كۆرۈشمىگىلى ئۇزاق بولغان، ئوتتۇرا مەكتەپتە بىللە ئوقۇغان بىر ساۋاقدىشىم بىلەن يېقىندا ئۇچرىشىپ قالدىم. ئەينى چاغدا ئۇ تولىمۇ تىرىشچان قىز بولۇپ، ھەممىمىز ئۇنىڭغا ھەۋەس قىلاتتۇق. ئۇ ئالىي مەكتەپتە ئوقۇۋاتقاندا چەت ئەلگە چىقىپ ئوقۇشنى نىشانلىغانىدى. مەن ئۇنىڭ بىلەن ئوقۇش، خىزمەت توغرىسىدا ئەھۋاللاشتىم. ئۇ ئىزچىل تىرىشىش ئارقىلىق ئاخىرى چەت ئەلگە چىقىپ ئوقۇش نىشانىغا يەتكەنلىكىنى ۋە باشقا مۇۋەپپەقىيەتلىرىنى ئىشتىياق بىلەن سۆزلەپ بەردى...
ئەمەلىيەتتە، ئەستايىدىل ئويلانساق، زور مۇۋەپپەقىيەتلەرگە ئېرىشكەن داڭلىق ئەربابلارنىڭ ھەممىسىدە تۇغما تالانت ياكى قابىلىيەتنىڭ مۇكەممەل بولۇشى ناتايىن، ئۇلارنىڭ باشقىلاردىن پەرقى تىرىشچانلىق دەرىجىسى ۋە تەپەككۇر شەكلىنىڭ ئوخشىماسلىقىدا.
مۇۋەپپەقىيەت قازىنىمىز دەيدىكەنمىز، چوقۇم تىرىشىمىز، مۇۋەپپەقىيەت قازانغۇچىلارنى ئۆزىمىزگە ئۈلگە قىلىشىمىز كېرەك. مۇۋەپپەقىيەت قازانغۇچىلارئۆزىگە ئىشىنىدۇ ھەم تىرىشقاندىلا نەتىجە قازانغىلى بولىدۇ، دەيدىغان تەپەككۇر بىلەن ئالغا ئىنتىلىدۇ، ھارماي ئىزدىنىدۇ. زور مۇۋەپپەقىيەتكە ئېرىشكەن داڭلىق ئەرباب ھەققىدە مۇنداق بىر ھېكايە بار: بىر ئالىي مەكتەپنىڭ پروفېسسورى يېڭى ئوقۇش مەۋسۇمىدە ئوقۇغۇچىلارغا ھەر كۈنى بىلىكىڭلارنى ئالدىغا 300 قېتىم، ئارقىغا 300 قېتىمدىن سىلكىڭلار، دەپ تەكلىپ بېرىپتۇ، بىر ئاي ئىچىدە %90 ئوقۇغۇچى پىروفېسسورنىڭ تەكلىپىنى بەجا كەلتۈرۈپتۇ، يەنە بىر ئايدىن كېيىن تەكلىپنى داۋاملاشتۇرغۇچىلار%80 كە چۈشۈپ قاپتۇ. بىر يىلدىن كېيىن، پىروفېسسور ئوقۇغۇچىلاردىن: تەكلىپىمنى ھازىرغىچە ئورۇنداۋاتقانلار قانچىلىك؟ دەپ سورىغان ئىكەن، بىر ئوقۇغۇچىلا قول كۆتۈرۈپتۇ. بۇ ئوقۇغۇچى يىللار ئۆتۈپ دۇنياغا داڭلىق ئەرباب بولۇپ تونۇلۇپتۇ. بۇ دەل داڭلىق پەيلاسوپ پىلاتوندۇر.
ھازىر بىر قىسىم ياشلىرىمىز تۇرمۇشتا ياكى خىزمەتتە ئازراق ئوڭۇشسىزلىققا ئۇچرىسىلا، نېمە قىلارىنى بىلەلمەي، مەغلۇپ بولۇشىنى ‹‹پېشانىسىنىڭ تەتۈرلۈكى›› دىن كۆرۈپ، ھېچ ئىش خوشياقماي، ئۆزىنى تاشلىۋېتىدۇ. بەزىلەر ئازراق نەتىجە قازانسىلا، خۇدىنى بىلمەي كېرىلىپ كېتىپ، كېيىنكى كۈنلەردە قىردىن ئاشالماس بولۇپ قالىدۇ، ئالىي مەكتەپنى پۈتكۈزگەن بىر قىسىم ياشلارمۇ مۇقىم خىزمەتنى كۈتۈپ، نۇرغۇن ياخشى پۇرسەتنى قولدىن بېرىپ قويىدۇ ۋاھاكازا. دۇنيادا مەغلۇبىيەتكە، ئوڭۇشسىزلىققا ئۇچرىمايدىغان ئىنسان بولمايدۇ. ‹‹قىيىن ئىش يوق ئالەمدە، كۆڭۈل قويغان ئادەمگە›› دېگەندەك، بىر ئىشقا ئەستايىدىل مۇئامىلە قىلىپ، ئىزچىل تىرىشقاندىلا، قىيىنچىلىقلارنى يېڭىپ، كۆزلىگەن نىشانغا يەتكىلى بولىدۇ.
پاكىتلار شۇنى ئىسپاتلىغانكى، ئۈزلۈكسىز تىرىشىش مۇۋەپپەقىيەت قازىنىشتىكى مۇھىم ئامىل. ھەر قانداق ئىنساننىڭ گۈزەل ئارزۇسى بولىدۇ، شۇ گۈزەل ئارزۇ يولىدا بوشاشماي تىرىشقان ھەم بۇ يولدا يولۇققان ئوڭۇشسىزلىقلارغا توغرا مۇئامىلە قىلالىغان كىشىلەرلا ئارزۇسىغا چوقۇم يېتەلەيدۇ.
مەنبە:
http://www.igilik.net