بارات كېچىسى ( شەبى بارات )

boraoghli

	ئىسلام دىنىدىكى مۇھىم ھېيىت – ئايەملەر ۋەخاتىرە كۈنلەر ( ھىجىرىيە ۋاقتى تەرتىپى بويىچە تونۇشتۇرۇلدى ) بۇ مەزمۇن شەمشىدىن ھاجى نىڭ ‹‹ مىلادىيە 1950 – يىلىدىن 2050 -يىلىغىچە ئىسلامىي ھېيىت – ئايەم ۋە خاتىرە كۈنلەرنىڭ مىلادىيە ۋە ھىجىرىيە بويىچە ۋاقىت سېلىشتۇرمىسى ›› ناملىق كىتابىدىن كۆچۈرۈلدى .( ئاللاھ كىتاب ئىگىسىدن رازى بولغاي !) بارات كېچىسى ( شەبى بارات ) مەنبە : بىلدۈر تورى بارات – ئەرەبچە << بەرائەت >> دېگەن سۆزنىڭ ئۇيغۇرچە ئۆزلىشىشى بولۇپ ، << پاك بولماق ، گۇناھسىز بولماق ، كەچۈرۈم قىلماق ، ئازاد قىلماق >> دېگەن مەنىلەرنى بېرىدۇ . بارات كېچىسى ھىجىرىيە تەقۋىمىدە شەئبان ( 8 – ئاي ) نىڭ 15 – كۈنى كېچىسىنى كۆرسىتىدۇ ۋە پارىسچە << شەبى بەرات >> دەپ ئاتىلىدۇ .، ئۇيغۇرلارمۇ بۇ كېچىنى << شەبى بارات >> دەپ ئاتاپ كەلگەن . ئىسلام دىنىدا ، بۇ كېچە ، بەندىلەرنىڭ گۇناھلىرىنى ئاللاھنىڭ << كەچۈرۈم قىلىش كېچىسى >> دەپ قارىلىدۇ . شەئىبان ئېيىدا مۇشۇنداق خاسىيەتلىك بىر كېچە بولغانلىقى ئۈچۈن ، ئۇيغۇرلار بۇ ئاينى << بارات ئاي >> دەپمۇ ئاتايدۇ . رىۋايەتتە ، مۇھەممەد ئەلەيھىسسالام 60 ياشقا يېقىنلاشقان بىر يىلى ھىجىرىيە شەئىبان ( 8 – ئاي ) نىڭ 15 – كۈنى كېچىسى يالغۇز ئۆزى مەدىنە مۇنەۋۋەردىكى بەقى قەبرىستانىغا يەنى جەننەتۇل بەقىگە بېرىپ دۇئا تىلاۋەت قىلغان . ئۇ يەردىن قايتىپ كېلىپ ، ساھابىلىرىغا : << بۇ كېچىدە ئاللاھ تائالا ئالەمگە ئەڭ يېقىن جايغا چۈشىدۇ ۋە مۇشۇ كېچىسى چىن ئىخلاس بىلەن تۆۋە قىلغانلار ، كەچۈرۈم قىلىنىشىنى تىلىگەنلەر ، بەخىت – سائادەت تىلىگەنلەرنىڭ تىلەكلىرى مەقبۇل بولىدۇ >> دېگەن . يەنە بىر خىل تەبىردە شۇنداق دېيىلىدۇكى ، قۇرئان كەرىم تەلىمىگە ئاساسەن ، ھەربىر بەندىنىڭ كۈندىلىك ياخشى – يامان سۆز – ھەركەتلىرى ئىككى نەپەر پەرىشتە تەرىپىدىن ھەربىر بەندىنىڭ << كىتابى >> ( نام – ئەمەل دەپتىرى ) غا يېزىلىپ ، ئاخىرەتتە سوراق قىلىنغاندا مۇكاپاتلاش ۋە جازالاشقا ئاساس قىلىنىدۇ . شۇڭا مۇھەممەد ئەلەيھىسسالام : << ھەربىر مۇسۇلماننىڭ بۇ خىل < دەپتىرى > ھەر يىلى بىر قېتىم ئالماشتۇرىلىدۇ . يەنى كونا دەپتەر ساقلاپ قويۇلۇپ يېڭى دەپتەرگە داۋاملىق خاتىرلىنىدۇ >> دېگەن . فىقھەشۇناسلارنىڭ قارىشىچە << شەبى بارات كېچىسى >> دەپتەر ئالماشتۇرىلىدىغان ۋە ھەركىم ئۆز گۇناھىنى كەچۈرۈشنى ئاللاھ تائالادىن تىلەيدىغان كېچە ، تەۋبە قىلىدىغان كېچە ، شۇڭا ئادەتتە بۇ كېچە << تەۋبە قىلىش كېچىسى >> ، << دەپتەر ئالماشتۇرۇش كېچىسى >> دەپمۇ ئاتىلىدۇ . مۇسۇلمانلار ئۆز سەۋەنلىكلىرىنى ئاللاھنىڭ كەچۈرۈشىگە مۇيەسسەر بولۇش ئۈچۈن مۇشۇ كۈنى كەچتە ئىككى رەكەت نەفلە نامىزى ئوقۇيدۇ ، ئەتىسى بىر كۈن نەفلە روزا تۇتىدۇ . بۇ كېچىدە مۇسۇلمانلار مەسچىتلەردە قۇرئان تىلاۋەت ۋە تائەت – ئىبادەت قىلىدۇ .، تەۋبە ئىستىغپار ئوقۇيدۇ ، ياكى سەدىقە بېرىش قاتارلىق ساخاۋەتلىك ئىشلارنى قىلىدۇ . بۇ ئارقىلىق ئۆزلىرىنىڭ ئۆتكەنكى بىر يىل ئىچىدىكى ياخشىلىق – يامانلىقلىرىنى ئەسلەپ ، يېڭى دەپتەرگە تېخىمۇ كۆپىرەك ياخشىلىقلىرىنىڭ يېزىلىشىنى قولغا كەلتۈرۈش ئۈچۈن ئاللاھتىن رەھمەت ئاتا قىلىشنى ۋە كەچۈرۈم قىلىشنى تىلەيدۇ . بۇ پائالىيەتلەر بارات كېچىسى ئاخىرلاشقۇچە داۋاملىشىدۇ . ئۇيغۇر مۇسۇلمانلىرىمۇ بۇ كېچىگە ئالاھىدە ئەھمىيەت بېرىپ كەلگەن . بۇ كېچە كەلگەندە ئۇيغۇر مەھەللىلىرىدە مەھەللىدىكى ياشلار ،- بالىلار ياغلىق قاپاقنى بادىرنىڭ ئۇچىغا بېكىتىپ مەشئەل يېقىپ مەسچىتنىڭ ئۆگىزىسى ياكى مەھەللىدىكى ھەممە كىشى كۆرەلەيدىغان ئېگىزلىككە چىقىپ ۋە ياكى ئۆيمۇ – ئۆي ئايلىنىپ : << بارات كەلدى ، تۇيدۇڭلارمۇ ، قازانغا ياغنى قۇيدۇڭلارمۇ ؟ >> دەپ باشلىنىدىغان << بارات قوشىقى >> نى يۇقىرى ئاۋازدا توۋلاپ يەنى << ۋەششەمسى توۋلاپ >> ھەممە كىشىنى << بارات كېچىسى >> نىڭ كەلگەنلىكىدىن خەۋەردار قىلاتتى ، ئۇلارغا ئۆي ئىگىلىرى بارات كېچىسىگە ئاتاپ پىشۇرۇلغان پوشكال – قۇيماقلارنى ھەدىيە قىلاتتى . شۇنداقلا ئۇلار يەنە ياغلىق قاپاق ، مەشئەللىرىنى كۆتۈرۈپ قەبرىستانلارغا بېرىپ ئەرۋاھلارنىڭ روھىغا دۇئا – تىلاۋەت قىلاتتى .

شاتلان

	ھەممىمىز بۇ كىچىنىڭ قەدرىگە يىتىپ تەۋبە قىلايلى

ezdabguqi

	بىز كىچىك چاغلىرىمىزدا بارات كەلدى دەپ رىزىنكا كۈيدۈرەتتۇق.

رةيهانة

	راستنلا ئەھمىيەتلك كۇنكەن  ،رەھمەت سزگە قىرىندىشم، [s:166]  [s:166]  [s:166]

karwan786

	بۇ كۈننى مەخسۇس ئىبادەت كۈنى قىلىپ بېكىتىۋېلىش بىدئەت . يەنە پوشكال ، قۇيماق سېلىپ ياغ پۇرۇتۇش دېگەن ساپلا بىدئەت ئىشلار . بۇنىڭ دىنىمىزدا ئاساسى يوق ئىشلار ئىكەنلىكىنى ئىسلامدىن ئازغىنا بىلىمى بار كىشىلەرمۇ بىلىدۇ .

bahirah

	بۇ يىل بارات كىچىسى ئىبادەت قىلشنى نىيەت قىلغان ئىدىم، تەبلىغلەردىمۇ بارات كىچىسىنىڭ خاسىيتى توغرۇلۇق نۇرغۇن گەپلەرنى ئاڭلىغان. ئەمما مۇشۇنداق خاسىيەتلىك ئىشلار بىدئەتلەرنى ئارلاشتۇرۋالمايلى. ئاللاھ ھەممىمىزنى بىدئەتتىن يىراق قىلسۇن!

ZERO903

	شۇنداقلا ئۇلار يەنە ياغلىق قاپاق ، مەشئەللىرىنى كۆتۈرۈپ قەبرىستانلارغا بېرىپ ئەرۋاھلارنىڭ روھىغا دۇئا – تىلاۋەت قىلاتتى ۋاي تۇۋا ما گەپلەرنى...... ئەرۋاھنىڭ رۇھىغا دۇئا تىلاۋەت قىلىش..... [s:148]

sayfulla1

	ئەجداتلىرىمىزدىن قالغان ئۆرپ-ئادەتلەرگە <قارىغۇ>لارچە ئېسىلىۋالماي، <قۇرئانغا ، سۇننەتكە>ئۇيغۇن بولغانلىرىنى ئۆزلەشتۇرەيلى ،،،!!! بىز بىلىپ-بىلمەي قىلىپ كىلىۋاتقان  <بىدئەت> ئىشلار بۇنىڭسىزمۇ ئاز ئەمەس !!!

boraoghli

	ئەسسالامۇ - ئەلەيكۇم قېرىنداشلار ، ئازىراق ئوقۇشماسلىق باردەك ھېس قىلدىم ، بۇ بىر ئىلمى ماقالە ، بۇنىڭغا ئىلمىي پوزىتسىيە تۇتمىقىمىز لازىم ، يەنى پەقەت ئۆزىمىزنىڭ تار كۆز قارىشىمىز ، كاللىمىزدا تۇيۇقسىز چاقناپ ئۆتكەن پارتىلاش خارەكتىرىدىكى ھېسىياتىمىز بىلەن مۇئامىلە قىلىماسلىقىمىز لازىم . بۇ يەردە شەمشىدىن ھاجى ئىسلامىي ھېيىت بايراملار توغرىسىدا چۈشەنچە بېرىۋاتىدۇ ، يەنى شۇ بايرامغا مۇناسىۋەتلىك ئىش پائالىيەتلەر ، ھەر قايسى رايونلاردىكى مۇسۇلمانلارنىڭ شۇ بايرامغا بولغان پوزىتىسىيىسى ۋە پائالىيەتلىرىنى تونۇشتۇرۇپ ئۆتىۋاتىدۇ ، ئاپتور  بۇ يەردە بۇ توغرا ، ئۇ خاتا  دېگەن مەسىلەئۈستىدە توختالمىدى . پەقەت ھېيىت - بايراملار توغرىسىدا مۇپەسسەل چۈشەنچە بەردى ، بىزگە غەلىتە بىلىنىۋاتقان ۋە بىدئەد تۇيۇلغان ئاۋۇ ئىش ھەركەتلەر بولسا بىز كۆز يۇمساق بولمايدىغان ھەقىقەت ، يەنى شۇ خىل پائالىيەتلەر مەۋجۇت ، ھېيىت - بايراملارنى چۈشەندۈرگەندە بۇ خىل ئەھۋاللار توغرىسىدا چۈشەنچە بېرىپ ئۆتۈش ھەرگىزمۇ شۇ خىل پائالىيەتلەرنى قوللاش ياكى تەشۋىق قىلىشنى بىلدۈرمەيدۇ ، پەقەت مەۋجۇت ئىكەنلىكىنى ئەسكەرتىدۇ خالاس . شۇڭا كۆپچىلىك توغرا مۇئامىلىدە بولۇپ ، قايناپ كەتمەي ، گۇناھ سادىر قىلىپ قويۇشتىن زېرەك ھەم ھۇشيار بولايلق ، بىدئەد ئىشلارغا ھۆكۈم قىلغاندا بىلىدىغان بىلىمىمىزگە كۆرگەن ماتىرىيالىمىزغا ( قۇرئان ، ھەدىس ، نوپۇزلۇق ، ئېتىراپقا ئېرىشكەن ئىسلام ئالىملىرىنىڭ پەتىۋالىرىغا ) تايىنايلى . توغرىسىنى بىلگۈچى ئاللاھتۇر ، ئاللاھ ئىگەمدىن ھەممىمىزگە تەۋپىق ۋە مەغفىرەت تىلەيمەن !