ھازىر كۆپلىگەن ئىدارە-ئورگانلاردا، مەكتەپلەردە خىزمەتچىلەر يېتىشمىسە باشقا ئورۇندىن خىزمەتچىلەرنى ۋاقىتلىق يۆتكەيدىغان（借调） ئىش ئومۇملىشىپ قالدى، رەھبەرلەرمۇ، كادىرلارمۇ شۇ ۋاقىتلىق يۆتكەلگەنلەرگە كۆنۈپمۇ قالدى. مەن بۇ ئىشنىڭ ماھىيىتىنى بۇرۇن ئانچە چۈشەنمەيتتىم، ئەمما يېقىندا ئۆز بېشىمغا كېلىۋىدى، چوڭقۇر چۈشەنچىگە ئىگە بولدۇم، ھەم بۇنى ‹‹قۇيرۇق›› دەپ تەرجىمە قىلسا ئەڭ مۇۋاپىق بولىدىكەن دەپ ئويلىدىم.............
‹‹يۆتكىلىسەن ››دەپ توساتتىن كەلگەندە بۇيرۇق،
كۆرۈنگەنتى شۇ چاغ ئەتراپ تېخىمۇ يورۇق.
ۋاقىتلىقكەن، چۈنكى ئىشتات ھەر جايدا تولۇق،
بىلدىم شۇندا بۇ گەپ چىقماس قۇرۇقتىن –قۇرۇق،
مېنى يۆتكەپ كەپتۇ بۇندا بولۇشقا ‹‹ قۇيرۇق››.
يېتىشمەپتۇ ئورگاندىكى خىزمەتچى ، كادىر،
ئەمەسمىدى ئۇلار زادى ‹‹ھەممىگە قادىر››.
ئېغىر كېلىپ ۋەزىپىلەر، بولۇپتۇ شاتۇر،
ئىچىدىكى ‹‹ئوماچ››لىرى ئەيلىنىپ زاھىر،
نۆۋەت كەلدى شۇ ئورگانغا قويۇشقا ‹‹قۇيرۇق››.
يىغىن، ئەمگەك، ئۆگىنىشتە ھەممىمىز ئوخشاش،
ۋەزىپىنى تەقسىملەشتە ئوخشىماس قاراش.
ئۇلار دەمدۇ مېنى ساددا ،ھەممىدىن يۇۋاش،
ئېغىرىنى مەن ئالىمەن، بولمايدۇ ئاياش،
مەن ئىكەنمەن ھەممىگىلا ئۇنۇشقا ‹‹قۇيرۇق››.
چوڭ ئىشلارنى ئورۇنداشقا يەتمەيدىكەن شەرت،
كىچىك ئىشنى ئىشلىتىشكە كەتمەيدىكەن شەرت.
شۇلاردىكەن بارچە ھوقۇق، ئەپلەيدىكەن رەت،
تاپارمەنمۇ بۇندا يەنە دەرت ئۈستىگە دەرت،
تەيياركەنمەن قارىغاندا ‹‹يۇلۇش››قا ‹‹قۇيرۇق››.
ئاسىدىغان، ياپىدىغان ، ئاچىدىغانغا،
خوپ دېمەسكە نېمە چارە ‹‹چاقىدىغان››غا.
بۇيرۇپ تۇرار ئۇششاق ئىشقا، چاپىدىغانغا،
ماقۇل ئەڭ كۆپ ، ماڭا گېپى ئاقىدىغانغا،
ئاز قالدىمغۇ تەپسە بەزەن تۇتۇشقا ‹‹قۇيرۇق››.
بۇيرىسىغۇ قانداق ئىشقا باشلىق، رازىمەن،
ئاستىنىڭمۇ ئاستىدىكى بولدۇم خار①ىمەن.
قايسى ئىشقا كىم كەم بولسا مەنلا بارىمەن،
ئەرزىم تولا بولغان بىلەن كىمگە يازىمەن؟
كۈلمەڭ، مانا بولۇپ قالدۇق قۇيرۇققا‹‹قۇيرۇق››.
مۇكاپاتنىڭ سەھنىسىدە مەندەك ئەسلا يوق،
ئويلىمىدىم، ئويلىمىسام بولار كۆڭلۈم توق.
بۇيرىغاننى كېچىكتۈرمەي پۈتتۈرسەم تولۇق،
شۇدۇر سىيلىق ئېغىزىدىن ئېتىلمىسا ئوق،
كۆنۈپ قالدىم ئۆز –ئۆزۈمنى نوقۇشقا ‹‹قۇيرۇق››.
شۇنداقمىكىن ھەممە يەردە ‹‹قۇيرۇق››نىڭ ھالى؟
ئۆزىدىن سىرت ئۆزگىلەرگە يېتەمدۇ زارى؟
بولارمىدۇ ئۇلار بىر كۈن ‹‹قۇيرۇق››تىن رازى؟
قۇتۇلارمەن‹‹قۇيرۇق››لىقتىن قاچانمۇ زادى؟
تاپايمىكىن ‹‹قۇيرۇق››لىققا قويۇشقا ‹‹قۇيرۇق››؟
①خار:لىم ياغاچ، خار ياغاچ
‹‹زىمىستان››
2012-يىلى 25- سېنتەبىر
بۇ يازمىنى ئاخىرىدا zimistan تەھرىرلىگەن. ۋاقتى 2012-9-25 23:28
‹‹قۇيرۇق››
bu zimistanning almizardiki yazmisi...
