بۇ يازمىنى ئاخىرىدا دىل گۈزەل تەھرىرلىگەن. ۋاقتى 2016-3-14 11:46 AM
نۇرۇز قوشىقى
ئالىم ياسىن ئارمانى
ئاخشام ئىدى سوغاق زىمىستان،
بۈگۈن مانا ئىللىقتۇر دۇنيا.
ھەر قەلىبتە چەكسىز ھاياجان،
ئەكىس ئېتەر شادلىق چىرايدا.
ئېرىقلاردا ئاقماقتا ئەگىز،
بوۋاق كەبىي كۈلۈپ ۋىلىقلاپ.
تەملىرىدىن شۇنچىلىك لەزىز،
تەشنا لەۋلەر ئەممەكتە شوراپ.
سۇۋادانلار چىقارغان پوتلا،
كۆز قىسىدۇ شاخلاردا چېچەك.
گۈل چېچەككە پۇركەنگەن دۇنيا،
جەننەت كەبىي ئېچىشار ئېتەك.
مانا يۇرتتا ئاجايىپ بىر ھال،
گۈزەللىكتىن كۈلەر ھەممە جان.
ھاياجانغا تولغان شوخ شامال،
كېپىنەكتەك ئۇچماقتا ھەريان.
قىزىماقتا ئۇسۇل، توي،مەشرەپ،
ئىش-ئەمگەكتە قاينىغان چېلىش.
مول-ھوسۇلنىڭ ئىشقىدا ھەدەپ،
دېھقان چېكەر ئېتىزغا نەقىش.
كۈن بىلەن تۈن تەڭلەشكەن چېغى،
بىلسەم نۇرۇز كەلگەن ئوخشايدۇ.
چوڭ قازاندا ئوپچىنىڭ ئېشى،
ئىناقلىقتىن ناخشا توۋلايدۇ.
قوياش كەبىي ياشنار تەبىئەت،
سوغ زىمىستان قاچار دالدىغا.
تارقىلىدۇ يېشىل مۇھەببەت،
مېھرى گويا ئوخشاپ ئانىغا.
كەلدى نۇرۇز بۇ يىل ئۆزگىچە،
نۇرۇز دېمەك باھاركەن ئەسلى.
يول ئالايلى باھار پەسلىگە،
چەكسىز گۈزەل ۋەتەن ئەتىسى.
(ئاپتۇر:پەيزاۋات ناھىيىلىك يېزا ئىگىلىك ماشىنىللىرى ئىدارىسىدە)