قوشاق يىغىمەن.

ubul0998

	ئۇ قاتىمۇ يارىم بار، بۇ قاتتىمۇ يارىم بار. ئۇ قاتتىكى يارىمدىن، ئۆلگۈچە تەمەيىم بار. ئۇ قاتقا چىقارسىز دەپ، بۇ قاتتا قۇنۇپ قالدۇق. ئۈچ كۈندە كېلەرمىز دەپ، يالغانچى بولۇپ قالدۇق. بېشىڭدىكى دوپپاڭنىڭ، سۇغا چۈشتى شولىسى. ئاخاش سۆيگەن يارىمنىڭ، يار ئۈستىدە ھويلىسى. باغدا ئۇنتۇلۇپ قاپتۇ، خامان سورىغان ئارا. چۈشۈمگە كىرىپ قاپتۇ، بۇلتۇر ئوينىغان قارا. تاماكىنى تارىۋالاي، چوغلارنى قۇتيۇپ. يار بىلەن ئوينىۋالاي، ئۇيقۇمنى قۇيۇپ. ئېرىق ئىچىدە يىلان، چىر-چىر قىلىدۇ. سىزگە كۆيگەن بۇ يۈرەك، پىژ-پىژ قىلىدۇ. باھار كېتىپ ياز كەلدى، بۇلبۇل قوندى تېرەككە. مېنىڭ دىلىم ئاغرىيدۇ، يار داغ سالغاچ يۈرەككە. ئۆستەڭ بويىدا يالپۇز، يالپۇزنىڭ شېخى يالغۇز. بارچە خەقنىڭ يارى بولسا، مەن ئۆزۈم تېخى يالغۇز. قايناۋاتقان قازانغا، چۆمۈچ سالغان يوق. ئارىقىمىز يېقىن تۇرۇپ، سۆيۈپ قويغان يوق. كۈن ئىگىلىپ كەچ بولدى، تال ئىگىلىپ پەس بولدى. ئارىلىقىمىز يىراق ئىكەن، كۆرۈشمەكمۇ تەس بولدى. مەستكەنسىز، مەستكەنسىز، مەستتىن قالغان پەسكەنسىز. مەن سىزنى يىگىت دېسەم، يىگىت ئەمەس خەسكەنسىز. چىلاڭ خورىزىم، چىللاڭ، يارىم ئويغانسۇن. لەۋلىرىدىن چىشلىۋالاي، چۆچۈپ ئويغانسۇن. غەزەل ئوقۇماي دېسەم، ئوقۇتىدۇ دەرد يامان. يارغا يىغلىماي دېسەم، يىغلىتىدۇ ئوت يامان. ئۈرۈمچىدە تاغ تولا، سۇ قويمىغان باغ تولا. ياش بالىلارنىڭ دەردى كۆپ، يۈرىكىدە داغ تولا. ئېرىقتىكى لاي سۇغا، تاشلىۋەتتى چېلەكنى. بىزنى يامان دېگەن يار، تاللىۋالسۇن بۆلەكنى. گۈل بېغىمدا ئېچىلغان، ئانارگۈلنىڭ بىرىمەن. گۈل تۈۋىدە ئولتۇرغان، قارا كۆزنىڭ خىلىمەن. يامچى بولساڭ ئۇستا بول، ئاۋاتلىقنىڭ تامچىسىدەك. چوكان سۆيسەڭ يۆگەپ سۆي، ھارۋىكەشنىڭ قامچىسىدەك. تۈگمىنىڭگە بارمايمەن، ئۇن تۇزۇيدۇ ياقامغا. ياردىن كۆڭلۈم ئاغرىسا، قارىمايمەن ئارقىغا. بىلىكىمنىڭ ئاقلىقى، سائىتىمنىڭ يوقلىقى. شۇنچە خەق ئارىسىدا، بىزنىڭ يارنىڭ يوقلىقى. پاڭچۇ كۆڭلىكىم بولسا، مەكتەپ ئالدىدا كىيسەم. كۆڭلۈمدىكى يار بولسا، دۈشمەن ئالدىدا سۆيسەم. ئالما ئاتتىم ئاتقانغا، سىم كارۋاتتا ياتقانغا. سىز بىزدىن يامنلاپسىز، بىرنى سۆيۈپ قاچقانغا. ئات مىندىم دېگەن بىلەن، قامچا بولمىسا بولماس. يار تۇتتۇم دېگەن بىلەن، ياندا بولمىسا بولماس. ئالتۇن تارغاق بېشىمدا، مەنمۇ باراي قېشىڭغا. ئاز كۈن ئويناپ ئايرىلدۇق، يىگىرمە ئالتە يېشىمدا. كۈندە كۆرمىدىم يارنى، بىر كۈنى كۆرەرمەن دەپ. ئۈمىد ئۈزمىدىم يارىدن، ئۆلمىسەم سۆيەرمەن دەپ. جۇرۇم ئۆتۈك كىيمەيمەن، ماڭسام پۇتۇم ئاغرىيدۇ. باش ئېلىپ كېتەي دەيمەن، سىزگە ئىچىم ئاغرىيدۇ. ئۇ قاتنىڭ بازارىدا، رەڭمۇ-رەڭ تاۋارى بار. چۆرگىلەپ كېتەلمەيسەن، سۆيگەننىڭ خۇمارى بار.

OTYAK

	ئوبۇل يىغىپ مىڭ قوشاق، خۇشال قىلدى ھەممە ياق. رەھمەت بىلەن تۇگىمەس، قوشاق بىلەن ياز ئوتياق. مىسرانىمدا قوشاقنى، تۆكمە قىلدى ئوبۇلجان. يىڭى-يىڭى مەزمۇننى، بىلىۋالدى بالىجان. نەزەر كۆرۈپ خوش بولدى، يىغىۋالدى مىڭ قوشاق. خەت يازىدۇ ياشباللار، ئەيمىنمەستىن قىرى بويتاق. قوشاق قوشاق مىڭ قوشاق، يەنە كېلەر ئۇز قوشاق. قوشاق بولسا يېزىڭلار، يەنە تويسۇن بۇ قوساق. _ ئوتياق

ubul0998

	ئالماڭنى ئىغىتمامسەن، دەريانىڭ ئۇ قېشىغا. يازغان خەتلىرىڭ تەگدى، يۈرەكنىڭ بېغىشىغا. ئوتۇن باستىم ھارۋىغا، تارتىۋالاي سىم بىلەن. قولۇمغا پۇتا چىقتى، ئوينىۋالاي سىز بىلەن. راۋابىمنى چالاي دەيمەن، زەخمەك بىلەن تارى يوق. يېڭىياچە يار تۇتسام، تاشلىۋەتتى كارى يوق. غازىمەنۇ، غازىمەن، چۆلدە ئۇچقان غازىمەن. سەندىن باشقا يار تۇتۇپ، ئۆلۈپ كەتسەم رازىمەن. قىزىلگۈلنىڭ غۇنچىسىنى، ئۈزەي دېسەم ئۈزگۈم يوق. سەن يارىمنى دېمىسەم، بۇ شەھەردە تۇرغۇم يوق. كەتمەن ئالدىم بازاردىن، ئېرىق-ئۆستەڭ چاپاي دەپ. مەنمۇ ئىزدەپ يۈرىمەن، خالىغاننى تاپاي دەپ. ئالمىلىق باغقا كىردىم، ئالمىنى ئىرغاتقىلى. ئالمىنى قىزغا بېرىپ، چوكانلارنى يىغلاتقىلى. شوتا قويدۇم شاتۇتقا، شاتۇت شېخى پەس ئەمەس. بۇرۇن سۆيگەن يارىمنى، ئەمدى سۆيمەك تەس ئەمەس. ئاق پاڭچۇدىن كۆڭلەكنى، ئېلىپ قويغىن لاپاسقا. يارنى تۇتساڭ قوشلاپ تۇت، بىرى قالسۇن زاپاسقا. ئۈرۈمچى دېگەن شەنىڭ، تېشى بار، تۇپىسى يوق. چىرايلىقنى يار تۇتساڭ، دەردى بار، ۋاپاسى يوق. ئۈرۈمچىگە بارمايمەن، پۇتۇم ئاغرىيدۇ مېنىڭ. ئۆلۈپ كەتكەن يارىمغا، ئىچىم ئاغرىيدۇ مېنىڭ. ئاق بىلىكىڭ ئاقمىدى، بېلىڭدىكى قاقمىدى. ئاخشام قىلغان گەپ-سۆزۈڭ، قۇلىقىمغا ياقمىدى. بازار بېشىدا قوي سۆيسام، پىچاق كەستى قولۇمنى. ئاشنىلىق ياراشقاندا، دۈشمەن توستى يولۇمنى. ئېگىز تاغقا قار يېغىپتۇ، پەس تاغقا يامغۇر. مېنىڭ يارىم ئاش ئېتىپتۇ، گۆشى يوق چامغۇر. مەن قاچان چوڭ بولىمەن، يارىم بىلەن تەڭ بولىمەن. سۆزىگە سۆز قايتۇرۇپ، دەردىگە دەرمان بولىمەن. بېرىپ ئۈزۈڭ باغدا ئانار، بېرىپ ئۈزۈڭ تاغدا ئانار. لىتىپخاننى كۆرگەندە، چاڭقىغان باغرىم قانار. ئەي لىتىپخان ئۆلمىسەك، مەڭگۈ ئۈمىد ئۈزمىسەك. ئەمدى قانداق قىلارمىز، بىر-بىرىمىزنى كۆرمىسەك. لىتىپخانغا كۆز يەتمەس، كۆز يەتمىسە ئۈن يەتمەس. لىتىپخاننى ئەسلىسەم، كىكىردەكتىن سۇ ئۆتمەس. ئاق ئالماڭنى يەرمەيمەن، ئېتىكىمنى لاي قىلىپ. سېنىڭ بىلەن يۈرمەيمەن، يۈرىكىمنى قان قىلىپ. ئاق ئالماڭنىڭ شېخى پەس، ئىگەي دېسەم ئىگىلمەس. شۇ خېنىمنىڭ كۆڭلى پەس، كىمنى كۆرسە ياق دېمەس. چىبەرقۇتتىن ئىشتان كىيىپ، كەمەر باغلىغان يارىم. ئايدا-يىلدا كۆرۈشمەي، خەۋەر ئالمىغان يارىم. بىخەۋەر دەپ ئاڭلىدۇق، چىن يۈرەكنى داغلىدۇق. سىلىگە بەرگەن كۆڭۈلنى، تىنىچ-ئامان ساقلىدۇق. ئاتنى باغلىدىم تۈزگە، بۇغداي تېرىدىم كۈزگە. خىيال بىلەن ئولتۇرۇپ، سالام يوللىدىم سىزگە. ئىككى تاغ ئارىسىدا، ئېرىمەيدىكەن قارلار. بىزدىن ئامەت قاچقاندا، قارىمايدىكەن يارلار. ئاتنىڭ بالىسى جەدە، مىنسەم قۇيرۇقى يەردە. چاقىرسام ئۈنۈم يەتمەس، مەھەللىسى يىراق يەردە. توپ تېرەكنىڭ تۈۋىدە، توپ ئوينىغان قارا كۆز. ياخشى يارنى كەپتۇ دەپ، زەن قويمىغان قارا كۆز. گۈلمىدى ئاچىلغىلى، غۇنچىمىدى ساچىلغىلى. ۋەدىمىز شۇنداقمىدى، ئۆلمەي تىرىك ئايرىلغىلى. ئاق بىلىكىڭ ئاقمىدى، بېلىڭدىكى قاقمىدى. ياقئېرىقتىن خۇتۇن ئالسام، مىجەزىمگە ياقمىدى.

ubul0998

	شىپۇندىن كۆڭلەك كىيمە، رەڭگى ئۆڭۈپ كېتىدۇ. نادانغا كۆڭۈل بەرمە، قۇشتەك ئۇچۇپ كېتىدۇ. بېغىڭدىكى ئالماڭنى، چىشلەپ يەيمەن، ئۈزمەيمەن. كۆڭلۈم چۈشمىگەن يارغا، چولام تەگمەيدۇ سۆيمەيمەن. ئاھ خېنىم، بويۇڭ پاكار، چىرايىڭ ئەڭلىك-ئۇپا. ئۇز چىرايىڭ بولمىسا، ئۇپا-ئەڭلىكىڭ بىكار. يۈرۈڭ يارىم مەن بىلەن، بېرىپ كېلىلى سەيلىگە. غېرىپ قىلماڭ كۆڭلۈمنى، كىرىپ دۈشمەن كەينىگە. ئاھ خېنىم، ئويناڭ خېنىم، داپنى چېلىپ ھارمايمەن. ھېرىپ قالسام نەغمەمدە، ئەل ئىچىگە بارمايمەن. ئىلەكتىن ئۆتۈپ باردۇق، كۇلاسقا يېتىپ باردۇق. ئۇسسۇل ئوينىغان خېنىمنى، قوشاققا قېتىپ باردۇق. ئۇچامدىكى كۆڭلەكنىڭ، ياقىسىغا گۈل تۇتتۇم. سىز خېنىمنى چاي قىلىپ، ئىككى پۈۋلەپ بىر يۇتتۇم. ئۈرۈمچىگە بارغۇچە، نى داۋاندىن ئاشقان بىز. سىزدەك بىۋاپا يارنى، تاشلىۋېتىپ قاچقان بىز. ئاسماندا مېنىڭ ئايىم، ئاۋاتتا مېنىڭ جايىم. ئاڭلاڭلار خالايىقلار، گۈل قىسقان مېنىڭ يارىم. يۇلغۇن چېچىكى سايدا، تاز خۇتۇنغا ئەر قايدا. خۇتۇن ئالساڭ تازنى ئال، يېلىم پۇلىغا پايدا. جىنچىراقنىڭ كۆيگىنىدىن، كۆيمىگىنى ياخشىراق. بىۋاپانىڭ سۆيگىنىدىن، سۆيمىگىنى ياخشىراق. بىز ئىلىغا ماڭغاندەك، ئۈرۈمچىگە ماڭماپتۇق. لىتىپخانغا كۆيگەندەك، ھېچ كىشىگە كۆيمەپتۇق. ئاھ خېنىم، لىتىپخېنىم، ئۆيىڭىز دۆڭ مەھەللىدە. كۆيدى ئىشقى ئوتلىرىم، لىتىپخاننىڭ دەردىدە. بۇ خۇدانىڭ تەقدىرى، لىتىپخاندىن ئايرىدى. ئىككىمىزنىڭ نالىسىغا، جانىۋارلاې سايرىدى. بېدەڭنى ئوراي دېسەم، ئورغاق كەستى قولۇمنى. مەن مەھەللەڭگە ماڭغاندا، دۈشمەن توستى يولۇمنى. ئاق قۇشقاچ ھارامزادە، ئېگىز يەرنى خالايدۇ. مېنىڭ ئۇماق شۇ يارىم، يەر ئاستىدىن قارايدۇ. باغدا پىشقان مېۋىنىڭ، ئەجەپ تاتلىق سۈيى بار. بىزنىڭ قارا قاش يارنىڭ، دۆڭ مەھەللىدە ئۆيى بار. بىر جۈپ ئالما ساقلىدىم، يار كەلسە بېرەرمەن دەپ. ئۆيۈمنى ياساپ قويدۇم، كۆڭلىنى ئالارمەن دەپ. ئوتىڭىز يامان ئىكەن، تۇتاشتى بۇ يۈرەككە. تارتمايدۇ مېنىڭ كۆڭلۈم، سىز يارىمدىن بۆلەككە. ئىشىك ئالدى مۇز كۆلچەك، ئاتلىماي ئۆتۈپ كەتتىم. باشقا يار تېپىۋاپسەن، قارىماي ئۆتۈپ كەتتىم. يارىم كۆڭلەك كىيىپتۇ، گۈلى يوغان تاۋاردا. ئۆتكەن ئاخشام سىز چىقماي، توڭلاپ قالدىم تالادا. راۋاپ چېلىپ ئوينايمەن، يانچۇقۇمدا تارىم بار. سېنىڭ بىلەن يۈرمەيمەن، سەندىن گۈزەل يارىم بار. مېنىڭ يارىم ئۆگزىگە، كىشمىش يېيىپتۇ. ئىككىمىزنىڭ يۈرگىنىنى، كىشىلەر بىلىپتۇ. يارنى يار دەپ كەپتىمەن، ياردىن كەلمەيدۇ ۋاپا. يارنىڭ بەك چىرايلىقى، سالىدۇ جانغا جاپا.

مۇرات

	سىز كىلەمسىز بۇياققا، مەن بارايمۇ ئۇياققا. ئۆيلەنمىسەم بولمايدۇ، سىزدەك گۈزەل ئۇماققا! يارىم ناخشا ئېيتىدۇ، ئەجەپ مۇڭلۇق، يېقىملىق. ئايرىلغاندا بىلىندۇ، كۆڭۈلدىكى يېقىنلىق. ئېرىقتا بېلىق يارىم، گەپ - سۆزى سىلىق يارىم. ساڭا بولغان مۇجەسسەم، بارچە ئۇز  قىلىق يارىم. بازاردىكى ماللارنىڭ، ساختا ئىكەن بەزىسى. راستمىدۇ يالغانمىدۇ، سەن يارىمنىڭ ۋەدىسى. تۈن كېچىدە تولدۇردۇم، قۇشاق يېزىپ دەپتەرنى. يارىم بىلسۇن بۇنىڭدىن، ئىچىمدىكى دەرتلەرنى.

ubul0998

	سېرىق تاۋار كۆرپەڭنىڭ، گۈلى يوغان، تېگى بوش. سەندەك يارنى تۇتمايمەن، گېپى يوغان، بېلى بوش. ئىشىكىڭدىن ئۆتكەنگە، قىلىۋالىسەن گەپنى. مەن يىراققا كەنكەندە، تارتىۋالىسەب دەردنى. سەن مېنى ئاۋارە قىلساڭ، مەن سېنى شەيدا قىلاي. كۆزلىرىڭنى باغلاپ تۇرۇپ، توققۇز خېنىم پەيدا قىلاي. يېڭى ئۆستەڭ يار كەتتى، ئۇنى بېرىپ قاشلايلى. يار گېپىڭىز راست بولسا، مۇھەببەتنى باشلايلى. ئالما شېخىى پەس ئىكەن، ئېلىپ يېمەك تەس ئىكەن. بىر مەھەللىدە چوڭ بۇلۇپ، كۆرۈشمىكىمىز تەس ئىكەن. قاتار-قاتار سىم تارتتى، ئايباغ يېزا يولىغا. نېمانچىلا قارايسەن، بىۋاپا يار يولىغا. راۋابىمنى چالمايمەن، قۇزۇققا ئىلىپ قويدۇم. ۋاپاسىزنىڭ دەردىنى، ئىچىمدە بىلىپ قويدۇم. چاقىمنىڭ ئۇچى كالتە، بىر خىيالدا چۆرۇيمەن. ۋاپا قىلمىغان يارنى، باش-كۆزۈمدىن ئۆرۈيمەن. تاللىغىنىم گۈل ئەمەس، سۆيگەن گۈزەل يارىم مېنىڭ. بۇ گۈزەل يارىم ئۈچۈن، بولسۇن پىدا جېنىم مېنىڭ. يار ۋەسلىگە يېتىشتۇر، ئارزۇ-ئارمانىم مېنىڭ. بولغۇسى بىر كۈن نىسىپ، دەردىمگە دەرمانىم مېنىڭ. تراكتۇرنى ھەيدەيمەن، تاغ باغرىنى ئەگىتىپ. يارىم ناخشا ئوقۇيدۇ، يۈرىكىمنى سەگىتىپ. گۈللەر ئېچىلار غاغدا، باھار پەسلى يەتكەندە. قەدرىم ئۆتۇلەر يارغا، مەن بۇ يەردىن كەتكەندە. ئۇ يەرمۇ تاغ، بۇ يەرمۇ تاغ، ئېرىمەيدۇ قار. باغدا تۇرۇپ شەرەت قىلسام، تۇنىمايدۇ يار. يارىم كەچتە چىللايدۇ، ئەتە بارسام تىللايدۇ. تىللىسىمۇ تىللىسۇن، ياردىن كۆڭلۈم قالمايدۇ. بىلدىم يار قەدرىنى، ئۈزۈپ پۇراي گۈلىنى. ئۆلگۈچە بىر تۇتماسمەن، باشقا يارنىڭ قولىنى. ئېرىق چاپساڭ چوڭقۇر چاپ، ياش بالىلار چۆكۈپ كەتسۇن. ياش بالىلارنىڭ دەردىدە، چوكانلار ئۆلۈپ كەتسۇن. ئىچىم قاينايدۇ، قاينايدۇ، قازانداە قاينىغان چايدەك. ئۆمرۈم شۇنداق ئۆتەمدۇ؟ ئۆستەڭدىكى لاي سۇدەك. مېكيان تۇخۇ باقماڭلار، سەھەر قانات قاقمايدۇ. چوكان ئاشنا تۇتماڭلار، جۇۋانلاردەك باقمايدۇ. بېغىم بارۇ، بېغىم بار، بۇغدايلىقتا زاغۇن بار. كىمنىڭ قىزى شوخ بولسا، شۇنى بېرىپ ئالغۇم بار. يارىمنىڭ مېڭىشلارى، ماڭسا قول سېلىشلارى. ھېچ كىشىگە ئوخشىماس، بىر قاراپ قۇياشلارى. دۇتدر چېلىپ ئۆگەندىم، راۋاپ چېلىپ ئۆگەندىم. چوكاندىن يارىم تولا، جۇۋان سۆيۈپ ئۆگەندىم. باغدا كاككۇك  سايرايدۇ، تىشاڭلار نېمە دەيدۇ. ھەر كىم ھەر نېمە دەيدۇ، دەرد كەلمىسە بىلمەيدۇ. كېتىپ قالساڭ ئاخىرەتكە، يىغلاپ قالاي كاككۇكۇم. كۈندە بېرىپ بېشىڭغا، تاۋاپ قىلاي كاككۇكۇم. بىر گەپنى قىلىپ قويدۇم، تەكتىنى ئۆزۈڭ ئويلا. كىچىكىمدە يار تۇتاي، يۈرىكىمدە داغ تولا. دوستۇم سورىسا مېبى، بەختىيار ئامان دەڭلار. بىر-بىرىدىن ئايرىلىش، ھەممىدىن يامان دەڭلار. ئەسسالام دەپ ئۆيگە كىرسەم، ئۆيدە يارىم ئولتۇرار. قاشلىرى قىيغان قەلەمدەك، كۆزلىرى ئويناپ تۇرار. ئالمىلار پىشاي دەپتۇ، شاخ-شېخىدا مەي بولۇپ. يار بىزدىن يامانلاپتۇ، بۇلۇت توسقان ئاي بۇلۇپ. قىزىلگۈلۈم چىرايلىق، يامان ۋاقتا غازان بولدى. مېنى ئوتقا سېلىپ قۇيۇپ، ئۆزى يولغا راۋان بولدى.

ubul0998

	چىمەن دوپپام بېشىمدا، قويغان ئوسما قېشىمدا. مەن ساڭا كۆيۈپ قالدىم، بىردەم تۇرغىن قېشىمدا. يارىم قوناق ئوتايدۇ، يول بويى قوناقلىقتا. تەرلەپ كەتسەم يەلپىيدۇ، ئانار گۈللۈك ياغلىقتا. ئىشىكىمدە بەسەيلىك، بەسەيلىكتە ئىزىڭىز. مەن ئۆزۈمچە كۆيمەيتىم، كۆيۈپ قالغان ئۆزىڭىز. ئىشىكىمنىڭ ئالدىدىن، ئېتىڭنى قامچىلاپ ئۆتتۈڭ. يا ئۈنۈڭ يوق، يا سۆزۈڭ يوق، ئىچىمگە چوغ سېلىپ ئۆتتۈڭ. تاغدەك يۈرىكىم تاغدەك، كاككۇك سايرىغان باغدەك. دائىم ئوينىساق دەيمەن، باشتا ئوينىغان چاغدەك. يارنىڭ ئۆيى دالدىدا، گۈل باغچىنىڭ ئالدىدا. كېلىڭ يارىم بىر سۆيەي، دۈشمەنلەرنىڭ ئالدىدا. ئالما بەرمىگەن يارنى، ئالما بەردى دەپتىمەن. كۆڭۈل بەرمىگەن يارنى، ۋاپادارىم دەپتىمەن. چوڭ چىنەممۇ چېقىلدى، كىچىك چىنەمگە دەز كەتتى. ئاق چوكاننىڭ ئۆلگىنى، ئالتە شەگە داڭ كەتتى. قوشقۇدۇقتا قوي سۆيسام، دىۋانە كاۋاپ دەيدۇ. ئاق چوكاننى بىر سۆيسە، ئۆلگۈچە ساۋاپ دەيدۇ. شوتا قۇيدۇم شاتۇتقا، بىز مۇساپىر بۇ يۇرتقا. مۇساپىر دەپ خار كۆرمەڭ، يېنىپ كېتىمىز ئكز يۇرتقا. كېتىپ بارغان خانىمنى، شەرەت بىلەن توختاتتۇق. قول سېلىشقا قاراپلا، بىزنىڭ يارغا ئوخشاتتۇق. يار كېتىپ يامان بولدى، چىرايىم سامان بولدى. يار بىلەن كۆرۈشمىگىلى، بەش-ئالتە زامان بولدى. كۆردۇڭمۇ قارا قاشنى، بىزنىڭ يار قەلەمقاشنى. ئۆلتۈرسەڭمۇ يېمەيمەن، يارىم ئەتمىگەن ئاشنى. خەتنى يازدىم ئەلەم بىلەن، ئۇچى ئالتۇن قەلەم بىلەن. خېتىمنى تامام قىلدىم، يالقۇنلۇق سالام بىلەن. ئىككى ئېرىققا سۇ كەپتۇ، ئۈنچە-مارجان ساي بىلەن. مېنىڭ يارىم كەپ قاپتۇ، يېڭى چىققان ئاي بىلەن. ئاي چىقىپ پەلەككە يەتتى، كۈن تېخى پەرمان بىلەن. كۆڭۈل ئاچساق تەڭ ئاچايلى، ئىشتىياق،  ئارمان بىلەن. ئىشىك ئالدى قوش ئېرىق، قوشۇلغىچە ئوينايمىز. ئۇچىمىزدا ئاق كۆڭلەك، يىرتىلغىچە ئوينايمىز. مالدار قوچقار ساقلىسا، قوي بۇلاركەن يارىيار. ئۆيدە قىزنى ساقلىسا، توي بۇلاركەن يارىيار. قارا قارا قاغىلار، خاماندىدۇر يارىيار. ئاشنىسى يوق جۇۋانلار، ئارماندىدۇر يارىيار. گۈل بۇلۇپ تۇرساڭ ئەگەر، بۇلبۇل بۇلۇپ قونغۇم كېلۇر. بىر قاراپ قويساڭ ئەگەردە، بىرنى سۆيۈپ قويغۇم كېلۇر. قويچى بولساڭ قويلىرىڭنى، بىرگە باقايلى. مەيدەڭدىكى قوش ئالماڭنى، تۆشكە ياقايلى. شاپتۇلىڭنىڭ شېخى پەس، ئەگمەڭ دېسەم ئەگدىڭىز. بىزنى يامان دەپ يۈرۈپ، بارىتاخۇنغا تەگدىڭىز. ئالما شېخى شاخلايدۇ، يوغان تېرەك شاخلايدۇ. يوغان تېرەك تۈۋىدە، يارىم ئالما ساقلايدۇ. ئاقتۇر بىلىكىم، ئاقتۇر، ياردىن تەلىيىم يوقتۇر. ياردىن تەلىيىم بولسا، ئۆلسەم ئارمىنىم يوقتۇر. يار ئۈچۈن ئۆلۈم كەلسە ، ئاۋال قولۇمنى باغلىتاي. ئىچىمدا ئارمان قالمىسۇن، يارنى قېشىمغا چىللىتاي. ئاتاۇشنىڭ يولى يامان، توشۇيدۇ ئوتۇن-سامان. نادان بالىلار بىلمەيدۇ، ھەممىدىن كۆيۈك يامان. باغدا بارمىكىن بادام، ئاقساقال مېنىڭ دادام. بىز ئوينايدىغان چاغدا، يار كىچىك تېخى نادان. كۆيدىمما، كۈل بولدىمما، ئوتۇڭدا بۇلبۇل بولدىمما. بۇ سېنىڭ ياخشى خۇيۇڭغا، ئۆلگۈچە قۇل بولدىمما. قاشنى قاشقا ئۇلىسام، يەتمىدى قاش بويىغا. مېنى سېلىپتۇ خۇدايىم، بىۋاپا يار كويىغا. ئاق يەرگە قوناق چاچسام، چاچراپ كېتىمەن دەيدۇ. بىۋاپانى يار تۇتسام، تاشلاپ كېتىمەن دەيدۇ. مەن بۈگۈن كەتمەكچىمەن، ئەرزىم بايان ئەيلەپ كېتەي. ئەرزىم خۇداغا يەتمىسە، چۆللەردە قان يىغلاپ كېتەي. خويمۇ خورلايسەن يارىم، بىر سايان كەتكىممۇ بار. ساڭا بەرگەن شۇ كۆڭۈلنى، خارۇ-زار ئەتكىممۇ بار. قۇمېرىق دەرياسىدا، ئېچىلىپتۇ لەيلىگۈل. سەن يارىڭغا خەت ئەۋەتسەڭ، مەن ئەۋەتتىم تاجىگۈل. كاككۇك تولا سايرايدۇ، قىزلدۆڭ دېگەن جايدا. يارىم تولا چىللايدۇ، . چولام تەگمىگەن چاغدا

ubul0998

	ئاق ئات سېلىپ دەرياغا، ئۆتەلمىدىم ئۇ قاتقا. مەيلى بولسا ئۆتمەمدۇ، مېنىڭ يارىم بۇ قاتقا. گۈل بۇلۇپ يۈرسەڭ ئەگەر، بۇلبۇل بۇلۇپ قونغۇم كېلۇر. بىر قاراپ قويساڭ ئەگەر، بىر ئۆمۈر سۆيگۈم كېلۇر. بۇلبۇللار سايرايدىكەن، چىمەنزارلىق ئىچىدە. يارىم ب ىلەن كۆرۈشتۇق، ئاپئاق ئايدىڭ كېچىدە. يارىمغا ئانار تۇتتۇم، ئۇرۇقىنى يېسۇن دەپ. ماڭا مەيلى بارمىكىن، گەپ-سۆزىنى دېسۇن دەپ. گۈلدۈرماما گۈلدۈرلەيدۇ، يامغۇر ياغقاندا. يارنىڭ كۆڭلى يايراپ كېتەر، ئىشىك قاققاندا. ئۆزۈڭمۇ چاغلىق نەرسە، ماختىمىغىن ئۆزۈڭنى. سەندىن ياخشى يار تۇتتۇم، ئېچىپ قارا كۆزۈڭنى. چاھار باغقا بارغاندا، بۇلبۇل سايرايدۇ. يار بىلەن بىللە ئۆتسەم، كۆڭلۈم يايرايدۇ. قوشاق قېتىپ ئىزھار قىلدىم، يۈرەك سۆزۈمنى. يار ھۆسنىگە ھەۋەسلىنىپ، تىكتىم كۆزۈمنى. مەيلى بىلىڭ، مەيلى بىلمەڭ، خۇمار كۆز يارىم. نادانلارچە تاشلاپ كېتىپ، تۆكمەڭ يۈزۈمنى. ئات مىنىپ سەيلىگە چىقساڭ، قامچا دەستەڭ مەن بولاي. ھەممە ئەلنىڭ كۆزى سەندە، تىلتۇمارىڭ مەن بولاي. ئاق چەكمەن، قارا چەكمەن، رەڭدە بۇيىغان چەكمەن. مەن ساڭا كۆيۈپ قالدىم، مەن سەندىن تولا دەردمەن. ئېگىز ئاسماندا ئاي پاتتى، مەرغۇلاندا تاڭ ئاتتى. يار ئوتى يامان ئىكەن، ھەر تەرەپكە قاراتتى. يېڭى چاپقان ئۆستەڭگە، سۇ باشلىدىڭ يىراقتىن. سالام يازدىم نىگارىم، كۆيۈپ پىشقاچ پىراقتىن. ئېرىقىڭدا سۇ بۇلۇپ، مايساڭغا ئاقاي دەيمەن. سېنىڭ بەرگەن گۈلۈڭنى، مەيدەمگە تاقاي دەيمەن. ئىشىكىڭدىن ئۆتەرمەن، يۆتىلىپ، گۈل كۆتۈرۈپ. مەيلىڭ بولسا چىقمامسەن، چىنەڭدە چاي كۆتۈرۈپ. ئاسماندا تۇلۇنئاي بار، چىراغنى يۇرۇتمايمەن. سىز يارىمدىن باشقىنى، سىز يارىمدىن كەچمەيمەن. باغتوغراققا بارمايمەن، چاڭ تۇزىدى ئەڭلىمگە. ئەمدى سىزنى سۆيمەيمەن، كىرىۋالۋاڭ كەينىمگە. يانچۇقۇمدا ئالا تاش، قاراپ باقسام قارا تاش. سۆيەي دېسەم بويۇم پەس، ئېگىلەملا قارا قاش . باغدا ئۆسكەن لەيلى بىز، تاغدا ئۆسكەن لەيلى بىز. غېرىپ بىلەن سەنەمدەك، ئۆلۈپ كەتسەك مەيلى بىز. ئەجەپمۇ يارىشىپتۇ، پېشايۋاننىڭ تېرەكى. قىيامەتتە ئۆچەرمۇ؟ ئىككىمىزنىڭ كۆيەكى. ئىشىك ئالدى شاپتۇلا، سىزگە قىلسام گەپ تولا. گەپ قىلماي يۈرگەن بىلەن، ئىچىمدە زەپ دەرد تولا. مەن غۇلجىغا بارغاندا، ئۆتەلمىگەن تېغىم بار. يۈرىكىمنى يېرىپ باق، يارغا كۆيگەن دېغىم بار. ئىشىكىڭدىن مەن ئۆتتۈم، ئېرىقىڭدىن تاقلىماي. سەن يار ئۈچۈن دەرد تارتتىم، ھېچ كىشىگە دادلىماي.

قۇملۇق

	قوشاقنى قوشاق بولغانغا مانداق تويغۇزىمىز ھە ... [s:181]  [s:181]  [s:181] قايەردىن كەلگەن ئىلھام بۇ `~~  [s:151]  [s:151] قوشاقنى قوشاق بۇلۇپ قالغىنىغا تويغۇزىۋېتىپسىز مانا ..... ۋۇج______________ۇن [s:137]  [s:137]  [s:127]  [s:127]

ubul0998

	ئايۋان سالدۇرۇپ قويدۇم، بېدە باستۇرۇپ قويدۇم. يوغان سۆزلىمەڭ يارىم، سىزنىمۇ كۆرۈپ قويدۇم. كەپتەر باقساڭ دەمدەر باق، ئۈنلەپ بېرىدۇ كۈۋۇكتا. كونا يارنى تاشلىما، تۇخۇم ساقلايدۇ ئۇيۇقتا. مەنمۇ ئادەم، سەنمۇ ئادەم، بىلسەڭ بولمامدۇ. شېرىن جاننى قىينىغۇچە، ئۆلسەڭ بولمامدۇ؟ ئاپاق غۇجام سەيلىسىدە، قىلىسەن تاۋاپ. مۇساپىرغا كۆڭۈل بەرسەم، بولمامدۇ ساۋاپ. ئاۋاتنىڭ بازارىدا، ئۇن تاسقايدۇ لەڭزىدە. ئاق جۇۋاننى بىر سۆيسەم، قان توختايدۇ مەڭزىدە.    راۋابىمنىڭ تارىسى، يىلان بېشى، كەكلىك قېشى. بىزنىڭ يارنىڭ ئوينىشى، غورۇچۆل تۈگمەن بېشى. باغقا بۇغداي تېرىسام، بۇغداي بۇدۇشقاق بولغۇدەك. ئۆيدە بەش پۇل بولمىسا، خۇتۇن ئۇرۇشقاق بولغۇدەك. قۇناقلىقتىن ئوت ئالدىم، بېشى قارا ئۆچكىگە. شۇنداقمۇ كۆيەرمەنمۇ، كۆڭلى قارا ئەسكىگە. ئېرىقىڭدا سۇ يوقمۇ، ئۇسسۇزلۇققا مەن تەشنا. ئۇسسۇزلۇققا سۇ بەرگەن، قارا قاشقا مەن ئاشنا. سىرلىق ساندۇق سىرىسىز، پەرىلەرنىڭ بىرىسىز. ئويناي دەيدۇ كۆڭلىڭىز، ئەمما قورقۇپ تۇرىسىز. ئىشىك ئالدىدا ئېرىق، سۇ باشلاپ كېلەي دەيمەن. رەنجىمىگىن سۆيگەنگە، كۆڭلۈڭنى بىلەي دەيمەن. قارا قاشنى قاش دېمەڭ، قارا قاش قەلەمچىدۇر. كونا يارنى تاشلىماڭ، يېڭى يار ئالدامچىدۇر. ھاۋادا پارچە بۇلۇت، يامغۇر يېغىپ ئۆتكىنى يوق. ئىككى مەشۇق بىر بۇلۇپ، مۇرادىغا يەتكىنى يوق. ئېگىز تاغقا چىقتىم مەن، تاپىنىمغا تاش قۇيۇپ. يارىم بولسا ياتاتتىم، مەيدىسىگە باش قۇيۇپ. سايراپ كەلگەن كاككۇكنى، ئوڭ قولۇمغا ئۆگىتەي. كۆيۈك ئوتى يامان ئىكەن، ناخشام بىلەن تۈگىتەي. چاي دەملىسەم يارىمغا، ئوتتا قۇيۇپ چەينەكنى. قارا كۆزۈڭ ئوينايدۇ، دەردتە قۇيۇپ يۈرەكنى. يارىمغا ئېيتىپ قۇيۇڭ، مېنى ئوبدان ئويناتسۇن. ئويناتمىسا ئەگەردە، چايغا سېلىپ قايناتسۇن. يېڭى ئۆي سېلىۋاپسىز، ئۆيىڭىز ساراي ئىكەن. ئاخشىمى باراي دېسەم، ئېرىڭىز مارايدىكەن. قارا قاشىم بار ئىدى، قوشۇما قاش لازىم ئەمەس. بىر ئاداشىم بار ئىدى، ئىككى ئاداش لازىم ئەمەس. قېشىڭنى قارا قىلغان، قېشىڭدىكى كۆك ئوسما. چىرايىڭنى سارغايتقان، يېنىڭدىكى لىڭتاسما. كۆككىنە كەپتەر بۇلۇپ، قونسام مۆرەڭنىڭ بېشىغا. بىرنىلا سۆيۈپ ئالاي، سەن خېنىمنىڭ قېشىغا. چاپىنىمنىڭ يېڭى تار، كىيەي دېسەم پاتمىدى. باغرى قاتتىق تاش يۈرەك، بىردەم قۇچاقلاپ ياتمىدى.