سالام ساڭا ئاتىجان ، يۈرۈگۈمنىڭ چوڭقۇر قاتلاملىرىدىن سالام ، سەن ماڭا بۇ 18 يىل جەريانىدا ئۆز كۆز قارىچۇغىڭنى ئاسرىغاندەك ئاسراپ كۆيۈنۈپ كەلدىڭ ، سەن ئۆزۈڭنىڭ مەرد – مەردانىلىكىڭ بىلەن مېنىڭ قەلبىمگە ئۆچمەس ئابىدە تىكلىدىڭ ، سەن مېنىڭ ھايات مۇساپىلىرىمنىڭ راۋان بولىشى ئۈچۈن كۆپ ئەجىرلەرنى سىڭدۈردۈڭ ، مەن ھايات مۇساپىلىرىمنىڭ مەلۇم بىر دوقمۇشلىرىدا قايمۇقۇپ قالغىنىمدا قاياققا مېڭىشنى ئۆگەتتىڭ ، ھەتتا يولدىكى يۈرۈش – تۇرۇشتىن تارتىپ ھەممىنى ئۆگەتتىڭ ، يەنە سەن ئارقىلىق ئۇيغۇرۇمنىڭ ئۆرپ – ئادەتلىرىنى ئۆگەندىم ، سېنىڭ بېشىڭغا كېيىۋالغان بادام دوپپا ، ئۇچاڭغا كېيىۋالغان ئۇزۇن تون ، پۇتۇڭغا كېيىۋالغان نۇر چېچىپ تۇرىدىغان ئۇزۇن ئۆتىكىڭ ۋە بېلىڭگە چىڭ باغلانغان بىللاغ ئارقىلىق ئۇيغۇرۇمنىڭ بەلگىسىنى تونۇدۇم ، يەنە بۇ ئارقىلىق ئۇيغۇرۇمنىڭ كىيىم – كېچەك مەدەنىيىتىنى چۈشەندىم . سېنىڭ ئىشلارنى بىر تەرەپ قىلىشتىكى جەسۇر – باتۇرلىقىڭدىن ئەرلەرگە خاس باتۇرلۇق ۋە كەسكىنلىكنى ئۆگەندىم ، قىسقىسى ئۇيغۇرۇمدىكى مىللىي روھنى ئۆگەندىم . جامائەت سورۇنلىرىدىكى ماڭا قاراپ باش لىڭشىتىپ يول كۆرسىتىشىڭدىن ، سېنىڭدىكى ھۆرمەتنى ۋە سېنىڭدىكى كۈيۈمچانلىقنى ھېس قىلدىم . سېنىڭ ھەربىر ئىش ھەرىكىتىڭ ئىشلارنى بىر تەرەپ قىلىشتىكى كەسكىنلىكىڭ ماڭا خۇددى چاڭقىغان يەرگە سېپىلگەن سۇدەكلا سىڭىپ كەتكەن ئىدى . سېنىڭ يۈرۈش – تۇرۇش ، سۆز – ھەرىكەتلىرىڭ ئارقىلىق مەن قانداق مېڭىشنى ، قانداق ئادەم بولۇشنى ئۆگەندىم ، شۇ ئارقىلىق ئىنسانىي خىسلەتنى يېتىلدۈردۈم . يەنە بىر قېتىم سالام ئاتىجان ، يۈرۈگۈمنىڭ چوڭقۇر قاتلاملىرىدىن ئېھتىرام ، سەن ماڭا يۈرۈش – تۇرۇش ، سۆز – ھەرىكەتلىرىڭ ئارقىلىق ماڭا ئادەم بولۇشنى ، قانداق مېڭىشنى ئۆگەتكەن بولساڭ ، ئۆز ئەجىرىڭ ئۆز مېھنىتىڭ ئارقىلىق مېنى كۆكتە ئۇچۇردۇڭ ، كۆكتە ئۇچۇشنى ئۆگەتتىڭ ، كۆكتە ئەركىن پەرۋاز قىلىشىم ئۈچۈن ئۆزۈڭنىڭ بارلىقىنى ماڭا تەقدىم قىلدىڭ سەندىكى بۇ تەقدىم قىلىش مېنى يۈكسەك بۇرچقا ۋە سەندىكى ئالىيجاناب روھقا ئىگە قىلدى . سالام ساڭا ئاتىجان مەن شېرىن ئۇيقۇغا كەتكىنىمدە سەن ئۇخلىماي مېنىڭ ئەتىدىكى شېرىن ئۇيقۇم ئۈچۈن غەم يىدىڭ . مەن شەھەرنىڭ ئەينەكتەك ئاسفالىت يوللىرىدا بىلىم ئېلىش ئۈچۈن كېتىۋاتقىنىمدا سەن ئالتۇن كەتمىنىڭنى كۆتۈرۈپ سەھرانىڭ چاڭ كەتكەن يوللىرىدا مېنىڭ ھاياتلىقىم ئۈچۈن سەپەر قىلدىڭ . سەن كەڭ كەتكەن ئېتىزدا مېنىڭ كەلگۈسۈم ئۈچۈن كۈرەش قىلدىڭ ، كەڭ كەتكەن ئېتىزلاردا ئەمگەك ناخشىسىنى ياڭراتتىڭ . مەن ئازادە ، راھەت ئورۇندۇقلاردا ئولتۇرغان بولسام ، سەن مەن ئۈچۈن قان تەر ئاققۇزدۇڭ . مەن ياپيېشىل چىملىقلاردا سايىداپ ئولتۇرغان بولسام ، سەن ئېتىزنىڭ بىر بېشىدا پىژغىرىم ئىسسىقتا ئولتۇردۇڭ ، مەن شەھەرنىڭ ئالىي تائاملىرىنى يىگەن چېغىمدا ، سەن قېتىپ قالغان ناننى غىزا قىلدىڭ . سالام ساڭا ئاتىجان ، سەن ماڭا خۇددى پەرىشتە ، ئەۋلىيالاردەك مەن ئاپتاپتا قالسام سالقىنلىق ، سوغۇقتا قالسام ئىللىقلىق ئاتا قىلدىڭ . مەن ئىسسىقتا چاڭقىغان چېغىمدا ، چاڭقىغان دىلىمغا زەم – زەم تىمىتتىڭ ، سەن ماڭا كەلگەن كېلىشمەسلىكلەرنى ئاڭلاپ خۇددى مىلتىقتا ئېتىلغان ئوقتەك دەرھال يېنىمغا يىتىپ كەلدىڭ ، سەن ماڭا يىقىلغان يېرىمدىن قانداق تۇرۇشنى ئۆگەتتىڭ ، سېنىڭدىكى بۇ ئۆگىتىش ، ماڭا ئۆزىگە تايىنىش ۋە ئۆزىنى قوغداشنى ھېس قىلدۇردى ، سەن مېنىڭدىكى خۇشاللىقنى كۆرۈپ ، خۇددىي ئالتۇن كەتمىنىڭنىڭ كارامىتىنى ئالتۇن ئېتىزدىكى ھوسۇلنى كۆرگەندەك بولدۇڭ . سالام ساڭا ئاتىجان ، سېنى تەرىپلەشكە مېنىڭ تىلىم ۋە دىلىم ئاجىزلىق قىلىدۇ . سەن ئۈچۈن قەلەم تەۋرەتسەم قەلەملىرىدىمدىن ياش ئاقىدۇ . سېنىڭ قولۇڭدىكى يول – يول يېرىقلار سېنىڭ مەن ئۈچۈن قانچىلىك ئەمگەك قىلغانلىقىڭنىڭ گۇۋاھچىسى ئەمەسمۇ ؟! سېنىڭ تاپىنىڭدىكى يول – يول يېرىقلار مېنىڭ ئۈچۈن چاڭ چىقىرىپ ماڭغان يوللىرىڭنىڭ گۇۋاھچىسى ئەمەسمۇ ؟! مېھرى ئىللىق دادا ، سېنىڭ تونۇرنىڭ تەپتىدەك قىزاغان يۈزۈڭ ، يۈزۈڭدىكى يول – يول ئىزلار مەن ئۈچۈن ، مېنىڭ ھاياتىم ۋە ھاياتلىقىم ئۈچۈن تارتقان جاپالىرىڭنىڭ گۇۋاھچىسى ئەمەسمۇ ، سالام ساڭا ئاتىجان سالام ، سېنىڭ مەن ئۈچۈن ئىشلىگەن قولۇڭغا مېنىڭ مەۋجۇتلۇقۇم ئۈچۈن يول ماڭغان پۇتۇڭغا ، مەن ئۈچۈن سوققان يۈرەكلىرىڭگە دەرت كەلمىسۇن ، ئۆز پەرزەنتلىرى ئۈچۈن ھاردىم – تالدىم دىمەي خىزمەت قىلىۋاتقان ، ئېتىز قىرلارنى چاڭ كەلتۈرىۋاتقان ئاتىلارنىڭ تېنى ساغلام ، ئۆمرى ئۇزۇن بولسۇن . سالام ئاتىجان سالام !

بۆرتالا شەھەرلىك7-ئوتتۇرا تولۇق 3-يىللىق1-سىنىپ
ئاپتورى:ئاي پالتا

[ ھونتەرىپىدىن2011-08-05 18:36قايتا تەھرىرلەندى ]