نەۋ باھار
پولات نىياز
ئىللىق شامال،شوخ بېقىپ چىللاپ كەلدى نەۋ باھار،
دالىلاردا –ۋادىدا ئويناپ كەلدى نەۋ باھار،
ئىش-ئەمگەكلەر ئېتىزدا قايناپ كەلدى نەۋ باھار،
نورۇز ،مەشرەپ قىزىتىپ تويلاپ كەلدى نەۋ باھار،
گۈلىستاندا بۇلبۇللار سايراپ كەلدى نەۋ باھار.
ھۆسىن ئاچتى تەبىئەت مانا بۈگۈن ئۆزگىرىپ،
نورۇز بىلەن يەر جاھان يېشىللاشتى كۆكىرىپ،
شوخ بالىلار چىۋىقنى ئات ئېتىدۇ يۈگۈرۈپ،
چاپىنىنى تارتىشار ئوغلاقچىدىن ئۆگىنىپ،
زېمىستاننى سوغۇقنى قوغلاپ كەلدى نەۋ باھار.
چىللار بىزنى ئۆزىگە ئۇز ياسىنىپ باغچىلار،
يايلاقلاردا ئالدىراش چارۋا بىلەن مالچىلار،
ئېقىنلاردا سال باغلاپ دەريا توسار سالچىلار،
چەۋەندازلار بەيگىدە ئاتلىرىنى قامچىلار،
پالۋانلارنى بەيگىدە تاۋلاپ كەلدى نەۋ باھار.
تۇنجى بولۇپ كۈزگۈلەر ئۇيقۇسىدىن ئويغاندى،
مۇزلار ئېرىپ دەريالار ئەركىن ئۈزۈپ تولغاندى،
جىرالارنىڭ سالىمى ئېتىزلارغا يوللاندى،
تېرىش ئۈچۈن ئۇرۇقلار ئىلغاپ راسا تاللاندى،
پەسىللەرنىڭ ئەركىسى ئويناپ كەلدى نەۋ باھار.
مەجنۇن تاللار تۈۋىدە قىزىزپ كەتتى تېپىشماق،
قىز- ئوغۇللار سۆيگۈدىن مۇشائىرە يېزىشماق،
شوخلۇقلىرى تۇتۇشۇپ سۈزۈك سۇنى چېچىشماق،
بىر بىرىنى قوغلىشىپ مەكتۇپلارنى ئېتىشماق،
كۆڭۈللەرنىڭ سىرىنى باغلاپ كەلدى نەۋ باھار.
يەتتە كۆكتات،مېۋە،دان تەييارلىدى بوۋىلار،
نورۇز ئېشى پىشۇردى قولى بەركەت مومىلار،
بىچە،تەپكۈچ تېپىشىپ ئوينار ئوماق بالىلار،
سەپ تارتىشىپ غاز ئۆردەك قايىتتى مانا تۇرنىلار،
تەبىئەتكە يېشىللىق تاشلاپ كەلدى نەۋ باھار.
چەرچەن مەدەنىيەت يۇرتىدىن