ھەيرانمەن خەيرۇللا قۇربان
ئۆز نەپسىنىڭ پەيزىنى سۈرگەنلەرگە ھەيرانمەن ،
زەرىچىلىك ئىلمى يوق ، يۈرگەنلەرگە ھەيرانمەن .
ئۆز بەختىگە ئۇل سېلىپ ، ھالال ھارام ئايرىماي ،
يىقىلغاننى - يۆلىمەي ، كۈلگەنلەرگە ھەيرانمەن .

تۇرسا ياندا ئايالى ، ئائىلىسى ، بالىسى ،
كوچىدىكى ‹ نايناقنى › سۆيگەنلەرگە ھەيرانمەن .
پاك مۇھەببەت سۆيگۈدىن ، قېنىپ ھوزۇر ئالماستىن ،
ئاشنىسىدىن ‹ پاك سۆيگۈ › كۈتكەنلەرگە ھەيرانمەن .

تارىخ بىرلە ساقلانغان ، نەۋرۇز ، ئايەم ، مەشرەپنىڭ ،
سۇغا چۈشكەن تاش كەبى ، چۆككىنىگە ھەيرانمەن .
ئۆزگە ئەلنىڭ بايرىمى ، ئۆزىدىن ئېشىپ بىزلەرگە ،
يۇقۇملۇق شۇم ۋابادەك ، كۆچكىنىگە ھەيرانمەن .

ئانا تىلدا تىل چىقىپ ، ئۆزگە تىلنى ئۈگەنگەن ،
ئانا تىلنى دۇدۇقلاپ ، سۆزلىگەنگە ھەيرانمەن .
ئانا تىلىم ،جان تىلىم ، دۇچ كەلسىمۇ خىرىسقا ،
ئۆزگە تىلنىڭ شەرپىنى ، كۆزلىگەنگە ھەيرانمەن .

ئۆزى ئەجىر قىلماستىن ، ئۆزگىلەرنىڭ ئەجىرىدە ،
ھايات پەيزى ، راھەتنى ،سۈرگەنلەرگە ھەيرانمەن .
ئەل قەلبىدىن يىراقلاپ ، ئەلگە مەنپئەت بەرمەستىن ،
ساختا ، مەنسەپ ئابروينى ، كۈتكەنلەرگە ھەيرانمەن .

ئۇيغۇر تۇرۇپ ئۇيغۇرنى، سۆككەنلەرگە ھەيرانمەن ،
مىللىتىمنىڭ يۈزىنى، تۆككەنلەرگە ھەيرانمەن ،
نامى ئۇلۇغ ئىسلامدىن ، خىرىستىيانغا قۇل بولۇپ ،
ھېيىقماستىن سەپ تۈزۈپ ،كۆچكەنلەرگە ھەيرانمەن ،