‹‹مەڭگۈلۈك ئىزدەش››كە ئىمىلدەش ناخشام...
( شائىر دولقۇن روزىنىڭ شۇ ناملىق شېئىرلار توپلىمىغا بېغىشلاپ)
قاراخان
قۇياشقا يۈزلىنىپ توۋلىدىم ناخشا ،
بولغاچقا دۇنيانىڭ قارنىدا پۈشتۇم .
ئىلغىدىم سادىرغا مۇناسىپ ناخشا ،
تىرىلگەن چاقماق بوپ سامانى قۇچتۇم .
چوققىلار بىلەيدۇ قەھرىمنى تىنماي،
كۆكدالا، قىز ،كېچە بولدىغۇ تۆكمە .
بۇرھاننىڭ چوققىسى قۇشۇم قونغان جاي،
ئۇيەردە كۆزۈمنى تىكىمەن كۆككە.
خىيالىم ئەمەستۇر يولسىز تىرىلىش ،
‹‹مەڭگۈلۈك ئىزدەش››كە ئىمىلدەش ناخشام.
قىزلارنىڭ كۆز يېشى ئاچچىق تىيىلىش،
ئازاپنى قېرىتقان يىگىتمەن ئاخشام .
قۇياشلىق ئۇپۇقتۇر مېنىڭ مەنزىلىم،
بەختنى ئەمرىمگە قويدۇم پەتھىلەپ .
يارقىن بىر سۈبھىگە تۇتاش ئەزەلىم ،
روھىڭنى روھىمغا ئويدۇم نەقىشلەپ.
باھارنى ئوغۇزغا قىلدىم قەرزدار ،
مەن ئۆزۈم ئانامغا قەرزدار تۇرۇپ .
بۇ يۈرەك بولدى بىر تەۋەرۇك دۇتار ،
سۇمرۇغنىڭ كۈيىگە قويىمەن ئۇرۇپ.
يېزىلغان ناخشام كۆپ قۇشنىڭ پېيىغا ،
قەلبىڭگە سىغدۇرغىن چۆچەكلىرىمنى .
مۇناجات ئېيتىمەن ‹‹مەشرەپ›› نېيىغا ،
‹‹دولقۇن››غا يۇتقۇزۇپ كۆرەكلىرىڭنى ...
سەمەندەر ناخشىسى مەخپى لىرىكام ،
ئاي تۈنەپ قالغاندا ئېيتىمەن ئۇنى .
‹‹نۇرى››غا ،‹‹سەيدۇل››غا...‹‹ۋېلى ››،‹‹ھېسام››كام ،
يەتكۈزۈپ قويسىكەن پەقەتلا شۇنى .
چولپانلار ياتىدۇ ‹‹چولپان مازار››دا،
ئامانەت قىپ قويۇپ تالاي شۆھرەتنى .
نۇر تۇرسۇن چالغان چاڭ، تەمبۇر، ساتاردا ،
ئۆزلۈكنىڭ كۈيلىرى تاپار قۇدرەتنى .
‹‹تۇداخۇن ››ئالدىڭغا گۈل تۇتۇپ چىقار،
ئازاپ ۋە بەختكە بولساڭ قۇرئانداز .
‹‹ھېبى››نىڭ سۆزىدە تۆت پەسىل باھار،
سائادەت يولىغا ساپتۇ پايانداز.
بەيتۇللا ئالدىدىن مەست ئۆتسە ‹‹ياقۇپ››،
رەنجىمەي قالامدۇ نازىم ئاقساقال .
گۆرىدە تىك تۇرار ھەتتا نۇزۇكئاي،
ئۈمۈدنىڭ كوچىسى قىلىنسا پايمال .
ياتساڭمۇ سارايدا ،ساتماڭنى ئەسلەپ ،
ئوخشاش بىر قىسمەتنى ئارتىپسەن ماڭا .
تەپەككۇر ۋەزنىڭدىن قالدىم تەمتىرەپ،
شۇندىمۇ بىر پاتمان گەپ‹‹ ساتتىم ››ساڭا .
سۆيگىنىڭ قىش ياكى باھار قىزىمۇ ؟
سەن تەتۈر قوشۇلما، سۈزۈك تۇيغۇغا .
كۆيگىنىڭ كوچا يا ئارمان قىزىمۇ ؟
گۈزەل شۇ تۈنەكتە كەتمە ئۇيقۇغا .
پۈتمىدى ئاناڭغا يازغان قەسىدە ،
يەتمىدى سىڭلىڭغا سۇنغان مەكتۇپۇڭ .
ئەڭ گۈزەل لىرىكاڭ بولماي رېسىدە ،
ئوغلۇڭغا <<لايىق>>نى نەدىن ئۇقۇشتۇڭ.
چۈشۇڭدىن قوغلاپسەن غالىپ تىلەكنى ،
مۇساپىر غازاڭنى شامال سۈرگەندەك .
بىر مەخپى رىسالەڭ تىلغاپ يۈرەكنى ،
بىلىندى ماڭىلا قاپاق تۈرگەندەك.
قولۇڭدا نىگاتىپ قۇياشنى تارتقان ،
روھىنات ۋەسلىڭنى قىلىپ ئىستىلا.
ئىخلاسنىڭ چېچىكى قېقىلىپ ياتقان...
يۇرەكنى بېغىشتىن كەسسۇن ئۇسترا.
قىشتىكى دەريانىڭ بويىدا مەۋجۇت ،
بولۇپسەن غەمگۇزار <<نۇرتاي>> ھاجىمدەك .
‹‹ئايخان››نىڭ روھىدا بولۇپ تەۋەللۇت،
مەنزىلگە ئات سالدىڭ جەڭگە تايىندەك .
ھامىلدار قىلغىنىڭ تۈن رىسالىسى ،
ئۇ بەلكى سېزىكتۇر تاڭنىڭ بۇيىغا .
تارىخنىڭ بار ئىكەن مىڭ سۇلالىسى،
ئۇ بەلكى مەنسۇپتۇر ئاڭنىڭ قۇلىغا .
مەن ئاقتىم روھىڭغا قوشۇلۇپ بۇدەم ،
قىسمەتلەر ئالدىدا كۆز ياش تۆككۈچە.
‹‹مەڭگۈلۈك ئىزدەش››تىن بارمۇ نېسىۋەم،
چۆكتىما ئويۇڭغا ‹‹ ئوي››غا چۆككىچە.
بولساڭمۇ پارتىزان ياكى رازۋېدچىك ،
بولساڭمۇ ‹‹بېلگراد››،‹‹نوۋېگورتتا ›› .
بولساڭمۇ غەۋۋاس يا كۆكتە لىيودچىك ،
ئىزدىگەن گۆھىرىڭ ئەلنىڭ قېتىدا...
بولدۇڭسەن تۆت ‹‹روزى››بىلەن تۆت قۇتۇپ*
بولدۇڭسەن تىرىلگەن تارىخ كەپتىرى.
بولدۇڭسەن ئارمانسىز ۋىسالنى قۇچۇپ،
يۈرەكنىڭ ساڭا كۆپ ‹‹سېرىق››گەپلىرى.
يەر كۆكتە مەن ساڭا بولدۇم ھەمنەپەس ،
كۇن ۋە تۈن بۇرۇنقى سېنىلا ئىزدەپ .
‹‹مەڭگۈلۈك ئىزدەش ›› ئۇ ئىكەن- ‹‹مۇسەللەس›› ،
ئىچىتىما مەن ئۇنى قۇيۇپ لەببالەپ!
ئىلاۋە:
1.بۇ شېئىرغا توپلامنىڭ مۇندەرىجە مەزمۇنلىرى خۇرۇچ بولدى.
2.‹‹تۆت روزى›› يالقۇن روزى،دولقۇن روزى،ئەركىن روزى ،باتۇر روزىلارنى كۆرسىتىدۇ.
2012-يىلى 15-يانۋار.
[ بۇ يازمىنىqarxan 2012-02-15 18:00قايتا تەھرىرلىدى ]