روزى سايىت

saharguli

	شائىر روزى سايىت شائىر روزى سايىت 1944-يىلى 9- ئايدا خوتەننىڭ گۇما ناھىيىسىگە قاراشلىق شەيدۇللا دېگەن يېرىدە سايىتاخۇن ئىسىملىك كونا ئەسكەر ئائىلىسىدە تۇغۇلغان . 1951-يىلى ئۇلارنىڭ ئائىلىسى خوتەن شەھىرىگە كۆچۈپ كىرگەن .روزى سايىت 1958-يىلىغىچە خوتەندە باشلانغۇچ ،ئوتتۇرا مەكتەپلەردە ئوقۇغان . سايىتاخۇننىڭ ئائىلىسى تارقاقلاشتۇرلۇپ خوتەننىڭ بۇزاق يېزىسىدىكى جاي كەنتىگە ماكانلاشتۇرۇلغاندىن كېيىن ،روزى سايىت دېھقانچىلىق بىلەن شۇغۇللانغان . 1962-يىلى خەلق ئوقۇتقۇچىسى بولغان ،كېيىن يەنە دېھقانچىلىق قىلغان ، 1973-يىلى قەشقەر پىداگوگىكا ئىنىستوتىنىڭ تىل- ئەدەبىيات فاكولتېتىغا ئوقۇشقا كىرگەن ، 1976-يىلى ئوقۇشنى پۈتتۈرگەندىن كېيىن خوتەندە ئوتتۇرا مەكتەپ ۋە دارىلمۇئەللىمىندە ئوقۇتقۇچىلىق قىلغان . 1980-يىلىدىن باشلاپ "يېڭى قاشتېشى" ژورنىلىدا مۇھەررىرلىك قىلغان . 2001-يىلى 9-ئايدا كېسەللىك سەۋەبىدىن 57 يېشىدا ئالەمدىن ئۆتكەن . روزى سايىتنىڭ ئەدەبىي ئىجادىيەت پائالىيىتى 1973-يىلى "قەشقەر گېزىتى" دە ئېلان قىلىنغان "دېھقانمۇ داشۆگە كىردى" ناملىق شېئىرى بىلەن باشلانغان . شۇنىڭدىن تارتىپ ھازىرغىچە ئۇنىڭ نۇرغۇن شېئىر-داستانلىرى ئېلان قىلىنغان . ئۇ يەنە "بارات يازغان ھېكايە " قاتارلىق بىرقانچە نەسرىي ئەسەرلەرنى  يازغان . ئۇنىڭ "يىپەك يولىدا نورۇز" ، "يۇرۇڭقاش ۋادىسىدا شادلىق "  قاتارلىق تېلىۋىزىيە بەدىئىي فىلىملىرىنىڭ سىنارىيىسى شىنجاڭ تېلىۋىزىيە ئىستانسىسى تەرىپىدىن رەتكە ئېلىنغان . روزى سايىتنىڭ بەزى ئەسەرلىرى مەملىكەت ھەم ئاپتونۇم رايون دەرىجىلىك مۇكاپاتلارغا ئېرىشكەن . ئۆزىمۇ بىرقانچە قېتىم ئاپتونۇم رايون ۋە ۋىلايەت دەرىجىلىك مۇنەۋۋەر مۇتەخەسسىس بولۇپ باھالانغان . روزى سايىتنىڭ ھازىرغىچە نەشىر قىلىنغان ئەسەرلىرىدىن "قاشتېشىنىڭ رىۋايىتى" ، "بۇ قىز كىمنى تاللىسۇن " ، "مەرھابا" ، "مۇھەببەتتىن پۈتكەن ناخشىلار" ، "پاھ ، دېھقاننىڭ ھەيكىلى" ، ناملىق شېئىر ۋە داستانلار توپلىمى بار . ئۇنىڭ دېھقانلار تېمىسىدا يازغان بىر تۈركۈم شېئىرلىرى ئەينى يىللاردا يېزىلارغا يۈرگۈزۈلگەن بەزى "سول" سىياسەتلەر كەلتۈرۈپ چىقارغان بەزىبىر ئاقىۋەتلەرگە قارىتىلغان .  بۇ شېئىرلار ئۈنئالغۇ  لېنتىسىغا ئېلىنىپ ، "دېھقان بولماق تەس " دېگەن نامدا نەشىر قىلىنىپ تارقىتىلغاندىن كېيىن ،زور تەسىر قوزغىغان . ئۇ ۋاپات بولغاندىن كېيىن مىللەتلەر نەشرىياتى "روزى سايىت شېئىرلىرىدىن " دېگەن نامدا ئۇنىڭ بىر تۈكۈم شېئىرلىنى نەشىر قىلدى . ئانا تىلىم - زەر تىلىم تىل ئالاقە قورالى ،تىل قەلبنىڭ ئەينىكى ، تىل ئادەمنى ،ئالەمنى باغلاپ تۇرغان زەر رىشتە . تىل غەزىنە ، تىل ھىكمەت ، تىل مۇھەببەت كۆۋرۈكى ، تىل ھايۋاننى ئىنسانغا ئايلاندۇردى پەرۋىشتە . تىل نادانغا پەم بېرىپ ، تىل زۇۋانغا تەم بېرىپ ، ھاياتلىقنىڭ ئابادى مېھرى تاپتى سۆيۈكتە . شۇڭا ھەر بىر قۇۋمچۈن مەيلى كىچىك-چوڭ بولسۇن ، ئاتا تىلى - ئۆز تىلى شۇنچە ئۇلۇغ ،بۈيۈك -تە ! ئۇيغۇر تىلى ئۇۋاق تىل، ئۇيغۇر تىلى ئۇماق تىل، سەككىز مىليون بۇلبۇلنىڭ ئەشۇ تىلدا ناۋاسى . ئۇيغۇر تىلى كىچىك تىل ، ئەمما تاتلىق چۈچۈك تىل، مەن شۇ تىلنىڭ شەيداسى ، مىراسخورى -ھەقداسى. ئۇ -ئانا تىل ئانامغا ئانىسىدىن يادىكار ، مەن بۇ تىلنى ئۈگەنگەن زاكامدىكى چاغلاردا . ئاشۇ ئانا تىل بىلەن ئوۋلاپ جانان مەيلىنى ، پاراڭلاشقان ،سىرداشقان ئالمىزارلىق باغلاردا . بوۋام مۇشۇ تىل بىلەن يۈرۈكۈمگە پىچىرلاپ ، ۋاپادارلىق ،مەردلىكنىڭ مىزانىنى بىلدۈرگەن. ئوغلۇم ،قىزىم ھەر كۈنى تۇمۇچۇقتەك ۋىچىرلاپ ، ھاياجانغا چۆمدۈرگەن ، مۇرادىمنى بىلدۈرگەن . مۇشۇ تىلدا ناۋائىي كىيگەن ناۋا تاجىنى ، شاھ مەشرەپنى مۇشۇ تىل  ئېرىشتۈرگەن شەرەپكە . يۈسۈپكە "خاس ھاجىپ " لىق ئاتا قىلغان مۇشۇ تىل، مەھمۇد بوۋام مۇشۇ تىلدا دەرس ئۈگەتكەن ئەرەپكە . مەن شۇ ئانا تىل بىلەن پەرۋاز قىلىپ ئىجادتا ، زىمىستاننى لەنەتلەپ ، تاڭغا مەڭز-يۈز ياقتىم . كۈلسە يۇرتۇم تەڭ كۈلدۈم ، ئەل يىغلىسا ياش تۆكتۈم ، بىللە كۆيدۈم ئوتىدا ، سۇلىرىدا تەڭ ئاقتىم . مەن شۇ ئانا تىل بىلەن باغاشلىدىم باھارنى ، گۈل -چېچەككە پۈركەنگەن چىمەنلەرنى ئارىلاپ. مەن كۈلىمەن ،قۇۋۇمنى كۈلدىرىمەن قەلەمدە ، تىلغا ئۈنگەن ھارام شاخ، كۆتەكلەرنى پارچىلاپ . شۇڭا دەيمەن : ئۆز تىلىم - گۆھەر تىلىم ،زەر تىلىم ، بوپقالغىنى ئۇششاق تىل ئەمەس ھەرگىز ئىلىىتى . زەررە كىچىك ، ئاتوم شۇ زەررىلەردىن تۈزۇلگەن ، مىنىڭ تىلىم ئاشۇنداق ، ئاتومچە بار قىممىتى . ئەي تەڭرىتاغ پەرزەنتى ، ئۇزۇن سەپەر كارۋىنى ، سىيپىماقتا مەڭزىڭنى تاڭنىڭ مەيىن شامىلى . مۇھەببەتلىك باغاشتا كۈلۈپ يايرا ،ياڭرىسۇن ، سەككىز مىليون شاد دىلنىڭ ئانا تىلدا ناۋاسى!! مەنبە : روزى سايىتنىڭ "ئانا تىلىم -زەر تىلىم" ناملىق شېئىرلار توپلىمىدىن

musilina

	روزى سايتىنىڭ دېھقانلار تۇرمۇشىنى ئاساس قىلپ يازغان شېئىرىلرى كەڭ ئوقۇرمەنلەرنىڭ قىزغىن ئالقىشىغا ئېرىشكەن،شۇڭا كىشىلەر روزى سايىتنى << دېھقان شائىرى>> دەپ ئاتاشقان..... روزى سايتنىڭ تەرجىمھالى توغرىسىدا تونۇشقا ئىگەبولدۇم،رەھمەت سىزگە......

julala

	مەن مۇ ئاشۇ شىېر نى ياخشى كۇرىمەن..؟ [s:2]

zapar

	ئەڭ قالتىس شائىرمىزنىڭ بىرسى ئىدى،رەھمەتلىك

SANSIZ0903

	شائىرنىڭ شىئىرلىرى ھەقىقەتەن ياخشى ئىدى رەھمەتلىك     توۋۋا دەيمەن بۇ بىرئەۋلاد كىملىشىپ كەتتى     ۋىجدانىنى زەي شور بېسىپ چىملىشىپ كەتتى     قەشقەر-خوتەن ئاشتۇزىدا ئەتلەنگەن تۇرۇپ     يۈرۈش-تۇرۇش ئوي پىكردە رىملىشىپ كەتتى     ئەركەكلىرى ئەردەك ئەمەس روھى زەيپانە     ئەقلى پۇلپەز غورورى دەز نىملىشىپ كەتتى     قىزچاقلىرى قىزدەك ئەمەسشەرمى ھايا كەم     كۆكسى ئۇچۇق بېشى چۇۋۇق شىملىشىپ كەتتى