|
|
|
|
ئەسسالامۇ ئەلەيكۇم مىسرانىم تورىدىكى ئەزىز تورداشلار،بۇ قېتىم .ئىكرانىمىزدا ئىلىم چېيى خاتىرىسى جەريانىنى بەردۇق ،ھەممىمىزگە مەلۇم يېقىندىن بۇيان مەركەزدىن ئىلمىي تەرەققىيات، ئىلغار مەدەنىيەت تەشەببۇسى ئوتتۇرغا قويۇلىۋاتىدۇ.بىر جەمئىيەتنىڭ ئىلغارلىشىشدا ،ئىلمىي تەرەققىياتىدا ئىلغار ئىلمىي سورۇنلار كەم بولسا بولمايدۇ ،مۇشۇ زۆرۈرىيەت تۈپەيلى بىز ئۈرۈمچىدىكى بىر تۈركۈم ئىلىم سۆيەر دوستلار ،پىكىرداشلار بىر نەچچە قېتىم ئىلمىي تېمىلارنى چۆرىدەپ سۆھبەتلەردە بولۇشقان ئىدى .
تۇنجى قېتىملىق ئىلىم چېيىمىز ئىلىم سۆيەر 12 قېرىندىشىمىزنىڭ قاتنىشىشى بىلەن بىلكۈچ كۇتۇپخانىسىدا ئۆتكۈزۈلدى،
بۇ قېتىم بىز بىر قەدەر مۇھىم دەپ بىلگەن «ئۇيغۇر پەلسەپە تارىخى»، «ئۈنۈمدار كىشىلەرنىڭ يەتتە ئادىتى»، «ئەدەبىيات نەزەرىيەسى»، «مەدەنىيەتلەر توقۇنۇشىدا»، «ئۆزلۈك گىرۋەكلىرىدە» قاتارلىق 10 كىتابنى مۇلاھىزە قىلدۇق. ئىككىنچى قېتىملىق ئىلىم چېيىمىز 20 قېرىندىشىمىزنىڭ قاتنىشىشى بىلەن جەنۇبىي تاغدا ئۆتكۈزۈلدى، بۇ قېتىم بىز دۇنياۋى مەشھۇر ئەسەر «دېمۇكراتىيە ۋە مائارىپ» ناملىق كىتابنى مۇلاھىزە قىلدۇق، ئىلىم چېيىمىزنىڭ ئەزالىرىنىڭ ھەر ئىككى قېتىمدا قىزغىنلىقى ئىنتايىن يۇقىرى بولدى. 3- قېتىملىق ئىلىم چېيىمىزمۇ ئىنتايىن مۇۋەپپىقىيەتلىك بولدى ،
بىزدە «سورۇن ئادەم تەربىيەلەيدۇ» دېگەن گەپ بار، ئىلىم چېيى سورۇنىمىز دەل ھەربىرىمىزنىڭ بىلىمىنى تاكامماللاشتۇرىدىغان، ئىلىم ئېلىش يولىدىكى مەنىسىزلىك تۇيغۇمىزغا خاتىمە بېرىدىغان سۆھبەت سورۇنى بولۇپ داۋاملىشىپ كەلدى. دېمىسىمۇ، بىر جەمئىيەت كىچىك – كىچىك مىكرو سورۇنلاردىن تەركىب تاپىدۇ، مىكرو سورۇنلىرىمىزنى ئىلغارلاشتۇرالىساق، پۈتكۈل جەمئىيىتىمىزنى ئىلغارلاشتۇرۇش يۆلىنىشىگە يۈزلەندۈرەلىشىمىز مۇمكىن. دۇنيادىكى نۇرغۇنلىغان مەنىۋىي ئىختىرالار، ئىجادىي قاراشلار ئىلغار پىكىرلىكلەرنىڭ ئۆز – ئارا مۇنازىرلىشىشىدىن كەلگەن. مەسلەن: ئېينىشتىيىننىڭ نۇرغۇنلىغان يېڭى قاراشلىرى ئۇنىڭ 10 نەچچە دوستى بىلەن بىللە چاي ئىچىشىپ پىكىرىلىشىش جەريانىدا بارلىققا كەلگەنلىكى كىتابلاردا قەيىت قىلىنغان. خۇش، بىز «ئىلىم چېيى»، «پىكىرلىشىش چېيى» قاتارلىق يېڭىچە چاي شەكىللىرىنى تۇرمۇشىمىزغا ئېلىپ كىرىپ، بۇنى جەمئىيەتتە بىر تۈرلۈك ساغلام بولغان مەنىۋى ھاۋاغا ئايلاندۇرۇشنى ئارزۇ قىلىپ ئىلىم چېيىمىزنى باشلىۋالدۇق، شۇنداقلا ئىلىم چېيىمىزنىڭ ئاددىيغىنە بىر كارتىنىسىدىن دۆلىتىمىز ئىچى – سىرتىدىكى تورداش دوستلىرىمىزنىمۇ خەۋەرلەندۈرۈش مەقسىتىدە، ئۇنىڭ 4 - سان سىن نۇسخىسىنى تورغا يوللىدۇق. ئەلۋەتتە، دۇنيادا كەمكۈتسىز ئىش بولمىغىنىدەك، بۇ قېتىملىق ئىلىم چېيىمىزدىمۇ بەزى نۇقسانلارنىڭ بولۇشى تەبئىي. تورداشلارنىڭ ئىلىم چېيىمىزنىڭ سىن نۇسخىسىنى ئىمكان بار ئەستايىدىل كۆرۈپ چىقىپ، ئىجابىي تەرىپىدىن ئۈلگە ئېلىشىنى، نۇقسانىدىن ئىبرەت ئېلىشىنى ئۈمىد قىلىمەن.
4- قېتىملىق ئىلىم چېيى سۆھبەت خاتىرە فىلىمى
نورمال چىقمىسا بۇ يەردىن كۆرۈڭ :
http://v.youku.com/v_show/id_XNjE1NzcyMjQw.html
ئەسلى فىلىمنى چۈشۈرۈش تەمىنلىنىۋاتىدۇ، ئەتىگىچە چۈشۈرەلەيسىز!
فىلىمگە مۇناسىۋەتلىك رەسىملەر:
رەسىملەرنى جۈمەخۇن سۈرەتچىلىكى تارتقان مىسرانىم تور بېكىتى ئىشلەپ تارقاتتى 2013- يىلى 10- ئاينىڭ 1 - كۈنى
|
|
|
|
|
|