292. باپ كىيىم –كىچەك ۋە يۈرۈش- يۇرۇشتا ئەرلەرنىڭ ئاياللارغا، ئاياللارنىڭ ئەرلەرگە ئوخشاش بولۇۋېلىشنىڭ ھاراملىقى توغرىسىدا
1631. ئىبىن ئابباس رەزىيەللاھۇ ئەنھۇمادىن رىۋايەت قىلىنىدۇكى، پەيغەمبەر ئەلەيھىسسالام ئاياللارغا ئوخشاش بولىۋالغان ئەرلەرگە، ئەرلەرگە ئوخشاش بولىۋالغان ئاياللارغا لەنەت قىلدى. يەنە بىر رىۋايەتتە: رەسۇلىللاھ ئاياللارغا ئوخشىۋالغۇچى ئەرلەرگە، ئەرلەرگە ئوخشىۋالغۇچى ئاياللارغا لەنەت قىلدى، دىيىلگەن.
ھەدىسنىڭ مۇھىم نۇقتىلىرى: 1) ئەرلەرنىڭ سۆز- ھەركەت، كىيىم- كىچەك، يۇرۈش-تۇرۇش، ياسىنىش ۋە ئۇنىڭدىن باشقا ئاياللارغا خاس ئادەت، مىجەزلەردە ئاياللارغا ئوخشىۋېلىشىنىڭ ھارام ئىكەنلىكى، ئاياللارنىڭ ھەم يۇقۇرقى ئىشلاردا ئەرلەرگە ئوخشىۋېلىشىنىڭ ھارام ئىكەنلىكى.
2) ئالىملار ئېيتىدۇ: ھەدىستىكى لەنەت سۆزى ئوخشىشىۋىلىشنىڭ چوڭ گۇناھ ئىكەنلىكىنى ئۇقتۇرۇدۇ.
ئەرنىڭ ئايالغا، ئايالنىڭ ئەرگە ئوخشىۋېلىشىنىڭ ھاراملىىقىدىكى ھىكمەت: ھەر بىر ئوخشىۋېلىش ئاللاھ تائالا ياراتقان ئۆزلىرىنىڭ تەبىئى خاراكتىرىدىن چەتنەش بۇلۇپ، خاس روھىيەتكە تەھدىت بۇلىدىغانلىقى ئۈچۈندۇر.
1632. ئەبۇ ھۇرەيرە رەزىيەللاھۇ ئەنھۇدىن رىۋەيەت قىلىنىدۇكى، پەيغەمبەر ئەلەيھىسسالام: «ئايالچە كىيىم كىيىۋالغان ئەرگە ۋە ئەرەنچە كىيىم كىيىۋالغان ئايالغا لەنەت قىلدى».
ھەدىسنىڭ مۇھىم نۇقتىلىرى: 1) ئەرلەرنىڭ ئايالچە، ئاياللارنىڭ ئەرچە كىيىم كىيىشنىڭ ھارام ئىكەنلىكى.
2) ئەر- ئاياللارنىڭ كىيىم- كىچەكتە بىر- بىرىگە ئوخشىۋېلىشى ھەر بىرىنىڭ ئەرلىك تەبىئىيىتى ۋە ئاياللىق تەبىىئىتىدىن چەتنەش، خاسلىقىنى ساقلىماسلىق ئىككى جىنىسنىڭ ئۆز ئالدىغا خاس بولغان ئالاھىدىلىكىنى ۋە ھۆرمىتىنى دەپسەندە قىلىش ۋە قارغۇلارچە دورامچىلىق قىلىش ھىساپلىنىدۇ. بۇنداق قىلىش پەقەت ئىسلامنىڭ توغرا كۆرسەتمىلىرىدىن ۋە پەيغەمبەر سۈننەتلىرىدىن چىققانلىقلا بولماستىن ئىنساننىڭ ئەسلى خارەكتىر ۋە تەبىئىيىتىدىن تايغانلىق، ئۆز ئىززەت شەرىپى ۋە قەدىر- قىممىتىنى يوقاتقانلىقىدۇر.
1633. ئەبۇ ھۇرەيرە رەزىيەللاھۇ ئەنھۇدىن رىۋەيەت قىلىنىدۇكى، پەيغەمبەر ئەلەيھىسسالام مۇنداق دىگەن: « ئىككى گوروھ دوۋزىخى ئادەملەر باردۇركى، ( مەن ئۇلارنى دوزاقتا كۆرۈۋىدىم) ئۇلارنى دۇنيادا كۈرۈپ باقمىدىم. بىرى: قوللىرىدا كالىنىڭ قۇيرۇقىدەك قامچىلارنى تۇتۇۋېلىپ، كىشىلەرنى ئۇرىدىغان ئادەملەر، يەنە بىرى: يېرىم يالىڭاچ كىيىنگەن، ئۆزلىرىمۇ ئېزىپ باشقىلارنىمۇ ئازدۇرىدىغان، باشلىرىدىكى چاچلىرى توگىنىڭ لوكىسىدەك ساڭگىلاپ تۇرىدىغان ئاياللار بولۇپ، ئۇلار جەننەتكە كىرەلمەيدۇ، جەننەتنىڭ پۇرىقىنىمۇ پۇرىيالمايدۇ. جەننەتنىڭ پۇرىقى يىراق جايلاردىنمۇ پۇراپ تۇرىدۇ.»
ھەدىسنىڭ مۇھىم نۇقتىسى: كىشىلەرنى ھېچقانداق سەۋەپسىزلا ئۇرۇش ياكى ئازار بىرىشنىڭ ھارام ئىكەنلىكى، كىشىلەرگە تۆھمەت چاپلايدىغان، ئۇلارنى قۇل ئورنىدا كۆرىدىغان ۋە ئۇلارنى ھەر خىل زۇلۇم ئارقىلىق قىينايدىغان كىشىلەر بولسا دىندىن يىراقلاشقان كىشىلەردۇر. ئۇلارنىڭ دۇنيادىكى جازاسى خارلىق، ئاجىرەتتە بولسا دوزاق ئازابى بولىدۇ.
مەنبە : مۇھەممەت سالىھ داموللا ھاجى ئۇيغۇرچىغا تەرجىمە قىلىپ نەشىر قىلدۇرغان « ياخشىلار باغچىسى( رىيازىسسالىھىين)» دىگەن كىتاپ.