ئۆمۈر ھەققىدە مۇخەممەس

Roman

	ئۆمۈر ھەققىدە مۇخەممەس                ئابدۇرېھىم ئۆتكۈر    ئۆمۈر مەنزىلىدە ئىزدەپ غۇبارسىز چىن ھەقىقەتنى، قەلەندەردەك كېزىپ يۈردۈم چىكىپ مىڭبىر مۇشەققەتنى. ۋە لېكىن يوق ئىكەن تۇز يول تېپىشتا ئۈشبۇ مەقسەتنى، تېڭىرقاپ ئۆتتى كۆپ ئۆمرۈم چۈشەنمەي سىرۇ ھېكمەتنى، ئىشىت دىلبەر، بايان ئەيلەي ساڭا بۇ ھەقتە سۆھبەتنى،    توغۇلغان ئىككى مۆمىندىن، ئۆتۈپ ئەللىكتە سەككىز يىل، يەكۈنلەش سائىتى يەتتى ئۆمۈرنى ئەمدى ئەستايىدىل، نەزەر سالسام بېسىپ ئۆتكەن يولۇمغا بولمايىن غاپىل، ئاقار كۆز ياشلىرىم گاھى بولۇپ ئېرتىش ۋە ياكى نىل، جاھاندا چەكمىگەي ھېچكىم مېنىڭدەك كۆپ نادامەتنى،    يا خەققە ئەتمىدىم قۇللۇق، يا ئەلگە قىلمىدىم خىزمەت، بېغىمغا كۈز يېتىپ كەلدى، قولۇمدىن كەتتى كۆپ پۇرسەت، ھەمىشە ئۆرتىبان دىلنى يېلىنجاپ بىر ئەلەم-ھەسرەت، ئازابلاپ كېچەيۇ-كۈندۈز قىلىپ جانىمنى بىتاقەت، راۋادۇر قانچىلىك قىلسام ئۆزۈمگە دوق مالامەتنى،       ئانا يۇرتۇپ بېرىپ ئاق سۈت، بېقىپ ئۆستۈردى مىڭ ئاسراپ، ئاۋايلاپ مايسىدەك ھەر تاڭ چېچىپ باشىمغا زەر ئاپتاپ، بېرىپ تىل ھەم ئەقىل-ئىدراك، قاتارغا قوشتى يول باشلاپ، قاناتى ئاستىغا ئالدى ئېغىر كۈنلەردە مىڭ-مىڭلاپ، نىچۈكمۇ ياندۇرارمەن بۇ ئانالىق مېھرى-شەپقەتنى    باھارنى كۈيلىشەر قۇشلار چېغىدا ھەر سەھەر دەمدە، نېمىشقا بولمىسۇن بىر ھېس تىرىك پەرزەنتى-ئادەمدە، ۋاھالەنكى، ئادا بولماي ھېسابسىز قەرز بۇ زىممەمدە، ھامان قاينايدۇ ھەسرەتلىك پۇشايمان ئابى دىدەمدە، ئۆمۈرنى زايە قىلما سەن، ئېلىپ مەندىن بۇ ئىبرەتنى،    خىيالىم دېڭىزى تىنماي تېشىپ مىڭ چايقىلىپ قايناق، كېچىلەر ئاز يۇمۇپ كۆزنى ۋە گاھى تاڭغىچە ئويغاق، چىقاردىم بىر يەكۈن ئاخىر ئۆمۈر مەنزىلىدىن شۇنداق، ئۆمۈردىن بىر كۈرەش، ھەرگىز ئەمەس ئۇ بىزگە ئاۋۇنچاق، يۇلاتما ئەي كۆڭۈل ئەمدى ئۆزۈڭگە زەررە غەپلەتنى،    پىكىر دەرياسىدا قانچە تېرەن چۆمگەنسېرى ھەر تۈن، كۆڭۈلنىڭ كىرلىرى شۇنچە يۇيۇلدى، تارقىدى ئەپسۇن، ھاياتىم گەرچە پۇشمانلىق دىلىمدۇر ناتىۋان مەھزۇن، ۋە لېكىن جان كىتابىغا قوشۇلدى تۈمەن مىڭ مەزمۇن، شۈكۈركىم، قوغلىدى مەڭگۈ يۇرۇق تاڭ قارا زۇلمەتنى،    تەپەككۈر كۆزىلە باقسۇن ئەگەر ئالەمگە بىر مەررە، ئەمەستۇر خالى ھېكمەتتىن ۋە ھەتتاكى ھەسەل ھەرە، چۈمۈلە چېغىدا تىنماي تاپۇر ئۆز ئەجرىدىن مەررە، كىشىكىم بىلسە بۇ بەلكى خەزىنە سىرىدىن زەررە، پىكىر قىل ھەم چۈشەن، ئۆگەن بۇ جانلىق سىرۇ-ھېكمەتنى،    بىلىپ يەتكەنسېرى ئىنسان ھاياتنىڭ سىرىنى كۆپرەك، كۆڭۈل رۇشەنلىشىپ ئاندىن چۈشەنگەي ئۆز زاتىنى خوپراق، مىسال: قارىغۇ نىچۈك بىلسۇن، قۇياش قانداغۇ ئاي قانداق، بىلۇر ئەمما گۈدەك ھەتتا نىچۈكتۇر گۈل نىچۈك ياپراق، دېمەككى مەرىپەتتىن جان تاپۇر ئەقلى-پاراسەتنى،    ئۆلۈمنى ئويلىسا ھەركىم بىلۇر ئۆز زاتىنى ئاندىن، تۇغۇلماق سۆڭرە ئۆلمەكلىك ئاياندۇر ھەممىگە ئايدىن، لېكىن نەدە، قاچان، قانداق ئۆلۈشنى كىم بىلۇر ئالدىن، يېشىلمەس بىر تۈگۈن بولدى بۇ ماۋزۇ دەۋرى-دەۋراندىن، ھەمىشە يىغسىمۇ دۇنيا بۇ سىرغا ھەممە دېققەتنى،    جاھان باقى ئەمەس، لوقمان چېغىدا تاپمىدى دەرمان، مىسالدۇر بۇڭا ئىسكەندەر، ۋە ھەتتا ئەركى چىنگىزخان، كېلىپ-كەتمەك بىلەن مەشغۇل، جاھانغا بىھېساپ كارۋان، ئۆتەر دۇنيا، كېچەر دۇنيا، پەقەت خەلقلا سۈرەر دەۋران، ئۆمۈر مەنزىلىدە تاپتىم نىھايەت شۇ ھەقىقەتنى، مەنبە: ئابدىرىھىم ئۆتكۈر شىئىرلىرى

كارۋان

	ئابدۇرېھىم ئاكىمىزنىڭ نادىر ئەسەرلىرى بىلەن بىزنى تەمىنلەپ تۇرغانلىقىڭىزغا رەھمەت يەنە بولسا يوللاپ تۇرۇڭ،،بىزمۇ ئۇقۇپ تۇرايلى.

kugul

	شائىر ئوغلان ئابدۇرېھىم ئۆتكۈر ئاكىمىزنىڭ ،نادىر ئەسەرلىرى بىلەن بىزنى تەمىنلەپ تۇرغانلىقىڭىزغا رەھمەت.داۋاملىق يوللاپ تۇرۇڭ.

TATLIHIM

	رەھمەت سىزگە !  ھەقىقەتەن ياخشى يېزىلغان شېئىر بۇ ،بىر پۈتۈن ھايات ۋە شۇنداقلا دۆلەت باشقۇرۇش ھەققىدە بەزى مەزمۇنلار يۇشۇرۇن كىرگىزۋېتىلگەن شېئىر يەنى خەلىق ھەققىدىكى مەزمۇنلار ! بولسا مۇشۇنداق داڭلىق يازغۇچىلىرىمىزنىڭ شېئىرلىرىنى يەنە يوللاپ تۇرىشىڭىزنى ئۈمىد قىلىمەن !  [s:36]

Roman

	قوللىغىنىڭلارغا رەھمەت ھاە

☆爱ASANMU☆

	مەشھۇر يازغۇچىمىزنىڭ شىئىرلىرىنى مۇنبەردە كۆرگىنىمدىن خۇشالمەن. يەنە بولسا يوللاپ تۇرارسىز ھە. [s:47]  [s:47]  [s:49]  [s:49]  [s:49]

jilwa

	يا خەققە ئەتمىدىم قۇللۇق، يا ئەلگە قىلمىدىم خىزمەت بېغىمغا كۈز يېتىپ كەلدى، قولۇمدىن كەتتى كۆپ پۇرسەت،   ھەمىشە ئۆرتىبان دىلنى يېلىنجاپ بىر ئەلەم-ھەسرەت،   ئازابلاپ كېچەيۇ-كۈندۈز قىلىپ جانىمنى بىتاقەت   راۋادۇر قانچىلىك قىلسام ئۆزۈمگە دوق مالامەتنى،        بۇ كۇبلېتنې بەك ياخشې كۇرمەن

زامانى

	بولۇپمۇ بۇ يېرى جاھان باقى ئەمەس، لوقمان چېغىدا تاپمىدى دەرمان، مىسالدۇر بۇڭا ئىسكەندەر، ۋە ھەتتا ئەركى چىنگىزخان،   كېلىپ-كەتمەك بىلەن مەشغۇل، جاھانغا بىھېساپ كارۋان، ئۆتەر دۇنيا، كېچەر دۇنيا، پەقەت خەلقلا سۈرەر دەۋران، ئۆمۈر مەنزىلىدە تاپتىم نىھايەت شۇ ھەقىقەتنى،

تارىم

	قانچە ئوقۇساممۇ يەنىلا باشقىچە زوق بىرىدىغان ئەسەر...