يىراقتىكى خىياللار
كېرىكىم يوق ھېچ كىشىگە كېرىكىم،
يالغۇز ياغاچ مەن چۆلدىكى ئۇنتۇلغان.
پىچىرلايدۇ ئۆزۈمگىلا يۈرىكىم،
ھەر نەپىسىم ماڭا سوئال قويۇلغان.
ئالەم ئارا كېزىپ يۈرەر تىلىكىم،
قەپەزدىكى قۇشتۇر ئارزۇ يۇلقۇنغان.
يىراقلارغا كەتسەم كېزىپ جاھاننى،
ھېچكىمنىڭ يوق ماڭا پەقەت پەرۋايى.
سېغىنساممۇ نەلەردىندۇ جاناننى،
چۈشۈمگىمۇ كىرىپ قويماس ئەرۋايى.
ئەقىدەمگە تىكىپ ئۆتتۈم بۇ جاننى،
ئىشقىڭ ئەركەم قىلىپ قويدى سەۋدايى.
پەقەت ساڭا تىكسەم جاننى، جاھاننى،
سۆيگۈ ماڭا ئېلىپ كەلدى ھاقارەت.
تاۋلار ئىدى ئەسلى سۆيگۈ ئىنساننى،
بولۇپ يۈردۈم ھاماقەتكە ھاماقەت.
تاشلىمىدىم ئۆرتەنسەممۇ ئىماننى،
ۋىجدان ماڭا ئاتا قىلدى سائادەت.
تۇپرىقىڭغا چۆكۈپ كەتسەم موبادا،
كېزىپ يۈرەر قەلبىمدىكى تىلەكلەر.
كۆزۈم ئوچۇق كېتەر بەلكىم داۋادا،
توختامدىكىن ساڭا تەپكەن يۈرەكلەر.
ئۆتۈپ كەتسەم يالغۇز قۇشتەك ناۋادا،
ئىزدەپ سۆيۈپ قويارمىكىن ئىستەكلەر.
قايتىپ كەلدىم خىياللاردىن يۇلقىنىپ،
سەنسىز جاھان قاراڭغۇ گۆر بىلىندى.
تاڭنى تاڭغا ئۇلاپ ئۆتتۈم تولغىنىپ،
خىيالىڭدا يۈرەك باغرىم تىلىندى.
سۆيگۈڭ بىلەن ھاقارەتتىن قوغدىنىپ،
چىدام-غەيرەت پەقەت سەندىن ئېلىندى.
تىلەپ ئالدىم جاسارەتنى تاغلاردىن،
مەغرۇر بولغاچ ئاي قونۇپتۇ بېشىغا.
سېنى ئىزدەپ يۈردۈم ئۇزاق چاغلاردىن،
ھىلال ئايلار ئوخشايتتى-دەپ قېشىغا.
نەپرىتىمنى يوشۇردۇم مەن زاغلاردىن،
مەن تەگمىدىم تۆھمەتخورنىڭ چىشىغا.
شاماللاردىن تىڭشىغۇم بار شەپەڭنى،
نۇرى يەتمەس قارىغانغا كۆزۈمنىڭ.
كۆرسەم بىر رەت ئاياغ باسقان پەتەڭنى،
نۇرى ئۆچۈپ قالغۇچە بۇ كۆزۈمنىڭ.
ۋەزنى ئېغىر ئىدىغۇ يار ۋەدەڭنىڭ،
پەرقى يوققۇ قەسەم بىلەن سۆزۈمنىڭ.
ئاي يۇلتۇزنى سېغىنىمەن يىراقتىن،
كۆزلىرىڭنى يۇلتۇزلارغا ئوخشىتىپ.
سەن يار ئۈچۈن سەۋدايىمەن پىراقتىن،
قوياي دەيمەن ياشلىقىمنى توختىتىپ.
قۇتۇلاي مەن قىيامەتلىك سوراقتىن،
قويغىن يايرىم بەزلەپ مېنى ئۇخلىتىپ.
دەردلىرىمنى قىلىپ كەلدىڭ زىيادە،
سېنىڭ ئۈچۈن تۆكۈلگەن مۇڭ ناۋالار.
نېمانچىلا تەتۈر تەقدىر ئىرادە،
تېپىلمايدۇ بۇ دەردلەرگە داۋالار.
يوللار ماڭا بىلىنمەيدۇ پىيادە،
پىغانىمغا گۇۋاھ چەكسىز سامالار.
بىلىپ يەتتىم سەۋرى دېگەن سائادەت،
بارچە ئىشلار بولىدىكەن قەرەللىك.
ئۇزۇن بولدى بۇ باشلاردا قىيامەت،
تۇغۇلۇپلا بولۇپ قالغاچ ئەلەملىك.
جۇدالىقمۇ بولۇپ قالار ئىبادەت،
ئىشىنىمەن ئۇلۇغ تەڭرىم كەرەملىك.
2012-يىلى 25-سېنتەبىر سەيشەنبە
شەھىرى ئۈرۈمچى
بۇ يازمىنى ئاخىرىدا فائىزە تەھرىرلىگەن. ۋاقتى 2012-9-25 23:12
paizaning yollanmisi,asli aptor gulnaz bolsa kerak.almizardin yotkaldi....