تېلېفون قىپتۇ بۇرادەرلىرىم ،
يىغىلىدۇق دەپ كەچلىك بازارغا ،
تەربىيىلىك سورۇنىمىزدىن ،
كېلىپ قالدى "ئىلھام " يازارغا .
تورداشلىرىم قېنى مەرھەمەت ،
باراتجاننىڭ ھېكايىسىگە .
قېنى سىزمۇ باھا بېرەرسىز ،
ئوقۇپ بولۇپ - ئىدىيىسىگە .
رەپىقىسى بارات دوستۇمنىڭ
بوشىنىپتۇ ئىككى كۈن ئاۋۋال .
قىز بوۋاقنى كۆرۈپ دوستىمىز ،
سۈرۈپتىمىش ئېگىز-پەس خىيال .
نېمىشقىمۇ ئۇلۇغ خۇدايىم ؟
قىلمىغانسىز بالامنى ئوغۇل .
باشلىرىمغا ئېلىپ كۆتۈرۈپ ،
مىندۈرەتتىم ئەمەسمۇ دۇلدۇل .
-قىز بالا ئۇ خەقنىڭ ئادىمى ،
بوپ كەتسىمۇ ئاسمانغا تۈۋرۈك .
ئوغۇل دېگەن ئەلگە يار بولۇپ ،
ياسىمامدۇ دەرياغا كۆۋرۈك .
خوتۇنىمدىن شۇڭا خاپىمەن ،
-دەپ تۆكتى ئۇ بىزگە "دەردىنى" .
بۇرادەرلەر گەپنى باشلىدۇق ،
تىڭشاپ بولۇپ ئۇنىڭ "ئەرزىنى."
-ئەزىز قىلدى ئىنساننى ئاللاھ ،
قىز بالىمۇ ئوخشاشلا ئۇلۇغ.
روزى موللا* "ئۇيغۇرنى "ساتتى ،
رىزۋانگۈللەر كۆتۈردىغۇ تۇغ !
مەيلى ئوغۇل مەيلى قىز بولسۇن ،
ھەر ئىككىسى بىر بۈيۈك نىئمەت .
بىلگىن دوستۇم ئانا بوپ قىزلار -
-مىللەت ئۈچۈن تۇغىدۇ ئەزىمەت !
ئەقىدىمىز ،پەرۋىشىمىزدىن ،
يېتىلگۈسى ئىنسانغا لايىق ،
پەرزەنىتلەر بولسۇن،ئىلاھىم -
-مىللىتى ۋە دىنىگە سادىق !
كاللىسىدىن ئۆتۈپ دوستۇمنىڭ ،
مېڭىپ كەتتى دوختۇرخانىغا .
بۇ گەپلەرنى قىلىپ قويۇڭلار ،
يەنە بولسا باراتجانلارغا ............
* روزى موللا -ئابدۇخالىق ئۇيغۇرنى دۈشمەنلەرگە ساتقان كىشى .
2011-يىلى 6-ئاينىڭ 30-كۈنى كەچ 10 دا :
شەھرى بورتالادا ۋاپادارىم خانىسىدە يېزىلىپ بېقىلدى .
[ ئەلتېكىنتەرىپىدىن2011-07-03 16:44قايتا تەھرىرلەندى ]