چۈنكى مەن ئانا

0999nazuk

	چۈنكى مەن ئانا (ھاياتنوپۇس مۇھەممەت) مەن ئانا بولدۇم. كۆز قارچۇقۇمدا ئوماق ئوغلۇمنىڭ ماڭا شوخلۇق،ئامراقلىق بىلەن تىكىلىپ تۇرغان بۇدرۇق چىرايى،قۇلاق تۈۋىمدە ماڭا ئەركىلىگەن چۈچۈك تىللىرى، يۈرىكىمدە ئۇنىڭغا بولغان تەگسىز، تەخىرسىز، توختاۋسىز سىغىنىش! ئۇنىڭدىن بىر سائەت ئايرىلىشقا كۆزۈم قىيمايدۇ، ئۇنى مىنۇت سىكۇنىتلا كۆرگۈم كىلىپلا تۇرىدۇ، ئۇنى باغرىمغا تېڭىپ، ۋۇجۇدۇمغا سىڭدۈرۋىتىپ ھەر ۋاقىت بىرگە ئىلىپ يۈرسەملا دەيمەن. مەن ئانا بولدۇم. پۈتكۈل خىيالىمنى، ۋۇجۇدۇمنى، قەلبىمنى ئانىلىق تۇيغۇ، ئانىلىق مەسئۇلىيەت ئىگىلىگەن ئەسنالىرىمنىڭ ھەر بىر دەقىقىسى، ماڭا بېغىشلاش ۋە بېغىشلىنىشنىڭ تەسىرلىك قىسسىلىرىنى سۆزلەيدۇ. ماڭا تەلپۈنۈپ، تېپچەكلەپ، يۈگرەپ ئالدىمغا چىقىدىغان، كۈندە ئىشتىن يىنىپ كەلگەن چۈش ۋە كەچتە ئاجايىپ كۈچلۈك تەشنالىق بىلەن ئۆزىنى ماڭا ئېتىپ، مىنى ئۇزاق ئۇزاق قۇچاغلاپ، ئۈنسىز ھالدا ھىدىمنى ھىدلايدىغان ئوغلۇمنىڭ ۋۇجۇدى، مېھرى مىنى شامدەك ئېرىتىپ تاشلايدۇ. بىر ئۆيدە تۇرۇپمۇ بىر بىرىمىزگە قانمىغانلىرىمىزغا قاراپ، بەزىدە خىزمەت قىلغىنىمغىمۇ ئاچچىغىم كىلىدۇ. بالامغا ئاجايىپ تەقەززالىق، تەشنالىقتا، مىنى مىنۇت ئاغزىدىن چۈشۈرمەي كۈتىدىغان ئوماق قوزامغا، ئىچىم ئاغرىپ ئاچچىق يۈتىمەن، يۈرىكىم پىژىلداپ ئىچىشىپ كىتىدۇ. مەن ئانا، ئەتىگەن ئىشقا ماڭغىنىمدا ئوغلۇم ئۇخلاپ قالغانىدى. ئويغىنىپ ئىسمىمنى چاقىرىپ قانچىلىك يىغلىغاندۇ. كۆينەكلىرىمنى قانچىلىك ھىدلاپ، رەسىمىمنى يۈرىكىگە تىڭىۋىلىپ، يۇمران لەۋلىرىدىن ئاجراتقىلى ئۇنىماي قانچىلىك سۆيگەندۇ! ئالدىغا تىزىپ بەرگەن مىغىز، بادام، پىچىنە،كەمپۈت، ئالمىلىرىنى ئانام يەيدۇ، ئانام يىگۈزۈپ قويىدۇ دەپ، قوللىرىغا لىق چاڭگاللىۋىلىپ، ئىشىككە تەلمۈرۈپ، ئىسمىمنى چاقىرىپ ئولتۇرغاندۇ.... ئوماق ئوغلۇم، مۇشۇ قىياپەتلىرىڭنى ئويلىسام، كۆزلىرىمنىمۇ باشقۇرالماي قالىمەن! ئەتىگەن ھاۋا سەل سوغۇق ئىدى. بالامغا قېلىنراق كىيىم كىيدۈرگەن بولىمىدىم... تىزرەك ئىشىمنى تۈگىتەي....تىخى ئىشتىن چۈشىدىغانغا خىلى ۋاقىت بار ئىكەن. ئوغلۇم كارۋاتتىن يىقىلىپ چۈشىدىغانغا خېلى ۋاقىت بار ئىكەن. ئوغلۇم كارۋاتتىن يىقىلىپ چۈشكەنمىدۇ، قولىنى ئىشىك قىسىۋالغانمىدۇ، مىنى ئىزدەپ يولغا چىقىپ كەتكەنمىدۇ.....بولدى، دىققىتىمنى يىغاي، تەپەككۈرۈمنى چاچماي، ئىشىمنى پۇختا، ئەستايىدىل ئورۇنداپ، تىزرەك ئۆيگە بىرىپ، قوزامنى باغرىمغا باساي، تامىقىنى يىگۈزۈپ، بەش مىنۇت بولسىمۇ بىرگە ئوينىشىپ بىرەي. چۈشلۈك تاماق ۋاقتى بەك قىسقا، تولىمۇ قىسقا، بالام ئىككىمىز بىر بىرىمىزگە قانماي ئايرىلىمىز. ئۇ يەنە يىغلاپ، ئىسمىمنى يادلاپ، ئىشىككە قاراپ ئولتۇرۇپ كەچتە ئىشتىن تىز كىلىشىمنى كۈتىدۇ! تۈرلۈك خىيال، ئەنسىرەش، توسالغۇسىز تەشنالىق بىلەن ۋاقىتنى تەستە توشقۇزۇپ ئۆيگە قاراپ يۈگرەيمەن. ئىشىك تۈۋىدە مىنى كۈتۈپ تۇرغان ئوغلۇم يىقىلىپ قوپۇپ يۈگۈرۈپ كەلگىنىچە ئۆزىنى باغرىمغا ئاتىدۇ. يۈز- كۆزلىرىمگە ، قۇلاق، بۇرنۇمغا، بويۇن- مۈرىلىرىمگە ئەسەبىيلەرچە، ۋىلىقلاپ سۆيگىنىچە كۈلۈپ سۆيۈپ، ھىدىمنى قانماي ھىدلايدۇ. يۈرىكىمگە بىشىنى قويۇپ يۈرەك تىۋىشىمدىن ئاراملىق ئىزدەيدۇ. ئىككىمىز بىر پەس، ئەتراپتىكى مۇھىتنى، دۇنيانى ئۇنتىمىز، بىر بىرىمىزنىڭ باغرىغا سىڭىپ كىتىمىز... ئوماق قوزام، ماڭغان ھەربىر قەدىمىم، قىلغان ھەربىر سۆزۈم، يۈرىكىمنىڭ ھەر بىر سوقۇشى سەن ئۈچۈن، خۇشاللىقلىرىم، ئىزدىنىشلىرىم ساڭا تەئەللۇق. سەن ماڭا تەسەللى، رىغبەت ۋە ئۆزۈمگە ئىشەنىچ، ھاياتقا يىڭى باشتىن مۇھەببەت باغلاشنى ئۆگەتتىڭ، كۈچ جاسارەت ئاتا قىلدىڭ! ماڭا ئانىلىق سۈپەت، ئانىلىق ۋەزىن ئاتا قىلىپلا قالماي، ھەقىقى مىھىر مۇھەببەتنىڭ مەنىسىنى قايتىدىن تونۇتتۇڭ. ماڭا ئۆزىنى بىغىشلاشنىڭ ۋە ھاياتنىڭ مەنىسىنىڭ قانداقلىقىنى ھىس قىلدۇردۇڭ! چېچەنلىكىڭ ماڭا، ئۆز مەسئۇلىيىتىمنى ئۇنىڭ ۋەزنىنىڭ قانچىلىكلىكىنى تونۇتسا، ئەقىللىقلىقىڭ، سەزگۈرلىكىڭ مەجبۇريىتىمنىڭ قانچىلىك ئىغىر ۋە يۈكسەكلىكىنى، چوڭقۇرلىقىنى ھىس قىلدۇرىدۇ. مەن ئانا بولدۇم،مېنىڭ ھايات شامىمنى ياندۇرۇپ، ھايات يولۇمنى داۋاملاشتۇرغۇچىغا، ئارزۇيۇمنى روياپقا چىقارغۇچىغا، ئەۋلادىمنى ئەۋلادقا ئۇلىغۇچىغا ئىگە بولدۇم، ئۆز قوۋمىمغا، خەلقىمگە بىر ئوغۇل، بىر تۈۋرۈك تۇغۇپ بەردىم، ئەمدى ئۇنى يۈرەك قىنىمنى، ھاياتىمنى بىغىشلاپ ياخشى پەرۋىش قىلىشىم كىرەك. ئۇنى كەلگۈسىگە مۇناىسپ ياراملىق ساپاغا ئىگە قىلىش ئۈچۈن شارائىت ھازىرلىشىم كىرەك، ئۇنى كۈچلۈك ئېتىقادقا، تەۋرەنمەس ئادىمىيلىك قەد ۋە غورۇرغا، يۇقىرى ساپاغا ۋە ئادىمىي ساداقەت، مېھىر- ۋاپا بىلەن يۇغۇرۇلغان، ئۆزىنى توختاتقان ۋەزىنلىك، سەۋىيىلىك، ئەڭ مەلۇماتلىق، ياراملىق ئەر قىلىپ خەلقىمگە سۇنۇش ئۈچۈن، مەن ئالدى بىلەن شۇنداق بىر ئوغۇلنىڭ ئانىسىغا مۇناسىپ ساپا، سالاھىيەت ھازىرلىشىم، ئۈزلۈكسىز ئۆگىنىشىم، ئىزدىنىشىم، ئانىلىق سالاھىيىتىمگە، ئەستايىدىل مۇئامىلە قىلىپ، ئۆزۈمگە دادىل تىكىلىشىم، ئۆزۈمنى مۇكەممەللەشتۈرۈشكە ھازىرلىنىشم كېرەك، ئوغلۇمنىڭ كەلگۈسى بىر كۈنلەرگە كەلگەندە ماڭا قاراپ ئۈمىتسىزلىنىپ قىلىشى ماڭا چەكسىز خورلۇق، ھاقارەت! ئوغلۇم ئۆزىنىڭ شۇنداق بىر ئانىنىڭ بارلىقىدىن ئۇنىڭغا گاھ مېھرىبان ئانا، گاھ تەلەپچان ئۇستاز، گاھ سىرداش دوسىت، گاھ قاتتىق قول يىتەكچى بولۇپ ئۆزىنى يىتىلەپ گۈزەل مەنزىلگە يەتكۈزگەنلىكىدىن سۆيۈنسۈنكى، پەقەت مىنىڭ كىچىلىرى ئاق سۈت بىرىپ باققىنىمغا، جەمىيەتكە، ئوقۇتۇپ، كىيم-كىچەك، خەج- خىراجەت بېرىپ چىقىرىپ قويغىنىمغىلا، ئانىلىق يىغلاڭغۇ مېھرىمگىلا قاراپ، ئانىسى بولغانلىقىم ئۈچۈنلا مېنى ھۆرمەتلەپ، مېنى ياخشى كۆرۈشى دەپلا چۈشەنمىسۇن! مەن ئۇنىڭ دەۋىرگە مۇناسىپ ئانىلا ئەمەس، يولباشچىسى، ئۈلگىسى، ئۇستازى بولۇش ئۈچۈن، ئوغلۇمنىڭ نەزىرىدىكى، زامانغا مۇناسىپ مۇكەممەل ئوبرازغا ئىگە ئانا بولۇش ئۈچۈن تىرىشاي...... چۈنكى مىنىڭ تىرىشىشىم ئۆزۈم ئۈچۈنلا، ئوغلۇم ئۈچۈنلا ئەمەس، ئورتاق بىر قوۋمنىڭ، مىللەت ۋە خەلىقنىڭ گەۋدىسىگە قوشۇلىدىغان بىر ئەزا، بىر تەركىبى ئۈچۈن! كەلگۈسىدە يەنە بىر ئائىلىگە باش، ئائىلىنىڭ بىر قانچە ئادىمىگە يىتەكچى، تەربىيچىسىنىڭ يېتىلىشى، مۇكەممەل بالاغىتى ئۈچۈن! مەن ئانا بولدۇم، بىر ئائىلىنى پەرۋىش قىلىپ، يېتەكلەيدىغانلا ئەمەس، بىر قوۋمگە مېھىر- مۇھەببەت ۋە ھاياتلىق ئاتا قىلغۇچىغا ۋە ئۇنى ئاپىرىدە قىلغۇچىغا ئايلاندىم! دوسىتلار كەچۈرۈڭلار، مىنى ئويۇن تاماشا تۈزۈشكەن سورۇنۇڭلارغا چىللىماڭلار، ئوغلۇمنى نانغا زورلاپ قويۇپ، ئۇنىڭ مېھىرگە تەشنا قەلبىنى بوش، يېتىم قالدۇرۇپ قويۇپ مېھماندارچىلىقىڭلارغا بارالمايمەن، كەچۈر دوستۇم، ھەپتىدە بىر ئالمىشىپ مودا قوغلىشىش سەھنىسىگە مىنى چىللىما، مەن ئوغلۇمنى ياخشى تەربىيلەش ئۈچۈن، ئۇنىڭ تۇرمۇشىنى پۇختا ئورۇنلاشتۇرۇش ئۈچۈن ئىقتىسادى ئاساسقا ئىگە بولمىسام، ئۆزۈمنىڭ تېشىنى ئەمەس، ئوغلۇمنىڭ ئىدىيىسىنى بىزەش ئۈچۈن كۈچ سەرىپ قىلمىسام بولمايدۇ، مەن بەك ئالدىراش، ۋاقتىم بەك قىس، ئوغلۇمنىڭ ھەممە نەرسىگە نېمە ئۈچۈن نەزىرىدە تىكىلىپ مۆلدۈرلەپ تۇرغان سەبى كۆزلىرى، ماڭا ھەر قاچان ئۇنىڭ ئۈچۈن كۆپرەك ۋاقىت چىقىرىپ ئاجرىتىشىمنىڭ، تەبىئەتتىكى ھەر بىر گىياھ، ھەر بىر جانلىقلار ھەققىدە، تۇرمۇشتىكى نۇرغۇن ئىشلار، يىڭىلىقلار، مۆجىزىلەر ھەققىدە ئەستايىدىل چۈشەنچە بىرىپ، ھاياتلىق مۇھەببىتىنى قەلبىدە ئاستا- ئاستا بىخ سۈردۈرۈش تەشنالىقىنى ئىپادىلەيدۇ. مەن ئۇنىڭ نەزىرىدە پۈتۈن كائىناتنىڭ ئانىسى، ئۇستازى، ھەممىگە مېھرىبان پەرۋىشچى. مەن پۈتكۈل كائىناتقا سۆيۈنۈشلۈك، پەرۋىشچان قۇچاق ئېچىپ، ئۇنىڭدىن ئۆزۈمگە ئىشەنىچ ۋە قەد تىكلەپ، ئاندىن ئۇنى ئۇنىڭدىن ئارتۇقراق مېھىر- ۋاپادار كائىناتقا، ئادەملەر ئارىسىغا تارقىتىشىم، ئانىنىڭ ئۇلۇغلىقىنى ئىپادىلىشىم، گويا شامدەك، يىلتىزدەك سۈپەتكە ئىگە بولۇشۇم، ئۆزۈمگە شۇنداق تەلەپ قويۇشۇم كىرەك، چۈنكى مەن ئانا!.............. "قىزلىق دوقمۇشتىن ئانىلىق سەپىرىگىچە" كىتاپتىن ئىلىندى...

mihir

	ھارمىغايسىز ، ياخشى يىزىلغان تىمىكەن .ئانا بولماق تەس ئەمەس، لىكىن ھەقىقى لاياقەتلىك ئانا بولماق بەك ،بەك تەس ،

aynor

	ئانا  بولغۇچى بالىنى گۈزەللىكنى،  ئادالەتنى ، ھە قىقەتنى  سۇيىدىغان  تەربىيلىشى كېرەك. نۇرغۇن ئانىلار  بالىنىڭ سالامەتلىكىگە  كۇڭۇل بولۇپلا  ، ئۇنىڭ  پەزىلىتى ھەم ئەقلىي تەرەققىياتىغا سەل قاراىيدۇ.   ناھايتى ئەھمىيەتلىك تىما يۇلاپسىز  رەخمەت سىزگە

arxang

	مۇشۇنداق ياخشى يىزىلغان ئەسەرلەر بولسا يوللاپ تۇرغايسىز

maleka

	ھەجەپ مىنىڭ تۇرمۇشۇمنى ،كوڭلۇمدىكى گەپلەرنى يىزىپىسز...بەك ئسىل تىما بوپتۇ ...ھارمىفايسىز.........

mickinay520

	ئانا  بۇلغۇچىنىڭ  كۈڭلىنى  بىزدەك  ئانا  بۇلغانلا  چۈشنىدۇ. ئۇلۇغ  ئاللا  باللىرىمىزنىڭ دىلىغا  ئىمان،كۈڭلىگە  ئىنساپ ئاتا  قىلسۇن.

☆爱ASANMU☆

	بەكلا ياخشى تىمىكەن.رەھمەت سىزگە. [s:47]  [s:34]  [s:49]  [s:50]

arkin-kuyax

	مۇشۇنداق  ياخشى  ئەسەرلەر بولسا   ئايىماي  يوللاپ تۇراسىز...

mehriban

	بەك ياخشى تېما ئىكەن دېمىسىمۇ ئانىلار ئەڭ ئۇلۇغ ئانىلىرىمىزنى قەدىرلەيلى!!

تاڭنۇر

	ھەر قېتىم ئانا توغرۇلۇق يېزىلغان تېمىلارنى ئۇقۇغان ۋاقتىمدا ئانامغا بولغان مىھىر - مۇھەببىتىم ھەسسىلەپ ئاشىدۇ ،چۈنكى ئانا دۇنيادىكى ئەڭ ئۇلۇغ ئىنساندۇر ،،،،،،،،،، ئانا،ئانا،،،،،،،،،،، بۇ نىمە دىگەن يېقىملىق سۆز ھە .... بارلىق ئانىلارنىڭ ئۆمۈرى ئۇزۇن بولسۇن !!!ئانىلارنى ئۇلۇغ ئاللاھ ئۆز پاناھىدا ساقلىسۇن !!!!!!........ تېما يولىغۇچىغا رەھمەت داۋاملىق يوللاپ تۇرۇڭ ............... ئانىلارنى قانچە تەرىپلەپ يازساقمۇ ئازلىق قىلىدۇ .