ئوتياش قىسسىسى

قاراخان

قىزىلمۇچ ھەم شوخۇلا لەغمەننىڭ قوشگېزىكى،
قانچە يىسە لەغمەننى چىقماس ئۇيغۇر سېزىكى.
سامساق پىياز قوشۇلۇپ لەغمەن سېيى ئوخشايدۇ،
يېسىۋىلەك،كەرەپشىنىڭ يوق دىمەڭلار كېرىكى.

ياغ بىلەن گۆش بىر تۇغقان غول پىيازنى كۆيدۈرەر،
ئەمما ئۇنىڭ تەم پۇرىقى ئىشتىھانى ئۆلتۈرەر ،
باش پىيازنىڭ قىيمىسىدا مانتا،سامسا تەڭشىلىپ ،
دەل ۋاقتىدا يىگەنلەرنى خۇمار قىلىپ سۆيدۈرەر.

كۈدە بىلەن تۇخۇمنى قورۇپ يىسەڭ ناشتىدا،
ئاشقازاندىن زەھەرنى ھەيدەپ تۇرار ۋاقتىدا.
قەۋزىيەتتىن خالى بولۇپ بۇلۇتتەك ھەم يېنىكلەپ ،
قاتتىق نانلار تۇرۇپ قالماس ھەپتە ئايلاپ تاختىدا.

كاۋىلارنىڭ گۆش نېنى دىئابىىتقا پايدىلىق،
دەپ قالمىغىن كاۋا كۆرسەڭ قوپال، تەمسىز ،تايىنلىق.
كۆك كاۋىنى باشقىلارنىڭ يىگىنىنى كۆرگەندە،
يىمەيدىغان نەرسەڭ يوق دەپ تېرىمىغىن خاپىلىق.

چامغۇر،تۇرۇپ بازاردىن ھەيدىۋەتتى تىۋىپنى،
ئۆپكە،كاناي ،قان بېسىمغا بىزدىن سورا سەۋەپنى.
دىدى ھەتتا خام يىسەڭمۇ دىگەن يەرگە بارىمىز،
قويما بىزگە بۇندىن ئارتۇق تاغدىن ئىگىز تەلەپنى.

يۇمغاق سۈتتىن يامانلىسا سوغۇق مىجەز ئۆچكە،
ئىسسىق ئېشىپ كەتكەن بىمار سالار مېنى گۈرۈچكە،
ئۈگرە كۆرسەم ئېسىلىپ تېنىم‹‹ ئەت››كە تولىدۇ،
مېنى ئىچكەن تىرىلىدۇ تاس قالغاندا ئۆلۈشكە.

سامساق يىگەن تېنى ساق دەپ لەقىمىم بار مېنىڭمۇ،
زەنجىۋىلگە دەپتۇ مېنى سېنىڭ نەۋرە ئېنىڭمۇ؟
مىكرۇپ نىمە ۋىرۇسنىڭمۇ تاناۋىنى تارتىمەن،
مەن بولغاچقا بۇلغانمايدۇ تومۇردىكى قېنىڭمۇ.

پىدىگەنمەن  قوڭۇر رەڭلىك كۆكتاتلارنىڭ نېگىرى،
قورۇما ياق قىيمىغىمۇ ياريدىغان ‹‹جىگىرى››،
ئاش پەيغەمبەر ،نان ئەۋلىيا دىگەنلەرمۇ بەزىدە،
ئالدىرايدۇ مېنى مايدا چالا قورۇپ يىگىلى.

قىشلىقىنى قېزا يەپ ئۆتكۈزگەن شۇ بايۋەچچە،
قىزىل ،سېرىق سەۋزىلەرنى قىلار يارغاق ،قەلەمچە،
شۇڭا مەڭزى قىپ-قىزىل چىقار قىشتىن خورازدەك،
گاھى مېنى چاچتەك توغراپ چىلاپ قويار غەرپچە.

كەمبەغەلنىڭ دوستىى دىگىن قىزىلبۇداش ،پالەكنى،
يىيىشلىك ھەم سىڭىشلىك ئېچىشتۇرماس يۈرەكنى. 
بىدە كۆك دەپ  تۇغقۇنۇم بار، گۈلكۆك كەبئى تەڭداشسىز،
تاسما پۇرچاق ياشارتىدۇ زەئىپلەشكەن بۆرەكنى..

سەرخىل بىزنىڭ تۈرىمىز ،ئانا يەردە ئۈنۈمىز،
كېچە -كۈندۈز تېنىڭىزگە ئوزۇق قۇۋۋەت بېرىمىز.
يالپۇز بىلەن تەرخەمەك،ئورۇقلىتار بودەكنى

دىمەك بىزنىڭ ئېچىلماقتا كۈندىن كۈنگە سىرىمىز

تۇركى تىللار دىۋانىدا پۈتۈكلۈكتۇر نامىمىز،
شۈنداق تۇرۇپ نىمىشقا بىزدىن بەزى چانىمىز.
توي-تۆكۈندە سەۋزىنىمۇ ‹‹لوبۇ››دەيدۇ بەزىلەر،
بىر چىرايلىق نامىمىزدىن نىچۈن دائىم تانىمىز.

كۆكتات دىسۇن، ئوتياش دىسۇن ،بىزنىڭ كۆپتۇر خىلىمىز

دىيەلمىسە زاڭلىق قىلما، كۆنسۈن تىۋىش تىلىمىز ،
ئەڭ قىسقىسى بەرەڭگىنى ‹‹ياڭيۇ›› دىدۇق نەچچە يىل،
ئېيتىڭلارچۇ قاچانغىچە ‹‹ئانا تىل››سىز، يۈرىمىز؟!

ۋىتامىنىم تەل تۇرۇپ ،كۈندە خەلقىم يەپ تۇرۇپ،
ئاتىساڭچۇ ئۇيغۇرچە ،شىمال ،غەرپ ئەي  جەنۇپ.
ئۆزۈڭ توغرا ئاتىساڭ خەقمۇ سەندەك ئاتايدۇ،
مەھمۇد بوۋام روھىمۇ قالماس مەڭگۈ قورۇنۇپ!

2012-يىلى 6-ئاۋغۇست

[ بۇ يازمىنىqarxan 2012-08-12 16:35قايتا تەھرىرلىدى ]

ئىمرانغا مۇنۇ تائام توغرىسىدىكى شېئىرنى سوۋغا قىلاي  يارىمىسا جايىدا قالار.5-قەۋەتتىكى ..

روھىمغا كۈچ مەدەت -ئۇيغۇر تائامى 

قاراخان

بىر جاندىن ، بىر ناندىن زېرىكمەس ئادەم،
نان ئۈچۈن جېنڭىنى  خەجلەيدۇ   ئالەم.
يوقلۇقنىڭ  قۇلىكەن   ھەركىم   ھاياتتا،
تەر تۆككەن جانلارغا  ھەر كۈنى  ئايەم.

بېشىڭغا  زىننەتكەن دوپپا، شۇ تەلپەك،
ئېشىڭغا زىننەتكەن شاھ پولو ،چەلپەك.
گۆش نان ۋە چۆچۈرە ،يوبدان ،تۈگۈرە،
زىخىڭدا تولغىنار  جىگەر ،تال، بۆرەك.

جوراڭنىڭ  كىملىگى، سۆزىدىن ئايان ،
شورپاڭنىڭ سۆللىگى، يۈزىدىن ئايان.
نارىن ۋە قولدامان ،لەغمەن ،ئۈگرىلەر،
يۇمغاقسۈت، يالپۇزۇڭ تۇزىدىن ئايان.

ھوسۇلغا تەم بەرگەن يەرنىڭ كۈچىكەن ،
يەر ئەمەس ئەمگەكچان ئەرنىڭ كۈچىكەن.
قىپ -قىزىل چەشلەرنى بارخان ئەيلىگەن ،
ئۈن تۈنسىز ئاققۇزغان تەرنىڭ كۈچىكەن.

قورداق  شۇ نانقايناق،ساڭزا،بوغۇرساق،
بوۋايغا ئوماچ  بار،   بوۋاققا   بۇلماق.
بار بىزدە ئاشلىقنىڭ قەدرىنى  بىلگەن،
ھالال  ۋە  ھارامغا   ئىمانى  ئويغاق.

ئۆردەك بار ،توخۇ بار ،كەپتەر غازمۇ بار،
دوغاپقا نان چىلاپ ئىچكەن يازمۇ بار.
تەڭ يىگەن تەنگە دەپ نەپسىدىن كېچىپ،
ئىشتىھا ئاچقان مۇڭ ،نەغمە، سازمۇ بار.

دۇئا،سۇ، ياغ بىلەن بەركەتلىك  تائام،
سەۋزە تەل ،تۇرۇپ تەل بۇ سەپتە تامام،
ئۇيغۇرنىڭ قولى گۈل ،تۇز ، تەمى  بۆلەك،
يەپ بىلگىن بىر چىشلەم ياكى بىر كاپام.

سان- سۈپەت،تۈرى كۆپ ئۈشبۇ تائامنىڭ ،
ھەر يەردە داڭقى بار يەرۇ-جاھاننىڭ.
بىر  قوشۇق  تۇزىنىڭ   ھەققىگە بەدەل،
بولالماس ئۆمرۈڭ گەر بولسا  لوقماننىڭ.

مۇراببا-قىيام،بال،سوقما ،ساپ ھەسەل ،
ئەڭ ئېسىل ناشتىلىق  ئەزەلدىن -ئەزەل.
چۈشلۇككە قايماق چاي  گاھى ئاش،مانتا ،
كەچلىككە مەلھەمدۇر سىڭىشلىق  تۈرمەل.

يىمىكى ،ئىچمىكى ئاجايىپ سەرخىل،
سان-سۈپەت تۇرلىرى ئۈچ يۈز ئاتمىش خىل*.
باي چەرچەن ،گۈل قۇمۇل، تۇرپان ئاستانە،
قەشقەرمۇ تارىخقا  گۈۋاھ   ھەق  كېپىل.

ماڭا كۈچ قۇۋۋەتتۇر ئەلنىڭ ئاش نېنى ،
شۇڭا  بار   بېشىمدا   ئەلنىڭ  ئار غېمى.
يىگەن شۇ  ئاش  تۇزنىڭ ھەققىنى ئادا ،
قىلماققا   تەيياردۇر  پېقىرنىڭ   جېنى...

2011-يىلى