قوشاق يىغىمەن.

ubul0998

	ئاق قۇشقاچقا ناۋات بەرسە، تەمىنى بىلمەس. نادان يارغا كۆڭۈل بەرسە، قەدرىنى بىلمەس. ئۆستەڭ ياقىلاپ يۈرسەم، ئېرىققا سۇ كېلىپ قاپتۇ. باغ ئارىلاپ يۈرگەندە، يار مېنى كۆرۈپ قاپتۇ. گۈلنى گۈلگە بەرمىدىلە، گۈلنى تىكەنگە بەردىلە. گۈل خىلىنى تاپقۇچە، قېرى بىگىمگە بەردىلە. كېچە-كۈندۈز تىنماي يىغلاپ قوينۇم تولدى كۆز ياشقا. يەنە يىغلاپ نە قىلاي، يارىمنىڭ كۆڭلى باشقا. قارىغاينى ئەگكىچە، مەيلى يوققا تەگكىچە. ئۆلۈپ كەتسەڭ بولمامدۇ ، سەن دەرد ئەلەم چەككىچە. ئۆستەڭ چاپساڭ چوڭقۇر چاپ، سۇ كەلگەندە بويلايمىز. بىز ئىككىمىز بىر بولساق، كۈندە خوشال ئوينايمىز. ئۈرۈمچىدىن كەلگۈچە، ساناپ ئۆتتۈم خۇمداننى. بىزنى يامان دېگەنلەر، تاللىۋالسۇن ئوبداننى. گۈلزارلار گۈلى بىلەن، گۈل ئۆسەر غۇلى بىلەن. ئوينىساڭ تۈزۈك ئوينا، ھەر ئىشنىڭ يولى بىلەن. ئايباغدىن بىر قىز ئالدىم، گۈلدىن گۈل خىللاپ. دۈشمەنلىرىم قاراپ قالدى، سالمىدەك ماراپ. تام تۆپىسىگە تام سالدىم، شامالغا دالدا سالسۇن دەپ. يار ئۈستىگە يار تۇتتۇم، يۈرەككە پايدا بولسۇن دەپ. قىبلىدىن كەلگەن شامال، ئۆرىۋەتتى باراڭنى. باغلاپ قويسا تۇرمايدۇ، كۆڭۈل دېگەن ساراڭنى. كېتىپ بارغان خېنىمنىڭ، تۈگمىسى قاتار-قاتار. تۈگمىسىنى يەشكۈچە، تۇخۇ چىللاپ تاڭ ئاتار. باغقا كىرمەك ئاساندۇر، شورا بولغاندىكىن. يارنى سۆيمەك ئاساندۇر، مەيلى بولغاندىكىن. بۇ كوچا ئۇزۇن كوچا، چالما ئاتسام يەتمەيدۇ. بۇ كوچىنىڭ قىزلىرى، مېنىڭ يارىمغا يەتمەيدۇ. دورا دەيدۇ، دورا دەيدۇ، قىچا يىغىنى. ئەقلى بولسا سۆيەرمىدى، كىشىنىڭ يارىنى. ئورمىنى تولا ئۇرۇپ، بارالمىدىم سەيلىگە. بىر بەلگە قىلىپ قۇيۇڭ، ئۆيىڭىزنىڭ كەينىگە. ھاۋادىكى ئاق قۇشقاچ، ۋىچىرلايدۇ، سايرايدۇ. بويى زىلۋا جۇۋانلار، بىزدىن ئەھۋال سورايدۇ. ئېگىز ئاسماندا ئاي ئىدۇق، يەرگە چۈشۈپ لاي بولدۇق. جاندىن ئەزىز دوستلىرىم، يار ئالدىدا خار بولدۇق. باغلىرىغا كۆپ كېلىپ، شىلدىرلاتتىڭ غازاڭنى. مەندىن باشقا يار تۇتساڭ، خۇدا بەرسۇن جاجاڭنى. مەن باراي تۇزغا، مەيدەمنى ياقاي مۇزغا. بىر موچەننىڭ تاينى يوق، ئىچىم كۆيىدۇ ئۇزغا. يار مېنى يامان دەيدۇ، يار ئۆزىنى بىلمەيدۇ. ناخشا ئېيتىپ، قاشنى ئاتسام، بىر قېتىممۇ كۈلمەيدۇ. ئالمىنىڭ شېخى تولا، ئىگىلىپ سۇنمايدىكەن. يارىمنىڭ ۋەدىسى تولا، گېپىدە تۇرمايدىكەن.

ubul0998

	ساي بىلەن يۈگرەپتىمەن، كىردى ئاياغىمغا تىكەن. نېمە دەپ يۈگۈرەر ئىدىم، يار ماڭا باقماس ئىكەن. ئۆگزىگە چىقىپ تۇرسام، چا تۇخۇ پاقاقلايدۇ. قىزىنى سۆيۈپ قويسام، ئانىسى ۋالاقلايدۇ. يار بولسا سۈزۈك بولسا، بەش قولىدا ئزۈك بولسا. ھەم مەڭزى قىزىل بولسا، ھەم بەختى تۈزۈك بولسا. يارىم بەرگەن ئۈچ ئالما، ئۈچىلىسى بۆلەك ئىكەن. مەقسەتكە يەتكۈزمىگەن، ئەجەپ كاج پەلەك ئىكەن. بېغىڭغا كېرىۋىلىپ، ئۈرۈكۈڭنى ئىرغىتاي. ناخشامغا قۇشۇۋېلىپ، سېنى راسا يىغلىتاي. تاماكا تارتقۇم كەلسە، سىلاپ قۇيىمەن ياننى. سەن يارىم مېنى دېسەڭ، تەسەدۇق قىلاي جاننى. قارا قۇش ئېغىر كەلسە، كۆتۈرگىكى بىلەك كېرەك. ئوسمىسى دەمدەك خېنىمنى، سۆيگىلى يۈرەك كېرەك. تۈڭلۈكتىن قاراپ باقسام، يار تولغىنىپ ياتىدۇ. ئايرىلىپ كېتەي دېسەم، دەردنى تولا تارتىدۇ. يارنىڭ ئۆيىدە قۇنۇپ، باغدا مەشرەپ ئوينايلى. قاشنى تەۋرىتىپ قۇيۇپ، يارنى قىيناپ ئوينايلى. كۆچەت تىكسەم ھويلامغا، بىر چىرايلىق باغ بولدى. يارىم قىلغان ئاھانەت، يۈرىكىمگە داغ بولدى. دەرۋازاڭ ئەجەپ يوغان، ئىلىپ قويغىلى بولماس. كىشىنىڭ يارىنى دائىم، سۆيۈپ قويغىلى بولماس. ئۆزى ئاق، كۆڭلى قارا، ئەجەپ ئەلەم قىلدىڭ ماڭا. قىلغىنىڭ كۆڭلۈمدە تۇرسۇن، مەنمۇ قىلغايمەن ساڭا. ئەلەم كەلسە بېشىمغا، يارىم كېلەر قېشىمغا. تاياق يەيدۇ ئالدامچى، تۇپا سالسا ئېشىمغا. مەن تاماكا تارتىمەن، دەردۇ-بالانى تارتىمەن. بىر سېلىم تاماكىنى، يار بىلەن تەڭ تارتىمەن. ـ نەگە بارىسەن خانىم، -ئىشقا بارىمەن يارىم. قاش-كۆزۈڭنى ئوينىتىپ، كۆيدۈرەمسەن نىگارىم. ئاتا مەندە بولمىسا، ئانا مەندە بولمىسا. بۇ يۇرتتا نېمە قىلاي، كۆڭلۈمدىكى يار بولمىسا. غورىلاريۇ، غورىلار، غورىڭىزنى ئوغرىلاي. ۋەدىڭىزدە چىڭ تۇرۇپ، ئىشنى ئۆزۈم توغرىلاي. كۆڭلەك كىيسەڭ ئۇچاڭغا، بىر ئوبدان يارىشىدۇ. كوچىدا كېتىپ بارساڭ، يىگىتلەر قارىشىدۇ. چىرايىم زەپىران بولدى، ساماندىن ئايرىيالمايمەن. ئەقەپ مىسكىن غېرىپ كۆڭلۈم، دەردكە پايلىيالمايمەن. قېشىڭىز قارا ئىكەن، كۆزىڭىزگە كۆيدۈممەن. تىلىڭىز تاتلىق ئىكەن، لېۋىڭىزگە سۆيدۈممەن. چىرايىم زەپىران بولدى، سارغايغىنىمنى كىم بىلۇر. سارغايغان چىرايىمنى، مېھىربان يارىم بىلۇر.

ubul0998

	ھارىقىڭنى ئىچمەيمەن، بېشىم ئاغرىيدۇ مېنىڭ. ياخشىنى يامان سۆيسە، ئىچىم ئاغرىيدۇ مېنىڭ. ئالمىنىڭ رەڭگى تولا، جىنەستىنىڭ بەرگى تولا. ناداننى سۆيگەن يىگىتنىڭ، ئىچىدە دەردى تولا. ئېتىمنى قۇيۇپ بەردىم، يېڭى چىققان قىياققا. يار دەردى شۇنداق بولسا، كېتەي دەيمەن يىراققا. باغ ئىچىدە بوستانلار، بۇلبۇل كۈيلەر داستانلار. يار دەردىدە كۆپ يىغلاپ، قاقشاپ كەتتى بۇ جانلار. مەن قازانغا چاينى قۇيدۇم، بىر چىنە قايماق بىلەن. ئۆتۈپ كەتتى بۇ ئۆمرۈم، خۇيى سەت مايماق بىلەن. چىلگە قۇغۇن پىشىپتۇ، كېۋەزلىكتە، چۆنەكتە. يارغا ئىچىم كۆيىدۇ، دەردىم تولا يۈرەكتە. بىر ئادەمنى ئەۋەتتىم، قەغەز بىلەن قەلەمگە. يارىم ئىچىم ئاغرىمدۇ؟ ماڭا كەلگەن ئەلەمگە. ئۆردەك سۇغا چۆمۈلسە، قاناتلىرى ھۆل بولماس. ئايرىلماسققا ۋەدە بەرگەن، ياردىن كەچكىلى بولماس. نەگە ماڭدىڭ ئالدىراپ، قارا كۆزلۈكۈم يارىم. ۋەدىسىدە تۇرالمىغان، شېرىن سۆزلۈكۈم يارىم. سەن قاياقتىن كېلىسەن، چىرايلىقىم كۆزى خۇمار. ياتنىڭ تىلى تەگمىسۇن، ئېسىۋالغىن تىلتۇمار. ئالمىڭىزنى يېمەيمەن، يېسەم مەيدەم ئاغرىيدۇ. يار ئۈستىگە يار تۇتسام، يارنىڭ كۆڭلى ئاغرىيدۇ. باغلاردا تولا ئەمەن، تاغلاردا تولا كەكلىك. مەن يارنى سېغىنغاندا، قايرىپ سۆيگىلى ئەپلىك. قۇرغۇي بۇلۇپ ئۇچتۇممەن، شال بويىغا چۈشتۇممەن. تەلىيىمنىڭ يوقىدىن، بىر نادانغا چشتۇممەن. چەكمەيمەن تاماكاڭنى، بارمىدۇ غاڭزاڭ. ئولتۇرۇشۇڭ بىر ئەپلىك، ياقىدۇ ماڭا ياڭزاڭ. ئاخىر بىر كۆيەرسەن، كۆيگىنىمنى بىلەرسەن. كۆيگىنىمنى بىلمىسەڭ، دۇزاق ئوتىدا ئۆلەرسەن. ئاق كۆرپە، قارا كۆرپە، زەر-زەۋەر تاشلىق. مېنىڭ سۆيگەن شۇ يارىم، ئون سەككىز ياشلىق. دۇتار چالغان قولۇڭغا، ئالتۇن ئۈزۈك سېپ قويدۇم. ئۇخلاپ قالغان ۋاقتىڭدا، ئويغاتماي سكيۈپ قويدۇم. باغقا كىرگۈن كېلىدۇ، گۈلنى ئۈزگۈم كېلىدۇ. گۈل تۈۋىدە ئولتۇرۇپ، سېنى سۆيگۈم كېلىدۇ. ئەجەپ ئوخشاپتۇ بۇ توغاچ، ئۆستەڭ بويىدا بولغاچ. مۇرادىمىزغا يەتتۇق بىز، تام قوشنا يېقىن بولغاچ. ئېگىز تاغدىن چۈشكەن سۇ، توختاپ قالدى ئېقىندا. سەھەر تۇرۇپ تىڭشىسام، ئۈنۈڭ چىقتى يېقىندا. كۆزلىرىمدىن ئاققان ياش، قۇشۇلۇپتۇ تارىمغا. كۆكتە پەرۋاز قىلاتتىم، ئېرىشەلىسەم يارىمغا. قولۇڭدىكى كەپتەرنى، مەن ئۆگزەمگە ئۆگىتەي. ئىچىمدىكى دەردىمنى، غەزەل بىلەن تۈگىتەي. ئاسماننى تۇمان باستى، كۆرۈنمەيدۇ يۇلتۇز، ئاي. مېنىڭ يارىم ئوبداندىن، ئايرىۋەتتى قايسى باي. سۇ كېلىدۇ تاش ئۈستىدە، ئۆركەشلەيدۇ قاش ئۈستىدە. مەن يارىمنى ئويلاپ-ئويلاپ، يىغلىۋەتتىم ئاش ئۈستىدە. كۆۋرىكىڭنىڭ تېگى تاختا، سۇلار ئاقىدۇ لاتقا. سەندىن باشقا يار تۇتسام، قان قۇساي ئۆلەر ۋاقتا. قارىياغاچ قاشتا بۇلار، چاچ-كۆيەك باشتا بۇلار. يارنىڭ دەردى ھەرقاچان، بۇ غېرىپ باشتا بۇلار. قارلىق تاغقا قار يىغىپتۇ، بوستانغا تۇمان. يارغا باشقىنى سايە قىپتۇ، كۆڭلۈمدە گۇمان. يارىم ئاشۇ ئەمەسمۇ، شىپاڭدا ياتقان. قاش ئېتىپ، كۆز ئوينىتىپ، جاننى قاخشاتقان. قانداق كىشى كېتىدىكەن، يارىنى تاشلاپ. مەيلى بولسا ئېلىپ كەتسۇن، بىللىلا باشلاپ. ئىشىك ئالدى بىر توپ سۆگەت، قۇرغۇي قونالماس. مېنىڭ يارىم تىكەنلىك گۈل، بۇلبۇل قونالماس. قونغان بىلەن سايىيالماس، ئۇنىڭ شېخىدا. ئالغان ئىدىم يار كۆڭلىنى، كىچىك چېغىمدا. تېۋىپ بولسا، تېۋىپ بولسا، تۇمۇرنى تۇتار. يار كېسىلى يۈرەكتىىدۇر، ئۇنى كىم ئۇقار؟ ئەجەپ يۇمشاق يار ئىكەن، قۇغۇن-تاۋۇز تېرىغۇدەك. بىزنىڭ يارنىڭ ئانىسى، باشقا ئەرگە بەرگۈدەك.

ubul0998

	دەرەزەڭدە  تەشتەكتە.. ئىچىلدۇرغان گۈل بۇلاي.. سەن خالىساڭ مەن ساڭا.. ئۆمۈربۇيى قۇل بۇلاي.. مەن خۇتەنگە ماڭغاندا.. ئۈرۈمچىدە قار ياققان.. يار بىلەن كۈرۈشكەندە.. لەۋلىرىگە لەۋ ياققان.. قازاندىكى يىغىمنى.. تۇز تىمىتىپ داغلىدىم.. ماڭا كۆيگەن جانانغا.. چىن ئەقىدە باغلىدىم.. ئۇزۇن بۇلدى كۆيگىلى.. يابۇلمىدى ئۆلگىلى... چىدىمايدۇ بۇيۈرەك.. باشقىسىنى سۆيگىلى.. ئۇن بەش پۇڭلۇق سىم ئالدىم. سائەت  بىغى  تۇ قۇ شقا... يىغلاپ تۇرۇپ خەت يازدىم.. كۈلۈپ تۇرۇپ ئۇقۇشقا... باغدا پىشتى جانانە.. يەپ باقامسىزبىردانە.. سەن ئۇماقنىڭ دەردىدە.. بۇلدۇم ساراڭ-دىۋانە.. كۆل تەرەپكە مىڭىپسەن.. كۈتۈرۈپ چىلەكىڭنى.. ئىرىتكىلى بۇلماسمۇ.. سىنىڭ تاش يۈرەكىڭنى.. قىش پەسلىدە تەشتەكتە.. خۇش پۇراق گۈلۈم بۇلسا.. يار بىلەن مۇڭداشقىلى.. مەخپى تۇر يۇلۇم بۇلسا... باغقا قۇغۇم تېرىسام، چۈشكەن سويمىسى ئوڭدا. ئۇيۇننى تولا ئويناپ، ئىشتان قالمىدى قوڭدا. كالا كەلسە ئوش دەيمىز، مۈشۈك كەلسە پۇش دەيمىز. سىلى كادىر، بىز ئەزا، نېمە دېسىلە خۇش دەيمىز. ئاق سارىيىڭ بار ئىكەن، زەدىۋالىڭ يوق ئىكەن. ئاتا-ئاناڭ بولمىسا، ئەتىۋارىڭ يوق ئىكەن. ئاتا ھېسەم قايىدۇ بېشىم، ئانا دېسەم تۆكۈلەر يېشىم. مېنىڭ بېشىمنى ئوڭلايدۇ، ئۇرۇق-تۇغقان، قېرىندىشىم. مەن قۇشۇمنى غازغا سالدىم، كىملەر سېلىپتۇ قاغىغا. ئالتە قاغا بىر بۇلۇپ، ئالدى قۇشۇمنى قارىغا. موللا قىلساڭ چوڭ قىلغىن، قۇۋۋەت تاپسۇن ئىمانى. چالا موللام تەمەخور، بۇلۇپ قالىدۇ دىۋانە. سۇ بىلەن تاھارەت قىل، لاي بىلەن ئىمارەت قىل. ئاتاڭ بىلەن ئاناڭنى، «مەككە» دەپ زىيارەت قىل. ئوقەتنىڭ چېغى چاغلىق، جان كۈندە چېچەكلەمدۇ؟ كۈندۈزى پىلەك تاشلاپ، كېچىسى خەمەكلەمدۇ. ئاتام بولسا، ئانام بولسا، كېلىڭ بالام دېمەسمىدى. چىنىدە ئاش يېپىپ قۇيۇپ، ئىچىڭ بالام دېمەسمىدى.

ubul0998

	باغقا كىرسەم باقىدۇ، بۇلبۇل قاناتنى قاقىدۇ. يىغلىماڭ جېنىم ئانا، بىزنى خۇدايىم باقىدۇ. ئەجەپمۇ يارىشىپتۇ، سېپىل تۈۋىگە خەندەك. كىشىنىڭ يۇرتىغا بېرىپ، ھېچكىم بولمىسۇن مەندەك. ئېتىم جەدە، ئېتىم جەدە، مىنسەم قۇيرۇقى يەردە. غېرىبلىق ماڭا يەتتى، غەمگۈزار ئانام نەدە؟ راۋابىڭنى ئالساڭچۇ، بېرىپ چۆللەردە چالساڭچۇ. مەن مۇساپىر، سەن غېرىپ، مېنى ئارقاڭغا سالساڭچۇ. ئاتاسى ئۆلمىگەن كىم بار، ئاناسى ئۆلمىگەن كىم بار. ئاتاسى يوق، ئاناسى يوق، غېرىپ بولمىغان كىم بار. ئاش بەرسە سۇيۇق بەردى، نان بەرسە كۈيۈك بەردى. ئەجەپمۇ يامان ئىكەن، ئۆگەي ئانىنىڭ دەردى. ئۆلۈمنىڭ نۆۋىتى كەلدى، قېچىڭلار باغۇ-بوستانغا. قېچىپ ھەرگىز قۇتۇلالمايسەن، تاماشا قىل گۈلىستاندا. مەن ئېتىمنى سالمايمەن، دەريادىكى لۆم-لۆمگە. كۈندە نەچچە يىغلايمەن، ئۆتۈپ كەتكەن ئۆمرۈمگە. >بۇرادەرلەر خوش ئەمدى، خۇدايىمغا ئامانەت. ئامان بولسام بىر كۈنى، كۆرۈشەرمىش سالامەت. ئاتام بولسا كۆرسەم مەن، ئانام بولسا كۆرسەم مەن. ئاتام بىلەن ئانامنىڭ، ئايىغىدا ئۆلسەم مەن. نى بالالەر كېلىدۇ، ئوغۇل بالىنىڭ بېشىغا. سايدا تۈگمەن چۆرگىلەيدۇ، كۆزدىن ئاققان يېشىغا. بۇ بېشىمدا دەرد تولا، دەردنى يا ئېيتتالمىدىم. كۆڭلۈمنىڭ ئارامى يوق، ئارامخۇدا ياتالمىدىم. قارىلىغاچ قارا نېمە، قانىتىدىن ئايرىلمىسۇن. قىز بالا ئاجىز نېمە، ئانىسىدىن ئايرىلمىسۇن. ئەجەپمۇ تولا ئىكەن، ياخشىلارنىڭ پېرىسى. پېرە قىلدۇرغان خېنىمنىڭ، كېچىدە  بار ھىيلىسى. ئاتالىقلار- ئانالقلار، دەستە- دەستە گۈل ئىكەن. ئاتاسىزلار- ئاناسىزلار، كۆيۈپ ئۆچكەن كۈل ئىكەن. سەھەردە سايرىغان بۇلبۇل، خۇداغا نالى قىلمامدۇ؟ ئاتىمىز يوق، ئانىمىز يوق، خۇدايىم رەھمى قىلمامدۇ؟ ئاتاممۇ ئۆلۈپ كەتكەن، ئاناممۇ ئۆلۈپ كەتكەن. ۋاپاسى قېرىنداشتىن، كۆڭلۈم بۆلۈنۈپ كەتكەن. ئۇ يېنىمدىن ئۆتسەڭچۇ، بۇ يېنىمدىن ئۆتسەڭچۇ. ئۇلۇغقىنا خۇدايىم، گۇناھىمدىن ئۆتسەڭچۇ. ئاتا دېگەن تاغ ئىكەن، ئانا دېگەن باغ ئىكەن. ئاتاسى يوق، ئاناسى يوق، بۇ دۇنيادا خار ئىكەن. ئاسماندىكى لاچىننى، پېشايۋانغا ئۆگەتتىم. ئىچىمدىكى دەردىمنى، غەزەل بىلەن تۈگەتتىم. يات كىشىنىڭ يۇرتىدا، بولدۇم ئەجەپ مەن غېرىپ. يېشىم بارماي ئەللىككە، كەتتى بېشىم ئاقىرىپ.

ubul0998

	مەشرىقتىن شامال كەلسە، گۈل شېخىنى قايرىيدۇ. يارىم بىلەن ئامراقتۇق، قانداق دۈشمەن ئايرىيدۇ. بازاردىن چىنە ئالدىم، دەستە-دەستە گۈل بىلەن. ئەسۇ-يادىم سىز بىلەن، سىز يۈرىسىز كىم بىلەن. يارىم تۇماق كېيىپتۇ، پېشانىسىگە چۆكتۈرمەي. قاچانغىچە يۈرۇيمىز، كۆيگەن ئوتنى ئۆچۈرمەي. يارىم كەپتۇ بەلباغسىز، بەلباغ بەرسەم باغلامسىز. ئالدىڭىزدا مەن تۇرسام، ھەر تەرەپكە قارامسىز. تاۋار ئىشتان، تاۋار ئىشتان، كىيگىلىرى كېلەمدۇ؟ سىلى كادىر، بىز دېھقان، سۆيگۈلىرى كېلەمدۇ؟ تېمىڭنىڭ ئارقىسى شورلۇق، پۇتۇڭ ئاغرىمدىكى يارىم. ئۆتۇڭدا ئۆلۈپ كەتسەم، ئىچىڭ ئاغرىمدىكى يارىم. ئۆيۈمگە كىرىڭ دەيسىز، چېيىڭىز بارمۇ خېنىم؟ ئاخشاملىققا كەل دەيسىز، مەيلىڭىز بارمۇ خېنىم. سۆگەت شېخى ئىگىزكەن، تارتىپ سۇندۇرالامسىز؟ ئاخشاملىققا كەل دەيسىز، قورقماي قوندۇرالامسىز؟ ساندۇقىڭنىڭ ھالقىسىنى، ئالتۇن بىلەن ئەتتىڭمۇ؟ مەندىن باشقا يار تۇتۇپ، مۇرادىڭغا يەتتىڭمۇ؟ دەريانىۇ ئۇ قېتىدا، كۆرۈنگەن تېرەك بىزنىڭ. شۇنچە خەق ئارىسىدا، كۆيىدۇ يۈرەك بىزنىڭ. سۇ كېلىدۇ تاش ئۈستىدە، ئاقىدۇ توققۇز تارام. سىزگە ئوخشاش يار تۇتۇپ، باشقىنى سۆيسەم ھارام. ماڭا بىر قاراپ قويساڭ، كۆزلىرىڭ قۇرۇپ قالماس. مېنى بىر سۆيۈپ قويساڭ، لەۋلىرىڭ سۇلۇپ قالماس. ئورمىنى تولا ئۇرۇپ، بىلىكىڭ قالدىمۇ يارىم؟ ئاش كۈن ئۆتمەي ئايرىلدۇق، يۈرىكىڭ قاندىمۇ يارىم. ئىشىك ئالدى لايلاتما، لايلاتمىغا چالما ئاتما. ئاكام سېنى ئالمايدۇ، قاش-كۆزۈڭنى ئويناتما. بىزنىڭ ھويلا كەڭ ھويلا، ئەتراپىدا ئەينولا. مەن ساڭا نېمە قىلدىم، ئولتۇرۇپ راسا ئويلا. ئۇچاڭدىكى چەكمەنمۇ، ئۆشنەڭدىكى كەتمەنمۇ؟ ناخشا ئېيتسام تىڭشايسەن، سەنمۇ مەندەك دەرتمەنمۇ؟

ubul0998

	ئۆگزىگە قوناق يايدىم، ئوينىشىپ ئۇنى چاچماڭ. قىلغان ۋەدىمىز ۋەدە، سىز مەندىن يىراق قاچماڭ. ھۆل ئۇتۇنغا ئوت ياقسام، ئوتۇڭ يانمىدى دەيسەن. ئون بەش كۈندە بىر كۆرۈپ، كۆڭلۈم قانمىدى دەيسەن. يامغۇرلار تولا ياغسا، مۇز داۋانلار پەسلەيدۇ. يار ئۆزۈڭگە ھۇشيار بول، دۈشمەن بىزنى قەستلەيدۇ. يارىشىپتۇ ئەجەپمۇ، ئەتلەس كۆڭلەك ئۇچاڭغا. قاچانغىچە كېلىمەن، دىۋانىدەك كوچاڭغا. بېغىڭدىكى چۆنەكنى، ئۆزۈڭ يالغۇز ئۇيغانمۇ. بۇ دۇنيادا ياش دىلىم، سەن يارىمغا تويغانمۇ؟ تالاغا چىقىپ باققىن، سالقىنراق شامال بارمۇ؟ دەردىڭگە يۈرەك كۆيدى، بۇنىڭغا ئامال بارمۇ؟ ئۇزۇن بولدى قارايمەن، ئاشۇ قارا كۆزۈڭگە. ماقۇل دېگىن چىرايلىق، ئۇنداق قىلماي سۆزۈمگە. كىشى قويسام ئاناڭغا، كىچىك دەپتۇ يېشىڭنى. كىچىك بولساڭ نېمىشقا، قارا قىلدىڭ قېشىڭنى؟ چاپىنىمنىڭ ئەستىرى، ئاق ئەستەر، قىزىل ئەستەر. مېنى ئوتقا سېلىپ قۇيۇپ، سەن يۈرەمسەن بىخەۋەر؟ كۆل بۇيىدا قوش سۆگەت، يول بۇيىدا ئاق سۆگەت. ئانچە-مۇنچە كەل يارىم، چىدىمايدىكەن يۈرەك. قۇرۇق قاقشال بۇلۇپ قالدۇق، ئوتۇنچى ئاپىرىپ ساتسۇن. يارىم مېنى ئويلىسا، ھالىمدىن خەۋەر تاپسۇن. قاپاق تېرەك ئالدىدا، ئۆيۈڭ بارمىدى يارىم؟ سۇغا چىققاچ قارايسەن، كۆڭلۈڭ بارمىدى يارىم. بادامدوپپىلىق يارىم، قۇناققا سۇ ئاچاي دەملا؟ بىزنى ئوتقا سېلىپ قۇيۇپ، چوڭ يولغا قاچاي دەملا؟ چوڭ يولغا چىقىپ تۇرۇپ، كۈنچىقىشقا قارايمەن. بۇ يولچە كىشى كەلسە، سەن يارىمنى سورايمەن. يارىم كەتتى يىراققا، كەينىگە يانارمىكىن. بىر قېتىم سۆيۈۋالسام، يۈرىكىم قانارمىكىن. ئېرىقلارغا سۇ كەلدى، بېلىقلارغا نېمە بولدى؟ بارۋە كىشى ئوينايدۇ، مېنىڭ يارىمغا نېمە بولدى؟ يارىم كەلدى يىراقتىن، ئارقىدىكى يول بىلەن. كۆڭلۈڭنى ئالاي يارىم، قولۇمدىكى گۈل بىلەن. باغدا بۇلبۇل بار ئىكەن، باغقا قارىسۇن يارىم. زادى گۈناھ كىمدىكىن، ئوبدان ئويلىسۇن يارىم. يارىم بەرگەن بەش ئالما، بەشلىسى قىزىل ئالما. يار ئۈزۈڭنى چوڭ چاغلاپ، مەندىن ئايرىلىپ قالما. تاغاردا تېرىقمىدى، دەريادا بېلىقمىدى. مەن سىزگە كۆيمەس چاغدا، چىرايىم سېرىقمىدى.

ubul0998

	پاڭچۇ كۆڭلىكىم پاكىز، تۇپا قونمىسۇن ھەرگىز. مەندىن باشقا يار تۇتساڭ، ۋاپا قىلمىسۇن ھەرگىز. يارىمنىڭ ئۆيى باشتا، بەلگىسى قارا قاشتا. كىچىككەن دېمەڭ بىزنى، نېمىشقا ئوينىغان باشتا. ئالمىنىڭ تاياقىمۇ، بېھىنىڭ تاياقىمۇ. قولۇم ئىشقا بارمايدۇ، يارنىڭ ئىشتىياقىمۇ؟ تاققا چىقىمەن ئەمدى، ياغاچ كېسىمەن ئەمدى. سەن ماڭا قارىمىساڭ، ئاشنا تۇتىمەن ئەمدى. كېپىنەك بۇلۇپ ئۇچىسىز، قىزىلگۈلگە قۇنىسىز. كۆرگىلىمۇ كەلمەيسىز، زادى كىمگە كۆيىسىز؟ ئالما بەرمىگەن يارنى، ئالما بەردى دەيمەنمۇ؟ كۆڭۈل بەرمىگەن يارنىڭ، ئوتىدا ئۆلەرمەنمۇ؟ سۇنى ئالدىم چېلەككە، ئىلىپ قويدۇم تېرەككە. ۋەدىمىز شۇنداقمىدى، قارىمايسىز بىزدەككە. شاپتۇل شېخى لىڭشىيدۇ، شاپتۇل شېخىدا كىم بار. ئاغزىڭىزدا مېنى دەيسىز، كۆڭلىڭىزدە تاڭ، كىم بار؟ ئېگىز تاغقا چىقماڭ يارىم، چىقىپ بىلەرسىز. چىرايلىقىنى سۆيمەڭ يارىم، كۆيۈپ ئۆلەرسىز. سۇنىڭ سۈزۈكى بۇلاق، چاچنىڭ ئۇزۇنى ئۇلاق. مەندىن باشقا يار تۇتساڭ، ئاڭلايدۇ بىزنىڭ قۇلاق. ئۇ يېنىمدىن ئۆتكەنلەر، بۇ يېنىمدىن ئۆتسۇنمۇ؟ بىزنى يامان دېگەنلەر، يار دەردىگە يەتسۇنمۇ؟ ئالما بەرسەڭ ئاپتىمەن، بېھى بەرسەڭ يەپتىمەن. بىرگە يۈرۈپ ئەبەدى، ئايرىلماسمىز دەپتىمەن. ئىشىك ئالدى ئېرىقلار، غىلدىرلايدۇ بېلىقلار. قايسى چۆلدە يۈرىسەن، قاشى قارا غېرىپلار. ئىشىل ئالدى ئاق بۇلۇت، بۇلۇتقا مىنەي دەيمەن. ئۆزى كەلمىگەن يارنى، چىللاپ كەلتۈرەي دەيمەن. ئوي مەھەللىدە ناخشا ئېيتسام، دۆڭ مەھەللىدە ئاڭلايسەن. شەرەت قىلسان ئۇقمايسەن، ياغاچ قۇلاق ئوخشايسەن. بېشىڭدىكى ياغلىقىڭنىڭ، گۈلى قانچە ساناپ باق. مەن ساڭا تولا كۆيدۈم، يۈرىكىمنى سىيلاپ باق. دەريا سۈيى ئاقىدۇ، يار كۆڭلىگە ياقىدۇ. غېرىپلىقتا سۆيگەن يار، ئەمدى كىمگە باقىدۇ. قېشىڭنى قارا قىلما، قارلىغاچ قانىتىدەك. كۆڭلۈمنى يېرىم قىلما، ئوينايمىز ئاۋالقىدەك. تال چىۋىقتەك بۇيۇڭغا، تال باغلىغۇم كېلىدۇ. تاتلىقىنا ئاغزىڭغا، سۆيۈۋالغۇم كېلىدۇ.

ubul0998

	غورۇچۆل دېگەن يەردە، بوستان تالنىڭ سايىسى. شۇنچە يىراق كېلەرمۇ، ئىككىمىزنىڭ ئارىسى. بېشىڭدىكى دوپپاڭنىڭ، گۈلىنى بۇزىۋەتمە. بۇ ئالەم ئۇزۇن ئالەم، ئۈمىدنى ئۈزىۋەتمە. ھاۋادىن ئۇچۇپ چۈشكەن، ئۆردەكمىكىن غازمىكىن. يارىم سېنىڭ ئىشقىڭدا، تارتقان دەردىم ئازمىكىن. نەقىش ئويدۇم يۈرەككە، ئۇماق يارىم سۆزۈڭدىن. ساڭا بولغان كۆڭلۈمنى، كۆرمىدىڭمۇ كۆزۈمدىن. يارىم نىسىپ بولارمۇ؟ قېنىپ-قېنىپ سۆيگىلى. بەختىمگە پۈتۈلگەنمۇ، پىراقىڭدا كۆيگىلى. ئەجەپمۇ تولا تارتتىم، يارنىڭ ئىشتىياقىنى. يارغا ھەرگىز كۆرسەتمە، چىشلىرىڭنىڭ ئېقىنى. مېنى يارغا قوشقانلار، ئۆلسە كېرەر بېھىشقا. ئوتتا مېنى كۆيدۈرۈپ، يار كەلمىدى نېمىشقا؟ ھەي خېنىم، رەھىم قىلىپ، ھالىمنى سورىساڭ نېمە بولار. ئىشىك ئالدى تاختا كۆۋرۈك، سۇدا پارە بولمىسا. ھەر كىشىنىڭ يارى بولسا، كۆڭلى قارا بولمىسا. يىغلىمايمەن ئاھ ئۇرۇپ، قەدرىمنى ھېچ بىلمىدىڭ. شۇنچە خالايىق ئىچىدە، مېنى كۆزگە ئىلمىدىڭ. ساڭا قىلغان ۋاپانىڭ، ماڭا بىرنى قىلمىدىڭ. ئەسلى نادان ئىكەنسەن، ئەقىدەمنى بىلمىدىڭ. ئامرىقىم ئۆتۈپ كەتتى، مەپىلەردە سەيلىگە. كۆڭۈل دېگەن بەڭۋاشنى، قۇيۇپ بەرمەڭ مەيلىگە.