رەسىمسىز ھالەت
|
ئۇسلۇب ئالماشتۇرۇش
|
باش بەت
»
سىز تېخى كۇلۇبقا
كىرمەپسىز
تىزىملىتىش
|
تەۋسىيە
|
ئىزدەش
|
مۇلازىمەتلەر
|
بانكا
|
ياردەم
|
ULY
كۇلۇب مۇلازىمىتى
قورال مەركىزى
ئۇسلۇب ئالماشتۇرۇش
wind
wind5
قىسقا ئۇچۇر
خەت ساندۇقى
يوللاش ساندۇقى
ئۇچۇر ئىز قوغلاش
قىسقا ئۇچۇر يېزىش
كونترول تاختا
كونترول تاختا باش بېتى
ماتېرىيال تەھرىرلەش
ماتېرىيال كۆرۈش
دوستلار تىزىملىكى
ئەزا ھوقۇقىنى كۆرۈش
سودا تەڭگىسى باشقۇرۇش
جۇغلانما ئالماشتۇرۇش
ئالاھىدە گورۇپپا سېتىۋېلىش
ساقلىغۇچ
تېمىلىرىم
سىتاتسىتكا
ئاساسىي سىتاتسىتكا
IP سىتاتسىتكىسى
باشقۇرۇش قوشۇنى
باشقۇرۇش سىتاتسىتكىسى
توردىكىلەر سىتاتسىتكىسى
ئەزالار قاتارى
سەھىپە قاتارى
يازما قاتارى
ئورخۇن مۇنبىرى
»
شانلىق دەۋر
»
شېرزىمان ئوسمان ئوغلى توغرىسىدا
>> ئۇيغۇرلارنىڭ قەدىمقى زامان تارىخى
|- رىۋايەتلەردىكى تارىخ
|- ئوتتۇرا ئەسىردىكى ئۇيغۇرلار
|- شانلىق مەدەنىيەت دەۋرى
|- كېيىنكى ئوتتۇرا ئەسىردىكى ئۇيغۇرلار
>> ئۇيغۇرلارنىڭ يېقىنقى زامان تارىخى
|- خوجىلار دەۋرىدىكى ئۇيغۇرلار
|- داۋالغۇش ئىچىدىكى ئۇيغۇر جەمىيىتى
>> ئۇيغۇرلارنىڭ ھازىرقى زامان تارىخى
|- ياڭ زېڭشىن، جىن شۇرېن ۋە شېڭ شىسەي
|- ئۈچ ۋىلايەت ئىنقىلابى
|- شانلىق دەۋر
>> ئۇيغۇر مەدەنىيەت تارىخى
|- ئۇيغۇرلاردا دىن
|- ئۇيغۇرلاردا تىل - يېزىق
|- ئۆرپ - ئادەت
|- ھۈنەر - كەسپ
|- ئۇيغۇرلاردا مائارىپ
>> جاھاننامە
|- كونا - يېڭى كىتاپلار
|- دۇنيادىكى ئۇيغۇرشۇناسلار ۋە ئۇيغۇرشۇناسلىق تەتقىق
|- ئۇيغۇرلاردىكى مەشھۇر شەخسلەر
|- قېرىنداش مىللەتلەر
|- جۇڭگو تارىخى
|- دۇنيا تارىخى
>> ئۇنۋېرسال سەھىپە
|- تارىخى فىلىم
|- تارىخى ئاتالغۇلار
|- تاغدىن - باغدىن
|- يادىكارلىقلىرىمىز
|- يەر ــ جاي ناملىرىمىز
|- تەكلىپ - پىكىر
سودا
راي
بۇ بەتتىكى يازما :
شېرزىمان ئوسمان ئوغلى توغرىسىدا
بېسىپ چىقىرىش
|
بۇ تېمىنى ساقلىۋېلىش
|
تېما ئۇلانمىسىنى كۆچۈرىۋېلىش
|
تېما ساقلىۋېلىش
|
ئالدىنقى تېما
|
كېيىنكى تېما
niyazdixan
دەرىجىسى :
كۇلۇب باشلىقى
نادىر يازمىلار :
يوللىغان تېما :
شۆھرىتى:
0 نومۇر
پۇلى:
سوم
تۆھپىسى:
نومۇر
توردىكى ۋاقتى : 0(سائەت)
تىزىملاتقان ۋاقتى : 2007-01-22
ئاخىرقى كىرگىنى : 1970-01-01
كىچىك
نورمال
چوڭ
شېرزىمان ئوسمان ئوغلى توغرىسىدا
شېرزىمان ئوسمان ئوغلى توغرىسىدا
زەيناۋۇدۇن يۈسۈپ
« شىنجاڭ تارىخ ماتىرياللىرى » نىڭ 29 – سانىدا يولداش پاتىخان سۇگۇربايوۋ « ئوسمان زادى قانداق ئادەم » دېگەن ماقالىسىنى ئېلان قىلدى . ئوسماننىڭ ئەمەلىي ئىش – ھەرىكەتلىرى ، ھەر بىر نۇقتىلىق مەسىلىلەردە ۋە ھەل قىلغۇچ پەيتلەردىكى مەيدانى ، كۆز قارىشى ، ئەمەلىي ھەرىكىتى ھەمدە ئۇ ھەرىكەتلەرنىڭ ئاقىۋەت نەتىجىلىرى ئارقىلىق ئۇنىڭ ئومۇمىي ئەھۋالىنى بىرقەدەر تەپسىلى ، ئىزچىلراق بايان قىلىپ ، كەڭ كىتابخانلارنىڭ شۇنداقلا جامائەتچىلىكنىڭ بۇ نامى پۇر كەتكەن شەخسنىڭ ھەقىقىي ئەھۋالىنى توغرا تونۇشى ، چۈشىنىشى ئۈچۈن خېلى تولۇق ماتىرىيال بىلەن تەمىنلىدى .
يولداش پاتىخان سۇگۇربايوۋ ماقالىسىدا ئوسماننىڭ چوڭ ئوغلى ۋە 1951 – يىلنىڭ بېشىدا ئوسمان ئەسىرگە چۈشكەندىن كېيىنمۇ شىنجاڭغا قېچىپ كېلىپ داۋاملىق باندىتلىق قىلغان ھەمدە 1952 – يىلى 9 – ئايدا تەسلىم بولغاندىن كېيىن تاكى 1970 – يىلى 4 – ئايدا ۋاپات بولغىچە 18 يىل ئۆمۈر شېرزىمان( "شېرزىمان" ئەرەبچە "شىر مان" يەنى " " ھەرىپى بىلەن يېزىلىدۇ . بۇ " " ھەرىپى ئۇيغۇرچە "ز " ھەرپ تەلەپپۇزىغا مايىلراق بولغاچقا " شېرزىمان " دەپ ئوقۇش ۋە يېزىش كېرەك . شېرزىمان ئۆزىمۇ شۇنداق يازاتتى ۋە شۇنداق ئاتايتتى . ئەمما بەزىلەر " شېردىمان " دەپ خاتا ئاتاپ كەلمەكتە _ ئاپتور ) توغرىسىدا ناھايىتى قىسقىلا بايان قىلىپ « شېرزىمان ، نېغمەتۇللا ، نەبىلەر 1941 – يىلىدىن تارتىپ ئوسماننىڭ قېشىدا بىللە بولۇپ ، 1951 – يىلنىڭ بېشىدا ئوسمان گەنسۇنىڭ خەيزى دېگەن يېرىدە خەلق ئازادلىق ئارمىيەسى تەرىپىدىن قولغا چۈشكەندىن كېيىن شىنجاڭغا قېچىپ كېلىپ ، بۇرۇنقى ھەمراھلىرىنى توپلاپ ، ئالتاي ، بۇغدا تاغلىرى ئارىلىقىدا باندىتلىق بىلەن شۇغۇللىنىدۇ . 1952 – يىلى 9 – ئايدا پارتىيىنىڭ سىياسىي خىزمەت ئىشلىشى نەتىجىسىدە قورال تاپشۇرۇپ تەسلىم بولۇپ ، 1969 – يىلى تۈرمىدە ۋاپات بولىدۇ » دەپ يازدى .
شۇڭلاشقا ، شېرزىماننىڭ تەسلىم بولۇپ ئۆتكەندىن كېيىنكى ئەھۋالى توغرىسىدا بۇ ماقالىنى يېزىپ كىتابخانلارغا تونۇشتۇرۇشنى لايىق كۆردۈم .
دەرۋەقە شېرزىماننىڭ 1952 – يىلى 9 – ئايدا تەسلىم بولغىچە ئۆتكەن ھاياتى ، ئوي – پىكرى ، مەقسەت مۇددىئاسى ۋە قىلمىش ئەتمىشى ئاتىسى ئوسمان بىلەن ئوخشاش دېگۈدەك . ئوسماننىڭ پۈتۈن ئىش ھەرىكىتى شېرزىماننىڭ مەسلىھەتى ، ياردىمى ، پىلانلىشى بىلەن ئېلىپ بېرىلغان . شۇڭلاشقا ئاتىسى ئوسمان بىلەن ئوخشاش نامى چىققان شەخسدۇر .
لېكىن شېرزىماننىڭ ئاتىسى ئوسماندىن كەسكىن پەرقى شۇكى ، ئوسمان بولسا ، ئەكسىيەتچىلىك يولىدىن قايتماي خەلق بىلەن ، پارتىيە بىلەن ئاخىرىقى نەپسىگىچە قارشىلىشىپ كەلگەچكە ، جىنايى قىلمىشىغا يارىشا قانۇن تەرىپىدىن ئۆلۈم جازاسىغا تارتىلغان . شېرزىمان بولسا ئاخىرىقى ھېسابتا پارتىيە سىياسىتىنىڭ تەسىرى بىلەن ئويغۇنۇپ ، جىنايەت يولىدىن قايتىپ قورال تاپشۇرۇپ تەسلىم بولغان . خەلق تەرەپكە ئۆتۈپ ئۆزگىرىپ يېڭى ئادەم بولۇش يولىدا ماڭغان . ئۆزى پەرزەنتلىرىنىڭ ، شۇنداقلا ئوسمان ، شېرزىمانلار ئەگەشتۈرۈپ يۈرگەن نۇرغۇن كىشىلەرنىڭ تۇيۇق يولدىن قايتىپ ، خەلق قاتارىدىن ئورۇن ئېلىپ ، توغرا ھايات يولىغا مېڭىشىدا تېگىشلىك خىزمەت كۆرسەتكەن . شۇڭلاشقا شېرزىماننىڭ كېيىنكى ھاياتىنى ئۆز كۆزۈم بىلەن كۆرگەن ۋە بىۋاستە ئاڭلىغان ۋەقەلەر ئارقىلىق تۆۋەندىكىچە تونۇشتۇرۇپ ئۆتمەكچىمەن .
مەن 1963 – يىلى ئىلى ئوبلاستلىق سىياسىي كېڭەشكە خىزمەتكە يۆتكىلىپ كەلگەن چاغدا ، شېرزىمان سىياسىي كېڭەش ئىشخانىسنىڭ مۇئاۋىن مۇدىرى ئىكەن . شۇندىن باشلاپ مەن شېرزىمان بىلەن تۇنۇشتۇم ھەمدە ئۇنىڭ كېيىنكى ھاياتىغا مۇناسىۋەتلىك نۇرغۇن ئىشلارغا ھەغدا قاتناشتىم .
شېرزىمان ئوسماننىڭ چوڭ ئوغلى ، ئوتتۇرا بوي ، ئاق سېرىق ، شالاڭ ئىنچىكە بۇرۇتلۇق ، كۈچلۈك ، 90 كىلوگىرامدىن ئېغىرراق ، زېھنى ئۆتكۈر ، ئىرادىسى قاتتىق ، ئۆزىگە تەلەپچان ، سەزگۈر ۋە قورقۇشنى بىلمەيدىغان ئادەم ئېدى . كىتاب – ماتىرىياللاردىن تولۇق پايدىلىناتتى .
1950 – يىلنىڭ ئاخىرىدا گەنسۇنىڭ خەيزى دېگەن يېرىدە ئوسمان خەلق ئازادلىق ئارمىيەسى تەرىپىدىن ئەسىرگە ئېلىنغاندىن كېيىن ، شېرزىمان ئىنىلىرى نېغمەتۇللا ، نەبىلەر بىلەن شىنجاڭغا قېچىپ كېلىپ ، شېرىكلىرىنى توپلاپ ئالتاي ، بۇغدا تاغلىرى ئارىلىقىدا داۋاملىق باندىتلىق قىلىپ يۈرگەن . 1952 – يىلى 9 – ئايدا ۋەزىيەتنىڭ قىستىشى ، ئۆزىنىڭ ھەر جەھەتتىن مەدەتسىز قېلىشى ۋە بولۇپمۇ پارتىيە ۋەكىل ئەۋەتىپ سىياسەتنى قايتا – قايتا چۈشەندۈرىشى ئارقىسىدا قورال تاشلاپ تەسلىم بولغان . شۇ چاغدىكى سىياسەت بويىچە شېرزىماننىڭ ئۆتمۈش تارىخى سۈرۈشتۈرۇلمىگەن شېرزىمانغا ۋە ئۇنىڭ ئاساسلىق كىشىلىرىگە قانۇنىي جازا بېرىلمىگەن بەلكى ھەر قايسىسىنىڭ كونكېرت ئەھۋالىغا قاراپ مۇۋاپىق ئورۇنلاشتۇرۇلغان . شېرزىمان شىنجاڭ ئۆلكىلىك ھۆكۈمەت تەرىپىدىن 1954 – يىلى 6 – ئايدا ئالتاي ۋالى مەھكىمىسى دېھقانچىلىق – چارۋىچىلىق بۆلۈمىنىڭ مۇئاۋىن بۆلۈم باشلىق ۋەزىپىسىگە تەينلەنگەن .
شېرزىمان ئالتاي ۋالىي مەھكىمىسىدە ئىشلەپ يۈرگەن مەزگىللەردە ئۆگىنىش ۋە ئىجتىمائىي خىزمەتلەرگە قاتنىشىش ئارقىلىق بىرىنچىدىن پارتىيە رەھبەرلىكىنىڭ توغرىلىقى ،خەلق ئاممىسى ئۈچۈن نۇرغۇن ياخشى ئىشلارنى قىلىپ بېرىۋاتقانلىقىنى ، قازاق ئەمگەكچىلىرى پارتىيە رەھبەرلىكىدە كۈندىن – كۈنگە ياخشى تۇرمۇشقا ئېرىشىۋاتقانلىقىنى كۆرۈپ ئىدىيىۋى تونۇشىنى ئۆستۈرگەن بولسا ، يەنە بىر تەرەپتىن ئۆزى بىلەن ئالاقىسى بولغان كىشىلەرگىمۇ ئىجابىي تەسىر كۆرسىتىپ كەلگەن . 1958 – يىللىرى كۆكتوقايدا كۆتۈرۈلگەن توپىلاڭنى تىنجىتىشتا ، شېرزىمان مۇھىم رول ئوينىغانلىقى مەلۇم . يەنى ھۆكۈمەتنىڭ تاپشۇرۇقى بىلەن توپىلاڭچىلار ئارىسىغا ئۆزى بېرىپ ئۇلارنى قايتۇرۇپ كەلگەن .
ئالتاي رايونىنىڭ ۋەزىيىتىنىڭ مۇقىملىقىغا كاپالەتلىك قىلىش ۋە شېرزىماننىڭ داۋاملىق ئۆزگىرىپ ياخشى ئادەم بولۇشىغا ياخشى شارائىت يارىتىپ بېرىش مەقىسىتىدە 1960 – يىلى 10 – ئايدا شىنجاڭ ئۇيغۇر ئاپتونوم رايونلۇق خەلق ھۆكۈمىتى شېرزىماننى ئىلى ئوبلاستلىق سىياسىي كېڭەش ئىشخانىسىغا مۇئاۋىن مۇدىر قىلىپ يۆتكىدى . بۇ چاغدا شېرزىمان مەمۇرى ي 16 – دەرىجىلىك خادىم ئىدى ( شۇ چاغدا 136.25 يۈەن مائاش ئالاتتى . 1962 – يىلى 10 – ئايدا ئاپپاراتلارنى ئىخچاملاشتا ، ئوپكوم بىرلىكسەپ بۆلۈمىنىڭ تەستىقى بىلەن شېرزىماننىڭ شتاتلىق مائاشىنى بىرلىكسەپ كىشىلىرىنىڭ تۇرمۇش پۇلىغا ئۆزگەرتىۋەتكەن ، ئەمما بۇرۇنقى 136.25 يۈەن بويىچە بەرگەن ) شېرزىمان ئايالى ماپاش ، ئۆگەي ئانىسى دەمىلە ، قىزى مۇبىنا ئوغلى نۇسرەت ئاقاتلارنى ئېلىپ 60 – يىلى 10 – ئايدا ئالتايدىن غۇلجىغا كۆچۈپ كېلىپ ئوبلاستلىق سىياسىي كېڭەش ئورگىنى قورۇسىدىكى ئائىلىكلەر قورۇسىغا ئورۇنلاشقاندى .
شېرزىمان ئىلى ئوبلاستلىق سىياسىي كېڭەشكە خىزمەتكە كەلگەن مەزگىللەردە سىياسىي كېڭەش بىلەن سىياسىي مەكتەپتە تۇرۇپ ئىشلەيدىغان 30 – 40 چە كېڭەش ئەزاسى ۋە بىرلىك سەپ ئەزاسى بار ئىدى . شېرزىمان شۇ كىشىلەر بىلەن ئۆگىنىش ، ئەمگەك ۋە باشقا پائالىيەتلەردە ھەر دائىم بىللە بولاتتى . ھەپتىدە بىر كۈن ئۆتكۈزىلىدىغان ئۆگىنىشلەرگە قاتنىشىپ ھۆججەت ، ماتىرىياللارنى ئۆگىنەتتى . يىغىن ۋە باشقا پائالىيەتلەرگە قاتنىشىپ تۇراتتى . 60 – يىللاردا دۇچ كەلگەن ئىقتىسادىي قىيىنچىلىق شارائىتىدا ، باشقىلار بىلەن بىرلىكتە جاپاغا چىداپ ، ئاددى – ساددى تۇرمۇش كۆچۈرۈپ قىيىنچىلىقلارنى يېڭىپ ئۆتكەندى .
شېرزىماننىڭ ئائىلىۋى خۇسۇسى مال – مۈلكىمۇ يوق دېيەرلىك ئىدى . تۈزۈكرەك ئۆي – جاھازلىرىمۇ ۋە باشقا پۇللۇق بۇيۇملىرىمۇ يوق ناھايىتى ئاددىي ئائىلە ئىدى . شېرزىماننىڭ ئۆيىگە كىرسىڭىز ( مەن بىرقانچە قېتىم كىرگەندىم ) ئالاھىدە كۆزگە چېلىققىدۇدەك بىردىن بىر نەرسە – شېرزىمان ئاستىغا سېلىپ ئولتۇرىدىغان بىر دانە قوڭۇر ئېيىقنىڭ تېرىسى بار ئىدى .
ئىسيانچىلار شېرزىماننى تۈرمىگە تاشلاپ بەرگەندىن كېيىن ئۆيىنى ئاقتۇرغاندا قولغا چىققۇدەك ھېچنەرسە تاپالماي ، ماپاشنىڭ ياش ۋاقتىدا كىيگەن بىر دانە كىيمەچەك ( چۆرىسىگە ئالتۇن سۈيى يالىتىلغان كۈمۈچ تەڭگە تاقالغان قازاق ئاياللىرىنىڭ باش كىيىمى ) شېرزىماننىڭ « رومېر » ماركىلىق قول سائىتىنى ئېلىپ چىققاندى .
1960 – 1965 – يىللاردا بىرلىكسەپ ساھەسىدىكى كىشىلەر ئارىسىدا ئىدىيە ئۆزگىرىش چىڭ تۇتۇلغان ، سىياسىي ھەرىكەتلەر ۋە سىياسىي ئۆگىنىشلەر ئۈزۈلمەي داۋاملىىشىپ تۇرغان مەزگىل ئىدى . ئىلى ئوبلاستلىق سىياسىي مەكتەپ قۇرۇلۇپ ئالتاي ، تارباغاتاي بورتالا ۋە ئىلى ۋىلايىتىدىكى ھەر مىللەت ھەر ساھە بىرلىكسەپ كىشىلىرى نۆۋەت بىلەن تەربىيىلىنەتتى ، ھەر نۆۋىتى ئاز بولسا بەش ئاي ، بەزى نۆۋەتلىرى بىر يىل داۋام قىلغاندى . ئادەم سانى ئاز بولغاندا 1000 كىشى ، 8 - ، 9 – قارارلىرىدا 200 – 300 كىشى يېتىپ ئوقۇغاندى . ئۇندىن باشقا سىياسىي كېڭەشتە ھەپتىدە بىر كۈن مۇقىم ئۆگىنىش بولۇپ ، بۇنىڭغا غۇلجا شەھىرىدە تۇرۇشلۇق كېڭەش ئەزالىرى بىلەن سىياسىي كېڭەشتە تۇرۇشلۇق كېڭەش ئەزالىرى تولۇق قاتنىشاتتى . شېرزىمان مۇشۇ ئۆگىنىش ۋە كۇرسلارغا دائىم ئاكتىپ قاتنىشىپ ، ئۆزىنىڭ جانلىق ئىدىيىسىگە تەدبىقلەپ ئاكتىپ پىكىر بايان قىلاتتى . قورقۇش ، گۇمان ، ئەندىشىدە بولۇش ( ئۇ چاغدا بىرلىكسەپ ساھەسىدىكى خېلى كۆپ كىشىلەر ئۆز ئىستىقبالىنىڭ قانداق بولۇشىدىن ئەنسىرەيتتى ) ئەمەس ، بەلكى : « مەن بارلىقىمنى پارتىيىگە تاپشۇردۇم ، پارتىيە ئېيتقان سۆزنى قەتئىي ئاڭلاپ ، پارتىيە بۇيرۇغان ئىشنى ئشىلەپ ، ئۆزگىرىپ يېڭى ئادەم بولۇش يولىغا تەۋرەنمەي ماڭىمەن . بۇ بىردىن بىر توغرا يول . ئۆز ئىستىقبالىمنى تاپىدىغان ، خەلىققە سوتىسيالىزىمغا پايدىلىق ئىش قىلىدىغان يول ، پارتىيە بىزگە ئىشىنىپ يېڭى ئادەم بولۇشقا پۇرسەت بېرىۋاتسا ، بىزنىڭ گۇمان – ئەندىشە قىلىشىمىز ، بۇ سىياسىي جەھەتتىكى نادانلىقتىن باشقا نەرسە ئەمەس » دەپ زور ئىشەنچ بىلەن پىكىر بايان قىلاتتى ۋە ئۆگىنىشكە قاتناشقانلارغا زور تەسىر كۆرسىتەتتى . شۇڭلاشقا ، شېرزىماننىڭ ئەمەلىي ئىپادىلىرىگە قاراپ ، شۇ چاغدىكى ئىلى ئوبلاستلىق پارتىكوم بىرلىكسەپ بۆلۈمىنىڭ باشلىقى چېن شىخۇا ئۆگىنىش يىغىنىدا : « شېرزىماننىڭ ئۆگىنىش ، ئۆزىنى ئۆزگەرتىش پوزىتسىيەسى توغرا ، سىياسىي ، نەزەرىيە ۋە پارتىيە سىياسەتلىرىنى ئۆگىنىش ، ئىدىيە ئۆزگەرتىش جەھەتلەردە كۆرۈنەرلىك ئالغا باستى ... » دەپ بىر قانچە قېتىم ئالاھىدە كۆرسەتكەندى ( بۇ كۇرس ، ئۆگىنىش ۋە يىغىنلارنىڭ ھەممىسىگە مەن بىۋاستە قاتنىشاتتىم ) .
يەنە بىر مىسال ، ئالتايدىن بولۇپمۇ چىڭگىل ، كۆكتوقاي ، بۇرۇلتوقاي ناھىيەلىرىدىن كۇرسقا كەلگەنلەر ئىچىدە شېرزىماننىڭ قەبىلىداشلىرى ، شېرزىمان ، ئوسمانلار بىلەن بارىكۆل ، گەنسۇ ، چىڭخەيلەرگىچە بېرىپ شېرزىمان تەسلىم بولغاندىن كېيىن يۇرتىغا قايتىپ كەلگەنلەر بولۇپ ، سىياسىي ھەرىكەتلەرنىڭ چوڭقۇرلىشىشىغا ئەگىشىپ ، ئۆز ئىستىقبالىغا گۇمان بىلەن قارايدىغانلار بار ئىدى . شۇڭلاشقا ئۇلار سىياسىي مەكتەپكە كېلىشى بىلەن شېرزىماننى يوقلاپ ئۆيىگە باراتتى . ئىشخانىسىغا كىرىپ سۆزلىشەتتى . شېرزىمان بۇ كىشىلەرگە ئۆزىنىڭ توغرا تونۇشى ، ھازىرقى ئەھۋالى قاتارلىق جانلىق پاكىتلار ئارقىلىق ، پارتىيە سۆزىنى ئاڭلاپ ، پارتىيە كۆرسەتكەن يولدا ماڭسىلا توغرا ئىستىقبالغا ئىگە بولىدىغانلىقىنى چۈشەندۈرۈپ تۇرغان . شېرزىماندىكى بۇ زور ئىدىيىۋى بۇرۇلۇش بۇ كىشىلەرگە ناھايىتى زور ئىجابىي تەسىر كۆرسەتكەنىدى . چىڭگىل ، كۆكتوقايلىق ئەشۇ كىشىلەردىن بىرقانچىسى بۇ ھەقتە ماڭا سۆزلەپ بەرگەنىدى . شېرزىمان كۆپ قېتىملىق ئۆگىنىش يىغىنلىرىدا : « كومپارتىيەنىڭ كېسەلنى داۋالاپ ئادەمنى قۇتقۇزۇش سىياسىتى بەكمۇ ئۇلۇغ سىياسەت ئىكەن ، خاتا يولدىن قايتىپ توغرا يولغا ماڭساڭ ، پارتىيە ھەقىقەتەن قارشى ئېلىپ ياردەم قولىنى سۇنىدىكەن . مېنىڭ ئەھۋالىم بۇنىڭ جانلىق مىسالىدۇر » دەپ ئۆز ھېسياتلىرىنى سۆزلەيتتى . يىغىپ ئېيتقاندا شېرزىماننىڭ شۇ چاغدىكى ئەمەلىي سۆز – ھەرىكەتلىرىدىن ، ئۇنىڭ ئۆتمۇشىگە تۆۋە قىلىپ ، تەقدىردىن ئەندىشە قىلماي ، ئۈزۈل – كېسىل ئۆزگىرىپ ياخشى ئادەم بولۇش يولىغا قاراپ ماڭغانلىقىنى كۆرگىلى بولاتتى .
شېرزىماندەك ئەكسىيەتچىلىك پاتقىقىغا پېتىپ كەتكەن ، زور جىنايەت ئۆتكۈزگەن شەخسكە قارىتا « قولغا كەلتۈرۈش ، ئىتتىپاقلىشىش ، ئۆزگەرتىش » سىياسىتىنى قوللىنىپ ، بىرنەچچە يىل تەربىيىلەش ئارقىسىدا ، يۇقۇرىدا ئېيتىپ ئۆتكىنىزدەك زور ئۆزگىرىش ھاسىل قىلغانلىقىغا قاراپ ، بىرلىكسەپ سىياسىتىنىڭ قۇدرەتلىك كۈچىنى چوڭقۇر ھېس قىلغانىدىم . يۇقۇرقىلار مەن 1963 – يىلدىن باشلاپ شېرزىمان بىلەن بىر ئورگاندا بىللە ئىشلەش جەريانىدا ئۆز كۆزۈم بىلەن كۆرگەن ۋە ئاڭلىغان ئەمەلىي پاكىتلاردۇر .
شېرزىماننىڭ تۈرمىگە كىرىشى
1966 – يىلى 5 – ئايدا « مەدەنىيەت زور ئىنقىلابى » باشلاندى . قىسقىغىنە ۋاقىت ئىچىدە ھەرقايسى ئورۇنلاردا « ئىسيانچىلار » ۋە « ئىسيانچى » تەشكىلاتلار خۇددى ئاسماندىن چۈشكەندەك پەيدا بولدى ۋە يەر جاھاننى ئاستىن – ئۈستىن قىلىپ ، پۈتۈن سەپلەر بويىچە شىددەتلىك ھۇجۇمغا ئۆتتى . بۇلار ئىلگىرىلەپ ھەر دەرىجىلىك مەسئۇل كادىرلارنى « كاپىتالىزىم يولىغا ماڭغان ھوقۇقدارلار » دەپ بىر – بىرلەپ تارتىپ چىقاردى . ئارقىدىن « پارتكوملارنى توپقا تۇتۇش » باشلاندى . بۇ ھال شۇ چاغدىكى پارتىيىگە ، سوتسىيالىستىك ئۆزگەرتىش ۋە قۇرۇلۇش ئىشىغا ئەقىدە باغلىغان مىليونلىغان كىشىلەرنى گاڭگىرىتىپ قويدى . بۇ « ئىسيانچىلارنىڭ نېمىگە قارشى تۇرۇپ ، نېمىنى ھېمايە قىلىشىنى بىلگىلى بولمىدى . ھەرىكەت بارغانسېرى ئەۋج ئېلىپ ، ھوقۇق تارىۋېلىش يولىغا ماڭدى . ئىلى ئوبلاست دەرىجىلىك ئورگانلار ئىچىدە ئوبلاستلىق سىياسىي كېڭەش « قارا گېزەندىلەر ئۇۋىسى » سانىلىپ ئەڭ دەھشەتلىك پىپەن قىلىندى ، شۇنىڭدەك بۇ ئورۇننىڭ ھوقۇقىنى تارتىۋېلىشنى مۇھىم كۈنتەرتىپكە كىرگۈزدى .
1967 – يىلى 1 – ئاينىڭ 13 – كۈنى بىزنىڭ سىياسىي كېڭەش ۋە سىياسىي مەكتەپتىكى « ئىسيانچىلار » ئەتراپلىق پىلانلىغان بىر چوڭ جەڭنى باشلىۋەتتى : بىرلىكسەپ ساھەسىدىكى « تەسلىمچىلىك » ، « شۇجېڭجيىلىق » نى پىپەن قىلىپ ، « كاپىتالىزىم يولىغا ماڭغان ھوقۇقدارلار»ھوقۇق تارتىۋېلىش مەقسىدىدە جامەئەت پىكرى توپلاش ئۈچۈن ، سىياسىي مەكتەپنىڭ چوڭ يىغىن زالىدا ئىنتايىن ھەيۋەتلىك – سۈرلۈك پىپەن يىغىنى ئۇيۇشتۇرۇلدى .
بۇ يىغىنغا ئوبلاستلىق سىياسىي كېڭەش ۋە سىياسىي مەكتەپتىكى بارلىق كادىرلار ، ئىشچىلار ، سىياسىي كېڭەش ئەزالىرى ۋە بىرلىكسەپ كىشىلىرى ئىلى ئوبلاستلىق پارتكوم بىرلىكسەپ بۆلۈمى ، مىللىي ،دىنىي ئىشلار تارماقلىرىدىكى خادىملار ، شەھەرلىك سىياسىي كېڭەش ، بىرلىكسەپ بۆلۈمىدىكى كادىرلار ، كېڭەش ئەزالىرى ، ئوبلاست دەرىجىلىك چوڭ « ئىسيانچى » تەشكىلاتلارنىڭ بىر قىسىم ۋەكىللىرى قاتناشتۇرۇلدى . بۇ يىغىن شۇ كەمگىچە ئوبلاست دەرىجىلىك ئورگانلاردا ئۆتكۈزۈلگەن كۆلىمى كەڭ ، ھەيۋىسى چوڭ ۋە ئەتراپقا قاتتىق تەسىر كۆرسەتكەن بىر يىغىن بولغاندى .
يىغىندا ئاساسلىقى ئىلى ئوبلاستلىق پارتكومنىڭ بىرلىكسەپتە « تەسلىمچىلىك » ، « شۇجېڭجيىلىق » لۇشيەن يۈرگۈزگەنلىكى ، بۇرژۇئا ئۇنسۇرلار ، گومىنداڭچىلار ، باندىتلار ، پومېشچىكلار ۋە ئىشپيون – جاسۇسلارنى قانات ئاستىغا ئېلىپ سىياسىي كېڭەشنى « قارا ئۇۋا » ، ئېكسپىلاتاتورلارنىڭ پانا جايى » قىلىۋەتكەنلىكىنى « نەق پاكىتلار » ئارقىلىق ئىسپاتلاپ بەرمەكچى ئىدى . شۇڭلاشقا ئۇلار ئوبلاستلىق پارتكوم بىرلىكسەپ بۆلۈمىنىڭ باشلىقى ( ئوبلاستلىق سىياسىي كېڭەشنىڭ قوشۇمچە مۇئاۋىن رەئىسى ۋە باش كاتىپى ) چېن شىخۇئا ، سىياسىي كېڭەشنىڭ تۇراقلىق مۇئاۋىن رەئىسى ئابدۇرېھىم ھەسەنوپلارنى سەھنىگە سۆرەپ چىقىپ ، بېشىنى ئېگىپ تۇرغۇزدى . ئۇلاردىن تۆۋەنرەك يەرگە شېرزىمان ، سانجىندوڭ ( گومىنداڭنىڭ سابىق گېنېرال دەرىجىلىك ئەمەلدارى ) قاتارلىق بىرنەچچە كىشى قاتار تىزىپ تۇرغۇزۇلدى . باشلىرىغا ئۇزۇن قەغەز قالپاقلار كىيگۈزۈلدى .
يىغىن زالى شۇ چاغدىكى ئېقىم بويىچە ئىنتايىن سۈرلۈك تۈس ئالغاندى . « بىرلىكسەپتىكى تەسلىمچىلىك ، شۇجېڭجيىلىق لۇشيەنىنى ئۈزۈل – كېسىل پىپەن قىلايلى ! » ، « ئوبلاستىمىزدىكى تەسلىمچىلىك لۇشيەنىنىڭ باش ئاتامانى چېن شىخۇئانى پىپەن قىلىپ سېسىتايلى ! » ، سىياسىي كېڭەشكە ، بىرلىكسەپ ئىچىگە يوشۇرىنىۋالغان باندىتلار ، گومىنداڭچىلار ، پومېشچىكلار ، ئىشپىيون – جاسۇسلارنى تارتىپ چىقىرايلى ! » ، « .... چېن شىخۇئادىن ھېساب ئالايلى ! » دېگەنگە ئوخشاش پىلاكات ، لوزۇنكىلار پۈتۈن يىغىن مەيدانىنى ، ھەتتا سىياسىي مەكتەپ قوراسىنىڭ تاملىرىنىمۇ قاپلاپ كەتكەن . قىزىل بەلگە تاقىغان « ئىسيانچىلار » ھەممىنى يەر بىلەن يەكسان قىلىۋەتكۈدەك ھەيۋە بىلەن ئارقا – ئارقىدىن توختىماي شوئار توۋلاپ تۇراتتى .
يىغىندا يىغىن رىياسەتچىسى - « يۈيگوڭ جەڭگىۋار دۈيى » نىڭ باشلىقى ليۇ پوۋاڭ ئىلىدىكى كاپىتالىزىم يولىغا ماڭغان ھوقۇقدار ۋە ئۇلارنىڭ « تەسلىمچىلىك » ، « شۇجېڭجيىلىق » لۇشيەن يۈرگۈزگەن « جىنايى قىلمىشلىرى » ئۈستىدە تەپسىلى سۆزلەپ ئۆتتى . ئارقىدىن ۋاڭ يوڭخۇئا قاتارلىق بىرقانچە كىشىلەر غەزەپ بىلەن پىپەن قىلدى . ......
ئۇلار ھەر بىر مۇھىم نۇقتىلىق مەسىلىدە چېن شىخۇئاغا سوئال قويۇپ ۋە بەرگەن ئېنىق جاۋابلىرىغا دەرھال قاتتىق رەددىيە بېرەتتى . شوئارلار توۋلايتتى . چېن شىخۇئادىن « ...... مىڭلىغان بىگۇناھ خەلقنى بۇلاڭ – تالاڭ قىلىپ ۋەيران قىلغان پارتىيە ، خەلق بىلەن قوراللىق دۈشمەنلىشىپ كەلگەن چوڭ باندىت شېرزىماننى قانات ئاستىغا ئېلىپ ، ئوبلاستلىق سىياسىي كېڭەشكە مۇھىم خىزمەتكە قويۇپ ، ئەتىۋارلاپ ئىشلەتتىڭ ۋە ئۆزگىرىش ئىپادىسى ياخشى ، زور دەرىجىدە ئالغا باستى ، پارتىيەگە ئەگىشىپ سوتىسيالىزىم يولىغا مېڭىشنى خالايدۇ ، دەپ ئوچۇقتىن – ئوچۇق كۆككە كۆتۈرۈپ ماختاپ كەلدىڭ . بۇ قانداق مەيدان ؟ سەن باندىتلار ، گومىنداڭچىلار ، ئىشپيونلارغا باش پاناھ بولۇپ ، شۇلار ئۈچۈن سۆزلىگەنلىكىڭ ئەمەسمۇ ؟! » دەپ سوراققا تارتقاندا ، چېن شېخۇائا : « شېرزىماننى مەن ياكى ئوبلاستلىق پارتكوم يۆتكەپ كەلگەن ئەمەس ، بەلكى ئاپتونوم رايونلۇق خەلق ھۆكۈمەت ئالتاي ۋالى مەھكىمە دېھقانچىلىق ، چارۋىچىلىق بۆلۈمىدىن يۆتكەپ ، ئىلى ئوبلاستلىق سىياسىي كېڭەش ئىشخانىسىنىڭ مۇئاۋىن مۇدىرلىكىگە تەيىنلىگەن . مېنىڭ بىلىشىمچە . مېنىڭ بىلىشىمچە ، بۇ شۇ چاغدىكى ئالتاي ۋەزىيىتىنىڭ مۇقىملىقىنى ساقلاش ، شېرزىمان ئۆزىگە ۋە ئومۇمىي ۋەزىيەتكە پايدىلىق بولۇش كۆزدە تۇتۇلغان ..... ئىلى ئوبلاستلىق سىياسىي كېڭەشكە كەلگەندىن كېيىن ، بىز يۇقۇرىنىڭ تاپشۇرۇقى ۋە بەلگىلىمىسى بويىچە ئورۇنلاشتۇرۇپ مۇئامىلە قىلدۇق ..... شېرزىمان ئىلىغا كەلگەندىن كېيىنكى ئۆگىنىش ، ئۆزگىرىش ئىپادىلىرى بىر قەدەر ياخشى ئىدى... » دەپ جاۋاپ بەرگەندى .
شۇ يىغىندا شېرزىمانمۇ سوراققا تارتىلدى . شېرزىمان ھېچ ئالاقزادە بولماي تۇراتتى . بېشىغا قەغىز قالپاق كىيدۈرگەندە قاتتىق نارازىلىق قىلغان بولسىمۇ ، ئىسيانچىلار زورلۇق بىلەن كىيگۈزدى . « ئىسيانچىلار » قويغان سوراققا شېرزىمان مۇنداق دەپ جاۋاپ بەردى : « مېنىڭ ئۆتمۈشتە ئۆتكۈزگەن جىنايى قىلمىشلىرىم ناھايىتى كۆپ ... بۇ قىلمىشلىرىم پارتىيىگە ، ھۆكۈمەتكە پۈتۈن خەلققە ئايان پاكىت . لېكىن پارتىيە توغرا سىياسەت قوللىنىپ ، جىنايەت يولىدىن قايتىپ خەلق تەرەپكە ئۆتۈشكە نەسىھەت قىلدى . ئۆتمۈش گۈناھلىرىمنى سۈرۈشتە قىلمايدىغانلىقىنى ، خاتالىقنى تۈزۈتۈپ ياخشى ئادەم بولۇشۇمغا پۇرسەت بېرىدىغانلىقىنى ، ھەتتا ماڭا ۋە مېنى ئەگەشكەن ھەمراھلىرىمنىڭ ھېچ قايسىسىغا قانۇنىي جازا بەرمەي ، بەلكى مۇۋاپىق خىزمەت ۋە تۇرمۇش شارائىتى بېرىشكە ۋەدە قىلدى . شۇنىڭ بىلەن مەن پارتىيە ھۆكۈمەتنىڭ ۋەدىسىگە ئىشىنىپ ، كېلىشىمگە ئىمزا قويۇپ ، قورال تاپشۇرۇپ ، ھەمراھلىرىمنى باشلاپ خەلق تەرەپكە ئۆتكەنىدىم . كومپارتىيە ھەقىقەتەن قىلغان ۋەدىسى بويىچە ئىش قىلدى . مېنى ھۆكۈمەت خىزمىتىگە ئورۇنلاشتۇرۇپ مائاش بەردى . ئۆگىنىش ، ئۆزگىرىش پۇرسىتى بەردى . ماڭا ئەگەشكەن چارۋىچىلارنى ئۆز يۇرت – ماكانلىرىغا ئورۇنلاشتۇرۇپ مال – چارۋە بېرىپ تىرىكچىلىك قىلىش شارائىتى ھازىرلاپ بەردى .
مەن ئاپتونوم رايونلۇق ھۆكۈمەتنىڭ ئورۇنلاشتۇرۇشىغا ئىتائەت قىلىپ ، ئالتايدىن ئىلى ئوبلاستلىق سىياسىي كېڭەشكە كەلدىم . ...
بۇ يەردە دائىملىق ئۆگىنىشلەرگە ۋە باشقا ئىجتىمائىي پائالىيەتلەرگە بىۋاستە قاتنىشىش ئارقىلىق ، پارتىيەنىڭ سىياسەتلىرىنى كۈندىن – كۈنگە چوڭقۇر چۈشەندىم . ئىستىقبالغا قارىتا ئىشەنچىم تېخىمۇ كۈچەيدى . گۇمان – ئەندىشىلەرنى چىقىرىپ تاشلاپ پارتىيە كۆرسەتكەن يولغا تەۋرەنمەي ماڭدىم . شۇڭلاشقا پارتىيەنىڭ ماڭا قوللانغان سىياسىتىنى مەن خاتا دەپ ئېيتالمايمەن . بۇ يەردە شۇنى ئوچۇق ئېيتىمەنكى ، ئەگەر پارتىيە بۈگۈن مېنى جىنايىتىڭ ئۈچۈن جازاليمىز دېسىمۇ مەن ئۇنىڭغا رازى . مەن تەسلىم بولۇپ ئۆتكەندىن تارتىپ ھازىرغىچە پارتىيىگە ، سوتىسيالىزمغا قارشى سۆز ھەرىكەتلەردە بولمىدىم . ئۇنداق قىلىش نىيىتىممۇ يوق ....... باشقا سەۋەنلىكلىرىم بولسا تۈزىتىشنى خالايمەن . .. » دەپ جاۋاپ بەردى . تەرەپ – تەرەپتىن توۋلىغان شوئارلار شېرزىماننىڭ سۆزىنى نەچچە قېتىم ئۈزىۋەتتى .
چېن شىخۇئا ، ھەسەنوپلارنىڭ « جىنايىتى » دەپ قويۇلغان مەسىلىلەر ئاساسلىقى بىرلىكسەپ سىياسىتىگە تاقىلىدىغان مەسىلىلەر بولغاچقا ، بۇ يىغىننىڭ كەيپىياتى ، يىغىنغا قاتناشتۇرۇلغان كېڭەش ئەزالىرى بىلەن بىرلىكسەپ كىشىلىرىنى قاتتىق چۆچۈتىۋەتتى . چوڭقۇر تەشۋىشكە سېلىپ قويدى . يىغىن ئاخىرلىشاي دېگەندە « ئىسيانچىلار » ھۇررا – چۇقان كۆتۈرۈپ ، شېرزىماننى ج خ ئورگىنىغا تاپشۇرۇپ بېرىش ھەققىدە قارار ماقۇللىدى . ۋە يىغىن ئاخىرلىشىش بىلەنلا شېرزىماننى يىغىن زالىدىن ئېلىپ چىقىپ غۇلجا شەھەرلىك ج خ ئىدارىسىگە ئېلىپ باردى . بىراق شەھەرلىك ج خ ئىدارىسىدىكى ئالاقىدار كىشىلەر : « بىز ئوبلاستلىق ئورگانلارنىڭ كىشىلىرىنى قوبۇل قىلالمايمىز » دەپ ئالغىلى ئۇنىمىدى . « ئىسيانچىلار » ھەرقانچە داۋلى سۆزلەپمۇ ماقۇل كەلتۈرەلمىدى . كەچ بولدى . ئاخىرى ئامال بولمىغاندا ، شۇ كېچىسى شېرزىماننى « تۇتۇپ تۇرۇش» قا ئەتىسى ئۆزلىرى كېلىپ ئېلىپ كېتىشكە كېلىشىپ شېرزىماننى تاشلاپ بېرىپ قايتتى .
1967 – يىلى 1 – ئاينىڭ 14 – كۈنى « ئىسيانچىلار » ئوبلاستلىق ج خ ئىدارىسىگە بېرىپ شېرزىماننى قولغا ئېلىشنى تەلەپ قىلدى . بۇ چاغدا ئوبلاستلىق پارتكوم سىياسىي قانۇن كومېتىتىنىڭ شۇجىسى ، قوشۇمچە ئوبلاستلىق ج خ ئىدارىسىنىڭ باشلىقى خۇ جۈيجاڭ ئىدارىدە يوق ئىكەن . باشقا مەسئۇل كىشىلەر : « بىرىنچىدىن ، نەق جىنايەت پاكىتى بولمىسا قولغا ئېلىشقا بولمايدۇ . ئىككىنچىدىن ، خو جۈيجاڭ شۇجى تەستىقلىمىسە بىز قولغا ئالالمايمىز . سىزلەر ئوبلاستلىق پارتكوم شۇجىلىرغا تەستىقلىتىپ كېلىڭلار » دەپ قايتۇردى . بۇ ھال ئويلىمىغان يەردىن « ئىسيانچىلار » نى ناھايىتى پاسسىپ ھالغا چۈشۈرۈپ قويدى . كۆپ تاكاللىشىپ ، داۋلى سۆزلەپ كۆرگەن بىلەنمۇ بولمىدى . ئاندىن ئۇلار قايتىپ كېلىپ مۇزاكىرە قىلدى . « ئىسيانچىلار » نىڭ باشلىقلىرى ۋە بىرقانچە ئەزالىرى ئوبلاستلىق پارتكومغا بېرىپ جاڭ شىگۇڭنى ئۇياق – بۇياقتىن ئىزدەپ تاپالماي تۇراتتى . جاڭ شىگۇڭ شۇجى ئوبكوم دەرۋازىسىدىن كىرىپ كېلىشىگىلا تۇتۇۋالدى . ( جاڭ شۇجى باشقا « ئىسيانچىلار » نىڭ مۇنازىرە مەيدانىدىن ئەندىلا قايتىپ كەلگەنىكەن ) . « ئىسيانچىلار » نىڭ باشلىقى ليۇ پوۋاڭ ، ۋاڭ يوڭخۇئالار « شېرزىماننى قولغا ئېلىش توغرىسىدىكى قارار » نى جاڭ شىگۇڭغا تەڭلەپ ئىمزا قويۇشقا قىستىدى . جاڭ شىگۇڭ بولسا شەخسەن ئۆزى قارار قىلالمايدىغانلىقىنى ، كوللېكتىپ مۇزاكىرە قويۇپ جاۋاپ بېرىدىغانلىقىنى ئېيتتى . بۇ ئارىلىقتا قىزىل بەلگە تاقىغان « ئىسيانچىلار » تەرەپ – تەرەپتىن كېلىپ كۆپىيىپ جاڭ شىگۇڭنى قىمىر قىلدۇرماي ئارىغا ئېلىۋالدى . جاڭ شىگۇڭ ھېچ ئامال بولمىغاندا ھېلىقى « قارار » نىڭ بۇرجىكىگە « ئوبلاستىلق ج خ ئىدارىىسى ئۆزى ئويلىشىپ بىر تەرەپ قىلسۇن » دەپ ئىمزا قويۇپ بەردى ( بۇ چاغدا ئوبكومنىڭ رەھبەرلىكى تازا يۈرۈشمەيدىغان ، يېرىم پالەچ ھالەتكە چۈشۈپ قالغاندى . جاڭ شىگۇڭ ئوخشاش رەھبەرلەرنى « ئىسيانچىلار » ھەرتەرەپكە سۆرەپ ئارام بەرمەيدىغان بولۇپ قالغاندى ) . مۇشۇ « تەستىق » نى ئالغاندىن كېيىن « ئىسيانچىلار » شەھەرلىك ج خ ئىدارىسىدىن شېرزىماننى ئېلىپ ئوبلاستلىق ج خ ئىدارىسىگە ئېلىپ باردى . ئۇلار جاڭ شىگۇڭنىڭ تەستىقىنى كۆرۈپ ، شۇنىڭدەك شېرزىماننىڭ ئەسلىدە چوڭ باندىت ئىكەنلىكىنى ھېسابقا ئېلىپ ئېھتىيات ئۈچۈن « توختىتىپ تۇرۇش » قا قوبۇل قىلىپ ئالدى .
دېمەك ، شېرزىمان 1967 – يىلى 1 – ئاينىڭ 14 – كۈنى چۈشتىن كېيىن ئوبلاستلىق ج خ ئىدارىسىگە زومۇ زور تاپشۇرپ بېرىلدى . يۇقۇرىدا بايان قىلىنغان ئەھۋاللاردىن بىز شېرزىمان ھەقىقەتكە قايتقاندىن كېيىن بولۇپمۇ مەدەنىيەت ئىنقىلابىنىڭ ئالدى كەينىلىرىدە نەق جىنايەت ئۆتكۈزۈپ ، قانۇن تەرتىپى بويىچە تۈرمىگە ئېلىنغان ئەمەس بەلكى « ئىسيانچىلار » نىڭ شۇ چاغدىكى ئەشەددى سولچىل ھەرىكەتلىرى ۋە ھوقۇقنى ئۆز چاڭگىلىغا ئېلىش ئېھتىياجلىرى تۈپەيلىدىن تۈرمىگە تاشلانغانلىقىنى روشەن كۆرۈۋالالايمىز .
شېرزىماننى ج خ ئىدارىىسىگە تاپشۇرۇپ بېرىۋەتكەندىن كېيىن « ئىسيانچىلار » ئوبلاستلىق پارتكومنى « تەسلىمچىلىك » ، شىجېڭجۇيىلىق » لۇشيەنى يۇرگۈزگەن ، دەپ ئەيبلەشكە چوڭ ئاساس دەسمايە قىلدى .
مەن ئۆز ئورگىنىمىزدىكى « ئىسيانچىلار » دىن ۋە شېرزىماننىڭ جەسىدىنى ئالغىلى بارغاندا ، ئوبلاستلىق ج خ ئىدارسىنىڭ تۈرمە خادىمىدىن ئىگىلىگەن ئەھۋالغا قارىغاندا ، شېرزىمانغا دەسلەپتە « ۋاقتىنچە تۇتۇپ تۇرۇش قاتارىدا مۇئامىلە قىلغان . رەسمى سوراق قىلىنمىغان . ئەمما شېرزىمان ج خ ئىدارىسىدە تۇتۇپ تۇرۇلغانلىقىنى ناھەق دەپ قاراپ ، مەسىلىسىنى دەرھال ئېنىقلاپ ئوچۇق بىر تەرەپ قىلىپ بېرىشنى كۆپ قېتىم تەلەپ قىلغانىكەن . شۇنداقلا « ئىسيانچىلار » مۇ شېرزىماننى تۈرمىگە تاشلىۋەتكەندىن كېيىن شېرزىمان توغرىسىدا ھېچقانداق يېڭى جىنايەت پاكىتلىق ماتىرىيال تېپىپ بېرەلمىگەن . كېيىنچە ( 1968 – يىلنىڭ ئاخىرى 1969 – يىلنىڭ ئوتتۇرىلىرىدا ) ئالتايدىكى « ئىسيانچىلار » ئالتايدا « پاش قىلىنغان باندىتلىق ھەرىكەتلەر » نىڭ شېرزىمانغا مۇناسىۋىتى ھەققىدە بەرگەن مەلۇماتى ( بۇنى ئېنىقلاش ئۈچۈن ئوبلاستلىق ج خ ئىدارىسى ھەربىي باشقۇرۇش كومىتېتى ئالتايغا تېلېگرامما ئەۋەتكەنىكەن ) شېرزىماننى ئىككى – ئۈچ نۆۋەت سوراق قىلغان . شېرزىمان قويۇلغان مەسىلىلەرنى تۆھمەت دەپ قاراپ رەت قىلغان . شۇ چاغدىكى كۈندىن كۈنگە كەسكىنلىشىپ كەتكەن سول لۇشيەن تۈپەيلىدىن ج خ ئىدارىسى شېرزىمانغا قاتتىق مۇئامىلە قىلغان . شېرزىمان بۇ مۇئامىلىگە تېخىمۇ نارازى بولغان . پارتىيە سىياسىتىنىڭ مۇنداق ئۆزگىرىپ كېتىشىگە ئىشەنمىگەن . بولۇپمۇ تۈرمىگە كىرگەندىن كېيىن تاكى ئالەمدىن ئۆتكىچە بالا – چاقىلىرى بىلەن بىر قېتىممۇ كۆرۈشتۇرمىگەنلىكىگە قاتتىق ھەسرەت چېكىپ ئارماندا كەتكەن .
Posted: 2007-11-24 20:20 |
[ئاپتور]
niyazdixan
دەرىجىسى :
كۇلۇب باشلىقى
نادىر يازمىلار :
يوللىغان تېما :
شۆھرىتى:
0 نومۇر
پۇلى:
سوم
تۆھپىسى:
نومۇر
توردىكى ۋاقتى : 0(سائەت)
تىزىملاتقان ۋاقتى : 2007-01-22
ئاخىرقى كىرگىنى : 1970-01-01
كىچىك
نورمال
چوڭ
شېرزىماننىڭ ئۆلۈشى ۋە دەپن قىلىنىش ئەھۋالى
شېرزىمان 1967 – يىلى 1 – ئاينىڭ 14 – كۈنى چۈشتىن كېيىن ئوبلاستلىق ج خ ئىدارىسىنىڭ تۈرمىسىگە كىرىپ ، ئۈچ يىل ئۈچ ئاي ياتقاندىن كېيىن ، 1970 – يىلى 4 – ئاينىڭ 30 – كۈنى كەچتە ئالەمدىن ئۆتتى . بۇ شېرزىماننىڭ مۆچەل يىلى بولۇپ 51 ياشقا چىققانىكەن .
1970 – يىلى 5 – ئاينىڭ 1 – كۈنى ئەتىگەندە ئىدارىگە كېلىشىمگىلا ( بۇ چاغدا رىجىم ئاستىدا تۇرغاچقا دەم ئالماي ئىشلەيتتىم ) « ئىسيانچىلار » دىن بىرسى : « سېنى باشلىق چاقىرىدۇ » دەپ مېنى باشلاپ ئىشخانىغا ئېلىپ كىردى . ئىشخانىدا باشلىقلاردىن ليۇ پوۋاڭ ، شامەشرەپ ، ئوسمانجان قاتارلىق تۆت كىشى بار ئىكەن ( بۇلار 1967 – يىلى 4 – ئاينىڭ 22 – كۈنى سىياسىي كېڭەشنى ئەمەلدىن قالدۇرۇپ ، سىياسىي مەكتەپ ھېسابىدا پۈتۈن ھوقۇقنى تارتىۋېلىپ « ھوقۇق تارتىۋېلىش كومىتېتى » قۇرغان ۋە مەخسۇس « ھوقۇق تارتىۋېلىش كومىتېتى » نىڭ تامغىسىنى ئويدۇرۇپ ئىشلەتكەن . بۇ رەھبەرلىك « بەنزە » نى كىم ، قايسى ئورۇن تەستىقلىگەنلىكى نامەلۇم ) . ئۇلار : « شېرزىمان تۈنۈگۈن كەچ تۈرمىدە ئۆلۈپتۇ ، بىزگە تېلېفوندا ئۇقتۇردى . سەن مۇھەممەت كامال ئىككىڭلار ئوبلاستلىق ج خ ئىدارىسى تۇرمىسىگە بېرىپ ، شېرزىماننىڭ جەسىدىنى ئەپچىقىپ ئائىلىسىگە تاپشۇرۇپ بېرىڭلار » دەپ بۇيرۇدى .
مەن سەل ئارىسالدى بولۇپ تۇرۇپ قالدىمدە ، ئاندىن : « سىزلەردىن بىرەر مەسئۇل كىشى بېرىپ جەسەتنى تاپشۇرۇپ ئېلىش رەسمىيەتلىرىنى بېجىرمىسەڭلار ، مېنىڭ بۇ رەسمىيەتنى بېجىرىشكە سالاھىيىتىم توغرا كەلمەس ..» دېدىم . شامەشرەپ « ئىنقىلابى ئاممىدىن ئادەم ئەۋەتمەيمىز ، سىزلەر بارساڭلار بولدى ... » دەپ گەپنى ئۈزىۋەتتى .
بۇ چاغلاردا ئورگىنىمىزدا « ئىسيانچىلار » تارتىپ چىقىرىپ نەزەربەنت قىلغان ۋە ئاممىۋى دېكتاتۇرا ئاستىدا ئىشلەيدىغان « قارا گېزەندىلەردىن ساجىندوڭ ، گوكۇڭلىن ، ئابابەكرى ئەلىيوپ ، رەخىمجان سابىر ھاجىيوۋ ، مۇھەممەت ئىمىن كېرىموۋ ، ھاجى قارى قاتارلىق خېلى كۆپ كىشىلەر بار ئىدى . لېكىن ئۇلارنىڭ ئىچىدە « يەرلىك مىللەتچى » قالپىقى بار ، ھەر ئىككى پەيدىكى « ئىسيانچىلار » ئورتاق دۈشمەن دەپ قارايدىغان ۋە « مەدەنىيەت ئىنقىلابى » باشلىنىش بىلەنلا خىزمەتتىن توختىتىپ رىجىمگە ئېلىنغان « سىنىپىي دۈشمەن » مۇھەممەت كامال مەخسۇم ئىككىمىز ئىدۇق . مۇھەممەت كامال ماخودا ئات باقاتتى . مەن ھارۋىكەش – خاڭدىن كۆمۈر توشۇيتتىم .
« ئىسيانچىلار » ج خ ئىدارىسىنىڭ ئۇقتۇرۇشىنى ئاڭلىغاندىن كېيىن ئەتراپلىق مۇزاكىرە قىلىپ ، شېرزىماندەك « چوڭ باندىت » نىڭ جەسىدىگە يېقىن يولاشنى ئۆزلىرىنىڭ ئىنقىلابىي شەنىگە مۇناسىپ كۆرمەي « سىنىپىي دۇشمەننىڭ جەسىدىنى سىنىپىي دۈشمەنلەر كۆتۈرۈپ چىقسۇن » دەپ سىنىپىي چېگرىنى قەتئىي ئايرىغانلىقتىن ، بۇ ئىشقا بىزنى بۇيرىغانكەن . مەن ئۇلارنىڭ غەرىزىنى چۈشەنگەندىن كېيىن ، « ئەڭ بولمغاندا ھوقۇق تارتىۋېلىش كومىتېتى نامىدا تۈرمىگە قارىتىپ بىر پارچە ئالاقە يېزىپ بېرىڭلار .. دېدىم . ئۇلار : « ج خ ئىدارە تۈرمىسىگە : شېرزىماننىڭ جەسىدىنى ئېلىپ كېلىشكە زەيناۋۇدۇن يۈسۈپنى ئەۋەتتۇق . ۋاقىپ بولۇپ تاپشۇرۇپ بېرەرسىزلەر » دەپ يېزىپ تامغا بېسىپ بەردى .
مەن بۇيرۇقنى ئالغانىدىن كېيىن ئەتىگەن سائەت سەككىز يېرىمدا ماخوغا چىقىپ ، مۇھەممەت كامال مەخسۇمگە شېرزىماننىڭ تۈرمىدە ئۆلگەنلىكىنى ۋە ئۇنىڭ جەسىدىنى تۈرمىدىن ئېلىپ چىقىپ ئائىلىسىگە تاپشۇرۇپ بېرىش ۋەزىپىسى ئىككىمىزگە تاپشۇرۇلغانلىقىنى ئۇقتۇردۇم – دە ، دەرھال ھارۋىنى قوشتۇم . ماخودىن بىر دانە بورا ، بىر پارچە كىگىز ئېلىپ ھارۋىغا سالدۇق – تە تۈرمىگە ماڭدۇق . يولدا كېتىۋېتىپ ئەرلى ئاخۇننى تېپىپ ( ئەرلى ئاخۇن ئوبلاستلىق سىياسىي كېڭەش دائىمىي كومېتىتېنىڭ كېڭەشتە تۇرۇشلۇق ئەزاسى ، ئىلىدىكى چوڭ ئۆلىما ، شېرزىمان ئىككىسى بىر قورادا ئىدى ) ئۇ كىشىگە : « شېرزىمان تۈرمىدە ئۆلۈپتۇ . جەسىدىنى ئېلىپ چىقىشنى ماڭا تاپشۇردى . شۇ يەرگە ماڭدۇق . شېرزىماننىڭ بالىلىرى كىچىك ، ئىگە بولغىدەك ئۇرۇق تۇغقانلىرى يوق . ئۇنى دەپن قىلىشقا ئىدارىدىن ھېچكىم قاتناشمايدۇ ، بىزگە قالدى . شۇڭا ئائىلىسىگە خەۋەر قىلىپ قويۇپ ، گۆر قېزىش ۋە دەپن قىلىش ئىشلىرىنى مەھەللىدىكى مەزىن ۋە بىرقانچە چوڭلار بىلەن مەسلىھەتلىشىپ ئورۇنلاشتۇرۇپ تۇرسىڭىز . بۈگۈنلا دەپنە قىلىۋېتەيلى » دېدىم . ئەرلى ئاخۇن ئۆيىگە كەتتى . بىز تۈرمىگە ماڭدۇق .
ئوبلاستلىق ج خ ئىدارە تۈرمىسىگە بېرىپ ، تۈرمە ئىشخانىسىدىن بىر خىزمەتچىنى تېپىپ ، قولۇمدىكى ئالاقىنى كۆرسەتتىم . ئۇنى كۆرۈپ : « سىلەر ئوبلاستلىق سىياسىي كېڭەشتىنمۇ ؟ » دەپ سورىدى . « شۇنداق » دېدىم . ئۇ تۈرمە قوراسى ئىچىدىن ئىككى كىشىنى چاقىرىپ ، شېرزىماننىڭ جەسىدىنى ئېلىپ چىقىشنى تاپشۇردى . مەن ھارۋىدىكى كىگىزنى ھېلىقى ئىككى كىشىگە بەردىم . ئۇلار كىرىپ كەتكەندە ، تۈرمە خادىمىدىن ( خەنزۇ ) « شېرزىمان كېسەل بولۇپ ئۆلدىمۇ ؟! » دەپ سورىدىم ( ئادەتتە تۈرمىدە ئېغىر كېسەل بولغان جىنايەتچىلەرنى ئائىلىدە داۋالىنىشقا رۇخسەت قىلاتتى . شېرزىماننى ئۇنداق قىلماپتۇ . سەل گۇمانلاندىم ) . ئۇ : « شېرزىمان تۈرمىدە كۆپ سوراققا تارتىلمىغان . كېيىنكى كۈنلەردە 3 – 4 قېتىم سوراق قىلىنغان . يېتىپ قالغۇدەك كېسەلمۇ بولمىغان . تەكشۈرۈپ بىر تەرەپ قىلىپ بېرىشنى بىرقانچە قېتىم قاتتىق تەلەپ قىلغان .... مۇشۇ بىر – ئىككى ئايدىن بېرى كۆپ سۆز قىلمايدىغان ۋە تاماق يېيىشتىن باش تارتىدىغان ، داۋالىنىشقىمۇ ئۇنىمايدىغان بولۇۋالدى . كۈندىن – كۈنگە ئاجىزلىشىپ كەتتى ... ئاخىرى تۈنۈگۈن كەچتە ئۆلدى » دېدى .
ھېلىقى كىشى شېرزماننى كىيىملىرى بىلەنلا كىگىزگە ئوراپ ئېلىپ چىقتى . ئارقىدىن بىر بوپا ( كىيىم – كېچەكلىرى بولسا كېرەك ) نى ئەچىقىپ ھارۋىغا تاشلىدى . ئېيتقاندەك شېرزىمان ئورۇقلاپ بىر سۆڭەك ، بىر تېرە بولۇپ قاپتۇ . مەن بىلىدىغان ئوتتۇرا بوي ، ئۇيۇل تاشتەك تەمبەل – قاۋۇل ، ئېغىرلىقى 90 كىلودىن ئاشىدىغان شېرزىمان ، بەئەينى 10 – 11 ياشلاردىكى بالىدەك كىچىكلەپ يېنىكلەپ كېتىپتۇ .
جەسەتنى ھارۋا بىلەن سائەت 11 گە يېقىن ئۆيىگە ئېلىپ كەلدۇق . ئەرلى ئاخۇنۇم مەھەللىدىكى 4 – 5 ئاقساقاللارنى چاقىرىپ ، قەبرە كولاشقا 5 – 6 ياش بالىلارنى ئەۋەتىپ ، ئۆزلىرى دەپنە قىلىش ئىشىنى مەسلىھەتلىشىپ ئولتۇرغانكەن .
بۇ چاغلاردا مەسچىتلەر تاقالغان ، دىنىي پائالىيەتلەرگە قاتتىق چەك قويۇلغان ، ھېيت ، جۈمە نامازلىرىنى قەبرىستانلىقلاردا ، يارساي بويلىرىدا يوشۇرۇنچە ئوقۇيتتى . مۇردا نامىزىمۇ قورۇ ئىچىدە ياكى قەبرىستاندا ئوقۇيتتى . مۇنداق تەشۋىشلىك پەيتتە شېرزىماندەك « چوڭ دۈشمەن » نىڭ مۇردا نامىزىنى ئوقۇشقا ئىماملارمۇ ئاسان جۈرئەت قىلالمايتتى . لېكىن تەقدىر شېرزىمان ئۈچۈن كۈتمىگەن بىر پۇرسەتنى ئاتا قىلدى : ئىدارىدىكى « ئىسيانچىلار » شېرزىماننىڭ جەسىدىگە يېقىن يولىمىدى . ئۇنى يەرلەش ئىشى ماڭا ، مۇھەممەت كامال مەخسۇمگە ۋە ئەرلى ئاخۇنغا قالدى . ئۇلاردىن بىرەر كىشى نازارەت قىلىپ تۇرغان بولسا ، شېرزىماننى مۇسۇلمانچىلىق قائىدە – يوسۇنى بىلەن دەپن قىلىش ، بىزگە تۈگىمەس ئاۋارىچىلىقلارنى كەلتۈرەتتى . مۇشۇ شارائىتتىن پايدىلىنىپ بىز ئىشنى ئۆز خالىنىغىنىمىزچە قىلىشقا كېلىشتۇق .
چۈشتىن كېيىن سائەت تۆتلەردە ياشلار گۆرنى كولاپ پۈتكۈزدى . شېرزىماننى مەھەللە ئاقساقاللىرى يۇدى ، كېپەنلىدى . جىنازىغا غېرىب يوپۇقى ( بۇنداق يوپۇق جامائەتتە بر ئىدى ) يېپىپ تاۋۇتقا سېلىپ ياشلار كۆتۈرۈپ ماڭدى . بىز ئون نەچچە كىشى ، شېرزىماننىڭ ئايالى ماپاش ، ئۆگەي ئانىسى دەمىلە ، قىزى موبىنا ، ئوغلى نۇسرەت ، ئاقات ۋە سەمەت ، كەنجە قىزى قارپىيالار بىرلىكتە جىنازىغا ئەگىشىپ خۇمدان مەھەللىنىڭ ساي قۇيۇلىشى – دەريا بويىدىكى قەبرىستانلىققا چىقىپ ، شۇ يەردە جىنازا نامىزى ئوقۇدۇق . ئەرلى ئاخۇن ئىمام بولدى . يەرلەپ دۇئا – تەگبىر ئوقۇپ قايتتۇق . شۇنداق قىلىپ شېرزىمان دۇنيانىڭ پۈتۈن ئاۋارىچىلىقلىرىدىن بىراقلا قۇتۇلدى . ئىلى دەرياسىنىڭ شىمالىي گىرۋىكىدىكى يار بويىدا دەريا شاۋقۇنىنى تىڭشاپ مەڭگۇ ئارام ئېلىپ ياتتى . 1980 – يىلى 10 – ئايدا قەبرىستان يۆتكەلگەندە ، بايانداينىڭ « تېجاڭگو » غولىنىڭ غەربىي يار بويىدىكى يېڭى قەبرىستانلىققا يۆتكەپ دەپن قىلىندى .
شېرزىماننى دەپنە قىلىپ قايتقاندىن كېيىن مەن خاتىرە دەپتىرىمگە « ھەي ئىنسان ! ئۆزەڭنىڭ قاچان قەيەردە ۋە قانداق ھالەتتە ئۆلىدىغانلىقىڭنى شۇنىڭدەك قانداق يوسۇندا ، كىملەرنىڭ قولىدا قارا يەرنىڭ قەھرىگە كىرىشىڭنى ئەسلا بىلەلمەيسەن . شېرزىمان سەن بىر چاغلاردا جاھانغا پاتماي يۈرگەن ، يامان نامىڭ پۇر كەتكەن ئادەم ئىدىڭ . شۇ يامانلىقلىرىڭ ئۈچۈن تۈرمىگە تاشلىنىش ياكى قانۇنىي جازاغا تارتىلىشدىن تەقدىر سېنى ساقلاپ قالغاندى . ساڭا تىرىكچىلىكنىڭ توغرا يولىنى كۆرسەتكەن ۋە سەنمۇ يامان پەيلىڭدىن قايتىپ ، گۇناھىڭغا تۆۋە قىلىپ ئىشەنچ ۋە ئۈمىد بىلەن ئون نەچچە يىلنى ئۆتكۈزدۈڭ . بىراق يەنە شۇ تەقدىر چاقچاق قىلغاندەك ، سېنىڭ جېنىڭنى تۈرمىدە ئۆتكۈزدى ئالدى ۋە سېنى دەپىن قىلىشنى ماڭا تاپشۇردى . بۇ ھەقىقەتەن تەسادىپىي ھادىسە ! سېنى يەرگە قويغىچە رەڭگى روھىڭنى ئاخىرقى قېتىم يەنە بىر كۆردۈم . مۇشۇنداق تەشۋىشلىك . ھەر كىم ئۆز غېمى بىلەن يۈرگەن ۋەزىيەتتە ، ئىلى بويىچە ئاتاقلىق موللا ئەرلى ئاخۇن ( خۇيزۇ ، مايەنمىن ) نامىزىڭغا ئىمام بولۇپ ، ئىلىدا مەشھۇر زات مۇتائالى خەلپەمنىڭ ئوغلى مۇھەممەت كامالى ، مەھەللە ئاقساقللىرى بولۇپ 15 نەپەر مۆتىۋەر جىنازا نامىزىڭنى ئوقۇپ غۇلجا شەھىرىنىڭ ئىلى دەرياسى ياقىسىغا قەبرەڭنى تۇرغۇزدى . بۇ تەقدىر ساڭا ئاخىرىقى قېتىم ئاتا قىلغان ھىممەتتۇر ..... » دەپ يېزىپ قويغانىدىم .
شېرزىمان ئۆلگەندىن كېيىنكى ئىشلار
شېرزىمان دۇنيادىن ئۆتتى . لېكىن ئۇنىڭ بالا – چاقىلىرى شېرزىمانغا چېتىلىپ « ئەكسىلئىنقىلابچىنىڭ ئائىلىسى » دېگەن قارا تىزىمغا ئېلىندى . بىر كۈنى دۆڭمەھەللە ئاساسىي قاتلام كومىتېتىدىن بىر ئەر ، بىر ئايال خادىم سىياسىي مەكتەپكە كېلىپ بىزنىڭ « ھوقۇق تارتىۋېلىش كومىتېتى » مەسئۇللىرىدىن شېرزىمان ئائىلىسىنىڭ ئەھۋالىنى سورىدى . بۇ كىشىلەرنىڭ « ئاھالىلەرنى يېزىغا كۆچۈرۈش » مۇناسىۋىتى بىلەن كەلگەنلىكىنى دەرھال بايقىدىم . چۈنكى ، ئىدارىمىزدىكى ئىشچى – خىزمەتچىلەر بۇ توغرۇلۇق ئاشكارە سۆزلىشىپ يۈرەتتى . باشلىقلارمۇ يېزىغا چۈشۈشكە تېگىشلىك كىشىلەرنىڭ ئىسىملىكىنى ئاللىقاچان تەييارلاپ قويغانىدى . بۇ تىزىمدا مەنمۇ بار ئىدىم .
بۇ ئىككى كىشىگە شامەشرەپ ، ئوسمانجانلار : « شېرزىمان ئائىلىسى ئەكسىلئىنقىلابچى ئائىلە ھېسابلىنىدۇ . مۇنداق ئەكسىيەتچى ئائىلە تەۋەلەر شەھەر نوپۇسىدىن تازىلاپ چىقىرىلىشى كېرەك » دەپ تونۇشتۇرغاندى .
شۇنداق قىلىپ شېرزىمان ئائىلىسى ئەشۇ « ئەكسىلئىنقىلابچى ئائىلە ئائىلە تەۋە » دېگەن قالپاق بىلەن 1970 – يىلى 11 – ئايدا ، مەجبۇرى يوسۇندا يۈك تاقىنى يۈدۈپ توققۇزتارا ناھىيەسىنىڭ موخۇر 1 – گوڭشې 4 – دادۈي 3 – شاۋدۈيگە سۈرگۈن قىلىندى . شېرزىماننىڭ ئايالى ماپاش ، 70 ياشلىق ئۆگەي ئانىسى دەمىلە ، چوڭ قىزى مۇبىنا ، ئوغلى نۇسرەت ، ئاقات ، سامەت ، كەنجە قىزى قارپىيا قاتارلىق ئالدى 14 ياش كەنجىسى تۆت ياشلىق نارسىدە بالىلىرىنى ئەگەشتۈرۈپ ، يېزىدىكى دېھقان چارۋىچىلارنىڭ ياردىمى بىلەن ئون يىل جان بېقىپ ئۆتتى .
پارتىيە 11 – نۆۋەتلىك مەركىزىي كومىتېتى 3 – ئومۇمىي يىغىننىڭ توغرا لۇشيەن ، فاڭجېن ، سىياسەتلىرى پۈتۈن ئېلىمىزگە باھار قۇياشىنى ئېلىپ كەلدى . بۇ قۇياش نۇرى مەرھۇم شېرزىماننىڭ بالا چاقىلىرىغىمۇ ياشاش ئۈمىد ئۇچقۇنى ئاتا قىلدى .
« مەدەنىيەت ئىنقىلابى » دا قارلىلانغانلارنىڭ ناھەق ئەنزىلىرىنى تەكشۈرۈش ، سىياسەتنى ئەمىلىلەشتۈرۈش ئىشى پەيدىن – پەي ئىشلىنىشكە باشلىدى . شۇ قاتاردا 1979 – يىلى 11 – ئاينىڭ 20 – كۈنى شېرزىمان ئەنزىسىگە سىياسەتنى ئەمىلىلەشتۈرۈش توغرىسىدا تەستىقىي ھۆججەت چۈشۈرۈلدى . بۇ ھۆججەتنىڭ تولۇق تېكىستى تۆۋەندىكىچە :
« ج ك پ ئىلى ئوبلاستلىق كومىتېتى بىرلىكسەپ خىزمەت بۆلۈمىنىڭ ھۆججىتى .
ئى ، ئو . پ بىرلىكسەپ (79) No20
شېرزىمانغا سىياسەتنى ئەمىلىلەشتۈرۈش توغرىسىدا تەستىقىي جاۋاب
ئىلى ئوبلاستلىق سىياسىي كېڭەش – سىياسىي مەكتەپ پارتىيە ياچېيكىسىغا :
ياچېيكىڭىزلار 7 – ئاينىڭ 26 – كۈنى يوللىغان « شېرزىمانغا سىياسەتنى ئەمىلىلەشتۈرۈش مەسىلىسى توغرىسىدا دوكلات » كۇيتۇڭدىن ئەۋەتىپ بېرىلدى . ئوبلاستلىق پارتكومنىڭ تەستىقى بويىچە تۆۋەندىكىچە جاۋاب بېرىمىز :
1 . شېرزىمان تەسلىم بولۇپ ئۆتكەن خادىم ، ئىلىغا كەلگەندىن كېيىنكى ئىپادىسى ئىزچىل تۈردە بىر قەدەر ياخشى بولۇپ كەلگەن . پارتىيىنىڭ سىياسىتى بويىچە ، ئۇنىڭ ئۆتمۈش تارىخى سۈرۈشتە قىلىنمايدۇ ، لېكىن مەدەنىيەت ئىنقىلابىدا تۇتۇپ تۇرۇلۇپ ، ئاقىۋەت كېسەل بولۇپ تۈرمىدە ئۆلگەن . ئۇ ، لىنبياۋ ، « تۆت كىشىلىك گۇرۇھ » نىڭ ئەشەددىي سول لۇشيەنىنىڭ زىيانكەشلىكىگە ئۇچراش سەۋەبىدىن ئۆلگەن ھېسابلىنىدۇ .
2 . سىياسىي كېڭەش نامىدا تەزىيە يىغىنى ئۆتكۈزۈپ ئاقلاپ – ئېلان قىلىنىشى كېرەك .
3 . شېرزىمان ۋاپات بولغاندىن كېيىن ، ئۇنىڭ ئائىلىسى « ئەكسىلئىنقىلابچى ئائىلە » دەپ قارىلىنىپ ، توققۇزتارا ناھىيەسىنىڭ 1 – گوڭشې 4 – دادۈيىگە چۈشۈرۈپ ئورۇنلاشتۇرۇلغان . بۇ ، شېرزىمانغا چېتىپ قارىغانلىقتىن بولغان ئىش . شۇڭلاشقا ، ئۇنىڭ پۈتۈن ئائىلىسىدىكىلەرنى غۇلجا شەھىرىگە قايتۇرۇپ كېلىشنى ۋە بالا – چاقىلىرىنىڭ شەھەر نوپۇسى ، ئاشلىق تەمىنلەش مۇناسىۋەتلىرىنى ھەل قىلىپ بېرىشنى بەلگىلىدۇق .
4 . مۇستەقىل تۇرمۇش كۆچۈرۈش ئىقتدارى بولمىغان ئايالى ۋە ياش پەرزەنتلىرىنىڭ ھەر بىرسىگە ئايدا 15 يۈەندىن نەپەقە پۇلى بېرىپ تۇرۇش ، شۇنىڭدەك پەرزەنتلىرىدىن بىرسىنى خىزمەتكە ئورۇنلاشتۇرۇش كېرەك .
5 . مەدەنىيەت ئىنقىلابى ھەرىكىتى داۋامىدا شېرزىماننىڭ ئائىلىسى ئاختۇرۇلغانكەن . ئاختۇرۇپ ئېلىپ كەتكەن مال – مۈلۈكلىرىنىڭ ھەممىسى ئائىلىسىگە قايتۇرۇپ بېرىلىشى كېرەك . يوقۇلۇپ كەتكەنلىرى بولسا مۇمكىن قەدەر ئىزدەپ تېپىش ، ئىزدەپ تېپىلماي قالسا ئائىلىسىگە ئوچۇق ئېيتىپ چۈشەندۈرۈپ قويۇش لازىم .
شېرزىمان ۋە ئۇنىڭ بالا – چاقىلىرى مەدەنىيەت ئىنقىلابى ھەرىكىتى جەريانىدا ، سىياسىي ۋە ئىقتىسادىي جەھەتتىن تارتقان زىيان ئاز ئەمەس . ئۇلارنى غۇلجا شەھىرىگە كۆچۈرۈپ كەلگەن ۋاقتىدا ئائىلىسىنى ياخشىراق ئورۇنلاشتۇرۇش ئۈچۈن 300 يۈەن ياردەم بېرىش كېرەك .
ج ك پ ئىلى ئوبكوم بىرلىكسەپ بۆلۈمى
1979 – يىلى 11 – ئاينىڭ 20 – كۈنى »
مۇشۇ ھۆججەت بويىچە ئون يىلدىن ئارتۇق سۆرەلگەن شېرزىمان ئەنزىسى ، پارتىيىنىڭ قارارى بويىچە ئاقلاندى . لىن بياۋ ، « تۆت كىشىلىك گۇرۇھ » نىڭ ئەشەددى سول لۇشيەنىنىڭ زىيانكەشلىكىگە ئۇچراپ ، « ئېسيانچىلارنىڭ » زوراۋانلىقى بىلەن بىگۇناھ تۈرمىگە تاشلانغان ۋە شۇ تۈرمىدە ئۈچ يىلدىن ئارتۇق يېتىپ ئالەمدىن ئۆتكەن شېرزىماننىڭ پارتىيىدىن كۈتكەن ئۈمىدى ئاخىرى ئەمەلگە ئاشتى . 18 يىل پارتىيە سۆزىنى ئاڭلاپ ، پارتىيىگە ئەگىشىپ ، بىرلىكسەپ قوشۇنىنىڭ لاياقەتلىك ئەزاسى بولۇپ كەلگەن شېرزىمانغا پارتىيە توغرا باھا بەردى . شېرزىمانغا – شېرزىمان بىلەن ئىجتىمائىي مۇناسىۋىتى بولغان نۇرغۇن كىشىلەر ئارىسىدا زور ئىجابىي تەسىر قوزغىدى ، پارتىيىنىڭ ئىناۋىتى كۆتۈرۈلدى .
ئەشۇ ھۆججەت بويىچە شېرزىماننىڭ ئائىلىسى 1980 – يىلى كۈزدە غۇلجا شەھىرىگە ساق – سالامەت كۆچۈپ كەلدى ( ئۆگەي ئانىسى دەمىلە 1975 – يىلى توققۇزتارادا ۋاپات بولدى ) ۋە ئوبلاستلىق سىياسىي كېڭەش ئائىلىكلەر قورۇسىغا ئورۇنلاشتۇرۇلدى . ئاز كۈنلەردىن كېيىن مەخسۇس شتات بېرىلىپ ، ئوغلى نۇسرەت ئوبلاستلىق ئاشلىق ساڭغا ئورۇنلاشتۇرۇلدى ( كېيىن مالىيە مەكتەپ تەرجىمە سىنىپىدا بىلىم ئاشۇرۇپ ئوقۇپ ھازىر ئوبلاستلىق ئاشلىق ئىدارىسىگە تەرجىمان بولدى . . پارتىيىنىڭ بۇ غەمخورلىقىدىن شېرزىماننىڭ بالا – چاقىلىرى چەكسىز مىننەتدار بولدى . تىرىشىپ جەمئىيەتكە ياراملىق ئادەم بولۇشقا بەل باغلىدى . شېرزىماننىڭ ئايالى ماپاش شېرزىماننىڭ يوقلۇقىنى بىلىندۈرمەي ئائىلە باشلىق سۈپىتىدە جان پىدا تۇتۇپ بالىلىرىغا باش پاناھ بولدى . بالىلىرىنى تەربىيىلەپ جەمئىيەتكە قوشتى .
ھازىر شېرزىماننىڭ چوڭ قىزى مۇبىنا ئۈرۈمچى نەسىللىك مال فېرمىسىدا خىزمەتچى .
ئوغلى نۇسرەت ئوبلاستلىق ئاشلىق ئىدارىسىدە تەرجىمان .
ئوغلى ئاقات ئىلى 1 – يۇڭ توقۇمىچىلىق فابرىكىسىدا ئىشچى .
كەنجە ئوغلى سامەت شاڭخەي سىفەن داشۆ تارىخ فاكولتېتىنى پۈتتۈرۈپ كەلدى . ھازىر ئوبلاستلىق تېلېۋىزىيە داشۆسىدە ئوقۇتقۇچى .
كەنجە قىزى قاربىيا ئىلى گېزىتى ئىدارىسىدە ئىشچى بولۇپ ئىشلەيدۇ .
1992 – يىلى ، فېۋرال ، غۇلجا
مەنبە : ئىلى تارىخ ماتىرىياللىرى ، 6 – سان ،
Posted: 2007-11-24 20:44 |
1 -قەۋەت
يازما كۆرۈلۈش خاتىرىسى
سەھىپە كۆرۈلۈش خاتىرىسى
سەھىپە يۆتكىلىش
>> ئۇيغۇرلارنىڭ قەدىمقى زامان تارىخى
|- رىۋايەتلەردىكى تارىخ
|- ئوتتۇرا ئەسىردىكى ئۇيغۇرلار
|- شانلىق مەدەنىيەت دەۋرى
|- كېيىنكى ئوتتۇرا ئەسىردىكى ئۇيغۇرلار
>> ئۇيغۇرلارنىڭ يېقىنقى زامان تارىخى
|- خوجىلار دەۋرىدىكى ئۇيغۇرلار
|- داۋالغۇش ئىچىدىكى ئۇيغۇر جەمىيىتى
>> ئۇيغۇرلارنىڭ ھازىرقى زامان تارىخى
|- ياڭ زېڭشىن، جىن شۇرېن ۋە شېڭ شىسەي
|- ئۈچ ۋىلايەت ئىنقىلابى
|- شانلىق دەۋر
>> ئۇيغۇر مەدەنىيەت تارىخى
|- ئۇيغۇرلاردا دىن
|- ئۇيغۇرلاردا تىل - يېزىق
|- ئۆرپ - ئادەت
|- ھۈنەر - كەسپ
|- ئۇيغۇرلاردا مائارىپ
>> جاھاننامە
|- كونا - يېڭى كىتاپلار
|- دۇنيادىكى ئۇيغۇرشۇناسلار ۋە ئۇيغۇرشۇناسلىق تەتقىق
|- ئۇيغۇرلاردىكى مەشھۇر شەخسلەر
|- قېرىنداش مىللەتلەر
|- جۇڭگو تارىخى
|- دۇنيا تارىخى
>> ئۇنۋېرسال سەھىپە
|- تارىخى فىلىم
|- تارىخى ئاتالغۇلار
|- تاغدىن - باغدىن
|- يادىكارلىقلىرىمىز
|- يەر ــ جاي ناملىرىمىز
|- تەكلىپ - پىكىر
ئورخۇن مۇنبىرى
»
شانلىق دەۋر
Total 0.080353(s) query 4, Time now is:02-15 08:10, Gzip disabled
ICPNo : 新06003667
Powered by
PHPWind
v6.0
Certificate
Code © 2003-07
PHPWind.com
Corporation
Uyghur Version Powered by Sazgur Code © 2007-2008
Yadikar.com
Corporation