قەرزدار سۆيگۈ ـــ پوۋىست (مىسرانىم مەشرەپ مۇكاپاتلىق ئەسەرلىرىگە )

hamra520

	قېرىندشېم ھارمغايسىز ........داۋامىنى تىزراق يوللاڭ......

XERHAN

	ئۆزىڭىز بىلىسىز مەن بەك ئالدىراش بولۇپ قالدىم .. شۇڭا ھازىرچە تىما توغۇرلۇق گەپ قىلغۇم يوق .

apisi502

	يەنە ساقلايمىزكەندە؟!

nazpari

	（2）    زاۋۇتنىڭ ئومومى ئىشلىرىغا مەسئۇل خادىمى لىيۇ شۈيگاڭ ئىككى نەپەر گۇرۇپپا باشلىقىنى ئەگەشتۈرۈپ سادىقنىڭ قوروسىغا كىرىپ كەلدى. 80-يىللاردىن باشلاپ زاۋۇتتا ئادەتتىكى ئىشچى، گۇرۇپپا باشلىقى، ئىشخانا ھەيئىتى قاتارلىق خىزمەتلەرنى ئىشلەپ كەلگەن بۇ پىشقەدەم باشلىق ئۇيغۇرلار ئارىسىدا ئۇزۇن مەزگىل تۇرغاچقا ئۇيغۇرچىنى راۋان سۆزلەيتتى. بىلمىگەن ئادەملەر ئۇنىڭ چىرايىنى كۆرمىگىچە ئۇيغۇر ئەمەسلىكىگە ئىشەنمەيتتى. ھويلىدا قالايمىقان تاشلاپ قويۇلغان داس، چەينەك، سوپۇن پاراشۇكى، سۈپۈرگە قاتارلىقلارغا بىر قۇر كۆز يۈگۈرتۈپ چىققان باشلىق گۇرۇپپا باشلىقلىرىغا ئىپادىسىزلا قاراپ قويغاندىن كىيىن قىلىن قىشلىق مىلەڭزىنى ئۆرۈپ ئىشىكنى يەڭگىل چەكتى ۋە :    -ئەسسالامۇ ئەلەيكۇم.    دەپ ئۆيگە كىرىپ كەلدى. گۈلسەنەمنىڭ يىنىدا ئۇكىسىغا قارىغاچ ئولتۇرۇپ مۈگدەپ قالغان ماھىرە چۆچۈپ ئورنىدىن تۇرۇپ كەتتى. زاۋۇت ئىچىگە ئوينىغىلى كىرگەندە، ئانچە-مۇنچە ئۇچرىتىپ قالىدىغان بۇ ئاچچىقى يامان باشلىقنىڭ سالام بىرىپ ئۆيگە كىرىشى ماھىرەنى ھەيرانلىقتا قالدۇرغانىدى.    -ئانا ئۆيگە مىھمان كەلدى.    ماھىرە باشلىقنىڭ كەينىدىن سوڭدىشىپ بىللە كىرىۋاتقان ئىككى نەپەر گۇرۇپپا باشلىقىنى كۆرۈپ كۆرپىگە باشلىغاچ شۇنداق دىدى. باياتىن بىرى مۇستاپانىڭ قاپقارا يۇمشاق چاچلىرىنى سىلاپ تۇرۇپ تۇغۇتىدىكى ۋەھىمىلىك سائەتلەر كۆز ئالدىغا كىلىۋىلىپ كۆز يىشى قىلغان گۈلسەنەم قاتتىق ئۇيقۇغا كەتكەن بولۇپ، ماھىرەنىڭ تۇرتۇپ ئويغىتىشى بىلەن ئاستا كۆزىنى ئىچىپ كىرىلدى. كەينىگە ئۆرۈلۈپ قاراپ زاۋۇتنىڭ باشلىقلىرىنى كۆرۈپ چۆچۈپ كەتتى. لىكىن دەماللىققا ئۆزىنى ئوڭشىۋالغاندىن كىيىن ئۇلار بىلەن سۇسلا سالاملىشىپ قويۇپ يىتىۋەردى. ‹‹ ھەقىچان مۇستاپانىڭ ئىشى ئۈچۈن كىردى بۇ خەق. سادىق يوق، ئەمدى قانداق قىلسام بولار؟ ......بولدىلا غەم قىلماي تۇراي. بەرىبىر مۇستاپا ساق-سالامەت تۇغۇلدى. ئەمدى بىشىمىزغا كەلگەننى كۆرمەمدىم ›› گۈلسەنەم مۇشۇلارنى ئويلاپ ئاپتاپ كۆرمەي قۇيغان ھىسىپتەك ئاقىرىپ كەتكەن ئىككى مەڭزىگە سۇس كۈلكە يۈگۈرتۈپ تۇرۇپ سورىدى.    -زاۋۇتنىڭ ئىشلىرى ياخشى كىتىۋاتامدۇ ؟    گۈلسەنەمنىڭ ئۆزلىرىنىڭ نىمە ئۈچۈن كىرگەنلىكىنى بىلىپ تۇرۇپمۇ قەستەن گەپنى ئىلىپ قىچىۋاتقانلىقىنى سەزگەن باشلىقمۇ چاندۇرماستىن ئۇنىڭغا ماسلاشتى.    -يامان ئەمەس، ھازىر تەرەققىيات ياخشى. بۇرۇنقى ۋاقىتلاردىكىدەك ماشىنىغا چىگىتنى ئارىدا ئۇسىدىغان ئىش يوق. ئۆز ۋاقتىدا سىلەر ئاياللارمۇ زاۋۇتتا كۆپ جاپا تارتقان.    گۈلسەنەم باشلىقنىڭ گىپىنى ئاڭلاپ 15 يىل بۇرۇنقى بىر ۋەقە كۆڭلىدىن كەچتى.    قەھرىتان قىش كۈنلىرىنىڭ بىرى گۈلسەنەم 5 ياشلىق ماھىرە بىلەن 2 ياشلىق مىرادىلنى ئانىسى تۇنسەخان ئاچىنىڭ يىنىدا قالدۇرۇپ، 4 ئايلىق بولغان قورسىقىنى كۆتۈرۈپ زاۋۇتقا ئىشلىگىلى چىقتى. ئۇ ۋاقىتلار نورمىغا ئاشلىق بىرىدىغان ۋاقىتلار بولغاچقا، ھۆكۈمەتنىڭ بەرگەن ئايلىق نورمىسى ئۇ ئايدىن-بۇ ئايغا يەتمەيتتى. سەي قايناق قاينىتىپ، خۇڭشۇ پىشۇرۇپ يەپ قورساقنى ئالدايدىغان بۇ ۋاقىتلاردا زاۋۇت ئىشچىلىرىنىڭ ئاياللىرىمۇ ئەرلىرى بىلەن بىللە ئىشلىگىلى چىقاتتى. بىر كۈن كەچكىچە بىلى ئۈزۈلۈپ چۈشكىچە ئىشلەپ كەچ بولغاندا قولىغا تەگكەن بىر كوي ئىككى مو پۇلنى كۆزلىرىگە سۈرتكىدەك بولۇپ كىتىشەتتى. ئەتتىگەندە قىلىن كىيىملىرىنى گۈلسەنەمگە قالدۇرۇپ قويۇپ ئۆزى يىلىڭ چاپىنى بىلەن چىقىپ كەتكەن سادىق گۈلسەنەمنىڭ زاۋۇتقا چىققىنىنى كۆرۈپ ئالدىغا كەلدى.    -ئاي ئوتتۇرىسى بولۇپ قالدى، نورما ئاشلىقىمىزمۇ بىر يەرگە بىرىپ قاپتۇ. بولمىغان بولسا سىنى بۇ يەرگە ھەرگىز چىققىلى قويمايتتىم.    سادىقنىڭ مىھرىبانلىق يىغىپ تۇرغان كۆزىگە ئوتلۇق نەزەردە بىر قارىۋەتكەن گۈلسەنەم كۈلۈمسىرەپ تۇرۇپ جاۋاب بەردى.    -ھىچقىسى يوق. ئەر-خوتۇن دىگەن جاپانىمۇ، ھالاۋەتنىمۇ تەڭ كۆرىشى كىرەك. سىز بۇ يەردە جاپالىق ئىشلەۋاتسىڭىز مەن ئۆيدە بىكار ئولتۇرۇپ يىسەم كۆڭلۈم ئۇنىمايدىكەن.    ئىككىسى بىرلىكتە چىگىتلىكنىڭ يىنىغا كىلىپ ماشىنىغا چىگىت ئۇستى. تۆت چاسا يوغان قورساقلىق تۆمۈر قول ھارۋىسىغا لىققىدە چىگىت ئۇسۇپ چىگىتتىن ياغ چىقىرىدىغان ئۈسكىنىگە ئەكىلىپ تۆكتى. شۇ كۈنى كەچ كىرگۈچە قاتتىق جاپالىق ئىشلىگەن گۈلسەنەم ھەممىسىدىن كۆپ پۇل ئالغان بولۇپ، كەچتە قولىغا تەگكەن بىر كوي بەش مونى يۈرىكىگە تىگىپ يىغلاپ كەتكەنىدى............    ماھىرەنىڭ قاتتىق تۈرتۈشى بىلەن چوڭقۇر خىياللار قاينىمىدىن قايتىپ چىققان گۈلسەنەم ياش ئەگىپ قالغان چىرايلىق كۆزلىرىنى باش ياغلىقىنىڭ ئۇچى بىلەن سۈرتكەندىن كىيىن باشلىققا قارىدى.    -باياتىن بىرى گەپ قىلسام جاۋابمۇ بەرمەيسىزغۇ ؟    -ھە! ....خاپا بولماڭ باشلىق. خىيالغا چۆكۈپ كىتىپتىمەن.    -سادىقنى ئويلاپ ئولتۇرغانمۇ؟ ئۇنچە ئىنتىزار بولمىسىڭىزمۇ ھىلىغىچە كىلىپ قالار ئۇ ئىيىق .    باشلىق ۋە ئىككى نەپەر گۇرۇپپا باشلىقىغا قوشۇلۇپ گۈلسەنەممۇ كۈلۈپ تاشلىدى. داستىخان كۆتۈرۈپ كىرگەن ماھىرە پىيالىلەرگە چاي قۇيۇپ نان ئوشتۇپ قويغاندىن كىيىن قۇرۇق يىمىش ئەكىرىش ئۈچۈن چىقىپ كەتتى.    -چاقچاقمۇ قىلىپ قويدۇم. ئەسلى مەقسەتكە كەلسەك، سىزنىڭ تىخى 15 كۈننىڭ ئالدىدا دوختۇرخانىدا تۇغۇپ چىققانلىقىڭىزنى بىرسى زاۋۇتقا كىرىپ چېقىپ قويۇپتۇ. زاۋۇت باشلىقىدىن خىلى گەپ ئاڭلىۋالدىم. ئەمەلىيەتتە ئالدىنقى بىر نەچچە بالىڭىزنى مەن زاۋۇت باشلىقىدىن يوشۇرۇپ كەلگەنىدىم. لىكىن قايسى مەلئۇننىڭ قىلغان ئىشىكىن، بۈگۈن ئەتتىگەندە زاۋۇت باشلىقى ماڭا بىر ھازا قايناپ ئاچچىقلاپ كەتتى. سىزمۇ بىلىسىز. مەن ئەزەلدىن كۆڭلۈمنىڭ كىرى يوق، باشقىلارغا قولۇمدىن كىلىشىچە ياخشلىق قىلدىغان ئادەم ئىدىم. لىكىن بۇ قىتىم سىلەرمۇ مىنى ئايىساڭلار.....    باشلىقنىڭ نىمە دىمەكچى  بولغانلىقىنى بىلىپ بولغان گۈلسەنەم ئاستا ئورنىدىن تۇرۇپ ئولتۇردى. مىڭ تەسلىكتە يىنىدىلا ياتقۇزۇلۇپ قويۇلغان مۇستاپانى قولىغا ئىلىپ چوڭقۇر ئانىلىق مىھرى بىلەن ئۇزاق تىكىلىپ قارىۋەتكەندىن كىيىن بالىغا قىيمىغاندەك بىر ئەلپازدا باشلىققا قارىدى. ئۇنىڭ كۆزلىرى يەنە ياشلانغانىدى.    -ئوبدان باشلىق، سىزدىن ئۆتۈنۈپ قالاي. مەن بۇ بالامنى مىڭ ئۆلۈپ مىڭبىر تىرىلىپ ئاران تۇغدۇم. پۈتۈن بىر كۈن قاتتىق تولغاقنىڭ ئازابىنى يەتكۈچە تارتىپ، نەچچە قىتىم ھوشۇمدىن كىتىپ ئاران تۇغدۇم. بۇ بالامغا پەقەت چىدىمايمەن. بۇ قىتىم بىر ئامال قىلىپ بىرىڭ. جەرىمانە تۆلىسەكمۇ مەيلى، لىكىن بالامدىن ئايرىلىپ قالغۇم يوق.    -سىزنىڭ ھىسياتىڭىزنى مەن چۈشىنىپ تۇرىۋاتىمەن.-دىدى باشلىق يىنىدا مۈكچىيىپ ئولتۇرۇپ ماھىرە ئىلىپ كىرگەن قۇرۇق يىمىشكە دۈم چۈشكەن گۇرۇپپا باشلىقلىرىغا كۆزىنىڭ قۇيرۇقىدا قاراپ - ھازىر سىياسەت بەك چىڭ. ئىلگىرىكىدەك پۇل تۆلەپلا ھەممە ئىشنى ھەل قىلغىلى بولمايدۇ. ھىلىمۇ ئالدىنقى 3 بالىڭىزغا جەرىمانە تۆلىدىڭلارغۇ؟    -ئۇنداق بولسا ئانامنىڭ ئۆيىگە كىتىپ تۇرۇپ باقىمەن بالامنى. ئىشقىلىپ بۇ بالامنى ھىچكىمگە بەرمەيمەن.    نۇرغۇن گەپ قىلىپ گۈلسەنەمنى قايىل قىلالمىغان باشلىق ئەتە-ئۆگۈن يەنە كىرىدىغانلىقىنى، ياخشىراق ئويلىنىپ بىقىشى كىرەكلىكىنى ئىيتىپ گۇرۇپپا باشلىقلىرىنى ئەگەشتۈرۈپ چىقىپ كەتتى.    يېرىم كىچە، ئىغىر ئەل ياتقۇ مەزگىلى. سىرتىدىن يالتىراق مىخلىۋىتىلگەن دىرىزىدىن غۇۋا چۈشۈپ تۇرغان ئاي يورۇقىدا ئوغلى مۇستاپانىڭ يۇمران يۈزلىرىگە قاراپ ياش تۆكۈپ ئولتۇرغان گۈلسەنەم، ئۆگزىنى ئىچىۋەتكۈدەك دەرىجىدە خورەك تارتىپ ئۇخلاۋاتقان سادىقنى چىمدىپ ئويغاتتى.    -نىمە بولدى؟ بۇ يىرىم كىچىدە ئۇخلىماي نىمىگە قاراپ ئولتۇرىسەن؟    -مەن كەچتىن بىرى سىزگە گەپ قىلىۋاتىمەن. يا ئۆ، يا مۆ دەپ بىر ئىغىزمۇ زۇۋان سۈرمىدىڭىز. ئەتە ئىشقا چىقىپ كەتسىڭىز، باشلىق يەنە كىرسە نىمە دەپ جاۋاب بىرىمەن؟    يىرىم كىچىدە ئۇيقۇسىنى بۇزغان گۈلسەنەمگە قاتتىق ئاچچىقى كەلگەن سادىق غۇدۇرلىدى:    -نىمە دەپ جاۋاب بەرسەڭ بەرمەمسەن. ئۆز ۋاقتىدا مەن بالىنى دوختۇر ئايالغا بىرەيلى دەپ بىر كىچە يىلىنسام ئۆزۈڭ بىلگەننى قىلدىڭ. ھىلىمۇ كۈنىمىز ئاران ئۆتىۋاتىدۇ. ئەتە-ئۆگۈن جەرىمانە دەپ قوپسا قانداق تۆلەيسەنكىن تاڭ.    -نىمە؟ سەن خىيالىڭدا جەرىمانىدىن قورقۇپ ئۆز پۇشتۇڭدىن بولغان بالىنى ياتقا بىرىۋەتمەكچىمۇ؟ ئەسلى مەقسىتىڭ شۇمىتى؟ ئىسىت سەن بىلەن ئۆتكەن 21 يىللىق گۈلدەك ھاياتىم.    -نىمە؟ ئەمدى پۇشايمان قىلىۋاتامسەن؟ ھىلىمۇ سىنىڭ بىشەملىكىڭنى كۆتۈرۈپ كەلدىم. مەندىن باشقا ئادەم بولغان بولسا ئاللىقاچان.....    سادىقنىڭ گىپىنىڭ ئاخىرىنى يۇتىۋىتىشى بىلەن گۈلسەنەم ئۆينى بىشىغا كەيدى.    -نىمە؟ دىمەمسەن؟ ئاللىقاچان خىتىمنى بىرىۋەتكەن بولاتتى شۇنداقمۇ؟ سەن بۇزۇقنىڭ دوختۇر ئايالنى كۆرگەندىن كىيىن ئۆزگىرىپ كەتكىنىڭنى مىنى  بىلمەيدۇ دىمە.    چاڭ.....    تۇيۇقسىز تەگكەن بىر تەستەكتىن كۆزىدىن ئوت چىقىپ، كۆز ئالدى قاراڭغۇلىشىپ كەتكەن گۈلسەنەم ئاۋازىنى بولۇشىغا قويىۋىتىپ يىغلاشقا باشلىدى. مۇستاپامۇ چىرقىراپ يىغلاپ كەتتى. ياندىكى ئۆيدە ھەممىنى ئاڭلاپ ياتقان ماھىرە، ئوتتۇرا ئۆيدە ئانىسىنىڭ يىغا ئاۋازىدىن ئويغىنىپ كەتكەن مىرادىل بىلەن مۇراتلار چاپىنىنى يىپىنچاقلاشقىنىچە دادىسى ئانىسى ياتقان ئۆيگە يۈگۈرۈپ كىرىشتى.    -دادا،ئانا، نىمە بولۇشتۇڭلار بۇ يىرىم كىچىدە.....ئادەمنى ئۇخلاتماي......    مۇراتنىڭ تۈرۈلگەن قاپىقىنى كۆرگەن ماھىرە ئۇنى گەپ قىلماسلىققا ئۈندەپ ئىشارەت قىلغاندىن كىيىن دەرھال كىلىپ قىرقىراپ يىغلاۋاتقان مۇستاپانى قولىغا ئىلىپ بەزلەشكە باشلىدى. بالىلارنىڭ كىرىشى بىلەن سادىق چاپىنىنى كىيىپ ئۆيدىن چىقىپ كەتتى.    كىچىچە تۈزۈك كىرپىك قاقماي يىغلاپ چىققان گۈلسەنەم ئەتىسى ئەتتىگەندە بالىلارنى ئىلىپ ئانىسىنىڭ ئۆيىگە كەتتى. ئەزەلدىن سادىقتىن تىرىقچىلىك خاپا بولۇپ قالسا يامانلاپ كىتىدىغان گۈلسەنەم كىچىدىن بولغان تۈگمىچىلىك ئىشنى ئانىسىغا كۆپتۈرۈپ سۆزلەپ بەردى.    -ئاجىرشىمەن ئۇنداق ناكەس ئەردىن. ھىلىمۇ 21 يىلدىن بىرى ئوتىدا كۆيۈپ، سۈيىدە ئىقىپ، چىچىمنى سۈپۈرگە قىلىپ ئۆيىنى تۇتۇپ كەلدىم. ماڭا بىرەر قۇر چىرايلىق كىيىم قىلىپ بىرىپ باقتىمۇ. كۆڭلۈم تارتقان تاماقلارنى ئەكىلىپ بىرەلىدىمۇ؟ مانا تۇغۇپ ياتقىلىمۇ 15-16 كۈن بولۇپ قالدى. ‹‹ خوتۇن، كۆڭلۈڭ نېمىنى تارتىدۇ؟ ›› دەپ سوراپمۇ قويمىدى. ھىلىمۇ ياخشى ماھىرەنى بىقىپ چوڭ قىلىپ مۇشۇ ياشقا كىرگۈزۈپ قويۇپتىكەنمەن. بولمىسا نىمە كۈنلەرنى كۆرەر ئىدىم؟    گۈلسەنەمنىڭ ھۈ تارتىپ يىغلىشى بىلەن ئاشۇ ئۆيدە بىقىلىۋاتقان مەدىنەم، مىنەۋەر، مۇكەرەم، مۇجاھىدلار يىغلاشقان پىتى كىلىپ ئانىسىنىڭ پۇتىنى قۇچاقلىدى. ئۆي ئىچىدە خۇددى ھازا ئىچىۋاتقاندەك بىر ھازاغىچە يىغا ئاۋازى ئۈزۈلمىدى.    سوتچىنىڭ ئالدىدا تۇرغان جاۋابكاردەك بىشىنى ئىگىپ، تىرنىقى بىلەن كۆرپىنىڭ گۈللىرىنى سىزىپ ئولتۇرغان سادىق قىيىنئانىسىنىڭ ئىشىكتىن كىرىپلا گىلىنى قىرىشى بىلەن بىشىنى كۆتۈردىيۇ، ئۇنىڭ مۇزدەك سوغۇق ئۇچقۇنلار چاقناپ تۇرغان كۆزلىرىگە قايتا قاراشقا پىتىنالماي يەنە بىشىنى تۆۋەن سىلىۋالدى.    -سىلەر توي قىلغىلى يىگىرمە نەچچە يىل بولدى. ماۋۇ ماھىرەمۇ 20 ياشقا كىرىپ قالدى. كۈيئوغۇل كۆرگىدەك بولغان ۋاقىتتا سىلەرگە يەنە ئۇرۇشۇپ نىمە كەپتۇ؟ بالىلارنىڭ ئالدىدا خىجىل بولمامسىلەر. مەنمۇ قىرىپ كەتتىم، بىر پۇتۇم گۆرگە ساڭگىلىدى. ھىچ بولمىسا مىنى بولسىمۇ ئارامىمدا ياشىغىلى قويساڭلار بولمامدۇ. قېرىغاندىمۇ ئۇرۇشۇپ سەتلىشىپ يۈرىدىكەنسىلەر.....    تۇنسەخان ئاچا يەنە بىر مۇنچە سۆزلەپ ئىچ-قارنىنى بوشىتىۋالغاندىن كىيىن، گەپ قىلماي بىشىنى سىلىپ ئولتۇرغان سادىققا ئالىيىپ قاراپ قويۇپ ‹‹ ئىككىڭلار دىيىشىدىغاننى دىيىشىۋىلىڭلار ›› دىگەندەك قىلىپ ئىشىكنى ھىم يىپىپ قويۇپ چىقىپ كەتتى.    سائەت ئىستىرىلكىسى بىر خىل رىتىمدا چىكىلداپ مىڭىۋاتاتتى. سۈكۈت، قىيداش، ئالىيىپ قاراشلار جىنىغا پاتقان سادىق ئاخىرى بولماي ئۆزى ئىغىز ئاچتى.    -قارا گۈلسەنەم، قىيىنئانامنىڭ ئىيىتقانلىرىمۇ توغرا. ئەمدى بولغاندا ئۇرۇشماي ئۆتەيلى. بالىلار چوڭ بولۇپ قالغاندا سەت تۇرىدىكەن.    -سەت تۇرۇشنى بىلگەن ئادەم مىنى تىللىمايدىغان .    مۇستاپانىڭ بىشىنى سىلاش ئۈچۈن قولىنى سوزغان سادىقنىڭ قولىنى زەرب بىلەن ئىتتىرىۋەتكەن گۈلسەنەم سادىققا تەتۈر قاراپ ئولتۇرىۋلدى.    -مىنىڭ دىگەنلىرىم يالغانمۇ؟ 21 يىلدىن بىرى خەقتىن ئالالمىغان ئاچچىقىڭنى مەندىن ئىلىپ بولۇشىغا دۇمبالىدىڭ. سىرتتا ھەممە كىشى سىنى ياخشى، ئاچچىقى يوق، ياۋاش-يۇمشاق دەپ تەرىپلىشىدۇ. ئەمما سەن ئۆيگە كىرسەڭ ياۋۇز چىلبۆرىنىڭ ئۆزىلا  بولىسەن. ئەمدى بۇ ياشقا كەلگەندە كۆتۈرگۈچىلىكىم قالمىدى.    -گۈلسەنەم، ئۇنداق تەتۈرلۈك قىلمىغىن. سىنى  ئۇرغان ۋاقىتلىرىمدا تۇرمۇشنى ئانچە چۈشەنمەيتتىم. ياش ئىدۇق، بەڭۋاش ئىدۇق. ئەمدى يىشىمىزمۇ بىر يەرگە باردى. نەچچە يىلدىن بىرى سىنى كۆز قارىچۇقۇمنى ئاسرىغاندەك ئاسراپ كىلىۋاتىمەنغۇ. ئۇنداق تەتۈرلۈك قىلما بولامدۇ.    -ھەئە، مەن تەتۈرلۈك قىلغان بولسام، ئاۋۇ تەتۈرلۈك قىلمايدىغان دوختۇر خىنىمىڭنى ئۆيۈڭگە ئەكىلىۋال.    -ئەمدى بولدى قىلساڭ بولامدىكىن. مىنىڭ ئۇ خوتۇن بىلەن قىلچە ئىشىم يوق. قارىسىغا گەپ قىلىۋەرمە. مۇشۇ يىشىم بىلەن ساڭا يىلىنىۋاتىمەن. بولدى قىلغىن، ئاناڭنىمۇ ئارامىدا قويايلى. ماقۇل دە، بۈگۈن قايتىپ كىتەيلى بولامدۇ؟    -ئىشىم يوق دىسەڭلا ئىش تۈگەمدۇ؟    گۈلسەنەم يوغان كۆزلىرىنى ئالايتىپ تۇرۇپ يەۋەتكۈدەك ئەلپازدا سادىققا قارىدى.    -ئەجىبا نەچچە كۈندىن بىرى مۇستاپانى شۇ خوتۇنغا بىرەيلى دەپ چىڭ تۇرىۋالمىدىڭمۇ؟ ئەمدىلىكتە بولغاندا ئىشىم يوق دەيسەن. سىنىڭ بىر مەقسەت-مۇددىئايىڭ بارلىقىنى كىم بىلمەيدۇ؟    سادىقنىڭ كۆزلىرى يوغىناپ بۇرۇن تۆشۈكلىرى كىڭەيدى. ئۇخلىسا چۈشىگىمۇ كىرمەيدىغان ئىشلارنى گۈلسەنەم خۇددىي ئەمەلىيەتتە بولىۋاتقان راست ئىشتەكلا سۆزلەۋاتاتتى.    -سەن ئالجىپسەن گۈلسەنەم. مەن نىمە ئويدا، سەن نىمە كويدا ھازىر؟    -توغرا مەن ئالجىدىم. نەچچە يىلدىن بىرىقى ئىشلارنىغۇ قويۇپ تۇرايلى. مەن تۇغۇپ ياتقان مۇشۇ 20 كۈندىن بۇيان بىرەر قىتىم مىنىڭ كۆڭلۈم تارتقان تاماقلارنى ئەتكۈزۈپ بىرەلىدىڭمۇ؟ ساقىيىپ ئورنۇمدىن تۇرسام ھەقىچان ھەر قىتىمقىدەك بىر قۇر ئەرزان كىيىم بىلەنلا ھەممىنى تۈگىتىسەن. خەقنىڭ ئاياللىرىدەك ئالتۇن بىلەيزۈك، ئالتۇن ھالقىلارغو 10 تاغنىڭ ئۇ قىتىدا.    گۈلسەنەمنىڭ ئاخىرقى گەپلىرى ئەرلىك غۇرۇرىغا قاتتىق تەگكەن سادىق ئاچچىقىنى ئىچىگە يۇتۇپ، پۈكۈلۈپ كىتىۋاتقان پۇتلىرىنى سۆرەپ ئىشىكتىن چىقىپ كەتتى.    ئارىدىن ساق بىر ئاي ئۆتكەندە 14 گراملىق ئالتۇن بىلەيزۈك كۆتۈرۈپ كەلگەن سادىق يەنە بىر مۇنچە يالۋۇرۇپ، بۇنىڭدىن كىيىن تىللىماسلىققا قەسەم ئىچىپ گۈلسەنەمنى ئۆيىگە قايتۇرۇپ ئىلىپ كەتتى. داۋامى يىزىلىۋاتىدۇ......

pikAso

	ياخشى يېزىپ سىز ئـــــــــــــــــــــــــــــــــــــــــــــاخىرىنى پاتراق يوللاسىز

nazila998

	ھىكايىڭىز ياخشى يىزىلىۋىتىپتۇ  ، داۋامىنى تىزرەك يازارسىز مۇكاپاتلىق پالىيەتتە نەتىجىگ ئىرشىشىڭىزگە تىلەكداشمەن

yurkimzida

	14گىراملىق ئالتۇن بىلەيزۈك  دەڭ؟

nazpari

	(3)    زاۋۇتنىڭ تىمىغا چاپلاپلا سىلىنغان بىر قاتاردۇكانلار سودىسىنىڭ ياخشىلىقى، خىرىدارنىڭ كۆپلىكى، ھۆنەرۋەن ئۇستاملارنىڭدۇكانلىرىدىن ياڭراۋاتقان ھەرخىل ناخشا ئاۋازلىرى بىلەن ئاۋات ئىدى. سادىقگۈلسەنەمنىڭ پىلانى بويىچە زاۋۇت باشلىقلىرىغا ئەھۋال ئىيتىپ يول مىڭىپ يۈرۈپ4-دۇكاننى 3 يىللىق توختام بىلەن ئىجارىگە ئالدى. دۇكان ئىچى كىچىك، كۆرۈمسىزبولسىمۇ، كۈندە بىر نەچچە كىشى سادىقنى ئىزدەپ دۇكاننى ئىجارىگە بىرىشنى ئىيتىپ ئۆتۈنۈشەتتى. سادىقمۇ ھەربىر ئادەمنى ئۆز يولىدا چىرايلىق گەپ قىلىپ يولغا سالاتتى. مۇشۇ كۈنلەردە سادىققا كىچىلىك ئىسمىنا نۆۋىتى كەلسە، بىر ئامال قىلىپ كۈندۈزگە ئالماشتۇراتتى. ناۋادا باشقىلارئالماشتۇرۇشقا ئۇنىماي تۇرىۋالسا بىر كىچىلىك ئىسمىنا ئۈچۈن 30 يۈەن بىرىدىغانلىقىنى ئىيتىپ ئىندەككە كەلتۈرەتتى. 30 يۈەنگە ئىككى كۈن جان باقالايدىغانلىقىغا كۆزى يىتىدىغان كىشلەر پۇل ئۈچۈن ئامالسىز ئالمىشىشقا مەجبۇر بولاتتى. ‹‹ ئايالىم تۇغۇتتىن كىيىن بەكلا ئاجىزلاپ كەتتى. كىچىدە يىنىدا بولمىسام قورقۇپ قالىدۇ ›› دەيتتى ئۇ بىر ئامال قىلىپ يالغان گىپىگە باشقىلارنى ئىشەندۈرۈشكە تىرىشىپ. كۈنلەر شۇ تەرىقىدە ئۆتۈشكە باشلىدى. سادىق ئىجارىگە ئالغان دۇكان ھىلىھەم قۇپقۇرۇق بولۇپ ئۇ دۇكاننى ياكى سادىق ئۆزى ئاچمىدى ياكى باشقىلارغا ئىجارىگە بەرمىدى. لىكىن ئەتراپتىكى قۇلۇم-قوشنىلار ھەپتىدە بىرەر قىتىم كەچ  ۋاقىتلىرى، سادىقنىڭ قولتۇقىغا چوڭ سامان تاغىرى قىستۇرۇپ دۇكاننىڭ ئىچىگە كىرىپ كىتىدىغانلىقىنى، سىرتتىن بىرەر كىشىگە ئىشىككە قۇلۇپ سىلىۋىتىشنى يىلىنىدىغانلىقىنى كۆرەتتى، ئەمما پەرۋا قىلماي ئۆز ئىشلىرى بىلەن مەشغۇل بولىۋىرەتتى.    ياز ئۆتۈپ كۈز كەلدى، كۈزمۇ ئۆز نۆۋىتىدە دەل-دەرەخلەرنىڭ خازانلىرىنى سارغايتىپ، سوغۇق ھاۋانى باشلاپ قويۇپ قىش پەسلىگە ئورۇن بوشاتتى. دىكابىرنىڭ ئاخىرلىرىدا يىتىپ كەلگەن قۇربان ھىيىت سادىق ئائىلىسىدىكىلەرنى خۇشاللىققا چۆمدۈردى.    ھىيىت نامىزىدىن قايتىپ كىلىپ قوي سويدۇرۇش ئۈچۈن قاسساپ تىپىپ كەلگەن سادىق ئايالى گۈلسەنەمنىڭ توزدەك ياسانغان ھالدا سادىقنىڭ قايتىپ كىلىشىنى كۈتۈپ ئولتۇرغانلىقىنى كۆرۈپ ئوغىسى قاينىدى.   -نىمە قىلغىنىڭ بۇ خوتۇن؟ مەن ھازىر قاسساپنى باشلاپ كەلدىم. ھىچ بولمىسا مەن كىلىپ بولغۇچە سۇيۇق-سەلەڭ تاماق ئىتىپ تۇرساڭ بولماسمىدى.   -قاچانلا قارىسا يەيدىغان-ئىچىدىغاننىڭلا گىپىنى قىلىدىكەنسىز. ئاۋۇ مىھمانخانا ئۆيگە قۇرۇق-ھۆل يەل-يىمىشلەرنى ئەكىرىپ چىرايلىق تىزىپ قويدۇم. نان-پان، قەنت-گىزەكلەرمۇ بار. شۇ ئۆيگە باشلاڭ. كۆڭلى تارتقىنىغا ئىغىز تەگسۇن.   گۈلسەنەم ھىچ ئىش بولمىغاندەك، تىخى 10 كۈن ئالدىدا ئىككى سىڭلىسى بىلەن بازارغا بىرىپ تاللاپ يۈرۈپ سىتىۋالغان چوڭ ياقۇت كۆزلۈك ھالقىسىنى، سائەت نۇسقىسىدا بۇيرۇپ ياساتقۇزغان زەنجىر بىلەيزۈكىنى، ئىككى قولىنىڭ 6 بارمىقىغا قوشلاپ سالسا يەتكۈدەك ئالتۇن ئۈزۈكلىرىنى تاقاش بىلەن ئاۋارە ئىدى. سادىق دىمىغىنى قاققىنىچە ئۆيدىن چىقىپ كەتتى. 7 بالىسىنى باشتىن-ئاياغ يىڭى كىيىم بىلەن جابدۇغان گۈلسەنەم شۇ ۋاقىتنىڭ ئۆزىدىلا كىچىك ئوغلى مۇستاپانى ئەسلەپ قالدى. ‹‹ ئۆز ۋاقتىدا دوختۇر ئايالغا بەرگەن بولسام، مانا مۇشۇنداق ھىيىت-ئايەم، بايراملاردا قىشىمغا ئەكىلىۋالاتتىم. قاچان كۆرىمەن دىسەم كۆرەلەيتتىم. مانائەمدى.......›› گۈلسەنەمنىڭ خىياللىرى ئوماق قىزى مىنەۋەرنىڭ چۈچۈك ئاۋازى بىلەن ئۈزۈلدى.   -ئانا، دادام سىزنى چاققانراق چىقسۇن دەيدۇ. خان ئانامنىڭ ئۆيىگە بارىدىكەنمىز.    -ھە مانا قىزىم، مانا ھازىرلا.......   گۈلسەنەم نوركا پەلتورىنى كىيىپ، ئوتقاشتەك قىپقىزىل سومكىسىنى ئىسىپ ئۆيدىن چىقتى. گەرچە ئانىسىنىڭ ئۆيى بىلەن ئۇلارنىڭ ئۆيى پەقەت 10 مىنۇتلۇقلا يول بولسىمۇ، لىكىن گۈلسەنەم تاكسى توسۇپ بارىمىز دىگەن پىكىردە چىڭ تۇرغاچقا، سادىق ئامالسىزلىقتىن تاكسى توسۇشقا مەجبۇر بولدى.‹‹ھەي......ئۇنىڭغا بولغان كۆڭلۈمنى دىمىگەندىمۇ 8 بالىنىڭ ئانىسى. ئەمدى ئېغىرلىق قىلاي. ئۆتكەنكىدەك يامانلاپ كەتسە، مۇشۇ يىشىمدا يالۋۇرۇپ يۈرسەم ياخشى بولماس. ئەڭ ياخشىسى ئۇ نىمە دىسە ماقۇل دىسەملا ئىش پۈتمىدىمۇ. كاۋاپمۇ كۆيمەيدىغان،زىخمۇ كۆيمەيدىغان ئەڭ ياخشى ئامال مۇشۇ شۇ ›› سادىق دەقىقە ئارىلىقىدا مۇشۇلارنى ئويلاپ ئۈلگۈردى ۋە ئايالى گۈلسەنەمگە قاراپ ھىجىيىپ قويدى.    قىزىل رەڭلىك چوڭ گۈللۈك شارپا، قىممەت باھالىق نوركا پەلتو، بۇيرۇپ سوقتۇرۇلغان، تاللاپ سىتىۋىلىنغان ئالتۇن جابدۇقلار ئىچىدىكى گۈلسەنەم گوياكى تاڭ سەھەردە پورەكلەپ ئىچىلغان خۇشپۇراق گۈلگىلا ئوخشاپ قالغانىدى. ھازىر ئۇنى باشقىلار كۆرسە 40 ياشقا كىرگەنلىكىگە ھەرگىز ئىشەنمەيتتى. ماشىنا ھەيدەۋاتقان ئابباس قارىماققا پۈتۈن زىھنى بىلەن ماشىنا ھەيدەۋاتقاندەك بىلىنسىمۇ، ئەمما ئۇنىڭ پۈتۈن ئەس-يادى گۈلسەنەمدىلا قالغان ئىدى. ئۇ بۇ يولنىڭ ئۇزۇنراق داۋام قىلىشىنى ئۈمىد قىلاتتى. لىكىن قىرىشقاندەك قىسقىغىنە ۋاقىت ئىچىدە ماشىنا ئۇلار دىگەن يەرگە كىلىپ توختىدى. ماشىنىدىن ئاۋايلاپ چۈشكەن گۈلسەنەم ئۆزىنى كۆرسەتكۈسى كەلگەندەك سومكىسىنى ئالدىرىماي ئىچىپ پورتمالى ئىچىدىن 5 يۈەنلىك پۇلدىن بىرنى ئىلىپ شوپۇرغا تەڭلىدى.   -رەھمەت ئۇستام، سىلىنى تولىمۇ ئاۋارە قىپتۇق.   -يا......ياقەي، ھىچقىسى يوق....   يىقىنلا يەردە ئۆزىگە پۇل تەڭلەپ تۇرغان گۈلسەنەمدىن كىلىۋاتقان خۇشبۇي پۇراق ئابباسنى مەست قىلىۋەتكەن بولسىمۇ، ئۇ دەرھال ئۆزىنى ئوڭشاپ گۈلسەنەمنىڭ قولىدىن پۇلنى ئالدى. لىكىن توساتتىن ئىككى قول بىر-بىرىگە تىگىشىپ كىتىپ ئابباستا توك سوقىۋەتكەندەك ئۆزگىچە بىر ھال شەكىللەندى.   -قارىسام ھىيىت پەتىسىگە كەلگەن ئوخشايسىلە.ناۋادا ماقۇل بولساڭلا قايتاشىڭلىدا مەن ئاپىرىپ قويساممۇ بولىدۇ.   -كۆپ رەھمەت ئۇستام. ئۆيىمىز ياغ زاۋۇتنىڭ ئائىللىكلەر قوروسىدا. قايتاشىمىزدا مىڭىپ كىتەرمىز.   گۈلسەنەم شوپۇرنىڭ كۆزىنىڭ ئىچىگە ئاجايىپ نازلىق بىر بىقىش بىلەن قارىغاندىن كىيىن مىڭىش ئۈچۈن تەمشەلدى.   -خىنىم توختاپ تۇرسىڭىز........   ئابباس ماشىنىنىڭ ئالدى تەرىپىگە قويۇپ قويۇلغان ئىسىم كارتۇچكىسىدىن بىرنى ئالدى،دە- ماشىنىدىن چۈشۈپ گۈلسەنەمگە يىقىن كىلىپ كارتىنى ئۇنىڭغا سۇندى.   -ناۋادا قايتاشىڭلاردا تاكسىغا ئولتۇرىدىغان بولۇپ قالساڭلا، تېلفۇن قىلىڭلا، شۇ ھامان مەن پەيدا بولىمەن. باشقا ھەر قانداق ۋاقىت، ھەرقانداق شارائىتتا تېلفۇن قىلساڭلارمۇ بولىۋىرىدۇ.   -بولىدۇ. سەن كىتىۋەرگىن يىگىت. ئىش بولسا تېلفۇن ئۇرىمىز.   سادىق شۇنداق دىگىنىچە گۈلسەنەمنىڭ قولىدىن تارتىپ كوچىغا كىرىپ كەتتى. لىكىن بايا گۈلسەنەمنىڭ شوپۇر يىگىتكە ئەركىلىشى ئۇنىڭ چىشىنى قىرىشتۇرۇپ قويغانىدى.    -دادا، ئانا، نىمانداق ئۇزاقتا كەلدىڭلار. بىز كىلىپ بولغىلى نەۋاخ.   مۇجاھىد تۇنسەخان ئاچىنىڭ قۇچىقىغا چىقىۋالغان بولۇپ چۇڭۇلداپ سۆزلەۋاتاتتى.   -مانا كەلدۇققۇ.....   دۇئا قىلىنىپ بولغاندىن كىيىن چوڭلار خىلى ئۇزۇنغىچە ئامان-ئىسەنلىك سوراشتى. بۇ يىلقى قۇربان ھىيىتنىڭ ئىنتايىن مولچىلىق پەسىلدە كەلگەنلىكىنى، بازاردىكى نەرسىلەرنىڭ باھاسىنىڭ مۇۋاپىق ئىكەنلىكىنى سۆزلىگەچ ئۇزۇن-ئۇزۇن ئولتۇرۇپ كىتىشتى. بىر ۋاقىتلاردا گۈلسەنەمنىڭ قول، بىلەك،بويۇنلىرىدىكى ئالتۇن جابدۇقلارغا كۆزى چۈشكەن تۇنسەخان ئاچا ھەيرانلىقىنى يوشۇرالمىدى.   -ۋوي، گۈلسەنەم بالام، قوللىرىڭغا سىلىۋالغان ئالتۇنلىرىڭ نىمانچە چوڭ. ئۆتكەندە ‹‹ دۇكان ئالدۇق. ئەمدى تىجارەتمۇ قىلىمىز ››دەۋاتاتتىڭلا. تىجارىتىڭلار بەك ياخشى ئوخشىمامدۇ ؟   تۇنسەخان ئاچىنىڭ چىشسىز ئىغىزىنى ماكىلدىتىپ تۇرۇپ سورىغان سۇئالى ئۇلارنىڭ قوللىرىنى تىترىتىپ قويدى. شۇنداقتىمۇ سۇئال سورالغان ئىكەن، جاۋاب بەرمەي بولمايتتى.    -ۋاي ئانا، ھەممىسى ساختا نەرسىلەر بۇ. چىرايلىق تۇرسۇن دەپ سىلىۋالدىم. بىزدە نەدىمۇ ئۇنچە كۆپ پۇل بولسۇن.   گۈلسەنەمنىڭ بەرگەن جاۋابى بىلەن سادىقنىڭ يۈرىكى ئورنىغا چۈشتى. ئۇ ئايالىنىڭ ئەقىل-پاراسىتىگە قايىل ئىدى. ھەر ۋاقىت ئەڭ ھالقىلىق پەيتتە گۈلسەنەم ئوتتۇرىغا چىقىپ سادىقنى تەڭلىكتىن قۇتۇلدۇرۇپ قالاتتى.   -باللىرىم، ئاۋۇ ئۆيگە كىرىپ تېلىۋۇزۇر كۆرۈڭلار. بىز يەنە بىردەم پاراڭلىشىمىز. سىلەر زىرىكىپ قالماڭلار يەنە.   بالىلارنىڭ ھەممىسىنى قىشلىق ئۆيگە قوغلاپ چىقارغان گۈلسەنەم ئانىسىنىڭ ئالدىدىلا سادىقتىن سورىدى.   -مۇستاپانى ھىيىت-ئايەمدە بولسىمۇ بىز بىلەن كۆرۈشتۈرسۇن. ئەتتىگەندە ئىسىمگە كىلىۋىلىپ يۈرىكىم پارە-پارە بولۇپ كەتتى. نىمىلا دىگەن بىلەن مىڭبىر جاپادا تۇغۇلغان بالا تۇرسا ئۇ .   -ھەراست، مۇستاپا بالام قانداق بولۇپ كەتتى؟ ئۆتكەندە بىرسىگە بىرىۋەتتۇق دىگەنتىڭلار. ماھىرە، مىرادىللاردىن سورىسام ‹‹ بىزئۇقمايمىز ›› دەپلا گەپنى تۈگەتتى.    تۇنسەخان ئاچىنىڭ پىشانىسىدىكى يول-يول قورۇقلار تېخىمۇ كۆپىيىپ كەتكەندەك ئىدى. ئۇ كۆز چاناقلىرىدىكى ياشنى ياغلىقىنىڭ ئۇچى بىلەن سۈرتكەندىن كىيىن، سادىققا ئۈمىدلىك نەزەردە قارىدى. موماينىڭ كۆڭلى يىرىم ئىدى. مۇستاپا دائىملا ئۇنىڭ كۆز ئالدىغا كىلىۋىلىپ ئۇنى بىئارام قىلاتتى. ئۇنىڭ يۈرىكى ئامبۇردا قىسىلغاندەك، نەپەس ئىلىشى قىيىنلاشقاندەك بولۇپ ئازابلىناتتى. مانا ئەمدى، ئالدىدا ئولتۇرغان مۇنۇ ئەر-خوتۇن ئىككىسى موماينى رازى قىلغۇدەك جاۋاب بىرەلەمدىكىن !   -مۇستاپانى بالا قىلىپ بىقىۋالغانلار ئۇنى ئۈرۈمچىگە ئىلىپ كىتىدىغانلىقىنى ئىيىتقان. مىنىڭمۇ ئۇنى بەك كۆرگۈم كەلدى. لىكىن مىڭ ئەپسۇس.....   سادىق بىشىنى چايقاپ ئەلەم بىلەن تام تەرەپكە قارىۋالدى. يالغان گەپ قىلغان گۇناھى ئۈچۈن ئاللاھتىن ئۆزىنى كەچۈرىۋىتىشىنى تەلەپ قىلدى. لىكىن ئۇمۇ مۇستاپانى قاتتىق سىغىنىپ كەتكەن ئىدى.   تۇنسەخان موماينىڭ ئۆيىدىن كەچلەپ قايتقان سادىق ئەر-خوتۇنلار، ماھىرە، مىرادىل، مۇراتلار يىگەن تامىقىنى سىڭدۈرۈش ئۈچۈن ئۆيىگە پىيادە قايتىشتى. يول بويى سۈكۈتتە ماڭغان گۈلسەنەم ئۆيگە كىرىپلا سىرىق قۇچقاچتەك سايراپ كەتتى.   -بۈگۈنكى شوپۇر يىگىت ھەجەپ قاملاشقان بالىكەن. گەپ-سۆزلىرى جايىدا، ئۆزى مۇلايىم، ئەدەپ-ئەخلاقلىق......   -ۋوي، نىمە بولدۇق؟ ئەجەپ كىچىك تىللىرىمىز چىقىپ قاپتىغۇ. نۇمۇس قىلماي مىنىڭ ئالدىمدا يات بىر ئەرنىڭ گىپىنى قىلىۋاتىسەنغۇ.    گۈلسەنەم شۇ ۋاقىتتا دەرھال ئۆزىگە كەلدى ۋە ئىرىنىڭ گىپىگە لايىقىدا جاۋاب قايتۇردى.   -نىمە بولدى؟ خەقنى ماختىسام ئاچچىقىڭىز كىلىۋاتامدۇ؟ مۇشۇ يىشىڭىزدا، مۇشۇ يىشىمدا مىنى كۈنلەۋاتامسىز؟ توۋا دەڭ جۇمۇ. سىز ئويلىمىغان بىلەن مەن قىزىمىز ماھىرەنىڭ تۇرمۇش ئىشىنى داۋاملىق ئويلاپ كۆزلىرىمدىن ئۇيقۇ قاچتى ھازىر. ئاۋۇ يىگىت ماھىرەگە بەك ماس كىلىدىكەن دەپ ئويلاپ شۇڭا تەرىپىنى قىلدىم. لىكىن سىز نىمىلەرنى ئويلاپ كەتتىڭىزكىن تاڭ !   سادىق ئويلانمايلا قىلغان گىپىدىن خىجىل بولدىمۇ قانداق، قىزىرىپ تاتىرىپ گۈلسەنەم سىلىپ بەرگەن ئورۇنغا موكلا چۈشۈپ ئۇيقۇغا كەتتى.    ‹‹ نىمانداق كىلىشكەن بالا ئۇ. كۆزۈمنىڭ ئىچىگە يەۋىتىدىغاندەك قاراپ كەتتى. قارىغاندا مەنمۇ ھىلىھەم سىن-سىپاتىمدىن كەتمىگەندەك قىلىمەن. ››   گۈلسەنەم ئۆزىنىڭ ئوي-خىيالىدىن ئۆزى رازى بولۇپ كىيىملىرىنى ئاستا يىشىپ، ئالتۇن جابدۇقلىرىنى ئىلىۋىتىپ، پەگاھتىكى چوڭ گىرىم ئۈستىلى ئالدىغا كىلىپ ئۆزىگە سەپسىلىشقا باشلىدى.   40 ياشتىن ئاشسىمۇ يەنىلا ياش قىزلارنى ئەسلىتىدىغان قاپقارا قۇندۇزدەك بىر ئۆرۈم چاچ، ئورغاق ئاينى ئەسلىتىدىغان ئەگىم قاشلار، بادام قاپاق ئاستىدىكى يوغان قوي كۆزلەر، ئىقىپ چۈشكەندەك قاڭشارلىق بۇرۇن، ئالۇچىدەك قىپقىزىل لەۋلەر......   گۈلسەنەم چىرايىدىن تولۇق مەمنۇن بولغان ھالدا ئۆزىگە سەپسىلىشنى يەنە داۋاملاشتۇردى.   تولغان چىڭ، بىر جۈپ ئالمىنى ئەسلىتىدىغان كۆكرەكلىرى، فگورا گۈزەللىكىنى نامايەن قىلىپ تۇرىدىغان يارىشىملىك ئۇستىخان شەكلى ئۇنى تولۇق رازى قىلغانىدى. گۈلسەنەم ئەينەك ئالدىدا ئۇزۇن تۇرۇپ كەتتى. ئۇ ئەينەكتىن شوپۇر يىگىتنىڭ قاپقارا كۆزلىرىنى كۆرگەندەك بولىۋاتاتتى. ئۆينىڭ تىمپىراتۇرىسى تۆۋەنلەپ ئۇنىڭ بەدىنى تىترەشكە باشلىغاندىلا ئاستا كەينىگە قايرىلىپ سىلىپ قويغان ئورۇنغا كىلىپ ياتتى.    ‹‹ ھە راست، بايا ئانام تاسلا قالدى ئالتۇنلىرىمنىڭ قەيەردىن كىلىشىنىڭ سىرىنى بىلىۋالغىلى. ناۋادا سادىقنىڭ ئىجارە ئالغان دۇكاننىڭ كەينى تىمىنى تىشىپ، زاۋۇتنىڭ كۆپ مىقداردىكى چىگىتلىرىنى ئوغۇرلاپ ساتقانلىقىنى، شۇ ئارقىلىق بىزنىڭ بىيىپ كەتكەنلىكىمىزنى ئۇقۇپ قالسا ئىشىمىز چاتاق.....ئانامغۇ ساختا دىسەم ئىشەندى. لىكىن خەقلەر چوقۇم گۇمانلىنىدۇ. شۇڭلاشقا بۇنىڭدىن كىيىن قاتتىق ئىھتىيات قىلسام بولغۇدەك ...››   گۈلسەنەم ئويلاپ مۇشۇ يەرگە كەلگەندە، سادىق بىر ئۆرۈلۈپلا گۈلسەنەمگە ئالدىنى قىلدى ۋە ئۇنىڭ يۇپيۇمىلاق مۈرىسىدىن قۇچاقلاپ ئۆزىگە تارتقىنىچە يەنە پۇشۇلداپ ئۇيقۇغا كەتتى. ئۇنىڭ قولىنى ئاۋايلاپ يانغا ئىلىپ قويغان گۈلسەنەم سادىققا كەينىنى قىلىپ ئۆرۈلۈپ ياتتى ۋە ھىلىقى قاپقارا قاشلىق تاكسى شوپۇرىنى ئويلىغىنىچە خىيالغا پىتىپ، ئۆزىنىڭ قاچانلاردا ئۇخلاپ قالغىنىنى سەزمەيلا قالدى. داۋامى يىزىلىۋاتىدۇ....

wenas

	داۋامىنى كۈتىۋاتىمەن.........................................

$叶子$

	قانداق خوتۇن بۇ قىز چىقارغۇدەك بولغاندىمۇ ياش يىگىتلەرگە كۆيۇپ يۇرگىنىنى، قېشىدا ئىرى تۇرسا باشقىلارنى ئويلاپ يۇرگىنى نىمىسى ئەمدى.ھەي..........