىپ، نۇرغۇن چىقىم سەرپ قىلغان، يەنە ئۇنى گۇرۇپپا باشلىقلىقىغا ئۆستۈرگەن. ئۇ شىركەتتىن ئايرىلغاندىن كېيىن، شىركەتنى توختىماي ئەرز قىلدى، يەنە سىزگە ئۇچۇر يېزىپ «ھايۋان، ئېشەك، سېنى بىر ئۆمۈر نەس باسقاي ئىلاھىم» دېگەندەك گەپلەر بىلەن ھاقارەتلىدى، جۇ دېرىكتور بۇنى ئۇنتۇپ قالمىغانسىز؟ ئۇ بىزنىڭ ھۆرمەتلىشىمىزگە ئەرزىمەيدۇ، لېكىن ھېسداشلىقىمىزنى قوزغايدۇ.
-ھەي...-قاتتىق ئۇھسىندىم، پەسكە قاراپ ئىختىيارسىز ئۈندىدار دوستلار چەمبىرىكىدىكى بىر گەپ يادىمغا يېتىپ قالدى، -«ھۆرمەتلەيدىغىنىم ھەممىنى بىلىدىغانلار ئەمەس، بەلكى مىننەتدارلىقنى بىلىدىغانلار».
بېشىمنى كۆتۈرۈپ ئاسمانغا قارىدىم، سۇس كۈمۈش رەڭلىك ئاي بۇلۇتلار ئارىسىدا لەيلەپ تۇراتتى، گاھ پەيدا بولۇپ، گاھ غايىپ بولاتتى، مەن بىپايان كۆككە قاراپ چوڭقۇر خىيالغا پاتتىم، رىزۋانگۈل بىلەن كامىلە ئوخشاش ئايال بولسىمۇ، لېكىن دۇنياسى ئىككى خىل ئىدى.
|