نادانغا
قاسىم سىدىق
تۆرەلدىم جاھانغا پەقەت بىردەمگە ،
ھېلىلا ئۆلۈمدىن كېلىدۇ خەۋەر.
توسمىغىن يولۇمنى ھەي نادان ئادەم ،
توسمىغىن ئەركىمگە مېنى قويۇپ بەر.
مەن كۆرەي ئالەمنىڭ ھۆسنىنى تولۇق ،
مەن چىقاي ئەڭ يۈكسەك چوققىلارغىچە .
مەن ئۈزەي دېڭىزلار كۆكسىنى يېرىپ،
دېڭىزنى سېنىڭدىن سوراپ يۈرگۈچە‹
قايسى بىر بۇلاقنىڭ سۈيى ئەڭ شىرىن،
قايسى بىر ئېتىزنىڭ بۇغدىيى بولۇق .
قايسى بىر گۈلشەننىڭ گۈلى خۇشپۇراق ،
قايسى بىر كىتاپنىڭ ھېكمىتى ئۇلۇغ؟!
ئەي نادان كۈتمەيمەن سېنىڭدىن جاۋاپ ،
ئۆزەمنىڭ كۆزىدە كۆرەي ئالەمنى .
ئېھتىمال ،تاپارمەن مەنمۇ ئۇلاردىن ،
سەن ئۆزەڭ سەزمىگەن يېڭى بىر تەمنى‹
---ئېلى دەرياسى .1981-يىل