ئۆكتەم مۇھەممەد (ئۆزبېكىستان)

كېلىن تاللاش خۇسۇسىدا

       پەيغەمبىرىمىز مۇھەممەد ئەلەيھىسسالام مۇنداق دەيدۇ: «ئەي ئۈممىتىم، نىكاھلىنىڭ. چۈنكى بىر كۈننىڭ نىكاھى، بىر يىللىق
نەپلى ئىبادەتتىن خەيرىلىكتۇر! سىلەردىن بىرىڭلار ئۆيلەنسە شەيتان شېرىكلىرىگە شۇنداق دەپ ۋارقىرايدۇ: ‹بۇ ئادەم دىننىڭ
ئىككىدىن بىر بۆلۈكىنى ئادا قىلدى، ئۇنىڭغا يېقىنلىشىش تەس› ئۆيلەنسەڭلار ئۆزۈڭلەرگە ئاتىلىق، ئۆيلەنگەن قىزغا بولسا ئانىلىق
شەرىپىنى بەخىش ئەتكەن بولىسىلەر».
        پەيغەمبىرىمىز يەنە: «نىكاھتا ئايالنىڭ تۆت تەرىپى ئېتىبارغا ئېلىنىدۇ: مال ـ  مۈلكى، خۇشپىچىم ـ  گۈزەللىكى ۋە دىنىي
ئېتىقادى. سىلەر ئەلۋەتتە ئېتقادلىق ئايالنى تاللاڭلار. شۇندىلا ئائىلە بەرىكەت تاپقۇسى» دېگەن. شۇنىڭدەك باشقا بىر
ھەدىستە: «ئاياللارنى پەقەت چىرايلىق بولغىنى ئۈچۈنلا نىكاھىڭلارغا ئالماڭلار، چىرايى ئۇلارنىڭ ئەخلاقىنى يامانلاشتۇرۇپ قويۇشى
مۇمكىن. ئۇلارغا مال ـ  دۇنياسى ئۈچۈنمۇ ئۆيلەنمەڭلار، مال ـ  دۇنيا ئۇلارنى يولدىن ئازدۇرۇشى مۇمكىن. ئاياللارغا ئېتىقادى ۋە
ئەدەب ـ  ئەخلاق، قائىدە ـ  يوسۇن بىلگەنلىكى ئۈچۈن ئۆيلىنىڭلار. شۈبھىسىزكى، كۆڭلىكى يىرتىق، كۆڭلى سۇنۇق بولسىمۇ
ئەخلاقلىق، پەزىلەتلىك، قائىدە ـ  يوسۇن ۋە شەرم ـ  ھايالىق ئايالغا ئۆيلىنىش ناھايىتى قىممەتلىكتۇر» دېيىلگەن. كۆپچىلىك
ئالىملار، ئۆيلىنىش ئىشىدا يەتتە ئۆلچەپ بىر كېسىشنى، بولغۇسى كېلىننى ئادىللىق بىلەن (غەرەزسىز ھالدا) تاللاشنى تەۋسىيە
قىلىشىدۇ. كېلىننىڭ بويى كۈيئوغۇلدىن بەك پاكارمۇ، بەك ئېگىزمۇ بولماسلىقى مۇۋاپىق دەپ قارالغان. كېلىن تاللاشتا
تۆۋەندىكىلەرگە ئەھمىيەت بېرىش زۆرۈر:
1) ئاھ ـ  ۋاھ ئۇرۇپ، ھەممە نەرسىدىن زارلىنىدىغان؛
2) قىلغان خىزمىتىنى مىننەت قىلىدىغان؛
3) يات ئەرلەرگە كۆز قۇيرۇقىدا بولسىمۇ قانداقتۇر غەيرى مۇددىئا بىلەن قارايدىغان؛
4) تاشقىرىدا ياسىنىپ ـ  تارىنىپ، ئۆي ئىچىدە پاسكىنا، تەرتىپسىز كىيىنىدىغان؛
5) ئىتائەتسىز، كىبىر ـ تەمەننالىق، قوپال قىزلارنى ھەمراھلىققا تاللاشقا قەتئىي بولمايدۇ.
بولغۇسى كېلىنچەكنى تاللاشتا ئۇنىڭ قايسىي خىسلەتلىرىگە ئاساسلانسا مۇتلەق ئاداشماسلىق مۇمكىن؟
ئىمام غەززالىينىڭ «نىكاھ ئەدەبلىرى» ناملىق رىسالىسىدە ئۆمۈرلۈك ھەمراھ تاللاشتا تۆۋەندىكى سەككىز خىسلەتكە ئەھمىيەت
بېرىش لازىملىقى تەكىتلەنگەن:
1. بولغۇسى كېلىننىڭ دىيانەتلىك، ئېتىقادلىق، شەرم ـ  ھايالىق بولۇشى مۇھىم ئەھمىيەتكە ئىگە. چۈنكى، يۇقىرىدا تەكىتلەپ
ئۆتۈلگىنىدەك، ھەقىقىي دىيانەتلىك ئايال كۆپ جەھەتتىن ئېرىگە ساداقەتمەن كېلىدۇ.
2. ياخشى ئەخلاقلىق بولۇشمۇ ناھايىتى زۆرۈردۇر. چۈنكى شاللاق، خۇيى يامان، قانائەتسىز، بۇزۇق ئاياللارنىڭ ۋۇجۇدىدىن ياخشى
مىجەزلىك، ئەدەب ـ  ئەخلاقلىق پەرزەنتلەرنىڭ تۆرىلىشى ناتايىن. شۇ سەۋەبلىك بولغۇسى كۈيئوغۇللارغا مىننەتنى راۋا كۆرگۈچى،
شەھۋەتپەرەس، مال ـ دۇنياغا ھېرىسمەن، مەمەدان، قانائەتسىز، كوچىغا چىققاندىلا ياسىنىدىغان، ئازراق خاپا بولۇشقاندا
ئۆيدىكى نەرسىلەرنى ئايرىشقا تۇرىدىغان بەد قىلىق قىزلار بىلەن ئائىلە قۇرۇشتىن ساقلىنىشى تەۋسىيە قىلىنىدۇ.
3. بولغۇسى كېلىننىڭ گۈزەل، خۇشچىراي بولۇشىمۇ زۆرۈر شەرتلەردىندۇر. چۈنكى، مۇھەببەت رىشتىسىنى باغلىغۇچى ئامىللاردىن بىرى
چىراي گۈزەللىكىدۇر. كۆرۈمسىز ئايالنىڭ چېھرىسى تېزلا كۆڭۈلنى سوۋۇتۇشى مۇمكىن. ئەمما گۈزەللىك دىيانەت ۋە ياخشى مىجەز ـ  
خۇلقلاردىن ئايرىلماسلىقى لازىم. دىيانەتسىز ۋە بەدخۇلق ئايالنىڭ چېھرە گۈزەللىكى ئۇنى پاھىشىلىككە يېتەكلىشى مۇمكىن.
يۇقىرىدىكى ھادىسىلەردە دىيانەتسىز ئايالغا ئۆيلىنىش تەۋسىيە قىلىنغانلىقى، گۈزەللىككە ئىنتىنلىشنى ئەسلا ئىنكار
قىلمايدىغانلىقىنى توغرا چۈشىنىش لازىم.
4. كېلىنغا بېرىلىدىغان قىز مېلىنىڭ ئاز بولۇشىمۇ ئېسىل خىسلەتلەردىندۇر. مەلۇمكى، قىز مېلى كۈيئوغۇل تەرىپىدىن بولغۇسى
كېلىنچەككە مۈلۈك سۈپىتىدە بېرىلىدۇ. قىز مېلى كېلىن ۋە ئۇنىڭ ئاتا ـ  ئانىسى تەرىپىدىن قانچىلىك ئاز سورالسا، شۇنچە ياخشى
دەپ قارىلىدۇ.
    مۇھەممەد ئەلەيھىسسالام: «ئاياللارنىڭ ئەڭ ۋاپادارى، چىراي جەھەتتىن ئەڭ گۈزەل ۋە قىز مېلى يەڭگىل بولغانلىرىدۇر»
دېگەن. شۇنىڭدەك، «ئايالنىڭ ئەرگە تېگىشى، تۇغۇشى ۋە قىز مېلىنىڭ يەڭگىل بولۇشى ئۇنىڭ بەرىكەتلىك بولۇشىدىندۇر».
دېيىلگەن.
كۈيئوغۇلنىڭ كېلىننىڭ مال ـ  دۇنياسىنى كۆزلەپ ئۇنىڭغا ئۆيلىنىشى ئەڭ ئېغىر خاتالىق ۋە قاملاشمىغان ئىشتۇر. ئالىملاردىن
بىرى: «كىشى ئۆيلەنگەن ھامان ‹ئەجەبا، ئايالىمنىڭ بىرەر نەرسىسى بارمىكىن؟› دېسە، بىلىش كېرەككى، ئۇ ئەر شەكسىز ئوغرىدۇر»
دېگەن. قۇدا تەرەپلەر بىر ـ  بىرىگە ھەدىيە قىلىشىپ، ئۇنىڭ ئورنىغا چوڭراقىنىڭ قايتۇرۇلۇشىغا كۆز تىكىشمۇ  بەخۇلق
بەلگىلىرىدىندۇر. تويلاردىكى دەبدەبىلەر، قىزلىق مېلىنى زىيادە تەلەپ قىلىش ۋە كۈيئوغۇللارنى مال ـ  دۇنياسى بار ـ  يوقلۇقىنى
سۈرۈشتە قىلىش ئۆرپ ـ  ئادەت ۋە مۇسۇلماندارچىلىقلىرىمىزغا خىلاپ ئىشلاردۇر.
5. كېلىننىڭ تۇغۇش قابىلىيىتىگە ئىگە بولۇشىمۇ مۇھىم ئەھمىيەتلىك ئىشتۇر. دەرھەقىقەت، كۆپچىلىك ئالىملار ھامىلدار بولۇش
ئىمكانىيىتىدىن مەھرۇم ئاياللارغا ئۆيلىنىشتىن ساقلىنىشنىڭ زۆرۈرلىكىنى قەيىت قىلىشقان. چۈنكى، رەسۇلىللاھ: «سۆيۈملۈك ۋە
تۇغالايدىغان ئاياللارغا ئۆيلىنىڭلار» دېگەن. ئەگەر ئايال بۇرۇن تۇرمۇش قۇرمىغان بولسا ۋە تۇغماسلىقى بىلىنمىسە، ئۇنىڭ
ساغلاملىقى ۋە يېشىغا ئەھمىيەت بېرىلىدۇ. چۈنكى ئايال قانچىلىك ياش ۋە ساغلام بولسا تۇغۇش ئىمكانىيىتى شۇنچە كۆپ بولىدۇ.
چۈنكى زامانىۋى تىبابىتىمىزمۇ 28 ياشقىچە ھامىلدار بولمىغان ئاياللاردا كېيىنچىرەك تۇنجى تۇغۇت جەريانىدا كۆپلىگەن
ئاسارەتلەرنىڭ ۋە قىيىنچىلىقلارنىڭ پەيدا بولىدىغانلىقىنى تەكىتلىشىدۇ.
6. ئۆمۈرلۈك ھەمراھلىققا تاللانغان قىز پاك بولۇشى لازىم. چۈنكى، رەسۇلىللاھ  بىر جۇۋانغا ئۆيلەنگەن ساھابىگە: «نېمىشقا قىزغا
ئۆيلەنمىدىڭ؟» دەپ تەنبىھ تەرىقىسىدە سۇئال قويغان. پاكلىقتا ئۈچ پايدىلىق تەرەپ مەۋجۇت ئىكەن:
1) پاك كېلىنچەك تۇنجى دوست قەدرىنى ھېس قىلغانلىقى سەۋەبلىك، پەقەت ئۆزى بىلگەن ئەرنىلا سۆيىدۇ ۋە ئۇنىڭ بىلەن
كۇپايىلىنىدۇ ھەمدە بۇرۇن ئەرلەر بىلەن ئارىلاشقان ئاياللارغا نىسبەتەن ئېرىگە ساداقەتمەن، مېھىر ـ  مۇھەببەتلىك بولىدۇ.
2) پاك ئايال ئېرى تەرىپىدىن بەكرەك قەدىرلىنىدۇ، سۆيۈلىدۇ. چۈنكى، ئۆز رەپىقىسىنىڭ ئالدىنقى تۇرمۇشىنى ئەسلەش، ئەرنىڭ
كۆڭلىنى غەش قىلىشى ۋە ئۇنىڭ ئايالىغا بولغان كۆڭلىنى قايتۇرۇشى مۇمكىن.
3) بۇرۇن تۇرمۇش قۇرغان ئايال ئەلۋەتتە بىرىنچى ئېرىنى كۆپرەك ئەسلەيدۇ، چۈنكى مۇھەببەت تۇنجى جۈپتى بىلەن يۇقىرى
پەللىگە يېتىشى ۋە خاتىرىدە ساقلىنىشى شۈبھىسىز.
پاكلىق بەلگىلىرى، ئىپپەت ۋە نومۇس ھەققىدە ئەسىرىمىزنىڭ كېيىنكى بابلىرىدا مۇپەسسىلرەك توختىلىپ ئۆتىمىز.
7. ئايالنىڭ نەسىل ـ  نەسەبلىك، يەنى ئېسىلزادە بولۇشىمۇ تۇرمۇشتا مۇھىم ئورۇن تۇتىدۇ. قەدىمكى ئەجداتلىرىمىزنىڭ «يەتتە
ئەۋالادىنى سۈرۈشتۈرۈشى» بىكاردىنلا پەيدا بولغان قائىدە ئەمەس. ئېسىل نەسەبلىك، دىيانەتلىك قىزلارلا كەلگۈسىدە ئىپپەتلىك،
ئەخلاقلىق ئايال بولۇپ، ياخشى پەرزەنتلەر، ساغلام ئەۋلادلارنى تەربىيلەشكە قادىرلاردۇر. بۇ ئورۇندا ئېرسىيەت خاراكتېرلىك
كېسەللىكلەرنى سۈرۈشتۈرۈشمۇ مۇھىم ئەھمىيەتكە ئىگە.
8. ئۆمۈرلۈك ھەمراھلىققا تاللانغان ئايال يېقىن تۇغقان، قېرىنداشلاردىن بولماسلىقى شەرت. چۈنكى، پەيغەمبىرىمىز: «يېقىن
قېرىنداش بولغان ئايالغا ئۆيلەنمەڭلار، چۈنكى، ئۇنىڭدىن تۇغۇلغان بالا ئاجىز، كېسەلمەن بولىدۇ» دەپ خەتەرلىك ئاقىۋەتلەردىن
بىزنى ئاگاھلاندۇرغان. ھېسىياتنىڭ جۇشقۇن ھەم كۆتۈرەڭگۈلۈكىمۇ نەزەرگە ئېلىنىشى كېرەك. چۈنكى زامانىۋى تىببىي ئىلىممۇ
بۇنداق بولۇشنىڭ ئائىلىنىڭ بەخىتلىك ۋە ساغلام تۇرمۇش كەچۈرۈشىگە پايدىلىق ئىكەنلىكىنى ئىسپاتلىغان. ئەلۋەتتە، ساغلام
تۇرمۇش تەرەققىياتىنىڭ ناتونۇشلار ئارىسىدىكى نىكاھ ئارقلىق ياخشى مۇۋەپپقىيەتكە ئېرىشىدىغانلىقى تىببىي مۇتەخەسىسلەرنىڭ
نۇرغۇن يىللىق تەجرىبىلىرىنىڭ يېغىندىسى.
كېلىن تاللاش خۇسۇسىدا ساھىبقىران ئەمىر تۆمۈر بوۋىمىز شۇنداق دېگەن: «ئوغۇللىرىم، نەۋرىلىرىم ۋە يېقىنلىرىمنى ئۆيلەندۈرۈش
تەشۋىشىدە كېلىن ئىزدەشكە ئېتىبار بەردىم. بۇ ئىشنى دۆلەت ئىشلىرى بىلەن تەڭ ئورۇنغا قويدۇم. كېلىن بولغۇچىنىڭ نەسىل ـ  
نەسەبىنى، يەتتە ئەۋلادىنى سۈرۈشتۈردۈم. خاس ئادەملەر ئارقىلىق سالامەتلىك ئەھۋالىنى، جىسمانىي كامالىتىنى ئېنىقلىدىم. كېلىن
بولغۇچىنىڭ نەسىل ـ  نەسەبى، ئەدەب ـ  ئەخلاقى، ساغلام ۋە بەقۇۋۋەتلىكى بىلەن بارچە قۇسۇرلاردىن خالىي بولسىلا، ئەل ـ  يۇرتقا
چاي بېرىپ، كېلىن ئەكىردىم».


كۈيئوغۇل تاللاش خۇسۇسىدا

          ئۇلۇغ پەيغەمبىرىمىز مۇھەممەد ئەلەيھىسسالام «قىزلىرىڭلارنى تۇرمۇشقا چىقىرىش مەسىلىسىدە ئانىلىرى بىلەن (ئەھلى
ئايالىڭىز بىلەن) مەسلىھەت قىلىڭلار» دېگەن. چۈنكى، قىز بالا ئۈچۈن ئانىسى سىرداشتۇر، ئانىنىڭ پەرزەنتىنىڭ ئاتىسى
بىلمەيدىغان ئايرىم تەرەپلىرىدىن بىخەۋەر بولۇشى ناتايىن. قىز رەسىدە پەلەمپىيىدىن ئۆتۈپ چوڭ بولغانسىرى ئائىلىگە
ئەلچىلەرنىڭ كېلىشى تەبىئىي. شۇ سەۋەبتىن، ئاتا ھەمدە ئانا كۈيئوغۇل تاللاش مەسلىسىگە دۇچ كېلىدۇ. لېكىن ئۇلار بۇ جەرياندا
قاتتىق ھۇشيار بولۇشلىرى لازىم. قەدىمدە ئاتا ـ  بوۋىلىرىمىز بەدخۇلق، چېھرى خۇنۇك، ئىمانى زەئىپ، دىيانەتسىز، قىز ھەققىنى ئادا
قىلالمايدىغان، نەسىل ـ  نەسەبى ناپاك كۈيئوغۇللارغا دۇچار بولماسلىق ئۈچۈن يىگىت بىلەن كۆرۈشۈپ، ئۇلارنى سىناشنى ئۆزلىرىگە
ئادەت قىلغان.
       چۈنكى، رەسۇلىللا: «نىكاھ قۇللۇققا ئوخشايدۇ. شۇ سەۋەبتىن قىزىڭلارنى كىمگە بېرىۋاتقىنىڭلارغا دىققەت قىلىڭلار» دەپ
ئالاھىدە تەكىتلىگەن. شۇ سەۋەبتىن، ئاتا ـ  ئانا ئامراق قىزىنى زۇلۇمكار، ئەخلاقى ناچار، ئىمانسىز، ئىشرەتۋاز، ھاراقكەش،
چىكەرمەن كىشىگە ياتلىق قىلسا ئالدىراقسانلىقى، ئەدەبلىك كۈيئوغۇل تاللىمىغانلىقى تۈپەيلىدىن ئاللاھنىڭ قەھرى ـ  غەزىپىگە
دۇچار بولىدۇ.
       مىڭ ئەپسۇسكى، كۆپلىگەن زامانداشلىرىمىز بۈگۈنكى كۈندە كۈيئوغۇل تاللاش ئىشىدا ئاخىرەتنى ئويلىماي ئىش تۇتماقتا.
بۇنداقلا كۈيئوغۇلنىڭ ئۆزىدىن كۆرە ئاتا ـ  ئانىسىنىڭ مەنسىپى، بايلىقىنى ئەلا بىلىپ قىزلىرىنىڭ بەختىگە ئولتۇرغانلىقىنى ئىلغا
قىلماي يۈرمەكتە. سىر ئەمەس، ئەخلاقسىز، ئىشرەتۋاز، چىكەرمەن، ھاراقكەش ياشلارنىڭ كۆپ قىسمى ھارام پايدا ھېسابىغا
دۆلەتمەن بولغان ئائىلىلەرنىڭ پەرزەنتلىرىدۇر.
       دېمەك، كۈيئوغۇل تاللاش ئىشىدا، ئاتىغا ئىنتايىن چوڭ مەسئۇلىيەت يۈكلەنگەن بولىدۇ. ناۋادا، بولغۇسى كۈيئوغۇل ھەققىدە
كۆپ سۈرۈشتۈرۈلسە، تۈرلۈك ئۇسۇللاردا سىناق ئېلىپ بېرىلسا ۋە قىزنىڭ ئاتىسى يىگىت بىلەن قايتا ـ  قايتا سۆھبەتلەشسە دۇنيا ۋە
ئاخىرەتتە پايدا شۇلارنىڭدۇر. يەنە شۇنىمۇ نەزەردىن ساقىت قىلماسلىق كېرەككى، ئاتىلار بولغۇسى كۈيئوغۇلنىڭ مۇفەسسىل تىببىي
كۆۋرۈكتىن ئۆتۈشىنىمۇ نازارەت قىلسا، ئۇ چاغدا نۇر ئۈستىگە نۇر قوشۇلۇپ، كۆڭۈللەر يورۇق بولىدۇ.
        ئەپسۇسكى ھازىرقى تۇرمۇش قۇرۇۋاتقان ياشلىرىمىزنىڭ ئايرىملىرى تەۋەككۈلچىلىك ئۇسۇلى بىلەن ئائىلە قۇرۇشماقتا.
شۇنىڭدەك، ئۇرۇق ـ تۇغقان، قېرىنداشلىرىدىن بىرەرسىنىڭ تونۇشتۇرۇش، ماختاش ۋە تەۋسىيەلىرىگە ئاساسەن بىر قېتىم كۆرۈشۈپلا
ئائىلە قۇرۇۋاتقانلارمۇ نۇرغۇن. ئاخىر، بولغۇسى كېلىن ـ كۈيئوغۇللار بىر ئۇچرىشىپلا پەقەت تاشقىي قىياپىتى، چىرايى ۋە قەددى ـ  
قامىتى ھەققىدە تەسەۋۋۇرغا ئېگە بولۇشى مۇمكىن، خالاس. توۋا دەيمەن، قىز ـ  يىگىتلەر بىر ـ بىرىنىڭ مىجەز خۇلقى، ئىتىقادى،
بىلىمى، ئەخلاق ـ پەزىلىتى، دىيانىتى ھەققىدە ئويلاشنى خالىمامدىغاندۇ؟!
        رەسۇلىللا ئۆيلەنمەكچى بولغان ساھابىلەردىن بىرىگە: «ئاۋۋال ئۇ ئايالنى كۆرگىن. چۈنكى ئۇنى كۆرسەڭ ئاراڭلاردا
مۇھەببەت، ئۈلپەتلىكنىڭ پەيدا بولۇشىغا سەۋەب بولىدۇ» دېگەن. ئەمما بۇ كۆرۈشۈش ئىككى تەرەپ ۋەكىللىرىنىڭ نازارىتى
ئاستىدا بولۇشى شەرت. ئەپسۇسكى، ئۇچرىشىش باھانىسى بىلەن بىر قىسىم ئەخلاقسىز ياشلار ئىپپەتكە قول سوزۇش دەرىجىسىگە
يەتمەكتە. رەسۇلىللا مۇنداق دەيدۇ: «ھەمراھى بولمىغان بىر كىشى بىلەن يالغۇز ئايال ئادەم يوق جايدا خالىي قالسا، ئۇلارنىڭ
ئۈچىنچىسى شەيتاندۇر». شۇنى ئۇنتۇپ قالماسلىق كېرەككى، نىكاھ ئوقۇلۇپ، توي ئۆتكۈزۈلۈپ، ھۇجرىغا كىرگەنگە قەدەر ياشلار بىر
ـ  بىرىگە نامەھرەمدۇر. لېكىن كۆپ قىسىم ياشلار، غەرب ئەللىرىنىڭ تەسىرى نەتىجىسىدە سىنىشىش باھانىسى بىلەن بىر ـ  بىرىگە
نىكاھتىن ئاۋۋال قول تەگكۈزمەكتە. شەكسىزكى، بۇ پەن نۇقتىسىدىن ئۇچىغا چىققان ئەخلاقسىزلىق، شەرىئەت ئەھكاملىرى
نۇقتىسىدىن بولسا ئىمانسىزلىقتۇر. ياشلارنىڭ بىر ـ  بىرىگە ئۇناشتۇرۇلغانلىقى تېخى «ئائىلە قۇرۇلدى» دېگەن گەپ ئەمەس.
بولغۇسى كېلىن ـ كۈيئوغۇللار ئۇچرىشىشتا شەرىئەت ئەھكاملىرىغىمۇ ئەھمىيەت بېرىشلىرى شەرت ھېسابلىنىدۇ.
      بۈگۈنكى كۈندە تۈرلۈك كېسەللىكلەرنىڭ سانى كۆپىيىپ كەتكەنلىكىنى كۆزدە تۇتقان ھالدا نىكاھقىچە مۇفەسسىل تىببىي
كۆۋرۈكتىن ئۆتۈش، ياشلار ئۈچۈن ئىنتايىن مۇھىمدۇر.

(ئۆزبېكىستان دەۋر نەشرىياتى نەشر قىلغان «نىكاھنىڭ بىرىنچى كېچىسى» ناملىق كىتابتىن ئابدۇكېرىم ئىسمائىل بوزتېكىن
تەرجىمىسى)
مەنبە:‹‹بىلقۇت ››تورىدىن كۆچۈرۈلدى

بۇ ئاجايىپ كاتتا كۆرسەتمىلەركەن! پەرزەنتلەرنىڭ ئۆمۈرلۈك ئىشىغا سەل قاراشقا بولمايدىكەن.

ئۆزىنى مۇسۇلمان دىگەن ئادەم چوقۇم بىلىۋېلىشقا تېگىشلىك ئىشلار ئىكەنغۇ بۇ......

بىلىپ ھەم ئاڭلاپ قويغۇلۇق.

ئات ئالساڭ بىر يىل تاللا،
خوتۇن ئالساڭ مىڭ يىل...

           _ ئاتىلار سۆزى

ئىشلىتىش

بۇ مەزمۇنسالمان888 نىڭ 2012-06-30 13:47 يوللىغان يازمىسى نىكاھ كېچىسى :
ئۆكتەم مۇھەممەد (ئۆزبېكىستان)

كېلىن تاللاش خۇسۇسىدا

       پەيغەمبىرىمىز مۇھەممەد ئەلەيھىسسالام مۇنداق دەيدۇ: «ئەي ئۈممىتىم، نىكاھلىنىڭ. چۈنكى بىر كۈننىڭ نىكاھى، بىر يىللىق
.......

مۇنۇ تېمىدىكى ھەدىسلەرنىڭ مەنبەسى ئېنىق يېزىلمىغان. يەنى قائىدە بويىچە بىرەر ھەدىسنى نەقىل قىلغاندا: بۇ ھەدىسنى پالانى ھەدىس توپلىمىدىن ئالدىم،دەپ ئەسكەرتىش مۇھىم قائىدە. بۇ قائىدە ھەرۋاقىت تاشلىنىپ قالماسلىقى كېرەك. گەرچە، بۇ تېمىنى سالمان قېرىندىشىم باشقا مۇنبەردىن كۆچۈرگەن بولسىمۇ مۇشۇ قائىدە تاشلىنىپ قالغاچقا، تاكى مەنبەسى ئېنىق بولغانغا قەدەر بۇ تېما ئۆچۈرۈپ تاشلىنىشى كېرەك. سەۋەبى: ھەركىم تېما ئېھتىياجى ئۈچۈن رەسۇلۇللاھ نامىدىن ھەدىس توقۇۋەرسە، ياخشى نىيىتى بولسىمۇ، ئۇ كىشى رەسۇلۇللاھقا كاززابلىق قىلغىنى ئۈچۈن دوزاخقا مەھكۇم بولىدۇ.

ئەسسالامۇ ئەلەيكۇم قۇتلۇق ئەپەندى، پىكرىڭىز ناھايىتى ئورۇنلۇق پىكىر بوپتۇ. يۇقارقى نەقىل ئالغان ھەدىسلەرنىڭ كۆپلىرىنى <<سەھىھۇل بۇخارى جەۋھەرلىرى>><<ياخشىلار باغچىسى>> <<سەھى ھەدىسلەردىن تاللانما>> قاتارلىق كىتاپلاردىن كۆرگەنلىكىم ئۇچۇن بەك دىققەت قىلىپ كەتمەپتىمەن. دىنىمىز، پەيغەمبىرىمىز يولىنىڭ ساپلىقىنى قوغداش ئۇچۇن پىكىر بەرگىنىڭىزدىن خۇشال بولدۇم.( بۇ ئىنكاسنى يىزىشتىن ئىلگىرى يەنە بىرقىتىم كىتاپلارغا مۇراجەت قىلدىم) لىكىن ئاپتۇرنىڭ ئىزاھلىمىغان خاتالىقى بار ئىكەن. ۋاقىت چىقىرىپ بىلگىنىمچە ئىنكاس شەكلىدە ئىزاھلاپ قويىمەن، ئامان بولۇڭ.

تالىپلىرىمىز ياخشى مۇزاكىرە قىلىشىۋاتىدۇ،
يامان تىلدىن ساقلىغايسەن ئاللا!!!   

ئەسسالامۇ ئەلەيكۇم، سالمان قېرىندىشىم، سەمىمىيىتىڭىز ئۈچۈن ئەللاھ رەھىم قىلغاي.

ئاللاھنىڭ رەھمىتى بارچە مۇسۇلمانلارغا بولسۇن. شۇ قاتاردا ماڭىمۇ....!