ئاياللىق ساڭا خاس ،ماڭا ئەركەكلىك

مامۇت  زايىت

بولدى قىل مەھبۇبە ،سۆزلىمە تەكرار،
ھاي بەرگىن ئاچچىققا ،بول تەمكىن-ئېغىر.
‹‹ئاجرىشىش››دىگەننى ئويلىما زىنھار،
بۇ سۆزدىن بولمىسۇن جۈپ يۈرەك يېغىر.

ھاياتتا شۇ گەپتىن يوق ئارتۇق ئاپەت،
ئۇ-ئىناق تۇرمۇشقا  قەبىھ كۈشەندە.
بۇ سۆزدىن يۈز ئۆرۈپ ئۆيدىن قۇت ئامەت،
بولىدۇ ئىنسانى سۆيگۈ دەپسەندە.

قىلىدۇ مۇشۇ سۆز قىز ۋە ئوغلۇڭنى،
ئاتىسىز-ئانىسىز خار ‹‹يىتىم ئوغلاق››
قىلىدۇ مۇشۇ سۆز پۈتۈن ئۆمرۈڭنى،
پۇشايمان شامىلى ئۇچۇرغان قامغاق.

قىلغانمۇ ئاجرىشىش ئۈچۈن بىز توينى،
ئەمەسمۇ بۇ كۆڭۈل ئىنسان ئىلكىدە.
ئۇزاق يىل بىرلىكتە تۇتۇپ شۇ ئۆينى،
كۆتۈردۇق نى ئېغىر يۈكنى يەلكىدە

بەختلىك تېنچ-ئىناق ئۆتكەن چاغلار كۆپ،
ئىدىغۇ كۆڭۈل شاد،ئۆمرىمىز گۈزەل
‹‹ھەممە ئىش تۈگىدى››دىمە ياش تۆكۈپ،
بولمايدۇ قايسىبىر ئۆي ئىچرە جىدەل؟

ئامراقلار رەنجىشىپ كېتىدۇ ئاسان،
بەك ئاسان ئوت ئالار ئېسىل چاقماقمۇ.
ئۆسەك سۆز تۇغدۇرسا كۆڭۈلدە گۈمان،
گاھ ئېغىر كېلىدۇ بىرەر چاخچاقمۇ.

پەرھات ۋە شېرىندەك بىزنىڭ ئىشقىمىز،
ۋىسالغا ئېرىشكەن ئوقۇلۇپ نىكاھ.
يىلسېرى چىڭىدى سۆيگۈ رىشتىمىز ،
بۇنىڭغا ئەل ۋە يۇرت قوشنىلار گۈۋاھ.

بىلىمەن ئاغرىندىڭ بۈگۈن مېنىڭدىن،
قىلماقتا پۇشايمان قەلبىمنى غەمناك،
كۆرمەيمەن بۇ ئىشنى پەقەت سېنىڭدىن
چىقىدۇ ئىككى قول ئۇرۇلسا چاۋاك.

كەچۈرگىن يېنىكلىك قىپتىمەن ساڭا،
باسمىسۇن مەن سۆيگەن چېھرىڭنى بۇلۇت.
ئەجرىڭ بار،جىق خىزمەت قىلدىڭ سەن ماڭا،
ئالتۇندەك پەرزەنتنى قىلىپ تەۋەللۇت.

تۇرمۇشتا بار ئاپەت ئىچىدە بەخت،
قايغۇنىڭ كەينىدىن كېلىدۇ شادلىق.
ھەممىنى ھەل قىلار ئەپۇچان ۋاقىت،
بولىدۇ كېيىنكى ئۆمرىمىز تاتلىق.

ئورۇنسىز دەتالاش،رەشك ،تەنتەكلىك،
قىلىدۇ ئادەمنى زەبۇن،خارۇ-زار.
ئاياللىق ساڭا خاس ،ماڭا ئەركەكلىك،
يول قويۇش ،ھەمدەملىك بىزگە بولسۇن يار.

‹‹ئاچچىقنى يەڭگەننى باتۇر››دەيدىكەن،
رەنجىمە ئامرىقىم،بۇ بولسۇن ساۋاق.
دىيىشسۇن ئەل بىزنى ‹‹ئامراق -ئەپ››ئىكەن،
ياشايلى بىر ئۆمۈر بەىتلىك ئىناق!...

1988-يىلى 3-ئاي،خوتەن.

‹‹ئۆلۈكلەر ۋە تىرىكلەر››ناملىق ئەشئارىدىن