دەرەخ بولۇۋالسام ، ئارزۇيۇم شۇكى يەنىلا « دەرەخ » بولۇۋالسام . ئىگىز - تىك قىيادىكى ، ئادەم چىقالمايدىغان قورام تاش ئۈستىدىكى « دەرەخ » بولۇۋالسام .
جۇدۇن - چاپقۇن ، شىۋىرغان ، قارا قۇيۇندا سۇنغان بىر « دەرەخ » بولۇۋالسام . قاقشال بولسىمۇ مەيلى ئىدى « دەرەخ » بولۇۋالسام . كاۋاك بولسىمۇ « دەرەخ » بولۇۋالسام ، قاداقلىق بولسىمۇ « دەرەخ » بولۇۋالسام ، قوۋزاقلىرى چۈشۈپ كەتكەن بولسىمۇ « دەرەخ » بولۇۋالسام ، شاخ - شۇمبىلىرى سەت بولسىمۇ « دەرەخ » بولۇۋالسام ، يوپۇرمىقى كۆركەمسىز بولسىمۇ « دەرەخ » بولۇۋالسام .
ئادەم زاتى قېشىمغا كېلەلمىسە لېكىن مەندىن ھوزۇر ئالىدىغان « دەرەخ » بولۇۋالسام . چاك - چاك يېرىق بولسىمۇ دەرەخ بولۇۋالسام ، ئارزۇيۇم شۇكى « دەرەخ » بولۇۋالسام …
قارلىق تاش بىلەن يالغۇزلا قالغان ، بۇلۇت ئارىسىدا تىكەندەك قالغان ، ھەيۋەت بولمىسىمۇ « دەرەخ » بولۇۋالسام ، قار- مۇز ئارىسىدا قالغان « دەرەخ » بولۇۋالسام .
قۇرۇپ كەتكەن بولسىمۇ مەيلى « دەرەخ » بولۇۋالسام ، ئەگرى - بۈگرى بولسىمۇ مەيلى « دەرەخ » بولۇۋالسام ، ھېچنىمە دەپ ئاتالمىساممۇ مەيلى ، « دەرەخ » بولۇۋالسام ، ئارزۇيۇم شۇكى « دەرەخ » بولۇۋالسام .
زاڭلىق قىلماڭلار « دەرەخ » بولۇۋالسام ، تىللاپ سالماڭلار « دەرەخ » بولۇۋالسام ، سېغىنىپمۇ كەتمەڭلار « دەرەخ » بولۇۋالسام ، ئېچ ئاغرىتماڭلار دەرەخ بولۇۋالسام ، سۇسىز قالساممۇ « دەرەخ » بولۇۋالسام ، پايدام بولمىسىمۇ دەرەخ بولۇۋالسام ، ئارزۇيۇم شۇكى « دەرەخ » بولۇۋالسام …
كۈلمەڭلار دوستلار « دەرەخ » بولۇۋالسام ، زىيىنىم يوقتۇر « دەرەخ » بولۇۋالسام ، شۇڭا تەشنامەن « دەرەخ » بولۇۋالسام…
ئۇچار قۇشلارغا ماكان بېرىمەن ، قار - يامغۇرغا قۇچاق ئاچىمەن ، ساپ ھاۋادىن ئەركىن تىناتتىم ، ھەم ئۇنىڭغا جۆرمۇ بولاتتىم ، ئارزۇيۇم شۇكى « دەرەخ » بولۇۋالسام …
دوستۇم بولساڭ مەدەتكار بولغىن ، تىلەكلەرگە يەتكىلى قويغىن ، پايدامنى بىر يەتكۈزىۋالاي ، شاخ - شۇمبامدىن « سەنئەتكار » بولغىن ، قوۋزاقلىرىمدىن « دورا » ياسىغىن ، يىلتىزلىرىمغا سۇلار تېمىتقىن ، ئارزۇيۇم تەكرار « دەرەخ » بولىۋالسام …
بىلال مۇھەممەتتۇرسۇن( ئىبراھىمى)
2016.10.25. |