مۇھەببەتنىڭ راۋاجى
مۇھەممەتتۇرسۇن يۈسۈپ
<نىھال>
ئۆرىۋەتتىڭ بىشىمغا، گۈلۈم، ھىجران تىغىنى،
ئازاپلىرىڭ ئىغىركەن، ئىزىۋەتتى يۈرەكنى .
سەيلە قىلاي دىمەيسەن بىنا قىلغان بىغىمنى ،
شۇنداقتىمۇ سۆيمىدىم پەقەت سەندىن بۆلەكنى .
تاڭ سەھەردە تىرەكتە سىغىزخانلار سايرىسا ،
كىلەمدىكىن دەپ سىنى يوللۇرۇڭغا تەلمۈردۈم .
يات چىرايلا گاھىدا ئىشىكىمدىن قارىسا ،
سەندىن خەۋەر ئەكەلگەن ئەلچىمۇ دەپ ئويلىدىم .
ئالبۇمۇمنى ھەر قىتىم ۋاراقلىغان چىغىمدا ،
سۈرىتىڭگە تىكىلىپ ئۇزاق - ئۇزاق قارايمەن .
غىرىپسىنىپ قالىمەن سەن بولمىغاچ يىنىمدا ،
بۇ ئالەمدە يىگانە قالغىنىمغا يىغلايمەن .
باھار كىلىپ قۇشلارمۇ ئۆز جۈپتىنى تاپاركەن ،
قەيەرلەردە يۈرىيسەن؟ تىخى سەندىن دىرەك يوق .
جىمى جانلىق كۈيىگە مۇھەببەتنى قاتاركەن ،
ئىھتىمالىم، كۆيمىگەن ، كۈل بولمىغان يۈرەك يوق .
ئىلىپ كەلسە ھېدىڭنى مەيىن - ئەركە شاماللار ،
بىھۇش بولۇپ جايىمغا چۈشەرمەنمۇ يىقىلىپ ؟
تەشۋىشلەرگە سالىدۇ تۈرلۈك - تۈمەن خىياللار ،
ئاخشاملىرى ئۇيقۇسىز قالدىم، ئىچىم سىقىلىپ .
ئىتىزلارنىڭ قىرىدا ئىچىلغان شۇ يالپۇزلار ،
سىنى سۆزلەپ تۇرىدۇ ، سىنى كۈيلەپ تۇرىدۇ .
يازنىڭ ئايدىڭ ئاخشىمى سۇ تۇتىمەن يالغۇزلا ،
تولۇن ئايمۇ < يارىڭدىن كەچمە، سۆي> دەپ تۇرىدۇ .
مۇقەددىمە يازغانغۇ مۇھەببەتكە ئىككىمىز ،
ئەمدى ئۇنىڭ راۋاجى قىيامەتكە قالدىمۇ ؟
قىچىپ يۈرسەك بىرىمىز، قوغلاپ يۈرسەك بىرىمىز.
ئۆمۈر چەكلىك ئەمەسمۇ ، خۇدا جاننى ئالمامدۇ؟
ئۇزاق بولدى ساقلىدىم سىنى مۇشۇ دوقمۇشتا ،
مەيلى قاچان كەل، گۈلۈم، سىنى كۈتۈپ ئۆتەرمەن .
تورنىلارمۇ نەچچە رەت سەپەر قىلدى جەنۇپقا ،
سەن كەلمىسەك گۈلخاندەك يىنىپ - يىنىپ ئۆچەرمەن .
مەنبە : مۇھەببەت دەرياسى ناملىق شىئىرلار توپلىمى